1, 2. Ang’o majiwi mondo iher Jehova Nyasaye?

BE IHERO Nyasaye? Ka isechiwo ngimani iwuon ne Jehova Nyasaye, dwoko mari kuom adier en ee kendo mano en gima kare! Kaka dhano, en gima owinjore mondo waher Jehova. Kuom adier wahero Nyasaye nikech oherowa. Muma wacho kama: “Wahere nikech en ema noherowa mokwongo.”—1 Johana 4:19.

² Jehova osekawo okang’ mar nyisowa herane. Omiyowa piny majaber kaka kar dak. Ochiwonwa dwaro magwa mag ringruok. (Mathayo 5:43-48) To maduong’ moloyo, ochiwonwa dwaro magwa kuom wechene. Omiyowa Wachne, ma en Muma. E wi mano, ogwelowa mondo walame kosingonwa ni obiro winjo kwayowa, kendo obiro miyowa roho mare maler mondo okonywa. (Zaburi 65:2; Luka 11:13) To maduong’ moloyo mago duto, ne ooro Wuode mohero ahinya mondo obednwa Rawar mondo omi oreswa kuom richo kod tho. Mano doko hera maduong’ ma Jehova osenyisowa!—Johana 3:16; Jo Rumi 5:8.

3. (a) Mondo wasik e hera mar Nyasaye ang’o monego watim? (b) Penjo maduong’ monego waket e paro en mane, kendo dwoko mar penjono yudore kanye?

³ Jehova dwaro ni wayud ber kuom herane nyaka chieng’. Kata kamano, mondo wayud kata kik wayud  ber mar herane, luwore gi yiero mar ng’ato owuon. Wach Nyasaye jiwowa kama: “Ritreuru e hera mar Nyasaye . . . nyaka uchopi e ngima ma nyaka chieng’.” (Juda 21) Wach motigo ni “ritreuru” nyiso ni mondo wasik e hera mar Nyasaye, nitie gima onego watim. Onego watim gik manenore maler ni wayie gi herane. Penjo maduong’ ma wanyalo keto e paro kuom mano en ma, ‘Anyalo nyiso ni ahero Nyasaye e yo mane?’ Dwoko mar penjono yudore e weche ma ne okudhi gi much Nyasaye ma nondik gi jaote Johana: “Nimar hero Nyasaye en mako chikne, to chikne ok tek.” (1 Johana 5:3) Onego wanon ahinya tiend  wechegi, nikech wadwaro nyiso Nyasaye ni wahere ahinya.

4, 5. Lerie kaka hera mar Jehova ne ochako dongo e chunyi.

⁴ Be inyalo paro kinde ma hera kuom Jehova ne ochako dongo e chunyi?

⁵ Parie matin kuom kinde ma ne ikwongo puonjori adiera mar Jehova kod dwarone kae to ichako bedo gi yie. Mano ne omiyo ing’eyo ni kata obedo ni ne onyuoli jaricho kendo mopog kuom Nyasaye, Jehova kokalo kuom Kristo ne oyawo yo manyalo miyo ibed gi ngima makare chuth ma Adam ne olalo, kendo yudo ngima ma nyaka chieng’. (Mathayo 20:28; Jo Rumi 5:12, 18) Ne ichako neno kaka misango ma Jehova ne ochiwo kuom oro Wuode mohero ahinya mondo othoni ne en gima duong’. Mano ne omulo chunyi, mi ichako hero Nyasaye mosenyisi hera maduong’ kaka mano.—1 Johana 4:9, 10.

6. Hera madier inyiso e yo mane, kendo hero Nyasaye ne omiyo itimo ang’o?

⁶ Kata kamano, hera ma ne iwinjo e chunyi ne en mana chakruok mar hera madier ne Jehova. Hera ok en mana gima ng’ato winjo e chunye; kata ok en mana gima iwacho awacha. Hera madier kuom Nyasaye ok en mana wacho ni, “Ahero Jehova.” Mana kaka yie, hera madier inyiso kuom timbe ma ojiwowa e nyiso. (Jakobo 2:26) To moloyo, hera inyiso kuom timbe mamoro ng’at mwaherono. Omiyo, kane isechako hero Jehova gie chunyi, ne igombo dak e ngima mamiyo Wuonu manie polo mor. Be in Janeno mosebatisi? Ka en kamano, herano kod chiwruok ema ne omiyo itimo yiero maduong’ ahinya e ngimani. Ne ichiwo ngimani  ne Jehova mondo itim dwarone kendo ne inyiso chiwruokni e batiso. (Jo Rumi 14:7, 8) Chopo singruokni ne Jehova oriwo gima jaote Johana wacho moluwo.

7. Moko kuom chike Nyasaye gin mage, kendo mako chikego oriwo timo ang’o?

⁷ Johana lero ni hero Nyasaye en: “Mako chikne.” Chike Nyasaye gin mage? Jehova miyowa chike moko mawuoyo ratiro kokalo kuom Wachne, ma en Muma. Kuom ranyisi, okwedo timbe kaka mer, terruok, lamo nyiseche manono, kwelo, kod miriambo. (1 Jo Korintho 5:11; 6:18; 10:14; Jo Efeso 4:28; Jo Kolosai 3:9) Mako chike Nyasaye oriwo dak kaluwore gi chike Muma manenore maler mag timbe mabeyo.

8, 9. Ere kaka wanyalo ng’eyo gima biro moro Jehova kata e weche ma onge chik ma Muma wuoyoe ratiro? Chiw ranyisi.

⁸ Kata kamano, mondo wami Jehova mor, onego watim gik moko moloyo mana mako chikene manenore ratiro. Jehova ok thung’wa gi chike matayo gimoro amora e ngimawa mapile. Omiyo, odiechieng’ kodiechieng’, wanyalo romo gi weche moko ma onge chike mawuoyo kuomgi ratiro e Muma. E weche kaka mago, wanyalo ng’eyo nade gima biro moro Jehova? Muma nyiso maler kaka Nyasaye neno gik moko. Sama wapuonjore Muma, wapuonjore gik ma Jehova ohero kod gik ma osin-go. (Zaburi 97:10; Ngeche 6:16-19) Wafwenyo kit paro kod timbe ma ohero. Kaka wamedo puonjore kit Jehova kod yorene, e kaka wabiro medo rwako parone mondo ema ota paro mwang’ado kod timbewa. Kuom mano, kata e weche ma onge chik ma Muma wuoyoe ratiro, kinde mang’eny wanyalo fwenyo “gi ma Ruoth [“Jehova,” NW] dwaro.”—Jo Efeso 5:17.

 ⁹ Kuom ranyisi, onge chik moro e Muma manyisowa ratiro ni kik wane sinembe kata program mag televison manyiso gik maricho kaka timbe gero kata chode. Onego wang’e ni ok owinjore neno program kaka mago kata ka onge chik manyisowa ratiro ni kik watim kamano. Wang’eyo kaka Jehova neno wechegi. Wachne nyisowa maler ni: ‘Chuny Jehova sin kod ng’a marach gi ng’a mohero tim mager.’ (Zaburi 11:5) Muma bende wacho ni: “Nyasaye nong’ad bura ni ndhegini kod jo terruok.” (Jo Hibrania 13:4) Ka waparo kuom wechego ma ne okudh gi much Nyasaye, wanyalo fwenyo maler dwaro mar Jehova. Kuom mano ok wayier manyo mor kuom ng’iyo gik manyiso maler timbe ma Nyasachwa sin-go. Wang’eyo ni Jehova bedo mamor ka wawere gi gik mochido ma pinyni temo wuondowago ni gin gik mor ma ok nyal hinyo ng’ato. *

10, 11. Ang’o momiyo wayiero winjo Jehova, kendo wawinje e yo mane?

¹⁰ Wach maduong’ mamiyo wamako chike Nyasaye en ang’o? Ang’o momiyo wadwaro dak odiechieng’ kodiechieng’ kaluwore gi kaka wang’eyo paro mar Nyasaye? Ok wayier dak e yo ma kamano mana ni mondo waring kum kata geng’o weche maricho mayudo jogo ma ok tim dwach Nyasaye. (Jo Galatia 6:7) Kar mano, waneno winjo Jehova kaka thuolo maber mar nyiso ni wahere. Mana kaka nyathi gombo ahinya ni wuon mare ogose kata oyie kode, wan bende wadwaro ni Jehova oyie kodwa. (Zaburi 5:12) En Wuonwa, kendo wahere. Onge gima miyowa mor ahinya kata miyo wawinj maber moloyo ng’eyo ni wadak e  yo ma miyo ‘wayudo puoch kuom Jehova.’—Ngeche 12:2, Luo, 2003.

¹¹ Kuom mano, ok wawinj ka wang’ur; kata yiero gima wabiro winjo. * Ok wayier chike ma wabiro winjo kod ma ok wabi winjo, ka wawinjo mana e kinde mayotnwa kata e kinde ma timo kamano ok tek. Kar timo kamano, wawinjo gi ‘chunywa.’ (Jo Rumi 6:17) Wawinjo kaka jandik-zaburi mar Muma ma nondiko kama: “Mi namor ahinya kuom wecheni michiko, masehero.” (Zaburi 119:47) Ee, wahero winjo Jehova. Wang’eyo ni owinjore kendo odwaro ni wawinj chikene chutho kendo ma ok waketone chik. (Rapar mar Chik 12:32) Dwaher ni mondo Jehova owach kuomwa gima Wachne wacho kuom Noa. Muma wacho kama kuom jaduong’no ma ne nigi yie motegno, ma nonyiso Nyasaye hera kowinje kuom higini mang’eny: “Noa notimo kamano; duto ma Nyasaye nochike, kamano notimo.”—Chakruok 6:22.

12. Winjo Jehova miyo obedo mamor e chunye kinde mage?

¹² Jehova neno nade ka wayie winje? Wachne wacho ni kuom timo kamano wamiyo ‘chunye mor.’ (Ngeche 27:11) Be ka wawinjo Ruoth Ma Jaloch e piny gi polo biro kelo mor e chunye gadier? Adier en kamano, kendo nitie gima owinjore mamiyo Jehova bedo mamor! Jehova ne ochweyowa kaka chwech ma nigi thuolo mar yiero kaka watiyo gi ngimawa. Mano tiende ni wan gi thuolo mar yiero; wanyalo yiero winjo Nyasaye, kata yiero ni ok wabi winje. (Rapar mar Chik 30:15, 16,  19, 20) Ka wayiero winjo Jehova kendo ka gima miyo watimo kamano en chuny mopong’ gi hero Nyasaye, wamiyo Wuonwa manie polo mor ahinya. (Ngeche 11:20) Bende wayiero ngima maberie moloyo.

13, 14. Ang’o momiyo inyalo wach ni chike Nyasaye ok gin ting’ mapek kendo, wanyalo chiwo ranyisi kuom wachni e yo mane?

¹³ Jaote Johana nyisowa wach mahoyo chuny ahinya kuom dwaro mag Jehova: “Chikne ok tek.” E dho-Grik wach molok ni “tek” e 1 Johana 5:3 tiende sie en “pek.” * Loko moro mar Muma wacho kama: “Chikene ok gin ting’ mapek.” (Luo, 2003) Dwaro mag Jehova ok gin mokalo tong’ kata mapek. Chikene ok gin manyalo tamo dhano morem winjo.

¹⁴ Wanyalo chiwo ranyisi kuom wachno kama. Osiepni kwayi ni mondo ikonye dar odhi e ot moro. En gi sanduge mang’eny modwaro kowo. Moko kuomgi yot minyalo ting’ gi ng’at achiel, moko kuomgi to pek kendo dwaro ni oting’ gi ji ariyo. Osiepnino yiero sanduge modwaro ni ikow. Be onyalo kwayi mondo iting’ sanduge ma ong’eyo ni pekni ahinya? Ooyo. Ok doher ni ihinyri kitemo ting’ogi kendi. E yo machalo kamano, Nyasachwa ma jahera kendo mang’won ok nyiswa ni mondo wamak chike matek ahinya luwo. (Rapar mar Chik 30:11-14) Ok onyal nyisowa ni mondo wating’ ting’ mapek kaka mano. Jehova ong’eyo  nyawo marwa, nimar “ong’eyo kitwa; oparo ka wan mana buch lowo.”—Zaburi 103:14.

15. Ang’o momiyo wanyalo bedo gadier ni chike Jehova gin ma konyowa ahinya?

¹⁵ Chike Jehova ok gin ting’ mapek ngang’; gin mana makonyowa ahinya. (Isaiah 48:17) Kuom mano, Musa ne nyalo wacho ne Jo-Israel machon ni: ‘Jehova nochikowa mondo wamak chikgi duto, waluor Jehova Nyasachwa, mi wabed maber ndalo duto, mondo oritwa mangima, kaka tinendeni.’ (Rapar mar Chik 6:24) Wan bende wanyalo bedo gadier ni kuom miyowa chikene, Jehova dewowa ahinya tiende ni oparo kuom ngimawa ma nyaka chieng’. Kuom adier, onge kaka Jehova nyalo chikowa mondo watim gima biro hinyowa. Jehova en Nyasaye ma nigi rieko ma onge giko. (Jo Rumi 11:33) Kuom mano ong’eyo gima ber kodwa. Jehova bende e ranyisi maduong’ mar hera. (1 Johana 4:8) Hera, ma en kite maduong’, ema chiko gimora amora mowacho kendo timo. Hera e mise mar chikene duto moketo ne jotichne.

16. Kata obedo ni nitie gik maricho mag pinyni kod timbe mag ringruok morem, ang’o momiyo wanyalo dak ka wawinjo Nyasaye?

¹⁶ Mano ok nyis ni winjo Nyasaye en gima yot. Nyaka waked gi gik maricho mag pinyni, ma “obedo e teko mar Ng’a Marachno.” (1 Johana 5:19) Nyaka waked bende gi ringruok morem, mamiyo wabedo gi paro mar ketho chike Nyasaye. (Jo Rumi 7:21-25) Kata kamano, hera ma waherogo Nyasaye nyalo locho. Jehova gwedho jogo madwaro nyiso heragi kuome ka giwinje. Omiyo “jo ma winje” kaka jaloch roho mare maler. (Tich Joote 5:32) Rohono nyago olembe mabeyo kuomwa, tiende ni kido mabeyo manyalo konyowa dak ka wawinjo Nyasaye.—Jo Galatia 5:22, 23.

17, 18. (a) Ang’o ma wabiro nono e bugni, to kendo sama watimo kamano, ang’o monego waket e paro? (b) Ang’o ma ibiro wuoyoe e sula maluwo?

 ¹⁷ E bugni, wabiro nono puonj mag Jehova kod chikene mag timbe mabeyo kod gik moko mathoth manyisowa dwarone. Seche ma wanono puonj mag Jehova, nitie weche moko madongo monego waket e paro. Wang’euru ni Jehova ok chunwa winjo chikene koda puonjne; odwaro ni wayie winjo chikene e chunywa. Wiwa kik wil ni Jehova kwayowa ni mondo wadag e yo mabiro kelo gweth mang’eny gie sani kendo mabiro terowa e ngima ma nyaka chieng’ e kinde mabiro. Kendo waneuru winjo wach gi chunywa duto kaka thuolo maber mar nyiso Jehova ni wahere ahinya.

¹⁸ Mondo okonywa pogo ber kod rach, Jehova e yor hera osemiyowa chuny manyalo chikowa. Kata kamano, chunywa dwaro tiegruok, mondo otawa e yo minyalo gen, mana kaka sula maluwo biro nyiso.