1, 2. Wetin mek yu lɛk Jiova Gɔd?

YU LƐK Gɔd? If yu dɔn gi yu layf to Jiova Gɔd, yu go mɔs ansa se, yɛs a lɛk Gɔd! Ɛn dat na tru. Fɔ lɛk Jiova na tin we wi ɔl ebul du. Wi lɛk Gɔd bikɔs Gɔd dɔn sho wi se i lɛk wi. Na dat mek di Baybul se: “Wi lɛk Gɔd ɛn wi kɔmpin bikɔs na Gɔd fɔs lɛk wi.”​—Jɔn In Fɔs Lɛta 4:19.

² Na Jiova fɔs dɔn sho se i lɛk wi. I dɔn mek dis wɔl fayn fayn wan fɔ lɛ wi de de. I kia fɔ wi ɛn na dat mek i de gi wi di tin dɛn we wi nid, lɛk ren ɛn san. (Matyu 5:43-45) Ɛn i de mek wi de lan bak bɔt am. I dɔn gi wi in Wɔd, di Baybul. Pantap dat, i de tɛl wi fɔ pre to am, ɛn i prɔmis wi se i go yɛri wi ɛn gi wi in oli spirit fɔ ɛp wi. (Sam 65:2; Lyuk 11:13) Bɔt di tin we pas ɔl, na we i sɛn in wangren Pikin fɔ kam day fɔ wi fɔ pul wi pan sin ɛn day. Ɔl dis dɔn sho wi se Jiova lɛk wi bad bad wan!​—Rid Jɔn 3:16; Lɛta Fɔ Rom 5:8.

3. (a) Wetin wi fɔ du fɔ mek Gɔd kɔntinyu fɔ lɛk wi? (b) Us impɔtant kwɛstyɔn wi gɛt fɔ tɔk bɔt? Usay wi go fɛn di ansa?

³ Jiova lɛk wi ɛn i want lɛ wi ɛnjɔy in blɛsin sote go. Bɔt i lɛf to wi fɔ disayd if wi go ɛnjɔy di lɛk we i lɛk wi  ɔ if wi nɔ go ɛnjɔy am. Gɔd in Wɔd tɛl wi se: “Una fɔ du dɛn tin we go mek Gɔd stil de blɛs una bikɔs i lɛk una.” (Jud In Lɛta 21) We di Baybul se “una fɔ du dɛn tin,” i sho se fɔ mek Gɔd kɔntinyu fɔ lɛk wi, wi fɔ du sɔntin. Wi fɔ du tin dɛn we de sho se wi lɛk am. Wan impɔtant kwɛstyɔn we wi fɔ aks wisɛf na, ‘Aw a go sho se a lɛk Gɔd?’ Di ansa de insay wetin Gɔd bin tɛl di apɔsul Jɔn fɔ rayt. I se: “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.” (Jɔn In Fɔs Lɛta 5:3) I go fayn mek wi tink gud wan bɔt dɛn wɔd ya, bikɔs wi want fɔ sho se wi rili lɛk Gɔd.

4, 5. Aw yu bigin fɔ lɛk Jiova?

⁴ Di apɔsul Jɔn bin rayt se: “We wi lɛk Gɔd wi de du ɔl wetin i tɛl wi fɔ du.” Wetin di apɔsul Jɔn bin de tink we i rayt dɛn wɔd ya? I bin de tink bɔt di we aw wi lɛk Gɔd na wi at. Yu ebul mɛmba di tɛm we yu bigin fɔ lɛk Jiova na yu at?

⁵ Tink bɔt di tɛm we yu fɔs lan di tru bɔt Jiova ɛn di tin dɛn we i want du. Ɛn tink bak bɔt di tɛm we yu bigin biliv am. Yu dɔn kam fɔ no se pan ɔl we wi na pipul dɛn we de sin, Jiova dɔn sɛn Jizɔs fɔ kam day fɔ wi. Dis dɔn gi yu di chans fɔ gɛt di kayn layf we Adam bin lɔs ɛn i dɔn ivin gi yu di chans fɔ gɛt layf we go de sote go. (Matyu 20:28; Lɛta Fɔ Rom 5:12, 18) Yu dɔn kam fɔ no se na big big tin Jiova du we i sɛn in Pikin fɔ kam day fɔ wi. Dis dɔn mek yu gladi bad, ɛn yu bigin lɛk di Gɔd we dɔn sho se i lɛk yu.—Rid Jɔn In Fɔs Lɛta 4:9, 10.

6. Aw pɔsin go sho se i rili lɛk sɔmbɔdi? We yu lɛk Gɔd, wetin dat dɔn mek yu du?

⁶ We yu fil se yu lɛk Jiova, dis jɔs de sho se yu dɔn bigin fɔ lɛk am. Fɔ fil ɔ tɔk se yu lɛk pɔsin nɔ min se yu rili lɛk am. We yu lɛk Gɔd nɔto fɔ jɔs tɔk se “Mi a lɛk Jiova.” Fɔ rili lɛk pɔsin, i tan lɛk we yu gɛt fet. Na di tin dɛn we pɔsin de du, de sho se i rili lɛk sɔmbɔdi. (Jems 2:26) Yu de sho se yu lɛk pɔsin we yu du di tin dɛn we de mek di pɔsin gladi. So we yu lɛk Jiova wit ɔl yu at, yu go want fɔ liv yu layf di we aw i want. Yu dɔn baptayz as Jiova Witnɛs? If yu dɔn baptayz, dat de sho se yu dɔn du wetin impɔtant pas ɛni ɔda tin na yu layf. Wetin mek yu du dis? Yu du dis bikɔs  yu rili lɛk Gɔd ɛn dɔn rɛdi fɔ du wetin i want. Yu bin dɔn prɔmis Jiova insay prea se yu want gi yu layf to am, ɛn yu bin sho se yu rɛdi fɔ du dat we yu baptayz. (Rid Lɛta Fɔ Rom 14:7, 8.) So fɔ lɛ wi du wetin wi bin dɔn prɔmis Jiova, wi gɛt fɔ du di ɔda tin we di apɔsul Jɔn tɔk bɔt.

7. Wetin na sɔm tin dɛn we Gɔd tɛl wi? Wetin i min fɔ du wetin Gɔd tɛl wi?

⁷ Jɔn tɛl wi wetin i min fɔ lɛk Gɔd. I se: “We wi lɛk Gɔd wi de du ɔl wetin i tɛl wi fɔ du.” Wetin na di tin dɛn we Gɔd tɛl wi? Jiova tɛl wi bɔku tin dɛn insay in Wɔd, di Baybul. Fɔ ɛgzampul, i se wi nɔ fɔ drɔnk, du mami ɛn dadi biznɛs di we aw i nɔ want, wi nɔ fɔ wɔship aydɔl, tif ɛn lay. (Fɔs Lɛta Fɔ Kɔrint 5:11; 6:18; 10:14; Lɛta Fɔ Ɛfisɔs 4:28; Lɛta Fɔ Kɔlɔse 3:9) Fɔ du wetin Gɔd tɛl wi min se, wi fɔ liv wi layf di we aw di Baybul se.

8, 9. Pan ɔl we Jiova nɔ gi lɔ fɔ ɔltin we wi de du, aw wi go ebul no wetin i want? Gi wan ɛgzampul.

⁸ Fɔ lɛ Jiova gladi fɔ wi, wi nɔ jɔs gɛt fɔ du di tin dɛn we i tɛl wi klia wan na in Wɔd, di Baybul. Jiova nɔ gi wi lɔ dɛn fɔ kɔntrol ɔltin we wi de du. So ɛvride, bɔku tin dɛn kin mit wi we di Baybul nɔ gi lɔ bɔt. We dɛn kayn tin ya mit wi, aw wi go no wetin fɔ du we go mek Jiova gladi? Di Baybul tɛl wi klia wan di we aw Jiova de tink. We wi de stɔdi di Baybul, wi de lan bɔt di tin dɛn we Jiova lɛk ɛn di tin dɛn we i nɔ lɛk. (Rid Sam 97:10; Prɔvabs 6:16-19) Wi go lan bak bɔt di kayn abit dɛn we i lɛk. Di mɔ wi lan bɔt Jiova in kwaliti dɛn ɛn di tin dɛn we i de du, na di mɔ  wi go ebul tink ɛn du tin dɛn di we aw i want. If sɔntin mit yu we no lɔ nɔ de na di Baybul bɔt dat, wetin yu go du? Di Baybul se wi fɔ “tray fɔ no wetin di Masta want” wi fɔ du.​—Lɛta Fɔ Ɛfisɔs 5:17.

⁹ Fɔ ɛgzampul, di Baybul nɔ gi wi ɛni lɔ we de tɛl wi se wi nɔ fɔ wach fim ɔ tɛlivishɔn program dɛn we de sho bɔku fɛt-fɛt ɔ mami ɛn dadi biznɛs. Bɔt yu fil se wi fɔ gɛt lɔ we de tɛl wi se wi nɔ fɔ wach dɛn kayn tin ya? Wi no aw Jiova de si dɛn tin ya. Di Baybul tɛl wi klia wan se: “[Jiova] nɔ lɛk udat lɛk fɔ du bad.” (Sam 11:5) Di Baybul tɔk bak se: “Gɔd go jɔj dɛn wan we liv fri layf, ɛn i go jɔj ɛni mared uman we kip ɔda man ɛn ɛni mared man we kip ɔda uman.” (Di Ibru Pipul Dɛn 13:4) We wi tink gud wan bɔt wetin di Baybul se, go ɛp wi fɔ si klia wan wetin Jiova lɛk ɛn wetin i nɔ lɛk. Ɛn dis go mek wi nɔ want wach ɛnitin we Gɔd et, na fim, tɛlivishɔn, Intanɛt ɔ ɛni ɔdasay. Plɛnti dɔti tin dɛn de we pipul dɛn de put an pan tide fɔ ɛnjɔy dɛnsɛf, ɛn dɛn tink se dɛn tin ya nɔ bad na Gɔd in yay. Bɔt wi no se dɛn tin ya bad na Jiova in yay, ɛn i de gladi we wi nɔ de put an pan dɛn. *

10, 11. Wetin mek wi de obe Jiova? Aw wi fɔ obe Jiova?

¹⁰ Wetin na di men rizin we mek wi de du ɔl di tin dɛn we Gɔd tɛl wi? Wetin mek ɛvride wi want fɔ liv wi layf di we aw Gɔd want? Wi nɔ de obe Gɔd jɔs bikɔs wi nɔ want lɛ i pɔnish wi ɔ bikɔs wi nɔ want lɛ bad tin apin to wi. (Lɛta Fɔ Galeshya 6:7) Bɔt, wi de obe Jiova bikɔs wi want sho se wi lɛk am. Jɔs lɛk aw  pikin kin du fayn tin dɛn fɔ lɛ in papa lɛk am, na so wisɛf fɔ du fayn tin dɛn fɔ mek Gɔd lɛk wi. (Sam 5:12) Jiova na wi Papa ɛn wi lɛk am. Wi gladi ɛn fil satisfay we wi no se wi de liv wi layf di rayt we, we go mek Jiova “blɛs” wi.​—Prɔvabs 12:2.

¹¹ So wi nɔ de obe Jiova bikɔs dɛn de fos wi; ɔ wi de pik wetin wi go obe ɔ wi de obe jɔs bikɔs wi nɔ want sɔfa. * Wi nɔ de pik-ɛn-chuz wetin fɔ obe pan Gɔd in lɔ dɛn, we min se wi de obe sɔm ɛn nɔ de obe sɔm. Bɔt wi dɔn rɛdi wi “at fɔ du ɔl” wetin Gɔd want. (Lɛta Fɔ Rom 6:17) Wi fɔ fil lɛk di pɔsin we rayt Sam 119 we se: “A lɛk yu lɔ dɛn, a de ɛnjɔy dɛn.” (Sam 119:47) Wi lɛk fɔ du wetin Jiova want. Wi no se wi fɔ obe Jiova wit ɔl wi at, ɛn na dat i want lɛ wi du. (Ditarɔnɔmi 12:32) Wi want lɛ Jiova tɔk fayn bɔt wi lɛk aw i bin tɔk fayn bɔt Noa. Noa bin lɛk Gɔd bay we i bin obe am, na dat mek di Baybul se: “Noa du ɔl wetin PAPA GƆD tɛl am fɔ du.”​—Jɛnɛsis 6:22.

12. Aw wi fɔ obe Jiova we go mek i gladi?

¹² Aw Jiova de fil we wi de obe am wit ɔl wi at? Di Baybul se, dis de mek in at “gladi.” (Prɔvabs 27:11) Yu tink se we wi de obe Jiova, de rili mek in at gladi? Yɛs, i de gladi ɛn i gɛt gud rizin we mek i de gladi! Jiova gi wi fridɔm fɔ du ɛnitin we wi want fɔ du. Dis min se wi fri fɔ disayd if wi go obe Jiova ɔ wi nɔ go obe am. (Ditarɔnɔmi 30:15, 16, 19, 20) We wi du wetin Jiova tɛl wi fɔ du wit ɔl wi at, ɛn du am bikɔs wi  lɛk am, dis de mek wi Papa we de na ɛvin, gladi. (Prɔvabs 11:20) Dis de sho bak se wi dɔn chuz di bɛst we aw fɔ liv wi layf.

13, 14. Wetin mek di Baybul se Gɔd in lɔ dɛn “nɔ traŋa fɔ wi”? Gi ɛgzampul.

¹³ Di apɔsul Jɔn tɛl wi sɔntin bɔt Jiova in lɔ dɛn we go mek wi nɔ wɔri. I se: “Wetin i tɛl wi fɔ du nɔ traŋa.” Di Grik wɔd we dɛn yuz fɔ translet di wɔd “traŋa” na Jɔn In Fɔs Lɛta 5:3 min “ebi.” * Nɔbɔdi nɔ go se di tin dɛn we Jiova tɛl wi fɔ du nɔ mek sɛns ɔ i tranga. Ɔlman ebul du di tin dɛn we Gɔd tɛl wi fɔ du.

¹⁴ Lɛ wi tɔk smɔl bɔt wan ɛgzampul. Lɛ wi se yu gɛt wan tayt padi we want muf, ɛn i tɛl yu fɔ go ɛp am. I gɛt bɔku tin dɛn fɔ kɛr go. Sɔm dɛn ebi; wan pɔsin nɔ go ebul tot dɛn. Bɔt sɔm dɛn nɔ ebi, wan pɔsin go ebul tot dɛn. Yu padi bin dɔn pik di tin dɛn we i want mek yu tot. Yu tink se yu padi go pik tin dɛn we ebi tumɔs we yu nɔ go ebul tot? Nɔ, i nɔ go du dat. I nɔ go want mek ɛni bad tin apin to yu we yu de tray fɔ kɛr di lod dɛn. Semweso, Gɔd lɛk wi ɛn i nɔ go tɛl wi fɔ du sɔntin we i no se i at fɔ du ɔ we wi nɔ go ebul du. (Ditarɔnɔmi 30:11-14) I nɔ go ɛva gi wi lod we wi nɔ go ebul tot. Jiova no wetin wi ebul fɔ du ɛn wetin  wi nɔ ebul fɔ du. Di Baybul se: “I no aw i mek wi; i nɔ de fɔgɛt se na dɔti i tek mek wi.”​—Sam 103:14.

15. Wetin mek wi no se Jiova in lɔ dɛn na fɔ wi yon bɛtɛ wan?

¹⁵ Jiova in lɔ dɛn nɔ tranga atɔl; i gi wi dɛn fɔ wi yon bɛtɛ wan. (Rid Ayzaya 48:17.) Na dat mek Mozis tɛl di Izrɛlayt dɛn se: “PAPA GƆD dɔn tɛl dɛn traŋa wan se dɛn fɔ de obe di lɔ dɛn ɛn rɛspɛkt PAPA GƆD we na dɛn PAPA GƆD ɔltɛm, so dat i go de kɔba dɛn ɔltɛm lɛkɛ aw i bin dɔn kɔba dɛn te da de de.” (Na wi mek am italiks; Ditarɔnɔmi 6:24) Wisɛf biliv se na bikɔs Jiova lɛk wi ɛn i want mek gud fala wi sote go, mek i gi wi in lɔ dɛn. Jiova nɔ go gi wi ɛni lɔ we go mek bad tin apin to wi. Jiova na Gɔd we gɛt sɛns pasmak. (Lɛta Fɔ Rom 11:33) So na in no wetin gud fɔ wi. Dɔn, Jiova gɛt lɔv pas ɔlman. (Jɔn In Fɔs Lɛta 4:8) Ɔltin bɔt Jiova na lɔv. Na lɔv de mek i de se ɛn du ɛnitin. So na lɔv mek i gi wi ɔl in lɔ dɛn.

16. Pan ɔl we dis wɔl ɛn wi yon bɔdi kin want mek wi du bad, wetin mek wi fɔ tray fɔ obe Jiova?

¹⁶ Bɔt dis nɔ min se i kin izi fɔ du wetin Gɔd tɛl wi fɔ du ɔltɛm. Wi gɛt fɔ tray tranga wan fɔ du wetin i tɛl wi bikɔs di wɔl we wi de, rili bad. Na dat mek di Baybul se na “Setan de rul di ol wɔl.” (Jɔn In Fɔs Lɛta 5:19) Wi fɔ tray tranga wan bak nɔ fɔ fala dis wi bɔdi we de mek wi sin ɛn pwɛl Gɔd in lɔ. (Lɛta Fɔ Rom 7:21-25) Bɔt di lɛk we wi lɛk Gɔd, go mek wi ebul du wetin i want. Jiova de blɛs di wan dɛn we de sho se dɛn lɛk am bay we dɛn de obe am. I de gi in oli spirit to “dɛn pipul we de du wetin i tɛl dɛn fɔ du.” (Di Apɔsul Dɛn Wok [Akt] 5:32) Dis spirit de mek wi gɛt  fayn fayn abit dɛn we go ɛp wi fɔ kɔntinyu fɔ du wetin Gɔd want.​—Lɛta Fɔ Galeshya 5:22, 23.

17, 18. (a) Wetin wi go lan bɔt insay dis buk? As wi de lan dɛn tin ya, wetin wi fɔ mɛmba? (b) Wetin wi go tɔk bɔt na di ɔda chapta?

¹⁷ Insay dis buk wi go lan bɔt di tin dɛn we Jiova de tich wi fɔ du, aw wi fɔ liv wi layf ɛn plɛnti ɔda tin dɛn we Jiova want lɛ wi du. As wi de lan dɛn tin ya, lɛ wi mɛmba se Jiova nɔ de fos ɛnibɔdi fɔ obe in lɔ dɛn. I want mek wi obe am wit ɔl wi at. Lɛ wi mɛmba bak se, Jiova de aks wi fɔ liv wi layf di rayt we, we go mek wi gɛt bɔku blɛsin rayt naw ɛn gɛt layf we go de sote go tumara bambay. Ɛn lɛ wi obe Jiova wit ɔl wi at bikɔs dis de gi wi di chans fɔ sho se wi rili lɛk am.

¹⁸ Jiova dɔn put sɔntin insay wi we de ɛp wi fɔ no wetin rayt ɛn wetin rɔng. Dɛn kɔl am kɔnshɛns. Bɔt fɔ lɛ di kɔnshɛns wok fayn, wi fɔ tren am. Na dat wi go lan bɔt na di ɔda chapta.