1, 2. ¿Imanasqataq Jehová Diosta kuyanki?

¿KUYANKICHU Diosta? Diosman vidaykita entregaruspaqa kallpawanchá arí ninki, chayqa allinpunim. Sutillam Jehová Diosta kuyasqanchikqa. Bibliapa nisqanman hinam ‘Diostaqa kuyanchik paypuni puntata kuyawasqanchikrayku’ (1 Juan 4:19).

² Jehová Diosqa tukuytam ruran kuyawasqanchikta qawachiwananchikpaq. Suma-sumaq Allpa pachatam qowarqanchik, sapa punchawtaq qowanchik kawsananchikpaq allin kaqkunatapas (Mateo 5:43-48). Paywan allin kananchikpaqpas yanapawanchikmi. Ejemplopaq, Palabrantam qowarqanchik. Kallpanchawanchiktaqmi confianzawan mañakunanchikpaq, mañakuptinchikqa uyariwasunchikpunim chaynataq chuya espiritunwanpas yanapawasunchik (Salmo 65:2; Lucas 11:13). Hatu-hatun kuyakuynintam ichaqa qawachiwarqanchik rantinchikpi wañunanpaq sapallan Churinta kachamuspan. ¡Anchatam Jehová Diosqa kuyawanchik! (Leey Juan 3:16; Romanos 5:8.)

3. a) ¿Imatataq rurananchik Jehová Diospa kuyakuyninpi takyananchikpaq? b) ¿Imatam tapukunanchik, maypitaq kutichiynintaqa tarisunchik?

³ Jehová Diosqa munanmi kuyakuyninpi wiñaypaq waqaychasqa kananchikta. Ichaqa, ¿pimantataq kanman? Ñoqanchikmantam. Bibliam niwanchik: ‘Diospa kuyakuyninpiyá  waqaychakuychik [...] wiñay kawsayta [...] suyastin’, nispa (Judas 21). “Waqaychakuychik” nispa niptinqa Diospa kuyakuyninpi takyanapaq hina kallpanchakuspa imatapas ruranamantam rimachkan. Chaynamá, kuyawasqanchikmanta agradecekuspaqa kasukuspam qawachinanchik. Chaymi tapukunanchikpuni: “¿Imata ruraspaymi Dios kuyasqayta qawachisaq?”, nispa. Chaymanta yachanapaqqa piensasun apostol Juanpa kayna nisqanpi: “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu”, nispa (1 Juan 5:3). Yachasunchikyá Diosta ancha kuyasqanchikta qawachinapaq apostol Juanpa ima nisqanmanta.

4, 5. a) ¿Imatam apostol Juan nichkarqa ‘Dios kuyaymanta’ rimaspan? b) ¿Imakunam yanapasurqanki Jehová Diosta astawan kuyanaykipaq?

⁴ ‘Dios kuyaymanta’ apostol Juan rimaspanqa, ¿imatam nichkarqa? Manayá Dios kuyawasqanchikmantachu, aswanqa ñoqanchik payta kuyasqanchikmantam. Yuyachkankichá Jehová Diosta chayllaraq reqsispayki kuyasqaykita.

⁵ Chaypi yuyaymanay. Paymanta hinaspa munayninmanta yachaspaykim astawan paypi iñirqanki. Yacharqankitaqmi llapallan runakuna hina, huchayoq nacespayki Jehová Diosmanta karunchasqa tarikusqaykita, chaywanpas Diosqa Churintakamam suma-sumaq suyakuyta qosurqanki: mana huchayoqña kaspa wiñaypaq kawsakuyta (Mateo 20:28; Romanos 5:12, 18). Chaymantapas, yacharqankim rantikipi wañunanpaq ancha kuyasqan Churinta qomuspa Jehová Diospa hatun llakipayakuyninmanta. Chayna rurasqanwan kuyakuyninta qawachisusqaykimantam admirakurqanki chaymi paytapas kuyarqanki (leey 1 Juan 4:9, 10).

6. ¿Imaynatam cheqap kuyakuyta qawachinchik, hinaspa imata ruraspaykim Dios kuyasqaykita qawachirqanki?

⁶ Sonqoykipi Diosmanta sientesqaykiqa manam cheqap kuyakuyraqchu karqa. ¿Imanasqataq chaynata ninchik? Cheqap kuyakuyqa manam ‘Diosta kuyani niyllachu’ nitaq sientiylla-sientiyllachu. Aswanqa rurayninchikwanmi cheqap kuyakuyninchiktaqa qawachinanchik iñiyninchikta hina (Santiago 2:26). Pitapas kuyaspanchikqa munasqantam ruranchik. Chaynam qampas Diosta kuyaspayki munasqanman hina kawsakuyta munarqanki. Ichapas Jehová Diospa testigon kanaykipaq bautizakurqanki. Chaynata ruraruspaykiqa Jehová Dios kuyasqaykitawan paypaq sonqo kasqaykitam qawachirqanki, chaymi Jehová Diosman qokuspayki munayninta wiñaypaq ruranaykipaq  prometerqanki hinaspa qokusqaykitapas bautizakuspayki qawachirqanki (leey Romanos 14:7, 8). Diosman qokusqanchikta cumplinapaqqa apostol Juanpa nisqantam rurananchik, qatiqninpim chaymanta yachasunchik.

7. ¿Mayqenkunataq Jehová Diospa wakin kamachikuyninkunaqa, hinaspa imata ruraspam kasukunchik?

⁷ Juanpa nisqanman hina Diosta kuyaspanchikqa ‘kamachikuyninkunatam kasukunanchik’. ¿Mayqenkunataq chay kamachikuyninkunaqa? Bibliapim willawanchik. Jehová Diosqa cheqninmi: sinkakuyta, huchapakuyta, taytacha-mamachakuna yupaychayta, suwakuyta, llullakuyta hinaspa chayman rikchakuq huchakunatapas (1 Corintios 5:11; 6:18; 10:14; Efesios 4:28; Colosenses 3:9). Jehová Diospa kamachikuyninkunata kasukunapaqqa Palabranpi nisqanman hinam kawsakuna.

8, 9. Imatapas rurananchikpaq Bibliapi kamachikuyta mana tarispaqa, ¿imaynatam yachanchik Diospa agradonpaq tanteasqanchik kasqanta? Willarimuy huk ejemplota.

⁸ Jehová Diospa agradonpaq kawsanapaqqa manayá Bibliapi qellqasqa kaqkunallatachu kasukunanchik. Jehová Diosqa manam tukuy ima rurananchikpaqchu kamachikuykunataqa qowanchik. Sapa punchaw imatapas rurananchikpaqqa manam llapallanpaqchu Bibliapi kamachikuytaqa tarinchik. Chayna kaptinqa, ¿imaynatam yachanchik Diospa agradonpaq tanteasqanchik kasqanta? Piensariy, ¿maypim Jehová Diospa agradonpaq imakuna kasqanta willawanchik? Bibliapim. Estudiaspanchikmi yachasunchik Jehová Dios imakuna kuyasqantawan cheqnisqantapas (leey Salmo 97:10; Proverbios 6:16-19). Chaynapim yachasunchik imayna kayninchikmi hinaspa imakuna rurayninchikmi agradonpaq kasqanta. Jehová Diospa sumaq kayninkunamanta chaynataq imayna tanteasqanta  yachaptinchikqa, manam sasachu kanqa Diospa munasqanman hina ima ruranapaqpas tanteayqa. Chaynapim imatapas rurananchikpaq tanteasqanchikpi ‘Señorpa munasqanta entiendenchik’, Bibliapi kamachikuyta manaña tarispanchikpas (Efesios 5:17).

⁹ Kay ejemplopi piensarisun. Bibliapiqa manam tarisunchu televisionpi otaq videopi maqanakuykunamantawan huchapakuykunamanta mana qawanapaq kamachikuytaqa. Ichaqa, ¿kamachikuytaraqchu necesitanchik chaykunata mana qawanapaq? Yachanchikmi Jehová Dios chaykunamanta ima piensasqanta. Palabranpim sutillata qawachiwanchik ‘daño ruraqkunata’ cheqnisqanmanta hinaspa ‘hukwan tupakuruqkunatawan huchapakuqkunata’ juzgananmantapas (Salmo 11:5; Hebreos 13:4). Kaykunapi yuyaymanaspanchikmi entiendenchik Diospa munayninmanta. Chaymi Jehová Diospa cheqnisqan ruraykunataqa manapuni qawaytaqa munanchikchu. Runakunaqa mana allinkunawan kusirikuykunata allinpaq hapinanchikpaqmi engañayta munawanchik, Jehová Diosmi ichaqa chaykunamanta karunchakunanchiktapuni munan. *

10, 11. ¿Imanasqam Diospa kamachikuyninkunata sapa kuti kasukuyta munanchik, hinaspa imaynatam kasukunanchik?

¹⁰ ¿Imanasqataq Diospa kamachikuyninkunataqa kasukunchik? Otaq, ¿imanasqataq sapa punchaw Diospa munasqanman hina kawsakuyta munanchik? Manam sasachakuykunamanta hinaspa castigasqa kanamanta librakunallapaqchu (Galatas 6:7). Aswanmi Jehová Diostaqa kasukunchik kuyasqanchikrayku. Imaynam wawa-churikunapas taytankupa favorninta chaskiyta munanku, chaynam ñoqanchikpas Jehová Diospa favorninta chaskiyta munanchik (Salmo 5:12). Paymi  Taytanchikqa chaymi anchata kuyanchik. Manamá imapas astawanqa kusichiwanchikmanchu nitaq allinta sientechiwanchikmanchu allinta rurasqanchikmanta ‘Diospa favorninta chaskikusqanchikmantaqa’ (Proverbios 12:2).

¹¹ Jehová Diostaqa manam qellapakuspachu, nitaq munasqallanchikman hinachu servinchik. * Kasukunanchikpaqqa manamá akllakunchikraqchu imakunata kasukusun hinaspa imakunata mana, aswanqa ‘tukuy sonqonchikwanmi kasukunchik’ (Romanos 6:17). Salmos librota qellqaq hinam ninchik: “Kamachisqaykikunatam kuyani”, nispa (Salmo 119:47). Arí, sonqomantapunim Jehová Diostaqa kasukunchik. Payqa munanpunim mana iskayrayaspa kamachikuyninkunata sapa kuti kasukunanchikta (Deuteronomio 12:32). Noey hinam kayta munanchik, payqa achka watakunam tukuy sonqonwan Diosta kasukurqa, chayna rurasqanwanmi kuyakuyninta qawachirqa. Chaynata ruraptinchikmi ñoqanchikmantapas Noeymanta hina ninqaku: ‘Lliwtam rurarqa Diospa kamachisqanman hina’, nispa (Genesis 6:22).

12. ¿Imata ruraspam Jehová Diospa sonqonta kusirichinchik?

¹² ¿Imaynataq Jehová Diosqa sientikun sonqomantapuni kasukuptinchikqa? Bibliam willawanchik kusikusqanmanta (Proverbios 27:11). ¿Cheqaptachu Llapallan Kamachiq Diospa sonqonta kusirichichwan? Kusirichichwanmi. Qawasunchikyá imanasqa chayna kasqanmanta. Jehová Diosqa unanchawarqanchik allin kaqta otaq mana allin kaqtapas akllakunapaqmi. Chaymi Diostaqa kasukuchwanpas otaq manapas (Deuteronomio 30:15, 16, 19, 20). Tukuy sonqowan kuyasqanchikrayku munayninta ruraspanchikqa sonqontam kusirichinchik (Proverbios  11:20). Chaymantapas Diospa munasqanman hinam kawsakuchkanchik.

13, 14. ¿Imanasqataq ninchik Diospa “kamachikuyninkunaqa manam llumpay sasachu” nispa, hinaspa imawanmi tupachichwan?

¹³ Sonqonchikta tiyaykachinanpaqmi apostol Juan kaynata nirqa: “Kamachikuyninkunaqa manam llumpay sasachu”, nispa. 1 Juan 5:3 nisqanpi ‘llumpay sasa’ ninanqa griego rimaypi “llumpay llasaq” ninanmi. * Jehová Diosqa atisqallanchiktam mañawanchik. Pantaq runa kaspanchikpas kamachikuyninkunataqa cumplichwanmi.

¹⁴ Kaywan tupachisun. Kuyasqayki amistadniki nisunkiman huk wasiman astakunanpaq yanapanaykipaq. Apanapaqqa achkam kachkan, wakinqa sampallam wakinñataq iskay runapa apananraq. Amistadnikim nisunki mayqanninta qepinaykipaq. Manamá mana atisqayki qepita sapallayki qepinaykipaqqa mañasunkimanchu, manachiki munanmanchu sapallayki qepispayki imanakurunaykitaqa. Chaynamá kuyakuq Diosninchikpas. Atisqallanchiktam mañawanchik (Deuteronomio 30:11-14). Manam mana atisqanchiktaqa mañawanchikmanchu. Jehová Diosqa “yachanmi imamanta rurasqa kasqanchikta. Payqa yuyanmi allpamanta rurasqa kasqanchikta” (Salmo 103:14).

15. ¿Imanasqam ninchik Jehová Diospa kamachikuyninkunaqa allinninchikpaqmi nispa?

 ¹⁵ Jehová Diospa kamachikuyninkunaqa manam sasachu, aswanqa allinninchikpaqmi (leey Isaias 48:17). Moisesmi Israel runakunata nirqa Jehová Diospa llapallan ‘decretonkunata cumplinankupaq hinaspa payta respetanankupaqpas’. Hinaspa, imanasqa chayna ruranankumantam nirqa: ‘Sapa punchaw allinlla kananchikpaq hinaspa kunan punchaw hina kawsananchikpaqmi’, nispa (Deuteronomio 6:24). Ñoqanchikpas seguropunim kachwan Diospa kamachikuyninkuna allinninchikpaq hinaspa wiñaypaq kusisqa kananchikpaqpas kasqanmanta. ¿Imanasqam chaynata ninchik? Jehová Diospuni nisqanraykum, payqariki ancha yachayniyoq kaspanmi allinninchikpaq imam kasqanta yachan (Romanos 11:33). Chaymantapas Diosqariki kuyakuqllañam (1 Juan 4:8). Jehová Diosqa kuyakuqllaña kaspanmi rurayninpiwan kamachikuyninpipas kuyakuyninta qawachin.

16. Mana allin kaqkuna hikutawaptinchikpas hinaspa pantaq runa kaptinchikpas, ¿imataq yanapawanchik Diosta kasukunanchikpaq?

¹⁶ Ichaqa, kallpanchakunanchikpunim Jehová Diospa kamachikuyninkunata kasukunapaqqa. ‘Diablopa makinpi’ kaqkunawan mana hikutachikunachikpaqmi kallpanchakunanchik (1 Juan 5:19). Diospa kamachikuyninkunata cumplinapaq sasachawaqninchik huchawanpas peleananchikmi (Romanos 7:21-25). Peleayninchikpi vencenanchikpaqqa Diosta kuyaymi yanapawasun. Jehová Diosqa bendecinmi kasukunankupaq kallpanchakuqkunata. ‘Kasukuqninkunamanmi Diosqa qon chuya espiritunta’ (Hechos 5:32). Chay espiritunmi agradonpaq hina kawsachiwanchik, chayna kawsakuymi yanapawanchik Diosta hinalla kasukunanchikpaq (Galatas 5:22, 23).

17, 18. a) ¿Imakunamantam yachachkasunchik kay librota estudiaspa, hinaspa imakunapitaq reparananchik? b) ¿Imamantam qatiqnin yachachikuypi yachachkasunchik?

¹⁷ Kay libropim estudiasunchik Jehová Diospa yachachikuyninkunata,  munasqanman hina kawsananchikpaq kamachikuyninkunata hinaspa munasqanta ruranapaq willakuyninkunatapas. Yachachikuyninkunamanta estudiaspaqa kaykunapim reparananchik: Jehová Diosqa manam haykapipas obligawanchikchu kamachikuyninkunatawan yachachikuyninkunata kasukunanchikpaqqa, payqa munanmi sonqomanta kasukunanchikta. Chaymantapas Jehová Diosqa prometewanchikmi allinta kawsakunanchikpaq bendeciwananchikta, hamuq tiempopiñataq wiñay kawsayta. Yachananchiktaqmi tukuy sonqowan Jehová Diosta kasukuspanchikqa ancha kuyasqanchikta qawachisqanchikta.

¹⁸ Allin kaqta otaq mana allin kaqta reqsinanchikpaqmi Jehová Diosqa llapallanchikman conciencianchikta sumaq regalota hina qowarqanchik. Ichaqa allin concienciayoq kananchikpaqqa conciencianchiktam yachachinanchik, chaymantam qatiqnin yachachikuypi qawachkasunchik.