1, 2. Ko e heigoa ne omoi a koe ke fakaalofa ki a Iehova ko e Atua?

FAKAALOFA nakai a koe ke he Atua? Kaeke kua fitā e taute haau a fakafetuiaga tapu mo Iehova, to talahau a koe mo e mauokafua, ē​​—ti kua lata ke tali pihia! Ti kua tonuhia mooli ke fakaalofa a tautolu ki a Iehova. Ko e fakaalofa mooli ha tautolu ke he Atua ha kua fakaalofa mai a ia ki a tautolu. Talahau pehē he Tohi Tapu: “Kua fakaalofa a tautolu, ha ko e mena ne fakamua mai hana [ko Iehova] fakaalofa kia tautolu.”​—1 Ioane 4:19.

² Ko Iehova ne fakakite mua e fakaalofa ki a tautolu. Ne foaki mai e ia e lalolagi fulufuluola mo kaina ha tautolu. Ti leveki e ia e tau manako oti ha tautolu. (Mataio 5:43-48) Mua atu e aoga, kua leveki e ia e tau manako fakaagaaga ha tautolu. Foaki mai e ia ki a tautolu e haana Kupu, ko e Tohi Tapu. Lafi ki ai, kua uiina e ia a tautolu ke liogi ki a ia mo e mauokafua to fanogonogo a ia mo e foaki mai e agaaga tapu haana ke lagomatai a tautolu. (Salamo 65:2; Luka 11:13) Ka e mua atu, ne fakafano mai e ia e haana Tama fakahele mo Lukutoto, ke laveaki po ke fakahao mai a tautolu he hala mo e mate. Kua lahi mooli e fakaalofa ha Iehova ne fakakite ki a tautolu!​—Totou Ioane 3:16; Roma 5:8.

3. (a) Ke fakatumau ke he fakaalofa he Atua, ko e heigoa ha tautolu kua lata ke taute? (e) Ko e heigoa e hūhū aoga kua lata ia tautolu ke manamanatu ki ai, ti moua i fe e tali?

³ Manako a Iehova ke fai lagomatai tukulagi a tautolu mai  he fakaalofa haana. Ka e fakavē ni ke he tau fifiliaga ha tautolu takitokotaha, ke aoga po ke nakai aoga e lagomatai ia ki a tautolu. Kua tomatoma mai he Kupu he Atua ki a tautolu: “Kia fakatumau e mutolu a mutolu ke he fakaalofa he Atua . . . kia hoko atu ke he moui tukulagi.” (Iuta 21) Ko e vala tala “fakatumau e mutolu a mutolu,” ne fakakite kua lata a tautolu ke gahua fakamalolō ke tumau ke he fakaalofa he Atua. Kua lata ia tautolu ke tali atu ke he haana fakaalofa he tau puhala mauokafua. Ko e hūhū aoga anei ke manamanatu a tautolu ki ai, ‘Maeke fēfē au ke fakatātā e fakaalofa haaku ma e Atua?’ Moua mai e tali he tau kupu omoomoi he aposetolo ko Ioane: “Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau  poaki.” (1 Ioane 5:3) Kua aoga ki a tautolu ke kumikumi fakamakutu ke he kakano he tau kupu nei, ha kua manako a tautolu ke fakakite ke he Atua e fakaalofa mooli ha tautolu ki a ia.

4, 5. (a) Hagaao ke he heigoa e vala tala “ko e fakaalofa ke he Atua”? (e) Fakamaama e puhala ne kamata e fakaalofa ki a Iehova ke tupu he loto haau.

⁴ “Ko e fakaalofa ke he Atua”​​—ko e heigoa ne manamanatu e aposetolo ko Ioane ki ai, he magaaho ne tohi e ia e tau kupu ia? Ko e vala tala nei ne nakai hagaao ke he fakaalofa he Atua ki a tautolu, ka e hagaao ke he fakaalofa ha tautolu ki a ia. Manatu nakai e koe e magaaho ne kamata e fakaalofa ki a Iehova ke tupu he loto haau?

⁵ Kia liu ke manamanatu ke he magaaho fakamua ne fakaako e koe e kupu mooli hagaao ki a Iehova mo e haana finagalo, ti kamata a koe ke tua ki a ia. He maama kua fanau mai a koe ko e tagata agahala mo e mamao mo e Atua, kua fakaaoga e Iehova e Keriso ke hafagi e puhala ma haau ke moua e mitaki katoatoa ne galo ia Atamu mo e moua e moui tukulagi. (Mataio 20:28; Roma 5:12, 18) Kamata foki a koe ke mailoga e lahi mahaki he poa ne foaki e Iehova he fakafano mai e Tama fakahele haana ke mate ma haau. Kua omoi e loto haau, ti kamata a koe ke logona e fakaalofa ke he Atua ne fakakite e fakaalofa lahi mahaki pihia ki a koe.​​—Totou 1 Ioane 4:9, 10.

6. Maeke fēfē ke fakakite e fakaalofa mooli, ti ko e heigoa ne omoi a koe ke taute ha ko e fakaalofa ke he Atua?

⁶ Ko e logonaaga ia ko e kamataaga he fakaalofa mooli ki a Iehova. Nakai ko e logonaaga po ke tau kupu hokoia ni e fakaalofa. He fakaalofa mooli ke he Atua kua nakai ko e talahau noa ni, “Fakaalofa au ki a Iehova.” Tuga e tua, kua kitia e fakaalofa mooli ha ko e tau gahua. (Iakopo 2:26) To fakakite pauaki e tautolu e fakaalofa ke he taha tagata kua loto a ia ke fakafiafia. Ko e mena ia, ka fakaalofa a koe ki a Iehova, to feaki e koe e manako ke moui he puhala ka fakafiafia e haau  a Matua he lagi. Ko koe nakai ko e Fakamoli kua papatiso? Ka pihia, ko e fakaalofa hokulo mo e fakamooli nei kua omoomoi a koe ke taute e fifiliaga uho lahi he moui haau. Ne tukulele e koe e moui haau ki a Iehova ke taute e finagalo haana, ti fakamailoga e koe e tukuleleaga haau he papatiso. (Totou Roma 14:7, 8.) He fakamooli e maveheaga nei ha tautolu ki a Iehova kua putoia mo e talahauaga he aposetolo ko Ioane ne totoku i lalo.

7. Ko e heigoa e falu poakiaga he Atua, mo e ko e heigoa ne putoia he omaoma ki ai?

⁷ Fakamaama e Ioane e kakano he fakaalofa ke he Atua: “Kia omaoma a tautolu ke he tau poaki hana.” Ko e heigoa e tau poakiaga he Atua? Foaki mai e Iehova e tau poaki pauaki he haana a Kupu, ko e Tohi Tapu. Ma e fakatai, ne nakai fakaatā e ia e tau mahani tuga e konahia, mahani feuaki, hufeilo ke he tau tupua, kaiha, mo e pikopiko. (1 Korinito 5:11; 6:18; 10:14; Efeso 4:28; Kolose 3:9) Ko e omaoma ke he tau poakiaga he Atua kua putoia e moui fakatatau ke he tau mahani mitaki he Tohi Tapu.

8, 9. Iloa fēfē e tautolu ko e heigoa ne fakafiafia a Iehova, pihia ni he tau tutuaga ne nakai fai fakatufono pauaki mai he Tohi Tapu? Talahau e fakataiaga.

⁸ Ke fakafiafia a Iehova, kua lata ia tautolu ke fakalahi atu e tau mena ka taute, nakai ni ko e omaoma ke he tau poaki pauaki haana. Nakai taofi e Iehova a tautolu he fakatutū e tau matafakatufono ma e tau momoui ha tautolu he tau aho takitaha. Ko e mena ia, he tau aho oti, kua feleveia a tautolu mo e tau tutuaga loga ne nakai fai poaki pauaki mai he Tohi Tapu. He tau tutuaga ia, maeke fēfē ia tautolu ke iloa ko e heigoa ka fakafiafia a Iehova? Kua fakakite fakamaaliali mai i loto he Tohi Tapu e puhala ne manamanatu e Atua. He fakaako a tautolu ke he Tohi Tapu, kua iloa e tautolu e tau mena kua fakaalofa po ke fiafia a Iehova ki ai mo e tau mena kua fakavihia e ia. (Totou Salamo 97:10; Tau Fakatai 6:16-19)  Kua iloa e tautolu e tau mahani mo e tau gahua ne aoga ki a ia. Ka lahi e fakaako ha tautolu ke he aga mo e tau puhala ha Iehova, ti maeke ia tautolu ke fakaatā e tau manatu haana ke takitaki e tau fifiliaga mo e fakalagalaga e tau gahua ha tautolu. Pihia ni ke he tau tutuaga ne nakai fai fakatufono pauaki mai he Tohi Tapu, to maeke tumau ia tautolu ke iloa “e finagalo he Iki [Iehova].”​​—Efeso 5:17.

⁹ Ma e fakatai, kua nakai toka i loto he Tohi Tapu e poakiaga pauaki ke ua kitekite ke he tau kifaga po ke tau ata he televisoni kua fakakite e aga fakalialia he favale po ke mahani feuaki. Ka e lata mooli kia ke fai fakatufono pauaki ne hataki a tautolu ke ua kitekite e tau mena pihia? Iloa e tautolu e onoonoaga ha Iehova ke he tau mena nei. Talahau fakamaaliali he Kupu haana ki a tautolu: “Kua vihiatia [e Iehova e tagata] kua fiafia ke he favale.” (Salamo 11:5) Talahau foki he Tohi Tapu: “[To] fakahala he Atua e tau tagata feuaki.” (Heperu 13:4) He manamanatu ke he tau kupu tohi nei ne omoomoi he agaaga tapu, maeke ia tautolu ke maama mitaki ko e heigoa e finagalo ha Iehova. Ti fifili e tautolu ke nakai fakafiafia mo e kitekite ke he tau fakatino mahani fakateteki pihia ne vihiatia he Atua ha tautolu. Iloa e tautolu to fiafia a Iehova ka fakamamao a tautolu mo e tau mahani fakalialia pihia he lalolagi, ne lali ke talahau ko e tau mena fakafiafia noa ni, kua ai fai lekua. *

10, 11. Ko e ha ne fifili e tautolu e puhala ke omaoma ki a Iehova, mo e omaoma fēfē a tautolu ki a ia?

¹⁰ Ko e heigoa e kakano ne mua atu ke omaoma a tautolu ke he tau poakiaga he Atua? Ko e ha ne manako a tautolu ke momoui fakatatau he tau aho oti, ke he tuaga ne iloa e tautolu ko e puhala manamanatu he Atua? Nakai fifili e tautolu e puhala nei ke kalo mai he fakahala po ke ua lauia he tau mena fakamamahi ka hoko ki a lautolu ne fakaheu e finagalo he Atua. (Kalatia 6:7) Ka e onoono a tautolu  ke he omaoma ki a Iehova, ko e magaaho uho ke fakakite e fakaalofa ha tautolu ki a ia. Tuga e tama tote ne manako lahi ke moua e mamali fakaalofa mai he matua taane haana, kua manako foki a tautolu ke moua e taliaaga fakaalofa mai ia Iehova. (Salamo 5:12) Ko ia ko e ha tautolu a Matua, ti fakaalofa a tautolu ki a ia. Nakai fai mena atu foki ke moua e tautolu e fiafia lahi po ke makona hokulo he iloa kua mumuitua a tautolu ke he puhala ke “moua e . . . fakaalofa mai ia Iehova.”​​—Tau Fakatai 12:2.

¹¹ Ko e mahani omaoma ha tautolu mogoia, kua nakai taute mo e kono, fifili po ke fai kaupāaga. * Nakai fifili e tautolu e tau poakiaga ke omaoma ki ai mo e ke fakaheu, he omaoma ni ka hagahaga mitaki ai ki a tautolu po ke nakai uka lahi. Ke he taha faahi, “kua omaoma [a tautolu] mo e tau loto.” (Roma 6:17) Kua logona hifo a tautolu tuga e tagata tohia he salamo he Tohi Tapu ne pehē: “To fiafia foki au ke he hāu a tau poaki, ne manako lahi au ki ai.” (Salamo 119:47) E, kua manako lahi a tautolu ke omaoma ki a Iehova. Mailoga e tautolu kua hako mo e latatonu ke omaoma ki a Ia mo e loto katoa. (Teutaronome 12:32) Manako a tautolu ke iloa e Iehova a tautolu tuga ne talahau he Kupu haana hagaao ki a Noa. Ke he tau tau loga, ko e tupuna mahani fakamooli ia, ne fakakite e fakaalofa ke he Atua he omaoma, ne pehē e Tohi Tapu: “Ti eke ni e Noa; tuga ne poaki mai he Atua kia ia ke he tau mena oti, ne eke pihia ai e ia.”​​—Kenese 6:22.

12. Ko e magaaho fe he omaoma ha tautolu ka fakafiafia e loto ha Iehova?

¹² Fēfē e logonaaga ha Iehova ke he ha tautolu a makai ke omaoma? Pehē e Kupu haana kua “fiafia ai [haana] loto” ki a tautolu. (Tau Fakatai 27:11) Fakafiafia mooli kia he omaoma ha tautolu e loto he Iki Pule Katoatoa he lagi mo e lalolagi? E mooli, ti fai kakano mitaki! Ne tufugatia e Iehova a tautolu  ko e tau tagata kua atāina ke fifili. Kakano he mena nei kua ha ha ia tautolu e atāina ke fifili; ko e fifiliaga ke omaoma ke he Atua po ke nakai omaoma ki a ia. (Teutaronome 30:15, 16, 19, 20) Ko e fifiliaga ha tautolu ke omaoma ki a Iehova, ti ko e fifiliaga nei ne omoi he loto fakaalofa ke he Atua, ka fakafiafia lahi e tautolu ha tautolu a Matua he lagi. (Tau Fakatai 11:20) Kua fifili foki e tautolu e puhala ne mua atu he moui.

13, 14. Ko e ha ne maeke ke talahau kua ‘nakai mamafa foki e tau poaki’ he Atua, ti fakatai fēfē e mena nei?

¹³ Kua fakamafana a tautolu he talahauaga he aposetolo ko Ioane hagaao ke he tau poakiaga ha Iehova: “Nakai mamafa foki hana tau poaki.” * (1 Ioane 5:3) Ko e tau manako ha Iehova kua nakai uka po ke fakapehia. Ti maeke e tau tagata nakai mitaki katoatoa ke omaoma ke he tau fakatufono Haana.

¹⁴ Liga fakatai pehē e tautolu. Ole e taha kapitiga tata haau ki a koe ke lagomatai a ia ke hiki ke he kaina foou. Loga e tau puha ke uta. Māmā falu ti maeke he taha e tagata ke lapolapo, ka ko e falu ne mamafa ti lata ke ua e tagata ke lagaki. Fifili he kapitiga haau e tau puha ne manako a ia ke uta e koe. To ole atu nakai a ia ki a koe ke lagaki hake e tau puha ne iloa e ia kua mamafa lahi ki a koe? Nakai. Ai manako a ia ke pakia a koe he lali ke lagaki tokotaha e tau puha. Tatai pihia, ko e ha tautolu a Atua fakaalofa mo e totonu ne nakai ole mai a ia ki a tautolu ke omaoma ke he tau poakiaga ne uka lahi ia tautolu ke fakamooli. (Teutaronome 30:11-14) Nakai fakaai a ia ke ole ki a tautolu ke fua e tau kavega mamafa pihia. Maama  e Iehova e tau kaupāaga ha tautolu, ha “kua fioia e ia e mena ne eke aki a tautolu; kua manatu e ia ko e kelekele ni a tautolu nai.”​​—Salamo 103:14.

15. Ko e ha ne maeke a tautolu ke mauokafua ko e tau poakiaga ha Iehova kua aoga lahi ma tautolu?

¹⁵ Ko e tau poakiaga ha Iehova kua nakai peehi mamafa; ka kua aoga lahi ma tautolu. (Totou Isaia 48:17.) Ti maeke a Mose ke talahau ke he tau Isaraela i tuai: “Poaki mai e Iehova kia eke ai e tautolu e tau fakatufono oti ia ni, kia matakutaku a tautolu kia Iehova ha tautolu a Atua, kia monuina ai a tautolu ke he tau aho oti kia [fakamomoui] ai e ia kia tautolu oti tuga he aho nai.” (Teutaronome 6:24) Maeke foki a tautolu ke mauokafua he foaki mai e Iehova e tau fakatufono haana, kua manamanatu a ia ki a tautolu​​—ke he ha tautolu a tau momoui he vahā loa. Mooli ai, to pihia fēfē? Kua nakai fai fakaotiaga e iloilo ha Iehova ko e Atua. (Roma 11:33) Ti iloa e ia ko e heigoa kua mua e mitaki ma tautolu. Ko Iehova ko ia ko e fakataiaga ne mua he fakaalofa. (1 Ioane 4:8) Ko e fakaalofa, ko e mahani pauaki haana a ia ne putoia ai e tau mena oti ne talahau mo e taute e ia. Ko e fakavēaga a ia he tau poakiaga oti ne tuku atu e ia ke he haana a tau fekafekau.

16. Pete e tau mahani he lalolagi kelea nei mo e tau aga he tino nakai mitaki katoatoa, ko e ha kua maeke a tautolu ke muitua ke he puhala omaoma?

¹⁶ Nakai pehē e mena ia ko e omaoma ke he Atua ko e puhala mukamuka ke muitua ki ai. Kua lata a tautolu ke totoko atu ke he tau mahani he lalolagi kelea nei, ne “ha he pule hana kua mahani kelea.” (1 Ioane 5:19) Kua taufetului foki a tautolu ha ko e ha tautolu a nakai mitaki katoatoa, ne kua fakahihiga atu ke moumou e tau fakatufono he Atua. (Roma 7:21-25) Ka e maeke he fakaalofa ha tautolu ke he Atua ke kautū. Fakamonuina e Iehova a lautolu ne manako ke fakakite e fakaalofa ha lautolu ki a ia he mahani omaoma. Foaki e ia e agaaga tapu haana “ke he tau tagata kua omaoma kia ia” ko e pule. (Gahua 5:32) Ko e agaaga ia ne kua moua mai e fua mitaki ia tautolu​​—ko e tau mahani uho ke lagomatai a  tautolu ke muitua ke he puhala omaoma.​​—Kalatia 5:22, 23.

17, 18. (a) Ko e heigoa ha tautolu ka kumikumi ki ai he tohi nei, mo e he taute pihia e tautolu, ko e heigoa kua lata ke manatu? (e) Ko e heigoa ka fakatutala he veveheaga ka mui mai?

¹⁷ I loto he tohi nei, to kumikumi a tautolu ke he tau matapatu fakaakoaga ha Iehova mo e tau mahani mitaki mo e falu talahauga ke he haana finagalo. He taute pihia, kua lata a tautolu ke manatu e falu mena aoga. Kia manatu e tautolu, nakai fakaohooho e Iehova a tautolu ke omaoma e tau fakatufono mo e tau matapatu fakaakoaga haana; manako a ia ke he omaoma ne hake mai he tau loto ha tautolu. Ua nimo e tautolu kua ole a Iehova ki a tautolu, ke moui he puhala ka tamai e tau monuina loga he magaaho nei ti hoko atu ke he moui tukulagi anoiha. Mo e maeke a tautolu ke kitia e kakano mooli he omaoma mo e loto katoa ha tautolu, ko e magaaho uho anei ke fakakite ki a Iehova e fakaalofa lahi ha tautolu ki a ia.

¹⁸ Ke lagomatai a tautolu ke fifili e mena hako mai he mena hepe, kua foaki fakaalofa mai e Iehova ki a tautolu e loto manamanatu. Ka kua lata e loto manamanatu ha tautolu ke fakaako ti maeke ke falanaki ki ai, to fakatutala he veveheaga ka mui mai.