ESHUURA 1
“Eki Nikyo Okukunda Ruhanga Kirikumanyisa”
“Oku nikwo kukunda Ruhanga, itwe okworobera ebiragiro bye; kandi ebiragiro bye tibirusya.”—1 YOHAANA 5:3.
1, 2. N’enki ekirikukuhiga kukunda Yehova Ruhanga?
NOOKUNDA Ruhanga? Ku oraabe waayehaireyo ahari Yehova, hatariho kubanganisa, noomukunda kandi ekyo kihikire. Buzima, n’eky’omu buhangwa itwe okukunda Yehova. Nitukunda Ruhanga ahabw’okugira ngu nawe naatukunda. Baibuli eki neekigambaho eti: “Itwe nitukunda, ahakuba [Yehova] akabanza kutukunda.”—1 Yohaana 4:19.
2 Yehova niwe yaabandize kutukunda. Akatuha ensi nungi ngu tugituuremu. Naatuha ebintu eby’omubiri ebi turikwetenga. (Matayo 5:43-48) Ekikuru munonga, naatureeberera omu by’omwoyo. Atuhaire Ekigambo kye, Baibuli. Okwongyera ahari ebyo, naatuhiga kumushaba, arikutuhamiza ngu naija kutuhurira kandi atuhe omwoyo gwe gurikwera kutuhwera. (Zaaburi 65:2; Luka 11:13) Ekirikukira byona, akoohereza Omwana we ou arikukunda munonga kutubeera Ekitambo kugira ngu tucungurwe kuruga omu kibi n’okufa. Yehova ka tworekire rukundo mpango!—Shoma Yohaana 3:16; Abarooma 5:8.
3. (a) Okubaasa kwerindira omu kukunda kwa Ruhanga, n’enki eki twine kukora? (b) Ni kibuuzo ki ekikuru eki twine kwebuuza, kandi eky’okugarukamu kyakyo kiri nkahi?
3 Yehova naayenda ngu tugasirwe omuri rukundo ye ebiro byona. Kwonka okugasirwa omuri rukundo ye n’okutagigasirwamu, kiri ahariitwe. Ekigambo kya Ruhanga nikituhiga kiti: “Mwerindire omu kukunda kwa Ruhanga” mwine amatsiko g’amagara agatahwaho. (Yuda 21) Ekigambo “mwerindire” nikyoreka ngu okubaasa kuguma omu kukunda kwa Ruhanga, haine eki twine kukora. Twine kworeka omu bikorwa ngu buzima nitumukunda. N’ahabw’ekyo ekibuuzo kikuru eki twine kwebuuza n’eki: ‘Nimbaasa kworeka nta ngu ninkunda Ruhanga?’ Eky’okugarukamu nikishangwa omu bigambo bya Ruhanga ebyahandiikirwe entumwa Yohaana: ‘Eki nikyo okukunda Ruhanga kirikumanyisa, itwe okworobera ebiragiro bye; kandi ebiragiro bye tibirusya.’ (1 Yohaana 5:3) Tushemereire kushwijuma amakuru g’ebigambo ebi, ahakuba nitwenda kworeka Ruhanga waitu rukundo mpango ei tumwiniire.
‘EKI NIKYO OKUKUNDA RUHANGA KIRIKUMANYISA’
4, 5. (a) Ebigambo “okukunda Ruhanga” nibimanyisa ki? (b) Shoboorora oku okukunda Yehova kwatandikire kukura omu mutima gwawe.
4 Obu entumwa Yohaana yaahandiika ebigambo “okukunda Ruhanga” akaba naamanyisa ki? Ka tureebe oku yaashobooroire eki okukunda Ruhanga kirikumanyisa. Kwonka tutakagambire ahari ekyo, teeraho kwijuka obu okukunda Yehova kwatandika kukura omu mutima gwawe.
Waayehayo kandi okabatizibwa nooba waatandika kworobera Yehova oyekundiire
5 Ijuka obu waatandika kwega amazima agarikukwata ahari Yehova n’ebigyendererwa bye reero okatandika kugira okwikiriza. Oketegyereza ngu n’obu oraabe waazairwe ori omusiisi otaanisiibwe ahari Ruhanga, Yehova kurabira omuri Kristo akakuteeraho omuhanda gw’okutunga amagara agatahwaho n’okuhikiirira, ebi Adamu yaatufeerereize. (Matayo 20:28; Abarooma 5:12, 18) Okatandika kwetegyereza omugasho gw’ekitambo eki Yehova yaahaireyo arikwohereza Omwana we ou akunda munonga kukufeera. Eki kikakukwataho kandi waatandika kukunda Ruhanga owaakworekire rukundo mpango etyo.—Shoma 1 Yohaana 4:9, 10.
6. Okukunda okwabuzima nikworekwa kuta, kandi okukunda Ruhanga kukakuhiga kukora ki?
6 Kwonka, rukundo ei waatandikire kugira omu mutima gwawe ekaba eri entandikiro ya rukundo eyabuzima ahari Yehova. Okukunda Ruhanga okwabuzima nikukira aha kugamba kwonka ngu “ninkunda Yehova.” Nk’okwikiriza, rukundo eyabuzima nereebekyera omu bikorwa. (Yakobo 2:26) Nitworeka ngu nitukunda omuntu twakora ebirikumushemeza. N’ahabw’ekyo, rukundo yaawe ahari Yehova ku yaatsimbire emizi, ekakuhiga kwenda kutwaza omu muringo ogurikushemeza Tataitwe ow’omu iguru. Ori Omujurizi wa Yehova obatiziibwe? Ku oraabe waabatiziibwe, rukundo mpango egi n’obwesigwa bwawe ahari Yehova bikakureetera kucwamu ekintu ekirikukirayo obukuru omu magara gaawe. Okeehayo ahari Yehova kukora ebi akunda, kandi waayoreka okwehayo kwawe orikubatizibwa. (Shoma Abarooma 14:7, 8.) Okuhikiiriza okwehayo kwaitu ahari Yehova nikutwariramu ekindi kintu eki entumwa Yohaana yaagambire.
“ITWE OKWOROBERA EBIRAGIRO BYE”
7. Bimwe aha biragiro bya Ruhanga ni biiha, kandi okubyorobera nikutwariramu ki?
7 Yohaana naashoboorora eki okukunda Ruhanga kirikumanyisa: “Itwe okworobera ebiragiro bye.” Ebiragiro bya Ruhanga ni biiha? Yehova naatuha ebiragiro bingi eby’okukuratira kurabira omu Kigambo kye, Baibuli. Nk’eky’okureeberaho, naayanga ebikorwa nk’obusinzi, obushambani, okuramya ebishushani, okwiba, n’okubeiha. (1 Abakorinso 5:11; 6:18; 10:14; Abaefeso 4:28; Abakolosai 3:9) Okworobera ebiragiro bya Ruhanga nikutwariramu okukuratira emitindo ya Baibuli erikukwata aha micwe.
8, 9. Nitubaasa kumanya tuta ekirikushemeza Yehova n’obu haakuba hatariho kiragiro kuruga omu Baibuli ekirikukwata aha mbeera ezimwe? Ha eky’okureeberaho.
8 Kwonka, okushemeza Yehova nikukira aha kworobera ebiragiro ebi tuteerairweho byonka. Yehova tarikututeeraho ebiragiro omuri buri kintu eki turikukora. N’ahabw’ekyo, omu mirimo yaitu eya buri izooba, nihabaasa kubaho ekintu oshangye hatariho kiragiro kyona eki orikumanya omu Baibuli ekirikukigambaho. Omu mbeera nk’ezo, nitubaasa kumanya tuta ekirikushemeza Yehova? Omu Baibuli, harimu ebintu ebirikworeka gye emiteekateekyere ya Ruhanga. Omu kwega Baibuli, nitwetegyereza ebi Yehova arikukunda n’ebi arikwanga. (Shoma Zaaburi 97:10; Enfumu 6:16-19) Nituhika aha kwetegyereza emiteekateekyere n’ebikorwa ebi arikusiima. Oku turaayeyongyere kwega ahari Yehova n’emitwarize ye, nikwo turaije kuhikaanisa ebikorwa byaitu n’emiteekateekyere ye. N’ahabw’ekyo, n’obu haakuba hatariho ekiragiro ky’omuri Baibuli ekirikugamba butunu aha bintu ebimwe, buzima nitubaasa kumanya ‘ebi Yehova arikukunda.’—Abaefeso 5:17.
9 Nk’eky’okureeberaho, Baibuli terimu kiragiro ekirikuzibira butunu kureeba tiivi nari vidiyo ezirikukwata aha ndwano nari aha by’obushambani. Kwonka shi buzima nitwetenga ekiragiro ekirikutuzibira kureeba ebintu nk’ebyo? Nitumanya oku Yehova arikureeba ebintu ebyo. Ekigambo kye nikitugambira butunu kiti: ‘Abakunda endwano omutima gwa Yehova gubanga.’ (Zaaburi 11:5) Kandi nikigira kiti: “Abashambani Ruhanga aryabacwera orubanja.” (Abaheburaayo 13:4) Twateekateeka munonga aha bigambo bya Ruhanga ebyo, nitwetegyereza gye eki Yehova arikukunda. N’ahabw’ekyo, nitucwamu okutareeba emizaano y’ebikorwa ebi Ruhanga waitu arikwanga. Nitumanya ngu nikishemeza Yehova twayetantara emicwe mibi ei ensi egi erikuteeraho kworeka nk’etari y’akabi. *
10, 11. Ahabw’enki nitucwamu kworobera Yehova, kandi nitumworobera mu muringo ki?
10 Ni nshonga ki enkuru erikutureetera kworobera ebiragiro bya Ruhanga? Ahabw’enki buri izooba nitwenda kukuratira ebi turikumanya ngu nibihikaana n’emiteekateekyere ya Ruhanga? Titurikucwamu kukora tutyo ahabw’okutiina kufubirwa nari okwetantara ebibi ebirikuhika ahari abo abarikwehuzya okukora ebi Ruhanga akunda. (Abagalatia 6:7) Kureka nitutwara okworobera Yehova nk’omugisha gw’okworeka rukundo ei tumwiniire. Nk’oku omwana arikuba naayenda kusiimwa ishe, nikwo naitwe turikwenda kusiimwa Yehova. (Zaaburi 5:12) Ni Tataitwe, kandi nitumukunda. Tihariho ekirikutureetera okushemererwa kwingi nk’okumanya ngu nitutwaza omu muringo ogu Yehova arikusiima.—Enfumu 12:2.
11 N’ahabw’ekyo, titurikugyemwa kumworobera kandi titurikutooranamu ebiragiro ebi turaayorobere. * Titurikucwamu kworobera ebiragiro ebimwe ebindi tukabireka nari tukabyorobera kyaba kitatugumiire bwonka. Kureka, ‘nitubyorobera twihire aha mutima.’ (Abarooma 6:17) Naitwe turi nk’omuhandiiki wa zaaburi owaagizire ati: ‘Nshemerererwa ebiragiro byawe, ebi naakunzire.’ (Zaaburi 119:47) Buzima, nitukunda kworobera Yehova. Nitumanya ngu tushemereire kumworobera kandi naayenda ngu tumworobere hamwe n’ebiragiro bye byona. (Eky’Ebiragiro 12:32) Nitwenda Yehova kutugambaho nk’oku Ekigambo kye kirikugamba ahari Noa. Aha bikwatiraine na Noa omwesigwa, owaayorekire ngu naakunda Ruhanga akamworobera kumara emyaka mingi, Baibuli neegira eti: “Noa yaakora atyo, nka byona ebi Ruhanga yaamuragiire oku biri; kandi yaaba nikwo yaatwaza.”—Okutandika 6:22.
12. Ni ryari obu okworoba kwaitu kurikushemeza omutima gwa Yehova?
12 Yehova naahurira ata yaareeba nitumworobera twekundiire? Ekigambo kye nikigira ngu twakora tutyo ‘nitushemeza omutima’ gwe. (Enfumu 27:11) Okworoba kwaitu buzima nikushemeza omutima gw’ow’Obushoboorozi Bwona? Eego buzima, kandi naashemererwa ahabw’enshonga nungi! Yehova akatuhanga twine obugabe bw’okwecweramu. Eki nikimanyisa ngu nitubaasa kucwamu kworobera Ruhanga, nari kumugomera. (Eky’Ebiragiro 30:15, 16, 19, 20) Ku turikucwamu twekundiire kworobera Yehova kandi turikuhigwa omutima ogwijwire rukundo ei tumwiniire, Tataitwe ow’omu iguru naashemererwa munonga. (Enfumu 11:20) Kandi nituba twacwamu kutoora omuhanda ogurikukirayo oburungi omu magara.
“EBIRAGIRO BYE TIBIRUSYA”
13, 14. Ahabw’enki nitubaasa kugira ngu ‘ebiragiro bya Ruhanga tibirikurusya,’ kandi eki nitubaasa kukishoboorora na ky’okureeberaho ki?
13 Entumwa Yohaana naatugambira ekintu ekirikutuhuumuriza aha bi Yehova arikutwenza. Ngu “ebiragiro bye tibirusya.” Ekigambo ky’Orugriika ekirikuvunuurwa nka ‘okurusya’ omuri 1 Yohaana 5:3 nikimanyisa “okuremeera.” * Baibuli erikwetwa New English Translation yo neegira eti: “Ebiragiro bye tibirikutuganzya.” Ti kugira ngu ebiragiro bya Yehova tiby’oburyo nari ngu nibirusya. Abantu abatahikiriire nibabaasa kubyorobera.
14 Nitubaasa kukishoboorora n’eky’okureeberaho eki. Munywani waawe ow’ahamara yaakushaba kumuhwera kufuruka. Hariho ebibokisi bingi eby’okufurura. Ebimwe tibirikuremeera kandi omuntu omwe naabaasa kubikiriza, kwonka ebindi nibiremeera kandi nibyetenga abantu babiri kubikiriza. Munywani waawe yaatooranamu ebibokisi ebi arikwenda ngu okirize. Noogira ngu naabaasa kukushaba kukiriza ebi arikumanya ngu torikubaasa? Ngaaha. Naaba atarikwenda ngu bikuhende orikuteeraho kubikiriza wenka. Nikyo kimwe, Ruhanga waitu omunyambabazi kandi oine rukundo tarikutushaba kworobera ebiragiro ebigumire munonga. (Eky’Ebiragiro 30:11-14) Tarikubaasa kutushaba kukiriza ebiremeire munonga nk’ebyo. Yehova naayetegyereza obweremwa bwaitu, ahakuba “naamanya obuhangwa bwaitu, naijuka ku turi omucuucu.”—Zaaburi 103:14.
15. Ahabw’enki nitubaasa kugira obwesigye ngu ebiragiro bya Yehova biriho kutugasira?
15 Ebiragiro bya Ruhanga buzima tibirikurusya. Biriho ahabw’oburungi bwaitu. (Shoma Isaaya 48:17.) Nikyo Musa yaagambiire Israeli eya ira ati: ‘MUKAMA yaaturagiira kworobera ebyo biragiro byona, n’okutiina MUKAMA Ruhanga waitu, ngu tubone kuba gye ebiro byona, kandi ngu akize amagara gaitu okufa, nk’oku kiri n’eri izooba.’ (Eky’Ebiragiro 6:24) Naitwe nitubaasa kugira obwesigye ngu Yehova omu kutuha ebiragiro bye, naaba naatwendeza ebirungi eby’ebiro byona. Buzima Yehova tarikubaasa kuturagiira kukora ekintu ekirikubaasa kutukora kubi. Yehova ni Ruhanga w’obwengye obutaine bugarukiro. (Abarooma 11:33) N’ahabw’ekyo naamanya ebirikutugasira. Kandi Yehova niwe arikukirayo kworeka rukundo. (1 Yohaana 4:8) Rukundo, omuringo gwe omukuru, niyo erikumuhiga omuri buri ki arikugamba n’eki arikukora. Ruhanga naayoreka rukundo omu kuha abaheereza be ebiragiro byona.
16. N’obu turaabe twine obweremwa bw’omubiri kandi hariho emitwarize mibi omu nsi, ahabw’enki nitubaasa kuguma nitworobera Yehova?
16 Ekyo tikirikumanyisa ngu okworobera Ruhanga kyorobi. Tushemereire kwetantara emitwarize mibi y’ensi egi, “eri omu butegyeki bw’Omubi.” (1 Yohaana 5:19) Kandi tushemereire kurwanisa obweremwa bw’emibiri yaitu, oburikutureetera kuhenda ebiragiro bya Ruhanga. (Abarooma 7:21-25) Kwonka rukundo ei twiniire Ruhanga neetubaasisa kusingura. Yehova naaha omugisha abo abarikwenda kworeka ngu buzima nibamukunda barikumworobera. Naaha abo “abarikumworobera” omwoyo gwe gurikwera. (Ebyakozirwe 5:32) Omwoyo ogwo nigutuhwera kugira emitwarize mirungi erikutubaasisa kuguma nitumworobera.—Abagalatia 5:22, 23.
17, 18. (a) Nituza kushwijuma ki omu katabo aka, kandi ku turaabe nitubishwijuma, n’enki eki turikwenda kuguma nitwijuka? (b) N’enki eki turikuza kwegaho omu shuura erikukurataho?
17 Omu katabo aka, nituza kushwijuma emisingye ya Yehova n’emitindo ye erikukwata aha micwe n’ebindi bingi ebirikworeka ebi arikukunda. Omu kushwijuma emisingye ya Yehova, nitwenda kuguma nitwijuka ebintu bikuru bingi. Ka tugume nitwijuka ngu Yehova tarikutugyema kworobera ebiragiro bye n’emisingye ye, naayenda ngu tumworobere twekundiire, kandi twihire aha mutima. Tutakaayebwa ngu Yehova naatushaba kutwaza omu muringo oguraaturugiremu ebirungi hati kandi oguraatuhitsye omu magara agatahwaho omu biro ebirikwija. Kandi ka tutware okworoba kwaitu okurikuruga aha mutima nk’omugisha gw’okworeka Yehova rukundo mpango ei tumwiniire.
18 Okutuhwera kutaanisaho ekibi n’ekirungi, Yehova akatuhangiramu omuntu ow’omunda. Omuntu ogu ow’omunda okubaasa kutuhwera kucwamu gye, twine kumutendeka nk’oku eshuura erikukurataho eraayorekye.
^ kacw. 9 Reeba Eshuura 6 ey’akatabo aka okumanya ebirikukiraho ebirikukwata aha ku turikubaasa kutoorana eby’okweshemeza ebirungi.
^ kacw. 11 Nangwa n’emyoyo emibi neebaasa kumworobera egyemirwe. Yesu ku yaabaire aragiira baadaimoni kuruga aha bantu abu baabaire baba bariho, baadaimoni bakaba bagyemeserezibwa kwikiriza obushoboorozi bwe kandi bamworobera, n’obu baraabe baabaire bakikora bateekundiire.—Mako 1:27; 5:7-13.
^ kacw. 13 Omuri Matayo 23:4, ekigambo eki nikikoresibwa kushoboorora “emitwaro erikuremeera,” nibyo biragiro n’emigyenzo y’abantu ebi abahandiiki n’Abafarisaayo baabaire nibagyema abantu ba butoosha kworobera.
