1, 2. Kii i ntinde we i gwés Yéhôva Djob?

BAA u ngwés Djob? Ibale u bi mal ti wemede nkikip inyu gwélél Yéhôva Djob, u ga timbhe ni makénd momasôna le “ñ”​—u kôli ki timbhe hala! Di kôli ndigi le di gwés Yéhôva inyule gwéha yés inyu yé i yé ndimbhe i gwéha a bi unda bés. Bibel i ntoñol i jam li lana le: “Bés di ngwés nye, inyule a bôk gwés bés.”​—1 Yôhanes 4:19.

² Yéhôva a ba nu bisu i unda bés gwéha. A ti bés liyééne lilam le hisi. A ntôñ bés i libak li minsôn, a tinak ki bés ngandak mam di gwé ngôñ. (Matéô 5:43-48) Jam li yé ki nseñ, li yé le a ntééda bés i pes mbuu. A bi ti bés Bañga yé, le Bibel. A nkônde ki naña bés i soohe nye ni mbônga le a ga emble masoohe més, a ti ki mbuu mpubi inyu hôla bés. (Tjémbi 65:2; Lukas 11:13) Jam li nloo mana mam momasôna li yé le, a bi ep tik yé man kiki binoñ inyu kobol bés i mok mi béba ni mi nyemb. Kinjee gwéha ikeñi Yéhôva a ñunda bés!​—Añ Yôhanes 3:16; Rôma 5:8.

3. (a) Kii di nlama boñ inyu tééda bésbomede ikété gwéha Djob? (b) Imbe mbadga ikeñi di nlama wan, ni hee ndimbhe yé i nlébna?

³ Yéhôva a gwé ngôñ le di kôs nseñ u gwéha yé i boga ni boga. Ndi, too di nkôs nseñ u, too di nkôs bé wo,  bés bon di nlama pohol. Bañga i Nyambe i mbéhe bés le: “Ni téédaga bébomede ikété gwéha Nyambe . . . ikepam niñ boga.” (Yuda 21) Bibañga bini le “ni téédaga bébomede” bi ñunda le di nlama boñ biliya inyu boñ le gwéha yés inyu Djob i mal bañ. Di nlama unda Djob ni bibôñôl le yak bés di ngwés nye. Jon ini mbadga i mbéda ni le, ‘lelaa me nla unda Djob le me ngwés nye?’ Ndimbhe i nene ikété bibañga bi ñôma Yôhanes le: “Inyule gwéha Nyambe ini, le di tééda matiñ mé, ndi matiñ mé ma ta bé nledek.” (1 Yôhanes 5:3) I yé loñge le di tibil wan ngobol i bibañga bini, inyule di nsômbôl unda Yéhôva ipam limbe likala di ngwés nye.

4, 5. (a) Bibuk bini le “gwéha Djob” bi nkobla le kii? (b) Toñol lelaa gwéha inyu Yéhôva i bi bôdôl o ikété ñem woñ.

⁴ “Gwéha Nyambe”: Kii ñôma Yôhanes a bééna mahoñol i ngéda a bi tila bibañga bini? Bibuk bini bi mpôdôl bé i gwéha Nyambe a gwé inyu yés, ndi i gwéha di gwé inyu Nyambe. Baa u ngi hoñlak i ngéda gwéha inyu Djob i bi bôdôl o ikété ñem woñ?

⁵ Hoñol ki ngéda u bi bôdôl nigil maliga inyu Yéhôva ni bitééne gwé. U bôdôl ki unda le u gwé hémle. U bi pam i nok le to hala kiki u bi gwééna béba, u ban-ga bé ki to maada mo ki mo ni Djob, Yéhôva a bi yoñ bitelbene ni njel Kristô le u kôdôl niñ boga, u kôhna ki libak li peles Adam a bi nimis. (Matéô 20:28; Rôma 5:12, 18) U bi bôdôl nôgda ipam limbe likala sesema Yéhôva a bi boñ i yé ikeñi, le a ep tik yé man inyu wo inyu yés. Hala a bi tihba ñem woñ, u bôdôl nôgda gwéha inyu Djob li li ñunda nya gwéha ikeñi inyu yoñ.​—Añ 1 Yôhanes 4:9, 10.

6. (a) Lelaa mut a nla unda bañga gwéha? (b) Kii gwéha inyu Djob i bi tinde we i boñ?

⁶ I gwéha u bôdôl nôgda inyu Djob, i yé ndigi bibôdle bi bañga gwéha inyu Yéhôva. Gwéha i ta ndigi bé jam ba nôgda; tole hop u nyo. Bañga gwéha inyu Djob i nlel i kal ndigi le: “Me ngwés Yéhôva.” Kiki hémle, bañga gwéha i nene ikété maboñog. (Yakôbô 2:26) Gwéha i nene ngéda di mboñ mam ma nlémél i nwet di ngwés. Jon, ngéda gwéha inyu Yéhôva i bi bôdôl o ikété ñem woñ, hala a bi tinde we i bana ngôñ i niñ kiki Tata woñ nu ngii a ngwés. Baa u yé nsôblaga? Ibale ñ, i gwéha ikeñi i, ni ndéñbe u ntéñbe i gwélél Yéhôva, gwon bi bi tinde we i yoñ ma makidik ma nlôôha nseñ i niñ yoñ. U ti wemede nkikip yak  Yéhôva inyu boñ sômbôl yé, u unda ki hala ngéda u bi kôs sôble. (Añ Rôma 14:7, 8.) Inyu yônôs mbônga u bi bôñôl Yéhôva i mbamba, i mbéda yom ipe ñôma Yôhanes a mpôdôl hanano.

7. Sima ngim matiñ ma Djob, ni lelaa u nla unda le u ntééda mo.

⁷ Yôhanes a ntoñol kii gwéha Nyambe i nkobla: “Di tééda matiñ mé.” Kii i yé matiñ ma Djob? Yéhôva a nti bés libim li mambén ma tôbôtôbô ni njel Bañga yé, le Bibel. Kiki hihéga, a nsôña bilem kiki bo lihiua, ndéñg, bégés bisat, wip ni bitembee. (1 Korintô 5:11; 6:18; 10:14; Efésô 4:28; Kôlôsé 3:9) Litééda matiñ ma Djob li nkobla le di niñ inoñnaga ni matéak ma Bibel inyu loñge ni béba.

8, 9. To ngéda mbén Bibel i mpôdôl bé tôbôtôbô inyu ngim jam, lelaa di nla yi yom i nlémél Yéhôva? Yoñ hihéga inyu toñol jam li.

⁸ Inyu lémél Yéhôva, di nlama ndigi bé nôgôl mambén mé, ndi di nlama yi kii i yé mahoñol mé. Yéhôva a nkéña bé bés ni mambén inyu hiki sii jam i niñ yés hiki kel. Jon ngim mangéda, u nla boma mam le mbén Bibel to yada i pôdôl bé tôbôtôbô. Ha yo ngéda, kii y’a yis bés sômbôl i Yéhôva? Bibel i niiga bés loñge loñge kii i yé mahoñol ma Yéhôva. Mu kiki di nigil Bibel, di mpam i yi i mam Yéhôva a ngwés ni ma a ñoo. (Añ Tjémbi 97:10; Bingéngén 6:16-19) Di mpam i yi maboñog ni mahoñol a ndiihe. Kiki di nkônde nigil i yi bilem gwé ni manjel mé, hala nyen di ga nwas le mahoñol mé mon ma éga bés i ngéda i mpam le di yoñ makidik, ni i bana maboñog malam. Jon, to ngéda mbén Bibel to yada i pôdôl bé tôbôtôbô inyu ngim jam, di nla pam i yi kii i yé ‘sômbôl i Yéhôva.’​—Efésô 5:17.

 ⁹ Kiki hihéga, Bibel i gwé bé mbén i nkal loñge loñge le di béñge bañ bisinima tole biliñge liñge bi ñunda bisañ tole ndéñg. Ndi baa i mbéda toi bés mbén i tôbôtôbô inyu ndôñ mam i? Di nyi lelaa Yéhôva a ntehe mam ma. Bañga yé i nkal loñge le: “[Yéhôva] a ñoo . . . nu a ngwés njôô [bisañ].” (Tjémbi 11:5) I nkal ki le: “Nyambe nyen a’ pémhene . . . bôt ba ndéñg mbagi.” (Lôk Héber 13:4) Ibale di ntibil ôt pék mu bibañga bi Djob bi, di nla yi loñge kii i yé sômbôl i Yéhôva. Jon di mpohol i keñgle bisinima tole biliñge liñge bi ñunda mam Djob a ñoo. Di nyi le hala a nlémél Yéhôva ngéda di nkeñgle bilem bi nyega nkoñ isi unu u ñunda kiki minjôha minlam. *

10, 11. (a) Inyuki di mpohol i bana lem i nôgôl Yéhôva? (b) Umbe ntén manôgla di nti nye?

¹⁰ Kii i yé njom bisu i ntinde bés i tééda matiñ ma Djob? Inyuki di ngwés le hiki kel di niñ inoñnaga ni i jam di nyi le li yé mahoñol ma Djob? Di mboñ bé hala ndigi inyule di nke kokse ngwéé, tole inyule di nkeñgle mandutu ma nkwél bôt ba nyan sômbôl i Yéhôva. (Galatia 6:7) Mahéñha ni hala, di ntehe manôgla més ipañ Yéhôva kiki loñge njel inyu unda nye le di ngwés nye. Kiki man nu a gwé ngôñ le isañ a kônôl nye maséé, hala nyen di gwé ngôñ le Yéhôva a kônôl bés maséé. (Tjémbi 5:13) A yé Tata wés, di ngwés ki nye. Yom ipe i nti bé bés maséé makeñi tole ñem ñwee kiki i yi le di niñil i njel i nlona “konangoo i Yéhôva.”​—Bingéngén 12:2.

¹¹ Jon manôgla més ma ta bé ni minhuñbe; di mbem bé to le Djob a bôñôl ndugi bés mam ilole di  nôgôl nye. * Di mpohol bé mambén, ndi to tep mo. Di nôgôl bé ndigi ngéda hala a nlémél bés. Di ta ndigi bé manôgla ngéda di ntehe le ndutu i ta bé tole ngéda hala a nene bé nledek. Mahéñha ni hala, di “nôgôl ni ñem.” (Rôma 6:17) Di gwé minlélém mi mahoñol kiki ntôp tjémbi nu a tila ikété Bibel le: “M’a nok ki lingoñoo inyu matiñ moñ, mon me ngwés.” (Tjémbi 119:47) Ñ, di ngwés yaga di nôgôl Yéhôva. Di neebe le a kôli ni manôgla més​—a mbat ki le di nôgôl nye ni ñem wés wonsôna, ibabé i bem nsaa wo ki wo. (Ndiimba Mbén 12:32) Sômbôl yés i yé le Yéhôva a pot inyu yés kiki a pot inyu Nôa. Inyu sôgôlsôgôl nunu a bé a tiñi ni Djob, nu a unda ki gwéha inyu Yéhôva ni njel manôgla iloo 50 ma ñwii, Bibel i nkal le: “Ni Nôa a boñ hala; kingéda mam momasôna Nyambe a kal nye, hala nyen a boñ.”​—Bibôdle 6:22.

12. Imbe ngéda manôgla més ma nkônha Yéhôva maséé?

¹² Lelaa Yéhôva a ntehe bés i ngéda di nôgôl nye ni ñem? Bañga yé i nkal le ngéda di mboñ hala di ‘nkônha ñem wé maséé.’ (Bingéngén 27:11) Baa i yé toi mbale le manôgla més ma nkônha Nwet ngiinda yosôna maséé? Ntiik, hala a nkônha nye maséé​—a gwé ki manjom malam i kon maséé! Yéhôva a bi heg bés ni kunde i yoñ makidik. Hala a nkobla le di gwé kunde i pohol mam di mboñ. Di nla pohol i nôgôl Djob, tole i tjél nôgôl nye. (Ndiimba Mbén 30:15, 16, 19, 20) Ngéda di nkit le di nôgôl Yéhôva ni ñem wés wonsôna, ni le ñem u yôni ni gwéha inyu yé won u  ntinde bés i yoñ makidik ma, di nkônha Tata wés nu ngii ngandak maséé. (Bingéngén 11:20) Hala a yé ki i tep bañga njel i niñ.

13, 14. Inyuki di nla kal le ‘matiñ ma Djob ma ta bé nledek,’ himbe hihéga u nla yoñ inyu toñol jam li?

¹³ Ñôma Yôhanes a nsima jam jada li nti bés makénd ngandak inyu matéak ma Yéhôva: “matiñ mé ma ta bé nledek.” I buk i grikia ba nkobol i kaat 1 Yôhanes 5:3 le “nledek” i nkobla le “nyédék.” * Ngobol Bibel ipe i nkal ha homa nu le “matiñ mé ma nyuu bé bés.” (New English Translation) Yéhôva a mbat bé bés le di boñ mam ma nloo bés ngui, tole ma ma nyidil bés. Matiñ mé ma nlel bé i yom bikwéha bi bôt bi nla boñ.

¹⁴ Di nla toñol jam li ni hihéga hini le: Liwanda joñ li yé bôô inyu ke i ndap mondo. A gwé ngandak minkuu le ni nlama begel. Ngim minkuu i nhoi kayéle mut wada a nla begel nwo, ndi mimpe mi nyét kayéle i mbéda bôt iba inyu begel nwo. Ibale liwanda joñ jon li mpohlene we minkuu u nlama begel, baa a ga pohol minkuu a nyi le mi nyét ngandak inyu yoñ? Heni. A ga boñ bé hala, inyule a ngwés bé le u nok njôghe mu kii u mba u noode begel minkuu mi wetama. Nlélém jam inyu Djob li gwéha ni li loñgeñem, a nti bé bés mambén ma ma yé nledek ngandak i yônôs. (Ndiimba Mbén 30:11-14) I niñ nom, a ga bat bé bés le di begel nya nyédék mbegee u.  Yéhôva a nyi bibomb gwés, “inyule a nyi maôñg més; a mbigda le di yé nluñ ték.”​—Tjémbi 103:14.

15. Inyuki di yé nkwoog nkaa le matiñ ma Yéhôva ma nlôôha ba nseñ inyu yés?

¹⁵ Matiñ ma Yéhôva ma nlet bé to bebee; ma nlôôha bane bés nseñ. (Añ Yésaya 48:17.) Jon Môsé a kal nlômbi litén li Lôk Israél le: “Yéhôva a kal bés le di tééda matéñ mana momasôna, i kon Yéhôva Nyambe wés woñi, le di tehe loñge ngéda yosôna, ndi a’ niñis bés kikii i yé i len ini.” (Ndiimba Mbén 6:24) Yak bés di nla ba nkwoog nkaa le ngéda Yéhôva a nti bés matiñ mé, loñge yés yon a nyéñ. Ha inyu hanano ndigi bé, ndi inyu boga ni boga. Hala a nhélés bé bés, inyule Yéhôva nyen a yé Djob li pék yosôna. (Rôma 11:33) Jon, a nyi loñge i yom i nlôôha ba nseñ inyu yés. Yéhôva a yé ki gwéha yomede. (1 Yôhanes 4:8) Gwéha yon i ntinde nye i pot ni i boñ hiki jam. Yon i yé ki hikuu het mambén momasôna a nti bagwélél bé ma niñne.

16. To hala kiki di niñil ikété ñôbak nkoñ isi, di jôhak ki nyuu yés minsôn; inyuki di nla ba bôt ba manôgla?

¹⁶ Hala a nkobla bé le nôgôl Djob li yé jam li ntomb. Di nlama kolba minheña mi ñôbak nkoñ isi unu, u “u niñi isi ane mut mbe.” (1 Yôhanes 5:19) Di nlama ki jôs nyuu yés minsôn, i i ntinde bés i bôk mambén ma Djob. (Rôma 7:21-25) Ndi gwéha yés inyu Djob i nla hôla bés i yémbél. Yéhôva a nsayap bet ba ñunda nye gwéha ni njel manôgla map. I “bet ba nôgôl nye” kiki ñane wap, a nti bo mbuu mpubi wé. (Minson mi baôma 5:32) Mbuu mpubi u won u nhôla bés i num matam malam​—hala wee bilem bilam bi nla hôla bés i niñ niñ i manôgla.​—Galatia 5:22, 23.

17, 18. (a) Kii di ga wan munu kaat ini? (b) Mu kiki di mba di mboñ hala, mambe mam di nlama tééda ikété mahoñol més? (c) Kii di ga kwélél mu pes i noñ?

 ¹⁷ Munu kaat ini, di ga wan matiñ ni matehge ma Yéhôva, ni mam mape ki ma ma nhôla bés i yi sômbôl yé. Mu kiki di ba di wan mo, di nlama tééda ngim mam ikété mahoñol. Jam jada li yé le Yéhôva a nyéksa bé bés i nôgôl mambén ni matiñ mé; manôgla ma nlôl ni ñem mon ma nlémél nye. Jam lipe li yé le Yéhôva a nsômbôl le di bana niñ i i ga lona bés bisai bikeñi i len ini, ni niñ boga i dilo di nlo. Jam li nsôk li yé le di tehe manôgla més ma ñem kiki loñge njel i unda Yéhôva ipam limbe likala di ngwés nye.

¹⁸ Inyu boñ maselna ipôla béba ni loñge, Yéhôva a bi ti bés likébla le kiññem. Ndi inyu boñ le kiññem yés i éga bés ibabé i set, di nlama niiga yo. I pes i noñ ha, i ga toñle bés lelaa di nla boñ hala.