1, 2. Ki lika mañi ze mi susueza ku lata Jehova Mulimu?

 KANA mwa lata Mulimu? Haiba mu batu ba ba ineezi ku Jehova Mulimu, ku si na ku kakanya mu ka alaba kuli, eni na mu lata. Mi luli lwa lukela ku lata Jehova. Lwa lata Mulimu bakeñisa kuli u lu bonisize lilato. Bibele i bulela cwana, i li: “Luna lwa lata, kakuli Yena [Jehova] u lu latile pili.”—1 Joani 4:19.

² Jehova u ezize lika ze bonisa kuli wa lu lata. U bupile lifasi le li buheha mi u lu file lona kuli lu pile ku lona. U lu file lika ze lu konisa ku pila fa lifasi, ze cwale ka pula ni lizazi. (Mateu 5:45) Mi mane sa butokwa ni ku fita kikuli u lu file lika ze lu tusa kwa moya. U lu file Linzwi la hae, yona Bibele. Ku zwa fo, u lu mema kuli lu no lapelanga ku yena ka buikolwiso bwa kuli u ka lu utwa ni ku lu fa moya wa hae o kenile kuli u lu tuse. (Samu 65:2; Luka 11:13) Mi muhato o mutuna ka ku fitisisa wa ngile Jehova ki wa ku luma Mwanaa hae wa libanda kuli a be Muliululi ya lu lukulula kwa sibi ni lifu. Ku si na kakanyo lilato la lu bonisize Jehova ki le lituna hahulu!—Joani 3:16; Maroma 5:8.

3. (a) Kuli lu tiiseze mwa lilato la Mulimu, lu tokwa ku ezañi? (b) Ki puzo ifi ya butokwa ye lu swanela ku ipuza, mi kalabo lu kona ku i fumana kai?

³ Jehova u bata kuli lu ikole lilato la hae ku ya  ku ile. Kono ku ikola lilato leo ku itingile ku luna. Linzwi la Mulimu li lu eleza kuli: “Mu tiiseze mwa lilato la Mulimu, . . . kuli mu bone bupilo bo bu sa feli.” (Juda 21) Pulelo ya kuli “mu tiiseze” i bonisa kuli, kuli lu zwelepili ku latiwa ki Mulimu, lu tokwa ku nga muhato o muñwi. Lu tokwa ku bonisa buitebuho kwa lilato la hae ka ku eza lika ze ñwi mwa bupilo bwa luna. Kacwalo, puzo ya butokwa ye lu swanela ku ipuza ki ya kuli: ‘Ni kona ku bonisa cwañi kuli na lata Mulimu?’ Kalabo lu kona ku i fumana mwa manzwi a mwa Bibele a naa bulezi muapositola Joani. Naa ize: “Ku lata Mulimu, kiha lu mamela litaelo za hae; mi litaelo za hae ha li na bukiti.” (1 Joani  5:3) Lu swanela ku nyakisisa ka tokomelo taluso ya manzwi ao, bakeñisa kuli lu bata ku bonisa Mulimu wa luna kuli lwa mu lata luli.

4, 5. Mu taluse lilato la ku lata Jehova mo ne li hulezi mwa pilu ya mina.

⁴ Muapositola Joani naa talusañi ha naa bulezi za lilato la “ku lata Mulimu”? Naa talusa za lilato le lituna le lu na ni lona ku Mulimu. Kana mwa hupula mo ne li kalezi ku hulela lilato leo mwa pilu ya mina?

⁵ Mu hupule nako ye ne mu kalile ku ituta niti ka za Jehova ni milelo ya hae ili ha ne mu kalile ku ba ni tumelo. Ne mu fitile fa ku utwisisa kuli nihaike kuli mu pepilwe mu li baezalibi ba ba si na silikani ni Mulimu, Jehova ka Kreste u kwaluzi nzila ya kuli mu fumane bupetehi bwa naa luzize Adama ni ku ikola bupilo bo bu sa feli. (Mateu 20:28; Maroma 5:12, 18) Mi ne mu fitile fa ku utwisisa buitomboli bo butuna bwa naa ezize Jehova ka ku luma Mwanaa hae wa libanda kuli a to mi shwela. Zeo kaufela ne li mi fitile kwa pilu, mi mwa kala ku lata Mulimu ya mi bonisize lilato le lituna cwalo.—1 Joani 4:9, 10.

6. Lilato sakata li boniswa cwañi, mi lilato la mina ku Mulimu ne li mi ngisize muhato mañi?

⁶ Kono ao ne li feela makalelo; lilato sakata la ku lata Jehova ne li sa hula. Lilato haki maikuto feela a na ni ona mutu mwa pilu. Lilato sakata la ku lata Mulimu ha li boniswi ka ku bulela feela kuli “na lata Jehova.” Lilato sakata li swana sina tumelo—li boniswa ka likezo za mutu. (Jakobo 2:26) Lilato li boniswa ka ku ezeza mutu ya latwa lika za tabela. Kacwalo lilato la ku lata Jehova ha ne li hulile mwa pilu ya mina, ne mu kalile ku ba ni takazo ya ku pila ka nzila ye tabisa Ndataa mina wa kwa  lihalimu. Kana mu Lipaki ba ba kolobelizwe? Haiba mu kolobelizwe, u zibe ze ne mi ngisize muhato wa butokwa ka ku fitisisa wo ki lona lilato leo ni busepahali bwa mina ku Jehova. Ne mu ineezi ku Jehova ili ku itama kuli mu ka eza tato ya hae, mi ne mu bonisize buitamo bwa mina ka ku kolobezwa. (Maroma 14:7, 8) Ku taleleza buitamo bo mu itamile ku Jehova ku ama ku eza nto ye tatama ya naa bulezi muapositola Joani.

7. Ki lifi litaelo ze ñwi za Mulimu, mi mu kona ku bonisa cwañi kuli mwa li mamela?

⁷ Joani naa bonisize ze ku talusa ku lata Mulimu. Naa ize: “Kiha lu mamela litaelo za hae.” Litaelo za Mulimu ki lifi? Jehova u lu file milao ye nongile mwa Linzwi la hae, yona Bibele. Ka mutala, u hanisa mikwa ye cwale ka butahwa, buhule, ku lapela maswaniso, busholi, ni buhata. (1 Makorinte 5:11; 6:18; 10:14; Maefese 4:28; Makolose 3:9) Ku mamela litaelo za Mulimu ku talusa ku latelela milao ye nongile ye lu fumana mwa Bibele.

8, 9. Lu kona ku ziba cwañi lika ze tabisa Jehova niha lu li mwa muinelo mo lu si ka tomelwa mulao o nongile wa Bibele? Mu fe mutala.

⁸ Kono ku tabisa Jehova ha ku talusi feela ku mamela milao ya hae ye nongile. Jehova haa si ka lu tomela milao ye miñata-ñata ya ku latelela mwa nto ni nto kaufela ye lu eza mwa bupilo. Kacwalo, mwa bupilo bwa luna bwa ka zazi ni zazi, lu kana lwa kopana ni miinelo ye miñata ili mo lu si ka tomelwa milao ye nongile ya Bibele. Mwa miinelo ye cwalo, lu kona ku ziba cwañi lika ze ka tabisa Jehova? Mwa Bibele ku na ni lisupo ze iponahalela hande fo ku sweu, ze bonisa mwa nahanela Mulimu. Ha lu nze lu ituta Bibele, lu fita fa ku ziba lika za lata Jehova ni lika za toile. (Samu 97:10; Liproverbia 6:16-19) Lu ka fita fa ku lemuha mikwa ni likezo za tabela. Ha lu  nze lu ituta mikwa ni linzila za Jehova, lu ka fita fa ku etelelwa ki munahano wa hae mwa likatulo ze lu eza ni mwa likezo za luna. Kacwalo, niha lu ipumana mwa muinelo mo lu si ka tomelwa mulao o nongile wa Bibele, lu ka lemuha kuli “se si latwa ki Mulena” ki sifi.—Maefese 5:17.

⁹ Ka mutala, mwa Bibele ha ku na mulao o nongile o hanisa ku buha mafilimu a maswe a lindwa ni buhule. Kono kana luli lwa tokwa ku tomelwa mulao o nongile o lu hanisa ku buha lika ze cwalo? Lwa ziba mwa ngela lika zeo Jehova. Linzwi la hae li lu bulelela ka ku utwahala hande kuli: ‘Moya wa Mulimu u toile ya lata situhu.’ (Samu 11:5) Hape li bulela kuli: “Mulimu u ka atula mahule ni ba ba buka.” (Maheberu 13:4) Ka ku nyakisisa feela manzwi ao aa ñozwi ka ketelelo ya moya o kenile, lwa kona ku lemuha hande fo ku sweu se si latwa ki Jehova. Mi lu fita fa ku ikatulela ku sa buhanga mafilimu a batu ba ba eza likezo za toile Mulimu. Lwa ziba kuli lu tabisa pilu ya Jehova ha lu ambuka buhule bo bu yuboka bo bu ngiwa mwa lifasi sina papali feela ya ku itabisa ka yona. a

10, 11. Ki kabakalañi ha lu ikatulela ku utwa Jehova mwa bupilo bwa luna, mi lu mu utwa ka nzila ifi?

¹⁰ Ki lifi libaka le lituna ha lu swanela ku mamela litaelo za Mulimu? Ki kabakalañi zazi ni zazi ha lu swanela ku pila ka nzila ye lumelelana ni munahano wa Mulimu? Libaka haki la kuli lu saba ku fiwa koto kamba ku welwa ki bumai bo bu welanga batu ba ba sa ezi tato ya Mulimu. (Magalata 6:7) Libaka luli ki la kuli lu ikutwa kuli ku utwa Jehova ki yona nzila ye lu kona ku bonisa ka yona kuli lwa mu lata. Mwana kamita u tabelanga  ku eza lika ze tabisa ndatahe; ni luna lu bata ku eza lika ze tabisa Jehova. (Samu 5:12) Jehova ki Ndataa luna, mi lwa mu lata. Ha ku na nto ye tabisa ye fita ku ziba kuli lu pila ka nzila ye ‘lumelelwa ki Mulimu.’—Liproverbia 12:2.

¹¹ Kacwalo, ha lu swaneli ku utwa Mulimu ka ku ikapeleza feela; mi ha lu swaneli ku keta milao ya ku utwa ni ya ku sa utwa kamba ku keta ku utwa feela ha lu bona kuli ku eza cwalo kwa konahala kamba ku bunolo. b Lu swanela ku utwa Mulimu ku zwelela kwatasaa “pilu” ya luna. (Maroma 6:17) Lu ikutwa sina mwa naa ikutwezi walisamu yo muñwi ya naa ize: “Ni ka tabela milao ya hao, ki yona ye ni lata.” (Samu 119:47) Kacwalo, lu swanela ku lata ku utwa Jehova. Lu lemuha kuli Jehova wa swanela ku utwiwa ka pilu ya luna kaufela ku si na taba ni miinelo ye lu li ku yona ni kuli hape mane u lu tokwa ku eza cwalo. (Deuteronoma 12:32) Lu bata kuli Jehova a lu nge sina Linzwi la hae mo li bulelela ka za Nuwe. Ka ku ama ku Nuwe ya naa sepahala, ya naa bonisize lilato la hae ku Mulimu ka ku ipeya ku mu utwa ka lilimo-limo, Bibele i bulela kuli: “Nuwe a eza kamukana mwa naa mu laelezi Mulimu; a eza cwalo.”—Genese 6:22.

12. Jehova u tabela buipeyo bo bu cwañi?

¹² Jehova u ikutwanga cwañi ha lu mu utwa ka pilu ya luna kaufela? Linzwi la hae li bonisa kuli ha lu eza cwalo lu ‘tabisa pilu’ ya hae. (Liproverbia 27:11) Kana buipeyo bwa luna luli bwa tabisa pilu ya Muambakani ya Pahami? Eni, mi ku na ni libaka le li utwahala ha ikutwanga  cwalo. Jehova ha naa lu bupile, naa lu file maata a ku iketela za ku eza. Fo ku talusa kuli, lwa kona ku iketela ku utwa Mulimu kamba ku sa mu utwa. (Deuteronoma 30:15, 16, 19, 20) Ha lu iketela ku utwa Jehova, mi haiba lu eza cwalo kabakala ku mu lata ka pilu ya luna kaufela, lu tahisa tabo ni nyakalalo ye tuna ku Ndataa luna wa kwa lihalimu. (Liproverbia 11:20) Mi ha lu eza cwalo hape, lu iketela bupilo bo bunde hahulu.

13, 14. Ki kabakalañi ha ku konwa ku bulelwa kuli ‘litaelo za Mulimu ha li na bukiti’? Mu kona ku talusa cwañi taba yeo ka ku itusisa mutala?

¹³ Muapositola Joani u lu taluseza nto ye ñwi ye omba-omba ka za litaelo za Jehova. U li: “Litaelo za hae ha li na bukiti.” Toloko ye ñwi ya Bibele i bulela cwana kwa 1 Joani 5:3, i li: “Litaelo za hae ha li lu imezi.” (New English Translation) Litaelo za Jehova haki ze bukiti kamba ze imeza. Milao ya hae haki ye taata; haki ye ba kona ku palelwa ku mamela batu ba ba si ka petahala.

¹⁴ Ha lu ngeni kuli mulikanaa mina yo mutuna u bata ku tutela mwa ndu i sili mi u mi kupa kuli mu mu tutise kwateñi. U na ni libyana ze ñata za ku tuta. Ze ñwi ki libyana ze bubebe ze kona ku shimbiwa ki mutu a li muñwi, kono ze ñwi ki ze bukiti ze tokwa batu ba babeli. Lu ngeni kuli mulikanaa mina ki yena ya mi ketela libyana za ku shimba. Kana naa ka mi ketela libyana ze bukiti ze mu sa koni ku shimba? Batili. Naa si ke a tabela kuli mu holofale kabakala ku shimba libyana ze bukiti mu nosi. Ka nzila ye swana, Mulimu wa luna ya lilato ni ya sishemo haa lu tokwi ku mamela litaelo ze taata ze lu sa koni ku mamela. (Deuteronoma 30:11-14) Naa si ke a lu lwalisa mutiyo o bukiti o cwalo. Jehova wa ziba ze lu sa koni  ku eza, kakuli “u ziba se lu bupilwe ka sona, u nzaa hupula kuli lu liluli feela.”—Samu 103:14.

15. Ki kabakalañi ha lu swanela ku kolwa kuli litaelo za Jehova li tomezwi ku lu tusa mwa bupilo?

¹⁵ Litaelo za Jehova haki ze imeza ni hanyinyani; ki litaelo ze lu tusa hahulu mwa bupilo. (Isaya 48:17) Kona libaka Mushe ha naa taluselize Maisilaele ba kwaikale kuli: “Muñaa Bupilo u lu laezi ku eza milao yeo kaufela, ni ku saba Muñaa Bupilo Mulimu wa luna, kuli lu kondise za luna kamita, mi a lu babalele inze lu pila, sina mo ku sa inezi ni kacenu.” (Deuteronoma 6:24) Ni luna lu swanela ku kolwa kuli Jehova za lu fezi milao ya hae kikuli wa lu lata mi u bata kuli lu pile mwa buiketo kamita-ni-mita. Kaniti, Jehova naa si ke a lu fa ku eza lika ze lu tahiseza kozi. Ki Mulimu ya na ni butali bo bu si na mo bu felela. (Maroma 11:33) Kacwalo wa ziba lika luli ze lu tusa mwa bupilo. Jehova hape ki Mulimu ya lilato. (1 Joani 4:8) Lika kaufela za bulela ni ku eza u li bulela ni ku li eza ka lilato. Lilato ki lona le li mu susueza ku tomela batanga ba hae milao.

16. Ku si na taba ni likukuezo za lifasi le li bolile le ni ku sa petahala kwa luna, ki kabakalañi ha lu kona ku zwelapili ku utwa Mulimu?

¹⁶ Kono ha ku talusi kuli ku utwa Mulimu ki nto ye bunolo. Lu na ni ku lwana ka taata ni likukuezo za lifasi le li bolile le, le “li lapalezi mwatasaa ya maswe.” (1 Joani 5:19) Mi hape lu na ni ku lwana ni ku sa petahala kwa luna, ko ku lu tahisezanga ku loba milao ya Mulimu. (Maroma 7:21-25) Niteñi, lilato la luna la ku lata Mulimu li ka lu tusa ku tula likukuezo zeo kaufela. Jehova u fuyolanga batu ba ba bonisa lilato ku yena ka ku mu utwa. U fanga moya wa hae o kenile ku “ba ba mu utwa.” (Likezo 5:32) Moya wo u lu tusa ku ba ni muselo o munde o lu konisa ku zwelapili ku utwa milao ya Mulimu.—Magalata 5:22, 23.

17, 18. (a) Lu ka nyakisisañi mwa buka ye, mi ha lu nze lu eza cwalo, lu swanela ku hupulangañi? (b) Lu ka nyakisisañi mwa kauhanyo ye tatama?

 ¹⁷ Mwa buka ye, lu ka nyakisisa likuka ni milao ya Jehova ni lisupo ze ñata ze bonisa tato ya hae. Ha lu nze lu eza cwalo, lu ka tokwa ku hupulanga lika ze ñwi za butokwa. Lu si ke lwa libala kuli Jehova haa lu hapelezi ku mamela milao ni likuka za hae; u bata kuli lu mu utwe ku zwelela kwatasaa pilu ya luna. Hape lu si ke lwa libala kuli Jehova u bata kuli lu pile bupilo bo bu ka lu tahiseza limbuyoti ze tuna cwale ni bupilo bo bu sa feli kwapili. Mi haike lu ikutwe kuli ku utwa Jehova ka pilu ya luna kaufela ki nzila ye nde ya ku bonisa ka yona Jehova kuli lwa mu lata luli.

¹⁸ Kuli a lu tuse ku ziba ku keta ze nde ku ze maswe, Jehova ka lilato u lu file lizwalo. Kono kuli lizwalo la luna li kone ku lu etelelanga mwa nzila ye lukile, li tokwa ku lutiwa, sina mo i ka boniseza kauhanyo ye tatama.