1, 2. Niinzi chipa kuti uyande Jehova?

ULAMUYANDA na Leza? Ikuti kulyaabide kuli Jehova Leza, nsandulo yako ngu iiyi uumvwika, alino mbukubede! Nchilengwa biya kuti tuyande Jehova. Kuyanda Leza, nkuvwiila kuluyando ndwaakatutondeezya. Bbayibbele lipandulula boobu: “Swebo tulamuyanda nkaambo nguwakasaanguna [Jehova] kuyanda ndiswe.”—1 Johane 4:19.

² Jehova nguwakatalika kutondeezya luyando kulindiswe. Utupede nyika kuti ibe muunzi wesu mubotu. Utupa zintu ziyandikana zyakunyama. (Matayo 5:43-48) Chipati nchakuti utupa zintu ziyandikana zitugwasya mubukombi. Alubo, utupede Jwi lyakwe, Bbayibbele. Kuyungizya waawo, ututamba kuti tukombe kulinguwe katulaa choonzyo chakuti ulatumvwa alimwi utupa muuya wakwe uusalala kuti utugwasye. (Intembauzyo 65:2; Luka 11:13) Kwiinda zyoonse, wakatuma Mwanaakwe kuti abe Munununi wesu akuti tukonzye kunununwa kuzwa kuchibi alufu. Eelyo kaka, Jehova wakatutondeezya luyando lupati loko!—Bala Johane 3:16; BaRoma 5:8.

3. (a) Tweelede kuchitaanzi kuti tukkale katuli muluyando lwaLeza? (b) Nguuli mubuzyo uuyandikana ngutweelede kulibuzya, alimwi nkuukuli nkutukonzya kujana nsandulo yamubuzyo ooyu?

 ³ Jehova uyanda kuti tugwasigwaa luyando lwakwe kukabe kutamani. Zili kulindiswe kuti tuyoogwasigwa na, naa kuti tatukoyoogwasigwa pe. Jwi lyaLeza litwaambila kuti: ‘Tuliyobole muluyando lwaLeza chakulangilila . . . kubuumi butamani.’ (Juda 21) Bbala lyakuti “kuliyobola” litondeezya kuti tweelede kuchita chimwi chintu kuti tukkale katuli muluyando lwaLeza. Tweelede kuchita zimwi zintu zilaantanganana kuti tutondeezye mbotumuyanda Leza. Mubuzyo uuyandikana  ngutweelede kulibuzya ngwakuti: ‘Kujana ndatondeezya biyeni kuti ndilamuyanda Leza?’ Nsandulo ijanika mumajwi aakasololelwa muuya uusalala, akalembwaa mwaapostolo Johane atii: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Johane 5:3) Tweelede kulanga-langa zyambwaa majwi aaya nkaambo tuyanda kutondeezya mbotumuyanda Leza.

4, 5. (a) Majwi aakuti “kuyanda Leza” aambaanzi? (b) Pandulula mbowakatalika kuyanda Jehova.

⁴ Niinzi nzyakali kuyeeya mwaapostolo Johane chiindi naakali kulemba majwi akuti: “Kuyanda Leza”? Majwi aaya taambi nzila njatuyandaayo Leza, pesi aamba mbotweelede kumuyanda. Uchichiyeeyede na chiindi nwaakatalika kuyanda Jehova?

⁵ Yeeya chiindi nwaakatalika kwiiya kasimpe atalaa Jehova azisyomezyo zyakwe achiindi nwaakatalika kubaa lusyomo. Wakatalika kuziba kuti nikuba kuti wakazyedwe kulisizibi kwaanzenaa Leza, pesi kwiinda muli Kristu, Jehova wakajula nzila yakuti ukajane kumaninina kwakasowegwaa Adamu akuti ukajane buumi butamani. (Matayo 20:28; BaRoma 5:12, 18) Wakatalika kumvwisisisya luyando ndwakatondeezya Jehova, naakaaba Mwanaakwe uuyandikana loko kuti azotufwide. Zyakakuyasa moyo mpawo wakatalika kuyanda Leza, wakakutondeezya luyando oolu lupati.—Bala 1 Johane 4:9, 10.

6. Luyando lwachoonzyo lutondeezegwa biyeni, alimwi luyando lwaLeza lwakapa kuti uchiteenzi?

⁶ Luyando ndwaakamvwa akali matalikilo buyo aakuyanda Jehova. Luyando teembwalimvwa luzutu muntu, pesi, luswaanizya zintu zyiingi. Kumuyanda  chachoonzyo Leza kuswaanizya kuchita zintu zyiingi kutali kwaamba buyo kuti “Ndilamuyanda Jehova.” Mbuli lusyomo, luyando lwachoonzyo lutondeezegwa kwiinda mumichito yesu. (Jakobo 2:26) Nkinkaako, chiindi nwaakatalika kuyanda Jehova, wakasala kupona munzila iibotezya Wuso wakujulu. Uli Kamboni ubbabbatizidwe na? Kuti kakuli boobo, luyando oolu ndulo lwakapa kuti usale munzila eeyi iiyandikana loko. Wakalipeda kuli Jehova kuti uchite kuyanda kwakwe, alimwi wakatondeezya kulipeda kwako kwiinda mukubbabbatizigwa. (Bala BaRoma 14:7, 8.) Kuzuzikizya chisyomezyo eechi chiyandikana kuli Jehova, kuswaanizya zimwi zyakambwaa mwaapostolo Johane.

7. Njiili imwi milawu yaLeza, alimwi kwiibamba kuswaanizyaanzi?

⁷ Johane wakapandulula nchochaamba kuyanda Leza naakati: “Twabamba milazyo yakwe.” Njiili milawu yaLeza? Jehova utupede milawu myiingi iijanika muJwi lyakwe, Bbayibbele. Muchikozyano, ukasya michito iili mbuli kukolwa, bwaamu, kukomba mituni, kubba akubeja. (1 BaKorinto 5:11; 6:18; 10:14; BaEfeso 4:28; BaKolose 3:9) Kubamba milawu yaLeza kuswaanizya kupona kweendelanaa zyeelelo zizwa muBbayibbele.

8, 9. Kujana twaziziba biyeni zintu zibotezya Jehova nikuba muzyiimo nokutakwe milawu ilaantanganana iizwa muBbayibbele? Kozyanisya.

⁸ Kuti tubotezye Jehova, tweelede kuchita zintu zyiingi kutali kubamba milawu yakwe luzutu. Jehova tatupi milawu yeendelezya buumi bwesu bwabuzubaa buzuba. Nikuba boobo, tulakonzya kuswaananaa zyiimo zisiyene-siyene zitakwe milawu ilaantanganana yaambwa muBbayibbele. Muzyiimo zili boobo, kujana twaziziba biyeni zintu zibotezya Jehova? Bbayibbele lilatutonde ezya mbwayeeya Jehova. Notubala Bbayibbele twiiya ziyandwaa Jehova anzyatayandi. (Bala Intembauzyo 97:10; Tusimpi 6:16-19) Tuyoomvwisisisya nzila njazibonaayo zintu amichito njayanda. Chiindi notwiiya zyiingi atalaa bube bwaJehova anzila zyakwe, ziyootupa kuti tukonzye kusala kabotu alimwi tubaa miyeeyo iilikabotu. Nikuba muchiindi nokutakwe milawu ilaantanganana iizwa muBbayibbele, tuyookonzya kuziba “mbulubede luyando lwaMwami [Jehova].”—BaEfeso 5:17.

⁹ Muchikozyano, muBbayibbele tamukwe mulawu ukasya kweebela misobano yakulwana naa yakutalijata kabotu iizwa mu TV. Pesi, tweelede kubikkilwa mulawu na ulaatalaa kweebela zisobano eezi? Tulizi nzila Jehova njazibonaayo zintu eezi. Chaantanganana, Jwi lyakwe litwaambila kuti: “[Jehova] ulisulide basikufumpa.” (Intembauzyo 11:5) Alubo litwaambila kuti: “Leza uyoobabeteka baamu.” (BaHebrayo 13:4) Kwiinda mukuyeeyesesya atalaa majwi aaya, tulakonzya kuziba zintu ziyandwaa Jehova. Alubo, tuyoosala kuteebela kufumbwa zifwanikisyo zitondeezya michito njatayandi Leza. Tulizi kuti zilamubotezya Jehova ikuti twatantamuka zintu zibonekaanga zilikabotu munyika eeyi. *

10, 11. Nkamboonzi nitusala kuswiilila Jehova, alimwi tweelede kumuswiilila biyeni?

¹⁰ Nkaakali kaambo kapati kapa kuti tubambe milawu yaLeza? Nkamboonzi nituyanda kupona kweendelanaa mbwayeeya Jehova? Tatusali kuchita oobo akaambo kakuti tuyoowa kusubulwa naa kuti tuyanda kulikwabilila kumpindu zijanwaa baabo batachiti kuyanda kwaLeza. (BaGalatiya 6:7) Pesi, tubona kuswiilila Jehova  mbuli nzila yakutondeezya kuti tulamuyanda. Mbuli mwana mbwayanda kuti wisi abotelwe, aswebo tuyanda kuti Jehova abotelwe. (Intembauzyo 5:12) NguNdeende wesu, alimwi tulamuyanda. Taakwe chimwi chintu pe chikonzya kutupa kubotelwa akukkutisikana kwiinda kubona kuti tulikupona kweendelana ambotukonzya ‘kujana choolwe kuli Jehova.’—Tusimpi 12:2.

¹¹ Nkinkaako, kuswiilila kwesu tekwakujatwaa nkanchi pe, alimwi tatulisalili milawu njituyanda kuswiilila naa njitutayandi kuswiilila. * Pesi ‘tuswiilila chamoyo woonse.’ (BaRoma 6:17) Tulimvwa mbuli mbwakalimvwa sintembawuzyo ooyo wakatii: “Ilandikondezya milazyo yako, njenjandisya.” (Intembauzyo 119:47) Masimpe, tukuyanda loko kuswiilila Jehova. Tulizi kuti tweelede kumuswiilila chamoyo woonse. (Deuteronomo 12:32) Tuyanda kuti Jehova aambe atalaa ndiswe mbuli mbwakaamba atalaa Nowa muJwi lyakwe. Kujatikizya sikale ooyo wakali kusyomeka alimwi wakatondeezya kuyanda Jehova, kwiinda mukumuswiilila kwaminyaka myiingi loko, Bbayibbele lyaamba kuti: “Nowa wakacita obo. Wakacita mbubonya mbuli Leza mbwakamulailila.”—Matalikilo 6:22.

12. Ndiilili kuswiilila kwesu nokubotezya moyo waJehova?

¹² Jehova ulimvwa biyeni atalaa kuswiilila kwesu chamoyo woonse? Jwi lyakwe lyaamba kuti “tukondezya moyo wakwe.” (Tusimpi 27:11) Ino kuswiilila kwesu kulamubotezya na Mwaami Singuzuzyoonse? Nisimpe, kulamubotezya! Jehova wakatulenga katulalwaangunuko lwakulisalila. Eechi chaamba kuti tulakonzya kusala kumuswi ilila naa kutamuswiilila. (Deuteronomo 30:15, 16, 19, 20) Chiindi notusala kuswiilila Jehova chamoyo woonse, alimwi katuzichita akaambo kakuti tulamuyanda, ngatulokubotezya Ndeende wesu wakujulu. (Tusimpi 11:20) Tunooli twasala nzila mbotu loko mubuumi.

13, 14. Nkamboonzi nchotukonzya kwaamba kuti ‘milazyo yaLeza tiili miyumu’ pe, alimwi eechi ngachilakozyanisigwa biyeni?

¹³ Mwaapostolo Johane utubuzya chimwi chintu chitusungwaazya atalaa zintu ziyandwaa Jehova: “Milazyo yakwe tiili miyumu.” Mabala aachiGiriki akasandululwa kuti “tiili miyumu” aali mulugwalo lwa 1 Johane 5:3 aamba kuti “tiilemi pe.” * Bumwi busanduluzi bwaBbayibbele bwaamba kuti: “Milazyo yakwe tiiminyi pe.” (New English Translation) Zyeelelo zyaJehova zilamvwisisika alimwi taziminyi pe. Tulakonzya kutobela milawu yakwe nikuba kuti tatumaninide pe.

¹⁴ Tulakonzya kuzikozyanisya munzila eeyi. Muchikozyano, atutii mweenzinyokwe wakukumbila kuti umugwasye chiindi naliikulonga. Ulaazintu zyiingi loko ziyanda kunyampulwa. Zimwi zikonzya kunyampulwaa muntu uumwi pesi zimwi ziyanda kunyampulwaa bantu babili. Mweenzinyokwe wasala nzyayanda kuti uzinyampule. Kujana wakukumbila kuti unyampule zintu nzyazi kuti zilalema na? Peepe, nkaambo tayandi kuti unyampule zintu zitakuchise. Mbumbubo, Leza wesu siluyando alimwi siluzyalo, tatupi milawu njazi  kuti miyumu kuti twiibambe. (Deuteronomo 30:11-14) Taakwe nanga ulatukumbila kuti tuchite zintu nzyazi kuti zilatuminya. Jehova ulizi mpotugolela, “nkaambo ulizi mbububede buntu bwesu, ulaibulukwa kuti tuli bulongo buyo.”—Intembauzyo 103:14.

15. Nkamboonzi nitukonzya kubaa choonzyo chakuti milawu yaJehova igwasya ndiswe?

¹⁵ Milawu yaJehova tiilemi pe; pesi igwasya ndiswe. (Bala Isaya 48:17.) Nkinkaako, Musa wakaambila maIsrayeli aachiindi kuti: “Jehova wakatulailila kubamba imbeta ezi zyoonse, tuyoowe Jehova Leza wesu, kuti tukale kabotu mazuba oonse, atuponye mbubonya mbuli sunu.” (Deuteronomo 6:24) Andiswe tulakonzya kubaa choonzyo chakuti kwiinda mukutupa milawu yakwe, Jehova ulatubikkila maanu alimwi uyanda kuti tukkale kabotu mane kukabe kutamani. Pesi nichoonzyo na kuti Leza utupa milawu iitalemi? Jehova nguLeza ulaa busongo butamani. (BaRoma 11:33) Aboobo, ulizizi zintu nzyotuyanda. Jehova nduyando. (1 Johane 4:8) Luyando mbube bwakwe bupati alimwi ndulo lusololela zintu zyoonse nzyaamba anzyachita. Mpaayeeme milawu yakwe yoonse njapa babelesi bakwe.

16. Nkamboonzi nitukonzya kuswiilila nikuba kuti tatumaninide alimwi nikuba kuti munyika muli lweeno?

¹⁶ Eezi tazyaambi kuti kuswiilila Leza nkuuba. Tweelede kulwanaa lweeno lulimunyika eeyi “iikede muzibi.” (1 Johane 5:19) Tweelede kulwanaa kutamaninina kwesu kutusololela kukutyola milawu yaLeza. (BaRoma 7:21-25) Pesi kuti katumuyanda Leza tulakonzya kuzwidilila. Jehova ulabalongezya boonse batondeezya kuti balamuyanda kwiinda mukumuswiilila. Upa muuya wakwe uusalala “kulibamumvwa.” (Incito 5:32) Muuya ooyo uusalala, upa kuti tubaa michelo mibotu alimwi  tubaa bube buyandikana loko bukonzya kutugwasya kuti tumuswiilile.—BaGalatiya 5:22, 23.

17, 18. (a) Niinzi nzituyolanga-langa mubbuku eeli, alimwi niinzi nzitweelede kukkala katuzi? (b) Tuyoyiyaanzi muchaandano chitobela?

¹⁷ Mubbuku eeli, tuyoolanga-langa zyeelelo zyaJehova, zyeelelo zyakulijata azimwi zintu zitondeezya nzyayanda. Mbuli mbotuchita eezi, tweelede kukkala katuzi zimwi zintu ziyandikana loko. Tutalubi kuti Leza tatusinikizyi kuswiilila milawu amayilile aakwe, pesi, uyanda kuti tumuswiilile kazizwa aansi aamoyo. Alubo, tutalubi kuti Jehova uyanda kuti tupone munzila iipa kuti tujane zilongezyo lino akuti tukajane buumi butamani muchiindi chiza. Tweelede kuziba kuti kuswiilila chamoyo woonse nchoolwe chipati chakutondeezya kuti tulamuyanda Jehova.

¹⁸ Kuti tukonzye kusiyanisya chibotu achibi, Jehova wakatupa manjezeezya. Pesi kuti akonzye kutusololela munzila iili kabotu, manjezeezya eesu ayelede kuyiisigwa, mbuli mbotutakiiye muchaandano chitobela.