CAPÍTULO 1
“Sa no yejua tiktlasojtlaj”
“Ijkuak tiktlakamatij itlanauatiluan Dios, sa no yejua tiktlajsojtlaj. Niman itlanauatiluan xyejyetikej.” (1 JUAN 5:3.)
1, 2. ¿Tleka tejua tiktlasojtla Jehová?
¿TEJUA tiktlasojtla toTajtsin? Tla yotimosentemakak itech, xokpa tiknemilis tikijtos ika kema. Tejuamej, xouijtika tikitaj tiktlasojtlaskej Jehová. Kema, ijkon tikchiuaj pampa yejua techtlasojtla. Ijkon ken Biblia kijtoua, “tiktlajsojtlaj [...] pampa yejua achtopa otechtlajsojtlak” (1 Juan 4:19).
2 Jehová nochipa kitejtemoua kenon techititis ika techtlasojtla. Yotechmakak kampa melak kualtsin tichantij, tlaltikpaktli niman mojmostla techmaka tlen techpoloua niman ijkon matiyoltokan (Mateo 5:43-48). Noijki yotechmakak tlen techpaleuiya matikmatikan ika noneki yejua matechyekana. ¿Tlenon? Yotechtlayokoli iTlajtol, Biblia. Niman techijlia matiknotsakan, niman matikmatstokan ika techkakis niman techpaleuis ika iespíritu santo (Salmo 65:2; Lucas 11:13). Niman okiteititi ika melak techtlasojtla ijkuak okuajtitlan iKoneuj akin melak kitlasojtla matechmakixtiki itech tlajtlakojli niman mikilistli. ¡Jehová yemelak techtlasojtla! (Xpoua Juan 3:16; Romanos 5:8.)
3. a) ¿Tlenon noneki tikchiuaskej tla tiknekij nochipa tinemiskej itech itlasojtlalis toTajtsin? b) ¿Tlenon melak noneki matotlajtoltikan, niman kanon tiknextiaj ken nonankilia?
3 Jehová kineki ika nochipa matechpaleui itlasojtlalis. ¿Kenon uelis panos yejuin? Noneki itlaj tikchiuaskej. Biblia kijtoua: “Xnemilikan nochipa ken ijki nenueliskej nenkiseliskej [ninemiskej itech] itetlajsojtlalis Dios. Niman xchakan on yenkuik nemilistli para nochipa” (Judas 21). Tlajtojli “ken ijki” techasikamachiltia ika kipiya tiktejtemouiliskej kenon nochipa tinemiskej itech itlasojtlalis Jehová, noneki itlaj tikchiuaskej. Kema, tikititiskej totlasojtlalis ika tlen tikchiuaj. Kuakon, melak noneki matotlajtoltikan: “¿Tlenon noneki nikchiuas tla nikneki nikititis toTajtsin ika niktlasojtla?”. Itlajtoluan Juan, itlatitlankauj Cristo, technankilia: “Ijkuak tiktlakamatij itlanauatiluan Dios, sa no yejua tiktlajsojtlaj. Niman itlanauatiluan xyejyetikej” (1 Juan 5:3). Pampa tiknekij tikititiskej toTajtsin ika melak tiktlasojtlaj, matikitakan tlenon yemelak kijtosnekij itlajtoluan Juan.
“SA NO YEJUA TIKTLAJSOJTLAJ”
4, 5. Xkijto kenon opeuj noskaltia ipan moyojlo motlasojtlalis itech Jehová.
4 “Sa no yejua tiktlasojtlaj”, ¿tlenon kinemilijtoya Juan ijkuak okijkuilo yejuin tlajtoltin? Tlajtotoya itech tlen tikmachiliaj ipan toyojlo itech toTajtsin. ¿Tikilnamiki kenon yejon tlasojtlalistli opeuj noskaltia ipan moyojlo?
Ijkuak tosentemakaj niman toapolaktiaj, peua tikchiuaj tlen kiteititia ika tiktlasojtlaj niman tiktlakamatij Jehová
5 Xtlanemili achijtsin ipan yejon tonaltin. Ijkuak otimomachtijtia tlen melauak itech Jehová niman itech tlen kineki kichiuas, onoskaltijtia motlaneltokil. Noijki otikasikamat ika otitlakatiko titlajtlakole ken nochimej niman, ika yejon, xueliya tiknisiuis toTajtsin. Maski ijkon, ipampa Jesucristo, Jehová okichiuj uelis tikpiyas nemilistli tlen Adán okipolo. Se nemilistli tlen xkeman tlamis niman xok tikpiyas tlajtlakojli (Mateo 20:28; Romanos 5:12, 18). Noijki, otikasikamat ika tlen Jehová okichiuj melak ueyi kijtosneki ijkuak okuajtitlan iKoneuj, akin melak kitlasojtlaya, mamikiki mopampa. Yejuin oajsik ipan moyojlo niman opeuj tiktlasojtla Jehová (xpoua 1 Juan 4:9, 10).
6. ¿Kenon noteititia melauak tlasojtlalistli, niman tlenon yotikchiuj pampa tiktlasojtla toTajtsin?
6 Yejon tlen opeuj tikmachilia xkijtosnekiya melauak tlasojtlalistli. ¿Tleka ijkon tikijtouaj? Pampa tiktlasojtlas toTajtsin xkijtosneki san tlen tikmachilis nion xsan tikijtos: “Nejua niktlasojtla Jehová”. Ijkon ken tlaneltokijli, melauak tlasojtlalistli noteititia ika tlen tikchiuaj (Santiago 2:17). Ijkuak yakaj tiktlasojtlaj, tiknekij tikchiuaskej tlen kiyolpaktia. Niman ijkon motech opanok. Ijkuak tlasojtlalistli tlen otikmachili itech toTajtsin ononeluayoti ipan moyojlo, otiknek tinemis ken yejua kineki. Kanaj hasta otimoapolakti ken iteixpantijkauj Jehová. Tla ijkon opanok, otikchiuj pampa tiktlasojtla niman tiknekiya tikueyichiuas toTajtsin, niman ika yejon otiktlapejpeni tikchiuas yejuin: otikijli toTajtsin ika tikneki tikchiuas nochipa tlen yejua kineki, niman sakin otikteititi tlen otikijto ijkuak otimoapolakti (xpoua Romanos 14:7, 8). San ika, ken tikitaskej amantsin, noneki tikchiuas tlen okijto Juan, itlatitlankauj Cristo, niman ijkon tikchiuas tlen otikijli toTajtsin.
“TIKTLAKAMATIJ ITLANAUATILUAN”
7. ¿Katlejua seki itlanauatiluan toTajtsin, niman tlenon tikchiuaskej tla tiknekij tikintlakamatiskej?
7 Juan okijto ika tiktlasojtlaj toTajtsin “ijkuak tiktlakamatij itlanauatiluan”. ¿Katlejua tlanauatiltin? Biblia techijlia katlejua. Seki itlanauatiluan Jehová kijtoua ika se maka matlauani, maauilnemi, makinueyichiua tajtsitsintin, matlachteki nion matlakajkayaua (1 Corintios 5:11; 6:18; 10:14; Efesios 4:28; Colosenses 3:9). Tla tiknekij tikintlakamatiskej itlanauatiluan toTajtsin, noneki tichipaujkanemiskej ken Biblia kijtoua.
8, 9. Ijkuak xtlaj se tlanauatijli ipan Biblia, ¿kenon tikmatiskej tlen Jehová kineki matikchiuakan? Xkijto se neskayotl.
8 San ika, tla tiknekij tikpaktiskej Jehová, xsan noneki matikintlakamatikan itlanauatiluan tlen ijkuiliujtokej ipan Biblia. Jehová xtechmaka melak miyek tlanauatiltin itech nochi tlen tikchiuaj ipan tonemilis. Mojmostla tikixnamikij miyek tlemach kampa xonka se tlanauatijli. Kuakon, ¿kenon tikmatiskej tla Jehová kipaktis tlen tiknemilijtokej tikchiuaskej? ¿Kanon tiknextiskej itech kenon tlanemilia toTajtsin? Oksejpa, ipan Biblia. Ijkuak tomachtiaj, tikasikamatij tlen Jehová kitlasojtla niman tlen kitlauelita (xpoua Romanos 12:9; Proverbios 6:16-19). San ijkon tikmatiskej kenon kuelita matoyekanakan. Ijkuak tomachtijtiaskej itech kenon tlanemilia, xouijtika tiktlapejpeniskej tikchiuaskej tlen kiyolpaktia. Ijkon, uelis tikmatiskej “tlinon Dios kineki” maski maka maonia se tlanauatijli itech tlen tiknekij tikchiuaskej (Romanos 12:2).
9 Xtlanemili itech yejuin. Biblia xtechmelajkaijlia ika maka matikitakan películas kampa auilnemilo niman nouisokilo. San ika ¿noneki matechmelajkaijli? Itikmatstokej tlenon kinemilia Jehová. Ipan iTlajtol kuajli kijtoua ika “melauak kitlauelita akin kuelita kichiuas tlen xkuajli” niman ika kinyolkuitis akin “auilnemij” (Salmo 11:5; Hebreos 13:4). Ijkuak titlanemiliaj itech yejuin tlajtoltin tikasikamatij tlen Jehová kineki. Ika yejon xtoyolpaktiaj tikitaskej tlen yejua kitlauelita. Ipan yejuin tonajli kinekiskej techtlaneltokiltiskej ika xtechijtlakos tla toyolpaktiaj ika tlen tsokuiltik. San ika, Jehová kiyolpaktia ijkuak xtikchiuaj nochi yejuin. *
10, 11. ¿Tleka tiknekij nochipa tiktlakamatiskej Jehová, niman kenon noneki tikchiuaskej?
10 ¿Tlenon kichiua matikintlakamatikan itlanauatiluan toTajtsin? ¿Tleka tiknekij mojmostla tinemiskej ken toTajtsin kineki? Xsan pampa xtiknekij tikpiyaskej tlauejli noso san pampa xtiknekij topan manochiua tlen inpan panoua akin xkimatij tlen toTajtsin kineki makichiuakan (Gálatas 6:7). Tiktlakamatij Jehová pampa tikasikamatij ika san ijkon uelis tikititiskej ika melak tiktlasojtlaj. Ijkon ken kokonej kinekij kuajli nemiskej ixpan intajuan, tejuamej noijki tiknekij kuajli tinemiskej ixpan Jehová (Salmo 5:12). Yejua toTaj niman melak tiktlasojtlaj. Melak techyolpaktia ika ken tinemij kichiua kuajli matinemikan ixpan Jehová (Proverbios 12:2).
11 Ika yejon, xtitlatsiuij tiktekichiuiliskej toTajtsin nion xtejuamej tikijtouaj kenon tikuelitaskiaj tiktekichiuiliskej. * Tejuamej xtiktlapejpeniaj kemanon tiktlakamatiskej, xtiknemiliaj tiktlakamatiskej san ijkuak xtitlajyouiskej noso ijkuak xouijtika tikitaskej. Ka, xijkon tikchiuaj, tejuamej tiktlakamatij ika nochi toyojlo (Romanos 6:17). Ken salmista, tikijtouaj: “Nejua melak nikinneki motlanauatiluan, kema, melak nikintlasojtla” (Salmo 119:47). Kema ijkon, tikuelitaj tiktlakamatiskej Jehová. Tikasikamatij ika yejua kinamiki niman kitlajtlani nochipa matiktlakamatikan (Deuteronomio 12:32). Tiknekij tikchiuaskej ken Noé, akin okitlakamat toTajtsin miyek xiuitl niman ijkon okiteititi kenon melak kitlasojtlaya. Tla ijkon tikchiuaj, noijki ijkon kijtoskej totech ken Noé: “Okichiuj nochi tlen toTajtsin yokinauatijka. Niman okichiuj ijkon ken okinauatijkej” (Génesis 6:22).
12. ¿Kemanon tikyolpaktiaj Jehová?
12 ¿Kenon nomachilia Jehová ijkuak tiktlakamatij ika nochi toyojlo? Biblia kijtoua ika tikyolpaktiaj (Proverbios 27:11). ¿Yemelak uelis tikyolpaktiskej akin melak Ueyixtika? Kema tiueliskej. Matikitakan tleka. Jehová otexchijchiuj matiuelikan tiktlapejpeniskej tlenon tikchiuaskej. Kuakon, nochipa uelis tiktlapejpeniskej tiktlakamatiskej noso xtiktlakamatiskej (Deuteronomio 30:15, 16, 19, 20). Ika yejon, ijkuak tiktlapejpeniaj tikchiuaskej tlen kineki pampa tiktlasojtlaj ika nochi toyojlo, melak tikyolpaktiaj (Proverbios 11:20). Niman, noijki, tiktlapejpenijtokej melak kualtsin tinemiskej.
“ITLANAUATILUAN XYEJYETIKEJ”
13, 14. ¿Tleka tikijtouaj ika “itlanauatiluan [toTajtsin] xyejyetikej”, niman ika tlen neskayotl tikasikamatij?
13 Juan, itlatitlankauj Cristo, techyolseuiya ika yejuin tlajtoltin: “Itlanauatiluan [toTajtsin] xyejyetikej”. Jehová xtechtlajtlanilia matikchiuakan tlen melak ouijtika noso tlen xuelis tikchiuaskej. Maski tinochimej titlajtlakolejkej, uelis tikintlakamatiskej itlanauatiluan.
14 Xtlanemili itech yejuin. Se akin melak kuajli iuan timouika mitstlajtlanilia xpaleui manochanpatla. Noneki tikinmajkokuis miyek cajas, sekimej xyetikej niman sekimej melak yetikej tlen san uelis kajkokuiskej omemej. Akin iuan timouika mitsijlia katlejua uelis tikinmajkokuis, xmitsijlis xkinmajkokui moselti cajas tlen melak yetikej, pampa xkineki xmokoko. Noijki ijkon panoua iuan toTajtsin akin melak techtlasojtla, yejua xtechtlajtlanilia matikchiuakan tlen xtiuelij (Deuteronomio 30:11-14). Xkeman technauatia matiktomamaltikan tlen melak yetik. Jehová kimatstika tlenon kema uelis tikchiuaskej, pampa “kuajli kimatstok kenon titlachijchiujtin, niman kilnamiki ika titlachijchiujtin ika tlalpoktli” (Salmo 103:14).
15. ¿Kenon uelis kuajli tikmatstoskej ika itlanauatiluan Jehová san no tejuamej techpaleuiyaj?
15 Itlanauatiluan Jehová xyejyetikej nion achijtsin; yejua san kineki kuajli matinemikan (xpoua Isaías 48:17). Moisés okimijli israelitas: “Matikchiuakan nochi yejuin tlanauatiltin, niman matikmojkaitakan toTajtsin Jehová”. Niman sakin okijto tleka ijkon noneki kichiuaskiaj: “Pampa ijkon nochipa kuajli tonkisaskej, kuakon uelis tiyoltoskej” (Deuteronomio 6:24). Tejuamej noijki noneki kuajli matikmatstokan ika itlanauatiluan toTajtsin nochipa techpaleuiyaj niman kichiuaj nochipa matinemikan ika pakilistli. ¿Tleka kichiuaj kuajli matinemikan? Pampa ualeuaj itech Jehová. Yejua kuajli kimati tlenon techpaleuis pampa melak tlamachilise (Romanos 11:33). Niman noijki pampa yejua tlasojtlalistli (1 Juan 4:8). ToTajtsin melak tetlasojtla, kiteititia itech nochi tlen kijtoua, itech tlen kichiua niman noijki itech nochi itlanauatiluan.
16. ¿Tlenon techpaleuiya matiktlakamatikan toTajtsin maski titlajtlakolejkej niman tikixnamikij tlen nochiua ipan tlaltikpaktli?
16 San ika, yejon xkijtosneki tla xouijtika tiktlakamatis toTajtsin. Kipiya ika tikixnamikiskej nochi tlen nochiua ipan yejuin tlaltikpaktli kampa Diablo tlanauatijtika (1 Juan 5:19). Noijki noneki tikitaskej maka matechtilana totlajtlakol matikpanauikan itlanauatiluan toTajtsin (Romanos 7:21-25). Tlasojtlalistli tlen tikmachiliaj itech toTajtsin uelis kichiuas kuajli matikisatij. Jehová kinteochiua akin yokinemilijkej kitlakamatiskej pampa kitlasojtlaj niman yejua kinmaka espíritu santo “on yejuan kitlakamatij” (Hechos 5:32). Niman yejon espíritu kichiua matikiskaltikan kualneskayomej tlen noijki techpaleuiyaj matiktlakamatikan toTajtsin (Gálatas 5:22, 23).
17, 18. a) ¿Tlenon tomachtiskej ipan yejuin amoxtli, niman tlenon noneki maka matikilkauakan? b) ¿Tlenon tomachtiskej ipan okse capítulo?
17 Ipan yejuin amoxtli tomachtiskej itlajtolyekanalisuan Jehová niman itlanauatiluan tlen techpaleuis melajki matinemikan, noijki miyek tlen yejua kineki matikchiuakan. Ijkuak tikitaskej yejuin noneki maka matikilkauakan seki tlemach. Kachtopa, Jehová xkeman texchiualtia matikintlakamatikan itlanauatiluan niman itlajtolyekanalisuan; yejua kineki matikchiuakan tlen kuelita pampa kisa itech toyojlo. Ika ome, Jehová techtekiuiltia se nemilistli aman ika miyek tlateochiualistin, niman ika tlayekapan se nemilistli tlen xkeman tlamis. Ika yeyi, tikititiskej ika melak tiktlasojtlaj Jehová tla tiktlakamatij ika nochi toyojlo.
18 Jehová yotechmakak se tetlayokolijli tlen techpaleuiya matiktlapejpenikan tlen kuajli iuan tlen xkuajli: totlamachilis. San ika, tla tiknekij totlamachilis kuajli matechyekana, kipiya ika tikmachtiskej, niman yejon tlen tikitaskej ipan okse capítulo.
^ párr. 9 Ipan capítulo 6 itech yejuin amoxtli kijtoua kenon tiktlapejpenis tlen ika timoyolpaktis niman maka mamitsijtlako.
^ párr. 11 Xkuakualtin espíritus noijki ueli tetlakamatij maski xkinekij kichiuaskej. Ijkuak Jesús okinnauati sekimej xkuakualtin espíritus makisakan itech tlaltikpakchanejkej, otetlakamatkej niman maski xkinekiyaj kichiuaskej, okimatkej ika Jesús kipiaya tlanauatijkayotl (Marcos 1:27; 5:7-13).
