1, 2. Pabia ku bu ama Jeova Deus?

SERA ki bu ama Deus? Si bu dedika ja bu vida pa Jeova Deus, ku serteza bu resposta na sedu sin. I normal pa no ama Jeova. No amor pa rel, i resposta di amor ki ten pa nos. Biblia fala: “No ama pabia i amanu purmeru.” — 1 Jon 4:19.

² Jeova tomaba ja inisiativa di mostra si amor pa nos. I danu Tera, un planeta bonitu pa no mora nel. I ta kuida di no nesesidadis material. (Mateus 5:43-45) Mas importanti inda, i ta kuida di no nesesidadis spiritual. I danu Biblia, si Palabra. Alen des, i nsentivanu fasi orason ku garantia di kuma i na obinu, tambi i na danu si spiritu santu pa judanu. (Salmu 65:2; Lukas 11:13) Mas importanti di tudu, i manda si Fiju ki gosta del ciu pa i sedu no Resgatadur, pa libertanu di pekadu ku mortu. Na bardadi Jeova amanu ciu! — Lei Jon 3:16; Romanus 5:8.

3. (a) Ke ki i pirsis fasi pa kontinua na amor di Deus? (b) Kal purgunta importanti ki bon pa no pensa nel? (c) Nunde ku no pudi oja si resposta?

³ Jeova misti pa no benefisia di si amor pa sempri.  Ma i anos ku na kuji si no na benefisia del o nau. Palabra di Deus falanu: “Bo fika sempri dentru di amor di Deus, . . . pa i da bos vida ku ka ta kaba.” (Judas 21) Palabras “bo fika”, misti mostra kuma, i pirsis ason di no parti pa pudi kontinua na amor di Deus. No pirsisa di mostra na pratika di kuma no tene tambi amor pa rel. Un purgunta importanti ki bon pa no pensa nel i es: ‘Kuma ku N pudi mostra amor pa Deus?’ Resposta sta nes palabras ku apostulu Jon nspiradu pa skirbi: “No amor pa Deus ta mostra na manera ku no ta obdisi si mandamentus. Si mandamentus gora, nin e ka  kansadu”. (1 Jon 5:3) I bon pa no jubi diritu signifikadu di es palabras, pabia no misti mostra Deus kuma, no amal ciu.

4, 5. (a) Ke ku palabras “amor pa Deus” ta rifiri? (b) Konta kuma ku amor pa Deus kumsa kirsi na bu korson.

⁴ Ke ku apostulu Jon misti fala ku palabras “amor pa Deus”? Es palabras ka na rifiri amor ku Deus ten pa nos, ma i na rifiri amor ku no ten pa rel. Sera ki bu lembra kal tempu ku es amor kumsa kirsi na bu korson?

⁵ Pensa un bokadu na mumentu ku bu kumsa kunsi bardadi aserka di Jeova ku si intenson, i bu kumsa mostra fe. Bu bin ntindi ki apesar di bu ka teneba bon relason ku Deus, Jeova fasi pa bu tene opurtunidadi di yangasa perfeison ku Adon pirdi i tene vida ku ka ta kaba atraves di Kristu. (Mateus 20:28; Romanus 5:12, 18) Bu kumsa ku apresia sforsu garandi ku Jeova fasi pa manda si Fiju ki gosta del ciu pa muri pa bo. Bu sinti tokadu, i bu kumsa ku sinti amor pa ki Deus ku mostra es garandi amor pa bo. — Lei 1 Jon 4:9, 10.

6. Kuma ku amor di bardadi ta mostradu? Ke ku amor pa Deus ta motivau fasi?

⁶ Ma es sintimentu i so kumsada di amor di bardadi ku no tene pa Jeova. Amor i ka so sintimentu, nin i ka so simplis palabras. Amor di bardadi pa Deus i mas di ki so fala kuma, “N ama Jeova.” Suma fe, amor ta mostra na obras. (Tiagu 2:26) Amor ta mostradu na ke ku no ta fasi pa kontenta kin ku no ama. Asin, ora ku amor pa Jeova sedu forti na bu korson, bu na sedu motivadu pa vivi di un manera ku na kontenta bu Pape  ku sta na seu. Sera ki abo i un Tustumuña di Jeova batizadu? Si resposta i sin, es amor garandi ku lealdadi pa Jeova fasiu toma disison mas importanti di bu vida. Bu dedika bu vida pa Jeova pa fasi si vontadi, i bu mostra es dedikason atraves di batismu. (Lei Romanus 14:7, 8) Vivi di akordu ku bu dedikason nvolvi fasi ke ku apostulu Jon fala dipus.

7. Kal ki alguns mandamentus di Deus? Ke ku signifika obdisi elis?

⁷ Apostulu Jon splika kuma ku amor pa Deus ta mostradu: “No ta obdisi si mandamentus.” Kal ki mandamentus di Deus? Jeova danu manga di mandamentus na si Palabra, ku sedu Biblia. Pur izemplu, i kondena pratikas suma cami, pekadu seksual, idolatria, furtu, ku konta mintida. (1 Koríntius 5:11; 6:18; 10:14; Efésius 4:28; Kolosensis 3:9) Obdisi mandamentus di Deus signifika vivi di akordu ku normas di moral di Biblia.

8, 9. Na situasons nunde ki ka ten un lei spesifiku di Biblia, kuma ku no pudi sibi ke ku ta kontenta Jeova? Da un izemplu.

⁸ Ma pa kontenta Jeova, no pirsisa di fasi mas di ki so obdisi si mandamentus. Jeova ka tujinu liberdadi atraves di leis ku na guverna no vida di kada dia. Pabia na vida di kada dia, no pudi kontra ku manga di situasons nunde ki ka ten mandamentu spesifiku di Biblia. Nes situasons, kuma ku no pudi sibi ke ku na kontenta Jeova? Biblia tene orientasons klaru aserka di manera di pensa di Deus. Nkuantu no na studa Biblia, no na aprindi ke ku Jeova ama ku ke ki odia. (Lei Salmu 97:10; Ditus 6:16-19) No ta kaba pa kunsi atitudis ku pratikas ki gosta del. Mas  ku no aprindi aserka di personalidadi di Jeova ku si manera di fasi kusas, mas no na pudi disa pa si pensamentu gia no disisons i nfluensia no asons. Asin, mesmu na situasons nunde ki ka ten lei spesifiku di Biblia, no pudi sibi ‘ke ku Siñor misti pa no fasi.’ — Efésius 5:17.

⁹ Pur izemplu, Biblia ka tene un mandamentu spesifiku ku fala pa ka jubi filmis o programas di Televison ku ta mostra violensia ku imoralidadi seksual. Ma sera ki no pirsisa di un lei spesifiku ku na tujinu jubi es kusas? No sibi kuma ku Jeova ta nkara es kusas. Si Palabra falanu kuma, i “nuju . . . kil ku ama violensia.” (Salmu 11:5) Tambi si Palabra falanu es: “Deus na julga kilis ku ta sta na vida susu, ku pekadu seksual.” (Ebreus 13:4) Ora ku no medita nes palabras nspiradu, no pudi ntindi diritu kal ki vontadi di Jeova. Asin, no pudi disidi ka divirti ku kusas ku Deus odia ku ta mostradu na filmis, na Televison, na internet, o na utrus meius. No sibi kuma, Jeova ta kontenti ora ku no ivita di susidadi imoral. Ma mundu ta misti mostranu kuma es i un divirtimentu normal. *

10, 11. Pabia ku no disidi obdisi Jeova? Kal koldadi di obdiensia ku no ta dal?

¹⁰ Kal ki razon prinsipal ku pui no ta obdisi mandamentu di Jeova? Pabia ku no disidi vivi di akordu ku manera di pensa di Deus? No ka disidi fasi kila so pa pudi kapli di kastigu, o pa ivita di mau rusultadu ku ta akontisi ku kilis ku ka ta fasi vontadi di Deus. (Gálatas 6:7) Ma pa kontrariu, no disidi vivi di akordu ku manera di pensa di Deus pabia i  un opurtunidadi pa mostra kuma no amal. Suma ku un mininu ta misti tene aprovason di si pape, asin tambi ku no misti tene aprovason di Jeova. (Salmu 5:12) Jeova i no Pape, no amal. I ka ten alegria ku justa ku alegria di sibi kuma, no sta na vivi di un manera ki na fasinu “yangasa fabur di SIÑOR”. — Ditus 12:2.

¹¹ No obdiensia i ka kontra vontadi, nin no ka ta kuji ke ku no na obdisi o pui kondison pa kumsa obdisi. * No ka ta disidi obdisi so ora ki i ten vantaẑen o ora ki sedu fasil. Ma pa kontrariu, no ta obdisi o “seta ku tudu korson”. (Romanus 6:17) No tene mesmu sintimentu ku di salmista ku fala: “Bu mandamentus i sabi pa mi; N gosta ciu delis.” (Salmu 119:47) No gosta di obdisi Jeova. No sibi kuma i misti un obdiensia total sin kondison, tambi no sibi kuma i meresi kila. (Ripitison di Lei 12:32) No misti pa Jeova falanu kil ku si Palabra fala aserka di Noe, omi fiel ku obdisi Deus pa manga di tempu. Biblia fala: “Noe fasi tudu suma ku Deus mandal.” — Kumsada 6:22.

12. Kal manera di obdisi ku ta kontenta Jeova?

¹² Kuma ku Jeova ta sinti ora ku no obdisil di livri vontadi? Si Palabra fala kuma no ta ‘pul pa i kontenti’. (Ditus 27:11) Sera ki na bardadi no obdiensia ta pui pa Suberanu Siñor di Universu fika kontenti? Sin, i ta pui, i ku bon motivu! Jeova kumpunu ku liberdadi di skolia. Es signifika ki, no tene liberdadi di disidi; no pudi disidi obdisi Deus o  disidi ka obdisil. (Ripitison di Lei 30:15, 16, 19, 20) Ora ku anos propi no disidi obdisi Jeova i no fasil pabia di amor garandi ku no ten pa rel, no ta pui no Pape ku sta na seu kontenti dimas. (Ditus 11:20) Na mesmu tempu no ta sta tambi na kuji minjor manera di vivi.

13, 14. Pabia ku no pudi fala kuma ‘mandamentus di Deus ka kansadu’ i kal izemplu ku ta mostra kila?

¹³ Apostulu Jon falanu un kusa ku ta konsolanu ciu aserka di mandamentus di Jeova. I fala: “Si mandamentus gora, nin e ka kansadu”. Palabra Gregu ku traduzidu pa “kansadu” na 1 Jon 5:3, literalmenti signifika “pizadu.” * I ten un traduson di Biblia ku traduzi es testu asin: “Si mandamentos ca pisado”. (NOBO TESTAMENTO NA CRIOL) Mandamentus di Jeova ka kansadu nin i ka ta tujinu liberdadi. No pudi obdisil, apesar di no sedu mperfeitu.

¹⁴ No pudi splika es atraves di es izemplu: Imaẑina kuma bu pidi bu amigu pa i bin judau munda. Na manga di kargus ku bu tene, i ten kilis ku lebi ku un algin son pudi lambu, tambi i ten kilis ki pizadu ku pudi lambudu pa dus o manga di jintis. Kal kargu ku bu na da bu amigu? Sera ki bu na dal ki pizadu? Nau, bu ka na fasi kila. Pabia bu sibi kuma i na kansa bu amigu. Di mesmu manera, no Deus, i un Deus bon, tambi i amanu. I ka na pidinu obdisi  mandamentus ki difisil pa no obdisi. (Ripitison di Lei 30:11-14) Nunka i ka na pidinu karga kargu ki sibi kuma i pizadu. Jeova kunsi no limitis, pabia “i sibi kuma ku no kumpudu; i ta lembra kuma anos i reia.” — Salmu 103:14.

15. Ke ku manda no pudi tene konfiansa di kuma mandamentus di Jeova i pa no ben?

¹⁵ Mandamentus di Jeova nunka ka ciga di sedu pizadu; ma i pa no ben. (Lei Isaias 48:17) Moisés pudiba fala israelitas di tempu antigu es palabras: “SIÑOR danu ordi pa obdisi tudu e leis, tambi pa rispita SIÑOR no Deus. Si no fasi asin, i ta sedu sempri pa ben di nos; no ta kontinua ku vida, suma aos.” (Ripitison di Lei 6:24, anos ku pui italiku) Aos tambi, no pudi sta konfianti di kuma, Jeova danu si leis pa benefisianu pa tudu tempu. So asin ki pudiba sedu, pabia Jeova i Deus di jiresa ku ka ta kaba. (Romanus 11:33) I sibi ke ki minjor pa nos. Tambi el i amor. (1 Jon 4:8) Amor i un kusa muitu importanti, i ta nfluensia tudu ke ki i ta fala ku tudu ke ki i ta fasi. Amor i alisersi di tudu mandamentus ki da si servus.

16. Ke ku pudi judanu sedu sempri obdienti apesar di mau nfluensia de mundu ku no mperfeison?

¹⁶ Es ka signifika kuma obdisi Deus i un kusa fasil. No pirsisa di luta kontra mau nfluensias de mundu ku “sta bas di puder di ki malvadu.” (1 Jon 5:19) No pirsisa tambi di luta kontra no mperfeison, ku ta lebanu na viola leis di Deus. (Romanus 7:21-25) Ma amor ku no ten pa Deus pudi ngaña es luta. Jeova ta abensua kilis ku misti da prova di se amor atraves di se obdiensia. I ta da si spiritu santu “pa kilis ku obdisil.” (Atus 5:32) Es spiritu ta fasinu tene  bon kualidadis ku pudi judanu sedu sempri jintis obdienti. — Gálatas 5:22, 23.

17, 18. (a) Ke ku no na izamina nes livru? Nkuantu no na fasil, ke ki bon lembra del? (b) Ke ku no na oja na kapitulu 2?

¹⁷ Nes livru, no na izamina prinsipius ku normas di moral di Jeova i ku manga di utrus orientasons ku na mostranu kal ki si vontadi. Nkuantu no na fasi es izami, no pirsisa di lembra di alguns kusas importanti. No lembra sempri di kuma, Jeova ka ta forsanu obdisi si leis ku si prinsipius; i misti un obdiensia ku bin di no korson. Ka no diskisi kuma Jeova ta pidinu pa no vivi di un manera ku na rusulta na manga di benson aos, i vida ku ka ta kaba na futuru. I no lembra sempri di kuma, obdiensia di tudu korson, i un bon opurtunidadi pa mostra Jeova amor garandi ku no ten pa rel.

¹⁸ Pa judanu sibi diferensa entri ben ku mal, Jeova danu un kusa muitu bonitu, konsiensia. Ma pa konsiensia sedu un bon gia, i pirsisa di trenadu. Kapitulu 2 na splika es asuntu.