1, 2. Saida mak book Ita atu hadomi Maromak Jeová?

ITA hadomi Maromak ka lae? Se Ita dedika tiha ona Ita-nia moris ba Maromak Jeová, ho fiar metin Ita sei hatán “Sin!” Loos duni, ita ida-idak iha domin ba Maromak Jeová. Tuir loloos, ita hadomi Maromak tanba nia mak uluk hatudu domin mai ita. Bíblia esplika hanesan neʼe: “Ita hadomi basá Maromak [Jeová] hadomi uluk ita.”​—1 Joao 4:19.

² Maromak Jeová hatudu uluk nia domin mai ita. Nia kria mundu neʼebé kapás nuʼudar ita-nia hela-fatin. Nia fó ai-han, sasán no buat hotu-hotu neʼebé ita presiza atu moris. (Mateus 5:43-48) Importante liu mak nia tau matan ba ita-nia presiza espirituál nian. Nia fó ba ita ninia Liafuan, Bíblia. Liután neʼe mak Maromak konvida ita atu halo orasaun ba nia no promete katak nia sei rona ba ita, no mós sei haraik ninia espíritu santu atu ajuda ita. (Salmo 65:2; Lucas 11:13) Importante liután mak Maromak haruka nia Oan-Mane neʼebé nia hadomi tebes atu fó ninia moris nuʼudar sakrifísiu atu salva ita husi sala no mate. Maromak Jeová hatudu duni domin neʼebé boot tebes mai ita!​—Joao 3:16; Roma 5:8.

3. (a) Saida mak ita tenke halo atu hela nafatin iha Maromak nia domin? (b) Ita tenke hanoin pergunta importante saida? Iha neʼebé mak ita bele hetan resposta ba pergunta ida-neʼe?

³ Maromak Jeová hakarak ita atu nafatin hetan bensaun  husi nia domin. Maibé, se ita simu bensaun hirak-neʼe ka lae, depende ba ita ida-idak nia desizaun. Maromak nia Liafuan fó laran-manas mai ita atu “hela nafatin iha Maromak nia domin hodi hein . . . moris rohan-laek”. (Judas 21) Liafuan “hela nafatin” hatudu katak atu nafatin iha Maromak nia domin, ita tenke halo buat ruma. Ita presiza hatudu katak ita simu nia domin liuhusi ita-nia hahalok. Nuneʼe, pergunta neʼebé importante atu ita hanoin mak neʼe: ‘Oinsá mak haʼu bele hatudu haʼu-nia domin ba Maromak?’ Ita bele hetan resposta ba pergunta ida-neʼe liuhusi liafuan neʼebé Maromak fó-hatene ba apóstolu João: “Ita-nia domin ba Maromak mak neʼe: katak ita halo tuir nia ukun-fuan sira. Nia ukun-fuan la susar mai ita.” (1 Joao 5:3) Ita  tenke hanoin didiʼak liafuan sira-neʼe katak sá loos, tanba ita hakarak hatudu ba Maromak katak ita hadomi tebes nia.

4, 5. Esplika oinsá mak ita komesa haburas domin ba Maromak Jeová iha Ita-nia laran.

⁴ Kuandu apóstolu João hakerek liafuan “ita-nia domin ba Maromak”, neʼe katak saida? Nia koʼalia kona-ba ita ida-idak nia sentimentu neʼebé kleʼan ba Maromak. Ita bele hanoin fali ka lae, ba tempu neʼebé Ita foin komesa haburas iha Ita-nia laran domin ba Maromak Jeová?

⁵ Ba tempu uitoan, hanoin toʼok bainhira Ita foin komesa aprende lia-loos kona-ba Maromak Jeová no ninia hakarak. Iha tempu neʼebá Ita komesa hatudu fiar ba nia. Liuhusi buat neʼebé Ita estuda tiha ona, Ita aprende katak Ita moris mai nuʼudar sala-naʼin no tan neʼe Ita dook husi Maromak. Maibé liuhusi Kristu, Maromak Jeová loke dalan ba Ita atu hetan moris perfeitu neʼebé Adão halo lakon, hodi nuneʼe Ita bele hetan moris ba nafatin. (Mateus 20:28; Roma 5:12, 18) Ita komesa komprende katak buat neʼebé Aman Jeová halo mak importante duni, tanba nia saran nia Oan-Mane mesak neʼebé nia hadomi tebes atu mate tan Ita. Neʼe book Ita-nia laran hodi Ita komesa sente iha domin ba Maromak.—1 Joao 4:9, 10.

6. Oinsá mak ita bele hatudu domin neʼebé loos? Domin ba Maromak book Ita atu halo saida?

⁶ Iha sentimentu neʼe hatudu katak ita foin komesa iha domin neʼebé loos ba Maromak Jeová. Domin neʼebé loos laʼós buat neʼebé ita sente deʼit. No mós, la toʼo atu hatete deʼit: “Haʼu hadomi Aman Jeová.” Hanesan ho fiar, ita hatudu domin neʼebé loos liuhusi ita-nia hahalok. (Tiago 2:26) Ita hatudu domin hodi halo hahalok neʼebé halo kontente sira neʼebé ita hadomi. Nuneʼe, kuandu Ita foin komesa iha domin neʼebé loos ba Aman Jeová, ida-neʼe book  Ita atu moris iha dalan neʼebé halo Nia kontente. Ita hetan batizmu nuʼudar Testemuña ba Jeová tiha ona ka lae? Se nuneʼe, Ita-nia domin neʼebé kleʼan ba Maromak, no Ita-nia laran-metin ba nia mak book Ita atu foti desizaun neʼe. Ita foti desizaun neʼebé importante liu iha Ita-nia moris kuandu Ita dedika Ita-nia an atu halo tuir Maromak Jeová nia hakarak, no hatudu Ita-nia dedikasaun liuhusi batizmu. (Roma 14:7, 8) Atu halo tuir buat neʼebé Ita promete ho laran ba Maromak Jeová dehan katak Ita mós halo tuir apóstolu João nia liafuan tuirmai neʼe.

7. Temi Maromak nia ukun-fuan balun. Halo tuir ukun-fuan sira-neʼe dehan katak ita halo saida?

⁷ Apóstolu João esplika katak se ita hadomi Maromak, “ita halo tuir [Maromak] nia ukun-fuan sira”. Ita bele hetan Maromak nia ukun-fuan iha neʼebé? Maromak Jeová fó nia ukun-fuan liuhusi ninia Liafuan, Bíblia. Porezemplu, nia bandu hahalok sira hanesan hemu lanu, halo sala-foʼer, naʼok, bosok, no adora buat lulik, estátua ka imajen. (1 Korinto 5:11; 6:18; 10:14; Efeso 4:28; Koloso 3:9) Halo tuir Maromak nia ukun-fuan sira dehan katak ita moris tuir Bíblia nia matadalan kona-ba morál.

8, 9. Bíblia la fó ukun-fuan kona-ba situasaun hotu-hotu neʼebé ita hasoru loron-loron. Entaun, oinsá mak ita bele hatene buat neʼebé halo Maromak Jeová kontente? Fó toʼok ezemplu ida.

⁸ Maibé, atu halo Aman Jeová kontente, la toʼo atu halo tuir deʼit ukun-fuan sira neʼebé hakerek tiha ona. Tuir loloos Maromak Jeová la kesi metin ita ho ukun-fuan barak kona-ba ita-nia moris tomak. Tan neʼe, Bíblia la fó ukun-fuan kona-ba situasaun hotu-hotu neʼebé ita hasoru loron-loron. Entaun, kuandu Bíblia la fó ukun-fuan kona-ba situasaun ida, oinsá mak ita hatene saida mak bele halo Maromak Jeová kontente? Bíblia hatudu ho klaru kona-ba Maromak nia hanoin. Nuʼudar ita estuda Bíblia, ita aprende kona-ba buat neʼebé Maromak Jeová hadomi no odi.  (Provérbios 6:16-19; Roma 12:9) Ita mós aprende kona-ba hanoin no hahalok neʼebé folin-boot iha Maromak nia oin. Kuandu ita aprende liután kona-ba Maromak Jeová nia hahalok no matadalan, ita sai toman atu halo desizaun tuir Maromak nia hakarak. Nuneʼe, se Bíblia la fó ukun-fuan kona-ba situasaun ruma neʼebé ita hasoru, dala barak ita bele hatene ‘buat neʼebé Maromak Jeová hakarak ita atu halo’.​—Efeso 5:17.

⁹ Porezemplu, Bíblia la fó ukun-fuan neʼebé bandu ita atu la haree filme neʼebé hatudu violénsia demais liu ka hahalok seksuál. Maibé ita presiza ukun-fuan kona-ba haree filme hanesan neʼe ka lae? Ita hatene tiha ona Maromak Jeová nia hanoin kona-ba buat hirak-neʼe. Nia Liafuan ho klaru fó-hatene mai ita: “Ema neʼebé hadomi violénsia [Jeová] odi tebes.” (Salmo 11:5) Bíblia mós hatete: “Maromak sei tesi lia ba sira neʼebé halo sala-foʼer ho foin-saʼe ka kaben-naʼin sira.” (Ebreu 13:4) Hodi hanoin kleʼan Maromak nia liafuan kona-ba buat hirak-neʼe, ita bele hatene ho klaru saida mak Maromak Jeová nia hakarak. Nuneʼe, ita sei deside atu la haree filme neʼebé hatudu violénsia demais, hahalok seksuál, ka hahalok aat seluk neʼebé ita-nia Maromak odi. Ita hatene katak ita halo kontente Maromak Jeová kuandu ita sees an husi filme neʼebé haleno mundu neʼe nia hahalok neʼebé imorál. *

10, 11. Tanbasá mak ita deside atu halaʼo ita-nia moris hodi halo tuir Maromak Jeová? Iha dalan saida mak ita halo tuir Maromak Jeová?

¹⁰ Ita iha razaun importante saida atu halo tuir Maromak nia ukun-fuan? Tanbasá mak loron-loron ita hakarak moris tuir buat neʼebé ita hatene kona-ba Maromak nia hanoin? Ita deside atu moris tuir ninia ukun-fuan laʼós deʼit tan ita lakohi hetan kastigu, ka lakohi sees husi rezultadu aat neʼebé akontese ba ema neʼebé la halo tuir Maromak nia hakarak. (Galasia 6:7) Maibé, razaun importante liu atu ita halo  tuir Maromak mak haree ida-neʼe nuʼudar oportunidade atu hatudu ita-nia domin ba nia. Hanesan oan ida hakarak duni ninia aman atu sente kontente ho nia, nuneʼe mós ita hakarak Maromak Jeová atu sente kontente ho ita. (Salmo 5:12) Nia mak ita-nia Aman, no ita hadomi nia. Buat neʼebé halo ita laran-kontente no laran-kmaan liu mak hatene katak ita halaʼo ita-nia moris tuir dalan neʼebé “monu loos ba Maromak nia laran”.​—1 Tesalonika 4:1.

¹¹ Tan neʼe, ita halo tuir laʼós tanba ema ka Maromak mak obriga ita. * No mós, ita la hili buat balun deʼit atu halo tuir. Porezemplu, la diʼak atu halo tuir deʼit ukun-fuan neʼebé fasil, maibé nega ukun-fuan neʼebé ladún fasil, ka todan liu. Maibé ita hakarak halo tuir ukun-fuan sira hotu “ho laran”. (Roma 6:17) Ita sente hanesan ho ema neʼebé hakerek salmu ida iha Bíblia, neʼebé dehan: “Haʼu sei hatudu katak haʼu gosta ita-nia ukun-fuan sira, sira-neʼe mak haʼu hadomi.” (Salmo 119:47) Sin, ita kontente tebes atu halo tuir Aman Jeová. Ita hatene katak nia hakarak atu ita halo tuir ho laran ninia ukun-fuan no matadalan hotu. (Deuteronômio 12:32) Ita hakarak Maromak Jeová koʼalia kona-ba ita hanesan saida mak Bíblia hatete kona-ba Noé. Bíblia konta istória kona-ba Noé neʼebé hatudu fiar no halo tuir Maromak durante tinan barak tebes. Ikusmai Bíblia dehan: “Noé halo tuir buat hotu neʼebé Maromak haruka nia atu halo. Nia halo nuneʼe duni.”​—Gênesis 6:22.

12. Oinsá mak ita bele halo tuir Maromak Jeová iha dalan neʼebé halo nia kontente?

¹² Kuandu ita halo tuir Maromak Jeová ho laran, nia sente oinsá? Ninia Liafuan hatete katak ita halo nia sente “laran-kontente”. (Provérbios 27:11) Maibé tuir loloos, Ukun-Naʼin Boot Liu Hotu sei kontente kuandu ita ema  halo tuir nia ka lae? Sin, nia sente kontente duni—no nia iha razaun diʼak atu sente hanesan neʼe! Maromak Jeová kria ita no fó mai ita liberdade atu hili. Ida-neʼe katak ita bele hili atu halo tuir Maromak, ka ita bele hili atu la halo tuir nia. (Deuteronômio 30:15, 16, 19, 20) Kuandu ita hili atu halo tuir Maromak Jeová tanba ita-nia domin neʼebé boot tebes book ita, ita sei halo ita-nia Aman iha lalehan sai kontente tebetebes. (Provérbios 11:20) No mós, ita hili dalan moris nian neʼebé diʼak liu.

13, 14. Tanbasá mak Maromak la fó ukun-fuan neʼebé “susar mai ita”? Fó toʼok ai-knanoik kona-ba ida-neʼe.

¹³ Apóstolu João fó-hatene buat ida neʼebé halo ita sente kmaan kona-ba Maromak Jeová nia hakarak, hodi hatete: “Nia ukun-fuan la susar mai ita.” Iha lia-gregu, liafuan “susar” iha 1 Joao 5:3 mós katak “todan”. * Tradusaun Bíblia seluk tradús eskritura neʼe: “Ninia ukun-fuan sira laʼós naha neʼebé todan.” (Bíblia Sagrada Para o Terceiro Milénio da Encarnação) Maromak Jeová nia hakarak la susar liu atu halo tuir, ka hanehan ita. Sin, maski ita ema la perfeitu, ita bele halo tuir Maromak nia ukun-fuan sira.

¹⁴ Kona-ba ida-neʼe, hanoin toʼok ba ai-knanoik tuirmai neʼe. Ita-nia belun husu Ita atu ajuda nia muda sasán ba uma foun. Nia iha sasán barak. Sasán balu kmaan no ema ida deʼit bele hiʼit, maibé sasán seluk todan no presiza ema naʼin-rua atu hiʼit. Ita-nia belun husu Ita atu hiʼit sasán balu. Nia sei husu Ita atu hiʼit sasán neʼebé todan liu ka lae? Lae. Nia lakohi Ita hetan perigu hodi mesak hiʼit sasán neʼebé todan. Hanesan neʼe mós ita-nia Maromak neʼebé laran-diʼak no sempre hatudu domin, la husu ita atu halo tuir ukun-fuan neʼebé todan liu. (Deuteronômio 30:11-14) Maromak Jeová nunka husu ita atu lori naha  neʼebé todan tanba nia hatene katak ita ema fraku. Bíblia hatete: “Nia hatene loos oinsá mak nia kria ita, nia hanoin-hetan katak ita mak rai-rahun.”​—Salmo 103:14.

15. Tanbasá mak ita bele fiar katak Maromak Jeová nia ukun-fuan sira ba ita-nia diʼak?

¹⁵ Loos, Maromak Jeová nia ukun-fuan la todan, maibé lori diʼak mai ita. (Isaías 48:17) Tan neʼe, iha tempu uluk Moisés fó-hatene ba ema Izraél: “Maromak Jeová haruka ita atu halo tuir ukun-fuan sira-neʼe hotu, atu taʼuk ba Jeová ita-nia Maromak ba ita-nia diʼak nafatin, hodi nuneʼe ita bele nafatin moris hanesan ita moris duni iha ohin loron neʼe.” (Deuteronômio 6:24) Ita mós bele fiar katak kuandu Maromak Jeová fó ukun-fuan ba ita, nia loloos hanoin kona-ba ita-nia diʼak, no nia hakarak ita atu iha moris neʼebé diʼak ba nafatin. Oinsá mak ita hatene ida-neʼe? Tanba Maromak Jeová iha matenek neʼebé la iha rohan. (Roma 11:33) Entaun, nia hatene saida mak diʼak liu ba ita. No mós, Maromak Jeová mak domin. (1 Joao 4:8) Domin mak Maromak nia hahalok neʼebé furak liu, no domin book nia atu halo buat hotu neʼebé nia halo no hatete. Domin mak hun ba ukun-fuan hotu neʼebé nia fó ba nia atan sira.

16. Maski ita moris iha mundu neʼebé aat no ita iha hakarak atu halo sala, tanbasá mak ita bele nafatin halo tuir Maromak?

¹⁶ Ida-neʼe la dehan katak fasil atu sempre halo tuir Maromak. Ita tenke luta hasoru mundu neʼe nia hahalok neʼebé aat, tanba “mundu tomak sei iha aat-naʼin nia ukun”. (1 Joao 5:19) No mós ita la perfeitu, tan neʼe ita tenke luta hasoru ita rasik nia hakarak neʼebé book ita atu kontra Maromak nia ukun-fuan sira. (Roma 7:21-25) Maibé tanba ita-nia domin ba Maromak, ita bele manán. Maromak Jeová haraik nia bensaun ba sira neʼebé hakarak hatudu sira-nia domin ba nia hodi halo tuir nia. Maromak haraik espíritu santu “ba sira neʼebé halo tuir Nia hakarak”. (Apostolu 5:32) Espíritu santu ajuda ita atu hatudu hahalok neʼebé furak, hahalok neʼebé ajuda ita atu halo tuir Maromak.—Galasia 5:22, 23.

17, 18. (a) Saida mak ita sei estuda iha livru neʼe? Ita tenke hanoin nafatin kona-ba saida deʼit? (b) Saida mak ita sei aprende iha kapítulu tuirmai?

 ¹⁷ Ho livru ida-neʼe, ita sei estuda kona-ba Maromak Jeová nia matadalan kona-ba buat morál nian, no mós buat barak neʼebé nia hakarak ita atu halo. Nuʼudar ita estuda kona-ba buat hirak-neʼe, ita tenke hanoin nafatin kona-ba buat importante tuirmai neʼe. Mai ita hanoin nafatin katak Maromak Jeová la obriga ita atu halo tuir ninia ukun-fuan no matadalan, maibé nia hakarak ita atu halo tuir nia ho laran. Mai ita hanoin nafatin katak Aman Jeová husu ita atu halo tuir, hodi nuneʼe ita-nia moris agora sei nakonu ho bensaun, no iha aban-bainrua ita bele hetan moris rohan-laek. No mós, mai ita hanoin nafatin katak hodi halo tuir ho laran, ita iha oportunidade atu hatudu katak ita hadomi tebes Maromak Jeová.

¹⁸ Ho domin Maromak Jeová kria ita ida-idak ho kbiit neon nian neʼebé ajuda ita atu hatene saida mak loos no saida mak sala. Maibé, ita tenke treinu ita-nia laran atu sai matadalan neʼebé diʼak. Kapítulu tuirmai sei esplika kona-ba ida-neʼe.