1, 2. Nemene la ka upi epuni troa hnimi Iehova Akötresie?

HETRE ihnimi nyipunieti kö koi Akötresie? Maine ase hë nyipunieti hane sa xepu me nue la mele i nyipunie troa nyi hlue i Iehova, haawe, thaa jole kö e tro epuni a sa, ka hape, eje hi, nge meköti hi lai! Nge thaa ewekë ka tro kö a jole koi së la troa hnimi Iehova. Easa hnimi Akötresie, ke, hnei Nyidrëti hna hnimi së. Celë hi hna qaja hnei Tusi Hmitrötr, kola hape: “Eësha aja nyidë ke pa i nyidëti [Iehova] hnimi shë.”—1 Ioane 4:19.

² Hnei Iehova hna ketre sipu amamane la ihnimi Nyidrëti koi së. Nyidrëti a hamë së la ihnadro ka mingöming thatraqa së. Nyidrëti a thupë së me hamëne la itre hne së hna ajane ngöne la götrane la ngönetrei. (Mataio 5:43-48) Nge ame la ka nyipi ewekë catr, tre, Nyidrëti a thupë së hnyawa ngöne la götrane la ua. Nyidrëti a hamë së la Wesi Ula i Nyidrë, ene la Tusi Hmitrötr. Ketre mina fe, Nyidrëti a upi së troa thithi koi Nyidrë cememine la mejiune laka tro Nyidrëti a drei së, me hamë së la uati hmitrötre i Nyidrë matre troa xatua së. (Salamo 65:2; Luka 11:13) Nge ame la ka nyipi ewekë catr, tre, hnei Nyidrëti hna upe la Nekö Hnimina i Nyidrë nyine Thupene Mele së, matre thepe së pi qa ngöne la ngazo memine la mec. Drei la etrune la aqane hnimi së hnei Iehova!—Ioane 3:16; Roma 5:8.

3. (a) Nemene la hna isa thele the së matre tro sa lapa qale catre kowe la ihnimi Akötresie? (b) Nemene la hnyinge ka tru nyine tro sa nyipi ewekëne hnyawa, nge ekaa ngön la mekune ka sa la hnyinge cili?

³ Ame la aja i Iehova, tre, ene la tro sa kapa epine palua la itre thangane la ihnimi Nyidrë. Ngo isa qanyi së kö troa iën, maine  tro sa hane kapa la itre manathithi cili maine thaa tro pena kö sa hane kapa itre ej. Kola hmekë së hnene la Wesi Ula i Akötresie, ka hape: “Nge thupë nyipunieti ju kö ngöne la ihnimi Akötesie . . . uti hë la mele ka tha ase palua kö.” (Iuda 21) Ame la xötrehnëewekë hna hape, “thupë nyipunieti ju kö,” tre, kola amamane laka, maine easa ajane troa lapa catre ngöne la ihnimi Akötresie, tre, hetre nyine tro sa isa kuca. Nyipi ewekë tro sa huliwa thenge la ihnimi Nyidrë. Qa ngöne lai, nyipi ewekë tro sa thele hnyawa, ka hape, ‘Tune kaa jë la aqane tro ni a amamane la ihniminge koi Akötresie?’ Kola sa la hnyinge celë ngöne la itre trenge ewekë hna qaja hnei aposetolo Ioane; hna hape: “Dei lola aja koi Akötesie, laka eësha denge thenge la ite wathebo i nyidë ; nge tha hace kö la ite wathebo i nyidë.” (1 Ioane 5:3) Loi e tro sa goeëne hnyawa  la aliene la itre trenge ewekë celë, pine laka easa ajane troa amamane kowe la Akötresi së la etrune la ihnimi së koi Nyidrë.

4, 5. Qaja jë la aqane nyiqaane kökötr e kuhu hni epuni la ihnimi epuni koi Iehova.

⁴ Nemene la hnei aposetolo Ioane hna mekun, ngöne la angeic a cinyihane la itre trenge ewekë celë, hna hape, “aja [ihnimi] koi Akötesie”? Mekune hi nyipunieti lo kola nyiqaane troa kökötre la ihnimi Iehova e kuhu itre hni nyipunie?

⁵ Pane mekune hmaca jë epuni lo epuni a xötrei atre la nyipici göi Iehova memine la itre aja i Nyidrë, nge epuni a hane nyiqaane lapaune koi Nyidrë. Epuni a trotrohnine laka, ngacama hna hnaho epuni ngöne la ngazo nge epuni a mekun, ka hape, hna thipetriji epuni hnei Akötresie, ngo ame pe, tre, hnei Iehova hna fe jëne Keriso matre ijiji epuni hmaca jë fe troa hane pexej; ewekë hna aluuzin ekö hnei Adamu, nge ka troa aijijë epuni troa hane kapa la mele ka thaa ase palua kö. (Mataio 20:28; Roma 5:12, 18) Epuni ha trotrohnine hnyawa la etrune la ewekë hna kuca hnei Iehova, ngöne laka, hnei Nyidrëti hna upe la Nekö Hnimina i Nyidrë matre troa meci pine la itre ngazo i epun. Ene pe kolo ha ketr la hni epun, nge nyiqaane kökötre jë hi la ihnimi epuni koi Akötresie, lo Atre amamane la ihnimi Nyidrëti ka tru koi epun.—1 Ioane 4:9, 10.

6. Tune kaa la aqane tro sa amamane la nyipi ihnimi së, nge nemene la hna upi së troa kuca hnene la ihnimi Akötresie?

⁶ Ngo ame la aliene hni cili, ene la easa hnimi Iehova, tre, kösë easë petre hi lai a nyiqaane la ihnimi nyipici së koi Iehova. Ame la ihnim, tre, thaa ketre aliene hni menu kö. Ame la troa nyipici la ihnimi së koi Iehova, tre, thaa ene kö la tro hi sa qaja, ka hape, “Eni a hnimi Iehova.” Ceitune hi la ihnimi memine la lapaun, laka, loi e troa mama hnene la itre huliwa hna kuca. (Iakobo 2:26) Ame la aja së asë, tre, ene la troa amamane la ihnimi së hnene la hna kuca la itre ewekë ka troa amadrinën la itre atr hne së hna hnim. Qa ngöne lai, ame hë la kola kökötre hnyawa la ihnimi Iehova e kuhu itre hni së, ene pe kola atraqatre mina fe la aja së troa mele thenge la itre ewekë ka amadrinën la hni ne la Tretretro së  e koho hnengödrai. Tune kaa, ka xome fe hë nyipunieti la bapataiso? Maine eje hi, tre, hnene hi lo lai nyipi ihnim me aqane inyipicikeu i epuni me Iehova, hna upi epuni troa axeciëne la ketre mekune ka tru, nge ka nyipi ewekë catr ngöne la mele i epun. Hnei epuni hna sa xepu koi Iehova troa kuca la aja i Nyidrë, me xome la bapataiso matre troa nyi hatrene la hnei epuni hna sa xepu. (Roma 14:7, 8) Easa troa ce wange la hnei aposetolo Ioane hna sisedrëne ngöne la aqane tro sa eatrëne la hne së hna isa sa xepu hnyawa.

7. Nemene la itre xaa wathebo hna acile hnei Akötresie, nge e tro sa drengethenge itre ej, ke kolo hi lai a hapeu?

⁷ Kola qaja hnei Ioane la aliene la aja [ihnimi] koi Akötresie, laka: “Easha denge thenge la ite wathebo i nyidë.” Nemene la itre wathebo i Akötresie? Iehova a hamë së la itre wathebo ka nyimutre ka thaa jole kö troa trotrohnin jëne la Wesi Ula i Nyidrë, ene la Tusi Hmitrötr. Drei la ketre ceitun, Nyidrëti a wathebone la itre atr troa iji menu la kahaitr, me kuci ngazo, me kuci idrola, me atrekënö, me thoi. (1 Korinito 5:11; 6:18; 10:14; Efeso 4:28; Kolose 3:9) Ame la troa drengethenge la itre wathebo i Akötresie, tre, ene la troa mele thenge la itre hna amekötine göi thiina ka thaa jole kö troa trotrohnin, ka eje e hnine la Tusi Hmitrötr.

8, 9. Nemene la nyine tro sa kuca matre troa amadrinë Iehova, ngöne lo itre jol hne së hna cile kow, nge kola mama laka pëkö wathebo nyine sane la itre jole cili? Hamëne jë la ketre ceitun.

⁸ Maine easa ajane troa amadrinë Iehova, thaa eje hmekuje kö la tro hi sa trongëne la itre wathebo i Nyidrë; hetre itre xaa nyine tro pala kö sa kuca. Thaa Iehova kö a hamë së la itre wathebo göi troa xom aconyi së, me musinëne la nöjei götranene la mele së. Haawe, maine jë ngöne la nöjei drai, tro sa cile kowe la itre jole ka nyimutre laka, pë hnyawa kö wathebo e hnine la Tusi Hmitrötr nyine san itre ej. Matre nemene e cili la nyine tro sa kuca matre troa amadrinë Iehova? Eje e hnine la Tusi Hmitrötr la itre ithuemacanyi ka amamane hnyawa la aqane waiewekë i Iehova. Ame la easa inine la Tusi Hmitrötr, easa atre la itre hnei Iehova hna ajan, me itre hnei Nyidrë hna sisin. (Salamo 97:10; Ite Edomë  6:16-19) Easa atrehmekune la itre aqane ujë me itre huliwa hna kuca ka tru alameken xajawa i Nyidrë. Maine tro sa catre thele troa atre la itre thiina i Iehova memine la itre jë i Nyidrë, haawe, tro hë së a nue la itre aqane waiewekë i Nyidrë troa wenë la itre mekune hne së hna troa axeciën, me thele matre thaa tro kö itre ej a gufa ngöne la itre huliwa nyine tro sa kuca. Celë hi matre, e cilë hë së kowe la ketre jol nge pëkö wathebo nyine san ej, haawe loi e troa ameköti së hnene la hne së hna atrehmekune hnyawa la “aja i Iehova.”—Efeso 5:17.

⁹ Hanawang la ketre ceitun, pëkö wathebo e hnine la Tusi Hmitrötr ka qaja koi së, ka hape, the goeëne kö la itre film maine televizio pena, ka amamai isi humuth maine kuci ngazo. Ngo hapeu, tro kö sa thipetrije la itre ewekë cili, ngacama pëkö sipu wathebo ka sewe së troa goeëne itre ej? Atre hi së la itre aqane waiewekë i Iehova ngöne la itre ewekë cili. Kola qaja hnyawa koi së hnene la Wesi Ula i Nyidrë, ka hape: “Kola sixele . . . la ate pi iangazo hnene la hnatesi nyidë.” (Salamo 11:5) Kola qaja fe hnei Tusi Hmitrötr, ka hape: “Tro Akötesieti a ahnëjinë angete nyi xetë me angete kuci ngazo.” (Heberu 13:4) Maine tro sa mekune hnyawa la itre trenge ewekë celë qaathene la ua i Akötresie, ijije hi tro sa atrehmekune hnyawa la aja i Akötresie. Qa ngöne lai, thaa easë kö a nue troa apuingazone la mele së hnene la itre hne së hna goeën, ene lo itre hna majemine kuca hna sisine hnei Akötresie. Atre hi së laka, ame la ka amadrinë Iehova, tre, ene la tro sa kötren la itre thiina ka ngazo, ke, kola thele hnene la fene celë troa uku së troa kapa ceitune me ketre nyine madrin ka troa hetre ethane kowe la mele së. *

10, 11. Pine nemene matre easa iëne troa drengethenge Iehova, nge nemene la aqane drengethenge nyine tro sa amamane koi Nyidrë?

¹⁰ Nemene la kepine hnapane matre tro sa drenge la itre wathebo i Iehova? Pine nemene matre ame ngöne la nöjei drai, tre, easa thele troa mele thenge la hne së hna atre, ene la aqane waiewekë i Akötresie? Thaa easë kö a iëne la ketre aqane ujë göne matre troa neën wanga nyi thupene jë koi së, maine troa neëne la  itre thangane ka ngazo ka traqa kowe la itre atr ka thatre kö la aja i Akötresie. (Galatia 6:7) Ngo tro pe sa xome la idrengethenge Iehova, ceitune me ketre aqane tro sa amamane la ihnimi së koi Nyidrë. Tune la nekönatr a thele troa amadrinën me kepe nyën hnene la keme i nyën, haawe, loi e tro fe sa thele troa kepe së hnei Iehova. (Salamo 5:12) Nyidrëti la Tretretro së, nge easa hnimi Nyidrë. Pëkö madrine ka tru maine nyipi manathithi pena, e hune la tro sa mele atre laka, kola “hnimi [së] hnei Iehova.”—Ite Edomë 12:2.

¹¹ Qa ngöne lai, thaa tro kö sa drengethenge me kuca la ketre ewekë nge thaa ajane pe së; ketre thaa tro kö a ië maine hetre ewekë pena hne së hna treqene ngön. * Thaa qanyi së kö troa isa iëne la wathebo nyine tro sa trongën, me drengethenge hmekuje hi ngöne la easa öhn, ka hape, ka loi koi së, maine ngöne la kola mama, ka hape, thaa ewekë ka tru kö nyine kuca, nge pëkö ejolene koi së. Easë pe a “denge thenge qa kuhu hni.” (Roma 6:17) Caasi hi la mekuna së memine la hna qaja hnene la atre cinyihane la salamo, kola hape: “Tro ni a aciaciane la ite wathebo i cilie, lo hnenge hna hnin.” (Salamo 119:47) Eje hi laka, aja së la troa drengethenge Iehova. Easa atrehmekune laka Nyidrëti la nyine tro sa drengethenge, nge Nyidrëti a thele the së troa pexej la aqane idrei së, nge thaa tro kö a drengethenge, ke, hetre thupene hna treqen. (Deuteronomi 12:32) Easa ajan tro Iehova a qeje së tune la aqane qeje Noa hnene la Wesi Ula i Nyidrë. Kola qaja hnei Tusi Hmitrötr la ketre atr ka lapaune me ka amamane la ihnimi nyidrë koi Akötresie, hnene la hna drengethenge ekö ngöne la itre macatre ka nyimutre; kola hape: “Hnei Noa hna kuca asë tune lo hnei Akötesieti hna ahnithe koi angeic ; tune hi lai hnei angeice hna kuca.”—Genese 6:22.

12. Eu la kola amadrinën la hni Iehova hnene la aqane drengethenge së?

¹² Nemene la mekuna i Iehova ngöne la easa drengethenge cememine la hni së ka ajan? Kola qaja hnene la Wesi Ula i Nyidrë  laka, easë hi lai a ‘amadrinën la hni’ Nyidrë. (Ite Edomë 27:11) Hapeu, kolo kö a amadrinëne la hni ne la Atre musi nge Joxu ne la hnengödrai memine la fen, hnene la aqane drengethenge së? Eje hi, thaa luelue kö së, nge hetre sipu kepine matre Nyidrëti a madrin! Hnei Iehova hna xupi së me amë the së la mekune troa isa ië hna ajan. Kolo lai a hape, thaa hna hnöthi së kö troa ië mekun; ijije hi tro sa iëne troa drengethenge Akötresie, maine ijije fe tro sa iëne troa thaa drei Nyidrë. (Deuteronomi 30:15, 16, 19, 20) Ame ngöne la easa ketre thele troa drengethenge Iehova, nge ihnimi së ka pexeje koi Nyidrë a uku së troa idrengethenge, easë hi lai a amadrinëne la hni ne la Tretretro së e koho hnengödrai. (Ite Edomë 11:20) Aqane iëne fe hi lai la aqane mele ka sisitria.

13, 14. Pine nemene la kola qaja, ka hape, “tha hace kö la ite wathebo” i Akötresie, nge tune kaa la aqane troa aceitunëne lai?

¹³ Kola qaja hnei aposetolo Ioane la ketre ewekë ka akeukawane hnyawa la itre hni göne la itre hna amekötine hnei Iehova, kola hape: “Tha hace kö la ite wathebo i nyidë.” (1 Ioane 5:3) Ka lolo nge thaa ka iqanangazo kö la itre hna amekötine hnei Iehova. Ijije fe hi tro la itre atr ka ngazo a hane drengethenge la itre wathebo i Nyidrë.

¹⁴ Ijije hi tro sa hamëne la ketre ceitune göne lai. Kola sipo nyipunie hnene la ketre enehmu i nyipunie troa xatua angeic pine laka angeic a troa saze hnalapa. Nyimutre la itre ikees nyine troa ajön. Ame itre xaa kees, tre, ijije hi troa ajöne hnene la ala caas, ngo ame itre xan, tre, ka hace nge loi e troa ce xome hnei ala lue. Kola iëne hnene la enehmu i nyipunie la itre ikees hnei angeic hna ajane tro epuni a ajön. Hapeu, tro kö angeic a sipo epuni troa ajöne caasine la itre ikees, nge atre hi angeice laka ka hace catre koi epun? Ohea. Thaa ajane kö angeic tro epuni a eatr qa ngöne la hna ajöne caasine itre ej. Ketre tune mina fe la ihnimi me eloi Akötresieti laka, thaa Nyidrëti kö a upi së troa xötrethenge la itre hna amekötine nge atre hi Nyidrëti, ka hape, ka jole catre tro sa trongën. (Deuteronomi 30:11-14) Thaa tro jë kö Nyidrëti a sipo së troa ajöne la ketre ehnefe ka thaa hmeku së kö.  Trotrohnine hnyawa hi Iehova la itre ifego së, pine laka, “ate kö nyidë la aqane tratrau shë ; nyidëti a mekune laka so ne hnadro shë.”—Salamo 103:14.

15. Pine nemene matre easa mejiune laka hetre thangane ka tru catr hne së hna troa kapa qa ngöne la hna trongene la itre hna amekötine hnei Iehova?

¹⁵ Eje hi lai laka, pë fe kö caa ehacene la itre hna amekötine hnei Iehova; hetre thangane catre itre ej kowe la mele së. (Isaia 48:17) Celë hi matre qaja jë Mose koi angetre Isaraela ekö, ka hape: “Hnei Iehova hna ahnithe koi huni troa kuca la nöjei wathebo celë mate qoue Iehova Akötesi shë, mate loi pala kö shë, mate amele shë hnei nyidë, mama ha ngöne la drai celë.” (Deuteronomi 6:24) Ijije mina fe tro sa mejiune laka, ame la Iehova a hamëne la itre wathebo i Nyidrë, tre, Nyidrëti hi lai a wanga atrune catrëne la mele së enehila me epine palua. Thatreine jë kö tro sa mekune, ka hape, Iehova a upi së troa kuca la ketre ewekë ka troa akötrë së. Ka thatrehmekune la inamacane i Iehova Akötresie. (Roma 11:33) Qa ngöne lai, atre hnyawa kö Nyidrëti la ka sisitria thatraqane la mele së. Kola mama fe thei Iehova laka Nyidrëti hi la ihnimi. (1 Ioane 4:8) Mele i Nyidrëti hi la ihnim, nge kola mama lai ngöne la nöjei hnei Nyidrëti hna qaja me kuca. Celë hi trepene la nöjei hna amekötine asë hnei Nyidrëti hna amë qëmekene la itre hlue i Nyidrë.

16. Ngacama catrehnine la itre iajojezi ne la fen me itre ethane la ngazo ka eje the së, pine nemene kö laka atreine së troa catre drengethenge?

¹⁶ Thaa kolo kö lai a qaja, ka hape, ame la troa drengethenge Akötresie, tre, ewekë ka hmaloi. Nyipi ewekë tro sa thipetrije la itre iajojezi ne la fene hnengödrai ka ngazo celë, ka “meköle thene la ate ka ngazo.” (1 Ioane 5:19) Nyipi ewekë mina fe tro sa isi pala hi memine la ngazo ka eje the së, ka uku së troa ena la itre wathebo i Iehova. (Roma 7:21-25) Ngo ijije hi tro la ihnimi së koi Akötresie a aijijë së troa ngaane la ngazo. Iehova a amanathithine la itre atr ka drengethenge, ke, angatre hi lai a amamane la etrune la ihnimi angatre koi Nyidrë. Nyidrëti a hamëne la uati hmitrötre i Nyidrë koi “angete denge thenge nyidë.” (Ite Huliwa 5:32) Celë hi uati hmitrötre lai ka aijijë së troa hetrenyi la itre wene ka nyipi lolo, ene la itre thiina ka sisitria ka troa xatua së troa catre drengethenge.—Galatia 5:22, 23.

17, 18. (a) Nemene la hne së hna troa wange e hnine la itusi celë, nge nemene la hne së hna troa mekune hnyawa pala hi ngöne la easa wange ej? (b) Nemene la hne së hna troa ithanatane ngöne la mekene ka troa xulu?

 ¹⁷ Ame ngöne la itusi celë, tre, easë a troa wange la itre trepene meköti Iehova me itre wathebo göi thiina, me itre xaa pengöne la aja i Nyidrë. Ame ngöne la easa goeëne la itre trepene meköti Iehova, nyipi ewekë troa eje hnine la he së la itre xaa mekune ka nyipi ewekë. Loi e tro sa mekune hmaca laka, thaa Iehova kö a huli së me uku së troa drengethenge la itre wathebo me itre trepene meköti Nyidrë; ngo loi pe koi Nyidrëti la drengethenge e kola xulu qa kuhu hni. Thaa tro pi kö sa thëthëhmine laka, ame la hnei Iehova hna thele the së, tre, ene la troa thupëne la aqane mele së matre troa kapa la itre manathithi ka tru enehila, nge matre troa eatrongë së elanyi kowe la mele ka epine palua. Nge loi e tro sa wanga atrune hnyawa la aqane drengethenge qa kuhu hni së, ke, celë hi ketre jëne ka tru tro sa amamane koi Iehova laka, atraqatre la ihnimi së koi Nyidrë.

¹⁸ Hnei Iehova hna hamë së la mekuthethew matre troa xatua së troa atrehmekune la loi me ngazo. Ngo maine easa ajane troa eatrongë së hnyawa hnene la mekuthethewe së, eje hi lai laka, nyipi ewekë troa inine ej; celë hi hne së hna troa ithanatane ngöne la mekene ka troa xulu.