1, 2. Akin ya inad-arom si Jehova?

KASIN inarom so Dios? No indedikam la so bilay mo ed si Jehova, segurado ya on so ebat mo. Duga labat ya aroen tayoy Dios ta inad-aro to tayo. Ibabaga na Biblia: “Mangaaro itayo, lapud [si Jehova] so inmunan angaro ed sikatayo.”—1 Juan 4:19.

² Si Jehova so inmunan angipanengneng na aro ed sikatayo. Inggawaan to tayo na balibalin dalin ya napanayaman tayo. Imparaan toy pambilay tan amin ya nakaukolan tayo. (Mateo 5:43-48) Tan say mas importante, iiter toy espiritual ya pankaukolan tayo. Inter toy Salita to, say Biblia. Ontan met, labay ton manpikasi tayod sikato tan impaseguro ton dengelen to itayo tan tulongan to tayo panamegley na masanton espiritu to. (Salmo 65:2; Lucas 11:13) Say sankaimportantian ed amin, imbaki toy inad-aro ton Anak pian dondonen itayod kasalanan tan patey. Talagan inad-aro itayo nen Aman Jehova!—Basaen so Juan 3:16; Roma 5:8.

3. (a) Antoy kaukolan tayon gawaen pian tuloytuloy itayon aroen na Dios? (b) Antoy kaukolan tayon itepet ed sarili tayo, tan iner so kawalaan na ebat?

³ Labay nen Jehova ya nalikna tayoy panangaro to diad  andi-anggaan. Balet akadepende itan ed sikatayo no awaten tayo odino andi. Oniay ibabaga na Biblia: “Mansiansia kayo ed panangaro na Dios . . . a mangitonton ed bilay ya andi-anggaan.” (Judas 21) Idadanet na salitan “mansiansia kayo” a kaukolan ya walay gawaen tayo pian tuloytuloy itayon aroen na Dios. Importantin ipanengneng tayo so panangaro tayod sikato diad espisipiko iran paraan. Kanian itepet tayod sarili tayo, ‘Panon kon nipanengneng so panangarok ed Dios?’ Say ebat et walad insulat nen apostol Juan: “Saya so kabaliksan na panangaro ed Dios, ya unoren tayo ray ganggan to; tan saray ganggan to et aliwan makapabelat.” (1 Juan 5:3) Aralen tayo sirin no antoy labay ya ibaga  na sarayan salita lapud labay tayon ipanengneng ed Dios ya sikatoy inad-aro tayo.

4, 5. Ipaliwawa no kapigan mo inmunan alikna ya inarom si Jehova.

⁴ Anto kasi so iisipen nen apostol Juan sanen insulat toy “panangaro ed Dios”? Say tutukoyen to et say panangaro tayo ed Dios bilang indibidual. Kasin nanonotan mo ni no kapigan mo inmunan alikna ya inarom si Jehova?

⁵ Isip mo pan magano no kapigan mo naamtaay katuaan nipaakar ed si Jehova tan saray gagala to, ya lapud satan et awalaan kay pananisia ed sikato. Atalosan mo ya anggano niyanak kan makasalanan tan nisian ed Dios, nanggaway paraan si Jehova diad panamegley nen Kristo pian nawalaan kay perpekton bilay ya abalang nen Adan tan manbilay ka ya andi-anggaan. (Mateo 20:28; Roma 5:12, 18) Misalsalamat ka met ed kabaleg na insakripisyo nen Jehova sanen imbaki toy inad-aro ton Anak pian ompatey parad sika. Atalosan mo ya talagan inad-aro ka na Dios kanian manlapu lad saman et aliknam ya inarom lay Jehova.—Basaen so 1 Juan 4:9, 10.

6. Panon ya nipanengneng so tuan panangaro, tan antoy ginawam lapud panangarom ed Dios?

⁶ Satan balet ya liknaan et gapo ni labat na tuan panangaro tayod si Jehova. Say aro et aliwa labat ya liknaan odino angga labat ed salita. Agmagenap so pangibaga labat ya, “Inarok si Jehova.” Say tuan panangaro et singa pananisia. Nepeg itan ya ipanengneng ed gawa. (Santiago 2:26) Nipanengneng tayoy panangaro diad panggawa na saray bengatlan makapaliket ed aaroen tayo. Kanian no linmamut lay panangarom ed si Aman Jehova, desidido kan manbilay diad paraan ya makapaliket ed sikato. Kasin nampabautismo ka la? No on, ginawam itan lapud inad-arom si  Jehova tan labay moy manmatoor ed sikato. Indedikam so bilay mod si Jehova pian gawaey panlabayan to, tan impakabat mo itan ed publiko panamegley na bautismo. (Basaen so Roma 14:7, 8.) Pian natoor moy sipan mo ed si Jehova, nepeg mon iyaplika imay sinmublay ya imbaga nen apostol Juan.

7. Anto ray pigaran ganggan na Dios, tan antoy nepeg tayon gawaen pian naunor tayo iratan?

⁷ Impaliwawa nen Juan no antoy kabaliksan na panangaro ed Dios: “Unoren tayo ray ganggan to.” Anto ray ganggan na Dios? Angiter si Jehova na saray espisipikon ganggan panamegley na Salita to, say Biblia. Alimbawa, isesebel toy panagbuanges, seksual ya imoralidad, pandayew ed idolo, pantakew, tan pantila. (1 Corinto 5:11; 6:18; 10:14; Efeso 4:28; Colosas 3:9) Pian naunor tayo ray ganggan na Dios, nepeg ya manbilay tayo base ed saray estandarte na Biblia ed moral.

8, 9. Panon tayon naamtaan no antoy makapaliket ed si Jehova anggan diad saray situasyon ya anggapoy direktan ganggan ed Biblia? Mangiter na alimbawa.

⁸ Balet pian napaliket tayoy Jehova, aliwan saray direktan ganggan to labat so unoren tayo. Ag-angiter si Jehova na detalyado iran ganggan parad amin ya gagawaen tayo. Kanian diad kada agew et nayarin wala ray situasyon ya anggapoy direktan ibabaga na Biblia. No bilang ontan, panon tayon naamtaan no antoy makapaliket ed si Jehova? Nabasa ed Biblia iray impormasyon ya makatulong pian natalosan tayoy panagnonot na Dios. Legan tayon aaralen so Biblia, naamtaan tayo no anto ray labay tan aglabay nen Jehova. (Basaen so Salmo 97:10; Proverbio 6:16-19) Naamtaan tayo ray ugali tan kagagawa ya labalabay to. No kapigan mas nakakabat  tayoy Jehova tan saray panlabayan to, mas nibase tayo ray desisyon tan gagawaen tayo ed panagnonot to. Kanian anggano anggapoy direktan ganggan na Biblia parad sakey a situasyon, natebek tayo “no antoy linawa nen Jehova.”—Efeso 5:17.

⁹ Alimbawa, anggapoy direktan nabasa ed Biblia ya bawal so manbantay na bayolenti odino imoral iran pelikula o palabas ed TV. Balet, kaukolan tayo ni kasi direktan ganggan ya mangisesebel ed ontan iran babantayan? Amta tayo no antoy nalilikna nen Jehova ed saratan. Malinew ya ibabaga na Salita to: “Kabusol [nen Jehova] so siopaman a mangaarod inkaruksa.” (Salmo 11:5) Nabasa tayo met: “Ukomen na Dios iray manggagawa na seksual ya imoralidad.” (Hebreo 13:4) No dalepdepen tayo iratan, natalosan tayo no antoy panlabayan nen Jehova. Kanian agtayo labay a bantayan iray palabas ya wala ray eksenan mangipapanengneng na saray kagagawan kabusol na Dios. Amta tayon napapaliket tayoy Jehova no papaliisan tayo ray bayolenti odino imoral ya palabas, anggano ibabaga na saray totoo ya anggapoy uges na saratan. *

10, 11. Akin ya labay tayon unoren si Jehova, tan panon tayon gawaen itan?

¹⁰ Antoy manunan rason no akin ya uunoren tayo ray ganggan na Dios? Akin et labay tayoy manbilay base ed panagnonot na Dios? Gagawaen tayo itan aliwan pian napaliisan tayoy dusa odino saray mauges ya resulta no kontraen tayoy panlabayan na Dios. (Galacia 6:7) Imbes, uunoren tayoy Jehova ta labay tayon pruebaan ya sikatoy inad-aro tayo. Singa sakey ya ugaw ya labalabay ton napaliket so ama to, labalabay tayo met ya napaliket si Jehova. (Salmo 5:12)  Sikato so Ama ya inad-aro tayo. Anggapoy mipara ed liket ya nalikna tayo no amta tayon say paraan na panagbilay tayo et ‘aabobonan nen Jehova.’—Proverbio 12:2.

¹¹ Kanian no unoren tayoy Jehova, nepeg ya ag-itayo napapasootan, ya manpipili tayo labat na labay tayon unoren, odino walay kondisyon. * Ag-itayo manpipili no anto ran ganggan so unoren tayo, no kapigan tayo labay, odino no mainomay labat iratan a gawaen. Imbes, nepeg ya ‘manlapud puso so katutulok tayo.’ (Roma 6:17) Nepeg ya miparay liknaan tayod si David ya oniay insulat to: “Labalabay ko ray ganggan mo, on, inad-arok iratan.” (Salmo 119:47) Talagan labalabay tayon unoren si Jehova. Sikatoy makanepegan ya unoren tayo, tan atan so kekerewen ton gawaen tayo. Mabulos tayo sirin ya ontulok tan anggapoy alagaren tayon kasalat. (Deuteronomio 12:32) Labay tayon aligen so maong ya alimbawa nen Noe. Impanengneng toy panangaro tod Dios diad impangunor tod sikato ed dakel a dekada. Kanian oniay ibabaga na Biblia: “Ginawa nen Noe so amin ya ingganggan na Dios ed sikato. Ontan so ginawa to.”—Genesis 6:22.

12. Anton klase na katutulok so mamaliket ed puso nen Jehova?

¹² Antoy nalilikna nen Jehova no maliket tayon ontutulok ed sikato? Ibabaga na Salita to ya ‘napapaliket tayoy puso to.’ (Proverbio 27:11) Tua kasi ya sarag tayon paliketen so puso na Soberanon Katawan na uniberso? On! Nen ginawa nen Jehova so too, inikdan toy abilidad ya makapandesisyon parad sarili to. Kanian sarag tayoy manpili no antoy labay tayo—no kasin unoren tayoy Dios odino andi.  (Deuteronomio 30:15, 16, 19, 20) No pilien tayon unoren si Aman Jehova ya say rason et lapud sikatoy inad-aro tayo, napaliket tayoy puso to. (Proverbio 11:20) Tan sankaabigan a bilay so pipilien tayo.

13, 14. Akin ya nibagan ‘saray ganggan na Dios et aliwan makapabelat’? Mangiter na alimbawa.

¹³ Oniay impaseguro nen apostol Juan nipaakar ed saray ganggan nen Jehova: “Saray ganggan to et aliwan makapabelat.” * (1 Juan 5:3) Diad sananey a bersion na Biblia et oniay nabasa: “Aliwan mairap ya unoren iray ganggan to.” (Maung a Balita) Saray labay nen Jehova ya gawaen tayo et aliwan mairap odino makapabelat. Saray ganggan to et aliwan imposiblin unoren, anggano agtayo perpekto.

¹⁴ Nayarin iyalimbawa itan ed sakey a kaaro ya manpapatulong ed sika ta onalis na panayaman to. Dakel so kahon ya awiten to. Wala ray anlemew labat a sarag ya awiten na sakey a too, balet wala ray ambebelat kanian duara so mangalsa. Pinili na kaarom iray kahon ya paalsa tod sika. Kasin paalsa tod sika iramay amta ton ambelbelat a maong? Andi. Agto labay ya narisgo ka no alsaen mon bukor iratan. Ontan met so Dios. Lapud maaro, ag-angiter na saray ganggan ya panirapan tayon unoren. (Deuteronomio 30:11-14) Agto labay ya nabelatan tayo. Ikokonsidera nen Jehova iray agtayo sarag a gawaen ta “amta to so inkagawa tayo, a sankanonot ton dabok itayo.”—Salmo 103:14.

15. Akin ya makaseguro tayon saray ganggan nen Jehova et parad pankaabigan tayo?

 ¹⁵ Talagan aliwan makapabelat iray ganggan nen Jehova lapud parad pankaabigan tayo iratan. (Basaen so Isaias 48:17.) Kanian oniay imbaga nen Moises ed saray Israelita nensaman: “Ingganggan kami nen Jehova a manumpal ed sarayan amin a totontonen tan ontakot ed si Jehova a Dios tayo parad pankaabigan tayo ed amin a panaon, pian mantultuloy tayon manbilay, a singa natan.” (Deuteronomio 6:24) Makaseguro tayo ya saray ganggan nen Jehova et parad pankaabigan tayo diad andi-anggaan. Imposiblin mangiter si Jehova na ganggan ya amta ton mauges so pansumpalan tayo! Anggapoy anggaan na karunongan nen Jehova. (Roma 11:33) Kanian amta to no antoy parad pankaabigan tayo. Sakey ni, si Jehova et aro. (1 Juan 4:8) Amin ya ibabaga tan gagawaen to et lapud aro. Atan so akabasian na amin a ganggan ya inter tod saray lingkor to.

16. Akin ya makapansiansia tayon maunor ed Dios anggano mauges so impluensya na sayan mundo tan wala ray makasalanan a pilalek na laman tayo?

¹⁶ Balet siempre, agto labay ya ibagan main-inomay so ontulok ed Dios. Nepeg tayon labanan so impluensya na sayan mundo ya “walad pakayari na samay mauges.” (1 Juan 5:19) Kaukolan tayo met ya labanan so makasalanan ya pilalek na laman ya lapud satan et walay tendensia tayon ag-unoren so ganggan na Dios. (Roma 7:21-25) Balet sarag tayon daegen iratan no inaro tayo so Dios. Bebendisyonan nen Jehova iramay ipapanengneng day panangaro dad sikato diad panguunor dad saray ganggan to. Iiter toy masanton espiritu to “ed saramay manguunor ed sikato bilang manuley.” (Gawa 5:32) Diad tulong na masanton espiritu, nipapanengneng tayo ray balibalin kualidad ya ontulong  ed sikatayon mansiansian maunor ed Dios.—Galacia 5:22, 23.

17, 18. (a) Anto ray aralen tayod sayan libro, tan anto ray nepeg tayon tandaan legan tayon aaralen iya? (b) Antoy aralen ed ontumbok ya kapitulo?

¹⁷ Diad sayan libro, aralen tayo ray prinsipyo tan estandarte nen Jehova tan saray dakel nin pakaamtaan na panlabayan to. Legan tayon gagawaen itan, wala ray nepeg tayon tandaan. Tandaan tayo ya ag-itayo papasooten nen Jehova ya unoren iray ganggan tan prinsipyo to. Say labay to et manlapud puso so katutulok tayo. Agtayo lilingwanan ya saray ganggan nen Jehova et parad pankaabigan tayo natan tan diad andi-anggaan. Tan agtayo lilingwanan ya say pangunor tayod si Aman Jehova diad interon puso tayo so sankaabigan a paraan pian nipanengneng tayoy panangaro tayod sikato.

¹⁸ Pian nibiig tayo no antoy duga tan aliwa, inikdan itayo nen Jehova na konsiensia. Balet pian duga so idikta na konsiensia tayo, kaukolan itan ya ipasal. Atan so aralen tayo diad ontumbok ya kapitulo.