1, 2. Alani aha do umbahen na taronjar rohanta mangkaholongi Jahowa?

TAHAHOLONGI do Debata? Molo nunga tardidi hita gabe sahalak Sitindangi Ni Jahowa, tontu dohononta ma huhaholongi do Debata. Jala ingkon songon i ma nian! Tutu tama do hita mangkaholongi Jahowa. Hinorhon ni holong ni Debata tu hita, mambahen rohanta taronjar mangkaholongi Ibana. Bibel mandok songon on, ”Marroha holong ma hita, ala Ibana jumolo mangkaholongi hita!”​—1 Johannes 4:19.

² Parjolo do Jahowa patuduhon holongNa tu hita. Dilehon do tu hita inganan na uli i ma tano on. Diparade do na porlu di parngoluonta. (Mateus 5:43-48) Na rumingkot muse, disarihon do partondionta. Dilehon do tu hita Bibel. Ditogihon do hita asa martangiang tu Ibana, dipapos do rohanta na tangihononNa tangiangta jala lehononNa tondi parbadia laho mangurupi hita. (Psalmen 65:3; Lukas 11:13) Na rumingkot sian saluhutna, dilehon do anakNa bahen tobusan laho paluahon hita sian dosa dohot hamatean. Balga situtu do holong ni roha ni Debata tu hita!​—Jaha Johannes 3:16; Rom 5:8.

3. (a) Aha do na ingkon taulahon asa boi taramoti dirinta di bagasan holong ni roha ni Debata? (b) Aha do sungkunsungkun na ringkot tarimangi jala didia tadapot alusna?

³  Lomo do roha ni Jahowa, asa mandapot laba salelengna hita sian holongNa. Olo do hita manjangkon holongNa i manang na ndang, hita sandiri do na manontuhon. Hata ni Debata manjujui hita, ”Ramoti hamu ma dirimuna di bagasan holong ni roha ni Debata . . . asa sahat hamu tu hangoluan salelengna.” (Judas 21) Hata na mandok ”ramoti hamu ma dirimuna”, patuduhon ingkon adong do na taulahon jala ingkon tangkas do tapatuduhon na tajangkon holongNa i,  asa tongtong hita di bagasan holong ni roha ni Debata. Alani i, adong sungkunsungkun na ringkot tarimangi: Songon dia do ahu patuduhon holong tu Debata? Alusna boi taida di surat ni apostel Johannes na mandok, ”Ai on do holong ni roha di Debata; molo taradoti patikna. Ndada na dokdok patikna i.” (1 Johannes 5:3) Denggan do molo taboto lapatan ni hata on. Lomo do rohanta patuduhon na holong situtu rohanta tu Debata.

4, 5. (a) Aha do lapatan ni hata na mandok ”holong ni roha di Debata”? (b) Songon dia do mulana hita mangkaholongi Debata?

⁴ Aha do na adong di pingkiran ni apostel Johannes tingki manurathon, ”Holong ni roha di Debata”? Lapatan ni hata on, ndang holong ni Debata tu hita, alai holongta tu Ibana do. Taingot do nandigan mulai tahaholongi Jahowa?

⁵ Taingot ma muse, parjolo sahali taboto hasintongan taringot Jahowa dohot sangkapNa dung i gabe marhaporseaon ma hita. Taboto ma, nang pe naung mardosa hita, dilehon Jahowa do dalan marhite Kristus asa boi hita malua sian dosa jala mandapot hangoluan salelengna. (Mateus 20:28; Rom 5:12, 18) Taargai ma panghongkop ni Jahowa tu hita, dilehon anakNa bahen tobusan tu hita. Alani i, tubu ma holong ni rohanta tu Ibana ala naung dipatuduhon holongNa tu hita.​—Jaha 1 Johannes 4:9, 10.

6. Songon dia do patuduhon holong tu Jahowa jala aha do na ingkon taulahon?

⁶ Holong ni rohanta tu Jahowa ndang holan pangkilalaan sambing, ndang sae holan mandok,  ”Huhaholongi do Jahowa”. Alai, songon haporseaon, holongta tu Jahowa ingkon tarida sian parniulaon. (Jakobus 2:26) Molo tahaholongi sasahalak, tabahen ma aha na pasonangkon rohana. Songon i ma molo tahaholongi Jahowa, ulahononta do lomo ni rohaNa di parngoluonta. Nunga tardidi hamu gabe Sitindangi Ni Jahowa? Molo nunga, tontu alani holongmuna do tu Jahowa, umbahen taronjar rohamu mangulahon i. (Jaha Rom 14:7, 8.) Asa boi tagohi janjinta tu Jahowa, taparrohahon ma muse aha na sinurat ni apostel Johannes.

7. Paboa ma pigapiga patik ni Debata jala songon dia laho mangulahon angka patikNa i?

⁷ Apostel Johannes patorangkon lapatan ni mangkaholongi Debata, i ma molo ”taradoti patikna”. Angka aha do patik ni Debata? Marhite Bibel, dipaboa Jahowa do angka patikNa tu hita. Umpamana, diorai do hita mangulahon parmainanon, mabuk, manomba ganaganaan, manangko dohot margabus. (1 Korint 5:11; 6:18; 10:14; Epesus 4:28; Kolosse 3:9) Mangulahon patik ni Debata lapatanna, ingkon tapahombar do parniulaonta siganup ari tu aturan ni Bibel.

8, 9. Songon dia do asa taboto aha na dihalomohon Jahowa nang pe ndang disurat di Bibel? Bahen ma tudosan.

⁸ Alai, laho pasonangkon roha ni Jahowa ndang holan patik na tarsurat i taulahon. Ndang diatur Jahowa sude aha na ingkon taulahon di parngoluonta siganup ari. Godang do angka situasi na masa di parngoluonta na so disurat di Bibel. Alani i, songon dia do asa taboto laho pasonangkon roha ni Jahowa? Tangkas do dipaboa  di Bibel lomo ni roha dohot pingkiran ni Debata. Molo taparsiajari Bibel, taboto ma lomo ni roha ni Debata dohot na so dihalomohon rohaNa. (Jaha Psalmen 97:10; Poda 6:16-19) Taantusi ma muse parange dohot parniulaon na dihalomohon rohaNa. Molo nunga taboto parange dohot ulaon ni Jahowa, mura ma hita maniru jala mangihuthon Ibana di parngoluonta. Alani i, boi do taboto ”manang dia lomo ni roha ni Tuhan i” di parngoluonta nang pe ndang disurat di Bibel.​—Epesus 5:17.

⁹ Ndang adong disurathon di Bibel na so boi hita manonton film na so hasea manang manonton film kekerasan. Alai, ingkon bahenon ni Debata do patik mangorai hita mangulahon i? Boi do taboto ndang lomo roha ni Jahowa mangida sisongon i. Bibel paboahon tu hita, ”Dihasogohon [Jahowa] do halak siulahon hakejamon.” (Psalmen 11:5, Bibel siganup ari) Dipaboa Bibel do muse, ”Uhumon ni Debata do angka parmainan dohot pangalangkup.” (Heber 13:4) Molo denggan tarimangi hata na tarsurat di Bibel boi do taantusi lomo ni roha ni Debata. Alani i, unang ma tatonton hiburan na dihasogohon Debata. Las do roha ni Jahowa molo tapasiding hiburan na so hasea, na dihalomohon portibi on. *

10, 11. Boasa taoloi Jahowa jala pangoloion na songon dia do tabahen tu Ibana?

¹⁰ Aha do siala na rumingkot umbahen na taoloi patik ni Debata? Boasa ingkon tatiru Debata di parngoluon siganup ari? Ndang holan alani pangkorhon na roa tu parngoluon manang asa malua  sian rimas ni Debata, umbahen na olo hita mangulahon i. (Galatia 6:7) Alai, tabahen ma pangoloionta gabe sada dalan laho patuduhon holong tu Debata. Songon dakdanak, lomo do rohana mambahen las roha ni bapana, songon i ma nang hita tu Jahowa. (Psalmen 5:13) Ala Jahowa do Ama di hita, tahaholongi ma Ibana. Dame ma pangkilalaanta ala nunga taulahon lomo ni rohaNa.​—Poda 12:2.

¹¹ Ndang ala na so tarjua manang mangharingkothon diri umbahen na taoloi Debata. * Taulahon lomo ni roha ni Debata, ndang holan ala lomo rohanta manang ala na mura mangulahon i. Alai, songon na didok di Bibel, ”Gabe pangoloi hamu nuaeng sian nasa rohamuna.” (Rom 6:17) Tatiru ma panurat ni buku Psalmen na mandok, ”Di pangoloion di parentaM jumpang ahu do las ni roha, ai huhaholongi do i.” (Psalmen 119:47, Bibel siganup ari) Lomo rohanta mangoloi Jahowa. Tangkas do taboto, tama do Jahowa oloanta, ala i do na pinangidoNa sian hita. (5 Musa 13:1) Las do rohanta molo didok Jahowa tu hita songon na nidokNa tu si Noak. Ala marsihohot si Noak tu Jahowa, disurat ma taringot ibana di Bibel. Bibel mandok, ”Dung i dibahen si Noak ma sude, songon na tinonahon ni Debata tu ibana, songon i dibahen.”​—1 Musa 6:22.

12. Aha do na porlu taulahon asa las roha ni Jahowa?

¹² Songon dia do pangkilalaan ni Jahowa molo taoloi Ibana sian ias ni rohanta? Bibel paboahon, las ma roha ni Jahowa molo taoloi Ibana. (Poda 27:11) Tutu do  boi las roha ni Jahowa molo taulahon lomo ni rohaNa? Tutu! Dilehon Jahowa do tu hita hak laho manontuhon aha na laho tapillit. Alani i, boi do hita mamillit laho mangoloi Ibana manang ndang. (5 Musa 30:15, 16, 19, 20) Alai, las ma roha ni Jahowa molo tapillit mangoloi Ibana sian ias ni rohanta jala alani holongta tu Ibana. (Poda 11:20) Molo tabahen songon i, nunga tapillit be hangoluan na dumenggan.

13, 14. Boasa boi dohononta ndang dokdok patik ni Debata jala songon dia on tapatudos?

¹³ Dipaboa apostel Johannes tu hita taringot patik ni Jahowa na mambahen dame rohanta, i ma ”ndada na dokdok patikna i”. Hata Junani na diterjemahon ”dokdok” na disurat di 1 Johannes 5:3 lapatanna ”borat”. * Ndang na pagodangku na pinangido ni Jahowa sian hita umbahen na maol taulahon. Ndang na dokdok patikNa i taulahon, nang pe hita jolma na mardosa.

¹⁴ Songon sada tudosan. Adong donganmu na pinda jabu jala godang barangna laho diboan. Adong do na boi diboan sahalak, alai adong na ingkon diboan dua halak. Suruonna do hamu mamboan barang na borat, na so boi tarboan ni sahalak? Tontu ndang suruonna. Ndang lomo rohana hamu gabe marsahit ala mamboan barang na paborathu. Suang songon  i ma Debata, ndang dipangido Ibana hita mangulahon ulaon na so tolap taulahon. (5 Musa 30:11-14) Diboto Jahowa do hagaleonta ala ”diingot do orbuk hita”.​—Psalmen 103:14.

15. Boasa pos rohanta tu angka patik ni Jahowa?

¹⁵ Angka patik ni Jahowa ndang gabe boban tu hita, alai sasintongna parohon laba. (Jaha Jesaya 48:17.) Alani i, didok si Musa tu halak Israel, ’Umbahen ditonahon Jahowa uju i tu hami ulahononnami sude angka uhumon, marhabiaran tu Jahowa, Debatanami, asa marhasonangan hami ganup ari jala tongtong hami pangoluonna, songon na andar sadarion.’ (5 Musa 6:24) Tingki dilehon Jahowa patikNa, pos do rohanta naung diboto Jahowa na marlaba i salelengna tu hita. Jala ingkon songon i ma nian, boasa? Ala Debata Jahowa, Debata na marbisuk. (Rom 11:33) Alani i, diboto do aha na dumenggan tu hita. Ai Debata parholong do Jahowa. (1 Johannes 4:8) Holong do na mangonjar roha ni Debata mangulahon sude ulaonNa. Tarida ma on sian hata dohot ulaonNa tu hita.

16. Nang pe hita mangolu di portibi na jahat on jala ingkon mangalo hagaleonta, boasa hita boi tongtong mangoloi Debata?

¹⁶ Antong mura do laho mangoloi Jahowa? Ndang mura. Alana ”di bagasan hajahaton do nasa portibi on”. (1 Johannes 5:19) Alani i, ingkon girgir do hita mangalo portibi na jahat on. Jala ingkon marsitutu do hita tongtong mangalo hagaleonta na jotjot mambahen hita ndang mangoloi patik ni Debata. (Rom 7:21-25) Alai, boi do tapatuduhon holongta tu Debata. Dipasupasu Jahowa do halak na patuduhon holong dohot pangoloion tu Ibana. Dilehon do tondi parbadia ”tu angka na mangoloi Ibana”. (Ulaon ni Apostel 5:32)  Jala tondi parbadia parohon parbue di parngoluonta, i ma pangalaho na denggan na mangurupi hita asa boi mangoloi Debata.​—Galatia 5:22, 23.

17, 18. (a) Aha do na laho taulas di buku on jala aha do na porlu taingot? (b) Aha ma na laho taulas di pasal na mangihut?

¹⁷ Di buku on, taulas ma angka prinsip, aturan dohot tudutudu ni Jahowa taringot tu lomo ni rohaNa. Huhut mangulahon i, taingot ma Jahowa ndang mamaksa hita mangoloi angka patik dohot prinsipNa. Alai, dihalomohon rohaNa do asa taoloi Ibana sian ias ni rohanta. Ingot ma, lomo do roha ni Jahowa asa denggan parngoluonta saonari jala boi mangolu salelengna di ari na naeng ro. Jala tabahen ma pangoloionta tu Jahowa gabe dalan laho patuduhon holongta tu Ibana.

¹⁸ Dilehon Jahowa do tu hita panggora ni roha asa boi mangurupi hita mamboto na sintong dohot na sala. Alai, ingkon talatik do panggora ni rohanta asa boi manogunogu hita, songon na laho taulas di pasal na mangihut.