1, 2. Bõe n kɩt tɩ yãmb nong Wẽnnaam a Zeova?

YÃMB nonga Wẽnnaam bɩ? Yãmb sã n zoe n dɩka y meng n kõ a Zeova, y na n leokame tɩ n-ye! Ne tõndo, pʋd n segdame la zemsame tɩ d nong a Zeova. D nonga Wẽnnaam, a sẽn nong tõndã yĩnga. Biiblã pʋd n yeta woto: ‘Tõnd nonga [a Zeova], a sẽn deng n nong tõndã yĩnga.’—1 Zã 4:19.

² A Zeova n yɩ pipi n sɩd wilg t’a nonga tõndo. A kõo tõnd tẽngã sẽn be yamleoogã. A geta tõnd yell sõma. (Matɩe 5:45) Sẽn yɩɩd fãa, a geta tõnd yell tẽebã wɛɛngẽ. A kõo tõnd Biiblã sẽn yaa a Gomdã. Sẽn paase, a wilgame tɩ tõnd sã n pʋʋs-a, a na n deega d pʋʋsgã, la t’a na n kõ-d-la a vʋʋsem sõngã. (Yɩɩl Sõamyã 65:3; Luk 11:13) La sẽn yɩɩd woto fãa, a tʋma a bi-nongrã t’a wa ki sẽn na yɩl n fãag tõnd ne yel-wẽnã la kũumã. A Zeova sẽn maan woto wã, a wilgame t’a sɩd nonga tõndo!—Zã 3:16; Rom dãmb 5:8.

3. a) Sẽn na yɩl n kell n pa Wẽnnaam nonglmã pʋgẽ, bõe la d segd n maane? b) Sok-bʋg la d segd n sok d mense, la leoorã bee yɛɛnẽ?

³ A Zeova ratame tɩ tõnd rɩ a nonglmã nafa wakat  sẽn kõn sa yĩnga. La rẽ bee ne tõnd ned kam fãa. Wẽnnaam Gomdã sagenda tõnd woto: “Bɩ y [kell n pa, NW ] Wẽnnaam nonglem pʋgẽ, yãmb sẽn gũud . . . vɩɩm sẽn ka sɛtã.” (Ziid 21) B sẽn yeel tɩ “kell n pa” wã wilgdame tɩ d tog n maana modgre. D segd n wilga ne d tʋʋmã tɩ d nonga Wẽnnaam. Dẽnd d segd n soka d mens woto: ‘Bõe la m tõe n maan n wilg tɩ m nonga Wẽnnaam?’ Sok-kãngã leokr bee goam nins Wẽnnaam sẽn vẽneg tʋm-tʋmd a Zã t’a gʋlsã pʋgẽ. A yeela woto: “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.” (1 Zã 5:3) D segd n bao n bãnga gom-kãensã  võor sõma, bala d rat n wilga Wẽnnaam tɩ d sɩd nong-a-la wʋsgo.

4, 5. a) Tʋm-tʋmd a Zã sẽn wa n gomd “Wẽnnaam nonglem” yellã, a ra tagsda bõe yelle? b) Bõe n kɩt tɩ y sɩng n na n nong a Zeova?

⁴ Tʋm-tʋmd a Zã sẽn wa n gomd “Wẽnnaam nonglem” yell vɛrse kãensã pʋgẽ wã, a ra tagsda bõe yelle? Ra pa Wẽnnaam sẽn nong tõndã yell ye. Yaa tõnd sẽn nong Wẽnnaamã yell la a ra gomda. Yãmb ket n tẽra wakat ning y sẽn wa n sɩng n na n nong Wẽnnaamã bɩ?

⁵ Tags-y n ges-y wakat ning yãmb sẽn wa n bãng a Zeova sẽn yaa a soabã, la a sẽn kãab bũmb ninsã, n sɩng n na n tall tẽeb ne rẽ wã. Yãmb wa n bãngame tɩ baa ne y sẽn dog ne yel-wẽnã, n pa tat Wẽnnaam a Zeova yamã, a kɩtame tɩ ne Kiristã maasem bɩ y tõe n wa zems zãng wa a Ãdem sẽn da yaa to-to sɩngrẽ wã, la y wa paam vɩɩm sẽn pa sate, n vɩɩnd tẽngã sẽn na n yɩ arzãnã pʋgẽ. (Matɩe 20:28; Rom dãmb 5:12, 18) Rẽ tɛka, y bãngame t’a Zeova sẽn tʋm a bi-nongrã t’a wa ki ninsaalbã yĩngã, sɩd yaa kũun sẽn ka to la a kõ tõndo. Wẽnnaam sẽn maan woto fãa n wilg t’a sɩd nonga yãmb wʋsgã yĩnga, kɩtame tɩ yãmb me sɩng n na n nong-a.—1 Zã 4:9, 10.

6. a) Wãn to la y wilgd tɩ y sɩd nonga neda? b) Y sẽn nong a Zeova wã kɩtame tɩ y maan bõe?

⁶ La woto ra nan yaa sɩngr bala. Y sã n yeel ne noor bal tɩ “mam nonga a Zeova,” pa sek ye. Wala tẽeb hakɩk sẽn naagd ne tʋʋmã, nonglem hakɩk me naagda ne tʋʋma. (Zak 2:26) Y sã n maand bũmb sẽn tat ned yam, y wilgdame tɩ y nonga a  soabã. Dẽnd y sã n sɩd nong y saasẽ Ba a Zeova, y na n datame tɩ wakat fãa bɩ y maand bũmb nins sẽn noom-a wã. Yãmb reega lisg n lebg a Zeova Kaset soab bɩ? Sã n yaa woto, yaa y sẽn nong a Zeova wʋsgo, la y rat n sak-a wakat fãa wã n kɩt tɩ y maan bõn-kãngã sẽn tar yõod n yɩɩd bũmb nins fãa y sẽn tõe n maan y vɩɩmã pʋgẽ wã. Yãmb rɩka y meng n kõ a Zeova n deeg lisg n na n maand a raabã. (Rom dãmb 14:7, 8) Sẽn na yɩl n pids y pʋlengã, rẽndame tɩ y maan bũmb ning tʋm-tʋmd a Zã sẽn yeel n paas a goamã pʋgẽ wã.

7. Wẽnnaam noyã kẽer la bʋse, la b tũub baoodame tɩ d maan bõe?

⁷ A Zã wilgame tɩ Wẽnnaam nonglem “yaa tɩ tõnd sak bãmb tõogo.” Wẽnnaam tõogã bɩ a noyã kẽer la bʋse? A Zeova kõo tõnd noy sẽn yaa vẽenes tɩ be Biiblã sẽn yaa a Gomdã pʋgẽ. Wala makre, a gɩdga rã-tɩgre, yoobo, bõn-naands pʋʋsgo, wagdem, la ziri yagbo. (1 Korẽnt dãmba 5:11; 6:18; 10:14; Efɛɛz rãmba 4:28; Kolos rãmba 3:9) D sã n dat n tũ Wẽnnaam noyã, rẽndame tɩ wakat fãa bɩ d tũud Biiblã sẽn yet bũmb ninsã.

8, 9. D sã n wa be yell taoor tɩ noor takɩ ka be Biiblã pʋgẽ n gomd rẽ yelle, d maanda wãn n bãng sẽn tat a Zeova yam? Rɩk-y makre.

⁸ D sã n dat n ta a Zeova yam, pa a noy nins sẽn yaa vẽenesã bal la d segd n sakdẽ ye. A Zeova pa yiis noy ka tɛk sẽn wilgd d sẽn segd n maan to-to yell fãa taoor ye. Rẽ kɩtame tɩ d tõe n wa be yell ning taoore, tɩ noor takɩ ka be Biiblã pʋgẽ n gomd rẽ yell ye. Sã n wa yaa woto, d na n maana wãn n bãng sẽn tat a Zeova yam? Biiblã tõe n sõnga tõnd  tɩ d bãng Wẽnnaam sẽn tagsd to-to yɛl buud toor-toor zugu. D sã n zãmsd Biiblã, d bãngda a Zeova sẽn nong la a sẽn kisi. (Yɩɩl Sõamyã 97:10; Yelbũna 6:16-19) D bãngda zʋg la manesem nins sẽn tat a yam. D sã n baood n bãngd a Zeova sẽn yaa a soabã sõma n paasdẽ, d sẽn na n yãk yam n maan bũmb ninsã fãa na n zemsda ne yẽ raabã. Baa d sã n wa be yell taoor tɩ noor ka be Biiblã pʋgẽ sẽn gomd rẽ yell vẽenega, d na n tõogame n “bãng Wẽnnaam daabo.”—Rom dãmb 12:2.

⁹ Wala makre, noor takɩ ka be Biiblã pʋgẽ n wilgdẽ tɩ d pa segd n ges filim sẽn wilgd wẽnem bɩ yoob ye. La rẽ yĩnga d pa mi tɩ d pa segd n ges yel-kãensã sɩda? Tõnd miime t’a Zeova kisa yel-kãensã. A Gomdã yeta vẽeneg woto: “Bãmb [a Zeova] kisa ned sẽn nong [wẽnem, NW ].” (Yɩɩl Sõamyã 11:5) Biiblã leb n yetame tɩ “Wẽnnaam na n kaoo raglem dãmbã ne nin-yoaadbã bʋʋdo.” (Hebre dãmba 13:4) Y sã n tags gom-kãensã zug sõma, y bãngda a Zeova raab sẽn yaa a soaba. Yaa rẽ n kɩt tɩ tõnd pa get filim bɩ sɛb sẽn wilgd yɛl Wẽnnaam sẽn kis ye. D miime tɩ d sã n pa get bõn-dẽgd kãensã sẽn pid dũniyã pʋgẽ wã, noogda a Zeova sũuri. *

10, 11. Bõe yĩng tɩ tõnd sakd a Zeova, la wãn to la d sakd-a?

¹⁰ Sẽn yɩɩd fãa bõe n kɩt tɩ d sakd Wẽnnaam noyã? Bõe yĩng tɩ daar fãa d rat n tũ bũmb nins tõnd sẽn mi tɩ zemsa ne Wẽnnaam daabã? D pa tũud Wẽnnaam noyã sẽn na yɩl n põs sɩbgr bɩ  zu-loees nins sẽn paamd neb nins sẽn pa tũud a noyã ye. (Galat dãmba 6:7) D getame tɩ d sã n sakd a Zeova, wilgdame tɩ d nong-a lame. Wala biig sẽn dat t’a ba sũur yɩ noog ne-a wã, tõnd me ratame t’a Zeova sũur yɩ noog ne-do. (Yɩɩl Sõamyã 5:13) A Zeova yaa tõnd Ba, la d nong-a lame. Baa fʋɩ ka be n kõt tõnd sũ-noog n yɩɩd d sẽn na n miẽ tɩ bũmb nins d sẽn maandã kɩtdame me tɩ d paamd a Zeova bark ye.—Yelbũna 12:2.

¹¹ Tõnd pa sakd a Zeova noyã ne nen-gãneng bɩ n sakd kẽer n basd kẽer ye. * D pa tũusd Wẽnnaam noy nins d sẽn datã bɩ sẽn yaa nana ne tõndã n tũudẽ ye. Tõnd sakda a noyã fãa ‘ne d sũyã fãa.’ (Rom dãmb 6:17) Tõnd me rat n yeela wala Biiblã pʋgẽ yɩɩl-gʋlsdã. A yeela woto: “Mam sũur yaa noog ne yãmb tõodã, la mam nonga bãmba.” (Yɩɩl Sõamyã 119:47) Tõnd sɩd ratame n sak a Zeova. D miime tɩ yẽ n tog ne sakr zãng-zãnga, la t’a ratame tɩ d sak-a ne d sũur fãa. (Tõodo 13:1) Tõnd ratame t’a Zeova gom tõnd me yell wala a sẽn gom a Nowe yell to-to a Gomdã pʋgẽ wã. A Nowe yɩɩ wẽn-sakd hakɩk yʋʋm wʋsg pʋgẽ, n wilg t’a sɩd nonga Wẽnnaam. Biiblã yeelame tɩ “bũmb nins fãa Wẽnnaam sẽn yeel yẽ t’a maanã, yẽ maaname.”—Sɩngre 6:22.

12. Wãn to la d segd n sak a Zeova t’a sũur yɩ noogo?

¹² Wãn to la a Zeova get tõnd sakrã? A Gomdã yetame tɩ tõnd sã n sakd ne yamleoogo, kõt-a-la “sũ-noogo.” (Yelbũna 27:11) Rẽ yĩnga tõnd sakrã  sɩd kõta yĩngr la tẽng Naabã sũ-noogo? N-ye, sɩd kõt-a-la sũ-noogo. Bõe yĩnga? A Zeova naana tõnd tɩ d tõe n yãk yam n maan d sẽn date. D sã n data d tõe n sak-a lame, d sã n dat me d tõe n kɩɩs-a lame. (Tõodo 30:15, 16, 19, 20) La tõnd sã n sakd d saasẽ Ba a Zeova d sẽn nong-a wã yĩnga, sɩd noogda a sũur wʋsgo. (Yelbũna 11:20) Sẽn paase, d sã n maand woto, d vɩɩmã me na n talla barka.

13, 14. Bõe yĩng tɩ d tõe n yeel tɩ Wẽnnaam “tõog ka toogo,” la ne mak-bʋg la d tõe n bilg rẽ?

¹³ Tʋm-tʋmd a Zã wilga tõnd bũmb sẽn be yamleoog a Zeova noyã tũub wɛɛngẽ. A yeelame tɩ “bãmb tõog ka toog ye.” Gɛrk gom-bil ning b sẽn lebg 1 Zã 5:3 pʋgẽ tɩ “toogã” rat n yeelame tɩ “zɩsgo.” * Rẽ n so tɩ Biibl a to (Sebr Sõngo) lebgd zĩ-kãng tɩ Wẽnnaam noyã “ka zɩs ye.” A Zeova noyã pa namsd ned ye. Ninsaalbã sẽn pa zems zãngã meng tõe n tũ-b lame.

¹⁴ Ges-y makr sẽn wilgd rẽ. Wala yãmb zoa sẽn na n dat n toeem roogo, n kos yãmb tɩ y sõng-a t’a wʋk a teedo. A saga teedã kartõ rãmb pʋsẽ. Kẽer faasame tɩ nin-yend tõe n dɩke, la kẽer zɩsame tɩ nin-yend pa tõe n dɩk ye. Rẽ yĩnga y zoa wã na n kosa yãmb tɩ y rɩgs kartõ zɩsdã n yaool n miẽ tɩ yɩɩda y pãng sɩda? Ayo! A pa na n maan woto ye. Bala a pa rat n nams yãmb ye. Tõnd Wẽnnaamã sẽn nong tõndã me pa na n kõ tõnd noy a sẽn mi  tɩ d pa tõe n tũ ye. (Tõodo 30:11-14) A Zeova pa na n kos tõnd abada tɩ d tʋk zɩɩb sẽn yɩɩd d pãng ye. A mii tõnd sẽn tõe n maan tɛka, bala “bãmb mii bãmb sẽn yãk bũmb ning n naan tõndo, bãmb tẽegdame tɩ tõnd yaa tẽng tom.”—Yɩɩl Sõamyã 103:14.

15. Bõe yĩng tɩ d tõe n kɩs sɩd t’a Zeova noyã yaa tõnd nafr yĩnga?

¹⁵ A Zeova tõogã bɩ a noyã pa toog abada. A kõo tõnd a noyã d nafr yĩnga. (Ezai 48:17) Rẽ n so t’a Moiiz ra yeel Israɛll nebã t’a Zeova yeelame tɩ ‘d sak tõ-kãensã fãa la d zoe bãmba a Wẽnnaam n tõog n paam sũ-noog daar fãa n kell n vɩɩmde.’ (Tõodo 6:24) Tõnd me tõe n kɩsa sɩd tɩ yaa a Zeova sẽn dat d neer wakat fãa wã yĩng la a sẽn kõ tõnd a noyã. Sɩd yaa woto, bala a Zeova yamã pa tar koak ye. (Rom dãmb 11:33) Rẽ n so t’a mi sẽn yaa sõma ne tõndo. A Zeova leb n yaa nonglem. (1 Zã 4:8) A maanda bũmba fãa ne nonglem. Yaa a sẽn nong a nebã yĩng n kɩt t’a kõ-b noy nins fãa sẽn be a Gomdã pʋgẽ wã.

16. Bõe yĩng tɩ d tõe n kell n sak Wẽnnaam baa ne d sẽn tar wẽngã tʋlsmã, la d sẽn vɩ dũni sẽn põog pʋgẽ wã?

¹⁶ Woto pa rat n yeel tɩ Wẽnnaam sakr yaa nana ye. Yɩl n maan dẽ baooda modgre, bala dũni-põosg ning pʋgẽ tõnd sẽn vɩ wã “bee wẽng soabã nugẽ.” (1 Zã 5:19) Tõnd segdame me n mao ne wẽngã tʋlsem sẽn tusd tõnd tɩ d rat n kɩɩs Wẽnnaam noyã. (Rom dãmb 7:21-25) La d sẽn nong Wẽnnaamã, d na n tõogame n yals kãn-kãe. A Zeova ningda neb nins sẽn sakd-a b sẽn nong-a wã yĩngã barka. A kõta ‘neb nins sẽn sakd yẽ wã’ a vʋʋsem sõngã. (Tʋʋma 5:32) Vʋʋsem sõngã biisã, rat n yeel tɩ zʋg-sõma nins a sẽn sõngd tõnd tɩ d  paamdẽ wã na n kɩtame tɩ d kell n sak Wẽnnaam.—Galat dãmba 5:22, 23.

17, 18. a) Bõe la d na n yã seb-kãngã pʋgẽ, la bõe la d segd n ning d yamẽ? b) Sak ning sẽn pʋgdã na n goma bõe yelle?

¹⁷ Seb-kãngã pʋgẽ, d na n yãa a Zeova saglse, a noy la yɛl a taab sẽn tõe n sõng tõnd tɩ d bãng a sẽn datã. La d segdame me n ning bũmb nins sẽn pʋgdã sẽn tar yõod wʋsgã d yamẽ: D tẽeg t’a Zeova pa modgd tõnd tɩ d sak a noyã la a saglsã ye. A ratame tɩ d sak ne yamleoog la ne d sũur fãa. D ra yĩm t’a Zeova sẽn dat tɩ d maan bũmb ninsã yaa sẽn na n naf tõnd rũndã-rũndã, la kɩt tɩ d wa paam vɩɩm sẽn pa sat ye. D bãng tɩ tõnd sã n sakd a Zeova ne d sũur fãa, d wilgdame tɩ d sɩd nong-a lame.

¹⁸ A Zeova sẽn nong tõndo, n dat tɩ d bãng sõma ne wẽng n bakã, a kõo tõnd sũur-kaset sẽn na yɩl n sõng tõnd tɩ d tõogd n sɩd bãngd sõma ne wẽng n bakdẽ. La sẽn na yɩl n paam tɩ d sũur-kasetã tõogd n wilg tõnd sor sõma, a segd n paama kiblgu. Sak ning sẽn pʋgdã na n goma rẽ yelle.