1, 2. Jé ja tindi wo na ô nye’e Yéhôva Zambe?

YE WO nye’e Zambe? Nge ô veya womiene ngumba be Yéhôva, wo ye fo’o yalane na ôwé, a nalé a ne mvo’é. Da yiane na bi nye’e Yéhôva. Bia nye’e Yéhôva amu émien a nye’e bia. Ajô te Kalate Zambe a jô na: “Bi anye’e, amu a nga taté nye’e bia.”​—1 Jean 4:19.

² Yéhôva nnye a tatéya liti bia na a nye’e bia. A ve bia si, mbamba vôme ya tabe. A jalé miñyiane miangane ya minsôn. (Matthieu 5:45) Jame da dañ é ne na, a jalé miñyiane miangane ya nsisim. A ve bia Kalate Zambe. Nde fe, a yi na bi ye’elane nye bi to ndi na, a ye vô’ôlô bia a ve bia mbamba nsisime wé na a volô bia. (Besam 65:2; Luc 11:13) Jôme ja dañe mfi é ne na, a nga lôme Mone wé a dañe nye’e na a zu kôté bia abé a awu. Ke Yéhôva a litiya fo’o na a nye’e bia abui!​—Lañe’e Jean 3:16; Beromain 5:8.

3. (a) Asu na bi tabe nye’ane Zambe été, bia yiane bo jé? (b) Beta nsili mbé bi ne sili biabebien, a bi ne yen éyalane ya été vé?

³ Yéhôva a yi na bi tabe nye’ane wé été nnôm éto. Ve da sili na biabebien bi bo jôm éziñ. Kalate Zambe a lebe bia na: “Mi ba’alane miabebien nye’ane Zambe  été, . . . akekui ényiñe ya melu mese.” (Jude 21) Bifia “mi ba’alane miabebien,” bia liti na, asu na bi tabe nye’ane Zambe été, bia yiane bo jôm éziñ. Bia yiane liti a mame bia bo na bia nye’e nye. Nde bi ne sili biabebiene na: ‘Aval avé me ne liti na ma nye’e Zambe?’ Éyalan é ne mejô Zambe a nga tindi nlômane Jean na ô tili: “Jame dina nde e ne nye’ane Zambe, ane bi ba’ale metiñe mé: a metiñe mé me nji bo adit.” (1 Jean 5:3) E ne mfi na bi jeñ atinane ya bifia bite, amu bia kômbô liti Zambe wongane na bia nye’e nye abui.

4, 5. (a) Bifia “nye’ane Zambe” bia liti jé? (b) Kat aval avé nye’ane Yéhôva ô nga taté na wo yaé wo nlem.

⁴ “Nye’ane Zambe”: jé nlômane Jean ô mbe ô kômbô’ô jô? Bifia bite bia liti nye’ane bi bili asu Zambe, sa ke nye’ane Zambe a bili asu dangan. Ye ô ngenane fo’o ô simesan éyoñe nye’ane Yéhôva ô nga taté na wo yaé nleme wôé été?

⁵ Tame simesan éyoñ ôsu ô nga wô’ô benya mejôô a lat a Yéhôva a mam a sôñ; éyoñ éte ô nga taté na wo liti mbunane wôé. Nde ô nga yemelane na, mbôl ô nga bialé nsem été, ô nji be ô bili mbamba élat a Zambe. Ve a zene ya be Krist, Yéhôva a nga bo na ô bo ngule ya beta bi ényiñ Adam a nga jañele: ényiñ é ne te bijô ya nsem, a ényiñe ya nnôm éto. (Matthieu 20:28; Beromain 5:12, 18) Nde ô nga taté na wo yemelane na, Yéhôva a nga bo beta jam éyoñ a nga tyi’i na, a lôme Mone wé a dañe nye’e na a zu wu asu dôé. Jam ete e nga nambe wo nlem, a ô nga taté na wo nye’e Zambe a nga liti wo beta nye’an.​—Lañe’e 1 Jean 4:9, 10.

6. Aval avé nya nye’ane a yené, a nye’ane wôé asu Yéhôva ô nga tindi wo na ô bo jé?

⁶ Ve jame da, jôm ô nga wô’ôtan é mbe fo’o ve atata’a ya nye’ane wôé asu Yéhôva. Nye’an ô nji bo ve jôm ba wô’ôtan nge jô a anyu. Môt a nye’e Zambe nya nye’ane a jô ke ve na: “Ma nye’e Yéhôva.” Fo’o ve ane mbunan, nya nye’an a yené a mimboan. (Jacques 2:26) Bia liti na bia nye’e môt éyoñ bia bo mam a nye’e. Éyoñ ô nga taté na wo nye’e Yéhôva, jam ete e nga tindi wo na ô nyiñ aval a yi. Ye ô dubaneya? Nge  nalé, beta nye’an ô bili asu Yéhôva, a nkômbane ya bo mam a nye’e, bi nga tindi wo na ô nyoñ ntyi’ane wo dañe mfi ényiñe jôé. Ô nga ve womiene ngumba be Yéhôva asu na ô bo nkômbane wé, a ô nga liti de éyoñ ô nga duban. (Lañe’e Beromain 14:7, 8.) Bifia bi nlômane Jean bia tya’a valé, bia liti aval avé bi ne tôé ngaka’a bi nga bo Yéhôva.

7. Tame lañe metiñe me Zambe méziñ, aval avé ô ne liti na wo ba’ale metiñe mete?

⁷ Jean a timine jé é ne nye’ane Zambe éyoñ a jô na: “Bi ba’ale metiñe mé.” Metiñe me Zambe me ne mevé? Metiñe me Yéhôva méziñ me ne Kalate Zambe été ma liti bia ne sañesañ jôm bia yiane bo. Bi ne nyoñ éve’an: a tyili bia mbia nyuane meyok, mbia nkeane binoñ, nkañane bezambe befe, wup, a minsos. (1 Becorinthien 5:11; 6:18; 10:14; Beéphésien 4:28; Becolossien 3:9) Bia ba’ale metiñe me Yéhôva éyoñe bia sa’ale mame Kalate Zambe a jô ne sañesañe na me ne abé.

8, 9. Aval avé bi ne yem nkômbane Zambe ja’a éyoñe Kalate Zambe a kate ki bia ne sañesañ ngume jam bia yiane bo? Nyoñe’e éve’an.

⁸ Jé bia yiane bo asu na bi ve Zambe nlem avak? Da sili ke ve na bi tôñe metiñe mé, bia yiane fe yem avale Yéhôva a yene mam. Yéhôva a nji ve bia metiñ asu bone be mame bese ya ényiñ. Biyoñe biziñ, Kalate Zambe a kate ki bia ne sañesañe jame bia yiane bo éyoñe bi tele été éziñ. Éyoñ éte, biabebien bia yiane tyik avale bia ye bo. Kalate Zambe a liti bia ne sañesañ avale Zambe a yene mam. Éyoñ bia yé’é Kalate Zambe, bia kui na bi yem mame Yéhôva a nye’e a  mam a vini. (Lañe’e Besam 97:10; Minkana 6:16-19) Bi ne kui na bi yem mefulu a mimboan a yene mvo’é. Abime bia ye yé’é mefulu me Yéhôva a mimboane mi mame mié, abim ete fe bia ye bo ngule ya nyoñ mintyi’an, a bo mame ma lu’an a ôsimesane wé. Nalé a ye bo na, ja’a éyoñe Kalate Zambe a kate ki bia ne sañesañ ngume jam bia yiane bo éyoñ bi tele été éziñ, bia ye bo ngule ya yeme “mam [Yéhôva] a kômbô.”​—Beéphésien 5:17.

⁹ Éve’ane ji: teke atiñ éziñe ya Kalate Zambe da jô ne sañesañ na, bi nji yiane fombô bingeñgeñ bia liti bôte ba nye’e évô, bijabô a mejian. Ve, ye da sili na Zambe a ve bia ngum atiñ asu na bi yem nge mam mete me ne abé nge momo? Bia yem avale Yéhôva a yen mimboane mite. Kalate Zambe a kôme kobô na: “Nyô a nye’e évô, nleme [Yéhôva] w’avini nye.” (Besam 11:5) A jô fe na: “[Bôte ba ke binoñ mbia nkean], Zambe a ye tyi’i be mejô.” (Behébreu 13:4) Nge bi nyoñ éyoñe ya fase mame bifuse bite bia jô, bia ye kui na bi kôme yeme nkômbane Zambe. Nalé a ye volô bia na bi bo te vôman a mam ma liti ne bôsa mimboane Zambe a vini, nge fombô mie bingeñgeñ. Asu na bi ve Zambe nlem avak, bia yiane sa’ale mbia mimboan émo ji ja liti bôt ane mame me ne mvo’é. *

10, 11. Amu jé bia tobe na bia bo Yéhôva mewôk, a avale mewô’ô avé bia bo nye?

¹⁰ Jé ja dañe tindi bia na bi tône metiñe me Yéhôva? Amu jé bia kômbô nyiñe môs ôse ane Yéhôva a  yi? Bi nji bo nkômbane Yéhôva amu bia mate fonos, nge ki amu bia mate na, mam ma kui bôte be ne te tôñe metiñe mé, me kui fe bia. (Begalate 6:7) Ve bia bo Yéhôva mewôk amu bia nye’e nye. Fo’o ve ane mon a ve ésa nlem avak, bia fe bia jeñe na bi ve Yéhôva nlem avak. (Besam 5:12) A ne Ésa wongan, a bia nye’e nye. Teke jam éziñ é ne soo bia mevak ane éyoñe bia yeme na, fatan ényiñ jangan ja bo na bi “nyoñ mvam be Yéhôva.”​—Minkana 12:2.

¹¹ Nde ñhe, bia bo ki mewôk a minleme mibaé, nge ke éyoñ nalé a yiane bia. * Bia fiale ki metiñ, bi tôñe ve ma ma ndeñele ki bia, nge ma bia yene na me nji bo ayaé. Ve, mewô’ô mangan “me aso minlem.” (Beromain 6:17) Bi ne tyiñ a ntili besam a nga jô na: “M’ayen mvaé jam mebendé môé été, mme mete me nye’eya.” (Besam 119:47) E ne été na bia nye’e bi bo’o Yéhôva mewôk. Yéhôva a yiane na bi bo nye mewôk a nleme wongan ôse, teke yange jôm éziñe be nye. (Deutéronome 12:32) Bia yi na Yéhôva a kobô ajô dangan avale Kalate Zambe a kobô ajô Noé. Kalate Zambe a kobô ajô mbo ésaé Zambe ya melu mvus ate, a nga bo Zambe mewôk mimbu mewôm, a jô’ô na: “Aval ete Noé a nga bo; mam mese Zambe a nga jô nye, nalé a nga bo.”​—Metata’a 6:22.

12. Avale mewô’ô avé da ve Yéhôva nlem avak?

¹² Yéhôva a wô’ô aya éyoñe bia bo nye mewôk a nlem ôse? Kalate Zambe a jô na avale mboon ete da  ve nye “nleme mevak.” (Minkana 27:11) Ye é ne fo’o été na mewô’ô mangan me ne ve Njôô ya si se meva’a nlem? Ôwé! Yéhôva a bili fo’o beamu ya wô’ô mevak. Yéhôva a nga té bia a fili ya nyoñe mintyi’an. Nalé a tinane na bi ne fili ya top; bi ne tobe na bia bo Zambe mewôk, nge ke tobe na bia bo nye melo. (Deutéronome 30:15, 16, 19, 20) Éyoñe bia tobe na bia bo Ésa wongan ya yôp mewôk amu bia nye’e nye, nalé a ve nye nlem avak. (Minkana 11:20) Fatan ényiñ éfe é vo’o soo bia bibotan ane dili.

13, 14. Amu jé be ne jô na metiñe me Yéhôva “me nji bo adit,” a éve’an évé é ne volô bia na bi kôme wô’ô ôsimesan ôte?

¹³ Nlômane Jean ô nga jô jôm éziñ ja ve bia ngule nyôl a lat a metiñe me Yéhôva; ô nga jô na: “Metiñe mé me nji bo adit.” * Yéhôva a sili ki bia mam ma lôte bia nkôñ. Môt ase a ne ngule ya tôñe metiñe me Yéhôva.

¹⁴ Bi ne nyoñ éve’ane ji: mvôé jôé ja jô wo na ô ke nye volô litan abui mimbe’e. Mimbe’e miziñ mi ne ôveves aval e ne na, môte wua a ne mie be’e; mi mivo’o ki mi ne adit aval e ne na, môte wua a se ngule ya be’e mie. Éyoñ éte mvôé jôé ja liti wo mimbe’e wo yiane be’e. Ye wo simesane na é jô wo na ô be’e mi mi ne adit? Momo. Aval ete fe, Zambe wongan a ve ki bia metiñe me ne ayaé ya tôñ, amu a ne mvam, a nye’e fe bia. (Deutéronome 30:11-14) A vo’o sili bia mam ma  lôte bia nkôñ. Yéhôva “a yem ntéane wongan, a simesane na bi ne metek;” ajô te, a yem mam bi ne ngule ya bo, a ma bi se ngule ya bo.​—Besam 103:14.

15. Amu jé bi ne tabe ndi na metiñe me Yéhôva me ne asu mvo’é jangan?

¹⁵ Metiñe me Yéhôva me nji ve’ele bo adit; ma volô volô bia. (Lañe’ Ésaïe 48:17.) Môze a nga jô bone b’ Israël na: “Ane Yéhôva a nga tiñeti bia na, bi bo memvinda mete mese, a ko Yéhôva Zambe wongane woñ, ane bi aye bo mvo’é melu mese, nde te a ye ba’ale bia bevevee, aval ane môse wu.” (Deutéronome 6:24) Bia fe bi ne tabe ndi na, nge Yéhôva a ve bia metiñe mé, a ne amu a sôñe mvo’é jangane ya nnôm éto. Jam ete e nji bo jame ya kam. Amu fe’e Yéhôva é ne te nné. (Beromain 11:33) A yeme jé é ne mvo’é asu dangan. Yéhôva émien a ne nye’an. (1 Jean 4:8) Fulu ja dañe mefulu mé mese é ne nye’an. Nde mam mese a bo, a mam mese a jô, me tii a nye’an. Metiñe mese a ve bebo bisaé bé me tii fe a nye’an.

16. Amu jé bi ne kui na bi bo Zambe mewôk akusa bo émo Satan, a abé ya menyôle mangan bia wosane bia?

¹⁶ Nalé a tinane ki na, e bo Zambe mewôk a ne tyi’ibi jam. Bia yiane wosane mam ya émo me ne bo na bi tyam atiñe Zambe, amu émo “é jô’ô [mo] be mbia môt.” (1 Jean 5:19) Bia yiane fe wosan abé é ne bia menyôl, amu da tindi bia na bi tyam metiñe me Zambe. (Beromain 7:21-25) Ve nye’ane bia nye’e Zambe ô ne dañe mam mete mese. Yéhôva a botane bôte bese ba bo nye mewôk a nlem ôse. A ve “bôte ba wô’ô nye” mbamba nsisime wé. (Mam Minlôman 5:32) Mbamba nsisim ate a bo na bi wume mbamba  bibuma, mbamba mefulu me ne volô bia na bi ke ôsu a bo Yéhôva mewôk.​—Begalate 5:22, 23.

17, 18. (a) Jé bia zu yé’é e kalate nyi, a jé bi nji yiane vuan nté bia yé’é nye? (b) Kabetôlô a tôñ a zu kobô ajô jé?

¹⁷ E kalate nyi, bia ye yé’é miñye’elane mi Yéhôva, mam ma fombô ényiñ Bekristen, a mame mevo’o mese ma volô na bi yem nkômbane Yéhôva. Ayé’é ete da ye volô bia na bi beta simesane miñye’elane miziñe ya Kalate Zambe mi ne mfi. Te bia vuane na Yéhôva a yemete ki bia na bi tôñe metiñe mé; a yi na bi bo nye mewôk a nleme wongan ôse. Te bia vuane fe na, ényiñ Yéhôva a ye’ele bia, é ne ji ja ye soo bia bibotan ataté den, akekui nnôm éto. Nde ñhe, bia yiane yen mewô’ô mangan ane zene ya liti Yéhôva na, bia nye’e nye angôndô ya abui.

¹⁸ Asu na a volô bia na bi yeme mam me ne mvaé a mam me ne abé, Yéhôva a nga té bia a jôm éziñ ba loone na, mone môte ya nlem. Ve asu na mone môte ya nlem a volô bia, bia yiane ye’ele nye. Kabetôlô baa a zu kobô ajô ete.