1, 2. ¿Chucoch maʼ cʼuxbin Jehová?

¿MUʼ baʼ cʼuxbin Dios jatet? Mi tsaʼix a wʌcʼʌ a bʌ tiʼ tojlel, mi caj a wʌl chaʼan mucʼʌch. Joñonla mi laj cʼuxbin Jehová come cheʼʌch luʼ ñʌmʌlonla. Mi lac mel jiñi come cheʼʌch miʼ mel ti lac tojlel. Jiñi Biblia mi yʌl: «Mi laj cʼuxbin Dios [...] come ñaxan tsiʼ cʼuxbiyonla» (1 Juan 4:19).

² Jehová jiñʌch miʼ ñaxan pʌs bajcheʼ cʼamel miʼ cʼuxbiñonla. Tsiʼ yʌqʼueyonla tʼojol jax bʌ lac chumlib wʌʼ ti Pañimil yicʼot miʼ yʌqʼueñonla i cʼʌjñibal bʌ lac chaʼan ti jujumpʼejl qʼuin chaʼan chʌn cuxulonla (Mateo 5:43-48). An baqui miʼ ñumen cʌntañonla jaʼel, jiñʌch cheʼ miʼ pʼʌtʼesan lac ñopoñel tiʼ tojlel. Jumpʼejl ejemplo jiñʌch cheʼ miʼ yʌqʼueñonla i Tʼan, jiñi Biblia. Miʼ subeñonla chaʼan mi lac pejcan ti oración, i mi lac ñop chaʼan mucʼʌch caj i jacʼbeñonla yicʼot i coltañonla ti jiñi chʼujul bʌ i yespíritu (Salmo 65:2; Lucas 11:13). Pero baqui tsiʼ ñumen pʌsbeyonla i cʼuxbiya, jiñʌch cheʼ tsiʼ choco tilel jiñi wen cʼuxbibil bʌ i Yalobil chaʼan miʼ locʼsañonla ti mulil yicʼot ti chʌmel. ¡Jehová mucʼʌch i wen cʼuxbiñonla! (Pejcan Juan 3:16; Romanos 5:8.)

3. a) ¿Chuqui yom mi lac mel chaʼan mi lac chʌn ajñel tiʼ cʼuxbiya Dios? b) ¿Baqui bʌ ñuc bʌ cʼajtiya yom mi lac melben lac bʌ, i baqui mi caj lac tajben i jacʼbal?

³ Jehová yom tiʼ pejtelel ora an lac chaʼan i cʼuxbiya.  Pero ¿muʼ ba caj lac mejlel? Joñoñixla cujil mi mucʼʌch. Jiñi Biblia miʼ suben jiñi xñoptʼañob: «Chʌn ajñenla tiʼ cʼuxbiya Dios [...] chaʼan mi laʼ taj laʼ cuxtʌlel mach bʌ añic miʼ jilel» (Judas 21). Cheʼ miʼ cʼʌjñel jiñi tʼan «chʌn ajñenla», yom yʌl chaʼan an chuqui yom mi lac mel chaʼan maʼañic mi lac sʌt i cʼuxbiya Dios. Jiñi cʼuxbiya yom mi lac pʌs ti lac melbal. Pero an jumpʼejl cʼajtiya yom bʌ mi lac melben lac bʌ: «¿Chuqui yom mic mel chaʼan mic pʌs jiñi j cʼuxbiya ti Dios?». Jiñi i jacʼbal mi lac taj ti jiñi tʼan tsaʼ bʌ i tsʼijbu jiñi apóstol Juan: «Come i cʼuxbintel Dios jiñʌch i chʼujbibentel i mandar. Mach wocolic i mandar» (1 Juan 5:3). Jin chaʼan, yom mi  lac wen tsajin chuqui yom yʌl tsaʼ bʌ i yʌlʌ jiñi apóstol Juan come com lac pʌsben Dios chaʼan mucʼʌch lac wen cʼuxbin.

4, 5. a) ¿Chuqui yom yʌl Juan cheʼ bʌ tsiʼ yʌlʌ jiñi tʼan «i cʼuxbintel Dios»? b) Tsictesan bajcheʼ woliʼ colel majlel ti a pusicʼal i cʼuxbintel Jehová.

⁴ ¿Chuqui yom yʌl jiñi apóstol Juan cheʼ bʌ tsiʼ yʌlʌ «i cʼuxbintel Dios» ti jiñi versículo? Mach jiñic i cʼuxbiya Dios am bʌ i chaʼan ti lac tojlel, yom yʌl, jin laj cʼuxbiya am bʌ lac chaʼan tiʼ tojlel. Tajol cʼajal a chaʼan bajcheʼ tsaʼ caji ti colel majlel a cʼuxbiya ti Dios.

⁵ Ñaʼtancu bajcheʼ yubil tsaʼ wubi cheʼ bʌ tsaʼ cʼoti a cʌn jiñi i sujmlel i chaʼan bʌ Jehová yicʼot chuqui yom bʌ, i tsaʼ caji ti colel majlel jiñi a ñopoñel tiʼ tojlel. Cheʼ jaʼel, tsaʼ cʼoti a cʌn chaʼan cheʼ bʌ tsaʼ wila pañimil xmuliletix i mach lʌcʼʌlic an a wicʼot Dios, anquese cheʼ añet bajcheʼ jiñi, Jehová tsiʼ cʼʌñʌ Cristo chaʼan miʼ yʌqʼueñet a pijtaya: Chaʼañʌch maʼ mejlel ti chumtʌl tiʼ pejtelel ora bajcheʼ ñaxan chumul Adán cheʼ bʌ maxto i chaʼle mulil (Mateo 20:28; Romanos 5:12, 18). Yicʼot jaʼel tsaʼ caji a cʌn chaʼan Jehová tsiʼ choco tilel wen cʼuxbibil bʌ i Yalobil chaʼan ti laj caj. Jiñi cʼuxbiya tsiʼ ñijca a pusicʼal, jin chaʼan tsaʼ cʼoti a cʼuxbin Jehová (pejcan 1 Juan 4:9, 10).

6. ¿Bajcheʼ miʼ pʌstʌl jiñi isujm bʌ cʼuxbiya, i chuqui an a mele chaʼan a cʼuxbiya ti Dios?

⁶ Pero maxto jiñic isujm bʌ cʼuxbiya. ¿Chucoch mi la cʌl bajcheʼ ili? Come jiñi cʼuxbiya mach jasʌlic jach mi la cʌl chaʼan an lac chaʼan. Cheʼ mi laj cʼuxbin Dios mach jasʌl mi laj cʌl: «Mij cʼuxbin Jehová». Cheʼ lajal bajcheʼ jiñi lac ñopoñel ti Dios, jiñi isujm bʌ cʼuxbiya mi lac pʌs ti chuqui mi lac mel (Santiago 2:26). Cheʼ an majqui mi laj cʼuxbin, mi lac mel wem bʌ miʼ qʼuel. Cheʼ  tsaʼ ujti ti a tojlel bajcheʼ jiñi. Cheʼ bʌ jiñi a cʼuxbiya ti a Tat am bʌ ti panchan tsaʼ caji ti colel majlel ti a pusicʼal, tsaʼ caji a mulan chumtʌl bajcheʼ yom. Tajol tsaʼ cʼoti a chʼʌmjaʼ chaʼan maʼ wochel bajcheʼ i testigo Jehová. Mi cheʼ tsaʼ mele bajcheʼ jiñi, tsaʼ pʌsʌ chaʼan añʌch ñuc bʌ a cʼuxbiya ti Dios yicʼot chaʼan tsaʼ ñaʼta a mel jiñi wen ñuc bʌ chaʼañet: Tsaʼ wʌqʼue a tʼan Dios chaʼan tiʼ pejtelel a cuxtʌlel mi caʼ mel chuqui yom bʌ, i ti wiʼil maʼ pʌs chaʼan tsaʼix a wʌcʼʌ a bʌ tiʼ tojlel cheʼ maʼ chaʼlen chʼʌmjaʼ (pejcan Romanos 14:7, 8). Pero, cheʼ bajcheʼ mi caj laj cʌn, chaʼan mi lac tsʼʌctesan jiñi lac tʼan wen ñuc bʌ tsaʼ la cʌcʼʌ, yom mi lac mel tsaʼ bʌ i yʌlʌ jiñi apóstol Juan.

7. ¿Baqui bʌ jiñi i mandar tac Dios, i chuqui yom mi lac mel chaʼan mi lac chʼujbin?

⁷ Juan miʼ tsictesan chaʼan jiñi i cʼuxbintel Dios yom yʌl «i chʼujbibentel i mandar». ¿Baqui bʌ mandar? Jiñi Biblia miʼ subeñonla. Cheʼ bajcheʼ jiñi yʌcʼajel (qʼuixñijel), tsʼiʼlel, chʼujutesʌntel diosteʼ tac, jiñi xujchʼ yicʼot lot (1 Corintios 5:11; 6:18; 10:14; Efesios 4:28; Colosenses 3:9). Chaʼan mi lac chʼujbiben i mandar Dios yom mi lac chumtʌl cheʼ bajcheʼ mi yʌl jiñi Biblia.

8, 9. ¿Bajcheʼ miʼ mejlel lac ñaʼtan chuqui yom bʌ mi lac mel Jehová cheʼ maʼañic miʼ subeñonla ti jamʌl yaʼ tiʼ mandar am bʌ ti Biblia? Acʼʌ jumpʼejl ejemplo.

⁸ ¿Chuqui yom mi lac mel chaʼan mi lac tijicñesʌben i pusicʼal Jehová? Yom mi laj cʌmben bajcheʼ yilal i pensar, mach jasʌlic jach mi lac jacʼben i mandar. Jehová maʼañic miʼ yʌcʼ mandar ti jujunchajp chuqui mi lac mel. An i tajol maʼañic yaʼ tsʼijbubil ti Biblia chaʼan chuqui miʼ yujtel ti jujumpʼejl qʼuin. Jin chaʼan, ¿bajcheʼ miʼ mejlel lac ñaʼtan chuqui muʼ bʌ i mulan Jehová? Jiñi Biblia miʼ tsictesan ti jamʌl. Cheʼ bʌ mi lac pejcan, mi laj  cʌn chuqui miʼ cʼuxbin Jehová yicʼot chuqui miʼ tsʼaʼlen (pejcan Salmo 97:10; Proverbios 6:16-19). Cheʼ bajcheʼ jiñi, mi caj laj cʌn bajcheʼ yilal yicʼot bajcheʼ yom miʼ mel i bʌ juntiquil chaʼan utsʼat tiʼ tojlel Jehová. Cheʼ mi laj cʌn majlel bajcheʼ miʼ mel yicʼot chuqui miʼ mel, mach wocolic mi caj laj cʌn mi jiñi woli (choncol) bʌ lac ñaʼtan lac mel lajal bajcheʼ jiñi yom bʌ Dios, o mach lajalic. Cheʼ bajcheʼ iliyi, mi caj laj cʌn «chuqui yom lac Yum» chaʼan mi lac mel, anquese maʼañic yaʼ tsʼijbubil jiñi mandar yaʼ ti Biblia (Efesios 5:17).

⁹ Laʼ laj cʌl jumpʼejl ejemplo. Jiñi Biblia maʼañic mi yʌl ti jamʌl chaʼan mach yomic laj qʼuel película tac baqui miʼ ñumel tsʼiʼlel, cʌlʌx tsʌnsa, jatsʼ yicʼot michʼajel. ¿Cʼʌñʌl ba an jumpʼejl mandar baqui mi yʌl chaʼan mach yomic laj qʼuel jiñi? La cujilix chuqui mi yʌl Jehová. Jamʌl mi yʌl yaʼ tiʼ Tʼan chaʼan miʼ tsʼaʼlen «jiñi muʼ bʌ i lon mulan jisaya» yicʼot chaʼan Dios mi caj i mel «majqui jach miʼ taj i yixic [o wiñic]» cheʼ añix i piʼʌl o cheʼ miʼ piʼleñob i bʌ cheʼ mach ñujpuñemobic (Salmo 11:5; Hebreos 13:4). Cheʼ bʌ mi lac wen ñaʼtan ili cʌntesʌntel, miʼ cʼotel laj cʌn chuqui yom bʌ Jehová. Jin chaʼan maʼañic mi laj qʼuel película muʼ bʌ i tsʼaʼlen Dios. Ili pañimil yom yʌqʼueñonla lac ñaʼtan chaʼan cheʼ mi laj qʼuel película baqui miʼ pʌstʌl i tsuculel maʼañic miʼ mejlel i ticʼlañonla, pero Jehová miʼ subeñonla chaʼan mach yomic mi laj qʼuel cheʼ bʌ bajcheʼ jiñi. *

10, 11. ¿Chucoch tiʼ pejtelel ora com lac jacʼben i mandar Dios, i bajcheʼ yom?

¹⁰ ¿Chucoch mi lac jacʼ jiñi i mandar Dios? ¿Chucoch la com chumtʌl ti jujumpʼejl qʼuin cheʼ bajcheʼ yom  Dios? ¿Chaʼan jach ba maʼañic mi lac taj wocol, o chaʼan mach la comic chaʼan Jehová miʼ yʌqʼueñonla lac toj lac mul? (Gálatas 6:7). Mi lac jacʼben i mandar Jehová come la cujil chaʼan cheʼʌch mi lac pʌsben chaʼan mi lac wen cʼuxbin. Lajal bajcheʼ jiñi xcolelob yom chaʼan wen miʼ qʼuejlelob tiʼ tat, cheʼ jaʼel joñonla, la com chaʼan Jehová miʼ qʼuelonla ti wen (Salmo 5:12). Jiñʌch lac Tat i mi lac wen cʼuxbin. Maʼañic yambʌ muʼ bʌ i ñumen aqʼueñonla lac tijicñʌyel cheʼ bʌ miʼ cʼotel lac tajben i «yutslel i pusicʼal lac Yum» (Proverbios 12:2).

¹¹ Jin chaʼan, cheʼ mi lac melben i yeʼtel Jehová maʼañic mi lac mel chaʼan xicʼbilonla yicʼot mach cheʼic jach bajcheʼ la com. * Mach joñoñicla mi la cʌl baqui bʌ mandar mi lac jacʼ i baqui bʌ maʼañic, tajol mi lac jacʼ mach bʌ wocolic mi la cubin o maʼañic bʌ miʼ mʌctañonla lac mel chuqui la com. Joñonla mi ‹lac jacʼ tʼan ti jumpʼejl lac pusicʼal› (Romanos 6:17). Cheʼ mi la cʌl bajcheʼ jiñi salmista: «Tijicñayon chaʼan a mandar» (Salmo 119:47). Mi lac jacʼben i mandar Jehová ti tijicña. Laj cujilix chaʼan cojach yom mi lac jacʼben i mandar tiʼ pejtelel ora i mach yomic mi la cʌl chaʼan mach mejloñicla (Deuteronomio 12:32). Cheʼ com lac mel bajcheʼ Noé, cabʌl jab tsaʼ chʌn ajñi ti toj yicʼot Dios, cheʼ bajcheʼ jiñi tsiʼ pʌsʌ chaʼan mucʼʌch i cʼuxbin. Cheʼ bajcheʼ tsaʼ ajli tiʼ tojlel Noé, cheʼ mi caj i yʌjlel ti lac tojlel jaʼel: «Cheʼʌch tsiʼ mele Noé. Tsiʼ chaʼle pejtelel chuqui tsiʼ yʌlʌ Dios» (Génesis 6:22).

12. ¿Baqui ora mi la cʌqʼuen i tijicñʌyel Jehová?

¹² ¿Bajcheʼ yubil miʼ yubin Jehová cheʼ tijicña mi lac  jacʼben i tʼan? Jiñi Biblia mi yʌl chaʼan mi lac tijicñesʌben i pusicʼal (Proverbios 27:11). Pero ¿tiʼ sujm ba miʼ mejlel lac tijicñesʌben i pusicʼal jiñi tsaʼ bʌ i mele Pañimil yicʼot panchan? Mucʼʌch. Laʼ laj qʼuel chucoch. Jehová tsiʼ meleyonla i tsiʼ yʌqʼueyonla chaʼan joñonla mi lac yajcan chuqui com bʌ lac mel. Cheʼ bajcheʼ iliyi, joñonla mi caj lac yajcan mi la com o mach la comic lac jacʼben i mandar (Deuteronomio 30:15, 16, 19, 20). Jin chaʼan, cheʼ mi lac mel chuqui yom Dios come mi laj cʼuxbin tiʼ pejtelel laj cuxtʌlel, mi la cʌqʼuen i tijicñʌyel (Proverbios 11:20). Cheʼ jaʼel, woli lac mel chaʼan lac wenlel.

13, 14. ¿Chucoch mi la cʌl chaʼan «mach wocolic i mandar Jehová», i baqui bʌ lajiya miʼ mejlel laj cʼʌn chaʼan mi lac tsictesan?

¹³ Jiñi apóstol Juan tsiʼ yʌlʌ: «Mach wocolic i mandar [Jehová]». Ili tʼan miʼ yʌcʼ tijicñʌyel. Jehová maʼañic miʼ subeñonla lac mel mach bʌ mejlic lac mel. Anquese xmulilonla ti lac pejtelel, mucʼʌch i mejlel lac tsʼʌctesan i mandar.

¹⁴ Laʼ la cʌl jumpʼejl lajiya. Juntiquil tatʌl miʼ majlel ti xotʼ siʼ yicʼot juntiquil i yalobil maxto bʌ wen ñuquic. Ili tatʌl maʼañic mi caj i suben i yalobil chaʼan miʼ cuch ti on, come yujil chaʼan maʼañic mi caj i lʌtʼ yicʼot miʼ mejlel i low i bʌ. Cheʼ miʼ mel Dios ti lac tojlel jaʼel. Maʼañic miʼ subeñonla lac mel wocol bʌ ti melol (Deuteronomio 30:11-14). Maʼañic baqui ora miʼ yʌqʼueñonla ñumen al bʌ laj cuch. Jehová yujil chuqui muʼ bʌ i mejlel lac mel, «come yujil cʼuñonla, yujil melbilonla ti tsʼubejn» (Salmo 103:14).

15. ¿Chucoch miʼ mejlel la cʌl chaʼan jiñi i mandar Jehová chaʼañʌch lac wenlel?

¹⁵ Jiñi i mandar Jehová mach wocolic, yom bʌ jiñʌch  chaʼan wen mi la cajñel (pejcan Isaías 48:17). Moisés tsiʼ sube jiñi israelob ‹chaʼan miʼ jacʼbeñob tiʼ pejtelel jiñi mandar, chaʼan miʼ bʌcʼñañob lac Yum Dios›. Ti wiʼil tsiʼ yʌlʌ chucoch: «Chaʼan miʼ loqʼuel ti utsʼat pejtelel chuqui mi caj i yujtel ti lac tojlel ti pejtelel ora» (Deuteronomio 6:24). Joñonla cujil jaʼel chaʼan jiñi mandar tsaʼ ajqʼui chaʼan mi lac taj lac wenlel yicʼot chaʼan tijicñayonla tiʼ pejtelel ora. La cujilix chaʼan mucʼʌch i coltañonla. ¿Chucoch? Come tilem ti Jehová yicʼot yujil chuqui yom bʌ lac chaʼan, i maʼañic i pʼisol i ñaʼtʌbal (Romanos 11:33). Cheʼ jaʼel xcʼuxbiyajʌch (1 Juan 4:8). Jiñi cʼuxbiya jiñʌch ñaxam bʌ ti Dios, miʼ pʌs tiʼ pejtelel chuqui mi yʌl, ti chuqui miʼ mel yicʼot tiʼ mandar.

16. Anquese xmulilonla yicʼot ili pañimil miʼ yʌqʼueñonla cabʌl wocol, pero ¿chuqui miʼ coltañonla chaʼan mi lac jacʼben i mandar Dios?

¹⁶ Pero jiñi mach yomic yʌl chaʼan cʼun tiʼ jacʼol i mandar Dios tiʼ pejtelel ora. Yom mi lac chaʼlen wersa chaʼan mi la cʌcʼ lac bʌ tiʼ contra ili pañimil (mulawil), come «añob tiʼ cʼʌb jiñi xjontolil» (1 Juan 5:19). Cheʼ jaʼel, yom mi lac chaʼlen wersa chaʼan maʼañic mi lac yajlel ti mulil muʼ bʌ mejlel i yʌqʼueñonla lac ñusʌben i mandar Dios (Romanos 7:21-25). Pero jiñi laj cʼuxbiya ti Dios jiñʌch miʼ mejlel i mʌl (jot) jiñi. Jehová miʼ yʌqʼuen bendición jiñi yom bʌ i jacʼben i tʼan chaʼan miʼ cʼuxbin. Cheʼ jaʼel, miʼ yʌqʼuen «chʼujul bʌ espíritu [...] muʼ bʌ i jacʼbeñob i tʼan» (Hechos 5:32). Jiñi espíritu miʼ yʌcʼ wem bʌ i wut ti lac tojlel: Wen tac bʌ lac melbal muʼ bʌ i coltañonla chaʼan mi lac chʌn jacʼben majlel i mandar Dios (Gálatas 5:22, 23).

17, 18. a) ¿Chuqui mi caj laj cʌn ila ti libro, i chuqui yom mi laj qʼuel ti ñuc cheʼ mi lac tsajin majlel? b) ¿Chuqui mi caj laj cʌn ti yambʌ cʌntesʌntel?

¹⁷ Ti ili libro mi caj laj cʌn principio tac, mandar tac  yicʼot chuqui yom bʌ Jehová mi lac mel ti jujumpʼejl qʼuin. Cheʼ woli laj qʼuel majlel, an chuqui tac yom bʌ mi lac chʼʌm ti ñuc. Ñaxam bʌ, Jehová maʼañic miʼ wersa xicʼonla chaʼan mi lac jacʼben i mandar, yom chaʼan loqʼuen ti lac pusicʼal cheʼ mi lac mel chuqui yom bʌ. I chaʼchajplel, Jehová miʼ pʌsbeñonla bajcheʼ yom mi lac chumtʌl chaʼan mi lac taj cabʌl bendición ili ora yicʼot laj cuxtʌlel mach bʌ añic miʼ jilel. Cojix bʌ, jiñʌch cheʼ mi mucʼʌch lac jacʼben i mandar tiʼ pejtelel lac pusicʼal, mi caj lac pʌs chaʼan mucʼʌch lac wen cʼuxbin.

¹⁸ Chaʼan miʼ cʼotel laj cʌn chuqui wem bʌ yicʼot chuqui mach bʌ weñic, Jehová tsiʼ yʌqʼueyonla jumpʼejl lac majtan: Laj conciencia. Jin chaʼan, mi la com chaʼan jiñi laj conciencia miʼ pʌsbeñonla bajcheʼ yom mi lac chaʼlen xʌmbal yom mi lac ñaxan cʌntesan, yaʼ ti yambʌ cʌntesʌntel mi caj laj cʌn bajcheʼ yom mi lac mel.