1, 2. Unsay modasig kanimo sa paghigugma kang Jehova nga Diyos?

GIHIGUGMA mo ba ang Diyos? Kon gipahinungod mo na ang imong kinabuhi kang Jehova nga Diyos, seguradong oo ang imong tubag ug angay gayod kana! Natural lamang nga kita mahigugma kang Jehova. Ang atong paghigugma sa Diyos maoy balos sa iyang paghigugma kanato. Kini ang gipahayag sa Bibliya: “Bahin kanato, kita nahigugma, tungod kay siya [Jehova] unang nahigugma kanato.”​—1 Juan 4:19.

² Si Jehova ang unang nagpahayag sa iyang gugma kanato. Iya kitang gihatagan ug matahom nga yutang puy-anan. Iyang gitagana ang atong pisikal ug materyal nga mga panginahanglan. (Mateo 5:43-48) Mas hinungdanon pa, iyang giatiman ang atong espirituwal nga mga panginahanglan. Siya naghatag kanato sa iyang Pulong, ang Bibliya. Dugang pa, iya kitang giawhag sa pag-ampo kaniya nga may pasalig nga iya kitang dunggon ug ihatag ang iyang balaang espiritu sa pagtabang kanato. (Salmo 65:2; Lucas 11:13) Labing hinungdanon, iyang gipadala ang iyang labing minahal nga Anak aron mahimong atong Manunubos aron maluwas kita gikan sa sala ug kamatayon. Pagkadakong gugma ang gipakita ni Jehova kanato!​—Juan 3:16; Roma 5:8.

3. (a) Unsay kinahanglan natong buhaton aron magpabilin sa gugma sa Diyos? (b) Unsang hinungdanong pangutana ang atong hisgotan, ug asa man hikaplagi ang tubag?

³ Buot ni Jehova nga makapahimulos kita sa iyang gugma  hangtod sa hangtod. Kana hinuon nagdepende ra kanato. Ang Pulong sa Diyos nag-awhag kanato: “Magpabilin kamo diha sa gugma sa Diyos . . . nga nagapanglantaw sa kinabuhing walay kataposan.” (Judas 21) Ang mga pulong “magpabilin kamo” nagpasabot nga kita may buhaton aron magpabilin sa gugma sa Diyos. Angay natong balosan sa dayag nga mga paagi ang iyang gugma kanato. Busa, angay natong hisgotan kining hinungdanong pangutana, ‘Sa unsang paagi akong ikapasundayag ang akong paghigugma sa Diyos?’ Ang tubag anaa sa inspiradong mga pulong ni apostol Juan: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Maayong susihon nato ang kahulogan niining mga pulonga,  kay buot natong ipakita sa Diyos nga gihigugma gayod nato siya pag-ayo.

4, 5. (a) Unsay gipasabot sa mga pulong “paghigugma sa Diyos”? (b) Batbata kon sa unsang paagi misugod pagturok sa imong kasingkasing ang gugma alang kang Jehova.

⁴ “Paghigugma sa Diyos”​—unsay gihunahuna ni apostol Juan sa iyang pagsulat niining mga pulonga? Kini nagtumong, dili sa gugma sa Diyos alang kanato, kondili sa atong gugma alang kaniya. Makahinumdom ka ba kon kanus-a nagsugod ang imong paghigugma kang Jehova?

⁵ Palandonga kadiyot kon kanus-a ka unang nakakat-on sa kamatuoran bahin kang Jehova ug sa iyang mga katuyoan mao nga nakabaton kag pagtuo. Nasabtan mo nga bisan pag natawo kang makasasala ug nahimulag sa Diyos, pinaagi ni Kristo gibuksan ni Jehova ang dalan aron maangkon mo ang kahingpitan nga giwala ni Adan ug mapanunod ang kinabuhing walay kataposan. (Mateo 20:28; Roma 5:12, 18) Nasabtan nimo kon unsa ka dako ang pagsakripisyo ni Jehova sa pagpadala sa iyang minahal kaayong Anak aron mamatay alang kanimo. Natukbil ang imong kasingkasing mao nga nagsugod ka sa paghigugma sa Diyos nga nagpakitag dako kaayong gugma alang kanimo.​—1 Juan 4:9, 10.

6. Sa unsang paagi ipakita ang tinuod nga gugma, ug nadasig ka sa pagbuhat sa unsa tungod sa imong gugma alang sa Diyos?

⁶ Apan ang maong pagbati sinugdanan lamang sa tiunay nga gugma alang kang Jehova. Hinuon ang gugma wala lang maglangkit sa pagbati. Ang tiunay nga gugma alang sa Diyos wala lang magpasabot sa pagsultig “Gihigugma ko si Jehova.” Sama sa pagtuo, ipadayag gayod kini sa mga buhat nga dinasig sa gugma. (Santiago 2:26) Sa espesipikong paagi, atong ipakita ang gugma pinaagi sa mga buhat nga makapahimuot sa usa nga atong gihigugma. Busa, sa miturok ang gugma alang kang Jehova diha sa imong kasingkasing, buot na nimong magkinabuhi sa paagi nga makapahimuot sa imong langitnong  Amahan. Ikaw ba bawtismado nang Saksi? Kon mao, kining lalom nga gugma ug pagkamaunongon kang Jehova maoy nagtukmod kanimo sa paghimo sa labing hinungdanong desisyon sa imong kinabuhi. Imo nang gipahinungod ang imong kaugalingon kang Jehova aron buhaton ang iyang kabubut-on, ug imong gipasimbolohan kana pinaagi sa pagpabawtismo. (Roma 14:7, 8) Ang pagtuman niining ugdang nga panaad maoy sunod nga gihisgotan ni apostol Juan.

7. Unsay pipila ka sugo sa Diyos, ug unsay nalakip sa atong pagbantay niini?

⁷ Gisaysay ni Juan kon unsay kahulogan sa paghigugma sa Diyos: “Atong bantayan ang iyang mga sugo.” Unsay mga sugo sa Diyos? Si Jehova naghatag kanatog daghang espesipikong mga sugo pinaagi sa iyang Pulong, ang Bibliya. Pananglitan, siya nagdili sa paghuboghubog, pakighilawas, pagsimbag diyosdiyos, pagpangawat, ug pagpamakak. (1 Corinto 5:11; 6:18; 10:14; Efeso 4:28; Colosas 3:9) Ang pagbantay sa mga sugo sa Diyos naglakip sa pagkinabuhi sumala sa tin-awng mga sukdanan sa Bibliya bahin sa moral.

8, 9. Sa unsang paagi kita mahibalo kon unsay makapahimuot kang Jehova bisan sa mga situwasyon nga walay espesipikong mga balaod sa Bibliya nga ikapadapat? Paghatag ug pananglitan.

⁸ Apan dili lang pagsugot sa iyang espesipikong mga balaod ang gikinahanglan aron makapahimuot kita kang Jehova. Wala kita pig-oti ni Jehova pinaagig mga balaod nga naggahom sa tanang bahin sa atong pagkinabuhi adlaw-adlaw. Busa, lagmit makasinati kitag daghang situwasyon nga walay espesipikong mga sugo sa Bibliya nga ikapadapat. Nianang mga situwasyona, unsaon nato pagkahibalo kon unsay makapahimuot kang Jehova? Ang Bibliya may tin-awng mga ilhanan kon unsay panghunahuna sa Diyos. Samtang atong gitun-an ang Bibliya, atong makat-onan kon unsay gihigugma ug gidumtan ni Jehova. (Salmo 97:10; Proverbio 6:16-19) Masabtan nato ang mga tinamdan ug mga binuhatan nga iyang giuyonan. Kon makakat-on kitag dugang bahin sa personalidad  ug mga paagi ni Jehova, ang iyang panghunahuna mas makagiya sa atong mga desisyon ug makaimpluwensiya sa atong mga binuhatan. Busa, bisan sa mga situwasyon nga walay espesipikong balaod sa Bibliya nga ikapadapat, kasagarang makasabot kita “kon unsa ang kabubut-on ni Jehova.”​—Efeso 5:17.

⁹ Pananglitan, walay espesipikong sugo ang Bibliya nga nagdili kanato sa pagtan-awg mga pelikula o salida sa TV nga mapintason kaayo o bahin sa seksuwal nga imoralidad. Apan gikinahanglan ba gayod nato ang usa ka espesipikong balaod batok sa pagtan-aw niana? Nahibalo kita kon unsay panghunahuna ni Jehova bahin niana. Ang iyang Pulong tin-awng nag-ingon kanato: “Si bisan kinsa nga nahigugma sa kapintasan ginadumtan gayod sa kalag [ni Jehova].” (Salmo 11:5) Kini nag-ingon usab: “Hukman sa Diyos ang mga makihilawason ug ang mga mananapaw.” (Hebreohanon 13:4) Pinaagi sa pagpalandong nianang inspiradong mga pulong, tin-aw natong masabtan kon unsa ang kabubut-on ni Jehova. Busa dili gayod kita motan-aw ug tataw nga mga pasundayag bahin sa mga buhat nga gidumtan sa atong Diyos. Nahibalo kita nga si Jehova mahimuot kon kita molikay sa moral nga kahugawan nga gustong isipon niining kalibotana ingong dili-makadaot nga kalingawan. *

10, 11. Nganong mopili kita nga magmasinugtanon kang Jehova, ug unsang matanga sa pagkamasinugtanon ang atong ipakita kaniya?

¹⁰ Unsa ang pangunang katarongan nga pagabantayan nato ang mga sugo sa Diyos? Nganong buot natong magkinabuhi kada adlaw nga nahiuyon sa panghunahuna sa Diyos? Wala nato pilia ang maong paagi sa pagkinabuhi aron lang makalingkawas sa silot o makalikay sa daotang mga resulta nga maagoman niadtong wala magtagad sa kabubut-on sa Diyos. (Galacia 6:7) Hinunoa, giisip nato nga ang pagkamasinugtanon kang Jehova maoy bililhong kahigayonan sa pagpakita  sa atong gugma kaniya. Ingon nga ang usa ka bata matinguhaon nga uyonan sa iyang amahan, gusto usab nato nga kita uyonan ni Jehova. (Salmo 5:12) Siya ang atong Amahan, ug ato siyang gihigugma. Wala nay laing makahatag kanatog mas dakong kalipay o katagbawan kay sa pagkahibalo nga kita nagkinabuhi sa paagi nga “makabaton ug pag-uyon gikan ni Jehova.”​—Proverbio 12:2.

¹¹ Busa, ang atong pagkamasinugtanon dili kontra-gusto, ni mapilion o may kondisyon. * Dili kita magpili kon unsang mga sugoa ang atong sugton o dili sugton, nga mosugot lang niana kon kombenyente o dili lisod. Sukwahi niana, kita ‘magmasinugtanon gikan sa kasingkasing.’ (Roma 6:17) Kita mobati sama sa salmista sa Bibliya nga misulat: “Ipakita ko ang kahinangop sa imong kasugoan nga akong gihigugma.” (Salmo 119:47) Tinuod, gusto gayod natong sugton si Jehova. Atong giila nga siya takos sa atong bug-os ug way-kondisyon nga pagkamasinugtanon ug obligado kita sa pagpakita niana. (Deuteronomio 12:32) Buot natong ang gisulti ni Jehova bahin kang Noe diha sa Bibliya, iyang isulti usab bahin kanato. Bahin sa matinumanong patriarka nga nagpakitag gugma alang sa Diyos pinaagi sa pagkamasinugtanon sa daghang katuigan, ang Bibliya nag-ingon: “Gibuhat ni Noe ang sumala sa tanan nga gisugo sa Diyos kaniya. Gibuhat niya ang ingon gayod.”​—Genesis 6:22.

12. Kanus-a makahatag ug kalipay sa kasingkasing ni Jehova ang atong pagkamasinugtanon?

¹² Unsay bation ni Jehova kon kita kinabubut-ong magmasinugtanon? Ang iyang Pulong nag-ingon nga atong ‘gilipay ang iyang kasingkasing.’ (Proverbio 27:11) Makalipay ba gayod sa kasingkasing sa Soberanong Ginoo sa uniberso ang atong pagkamasinugtanon? Oo, ug kana tungod sa usa ka maayong katarongan! Kita gilalang ni Jehova nga may kagawasan  sa pagpili ug kini nagkahulogan nga makapili kita sa pagsugot o pagsupak kaniya. (Deuteronomio 30:15, 16, 19, 20) Kon kita kinabubut-ong mopili sa pagsugot kang Jehova ug kon ang maong desisyon tinukmod sa kasingkasing nga nahupngan ug gugma sa Diyos, kita makahatag gayod ug dakong kahimuot ug kalipay sa atong langitnong Amahan. (Proverbio 11:20) Ginapili usab nato ang labing maayong paagi sa pagkinabuhi.

13, 14. Nganong ikaingon nga ang ‘mga sugo sa Diyos dili mabug-at,’ ug sa unsang paagi ikailustrar kini?

¹³ Makasalig gayod kita sa gisulti ni apostol Juan bahin sa mga kinahanglanon ni Jehova: “Ang iyang mga sugo dili mabug-at.” Ang Gregong pulong nga gihubad ug “mabug-at” diha sa 1 Juan 5:3 maoy literal nga hubad. * Makataronganon o dili mabug-at ang mga kinahanglanon ni Jehova. Ang dili-hingpit nga mga tawo makatuman gayod sa iyang mga balaod.

¹⁴ Ikailustrar nato kini niining paagiha. Hangyoon ka sa suod nimog higala nga tabangan siya sa iyang pagbalhin ug laing puy-anan. Daghang kahon ang kinahanglang dad-on. Gaan ra ang pipila nga kini mahimong dad-on sa usa ka tawo, pero ang uban bug-at nga kinahanglang alsahon ug duha ka tawo. Ang imong higala mopili sa mga kahon nga iyang ipaalsa kanimo. Ipaalsa ba niya ang mga kahon nga nahibalo siyang bug-at ra kaayo para nimo? Dili. Dili niya gustong mapiang ka kon ikaw ray mag-alsa niana. Sa susamang paagi, ang atong mahigugmaon ug malulotong Diyos dili mohatag kanatog mga sugo nga lisod kaayong matuman. (Deuteronomio 30:11-14) Dili gayod niya kita hatagan ug bug-at kaayo nga  sugo. Nakasabot si Jehova sa atong mga limitasyon, kay “siya nahibalo pag-ayo sa atong pagkaumol, nga nahinumdom nga kita abog.”​—Salmo 103:14.

15. Nganong makasalig kita nga ang mga sugo ni Jehova maoy alang sa atong kaayohan?

¹⁵ Dili gayod mabug-at ang mga sugo ni Jehova; kana alang gayod sa atong kaayohan. (Isaias 48:17) Busa nakasulti si Moises ngadto sa karaang Israel: “Gisugo kami ni Jehova nga tumanon kining tanang regulasyon, sa pagkahadlok kang Jehova nga atong Diyos alang sa among kaayohan kanunay, aron kami magpabiling buhi ingon niining adlawa.” (Deuteronomio 6:24) Makasalig usab kita nga sa paghatag ni Jehova kanato sa iyang mga balaod, siya naghunahuna sa atong walay-kataposang kaayohan. Dili gayod himoon ni Jehova ang sukwahi niana! Ang kaalam ni Jehova nga Diyos dili gayod matugkad. (Roma 11:33) Busa siya nahibalo kon unsay labing maayo alang kanato. Si Jehova mao usab ang kinalabwang panig-ingnan sa gugma. (1 Juan 4:8) Ang gugma, nga panguna niyang hiyas, nag-impluwensiya sa tanan niyang gisulti ug gibuhat. Ang tanang sugo nga iyang gipatuman sa iyang mga alagad gipasukad niining hiyasa.

16. Bisan pa sa mga impluwensiya niining daotang kalibotan ug sa atong pagkadili-hingpit, nganong makapadayon kitang magmasinugtanon?

¹⁶ Dili buot ingnon nga sayon nga magmasinugtanon sa Diyos. Kinahanglang suklan nato ang mga impluwensiya niining daotang kalibotan, nga “nailalom sa gahom sa usa nga daotan.” (1 Juan 5:19) Kinahanglang pakigbisogan usab nato ang atong pagkadili-hingpit, mao nga kita masalad-on kon bahin sa mga balaod sa Diyos. (Roma 7:21-25) Apan tungod sa atong gugma alang sa Diyos, kita magmadaogon. Panalanginan ni Jehova kadtong buot magpamatuod sa ilang gugma kaniya pinaagi sa ilang pagkamasinugtanon. Ihatag niya ang iyang balaang espiritu “niadtong nagasugot kaniya ingon nga magmamando.” (Buhat 5:32) Ang maong espiritu magpatunghag bililhon kaayong mga hiyas nga makatabang kanato nga magpadayong magmasinugtanon.​—Galacia 5:22, 23.

17, 18. (a) Unsay atong susihon niining libroha, ug unsay angay natong hinumdoman samtang gisusi nato kini? (b) Unsay hisgotan sa sunod nga kapitulo?

 ¹⁷ Atong susihon niining libroha ang mga prinsipyo ug mga sukdanan sa moral ni Jehova ug ang ubang mga pagpadayag sa iyang kabubut-on. Samtang susihon nato kana, ibutang nato sa hunahuna ang pipila ka hinungdanong mga butang. Hinumdoman nato nga dili gayod kita pugson ni Jehova sa pagsunod sa iyang mga balaod ug mga prinsipyo; gusto niya ang kinabubut-on ug kinasingkasing nga pagkamasinugtanon. Dili nato kalimtan nga si Jehova nag-awhag kanato sa pagkinabuhi sa paagi nga makahatag ug daghang kaayohan karon ug walay-kataposang kinabuhi sa umaabot. Ug atong sabton kon unsay kahulogan sa bug-os-kasingkasing nga pagkamasinugtanon​—usa ka bililhong kahigayonan sa pagpakita kang Jehova nga ato siyang gihigugma pag-ayo.

¹⁸ Sa pagtabang kanato nga makaila kon unsay matarong ug daotan, mahigugmaong gihatagan kita ni Jehova ug katakos sa tanlag. Apan kinahanglang bansayon ang atong tanlag aron mahimo kining kasaligang giya, ug kini ang hisgotan sa sunod nga kapitulo.