အဆၢဒိၣ် ၁
“တၢ်အဲၣ်ကစၢ်ယွၤ စံးတၢ်န့ၣ်”
“တၢ်အဲၣ်ယွၤမ့ၢ်အအံၤ, လၢပတိၢ်န့ၢ် အတၢ်မၤလိာ်လီၤ. ဒီးအတၢ်မၤလိာ်န့ၣ် တကီတခဲဘၣ်လီၤ.”—၁ ယိၤဟၣ် ၅:၃.
၁, ၂. တၢ်မနုၤ ထိၣ်ဂဲၤထီၣ်နၤလၢ နကအဲၣ် ယဟိဝၤအဂီၢ်လဲၣ်.
နအဲၣ်ကစၢ်ယွၤ ကစီဒီဧါ. နဟ့ၣ်လုၢ်ထီၣ်နသးဆူ ယဟိဝၤအိၣ်မ့ၢ်ဝံၤလံဒီး နကစံးဆၢက့ၤသပှၢ်တၢၢ်လၢ နအဲၣ်အီၤန့ၣ်လီၤ. နကြၢးစံးဆၢက့ၤ ဒ်သိးန့ၣ်လီၤ. ပတၢ်အဲၣ် ယဟိဝၤန့ၣ်မ့ၢ်တၢ်လၢ အကြၢးဝဲဘၣ်ဝဲ နီၢ်နီၢ်လီၤ. နီၢ်နီၢ်, ပတၢ်အဲၣ်ကစၢ်ယွၤန့ၣ် မ့ၢ်တၢ်အဲၣ်ဆၢက့ၤ ကစၢ်အတၢ်အဲၣ်ပှၤန့ၣ်လီၤ. လံာ်စီဆှံ စံးဝဲလၢ “ပအဲၣ်တၢ်ကွံတၢ်လီၤ, အဂ့ၢ်ဒ်အံၤ, အဝဲဒၣ် [ယဟိဝၤ] အဲၣ်ဆိပှၤလီၤ.”—၁ ယိၤဟၣ် ၄:၁၉.
၂ ယဟိဝၤ ပာ်ဖျါအတၢ်အဲၣ်ပှၤ အဆိကတၢၢ်လီၤ. အဝဲဟ့ၣ်ပှၤ ဟီၣ်ခိၣ်ဟံၣ်ဃံလၤလီၤ. ကစၢ်အံးထွဲကွၢ်ထွဲ ပနီၢ်ခိဒီး တၢ်သူတၢ်စွဲလၢအလိၣ်ဒီး ပှၤတဖၣ်လီၤ. (မးသဲ ၅:၄၃- ၄၈) အကါဒိၣ်ကတၢၢ်န့ၣ်, ကစၢ်အံးထွဲကွၢ်ထွဲ ပနီၢ်သးအတၢ်လိၣ်ဘၣ်တဖၣ်လီၤ. ကစၢ်ဟ့ၣ်ပှၤ အကလုၢ်ကထါ, လံာ်စီဆှံန့ၣ်လီၤ. လၢန့ၣ်အမဲာ်ညါ, အဝဲကွဲမုာ်ပှၤလၢ ပကဃ့ဘါထုကဖၣ်ဆူအအိၣ်ဒီး အုၣ်ခီၣ်ဝဲလၢ ကဒိကနၣ်ပတၢ်ထုကဖၣ်ဒီး ကဟ့ၣ်ပှၤသးစီဆှံလၢ ကမၤစၢၤပှၤအဂီၢ်န့ၣ်လီၤ. (စံးထီၣ်ပတြၢၤ ၆၅:၂; လူၤကၣ် ၁၁:၁၃) လၢတၢ်ခဲလၢာ်အဖီခိၣ်, အဝဲဟ့ၣ်လီၤ အဖိခွါလုၢ်ဒိၣ်ပှ့ၤဒိၣ်ကတၢၢ် ဒ်တၢ်ပှ့ၤက့ၤကစၢ်အဃိ ပဘၣ်တၢ်အုၣ်က့ၤခီၣ်က့ၤပှၤလၢ တၢ်သံဒီးတၢ်ဒဲးဘးန့ၣ်လီၤ. မ့ၢ်မး ယဟိဝၤ ပာ်ဖျါအတၢ်အဲၣ်ပှၤ ဒိၣ်မးထဲအံၤညါန့ၣ်လီၤ.—ယိၤဟၣ် ၃:၁၆; ရိမ့ၤ ၅:၈.
၃. (က) ပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံပူၤအဂီၢ် လၢပအိၣ်တခီ တၢ်မနုၤလိၣ်ဝဲလဲၣ်. (ခ) လိၣ်လၢပကဘၣ် ဆိကမိၣ်သကိး တၢ်သံကွၢ်အကါဒိၣ် မနုၤလဲၣ်, ဒီးပကထံၣ်ဘၣ်အစၢဖဲလဲၣ်.
၃ ယဟိဝၤအဲၣ်ဒိးဝဲလၢ ပဒိးန့ၢ်ဘၣ်အတၢ်အဲၣ် လီၤထူလီၤယိာ်န့ၣ်လီၤ. ဘၣ်ဆၣ်, ပကဒိးန့ၢ်ဘၣ်, တဒိးန့ၢ်ဘၣ်န့ၣ် သန့ၤထီၣ်အသးလၢ ပဝဲသ့ၣ်တဂၤစုာ်စုာ် ပတၢ်ဃုထၢန့ၣ်လီၤ. လံာ်စီဆှံ ဆီၣ်ထွဲပှၤဒ်အံၤလီၤ, “ဒီးဟံးဃာ်ပၢၤဃာ် သုသးလၢကစၢ်ယွၤအတၢ်အဲၣ်တၢ်ကွံအပူၤ, . . . တၢ်မူအထူအယိာ်လၢ အတၢ်သးကညီၤဒၣ်ဝဲအပူၤ အခါန့ၣ်တက့ၢ်.” (ယူဒၤ ၂၁, ခစ) တၢ်ကတိၤလၢအမ့ၢ် “ဟံးဃာ်ပၢၤဃာ် သုသး” န့ၣ်နဲၣ်ဖျါဝဲလၢ ပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤအဂီၢ် ပကဘၣ်မၤတၢ်အိၣ်ဝဲန့ၣ်လီၤ. ပတၢ်အဲၣ်ဆၢက့ၤ ကစၢ်အံၤကဘၣ်အိၣ်ဖျါ ဝဲဒၣ်န့ၣ်လီၤ. လၢတၢ်န့ၣ်အဃိ, ပကဘၣ်ဆိကမိၣ် တၢ်သံကွၢ်အကါဒိၣ် တမံၤလၢ အမ့ၢ် ‘ယပာ်ဖျါထီၣ် ယတၢ်အဲၣ် ကစၢ်ယွၤကသ့ဒ်လဲၣ်’. တၢ်စံးဆၢအံၤပထံၣ်ဘၣ်ဖဲ တၢ်မၢဖိယိၤဟၣ်လၢ အဒိးန့ၢ်ဘၣ်သးစီဆှံ အတၢ်ကတိၤတဖၣ်လၢအမ့ၢ်, “အဂ့ၢ်ဒ်အံၤ, တၢ်အဲၣ်ယွၤမ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ်န့ၣ်တကီတခဲဘၣ်လီၤ.” (၁ ယိၤဟၣ် ၅:၃) ပအဲၣ်ဒိးပာ်ဖျါထီၣ်လၢ ပအဲၣ်ကစၢ်ယွၤ ဒိၣ်မးအဃိ ပကြၢးသမံသမိးကွၢ် တၢ်ကတိၤတဖၣ်အံၤ အခီပညီလီၤတံၢ်လီၤဆဲးလီၤ.
“တၢ်အဲၣ်ကစၢ်ယွၤ စံးတၢ်န့ၣ်”
၄, ၅. (က) တၢ်ပာ်ဖျါလၢ တၢ်အဲၣ်ယွၤန့ၣ် အဲၣ်ဒိးစံးဝဲ တၢ်မနုၤလဲၣ်. (ခ) နတၢ်အဲၣ်ယဟိဝၤ စးထီၣ်သူၣ်လီၤအသးလၢ နသးပူၤဒ်လဲၣ်န့ၣ် တဲဖျါထီၣ်တက့ၢ်.
၄ ဖဲတၢ်မၢဖိယိၤဟၣ် ကွဲးဝဲတၢ်ကတိၤလၢအမ့ၢ် “တၢ်အဲၣ်ကစၢ်ယွၤ” အံၤအခါ တၢ်မနုၤ အိၣ်လၢအသးပူၤလဲၣ်. တၢ်အံၤအဲၣ်ဒိးစံးဝဲလၢ ပဝဲတဂၤစုာ်စုာ် ပတၢ်သူၣ်အိၣ်သးအိၣ် အဒိၣ်အယိာ် လၢကစၢ်ယွၤအဖီခိၣ်န့ၣ်လီၤ. မ့ၢ်နသ့ၣ်နီၣ်ထီၣ်လၢ နစးထီၣ်အဲၣ်ယဟိဝၤ လၢနသးပူၤအဆၢကတီၢ်န့ၣ်ဧါ.
တၢ်ဟ့ၣ်လုၢ်ထီၣ်သးဒီး တၢ်ဒိးဘျၢထံန့ၣ် မ့ၢ်တၢ်ပနီၣ်လၢ ပစးထီၣ်အိၣ်မူလၢ တၢ်စူၢ်ယဟိဝၤလၢတၢ်အဲၣ်တၢ်ကွံအပူၤလီၤ
၅ ဆိကမိၣ်ကွၢ်က့ၤတစိာ်ဖိလၢ နစးထီၣ်မၤလိ တၢ်မ့ၢ်တၢ်တီလၢ ဘၣ်ဃးယဟိဝၤဒီး ကစၢ်အတၢ်တိာ်ပာ်အဂ့ၢ်ဒီး နအိၣ်ထီၣ်ဒီးတၢ်နာ်အခါန့ၣ်တက့ၢ်. နသ့ၣ်ညါထီၣ်ဘၣ်လံလၢ နအိၣ်ဖျဲၣ်ထီၣ်ဒ် ပှၤတၢ်ဒဲးဘးဖိလၢ အယံၤဒီးယွၤသနာ်က့ နကဒိးန့ၢ်က့ၤ တၢ်လၢတၢ်ပှဲၤလၢ အၤဒၣ်ဒုးလီၤမၣ်ကွံာ်တဖၣ်ဒီး တၢ်မူအထူအယိာ်အဂီၢ် ကစၢ်အိးထီၣ်ဝဲကျဲခီဖျိလၢ ခရံာ်န့ၣ်လီၤ. (မးသဲ ၂၀:၂၈; ရိမ့ၤ ၅:၁၂, ၁၈) ဖဲယဟိဝၤ ပျဲလီၤအဖိခွါသးဘိလၢ ကတူၢ်သံအသးလၢ နဂီၢ်အခါ, အဝဲဘၣ်တူၢ်ဆါအသးထဲလဲၣ်န့ၣ် နသ့ၣ်ညါထီၣ်ဘၣ်လီၤ. ဖဲန့ၣ်အခါ နသးကဟူးဂဲၤထီၣ်ဒီး နကအဲၣ်ဘၣ် ကစၢ်ယွၤလၢ အပာ်ဖျါအတၢ်အဲၣ်နၤ ဒိၣ်မးထဲအံၤညါန့ၣ်လီၤ.—၁ ယိၤဟၣ် ၄:၉, ၁၀.
၆. ပပာ်ဖျါတၢ်အဲၣ် နီၢ်နီၢ်အံၤဒ်လဲၣ်. တၢ်အဲၣ်ကစၢ်ယွၤန့ၣ် ထိၣ်ဂဲၤထီၣ်နၤလၢ နကမၤတၢ်မနုၤလဲၣ်.
၆ ဘၣ်ဆၣ်, သးအတၢ်တူၢ်ဘၣ်အံၤန့ၣ် မ့ၢ်ဒံးဒၣ်တၢ်စးထီၣ်အဲၣ်နီၢ်နီၢ် ယဟိဝၤန့ၣ်လီၤ. တၢ်အဲၣ်အံၤန့ၣ် တမ့ၢ်ထဲဒၣ် သးအတၢ်တူၢ်ဘၣ်, ဒီးထဲဒၣ်တၢ်ကတိၤဧိၤဘၣ်. တၢ်အဲၣ်နီၢ်နီၢ်ကစၢ်ယွၤန့ၣ် ပာ်ဃုာ်အါန့ၢ်တက့ၢ်ဒံး တၢ်ကတိၤလၢ “ယအဲၣ်ယဟိဝၤ”န့ၣ်လီၤ. ဒ်တၢ်စူၢ်တၢ်နာ် အသိး တၢ်အဲၣ်နီၢ်နီၢ်န့ၣ် အိၣ်ဖျါတြၢၢ်ကလာ်လၢ တၢ်ဖံးတၢ်မၤလီၤ. (ယၤကိာ်၂:၂၆) ပမ့ၢ်စံးလီၤတံၢ်လီၤဆဲးန့ၣ် ပပာ်ဖျါထီၣ် ပတၢ်အဲၣ်ခီဖျိ ပမၤမုာ်ပှၤလၢ ပအဲၣ်ဘၣ်အီၤအသးန့ၣ်လီၤ. လၢတၢ်န့ၣ်အဃိ, နတၢ်အဲၣ်ယဟိဝၤ သူၣ်ထီၣ်အသးလၢ နသးပူၤအခါ နကအဲၣ်ဒိးအိၣ်မူဒ် ကျဲလၢအဘၣ် ပၢ်အိၣ်လၢမူခိၣ်အသးန့ၣ်လီၤ. နမ့ၢ်ပှၤအုၣ်အသးလၢ အဘျၢထံဝံၤလံဧါ. မ့မ့ၢ်ဒ်န့ၣ်ဒီး, တၢ်အဲၣ်အဒိၣ်အယိာ်ဒီး တၢ်သးတီဒီး ယဟိဝၤအံၤန့ၣ် ဒုးအိၣ်ထီၣ်တၢ်ပာ်လီၤသး အကါဒိၣ်ကတၢၢ်လၢ နတၢ်အိၣ်မူပူၤန့ၣ်လီၤ. နနီၢ်ကစၢ်ဒၣ်ဝဲ နဟ့ၣ်လုၢ်ထီၣ်နသးဆူ ယဟိဝၤအအိၣ်လၢနကမၤ အတၢ်ဘၣ်သးအဂီၢ်, ဒီးနတၢ်ဟ့ၣ်လုၢ်ထီၣ်သးန့ၣ် နပာ်ဖျါထီၣ်အီၤလၢ တၢ်ဒိးဘျၢထံန့ၣ်လီၤ. (ရိမ့ၤ ၁၄:၇, ၈) တၢ်မၤလၢပှဲၤထီၣ် တၢ်အၢၣ်လီၤအီလီၤ အဒိၣ်အယိာ်အံၤဒီး ယဟိဝၤန့ၣ်ပာ်ဃုာ်ဒီး တၢ်မၢဖိယိၤဟၣ် အတၢ်ပာ်ဖျါလၢခံတဖၣ်န့ၣ်လီၤ.
“ပတိၢ်န့ၢ် အတၢ်မၤလိာ်လီၤ”
၇. ကစၢ်ယွၤအတၢ်မၤလိာ် တနီၤန့ၣ်မ့ၢ်မနုၤလဲၣ်. ဒီးတၢ်တိၢ်န့ၣ် တၢ်မၤလိာ်န့ၣ် ပာ်ဃုာ်ဒီး တၢ်မနုၤလဲၣ်.
၇ ယိၤဟၣ်တဲနၢ်ပၢၢ်ဝဲလၢ တၢ်အဲၣ်ကစၢ်ယွၤ စံးတၢ်န့ၣ်မ့ၢ် “ပတိၢ်န့ၢ်အတၢ် မၤလိာ်လီၤ”. ကစၢ်ယွၤ အတၢ်မၤလိာ်တဖၣ် မ့ၢ်မနုၤလဲၣ်. ယဟိဝၤဟ့ၣ်ပှၤ တၢ်မၤလိာ် လီၤတံၢ်လီၤဆဲး အါမးလၢ အကလုၢ်ကထါ လံာ်စီဆှံပူၤန့ၣ်လီၤ. အဒိ, ကစၢ်တြီဝဲ တၢ်အလုၢ်အလၢ်ဒ်သိး တၢ်အီမူၤသံး, တၢ်မၤကမၣ်မုၣ်ကမၣ်ခွါ, တၢ်ဘါတၢ်ဂီၤ, တၢ်ဟုၣ်တၢ်ဒီး တၢ်ကတိၤကဘျံးကဘျၣ်တဖၣ်လီၤ. (၁ ကရံၣ်သူး ၅:၁၁; ၆:၁၈; ၁၀:၁၄; အ့းဖ့းစူး ၄:၂၈; ကလီးစဲ ၃:၉) တၢ်တိၢ်န့ၢ် ယွၤအတၢ်မၤလိာ်န့ၣ် ပာ်ဃုာ်ဒီးတၢ်မၤထွဲဒ် လံာ်စီဆှံတၢ်သိၣ်တၢ်သီလၢ အကဆှီတဖၣ်အသိးန့ၣ်လီၤ.
၈, ၉. တၢ်အိၣ်သးလၢ လံာ်စီဆှံတၢ်မၤလိာ် လီၤတံၢ်တအိၣ်ဒၣ်လဲာ် ပသ့ၣ်ညါ ယဟိဝၤအတၢ်ဘၣ်သး သ့ဒ်လဲၣ်. ဟ့ၣ်အဒိတက့ၢ်.
၈ ထဲဒၣ်ပဒိကနၣ် ယဟိဝၤအတၢ်မၤလိာ်လၢ အလီၤတံၢ်လီၤဆဲးတဖၣ်န့ၣ် ပဒိးန့ၢ်ဘၣ်ကစၢ်အတၢ်ဘၣ်သး တသ့ဘၣ်. လၢပတၢ်အိၣ်မူ ကိးသနၢၣ် ဒဲးအပူၤန့ၣ် ယဟိဝၤတထုးဃံးပှၤလၢ အတၢ်မၤလိာ်တဖၣ်ဘၣ်. လၢတၢ်န့ၣ်အဃိ, တၢ်အိၣ်အသးအါမးလၢ ကိးနံၤဒဲးပကွၢ်ဆၢၣ်မဲာ်ဘၣ်အဂီၢ် လံာ်စီဆှံတၢ်မၤလိာ်လီၤတံၢ်တအိၣ်ဘၣ်. မ့မ့ၢ်ဒ်န့ၣ်ဒီး တၢ်လၢယဟိဝၤဘၣ်အသးတဖၣ်န့ၣ် ပသ့ၣ်ညါဘၣ်ကသ့ဒ်လဲၣ်. လံာ်စီဆှံပူၤ အိၣ်ဒီးတၢ်နဲၣ်ဖျါလၢ အပာ်ဖျါထီၣ် ကစၢ်ယွၤအတၢ် ဆိကမိၣ်တဖၣ်န့ၣ်လီၤ. ဖဲပမၤလိလံာ်စီဆှံအခါ ပသ့ၣ်ညါထီၣ်ဘၣ် ယဟိဝၤအဲၣ်တၢ်ဒီး သးဟ့တၢ်တဖၣ်လီၤ. (စံးထီၣ်ပတြၢၤ ၉၇:၁၀; ကတိၤဒိ ၆:၁၆-၁၉) ဒီးပထံၣ်သ့ၣ်ညါဘၣ် တၢ်ပာ်သူၣ်ပာ်သးဒီး တၢ်ဖံးတၢ်မၤလၢ ကစၢ်ပာ်လုၢ်ပာ်ပှ့ၤဝဲ တဖၣ်န့ၣ်လီၤ. ဒ်ပမၤလိအါထီၣ်ဘၣ် ယဟိဝၤအတၢ်ဂ့ၤတၢ်ဝါဒီး အကျဲတဖၣ်အသိး ပဟ့ၣ်အခွဲးအါထီၣ်လၢ ကစၢ်အတၢ်ဆိကမိၣ် ကနဲၣ်လိ ပတၢ်ပာ်လီၤသး ဒီးကလုၢ်ဘၢပတၢ်မၤတဖၣ်န့ၣ်လီၤ. လၢတၢ်အံၤအဃိ, တၢ်အိၣ်သးလၢ လံာ်စီဆှံတၢ်မၤလိာ်လီၤတံၢ်လီၤဆဲး မ့ၢ်တအိၣ်ဒၣ်လဲာ် “တၢ်ဘၣ်ကစၢ်အသးဒ်လဲၣ်န့ၣ်” ပထံၣ်သ့ၣ်ညါနၢ်ပၢၢ်အီၤသ့ဝဲလီၤ.—အ့းဖ့းစူး ၅:၁၇.
၉ အဒိ, လံာ်စီဆှံပူၤ တၢ်မၤလိာ်လၢ ပတဘၣ်ကွၢ် တၢ်ဂီၤမူ, ကွဲၤထံၣ်ဟူ တၢ်ရဲၣ်တၢ်ကျဲၤလၢ အဒုးနဲၣ်ဖျါ တၢ်မၤဆူၣ်မၤစိး မ့တမ့ၢ် တၢ်ကလုာ်ကလိၤတဖၣ် တအိၣ်ဘၣ်. ဘၣ်ဆၣ်, ပလိၣ်ဘၣ်နီၢ်နီၢ် တၢ်မၤလိာ်လၢ အတြီတၢ်ကွၢ် တၢ်တဖၣ်အံၤန့ၣ်ဧါ. ပသ့ၣ်ညါလၢ ယဟိဝၤထံၣ်ဝဲ တၢ်သ့ၣ်တဖၣ်အံၤဒ်လဲၣ်န့ၣ်လီၤ. ကစၢ်အကလုၢ်ကထါစံးပှၤ ပျီပျီလၢ “ပှၤလၢအအဲၣ်ဒိး တၢ်မၤအၢန့ၣ် [ယဟိဝၤ] ယွၤသးဟ့အီၤလီၤ.”(စံးထီၣ်ပတြၢၤ ၁၁:၅) စံးစ့ၢ်ကီးဝဲလၢ “မ့မ့ၢ်ပှၤမၤကမၣ် ပိာ်မုၣ်ပိာ်မၢၤ, ဒီးပှၤလၢအမၤကမၣ် ပှၤမါန့ၣ်, ယွၤကစံၣ်ညီၣ်အီၤလီၤ.” (ဧ့ၤဘြံၤ ၁၃:၄) ခီဖျိပဆိကမိၣ်ကွၢ် တၢ်ကတိၤလၢ ဘၣ်တၢ်ကွဲးအီၤလၢ သးစီဆှံအံၤန့ၣ် ပထံၣ်သ့ၣ်ညါဘၣ် ယဟိဝၤအတၢ်ဘၣ်သး တဖၣ်တြၢၢ်ကလာ်လီၤ. လၢတၢ်န့ၣ်အဃိ, ပတဃုထၢ တၢ်မၤမုာ်ပသးလၢ တၢ်ကွၢ်တၢ်ဂီၤလၢ ပာ်ဖျါဝဲလုၢ်လၢ်လၢ ယွၤသးဟ့တဖၣ်န့ၣ်ဘၣ်. ပသ့ၣ်ညါပာ်လၢ ယဟိဝၤဘၣ်အသး ဖဲပဟးဆှဲး တၢ်မၤမုာ်မၤဖှံသးလၢ ဟီၣ်ခိၣ်ပာ်ဖျါကမၣ်ဝဲလၢ တၢ်ဘၣ်ယိာ်အလီၢ်တအိၣ်, လၢအမ့ၢ်တၢ်သကဲာ်ပဝးလၢ အလီၤသးဘၣ်အၢတဖၣ်န့ၣ်လီၤ. *
၁၀, ၁၁. ဘၣ်မနုၤအဃိ ပဃုထၢကျဲလၢ ပကဒိကနၣ်ယဟိဝၤအကလုၢ်လဲၣ်, ဒီးတၢ်ဒိကနၣ်ကစၢ်အကလုၢ်န့ၣ် ကဘၣ်မ့ၢ်ဝဲ တၢ်ဒိကနၣ်ဒ်လဲၣ်.
၁၀ တၢ်ဂ့ၢ်မိၢ်ပှၢ်လၢ ပကဘၣ်တိၢ်န့ၢ် ကစၢ်ယွၤအတၢ်မၤလိာ်န့ၣ် မ့ၢ်မနုၤလဲၣ်. ဘၣ်မနုၤအဃိ ကိးနံၤဒဲးပအဲၣ်ဒိးအိၣ်မူဒ် ကစၢ်ယွၤအတၢ်ဆိကမိၣ်အသိးန့ၣ်လဲၣ်. တမ့ၢ်ပဃုထၢလၢ ပကဃ့ၣ်ပူၤဖျဲးလၢတၢ်စံၣ်ညီၣ် မ့တမ့ၢ် ပအဲၣ်ဒိးဟးဆှဲး တၢ်ဘၣ်ယိၣ်ဘၣ်ဘီလၢ ပှၤလၢအလဲၤကပာ် ကစၢ်အတၢ်ဘၣ်သးတဖၣ် ကွၢ်ဆၢၣ်မဲာ်ဘၣ်ဝဲ တၢ်အဘျုးအၢတဖၣ်အဃိဘၣ်. (ကလၤတံ ၆:၇) လၢတၢ်န့ၣ်အလီၢ်, တၢ်စူၢ်ယဟိဝၤန့ၣ်ပပာ်အီၤဒ် တၢ်ခွဲးတၢ်ယာ်လီၤဆီ တခါလၢ ပကပာ်ဖျါ ပတၢ်အဲၣ်အီၤန့ၣ်လီၤ. ဒ်ဖိသၣ်တဂၤ အသးဆူၣ်လၢ အဲၣ်ဒိးမၤန့ၢ် အပၢ်အတၢ်ဘၣ်သးအသိး, ပအဲၣ်ဒိးမၤန့ၢ်ယဟိဝၤအတၢ်ဘၣ်သးလီၤ. (စံးထီၣ်ပတြၢၤ ၅:၁၂) ကစၢ်မ့ၢ်ပပၢ်ဒီး ပအဲၣ်အီၤန့ၣ်လီၤ. တၢ်လၢကဟ့ၣ်ပှၤ တၢ်သူၣ်မံသးမုာ်ဖးဒိၣ် အါန့ၢ်ဒံး ပသ့ၣ်ညါပာ်လၢ ပအိၣ်မူဒ်ကျဲလၢ ယဟိဝၤ “ဘၣ်အသး”န့ၣ်တအိၣ်ဘၣ်.—ကတိၤဒိ ၁၂:၂
၁၁ လၢတၢ်န့ၣ်အဃိ, ပဝဲသ့ၣ်တဖၣ် တမ့ၢ်ပဒိကနၣ် တၢ်လၢတၢ်သးတအိၣ်, တၢ်ဃုထၢဒိကနၣ်တၢ် မ့တမ့ၢ် တမ့ၢ်တၢ်ဒိကနၣ်လီၤဆီတၢ်ဘၣ်. * ဒီးပတဃုထၢစူၢ်တၢ်လၢ ပသးဒၣ်ဝဲ, ဒီးတမ့ၢ်ထဲဒၣ် ပဒိကနၣ်တၢ်လၢ တၢ်ဒိကနၣ်အံၤညီအခါ မ့တမ့ၢ် ဖဲပမၤဘၣ်အီၤ ဘၣ်ဘျီးဘၣ်ဒါ မ့တမ့ၢ် တၢ်ကီတၢ်ခဲတအိၣ်အခါဘၣ်. လၢတၢ်န့ၣ်အလီၢ်, ပ‘ဒိကနၣ်တၢ်လၢ သးဒီဖျၢၣ်လီၤ’. (ရိမ့ၤ ၆:၁၇. ခစ)ပတူၢ်ဘၣ်ဒ်ပှၤကွဲးထါစံးထီၣ်ပတြၢၤ စံးဝဲအသိး, “ယကသူၣ်ဖှံသးညီလၢ နတၢ်မၤလိာ်လၢယအဲၣ်အီၤအပူၤန့ၣ်လီၤ.” (စံးထီၣ်ပတြၢၤ ၁၁၉:၄၇) မ့ၢ်လီၤ, ပသးအိၣ်စူၢ် ယဟိဝၤလီၤ. ပအၢၣ်လီၤတူၢ်လိာ်လၢ ကစၢ်ကြၢးန့ၢ်ဘၣ်ဝဲ ဒီးဃ့ဝဲပတၢ်ဒိကနၣ် လၢာ်လၢာ်ဆ့ဆ့လီၤ. (၅ မိၤၡ့ ၁၂:၃၂) ဒ်လံာ်စီဆှံ စံးဘၣ်နိအၤအသိး ပအဲၣ်ဒိးလၢ ယဟိဝၤစံးစ့ၢ်ကီးပှၤ ဒ်န့ၣ်သိးလီၤ. ဘၣ်ဃးဒီး သးပှၢ်လၢအတီ, ပှၤလၢအပာ်ဖျါထီၣ် တၢ်အဲၣ်ကစၢ်ယွၤခီဖျိ စူၢ်ဝဲလၢ တဆံနံၣ်အါမးန့ၣ် လံာ်စီဆှံစံးဝဲဒ်အံၤလီၤ, “စီၤနိအၤမၤဝဲ, ဒ်ကယဲၢ်တၢ်လၢ ယွၤမၤလိာ်အီၤအသိးန့ၣ်, မၤဝဲဒ်န့ၣ်အသိးလီၤ.”—၁ မိၤၡ့ ၆:၂၂.
၁၂. ပတၢ်ဒိကနၣ်န့ၣ် မၤသးခုယဟိဝၤလၢ ဖဲလဲၣ်အဆၢကတီၢ်လဲၣ်.
၁၂ ပဒိကနၣ်တၢ်လၢ တၢ်သးအိၣ်အဃိ ယဟိဝၤအသးကမၤသးဒ်လဲၣ်. လံာ်စီဆှံစံးဝဲလၢ, ပမၤဒ်န့ၣ်အဃိ ကစၢ်‘အသးခု’လီၤ. (ကတိၤဒိ ၂၇:၁၁) ပတၢ်ဒိကနၣ်န့ၣ် မၤသးခုကစၢ်လၢ အပၢဘၣ်မူဟီၣ်ကယၢအသး နီၢ်နီၢ်ဧါ. မၤသးခုနီၢ်နီၢ်လီၤ. ယဟိဝၤအိၣ်ဒီးတၢ်ဂ့ၢ် လီၤတံၢ်လၢကသးခုဝဲန့ၣ်လီၤ. ယဟိဝၤတ့လီၤပှၤလၢ သးလၢအဃုထၢတၢ်လၢ တၢ်သဘျ့လီၤ. တၢ်အံၤအခီပညီမ့ၢ် ပအိၣ်ဒီးတၢ်သဘျ့လၢပဃုထၢတၢ်လၢ ပသးဒၣ်ဝဲသ့န့ၣ်လီၤ. ပဃုထၢလၢ ပကစူၢ်ယွၤအကလုၢ်သ့ မ့တမ့ၢ် ပဃုထၢလၢပတစူၢ်အကလုၢ် သ့စ့ၢ်ကီးန့ၣ်လီၤ. (၅ မိၤၡ့ ၃၀:၁၅, ၁၆, ၁၉, ၂၀) ဖဲပဃုထၢလၢ ပသးဒၣ်ဝဲလၢပကစူၢ်ယဟိဝၤအကလုၢ်ဒီး, ပအဲၣ်ယဟိဝၤအဃိ ပပာ်လီၤပသးလၢ ပကမၤမုာ်အသးအခါ မ့ၢ်ပမၤသးခု ပပၢ်အိၣ်လၢမူခိၣ်အသးန့ၣ်လီၤ. (ကတိၤဒိ ၁၁:၂၀) မ့ၢ်စ့ၢ်ကီး ပဃုထၢတၢ်အိၣ်မူ ကျဲလၢအဂ့ၤကတၢၢ်န့ၣ်လီၤ.
“ဒီးအတၢ်မၤလိာ်န့ၣ် တကီတခဲဘၣ်”
၁၃, ၁၄. ဘၣ်မနုၤအဃိ ပစံးသ့လၢ ကစၢ်ယွၤ “အတၢ်မၤလိာ်န့ၣ် တကီတခဲဘၣ်”လဲၣ်. ဒီးတၢ်အံၤပဟ့ၣ်အဒိသ့ ဒ်လဲၣ်.
၁၃ ဘၣ်ဃးဒီး ယဟိဝၤဃ့တၢ်တဖၣ်န့ၣ် တၢ်မၢဖိယိၤဟၣ် စံးဘၣ်ပှၤလၢ တၢ်ကတိၤမၤမုာ်ပသးဒ်အံၤလီၤ, “အတၢ်မၤလိာ်န့ၣ် တကီတခဲဘၣ်လီၤ.” တၢ်ကတိၤ “တကီတခဲ” လၢဘၣ်တၢ်ကွဲးကျိး ဖဲ ၁ ယိၤဟၣ် ၅:၃ န့ၣ် လၢကြံးခ်ကျိာ် အခီပညီ ဟဲလိၤလိၤမ့ၢ် “တၢ်ဃၢတၢ်စံာ်” လီၤ. * ပဖးဘၣ်လၢ လံာ်စီဆှံကွဲးကျိးအဂၤ တဘ့ၣ်န့ၣ်ဒ်အံၤလီၤ, “ကစၢ်အတၢ်မၤလိာ် တဖၣ်န့ၣ် တမၤနးမၤဖှီၣ်ပှၤဘၣ်.” (အဲကလံး လံာ်ကွဲးကျိးအသီ) ယဟိဝၤဃ့တၢ်တဖၣ်န့ၣ် တမ့ၢ်တၢ်လၢ တလၢကွံာ်အခၢး မ့တမ့ၢ် တၢ်ဝံတၢ်ယိးဘၣ်. ကစၢ်အတၢ်မၤလိာ် တဖၣ်န့ၣ် တမ့ၢ်တၢ်လၢ ပှၤကညီတလၢပှဲၤတဖၣ် စူၢ်ဝဲတန့ၢ်ဘၣ်.
၁၄ ပဟ့ၣ်အဒိဒ်အံၤသ့လီၤ. တံၤသကိးလၢ နအဲၣ်ဘၣ်အီၤတဂၤ ဃ့နၤတၢ်မၤစၢၤဖဲ သူးအဟံၣ်အခါန့ၣ်လီၤ. တလါကအိၣ်အါဖျၢၣ်လၢ နကဘၣ်စိာ်ဆှၢစၢၤ အီၤလီၤ. တနီၤန့ၣ်ဖှံလၢပှၤစိာ်အီၤ တဂၤန့ၢ်ဘၣ်ဆၣ် အဂၤန့ၣ်ဃၢဝဲဒီးလိၣ်လၢ ပှၤကဘၣ်စိာ်အီၤခံဂၤန့ၣ်လီၤ. အဝဲကဃုထၢဝဲ တလါလၢအဲၣ်ဒိး မၢနစိာ်န့ၣ်လီၤ. အဝဲကမၢ နစိာ်တလါလၢ အဃၢဒိၣ်မးတဖၣ်န့ၣ်ဧါ. တမၢဝဲဘၣ်. အဝဲတအဲၣ်ဒိး မၤဘၣ်ဒိဆါနၤလၢ နကစိာ်တၢ်အံၤထဲတဂၤဘၣ်. ဒ်န့ၣ်အသိးလီၤ, ကစၢ်ယွၤလၢ အအိၣ်ဒီး တၢ်အဲၣ်တၢ်သးကညီၤန့ၣ် တဃ့ပှၤလၢ ပကတိၢ်န့ၢ်အတၢ်မၤလိာ်လၢ ပမၤထီၣ်ဘးအီၤကီ တဖၣ်ဘၣ်. (၅ မိၤၡ့ ၃၀:၁၁-၁၄) အဝဲတဃ့ဝဲလ့ၤတက့ၤလၢ ပကဘၣ်စိာ်တၢ်ဝံတၢ်ယိးလၢ အဃၢန့ၣ်ဘၣ်. ယဟိဝၤ “သ့ၣ်ညါပနီၢ်ခိလီၤ. သ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်အကမူၣ်”အဃိ, နၢ်ပၢၢ် ပတၢ်အိၣ်သးတဖၣ်န့ၣ်လီၤ.—စံးထီၣ်ပတြၢၤ ၁၀၃:၁၄.
၁၅. ဘၣ်မနုၤအဃိ ပနာ်သ့လၢ ယဟိဝၤအတၢ်မၤလိာ်တဖၣ်န့ၣ် မ့ၢ်တၢ်လၢ အကဲဘျုးဒိၣ်မးလၢ ပဂီၢ်လဲၣ်.
၁၅ ယဟိဝၤအတၢ်မၤလိာ် တဖၣ်န့ၣ် ကမ့ၢ်တၢ်ဝံတၢ်ယိး ယံၤဒီး, မ့ၢ်တၢ်လၢ အကဲဘျုးလၢပဂီၢ်ဒိၣ်မးန့ၣ်လီၤ. (ဝံယၡါယၤ ၄၈:၁၇) လၢတၢ်န့ၣ်အဃိ, မိၤၡ့စံးဘၣ် လၢပျၢၤပှၤအံၣ်စရ့လးဖိတဖၣ်လၢ “ယွၤမၤလိာ်ပှၤဒ်သိး ပကတိၢ်န့ၢ်တၢ်မၤလိာ်တဖၣ် အံၤခဲလၢာ်, ဒ်သိးပကပျံၤယွၤပကစၢ် လၢပတၢ်ဂ့ၤအဂီၢ်, ဒ်သိးအကဒုးမူဒံး ပှၤတဘိယူၢ်ဃီ, ဒ်လၢမုၢ်မဆါတနံၤအံၤအသိးန့ၣ်လီၤ.” (၅ မိၤၡ့ ၆:၂၄) ပနာ်သ့သပှၢ်တၢၢ်လၢ ယဟိဝၤဟ့ၣ်ပှၤ တၢ်မၤလိာ်တဖၣ်န့ၣ် အဲၣ်ဒိးဝဲလၢ ပကအိၣ်ကၢအိၣ်ခိးဒီး အိၣ်ဘီၣ်အိၣ်ညီ လီၤထူလီၤယိာ်လီၤ. မ့တမ့ၢ်ဘၣ်ဒ်န့ၣ်ဒီး ကျဲအဂၤကအိၣ်ဒံးဧါ. ယဟိဝၤမ့ၢ် ယွၤလၢတၢ်ကူၣ်ဘၣ်ကူၣ်သ့ အကတၢၢ်တအိၣ်ဘၣ်န့ၣ်လီၤ. ( ရိမ့ၤ ၁၁:၃၃) လၢတၢ်န့ၣ်အဃိ, ကစၢ်သ့ၣ်ညါဝဲ တၢ်အဂ့ၤကတၢၢ်လၢ ပဂီၢ်လီၤ. ယဟိဝၤမ့ၢ်စ့ၢ်ကီး တၢ်အဲၣ်အဂံၢ်ခီၣ်ထံးလီၤ. (၁ ယိၤဟၣ် ၄:၈) တၢ်အဲၣ်အံၤ အိၣ်ဖျါတြၢၢ်ကလာ်လၢ ကစၢ်အတၢ်ကတိၤဒီး အတၢ်ဖံးတၢ်မၤကိးမံၤဒဲး အပူၤလီၤ. ကစၢ်ပာ်လီၤ တၢ်မၤလိာ်ခဲလၢာ်လၢ အကုၢ်အပှၤတဖၣ်အဂီၢ်န့ၣ် ဒိးသန့ၤထီၣ်ဝဲလၢ တၢ်အဲၣ်တၢ်ကွံလီၤ.
၁၆. ဟီၣ်ခိၣ်အအၢအသီအံၤ အတၢ်လုၢ်ဘၢဒီး ပတၢ်တလၢပှဲၤမ့ၢ်အိၣ်သနာ်က့ ဘၣ်မနုၤအဃိပလူၤ ပိာ်ထွဲတၢ်ဒိကနၣ်အကျဲသ့လဲၣ်.
၁၆ တၢ်အံၤတစံးဝဲလၢ တၢ်စူၢ်ယွၤအကလုၢ်န့ၣ် မ့ၢ်တၢ်လၢအညီဘၣ်. ပကဘၣ်တြီဆၢ ဟီၣ်ခိၣ်အအၢအသီ, လၢ“မံလီၤဝဲလၢတၢ်အၢ တၢ်သီတဂၤန့ၣ် အပူၤ”အံၤ, အတၢ်လုၢ်ဘၢလီၤ. (၁ ယိၤဟၣ် ၅:၁၉) ပကဘၣ်ထီဒါ စ့ၢ်ကီး တၢ်တလၢပှဲၤ, လၢကထုးန့ၢ်ပှၤလၢ ပကလုၢ်သ့ၣ်ခါပတာ် ယွၤအတၢ်မၤလိာ်န့ၣ်လီၤ. (ရိမ့ၤ ၇:၂၁- ၂၅) ဘၣ်ဆၣ်,ပတၢ်အဲၣ်ယွၤန့ၣ် မၤနၢၤတၢ်သ့လီၤ. ယဟိဝၤဆိၣ်ဂ့ၤ ပှၤလၢအအဲၣ်ဒိးပာ်ဖျါ အတၢ်အဲၣ်အီၤခီဖျိလၢ စူၢ်ကစၢ်အကလုၢ်တဖၣ်န့ၣ်လီၤ. ကစၢ်ဟ့ၣ်အသးစီဆှံလၢ“ပှၤလၢအစူၢ်အီၤတဖၣ်”လီၤ. (မၤတၢ် ၅:၃၂) သးစီဆှံအံၤ ဒုးအိၣ်ထီၣ်တၤသၣ်ဃံလၤ လၢအမ့ၢ်တၢ်ဂ့ၤတၢ်ဝါလုၢ်ဒိၣ်ပှ့ၤဒိၣ်တဖၣ်လၢ တိစၢၤမၤစၢၤပှၤသ့လၢ ပကလူၤပိာ်ထွဲ တၢ်ဒိကနၣ်အကျဲန့ၣ်လီၤ.—ကလၤတံ ၅:၂၂, ၂၃.
၁၇, ၁၈. (က) လၢလံာ်အံၤအပူၤ ပကသမံသမိးကွၢ် တၢ်ဂ့ၢ်မနုၤလဲၣ်, ဖဲပမၤတၢ်အံၤအခါ ပကြၢးပာ်တၢ်မနုၤလၢ ပသးပူၤလဲၣ်. (ခ) အဆၢဒိၣ်လၢခံန့ၣ် ပကကတိၤသကိးတၢ်ဂ့ၢ် မနုၤလဲၣ်.
၁၇ ယဟိဝၤ သိၣ်လိပှၤလၢ ဘၣ်ဃးဒီး ပမၤတၢ်ဒီး ပတၢ်ပာ်လီၤသးလၢ ကိးနံၤဒဲး ပကွၢ်ဆၢၣ်မဲာ်ဘၣ်တၢ်အပူၤ ကစၢ်တူၢ်ဘၣ်ဝဲဒ်လဲၣ်န့ၣ် ပကသမံသမိးကွၢ်လၢ လံာ်အံၤအပူၤလီၤ. ဖဲပသမံသမိးကွၢ် ယဟိဝၤအတၢ်သိၣ်တၢ်သီ တဖၣ်အခါ လိၣ်လၢပကဘၣ်ပာ်တၢ် အကါဒိၣ်တနီၤလၢ ပသးပူၤလီၤ. ပကသ့ၣ်နီၣ်ထီၣ် သကိးလၢ ယဟိဝၤ တမၢဆူၣ်ပှၤလၢ ပကဘၣ်စူၢ်အတၢ်မၤလိာ် ဒီးအတၢ်သိၣ်တၢ်သီမိၢ်ပှၢ်တဖၣ်ဘၣ်. ကစၢ်အဲၣ်ဒိး ပစူၢ်အီၤလၢတၢ်သူၣ်အိၣ်သးအိၣ်လီၤ. ယဟိဝၤဃ့ပှၤလၢ ပကအိၣ်မူဒ်ကျဲလၢ ဟ့ၣ်ပှၤတၢ်ဆိၣ်ဂ့ၤအါမး လၢဆၢကတီၢ်ခဲအံၤဒီး ခါဆူညါပကဒိးန့ၢ်ဘၣ် တၢ်မူအထူအယိာ်န့ၣ် မ်ပသုတသးပ့ၤနီၣ်တဂ့ၤ. တၢ်စူၢ်အကလုၢ်လၢ ပသးဒီဖျၢၣ်န့ၣ် မ့ၢ်တၢ်ခွဲးတၢ်ယာ် လီၤဆီလၢ ပပာ်ဖျါထီၣ်ပအဲၣ်ယဟိဝၤ ဆံးဒိၣ်လဲၣ်န့ၣ် ပကဆိကမိၣ်ကွၢ်သကိးတက့ၢ်.
၁၈ လၢတၢ်အဲၣ်တၢ်ကွံအပူၤ ယဟိဝၤဟ့ၣ်သးကညီၤပှၤ သးလၢအသ့ၣ်ညါဒၣ်တၢ်လၢ ပကနီၤဖး တၢ်ဂ့ၤဒီး တၢ်အၢန့ၣ်လီၤ. ဘၣ်ဆၣ်, ကမ့ၢ်တၢ်နဲၣ်လိလၢ ပနာ်သ့အဂီၢ်, လိၣ်လၢ ပကဘၣ်သိၣ်လိ ပသးလၢအသ့ၣ်ညါဒၣ်တၢ်န့ၣ်လီၤ. ပကကတိၤသကိး တၢ်ဂ့ၢ်တဖၣ်အံၤလၢ အဆၢဒိၣ်လၢခံန့ၣ်လီၤ.
^ လံာ်အဆၢ. 9 တၢ်ကတိၤသကိးလၢ ပဃုထၢတၢ်မၤမုာ်သးလၢ အဘျုးအိၣ်သ့အဂ့ၢ်န့ၣ် ကွၢ်ဖဲလံာ်အံၤ အဆၢဒိၣ် ၆ တက့ၢ်.
^ လံာ်အဆၢ. 11 ပှၤနီၢ်သးလၢ အအၢတဖၣ်ဒၣ်လဲာ် ဒိကနၣ်တၢ်လၢ တၢ်သးတအိၣ်သ့လီၤ. ဖဲယ့ၣ်ၡူးဟ့ၣ်လီၤအကလုၢ်လၢ တၢ်နါတဖၣ် ကဟးထီၣ်ကွံာ်လၢ ပှၤလၢတၢ်နါအိၣ်လၢအပူၤအခါ, တၢ်နါတဖၣ်န့ၣ် အၢၣ်လီၤဝဲကစၢ်အစိကမီၤ ဒီးဒိကနၣ်ဝဲသနာ်က့ တမ့ၢ်လၢတၢ်သးအိၣ်ဘၣ်.—မၢ်ကူး ၁:၂၇; ၅:၇-၁၃.
^ လံာ်အဆၢ. 13 ဖဲ မးသဲ ၂၃:၄ အပူၤန့ၣ် ပာ်ဖျါထီၣ်ဝဲတၢ်ကတိၤအံၤလၢ, “တၢ်ယိးလၢအဃၢ”လီၤ. တၢ်အံၤအခီပညီမ့ၢ် တၢ်ဘျၢလီၤတံၢ်လီၤဆဲးတဖၣ် ဒီးပှၤကညီအလုၢ်လၢ်လၢ ပှၤကွဲးလံာ်ဒီး ဖၤရံၤၡဲတဖၣ် ပာ်ထီၣ်ဝဲလၢ ကမျၢၢ်အဖီခိၣ်န့ၣ်လီၤ.
