1, 2. Ngaa ginahigugma mo si Jehova nga Dios?

GINAHIGUGMA mo bala ang Dios? Kon nadedikar mo na ang imo kabuhi kay Jehova nga Dios, pat-od gid nga huo ang imo sabat. Nagakaigo gid kag natural lang nga higugmaon naton si Jehova. Ginahigugma naton ang Dios bangod ginahigugma niya kita. Ang Biblia nagasiling: “Nagahigugma kita, bangod sia [si Jehova] ang una nga naghigugma sa aton.”—1 Juan 4:19.

² Si Jehova ang una nga nagpakita sang iya gugma sa aton. Ginhatagan niya kita sing matahom nga duta nga aton ginapuy-an. Ginaamanan niya kita sang aton pisikal kag materyal nga mga kinahanglanon. (Mateo 5:43-48) Kag mas importante sa sini, ginapun-an niya ang aton espirituwal nga mga kinahanglanon. Ginhatag niya sa aton ang iya Pulong, ang Biblia. Ginaagda man niya kita nga mangamuyo sa iya kag nagapasalig sia nga pamatian niya kita kag buligan paagi sa iya balaan nga espiritu. (Salmo 65:2; Lucas 11:13) Labaw sa tanan, ginpadala niya ang iya pinalangga nga Anak bilang Manuggawad naton agod maluwas kita sa sala kag kamatayon. Daku gid nga gugma ang ginpakita ni Jehova sa aton!—Basaha ang Juan 3:16; Roma 5:8.

3. (a) Agod makapabilin kita sa gugma sang Dios, ano ang dapat naton himuon? (b) Ano ang importante nga pamangkot nga binagbinagon naton, kag diin naton makita ang sabat?

³ Luyag ni Jehova nga makabenepisyo kita sa iya gugma  sing dayon. Apang, depende sa aton kon bala luyag naton nga makabenepisyo sa sini ukon indi. Ang Pulong sang Dios nagapalig-on sa aton: ‘Magpabilin kamo sa gugma sang Dios nga nagadul-ong sa kabuhi nga wala sing katapusan.’ (Judas 21) Ang ekspresyon nga ‘magpabilin kamo’ nagapahangop nga agod makapabilin sa gugma sang Dios, may dapat kita himuon. Dapat naton ipakita nga ginahigugma gid naton sia. Gani, binagbinagon naton ining importante nga pamangkot, ‘Paano ko mapakita ang akon gugma sa Dios?’ Ang sabat makita sa ginsiling ni apostol Juan: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.” (1 Juan 5:3) Dapat binagbinagon naton sing maayo ang kahulugan  sini, bangod luyag naton ipakita sa aton Dios nga ginahigugma gid naton sia.

4, 5. (a) Ano ang ginapatuhuyan sang ekspresyon nga “gugma sa Dios”? (b) Ipaathag kon paano nagtubo ang imo gugma kay Jehova.

⁴ “Gugma sa Dios”—ano ang ginapatuhuyan ni apostol Juan sang ginsulat niya ini? Ginapatuhuyan niya ang aton gugma sa Dios, indi ang gugma sang Dios sa aton. Madumduman mo bala ang tion nga nagsugod sa pagtubo ang imo gugma kay Jehova?

⁵ Dumduma sing makadali sang una mo nga natun-an ang kamatuoran tuhoy kay Jehova kag sa iya mga katuyuan, kag nagtuo ka sa iya. Nahangpan mo nga bisan natawo ka nga makasasala kag nahamulag sa Dios, naghimo si Jehova sing kahimusan paagi sa Cristo agod matigayon mo ang kahimpitan nga nadula ni Adan kag mapanubli mo ang kabuhi nga wala sing katapusan. (Mateo 20:28; Roma 5:12, 18) Nahangpan mo ang daku gid nga sakripisyo ni Jehova sa pagpadala sang iya pinalangga nga Anak agod mapatay para sa imo. Natandog ang imo tagipusuon kag nabatyagan mo ang gugma sa Dios nga nagpakita sining daku nga gugma sa imo.—Basaha ang 1 Juan 4:9, 10.

6. Paano ginapakita ang tunay nga gugma, kag ano ang himuon mo bangod napahulag ka sang imo gugma sa Dios?

⁶ Apang ina nga balatyagon umpisa pa lang sang tunay nga gugma kay Jehova. Ang gugma indi lang isa ka balatyagon; kag indi man ini sa hambal lang. Ang matuod nga gugma sa Dios indi lang pagsiling, “Ginahigugma ko si Jehova.” Kaangay sang pagtuo, ang tunay nga gugma makita sa mga buhat nga ginahimo naton bangod napahulag kita sini nga gugma. (Santiago 2:26) Mapakita naton ang gugma paagi sa paghimo sang mga butang nga nagapahalipay sa aton ginahigugma. Gani, sang nanggamot na ang gugma kay Jehova sa imo tagipusuon, luyag mo nga ang imo pagkabuhi nagapahamuot sa imo langitnon nga Amay. Bawtismado ka na bala nga Saksi?  Kon huo, ang imo tudok nga pagpalangga kag debosyon kay Jehova amo ang nagpahulag sa imo nga himuon ang pinakaimportante nga desisyon sa imo kabuhi. Gindedikar mo ang imo kabuhi kay Jehova sa paghimo sang iya kabubut-on, kag ginsimbuluhan mo ini paagi sa pagpabawtismo. (Basaha ang Roma 14:7, 8.) Ang pagtuman sa sining serioso nga panaad kay Jehova amo ang ginapatuhuyan sang masunod nga ginsiling ni apostol Juan.

7. Ano ang pila ka sugo sang Dios, kag ano ang nalakip sa pagtuman sini?

⁷ Ginpaathag ni Juan ang kahulugan sang gugma sa Dios: “Tumanon naton ang iya mga sugo.” Ano ang mga sugo sang Dios? Ginhatagan kita ni Jehova sing espesipiko nga mga sugo paagi sa iya Pulong, ang Biblia. Halimbawa, ginadumilian niya ang pagpahubog, seksuwal nga imoralidad, pagsimba sa mga diosdios, pagpangawat, kag pagbinutig. (1 Corinto 5:11; 6:18; 10:14; Efeso 4:28; Colosas 3:9) Nalakip sa pagtuman sa mga sugo sang Dios amo ang pagkabuhi nahisuno sa maathag nga mga talaksan sang Biblia sa moral.

8, 9. Paano naton mahibaluan kon ano ang makapahamuot kay Jehova bisan sa mga kahimtangan nga wala sing espesipiko nga kasuguan sa Biblia? Maghatag sing halimbawa.

⁸ Apang, agod mapahamut-an si Jehova, indi lang pagtuman sa iya espesipiko nga mga sugo ang dapat naton himuon. Wala ginadiktahan sang mga kasuguan ni Jehova ang tanan naton nga ginahimo adlaw-adlaw. Gani kada adlaw, mahimo makaatubang kita sing madamo nga kahimtangan nga wala sing espesipiko nga sugo sa Biblia kon ano ang himuon. Sa sini nga mga kahimtangan, paano naton mahibaluan kon ano ang makapahamuot kay Jehova? Maathag nga ginapakita sang Biblia kon ano ang pagtamod sang Dios. Samtang ginatun-an naton ang Biblia, nahibaluan naton kon ano ang ginahigugma ni Jehova kag kon ano ang ginadumtan niya. (Basaha ang Salmo 97:10; Hulubaton 6:16-19) Nahantop naton ang mga panimuot kag mga buhat nga iya ginapabaloran. Samtang nagadalom  ang aton ihibalo tuhoy sa personalidad kag mga dalanon ni Jehova, mas labi nga ginapahisuno naton ang aton mga desisyon kag mga buhat sa iya pagtamod. Gani, bisan sa mga kahimtangan nga wala sing espesipiko nga kasuguan sa Biblia, masami nga mahantop naton “kon ano ang kabubut-on ni Jehova.”—Efeso 5:17.

⁹ Halimbawa, wala sing espesipiko nga sugo sa Biblia nga nagasugo sa aton nga indi magtan-aw sing mga pelikula ukon mga programa sa TV nga nagapagua sing kasingki ukon seksuwal nga imoralidad. Apang kinahanglan gid bala naton ang espesipiko nga kasuguan nga indi magtan-aw sini? Nahibaluan naton ang pagtamod ni Jehova sa sini. Ang iya Pulong maathag nga nagasiling sa aton: “Ginadumtan [ni Jehova] ang nagahigugma sa kasingki.” (Salmo 11:5) Nagsiling man ini: “Hukman sang Dios ang mga nagahimo sang seksuwal nga imoralidad.” (Hebreo 13:4) Paagi sa pagbinagbinag sining mga kasulatan, mahantop naton sing maathag kon ano ang kabubut-on ni Jehova. Gani wala kita nagatan-aw sing mga kalingawan nga maathag nga nagapakita sini nga sahi sang mga buhat nga ginadumtan sang Dios. Nahibaluan naton nga mahamuot si Jehova kon likawan naton ang kahigkuan sa moral, nga ginakabig sining kalibutan subong indi makahalalit nga kalingawan. *

10, 11. Ngaa ginatuman naton si Jehova, kag paano naton sia ginatuman?

¹⁰ Ano ang panguna nga rason nga ginatuman naton ang mga sugo sang Dios? Ngaa ginapahisuno naton ang aton pagkabuhi sa kon ano ang nahibaluan naton nga pagtamod sang Dios? Wala naton ini ginahimo agod lang makalikaw sa silot ukon sa kahalitan nga madangatan sang mga wala nagatuman sa kabubut-on sang Dios. (Galacia 6:7) Sa baylo, ginakabig naton ang pagtuman kay Jehova subong hamili nga kahigayunan nga mapakita naton  ang aton gugma sa iya. Subong nga luyag gid sang isa ka bata nga kahamut-an sia sang iya amay, luyag man naton nga kahamut-an kita ni Jehova. (Salmo 5:12) Sia ang aton Amay, kag ginahigugma naton sia. Nalipay gid kita nga mahibaluan nga ang aton pagkabuhi “ginakahamut-an ni Jehova.”—Hulubaton 12:2.

¹¹ Kon amo, ang aton pagtuman wala napilitan lang, kag wala man ini nagapili ukon wala ini sing kondisyon. * Wala naton ginatuman ang sugo bangod lamang kombeniente ini sa aton ukon mahapos ini himuon. Sa baylo, nagatuman kita sing kinabubut-on. (Roma 6:17) Nabatyagan naton ang ginbatyag sang salmista sa Biblia nga nagsulat: “Nalipay ako sa imo mga sugo, huo, ginahigugma ko sila.” (Salmo 119:47) Nalipay gid kita sa pagtuman kay Jehova. Nahibaluan naton nga dapat gid naton sia tumanon sing bug-os kag wala sing kondisyon, kag amo gid sini ang ginapatuman niya sa aton. (Deuteronomio 12:32) Luyag naton nga isiling ni Jehova sa aton ang ginsiling sang iya Pulong parte kay Noe. Tuhoy sa sining matutom nga patriarka, nga nagpakita sang iya gugma sa Dios paagi sa pagtuman sa Iya sa sulod sang madamo nga dekada, ang Biblia nagsiling: “Ginhimo ni Noe ang tanan nga ginsugo sang Dios sa iya. Amo gid ini ang ginhimo niya.”—Genesis 6:22.

12. Ngaa ang aton pagtuman nagapahalipay kay Jehova?

¹² Ano ang ginabatyag ni Jehova kon ginatuman naton sia sing kinabubut-on? Ginasiling sang iya Pulong nga ‘ginapasadya naton ang iya tagipusuon.’ (Hulubaton 27:11) Nalipay gid bala ang Soberanong Ginuo sang uniberso kon ginatuman naton sia? Huo, kag may rason gid sia nga malipay! Gintuga kita ni Jehova nga may kahilwayan sa pagbuot. Buot silingon, may kahilwayan kita sa pagpili; makapili kita kon bala tumanon  naton ang Dios ukon supakon sia. (Deuteronomio 30:15, 16, 19, 20) Kon kinabubut-on nga ginatuman naton si Jehova bangod ginahigugma gid naton sia, ginapahamut-an gid naton kag ginapahalipay ang aton langitnon nga Amay. (Hulubaton 11:20) Ginapili man naton ang pinakamaayo nga dalanon sang kabuhi.

13, 14. Ngaa masiling naton nga ang ‘mga sugo sang Dios indi mabug-at,’ kag paano ini mailustrar?

¹³ Makapalig-on gid ang ginsiling ni apostol Juan sa aton tuhoy sa mga ginapatuman ni Jehova: “Ang iya mga sugo indi mabug-at.” (1 Juan 5:3) Ang isa pa ka Biblia nagbadbad sini nga teksto nga: “Ang iya mga sugo indi tama kabudlay para sa aton.” (Maayong Balita nga Biblia) Ang mga ginapatuman ni Jehova makatarunganon kag indi mapiguson. * Ang iya mga kasuguan masarangan tumanon sang indi himpit nga mga tawo.

¹⁴ Sa pag-ilustrar: Ang imo suod nga abyan nagpabulig sa imo kay masaylo sia sing ilistaran. Madamo sia sing halakuton nga mga gamit. Ang iban mamag-an kag masarangan sang isa lang ka tawo, pero ang iban mabug-at amo nga kinahanglan tuwangan sang duha ka tawo. Ginpili sang imo abyan ang mga gamit nga hakwaton mo. Ipahakwat bala niya sa imo ang mga gamit nga nahibaluan niya nga indi mo madala? Indi, kay basi mabalian ka. Sing kaanggid, ang aton mahigugmaon kag mainayuhon nga Dios indi man maghatag sa aton sing mga sugo nga indi naton masarangan tumanon. (Deuteronomio 30:11-14) Indi niya kita pagpahakwaton sing tuman kabug-at nga lulan. Nakita ni Jehova ang aton mga limitasyon, “kay  nahibaluan gid niya kon paano kita ginhimo, ginadumdom niya nga kita yab-ok lamang.”—Salmo 103:14.

15. Ngaa makasalig kita nga ang mga sugo ni Jehova para gid sa aton kaayuhan?

¹⁵ Ang mga sugo ni Jehova indi mabug-at. Para gid ini sa aton kaayuhan. (Basaha ang Isaias 48:17.) Gani nasiling ni Moises sa mga Israelinhon sang una: “Ginsugo kami ni Jehova nga tumanon ini tanan nga pagsulundan kag magkahadlok kay Jehova nga aton Dios para sa aton kaayuhan pirme, agod padayon kita nga mabuhi, pareho subong.” (Deuteronomio 6:24) Makasalig man kita nga para gid sa aton dayon nga kaayuhan ang mga kasuguan ni Jehova. Kay man, may sugo bala si Jehova nga makahalit sa aton? Wala sing latid ang kaalam ni Jehova nga Dios. (Roma 11:33) Gani, nahibaluan niya kon ano ang labing maayo para sa aton. Si Jehova man ang pinakamaayo nga halimbawa sang gugma. (1 Juan 4:8) Makita mo ang iya gugma sa tanan niya nga ginahambal kag ginahimo. Amo ini ang basihan sang tanan niya nga sugo sa iya mga alagad.

16. Walay sapayan sang impluwensia sining malaut nga kalibutan kag sang aton pagkadihimpit, ngaa posible gihapon nga mangin matinumanon kita?

¹⁶ Wala ini nagapahangop nga mahapos pirme ang pagtuman sa Dios. Kinahanglan naton pamatukan ang mga impluwensia sining malaut nga kalibutan, nga “yara sa gahom sang isa nga malauton.” (1 Juan 5:19) Dapat man naton batuan ang pagkadihimpit, nga amo ang rason kon ngaa may huyog kita nga supakon ang mga kasuguan sang Dios. (Roma 7:21-25) Apang madaug naton ini bangod ginahigugma naton ang Dios. Ginapakamaayo ni Jehova ang mga nagatuman sa iya bangod ginahigugma nila sia. Ginahatagan niya sang iya balaan nga espiritu ang “mga nagatuman sa iya subong manuggahom.” (Binuhatan 5:32) Ini nga espiritu nagapatubas sing hamili nga mga kinaiya nga makabulig sa aton agod mangin matinumanon kita.—Galacia 5:22, 23.

17, 18. (a) Ano ang aton binagbinagon sa sini nga libro, kag samtang ginabinagbinag naton ini, ano ang aton hunahunaon? (b) Ano ang aton binagbinagon sa masunod nga kapitulo?

 ¹⁷ Sa sini nga libro, binagbinagon naton ang mga prinsipio kag mga talaksan sa paggawi nga ginapatuman ni Jehova, kag ang iban pa niya nga kabubut-on. Samtang ginabinagbinag naton ini, hunahunaon naton ang pila ka importante nga butang. Dumdumon naton nga wala kita ginapilit ni Jehova nga tumanon naton ang iya mga kasuguan kag mga prinsipio; luyag niya nga tumanon naton sia sing kinabubut-on kag sing tinagipusuon. Dumdumon man naton nga ginapangabay kita ni Jehova nga magkabuhi sa paagi nga mabaton naton ang madamo nga pagpakamaayo karon kag magadul-ong sa kabuhi nga walay katapusan sa palaabuton. Kag tamdon naton ang aton bug-os tagipusuon nga pagtuman subong hamili nga kahigayunan nga ipakita kay Jehova nga ginahigugma gid naton sia.

¹⁸ Agod mabuligan kita nga mahantop ang maayo kag malain, ginhatagan kita ni Jehova sing konsiensia. Apang, agod mangin masaligan nga giya ang aton konsiensia, dapat ini hanason. Binagbinagon naton ini sa masunod nga kapitulo.