1, 2. Na cava e uqeti iko mo lomani Jiova?

O LOMANA na Kalou? Kevaka o sa yalataki iko vei Jiova, o na vakaio! E daumaka qori, ni dodonu ga meda lomani Jiova ena vuku ni nona lomani keda. E tukuna na iVolatabu: “Eda veilomani baleta ni a liu sara ga na nona lomani keda na Kalou [o Jiova].”—1 Joni 4:19.

² E vakaliuliu o Jiova me vakaraitaka na nona lomani keda. E vakarautaka na vuravura totoka meda tiko kina kei na veika vakayago e ganiti keda. (Maciu 5:43-48) Koya e bibi sara, e kauaitaka na veika eda gadreva vakayalo. E vakarautaka nona Vosa na iVolatabu, e uqeti keda meda masu vua da qai vakadeitaka ni na rogoca, ena solia tale ga na yalona tabu me dusimaki keda. (Same 65:2; Luke 11:13) Na ivakaraitaki bibi duadua ni nona loloma, oya nona tala mai na luvena  vakamareqeti me voli keda mai na ivalavala ca kei na mate. E lomani keda dina o Jiova!—Wilika Joni 3:16; Roma 5:8.

3. (a) Meda tiko ga ena loloma ni Kalou, na cava ena vinakati? (b) Na taro bibi cava meda taroga, ena kune e vei na kena isau?

³ E vinakata o Jiova meda tiko ga ena nona loloma. Ia sa na qai vakatau sara ga qori vei keda yadua. E vakasalataki keda na Vosa ni Kalou: “Ni tiko ga ena loloma ni Kalou . . . ni oni nuitaka tiko na  bula tawamudu.” (Juta 21) Na matavosa “tiko ga” e dusia ni vinakati na sasaga meda tiko ga ena loloma ni Kalou. Meda vakaraitaka nida vakavinavinakataka nona loloma. E bibi gona meda taroga, ‘Au na vakaraitaka vakacava niu lomana na Kalou?’ Na kena isau e kune ena vosa uqeti vakalou nei Joni: “Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.” (1 Joni 5:3) E dodonu meda dikeva vinaka na ibalebale ni vosa qori nida via vakaraitaka vua na Kalou na levu ni noda lomani koya.

4, 5. (a) Na cava e dusia na matavosa “lomana na Kalou”? (b) Vakamacalataka se kadre vakacava e lomamu na nomu lomani Jiova.

⁴ Na cava a vakasamataka tiko o Joni ni vola na matavosa “lomana na Kalou”? E sega ni dusia nona lomani keda na Kalou, ia e dusia na noda lomani koya. O se nanuma tiko na gauna e tekivu kadre kina e lomamu na nomu lomani Jiova?

⁵ Vakasamataka mada ni o se qai vulica na ka dina me baleti Jiova kei na nona inaki, o qai vakabauta na ka o vulica qori. O kila kina ni o sucu ivalavala ca o qai yawaka na Kalou, ia ena vuku i Karisito, o rawa ni marautaka tale na bula uasivi kei na bula tawamudu a sega ni rawata o Atama. (Maciu 20:28; Roma 5:12, 18) O kila tale ga kina na  loloma levu e vakaraitaka o Jiova ena nona tala mai na luvena mareqeti duadua me mate ena vukumu. Na nomu kila qori e uqeti iko sara ga mo lomana na Kalou.—Wilika 1 Joni 4:9, 10.

6. E vakaraitaki vakacava na loloma dina? Na cava o vakatulewataka mo cakava ni o lomana na Kalou?

⁶ Ia qori na itekitekivu wale ga ni loloma dina ena vakaraitaki vei Jiova. Na loloma dina e sega ni ka ni vosa wale ga. O koya gona, ke dua e lomana dina na Kalou, ena sega ni tukuna ga “Au lomani Jiova.” Me vaka na vakabauta, na loloma dina e vakaraitaki ena ka eda cakava. (Jemesa 2:26) Eda na vakaraitaka na loloma dina nida cakava na veika e vakamarautaki koya eda lomana. Ke sa kadre gona e lomada na noda lomani Jiova eda na via muria na ivakarau ni bula e vakamarautaki koya. O iVakadinadina papitaiso? Ke vaka kina, na nomu lomani Jiova kei na nomu yalodina vua, a uqeti iko mo vakayacora na vakatulewa bibi duadua ena nomu bula. O yalataka mo cakava na lomana qai ivakadei ni yalayala qori na nomu papitaiso. (Wilika Roma 14:7, 8.) Nida dina ena noda yalayala vei Jiova e vauci kina na ka e vakamacalataka tarava na yapositolo o Joni.

7. Na cava eso na ivunau ni Kalou, cava e vauci ena noda muria na ivunau qori?

⁷ E tukuna o Joni ke da lomana na Kalou, “meda muria na nona ivunau.” Cava na ivunau  ni Kalou? O Jiova e vakatakila vei keda ena nona Vosa e levu nona ivunau. Kena ivakaraitaki, e vakatabuya na mateni, veiyacovi tawadodonu, qaravi matakau, butako, kei na lasu. (1 Korinica 5:11; 6:18; 10:14; Efeso 4:28; Kolosa 3:9) Nida muria na ivunau ni Kalou e vauci kina noda muria na ivakatagedegede savasava ena iVolatabu.

8, 9. Ena ituvaki e sega na kena ivakaro matata vakaivolatabu, eda na kila vakacava na loma i Jiova? Tukuna e dua na kena ivakaraitaki.

⁸ Nida vakamarautaki Jiova e sega ni okati ga kina noda muria na nona ivunau matata e volai tu ena nona Vosa. E sega ni kotora na lawa me lewa na basoga ni noda bula kece. Ena so na gauna ena basika na ituvaki e sega na kena ivunau matata vakaivolatabu. Eda na kila vakacava na ka e vakamarautaki Jiova? Na iVolatabu e vakamatatataka vei keda na rai ni Kalou. Eda na kila nida vulica ena iVolatabu na veika e taleitaka kei na veika e cata. (Wilika Same 97:10; Vosa Vakaibalebale 6:16-19) Eda na kila tale ga na rai kei na ivalavala e vakadonuya. Ke da qacoya na vulica na itovo i Jiova, eda na yalorawarawa me dusimaka na noda vakatulewa kei na noda ivalavala na nona rai. Ena ituvaki mada ga e sega na kena ivakaro matata vakaivolatabu, se rawa ga nida kila “na loma i Jiova.”—Efeso 5:17.

⁹ Kena ivakaraitaki, e sega ni vakaroti ena iVolatabu me kua ni saravi na iyaloyalo se porokaramu  ena tivi e vakaraitaki kina na itovo voravora se ivalavala dukadukali. Ia e sega ni gadrevi sara me dua na lawa matata me baleta na kena saravi se sega na iyaloyalo va qori. E matata vei keda na rai i Jiova ni vakatakila ena nona Vosa: O “[Jiova] e cati ira kece era taleitaka na itovo kaukaua.” (Same 11:5) E tukuna tale ga na iVolatabu: “Ni na lewai ira na dau veiyacovi tawadodonu . . . na Kalou.” (Iperiu 13:4) Nida vakasamataka na vosa uqeti vakalou qori, eda na kila se cava na loma i Jiova. Eda na sega ni sarava na iyaloyalo e vakaraitaki kina na ivalavala e cata na Kalou. E vakamarautaki koya noda yawaka na ka ni veivakamarautaki vakasisila e tukuni tu ni sega ni veivakaleqai. *

10, 11. Cava na vuna eda talairawarawa kina vei Jiova, na talairawarawa vakacava e vinakati?

¹⁰ Na cava e bibi kina me muri na ivunau ni Kalou? Na cava e gadrevi kina meda yalorawarawa ni moica noda bula me salavata kei na rai ni Kalou? E sega ni baleta ga noda via drotaka na itotogi se veika rarawa era sotava na vakawalena na inaki ni Kalou. (Kalatia 6:7) Ia eda okata noda talairawarawa vei Jiova me ivakaraitaki ni noda lomani koya. Me vaka e dua na gone e vinakata me vakadonui koya o tamana, eda vinakata tale ga me vakadonui keda o Jiova.  (Same 5:12) Eda lomani koya ni Tamada. Sega tale ni dua na ka ena vakamarautaki keda vakalevu, mai na noda kila ni noda ivakarau ni bula “e vakadonuya o Jiova.”—Vosa Vakaibalebale 12:2.

¹¹ Eda sega ni talairawarawa ena voraki se talairawarawa ga nida rawata kina e dua na ka. * Sega nida digia na ivakaro meda talairawarawa kina kei na kena me kua, sega tale ga nida talairawarawa ke ganiti keda se rawarawa na ivakaro, ia eda talairawarawa ga ‘mai vu ni lomada.’ (Roma 6:17) Eda duavata kei na daunisame ena nona kaya: “Au taleitaka na nomuni ivakaro, io, au dau lomana.” (Same 119:47) Io, eda vinakata meda talairawarawa vei Jiova ni veiganiti, e dodonu tale ga me taucoko qai vakatabakidua noda talairawarawa vua. (Vakarua 12:32) Eda vinakata me tukuna vei keda o Jiova na ka e tukuni ena nona Vosa me baleti Noa. Na peteriaki yalodina qori a vakaraitaka nona lomani Jiova ena nona talairawarawa vua me vica vata na yabaki, e kaya kina na iVolatabu: “E qai cakava o Noa na ka kece e vakaroti koya kina na Kalou. E cakava sara ga na ka e tukuni vua.”—Vakatekivu 6:22.

12. Na talairawarawa vakacava e vakamarautaki Jiova?

 ¹² Na cava na rai i Jiova me baleta na noda talairawarawa mai vu ni lomada? E kaya na iVolatabu ni ‘vakamarautaka na lomana.’ (Vosa Vakaibalebale 27:11) E vakamarautaki koya dina na Turaga Cecere ni lomalagi kei vuravura na noda talairawarawa? Io, e tiko na vuna vinaka e marau kina! O Jiova e solia vei keda na galala ni vakatulewa. Kena ibalebale nida rawa ni digia meda talairawarawa vua se sega. (Vakarua 30:15, 16, 19, 20) E marau vakalevu na Tamada vakalomalagi ni uqeti keda noda lomani koya meda talairawarawa mai vu ni lomada. (Vosa Vakaibalebale 11:20) Sa da digia tale ga kina na ivakarau ni bula vinaka duadua.

13, 14. Na cava e rawa ni tukuni kina ni “sega ni icolacola bibi na nona ivunau” na Kalou? Vakatauvatana.

¹³ E veivakacegui na ka e tukuna na yapositolo o Joni me baleta na ivakaro i Jiova: “E sega ni icolacola bibi na nona ivunau.” * Na ivakaro i  Jiova e sega ni dredre meda sega ni muria rawa na tamata ivalavala ca.

¹⁴ Kaya mada ke kerei iko e dua nomu itokani mo vukei koya ena nona toki ina dua tale na vale. E levu na kateni iyaya, so e mamada e rawa ni colata ga e dua, so tale e bibi e vinakati me rau colata e rua. Ni digia nomu itokani na kateni mo colata, ena kerei iko beka mo colata na kateni e kila ni bibi vei iko? Sega, ena sega ni vinakata mo colata duadua na kateni bibi o na mavoa kina. E va sara ga qori na Kalou yalololoma qai yalovinaka o Jiova, ena sega ni kerea meda muria na ivunau ena dredre vei keda. (Vakarua 30:11-14) Ena sega ni kerei keda meda colata e dua na icolacola bibi. “Ni kila vinaka o koya na keda ibulibuli, e nanuma tiko nida kuvuniqele,” sega ni lecava o Jiova ni vakaiyalayala ga na veika eda rawata.—Same 103:14.

15. Na cava eda kaya kina ni yaga vei keda na ivunau i Jiova?

¹⁵ Na ivunau i Jiova e sega ni veivakaocai; ia e yaga vei keda. (Wilika Aisea 48:17.) A tukuna vei ira na Isireli o Mosese: “E vakaroti keda o Jiova meda vakayacora sara na ivakaro kece qo, meda rerevaki Jiova tale ga na noda Kalou meda vinaka kina, meda bula tiko kina me vaka sa yaco tu vei keda nikua.” (Vakarua 6:24) Me vakataki ira na Isireli, meda lomavakacegu tale ga ni bulia o Jiova na lawa meda vinaka tawamudu kina. Ena  sega gona ni vakarota meda cakava na ka eda na vakaleqai kina. Ni tawavakaiyalayala na vuku i Jiova, e kila na veika e yaga vei keda. (Roma 11:33) E ivakaraitaki uasivi tale ga ni loloma. (1 Joni 4:8) E usutu sara ga ni nona bula na loloma, e yavutaki kina na veika e tukuna kei na veika e cakava, vaka kina na nona ivunau vei ira na nona tamata.

16. Na cava eda rawa kina ni talairawarawa, dina ga ni veivakacalai na vuravura ca qo kei na yagoda ivalavala ca?

¹⁶ E ka ni sasaga na talairawarawa vua na Kalou. E vinakati meda vorata na vuravura ca e “lewa tiko na vunica.” (1 Joni 5:19) E vinakati tale ga na sasaga meda valuta na yagoda ivalavala ca e dau vakavuna meda beca na lawa ni Kalou. (Roma 7:21-25) Ia nida lomana na Kalou eda na qaqa. O Jiova e vakalougatataki ira na via vakadinadinataka nodra loloma ena nodra talairawarawa vua. E solia na yalona tabu “vei ira era talairawarawa vua.” (Cakacaka 5:32) Na yalo tabu e veivakauqeti ena noda vuataka na veika totoka—na itovo talei e yaga ena noda saga meda talairawarawa.—Kalatia 5:22, 23.

17, 18. (a) Na cava eda na veivosakitaka ena ivola qo, na cava eso na tikina bibi meda nanuma tiko? (b) Na cava ena veivosakitaki ena ulutaga tarava?

¹⁷ Ena veivosakitaki ena ivola qo na ivakavuvuli i Jiova, nona ivakatagedegede savasava, kei na so tale na sala e vakatakilai kina na lomana. E  gadrevi meda nanuma tiko eso na tikina bibi. O Jiova e sega ni vakasaurarataki keda meda muria nona lawa kei na nona ivakavuvuli; e vinakata me vu mai lomada na noda talairawarawa. E kerei keda o Jiova meda muria na ivakarau ni bula eda na vakalougatataki kina ena gauna qo qai rawati kina na bula tawamudu. Meda okata na noda talairawarawa mai vu ni lomada me sala eda vakaraitaka kina na levu ni noda lomani Jiova.

¹⁸ Meda vakaduiduitaka na ka e donu mai na ka e cala, e solia vakayalololoma vei keda o Jiova na lewaeloma. Ia e bibi me vakavulici na lewaeloma me rawa ni idusidusi nuitaki. Ena veivosakitaki qo ena ulutaga tarava.