1, 2. Oshike she ku inyengitha wu kale wu hole Jehova Kalunga?

MBELA owu hole Kalunga? Ngele owi iyapulila nale Jehova Kalunga, osha yela kutya oto ka tya eeno, naashoka oshi li mondjila. Oshi li pandunge okukala tu hole Jehova. Otu hole Kalunga molwaashoka a kala e tu hole tango. Ombiimbeli otayi shi popi komukalo nguka tayi ti: ‘Otu hole Jehova, oshoka okwa kala e tu hole tango.’ — 1 Joh. 4:19.

² Jehova oye e tu ulukile ohole ye tango. Okwe tu pa evi ndyoka li li ehala ewanawa okukala mo. Ohe tu sile oshimpwiyu palutu. (Mat. 5:43-48) Shoka sha simana noonkondo osho kutya ohe tu sile oshimpwiyu pambepo. Okwe tu pa Oohapu dhe, Ombiimbeli. Kakele kaashono, ote tu hiya tu mu galikane notu na uushili kutya ote ke tu uva note ke tu pa ombepo ye ondjapuki yi tu kwathele. (Eps. 65:2; Luk. 11:13) Shoka sha simanenena osho kutya okwa tuma Omwana omuholike a ninge Omukulili gwetu opo e tu hupithe muulunde neso. Jehova inu ulika tuu kutya oku tu hole noonkondo! — Lesha Johannes 3:16; Aaroma 5:8.

3. (a) Otwa pumbwa okuninga shike opo tu kale mohole yaKalunga? (b) Epulo lya simana lini twa pumbwa okwiipula, nopeni tatu adha eyamukulo?

³ Jehova okwa hala tu mone uuwanawa mohole ye sigo aluhe. Ihe oshi ikolelela kutse ngele otatu ke wu mona nenge hasho. Oohapu dhaKalunga otadhi tu kumagidha  tadhi ti: ‘Ikalekeni mohole yaKalunga mu na etegelelo lyokupewa omwenyo gwaaluhe.’ (Jud. 21) Uutumbulilo ‘ikalekeni’ otawu ulike kutya opo tu kale mohole yaKalunga, otwa pumbwa okuninga sha. Otwa pumbwa okwiinyengithwa kohole ye momikalo dhi wetike. Onkee ano, epulo lya simana kutse okwiipula olyo: ‘Ongiini tandi vulu okuulika kutya ondi hole Kalunga?’ Eyamukulo otali adhika moohapu dha nwethwa mo dhomuyapostoli Johannes ndhoka tadhi ti: “Ohole yokuhola Kalunga oyo okuvulika kiipango ye. Iipango ye kayi shi iidhigu kutse.” (1 Joh. 5:3) Otu na okukonakona nuukeka shoka oohapu ndhika tadhi ti, oshoka otwa hala okuulukila Kalunga ketu kutya otu mu hole noonkondo.

4, 5. Hokolola nkene ohole yokuhola Jehova ya tameke okukoka momutima gwoye.

⁴ Omuyapostoli Johannes okwa li a tameke oohapu ndhoka dha popiwa metetekelo a ti: “Ohole yokuhola Kalunga oyo . . . ” Natu tale nkene a yelitha shoka okukala tu hole Kalunga taku ti. Ihe manga inaatu tala kwaashoka, kambadhala okudhimbulukwa ethimbo ndyoka ohole yokuhola Jehova ya tameke okukoka momutima gwoye.

⁵ Dhiladhila uule wokathimbo sho wi ilongo tango oshili kombinga yaJehova nomalalakano ge e to tameke okukala neitaalo. Owi ilongo kutya nonando owa valwa omulunde i iteka kuKalunga, ye okwe ku pe ompito okupitila muKristus opo wu ka mone egwaneneno ndyoka Adam a kanitha nowu mone omwenyo gwaaluhe. (Mat. 20:28; Rom. 5:12, 18) Owa tameka okukala wu uvite ko kutya Jehova okwa ninga oshindji noonkondo sho a tumu Omwana omuholike e ku sile. Shika oshi inyengitha omutima gwoye e to tameke okukala wu hole Kalunga ngoka e ku ulukila ohole ye onene ya tya ngaaka. — Lesha 1 Johannes 4:9, 10.

6. Ohole yashili ohayi ulikwa ngiini, nohole yokuhola Kalunga oye ku inyengitha wu ninge shike?

⁶ Nonando ongaaka, eiyuvo ndyoka olya li owala etameko lyohole yashili yokukala wu hole Jehova. Ohole kayi shi owala eiyuvo. Ohole yashili yokuhola Kalunga oya kwatela mo oshindji kaashi shi owala okutya: “Ondi hole Jehova.” Ngaashi eitaalo, ohole yashili ohayi ulikwa nohayi imonikila miilonga. (Jak. 2:26) Oku shi popya kondandalunde, ohole ohatu yi ulike mokulongela ngoka tu hole iilonga mbyoka tayi mu nyanyudha. Onkee ano, sho wa tameke okukala wu hole Jehova, oshe ku inyengitha wu kale wa hala okukala nonkalamwenyo ndjoka tayi mu nyanyudha. Mbela owu li Onzapo ya ninginithwa? Ngele osho, ohole ndjika onene nuudhiginini woye muJehova oyo ye ku inyengitha wu ninge etokolo ndyoka lya simanenena  monkalamwenyo yoye. Owi iyapulila Jehova okulonga ehalo lye nowe shi ulika mokuninginithwa. (Lesha Aaroma 14:7, 8.) Okukala metsokumwe nokwiiyapulila kwetu Jehova okwa kwatela mo shoka tashi popiwa komuyapostoli Johannes mokatendo taka landula.

7. Yimwe yomiipango yaKalunga oyini, nokuvulika kuyo okwa kwatela mo shike?

⁷ Johannes ota yelitha shoka ohole yokuhola Kalunga tayi ti, sho a ti: “Okuvulika kiipango ye.” Iipango yaKalunga oyini? Jehova okwe tu pa iipango oyindji yokondandalunde mOohapu dhe, Ombiimbeli. Pashiholelwa, okwi indika iilonga ngaashi uunkolwe, oluhondelo, esimaneko lyiimenka, okuyaka nokufundja. (1 Kor. 5:11; 6:18; 10:14; Ef. 4:28; Kol. 3:9) Okuvulika kiipango yaKalunga okwa kwatela mo okukala metsokumwe nomithikampango dha yogoka dhopamikalo ndhoka dhi li mOmbiimbeli.

8, 9. Ongiini tatu vulu okutseya kutya oshike tashi nyanyudha Jehova nokuli nomoonkalo moka kaapu na ompango yOmbiimbeli yokondandalunde? Gandja oshiholelwa.

⁸ Ihe opo tu nyanyudhe Jehova, otwa pumbwa okuninga oshindji kaashi shi owala okuvulika kiipango ye yokondandalunde. Jehova ine tu tulila po oompango ndhoka tadhi tu lombwele shoka tu na okuninga mokanima kehe monkalamwenyo yetu yesiku kehe. Onkee ano, monkalamwenyo yetu yesiku kehe otashi vulika hatu tsakaneke oonkalo odhindji ndhoka kaapu na oshipango shokondandalunde mOmbiimbeli tashi popi kombinga yadho. Ongiini tatu vulu okutseya shoka tashi nyanyudha Jehova moonkalo dha tya ngaaka? Ombiimbeli otayi popi sha yela kutya Kalunga okwa hokwa shike. Manga tatu konakono Ombiimbeli, otatu ilongo shoka Jehova e hole naashoka e tonde. (Lesha Episalomi 97:10; Omayel. 6:16-19) Otatu ilongo kutya oku hole iikala niilonga yini. Shi thike mpoka tatu  ilongo kombinga yuukwatya we noondjila dhe, opo ngaa pu thike okweetha okudhiladhila kwe ku nwethe mo omatokolo getu niilonga yetu. Ano nokuli nomoonkalo moka kaapu na ompango yOmbiimbeli yokondandalunde, otatu vulu okutseya kutya ‘Omuwa okwa hala tu ninge shike.’ — Ef. 5:17.

⁹ Pashiholelwa, mOmbiimbeli kamu na oshipango tashi ti kutya inatu tala ookino nenge oopolohalama dhoko-TV ndhoka tadhi ulike elongithonkondo enyanyalithi nenge oluhondelo. Ihe mbela otwa pumbwa lela ompango yokondandalunde tayi tu indike tu tale iinima ya tya ngaaka? Otu shi nale nkene Jehova he yi tala ko. Oohapu dhe otadhi tu lombwele sha yela tadhi ti: “Jehova oku tonde mboka ye hole elongithonkondo.” (Eps. 11:5, NW) Otadhi ti wo: “Kalunga ota ka pangula mboka ye hole oluhondelo.” (Heb. 13:4) Ngele tatu tedhatedha koohapu ndhika dha nwethwa mo, otatu vulu okumona nawa kutya ehalo lye olini. Onkee ano, ihatu inyanyudha nokutala omathano giilonga mbyoka e tonde. Otwa tseya kutya ohashi mu nyanyudha ngele tatu yanda omikalo dha nyata ndhoka uuyuni mbuka wa tala ko dhi li omainyanyudho inaaga nika oshiponga. *

10, 11. Omolwashike hatu vulika kuJehova, nohatu vulika kuye nevuliko lya tya ngiini?

¹⁰ Omolwetompelo lya simanenena lini hatu vulika kiipango yaKalunga? Omolwashike twa hala okwiihumbata esiku kehe metsokumwe naashoka tu shi kutya Kalunga okwe shi hokwa? Ihatu shi ningi owala molwaashoka twa hala okuyanda okugeelwa nenge okuyanda iilanduliko iiwinayi mbyoka hayi adha mboka yi ipwililika okulonga ehalo lyaKalunga. (Gal. 6:7) Pehala lyaashono, ohatu shi ningi molwaashoka otwa tala ko okuvulika kuJehova ku li ompito  ombwanawa noonkondo okuulika kutya otu mu hole. Ngaashi naanaa okanona haka kala ka hala okukala ke holike kuhe, natse otwa hala okukala tu holike kuJehova. (Eps. 5:12) Oye Tate yetu notu mu hole. Kapu na sha tashi tu etele enyanyu nembilipalelo enene kaashi shi okutseya kutya otu li monkalamwenyo ndjoka ya “hokiwa kOMUWA.” — Omayel. 12:2.

¹¹ Onkee ano, katu na okukala hatu vulika kethininiko nenge hatu hogolola kutya oompango dhini twa hala okuvulika kudho. * Ihatu vulika owala ngele shi li nawa kutse nenge ngele kaapu na omaupyakadhi gasha. Mepingathano naashono, ohatu “vulika nomwenyo aguhe.” (Rom. 6:17) Otu uvite ngaashi omupisalomi a li e uvite ngoka a nyola mOmbiimbeli a ti: “Onda hokwa iipango yoye nondi yi hole.” (Eps. 119:47) Eeno, otu hole okuvulika kuJehova. Otwa tseya kutya otu na okuvulika thiluthilu kuye nosho a hala tu ninge. (Deut. 12:32) Otwa hala Jehova a popye shi na ko nasha natse ngaashi a popya kombinga yaNoa mOohapu dhe. Ombiimbeli oya popya kombinga yatatekulululwa nguka omudhiginini, ngoka a li u ulike kutya oku hole Kalunga sho a kala ha vulika kuye uule woomvula omilongo odhindji dha piti, ya ti: “Noa okwa ningi, ngaashi Kalunga e mu lombwele.” — Gen. 6:22.

12. Okuvulika kwetu kuJehova uunake taku nyanyudha omwenyo gwe?

¹² Jehova oha kala e uvite ngiini ngele tatu vulika kuye nehalo ewanawa? Oohapu dhe otadhi popi kutya ngele tatu shi ningi, otatu ‘nyanyudha omwenyo gwe.’ (Omayel. 27:11) Mbela okuvulika kwetu ohaku nyanyudha ngaa lela Omuwa Omunamapangelo agehe? Eeno, ohaku mu nyanyudha  noku na etompelo ewanawa lyokukala e uvite ngawo. Jehova okwe tu shita tu li aantu ya manguluka okuninga omatokolo getu yene. Ohatu vulu okutokola kutya otatu vulika kuye nenge hasho. (Deut. 30:15, 16, 19, 20) Ngele tatu vulika kuTate yetu gwomegulu, Jehova, nehalo ewanawa notatu shi ningi tatu inyengithwa kohole yoku mu hola, nena otashi mu nyanyudha. (Omayel. 11:20) Otashi ti wo kutya otwa hogolola onkalamwenyo ombwanawaelela.

13, 14. Omolwashike tatu vulu okutya ‘iipango yaKalunga kayi shi iidhigu kutse,’ naashono otatu vulu oku shi thaneka nashike?

¹³ Omuyapostoli Johannes okwe tu lombwele sha tashi tu tsu omukumo shi na ko nasha niitegelelwa yaJehova ta ti: “Iipango ye kayi shi iidhigu kutse.” Shoka Jehova a tegelela kutse kashi shi oshidhigu. Oompango dhe kadhi shi oondhigu nokwaahavulika kaantu inaatu gwanenena.

¹⁴ Shika otatu vulu oku shi thaneka ngeyi: Natu tye nduno kuume koye kopothingo ote ku pula wu mu kwathele sho ta dhiluka. Opu na omiti odhindji ndhoka dhi na okuhumbatwa. Dhimwe dhomudho omipu nokuhumbatwa komuntu gumwe awike, ihe dhimwe omidhigu nodha pumbwa okuhumbatwa kaantu yaali. Kuume koye ota hogolola po omiti ndhoka a hala wu mu humbatele. Mbela ote ku lombwele wu humbate po omiti ndhoka e shi kutya omidhigu kungoye? Aawe. Ina hala wi iyehameke noku dhi humbata ongoye awike. Sha faathana, Kalunga ketu omunahole nomunambili ihe tu pula tu vulike kiipango iidhigu noonkondo. (Deut. 30:11-14) Ihe ke na nando esiku limwe e tu pule tu humbate omutengi ngoka omudhigu kutse. Jehova oku shi omangambeko getu, molwaashoka “okwa tseya kutya otwa shitwa nashike; oku shi shi kutya otse ontsi yevi.” — Eps. 103:14.

15. Omolwashike tatu vulu okukala neinekelo kutya iipango yaJehova oyi li po oku tu etela uuwanawa owundji?

 ¹⁵ Iipango yaJehova kayi shi iidhigu nando noyi li po oku tu etela uuwanawa owundji. (Lesha Jesaja 48:17.) Onkee ano Moses okwa li a lombwele Aaisraeli yonale a ti: “OMUWA Kalunga ketu okwe tu lombwele tu dhiginine omautho ngaka agehe noku mu tila. Ngele otatu shi ningi, ota ka tonatela aluhe oshigwana shetu e te shi kaleke melago.” (Deut. 6:24) Natse wo otatu vulu okukala neinekelo kutya Jehova moku tu pa oompango dhe, oku ulike kutya oku na ko nasha lela nonkalonawa yetu yaaluhe. Jehova ihe tu lombwele nando tu ninge iinima mbyoka tayi tu etele oshiponga. Ye oku li Kalunga e na uunongo itaawu vulu okuyelekwa nasha. (Rom. 11:33) Onkee ano, ye okwa tseya shoka oshiwanawa kutse. Oye wo ohole. (1 Joh. 4:8) Ohole oyo tayi dhana onkandangala onene muye noyo hayi nwetha mo kehe shimwe ta popi naashono ta ningi. Kuyo oko kwa kankamena iipango ayihe mbyoka a pa aapiya ye.

16. Omolwashike tatu vulu okukala hatu vulika kuJehova nonando opu na omanwethomo guuyuni mbuka wa yonuka nosho wo iikala yokwaahagwanenena kwetu kwopanyama?

¹⁶ Itatu vulu okutya okuvulika kuKalunga oku li oshinima oshipu okuninga. Otu na okukondjitha omanwethomo guuyuni mbuka wa yonuka mboka wu “li mepangelo lyomuhindadhi.” (1 Joh. 5:19) Otu na wo okukondjitha okwaahagwanenena kwetu kwopanyama hoka haku tu ningitha tu yone oompango dhaKalunga. (Rom. 7:21-25) Ihe ohole yetu yokuhola Kalunga otayi vulu oku tu kwathela tu ku sinde. Jehova oha laleke nuuyamba mboka ya hala okuulika ohole yawo yoku mu hola okupitila mokuvulika kuye. Oha gandja ombepo ye ondjapuki “kumboka haa vulika kuye.” (Iil. 5:32) Ombepo ndjoka ohayi imike iiyimati iiwanawa mutse mbyoka yi li omaukwatya omawanawa ngoka taga vulu oku tu kwathela tu kale hatu vulika kuye. — Gal. 5:22, 23.

17, 18. (a) Oshike tatu ka konakona membo ndika, nongele tatu shi ningi, otu na okukaleka shike momadhiladhilo? (b) Oshike tashi ka kundathanwa montopolwa tayi landula?

 ¹⁷ Membo ndika otatu ka konakona omakotampango gaJehova nomithikampango dhe dhopamikalo nosho wo uuyelele wulwe owundji wu na ko nasha nehalo lye. Manga tatu shi ningi, otwa pumbwa okukaleka momadhiladhilo iinima oyindji ya simana. Natu dhimbulukweni kutya Jehova ihe tu thininike tu vulike koompango dhe nomakotampango ge, ihe okwa hala tu vulike nehalo ewanawa tashi zi komutima. Inatu dhimbwa kutya Jehova okwa tegelela tu kale nonkalamwenyo ndjoka tayi tu etele omalaleko nuuyamba ogendji ngashingeyi nosho wo omwenyo gwaaluhe monakuyiwa. Natu talii ko ano evuliko lyetu tali zi komutima kutya oli li ompito ombwanawa okuulukila Jehova kutya otu mu hole shi thike peni.

¹⁸ Jehova molwohole ye okwe tu pa eiyuvo li tu kwathele tu yoolole pokati kaashoka shi li mondjila naashoka sha puka. Ihe opo eiyuvo lyetu li kale tali tu wilike nawa, olya pumbwa okudheulwa, naashika otashi ka kundathanwa montopolwa tayi landula.