1, 2. Ki pousse nou pou content Jéhovah?

ESKI ou content Bondié? Si ou finn deja fini voué ou la vie ar Jéhovah, surement ou pou reponn par enn grand oui—c’est enn kitsoz normal! Pou nou, li normal ki nou content Jéhovah. En realité, nou content Bondié parski Li, Li’nn content nou avant. La Bible dire: “Mais nou, nou ena l’amour, parski Li [Jéhovah], Li finn content nou en premier.”—1 Jean 4:19.

² C’est Jéhovah ki’nn faire premier pas pou montré so l’amour pou nou. Li donne nou enn joli la terre pou nou resté. Li donne nou seki nou bizin lor plan physik ek materiel. (Matthieu 5:43-48) Surtout, li donne nou seki nou bizin lor plan spirituel! Li donne nou so Parole, la Bible. En plus, Li invite nou pou prié Li ek Li donne nou l’assurance ki Li pou ecoute nou ek ki Li pou donne nou so l’esprit saint pou aide nou. (Psaume 65:2; Luc 11:13) Mais pli important ki tou, Li’nn envoye so Garson ki ena beaucoup valeur pou Li, pou ki li vinn sa Kikenn ki donne so la vie en ranson-la. Coumsa nou kapav sapé dan peché ek la mort. Jéhovah inn vrai-mem montré enn grand l’amour pou nou!—Jean 3:16; Romains 5:8.

3. (a) Pou nou reste dan l’amour Bondié, ki nou bizin faire? (b) Ki question important nou bizin examiné, ek kot-sa nou trouve so reponse?

 ³ Jéhovah envie ki nou profite so l’amour pou touletan. Mais tou depann lor choix ki sakenn parmi nou faire. Parole Bondié donne nou sa conseil-la: “Reste dan l’amour Bondié . . . pou gagne la vie eternel.” (Jude 21) L’expression “reste dan l’amour Bondié” faire nou comprend ki nou bizin faire kitsoz. En retour nou bizin montré nou l’amour Bondié dan bann fason precis. Alors ena enn question important ki nou bizin examiné: ‘Couma mo kapav montré mo l’amour pou Bondié?’ Nou trouve reponse pou sa question-la dan bann parole ki Bondié ti inspire l’apotre Jean pou ecrire: “Ala  seki vedir l’amour Bondié: suive so bann commandement; ek pourtant so bann commandement pa lourd.” (1 Jean 5:3) Alors, nou bizin examine bien seki sa bann parole-la vedir, parski nou envie montré nou Bondié ki quantité nou content Li.

4, 5. (a) Ki l’expression “l’amour Bondié” vedir? (b) Raconté couma ou’nn commence ressenti l’amour pou Jéhovah dan ou leker.

⁴ “L’amour Bondié.” Ki l’apotre Jean ti pé pensé kan li ti ecrire sa bann parole-la? Sa l’expression-la pa vedir l’amour ki Bondié ena pou nou, mais l’amour ki nou, nou ena pou Li. Eski ou kapav rappel kan ou ti commence ressenti l’amour pou Jéhovah dan ou leker?

⁵ Mazinn enn coute kan ou ti konn la verité lor Jéhovah ek so bann projet pou premier fois, ek ou ti commence ena la foi. Ou ti arrivé comprend ki malgré ki ou’nn né dan peché loin ar Bondié, Jéhovah ti ouvert chemin a travers Christ pou ou kapav gagne perfection ki Adam ti perdi ek herite la vie eternel. (Matthieu 20:28; Romains 5:12, 18) Ou ti commence realisé ki grand sacrifice Jéhovah ti faire kan Li ti envoye so Garson ki ena plus valeur ki tou, pou ki li mort pou ou. Ou leker ti touché, ek ou ti commence ressenti enn l’amour pou sa Bondié ki’nn montré sa quantité l’amour-la pou ou.—1 Jean 4:9, 10.

6. Couma eski bann dimoune montré ki zot ena vrai l’amour, ek ki l’amour pou Bondié ti pousse ou pou faire?

⁶ Mais sa sentiment-la ti zis enn commencement sa vrai l’amour ki ou ressenti pou Jéhovah. L’amour li pa zis enn sentiment, ni zis deux-trois mot ki nou dire avek nou la bouche. Vrai l’amour pou Bondié vedir plus ki zis dire: “Mo content Jéhovah.” Pareil couma la foi, nou reconette vrai l’amour par bann action ki sa pousse enn dimoune pou faire. (Jacques 2:26) Bann dimoune montré zot l’amour surtout kan zot faire bann kitsoz ki faire plaisir sa kikenn ki zot  content-la. Alors, kan l’amour pou Jéhovah ti prend racine dan ou leker, sa ti pousse ou pou ena desir pou vive dan enn fason ki faire plaisir ou Papa ki dan le ciel. Eski ou baptisé? Si oui, sa l’affection ek l’attachement profond pou Jéhovah-la ti pousse ou pou prend decision pli important dan ou la vie. Ou ti voué-ou ar Jéhovah pou faire so volonté, ek ou ti montré sa kan ou ti prend bapteme. (Romains 14:7, 8) Pou tini sa promesse serieux ki ou’nn faire ar Jéhovah-la, ou bizin faire seki l’apotre Jean dire apré dan 1 Jean 5:3.

7. Cite certain commandement Bondié; ki vedir suive sa bann commandement-la?

⁷ Jean expliké ki vedir l’amour Bondié: “Suive so bann commandement.” Ki so bann commandement? Dan so Parole, la Bible, Jéhovah donne beaucoup commandement ki bien clair. Par exemple, Li interdit bann pratik couma boire ziska sou, fornication, l’idolatrie, kokin, ek koz menti. (1 Corinthiens 5:11; 6:18; 10:14; Éphésiens 4:28; Colossiens 3:9) Suive bann commandement Bondié vedir vive en accord avek bann principe moral bien clair ki ena dan la Bible.

8, 9. Couma nou kapav koné ki kitsoz faire Jéhovah plaisir mem dan bann cas kot pena okenn la loi biblik precis? Donne enn l’exemple.

⁸ Mais pou faire Jéhovah plaisir, nou bizin faire plus ki zis obeir bann commandement precis ki Li donne nou. Jéhovah pa mette bann la loi couma enn barrage autour nou pou dirige chaque domaine nou la vie toulé-jour. Alors, chaque jour ki passé, li kapav arrivé ki nou faire face ar beaucoup situation kot pena okenn commandement biblik precis ki appliké. Dan sa bann cas-la, couma eski nou kapav koné ki kitsoz pou faire Jéhovah plaisir? Dan la Bible ena bann renseignement bien clair lor fason pensé Bondié. A mesure nou etudié la Bible, nou aprann seki Jéhovah content ek seki Li pa content. (Psaume 97:10; Proverbes 6:16-19) Doucement-doucement nou comprend bann fason pensé ek bann action  ki Li apprecié. Plus nou aprann lor personnalité Jéhovah ek so bann fason agir, plus nou pou kapav laisse so fason pensé guide nou bann decision ek influence nou bann action. Lerla, mem dan bann cas kot pena okenn la loi biblik precis, souvent nou kapav comprend “ki volonté Jéhovah été.”—Éphésiens 5:17.

⁹ Par exemple, dan la Bible pena okenn commandement precis ki dire nou pa guette bann film ou-soit bann programme television kot ena beaucoup violence ek l’immoralité. Mais eski vrai-mem nou bizin enn la loi precis ki empeche nou guette sa bann qualité kitsoz-la? Nou koné couma Jéhovah considere sa bann kitsoz-la. So Parole dire nou dan enn fason bien clair: ‘Jéhovah ena vrai-mem la haine pou enn kikenn ki content la violence.’ (Psaume 11:5) Li dire encore: “Bondié pou juge bann fornicateur ek bann adultere.” (Hébreux 13:4) Kan nou reflechi lor sa bann parole inspiré-la, nou kapav comprend dan enn fason bien clair ki volonté Jéhovah été. Alors, nou pa pou choisir pou guette bann kitsoz ki montré toute sorte qualité pratik ki nou Bondié pa content, pou diverti-nou. Nou koné ki sa faire Jéhovah plaisir kan nou rejette bann kitsoz malprop ki sa le monde-la rod faire passe pou bann divertissement innocent. *

10, 11. Kifer nou choisir pou obeir Jéhovah, ek ki qualité l’obeissance nou donne Li?

¹⁰ Ki premier raison nou ena pou suive bann commandement Bondié? Kan nou konn fason pensé Bondié lor enn kitsoz, kifer nou envie vive en accord avek sa chaque jour ki passé? Nou pa choisir pou faire sa zis pou evite punition ou-soit bann mauvais consequence ki bann ki pa prend compte volonté Bondié gagné. (Galates 6:7) Au contraire, nou considere nou l’obeissance pou Jéhovah couma enn bon l’occasion pou montré l’amour ki nou ena pou  Li. Pareil couma enn zenfant bien envie faire so papa plaisir, nou aussi nou bien envie gagne faveur Jéhovah. (Psaume 5:12) Li nou Papa, ek nou content Li. Nanyin pa donne nou plus la joie ou-soit enn pli grand satisfaction ki kan nou koné nou pé vive dan enn fason ki faire nou “gagne faveur Jéhovah.”—Proverbes 12:2.

¹¹ Alors, nou pa obeir a cause ki a faire, ni nou obeir kan sa arrange nou ou-soit nou pose nou condition avant nou obeir. * Nou pa choisir ki commandement nou pou obeir, ek obeir zis kan sa pa derange nou ou-soit kan li facile pou obeir. Au contraire, nou ‘obeir avek nou leker.’ (Romains 6:17) Nou ena mem sentiment ki sa ecrivain Psaume-la: “Mo pou reste attaché ar to bann commandement ki mo’nn content.” (Psaume 119:47) Oui, nou content obeir Jéhovah. Nou reconette ki Li merite—ek Li demann—nou l’obeissance total sans okenn condition. (Deutéronome 12:32) Nou envie ki Jéhovah dire lor nou seki so Parole dire lor Noé. Li ti montré so l’amour pou Bondié kan li ti obeir Jéhovah pendant plusieurs dizaine l’année. Concernant sa zom fidele-la, la Bible dire: “Noé ti faire dapré tou seki Bondié ti’nn donne li l’ordre pou faire. Li ti faire exactement seki ti’nn dire li faire.”—Genèse 6:22.

12. Kan eski nou l’obeissance faire leker Jéhovah content?

¹² Ki Jéhovah ressenti kan nou disposé pou obeir? So Parole dire ki kan nou faire sa, nou faire so “leker content.” (Proverbes 27:11) Eski nou l’obeissance kapav vrai-mem faire leker Souverain Seigneur l’univers content? Oui, sa faire so leker content—ek pou enn bon raison! Jéhovah inn crée nou avek enn libre arbitre. Sa vedir ki nou libre pou choisir; nou kapav choisir pou obeir Bondié, ou-soit pou desobeir  Li. (Deutéronome 30:15, 16, 19, 20) Kan nou choisir volontairement pou obeir Jéhovah ek kan c’est enn leker rempli ar l’amour pou Bondié ki pousse nou pou prend sa decision-la, nou faire nou Papa ki dan le ciel ressenti enn grand plaisir ek la joie. (Proverbes 11:20) Nou pé choisir aussi pli bon fason vive ki ena.

13, 14. Kifer nou kapav dire ki “bann commandement [Bondié] pa lourd,” ek ki l’exemple nou kapav prend pou explik sa?

¹³ Dan 1 Jean 5:3, l’apotre Jean dire nou enn kitsoz ki rassure nou lor seki Jéhovah demandé: “So bann commandement pa lourd.” * Enn lot traduction la Bible dire: “So bann commandement pa enn fardeau.” (Traduction Œcuménique de la Bible) Jéhovah pa demann nou bann kitsoz ki pa raisonnable ou-soit ki lourd pou nou. Li pa impossible pou bann dimoune imparfait obeir so bann la loi.

¹⁴ Nou kapav prend enn l’exemple pou explik sa. Faire coumadir enn bon camarade demann ou aide li pou demenagé. Ena beaucoup boite pou sarié. Certain assez leger pou enn sel dimoune sarié facilement, mais ena lezot ki lourd kot bizin deux dimoune pou sarié. Ou camarade choisir bann boite ki li envie ou sarié. Eski li pou demann ou sarié bann boite ki li koné trop lourd pou ou? Non. Li pa pou envie ki ou blessé kan ou essaye sarié sa bann boite-la ou tousel. Li pareil pou nou Bondié ki content nou ek ki bon. Li pa demann nou suive bann commandement ki trop difficile pou respecté. (Deutéronome 30:11-14) Jamais Li pa pou demann nou sarié enn la charge ki lourd coumsa. Jéhovah comprend  nou bann limite, parski “Li konn bien couma nou finn formé, Li rappel ki nou finn faire ar la poussiere.”—Psaume 103:14.

15. Kifer nou kapav ena confiance ki bann commandement Jéhovah, zot pou nou pli grand profit?

¹⁵ Bann commandement Jéhovah pa lourd ditou, en realité zot faire nou gagne bann grand bienfait. (Isaïe 48:17) A cause sa-mem, Moïse ti kapav dire peuple Israël: “Jéhovah ti donne nou l’ordre pou applik tou sa bann commandement-la, pou ena la crainte pou Jéhovah nou Bondié pou nou tire profit touletan, pou ki nou kapav reste vivant couma zordi.” (Deutéronome 6:24) Nou aussi nou kapav ena confiance ki, kan Jéhovah donne nou so bann la loi, Li prend compte nou l’interet—seki pou pli bon pou nou pendant bien longtemps ek mem pou touletan. Nou pa kapav pensé ki Jéhovah pou demann nou faire enn kitsoz ki pou faire nou di-tort! Li enn Bondié ki ena enn grand sagesse. (Romains 11:33) Alors Li koné ki pli bon pou nou. Jéhovah Li aussi pli grand l’exemple l’amour. (1 Jean 4:8) L’amour, li dan nature Jéhovah, sa influence tou seki Li dire ek faire. Tou sa bann commandement ki Li donne so bann serviteur-la basé lor sa qualité-la.

16. Malgré bann l’influence sa le monde ki pé degradé lor plan moral-la ek bann tendance ki nou ena a cause nou l’imperfection, kifer nou kapav contigne obeir Bondié?

¹⁶ Sa pa vedir ki li facile pou obeir Bondié. Nou bizin laguerre kont bann mauvais l’influence sa le monde ki pé degradé lor plan moral-la ek ki “dan pouvoir sa kikenn ki mauvais-la.” (1 Jean 5:19) Nou bizin lutte aussi kont nou l’imperfection ki pousse nou pou desobeir bann la loi Bondié. (Romains 7:21-25) Mais nou l’amour pou Bondié kapav gagne la victoire. Jéhovah beni bann ki envie obeir Li pou montré zot l’amour pou Li. Li donne so l’esprit saint “bann ki obeir Li couma enn chef.” (Actes 5:32) Sa l’esprit-la produire enn joli fruit dan nou—bann qualité ki ena valeur  ki kapav aide nou pou contigne obeir Bondié.—Galates 5:22, 23.

17, 18. (a) Ki nou pou examiné dan sa livre-la, ek ki nou bizin garde dan nou l’esprit pendant ki nou pé faire sa? (b) Ki nou pou guetté dan prochain chapitre?

¹⁷ Dan sa livre-la, nou pou examine bann principe moral Jéhovah ek lezot fason ki Li faire nou konn so volonté. Pendant ki nou faire sa, nou bizin garde certain kitsoz bien important dan nou l’esprit. Anou rappel ki Jéhovah pa force nou pou obeir so bann la loi ek so bann principe; Li envie ki nou l’obeissance sorti dan nou leker. Anou rappel aussi ki Jéhovah pé demann nou pou vive dan enn fason ki pou faire nou gagne bann bienfait depuis asterla ek ki pou amenn nou vers la vie eternel dan l’avenir. Ek anou considere l’obeissance ki nou donne Jéhovah avek tou nou leker couma enn bon l’occasion pou montré Jéhovah ki quantité nou content Li.

¹⁸ Pou aide nou faire difference entre seki bon ek seki mauvais, dan so l’amour, Jéhovah inn donne nou enn conscience. Pourtant, pareil couma prochain chapitre pou montré nou, pou nou conscience kapav vinn enn guide lor ki nou kapav compté, nou bizin forme li.