TLAMACHTIL 1
“Tiktenextiah tiktlasojtla Dios”
“Tiktenextiah tiktlasojtla Dios keman tikintlakitah itlanawatilwah, iwa amo owi se kintlakita.” (1 JUAN 5:3.)
1, 2. ¿Tleka tiktlasojtla Jehová?
¿TIKTLASOJTLA toTajtsin Dios? Tla yotimotemakak itech, ika nochi moyolo titlanankilis kema. Kisa itech toyolo tiktlasojtlaskej Jehová. Uan tiktlasojtlaj pampa ye techtlasojtla. Ken kijtoa Biblia: “Tiktlasojtla Dios porke Ye achto otechtlasojtlak” (1 Juan 4:19).
2 Jehová nochipa kitemojtok ken techititis ye techtlasojtla. Otechmakak se kualtsin tokalijtik, Tlaltikpak, uan mojmostla techmaka tlen ika tiyoltoskej (Mateo 5:45). Noijki kichikaua totlaneltokilis pampa non tlen okachi ipati. ¿Ken kichiua? Se neskayotl, otechtliokoli iTlajtol, Biblia. Noijki techyoleua itech ma timotlatlaujtikan uan tikmatij melauak techkakis uan techmakas iespíritu santo pampa ma techpaleui (Salmo 65:2; Lucas 11:13). Okiteititi techtlasojtla ijkuak okiualtitlanki iKone ma techmakixtiki itech tlajtlakoli uan mikilistli. ¡Jehová sapanoa techtlasojtla! (xiktlajtolti Juan 3:16; Romanos 5:8.)
3. 1) ¿Tlen moneki tikchiuaskej pampa tiyetoskej itech itlasojtlalis toTajtsin Dios? 2) ¿Tlen okachi ipati ma timotlajtlanikan, uan kanin uelis tikajsiskej tlanankilistli?
3 Jehová kineki nochipa ma tikpiakan itlasojtlalis. Tejuan tikijtoskej tla tiknekij noso amo. ITlajtol toTajtsin Dios technauatia: “Xiyetokan itech itlasojtlalis toTajtsin Dios [...] uan yolilistli tlen kajki namoixpan tlen amo keman tlamis” (Judas 21, TNM). Tlajtoli “xiyetokan”, kijtosneki moneki itlaj tikchiuaskej uan ijkon tiyetoskej itech itlasojtlalis toTajtsin Dios. Ika tlen tikchiuaj itech tonemilis, moneki tikteititiskej noijki tiktlasojtlaj. Ik non, ma timotlajtlanikan: “¿Tlen moneki nikchiuas pampa nikititis melauak niktlasojtla toTajtsin Dios?”. Pampa uelis titlanankiliskej, ma tiktlajtoltikan tlen Jehová okilui ma kijkuilo tlatitlanil Juan: “Tiktenextiah tiktlasojtla Dios keman tikintlakitah itlanawatilwah, iwa amo owi se kintlakita [noso se kintlakamati]” (1 Juan 5:3). Pampa sapanoa tiknekij tikititiskej melauak tiktlasojtlaj, ma tikitakan tlen kijtosneki ninmej tlajtolmej tlen okijkuilo Juan.
“TIKTENEXTIAH TIKTLASOJTLA DIOS”
4, 5. Xikyekijto ken opejki tiktlasojtla Jehová itech moyolo.
4 “Tiktlasojtla Dios”, ¿tlen omokuayejyekojtoka tlatitlanil Juan ijkuak okijkuilo nin? Omokuayejyekojtoka itech tlen tikmachiliaj itech toyolo tisejse itech toTajtsin Dios. ¿Tikilnamiki ken opejki tiktlasojtla Jehová itech moyolo?
Ijkuak timotemakaj itech Jehová uan timoapolaktiaj peua tikteititiaj tiktlasojtlaj uan tiktlakamatij
5 Tepitsin ximokuayejyeko ijkuak opejki timomachtia tlen melauak itech Jehová uan itech itlanekilis, opejki titlaneltoka itech. Otikajsikamatki amo otikatka inauak toTajtsin Dios pampa titlajtlakole, pero ika Cristo, omitsmakak se kualtsin chialistli: tiyoltos nochipa uan ayakmo tikpias tlajtlakoli, itlaj tlen Adán okipolo (Mateo 20:28; Romanos 5:12, 18). Noijki otikajsikamatki Jehová sapanoa miak okitemakak ijkuak okiualtitlanki iKone akin okachi kitlasojtla ma mikiki mopampa. Ijkuak otikmatki nin, melauak oajsik itech moyolo, ik non, opejki tiktlasojtla Jehová (xiktlajtolti 1 Juan 4:9, 10).
6. ¿Ken moteititia tlasojtlalistli tlen melauak, uan tlen otikchi tejuatsin pampa tiktlasojtla toTajtsin Dios?
6 Ijkuak ijkon otikmachiliaya, ayamo melauak otiktlasojtlaya Jehová. Tlasojtlalistli amo moteititia san ika tlajtolmej noso san pampa se kijtos se kimachilia. Melauak tiktlasojtlaskej Jehová amo san kijtosneki tikijtoskej: “Ne niktlasojtla Jehová”. Ijkon ken tlaneltokilistli, tlasojtlalistli tlen melauak tikteititiaj ika tlen tikchiuaj (Santiago 2:26). Ijkuak tiktlasojtlaj ikaj, tiknekij tikchiuaskej tlen ye kipaktia. Uan tejuatsin ijkon omitspanok. Ik non, ijkuak opejki tiktlasojtla Jehová, otikneki tikchiuas tlen kiyolpaktia. ¿Tejuatsin yotimoapolakti? Tla kema, otikchi tlen okachi ipati itech monemilis pampa melauak tiktlasojtla toTajtsin Dios uan tikneki tinemis ken ye kineki. Otimotemakak itech Jehová pampa tikchiuas itlanekilis, uan ijkon otikteititi ijkuak otimoapolakti (xiktlajtolti Romanos 14:7, 8). Ijkon ken tikitaskej satepan, pampa tikchiuas tlen otikilui Jehová, moneki tikchiuas tlen okijto tlatitlanil Juan.
“TIKINTLAKITAH ITLANAWATILWAH”
7. ¿Katli seki itlanauatiluan toTajtsin Dios, uan tlen moneki tikchiuaskej pampa tikintlakamatiskej?
7 Juan okijto tikteititiaj tiktlasojtlaj toTajtsin Dios ijkuak “tikintlakitah itlanawatilwah”. ¿Katli itlanauatiluan? Biblia techiluia. Se neskayotl, Jehová kijtoa amo ma titlauanakan, amo ma tiauilnemikan, amo ma tikinueyichiuakan teotsitsintin, amo ma titlachtekikan nion ma titlakajkayauakan (1 Corintios 5:11; 6:18; 10:14; Efesios 4:28; Colosenses 3:9). Pampa tikintlakamatiskej itlanauatiluan toTajtsin Dios, moneki tikchiuaskej tlanauatilmej tlen katej itech Biblia tlen techiluiaj ma tikpiakan chipauak tonemilis.
8, 9. Ijkuak amo onka se tlanauatil itech Biblia tlen techiluia tlen moneki tikchiuaskej, ¿ken uelis tikmatiskej tlen kineki Jehová ma tikchiuakan? Xikijto se neskayotl.
8 Uan pampa tikyolpaktiskej Jehová, amo san moneki tikintlakamatiskej tlanauatilmej tlen katej itech Biblia. Jehová amo techsotlaua ika tlanauatilmej tlen techiluiaj tlen tikchiuaskej itech nochi tlamantli. Mojmostla techpanoa miak tlamantli uan amo onka se itlanauatil Biblia tlen techiluia tlen moneki tikchiuaskej. Ijkuak ijkon techpanoa, ¿ken tikmatiskej tla Jehová yolpakis ika tlen tiknekij tikchiuaskej? Biblia kuali techiluia ken mokuayejyekoa toTajtsin Dios. Ijkuak timomachtiaj Biblia, tikajsikamatij tlen Jehová kitlasojtla uan tlen kikokolia (xiktlajtolti Salmo 97:10; Proverbios 6:16-19). Ijkon tikajsikamatij ken kineki ma tikpiakan tonemilis uan tlen kipaktia ma tikchiuakan. Ijkuak okachi tikmatij ken kichiua uan ken iyelis Jehová, okachi amo oui tikmatiskej kox kiyolpaktis noso amo tlen tiknekij tikchiuaskej. Maski ualeua Biblia amo techmaka se tlanauatil tlen kijtoa tlen moneki tikchiuaskej, kema uelis ‘tikajsikamatiskej tlan Dios kimonekiltia matikchiuakah’ (Efesios 5:17).
9 Ma tiktlalikan se neskayotl. Biblia amo kanaj kiyekijtoa amo ma tikitakan itech televisión ijkuak auilnemij noso ijkuak sapanoa moteuiaj. San ma timokuayejyekokan, ¿moneki ma yeto se tlanauatil tlen kijtos amo ma tikitakan non tlamantli? Yitikmatij ken kita Jehová non tlamantli. Itech iTlajtol kuali techiluia ye “kikokolia akin kipaktia moteuis” (Salmo 11:5). Uan noijki kijtoa: “Kintlaijyowiltis akimeh momekatiah noso awilnemi, non yomonamiktijkeh iwa non ayamó monamiktiah” (Hebreos 13:4). Ijkuak timokuayejyekoaj itech ninmej tlajtolmej tikajsikamatij katli itlanekilis Jehová. Ik non, amo tiknekij tikitaskej itech televisión, películas, Internet noso oksekan kanin moita tlen toTajtsin Dios kikokolia. Maski tlaltikpaktlakamej tlen amo yolkualmej kinekij ma tikneltokakan amo techijtlakos tlamauisolmej tlen sokiojkej, Jehová yolpaki ijkuak tikinmixtopeuaj ninmej tlamauisolmej. *
10, 11. ¿Tleka nochipa tiknekij tiktlakamatiskej Jehová, uan ken tikchiuaj?
10 ¿Tlen okachi techyolinia ma tikintlakamatikan itlanauatiluan toTajtsin Dios? ¿Tleka tiknekij tikpiaskej tonemilis ken toTajtsin Dios kineki? Amo san pampa amo tiknekij tikpiaskej ouijkayotl noso amo tiknekij ma techtlajyouilti (Gálatas 6:7). Tiktlakamatij Jehová pampa tikajsikamatij ijkon uelis tikititiskej melauak tiktlasojtlaj. Ijkon ken konemej kinekij ma kinselikan intatajuan, tejuan noijki tiknekij ma techseli Jehová (Salmo 5:12). Ye toTajtsin uan tiktlasojtlaj miak. Techyolpaktia miak tikmatiskej tlen tikchiuaj ‘kiselia Jehová’ (Proverbios 12:2).
11 Ik non, amo san tikualantokej ijkuak tiktekichiuiliaj toTajtsin Dios nion tikchiuaj san ken tiknekij noso san ken okachi techpaktia. * Amo tikijtoaj keman titetlakamatiskej, amo timokuayejyekoaj san tikchiuaskej ijkuak amo okachi oui, noso ijkuak amo sapanoa timochijchikauaskej. Okachi kuali, ‘titetlakitah ika [nochi] toyolo’ (Romanos 6:17). Tikmachiliaj ijkon ken okijkuilo salmista: “Nikinneki motlanauatiluan” (Salmo 119:47). Kema, tiktlakamatij Jehová ika pakilistli. Tikajsikamatij san ye kinamiki —uan ye ijkon techtlajtlanilia— nochipa ma tiktlakamatikan uan amo ma titlananankilijtokan (Deuteronomio 12:32). Tiknekij tikchiuaskej ken Noé, akin itech nochi inemilis okitlakamatki toTajtsin Dios ika nochi iyolo uan ijkon okiteititi melauak okitlasojtlaya. Noijki ijkon moijtos totech ken omoijto itech ye: “Okichi nochi tlen okinauati toTajtsin Dios. Ijkon melauak okichi” (Génesis 6:22).
12. ¿Ken uelis tikyolpaktiskej Jehová?
12 ¿Ken momachilia Jehová ijkuak tiktlakamatij ika pakilistli? Biblia kijtoa tikyolpaktiaj (Proverbios 27:11). Pero ¿melauak uelis tikyolpaktiskej akin Ueyi Tekiua itech nochi semanauak? Kema. Jehová otechchijchi pampa uelis tikpejpenaskej tlen tikchiuaskej. Ik non, uelis tiktlakamatiskej, noso amo (Deuteronomio 30:15, 16, 19, 20). Ijkon, ijkuak tikchiuaj itlanekilis, melauak tikyolpaktiaj pampa tiktlasojtlaj ika nochi toyolo (Proverbios 11:20). Uan noijki okachi kuali tikpiaj tonemilis.
“AMO OWI SE KINTLAKITA”
13, 14. ¿Tleka tikijtoaj “itlanawatilwah [Jehová] [...] amo owi se kintlakita”, uan tlen ika uelis tikneskayotiskej?
13 Tlatitlanil Juan noijki kijtoa ninmej tlajtolmej tlen techyolseuiaj: “Itlanawatilwah [Jehová] [...] amo owi se kintlakita”. Tlajtoli griego tlen motlajtolkuepa “owi” tlen ijkuilitok itech 1 Juan 5:3, kijtosneki “etik”. * Noijki, okse versión bíblica kitlajtolkuepa ijkin: “Itlanauatiluan amo se tlamamali tlen etik” (Nuevo Testamento, Pedro Ortiz). Jehová amo techtlajtlanilia itlaj tlen sepa amo uelis tikchiuaskej. Maski tinochtin titlajtlakolejkej, uelis tikintlakamatiskej itlanauatiluan.
14 Ma tiktlalikan se neskayotl. Ximokuayejyeko se teta kuajkouiti iuan ikonetsin. Nin teta amo kinauatis ikonetsin ma kimama miak kuauitl, pampa kimati amo kixikos uan uelis mokokos. Noijki ijkon panoa iuan toTajtsin Dios akin techtlasojtla. Ye amo techtlajtlanilia itlaj tlen amo uelis tikchiuaskej (Deuteronomio 30:11-14). Amo keman technauatia ma tikmamakan itlaj tlen sapanoa etik. Jehová kimati hasta kanin uelis titlaxikoskej pampa ye “kuali kimati ken tichijchijtokej, uan kilnamiki tejuan titlali” (Salmo 103:14).
15. ¿Tleka kuali tikmatij itlanauatiluan Jehová techpaleuiaj?
15 Itlanauatiluan Jehová sepa amo etikej; katej pampa techpaleuiskej (xiktlajtolti Isaías 48:17). Moisés okinmilui israelitas omonekiaya ‘kichiuaskej nochi ninmej tlanauatilmej, ma kimauilikan toTajtsin Jehová’. Uan noijki okijto tleka: “Pampa nochipa kuali tiyetoskej, pampa uelis tiyoltoskej” (Deuteronomio 6:24). Tejuan noijki kuali tikmatij itlanauatiluan toTajtsin Dios katej pampa techpaleuiskej uan nochipa tiyolpakiskej. ¿Tleka melauak techpaleuiaj? Pampa uitsej itech Jehová, akin sapanoa ixtlamatki uan kimati tlen okachi techpaleuia (Romanos 11:33). Uan noijki ye tlasojtlalistli (1 Juan 4:8). Ik non, tlasojtlalistli moita itech nochi tlen kichiua uan kijtoa, noijki itech itlanauatiluan.
16. Maski akinmej amo kitlakamatij Jehová kinekij techtlaniskej uan noijki totlajtlakol, ¿tlen techpaleuis ma tiktlakamatikan?
16 Nin amo kijtosneki amo oui se kitlakamatis toTajtsin Dios. Moneki timochijchikauaskej pampa amo techtlaniskej akinmej amo kitlakamatij Jehová, pampa “nochteh n tlaltikpaktlakah non amo kineltokah Dios kinnawatijtok n satanás” (1 Juan 5:19). Noijki moneki timochijchikauaskej pampa amo techtlanis totlajtlakol tlen techtopeua amo ma tikintlakamatikan itlanauatiluan toTajtsin Dios (Romanos 7:21-25). Pero uelis tlatlanis tlasojtlalistli tlen tikpialiaj toTajtsin Dios. Jehová kinteochiua akinmej kitlakamatij pampa kitlasojtlaj. Uan ye kinmaka “Espíritu Santo [...] akimeh kitlakitah” (Hechos 5:32). Uan espíritu santo kichiua ma tikpiakan tlen kuali itech toyolo: ma tikpiakan kuali toyelis, tlen techpaleuis ma tiktlakamatikan toTajtsin Dios (Gálatas 5:22, 23).
17, 18. 1) ¿Tlen timomachtiskej itech nin amochtli, uan tlen moneki tikilnamiktoskej ijkuak timomachtijtiaskej? 2) ¿Tlen tikitaskej itech okse tlamachtil?
17 Itech nin amochtli timomachtiskej seki principios bíblicos uan okseki tlanauatilmej tlen techmaka Jehová pampa tikpiaskej chipauak tonemilis, uan okseki tlamantli tlen ye kineki ma tikchiuakan. Ijkuak timomachtijtiaskej, moneki ma tikitakan seki tlamantli tlen miak ipati. Se, Jehová amo keman techchiualtia ma timoyekanakan ika principios bíblicos uan okseki tlanauatilmej tlen techmaka; ye kineki ma tikchiuakan itlanekilis pampa kisa itech toyolo. Ome, Jehová kineki techmakas se nemilistli tlen axkan techmakas tlateochiualismej uan satepan yolilistli tlen amo keman tlamis. Eyi, tla tiktlakamatij Jehová ika nochi toyolo, tikititiaj melauak tiktlasojtlaj.
18 Pampa uelis tikmatiskej tla itlaj kuali noso amo, Jehová otechtliokoli itlaj: totlalnamikilis. Uan tla tiknekij kuali ma techyekana totlalnamikilis, moneki tikmachtiskej, uan nin tikitaskej itech okse tlamachtil.
^ párr. 9 Itech tlamachtil 6 kiyekijtoa ken uelis tikpejpenaskej tlen ika timoyolpaktiskej.
^ párr. 11 Amo kuali ejekamej noijki tetlakamatij maski san kualantokej. Ijkuak Jesús okinnauati sekimej amo kuali ejekamej ma kisakan intech tlaltikpaktlakamej, yejuan okichijkej itlaj tlen amo okinekiayaj kichiuaskej: okiselijkej itlanauatil Cristo uan okitlakamatkej (Marcos 1:27; 5:7-13).
^ párr. 13 Nin tlajtoli noijki motekitiltia itech Mateo 23:4, kanin kijtoa escribas uan fariseos ‘okinmamaltiayah’ tlaltikpaktlakamej pampa ma kintlakamatikan miakej tlanauatilmej uan okseki tlamantli tlen san okintlaliliayaj. Itech Hechos 20:29, 30 motlajtolkuepa ken “kintlajtlamiah”, uan nin tlajtoli omoijto itech akinmej moxeloskiaj itech ialtepe Jehová tlen kintlajyouiltiskiaj uan kinkajkayauaskiaj miakej ika “tlan amo milák”.
