1, 2. Wanem samting i kirapim yu long laikim God Jehova?

 YU SAVE laikim tru God? Sapos yu dediketim pinis laip bilong yu long God Jehova, bai yu tok yes​—na i stret yu tok olsem! Tru tumas, yumi save laikim Jehova. Yumi laikim God, long wanem, em i laikim tru yumi. Baibel i tok: “Yumi save laikim ol arapela, long wanem, God i bin laikim yumi pastaim.”​—1 Jon 4:19.

² Jehova i go pas long kamapim pasin bilong em long laikim yumi. Em i givim yumi gutpela graun bilong yumi ken i stap long en. Em i save lukautim yumi long ol samting bilong skin. (Matyu 5:​43-48) Tasol bikpela samting moa, em i save lukautim yumi long ol samting bilong spirit. Em i givim yumi Tok Bilong Em, em Baibel. Na tu, em i tokim yumi long beten long em, na em i tok promis olsem em bai harim beten bilong yumi na givim holi spirit bilong em bilong helpim yumi. (Song 65:2; Luk 11:13) Tasol bikpela samting moa, em i salim nambawan gutpela Pikinini bilong em bilong kamap Man Bilong Kisim Bek yumi long sin na dai. Man! Jehova i kamapim  bikpela pasin laikim tru long yumi, a?​—Jon 3:16; Rom 5:8.

3. (a) Bilong stap yet insait long laikim bilong God, yumi mas mekim wanem? (b) Yumi mas tingim wanem bikpela askim? Bekim bilong dispela askim i stap we?

³ Jehova i laik bai pasin laikim bilong em i ken helpim yumi inap oltaim oltaim. Tasol bilong yumi ken kisim dispela helpim, yumi yet i mas mekim sampela samting. Baibel i tokim yumi: “Stap insait yet long pasin laikim bilong God” na bai yupela inap “kisim laip oltaim.” (Jut 21, NW) Dispela tok “stap insait yet” i  makim olsem bilong stap insait long laikim bilong God, yumi yet i mas mekim sampela samting. Yumi mas mekim ol samting i kamapim klia olsem yumi pilim pasin laikim bilong em. Wanpela bikpela askim yumi mas tingim i olsem, ‘Olsem wanem mi ken soim olsem mi laikim tru God?’ Bekim bilong dispela askim i stap long tok bilong aposel Jon, em i tok: “Pasin bilong laikim God i olsem, yumi bihainim ol lo bilong em na ol lo bilong em i no givim hevi long yumi.” (1 Jon 5:​3, NW) Yumi mas skelim gut mining bilong dispela tok, long wanem, yumi laik soim God bilong yumi olsem yumi laikim em tru.

4, 5. Stori long olsem wanem pasin bilong laikim tru Jehova i bin kirap long bel bilong yu.

⁴ “Pasin bilong laikim God”​​—yu ting aposel Jon i tingim wanem samting taim em i raitim dispela tok? Yu inap tingim wanem taim pasin bilong yu long laikim Jehova i bin kirap long bel bilong yu?

⁵ Tingim namba wan taim yu bin kisim stretpela save long Jehova na ol samting em i tingting pinis long mekim na yu kirap long bilip. Yu kisim save olsem maski yu sinman na yu stap longwe long God, long rot bilong Krais, Jehova i opim rot long yu ken kamap gutpela olgeta na kisim laip oltaim, em ol samting Adam i bin lusim. (Matyu 20:28; Rom 5:​12, 18) Na yu kliagut long pasin bilong Jehova long daunim tru laik bilong em yet na salim gutpela Pikinini bilong em i kam bilong i dai na helpim yu. Bel bilong yu i pilim tru, na yu kirap long laikim God husat  i bin soim olsem em i laikim yu tru.​—1 Jon 4:​9, 10.

6. Olsem wanem yumi soim pasin laikim? Pasin bilong laikim tru God i bin kirapim yu long mekim wanem?

⁶ Tasol samting yu pilim, em kirap tasol bilong pasin bilong yu long laikim tru Jehova. Pasin laikim i no samting man i pilim tasol, na bilong laikim tru God yumi no inap tok tasol olsem “Mi laikim Jehova,” nogat. Wankain olsem pasin bilong bilip, pasin laikim bai kamap ples klia long ol samting dispela pasin i kirapim man long mekim. (Jems 2:26) Yumi soim pasin laikim long rot bilong mekim ol samting i amamasim man yumi laikim. Olsem na taim yu kirap laikim Jehova long bel bilong yu, dispela i kirapim yu long wokabaut long pasin i amamasim Papa bilong yu long heven. Olsem wanem? Yu wanpela Witnes i baptais pinis? Sapos olsem, pasin bilong yu long laikim tru Jehova na stap gut long em i bin kirapim yu long mekim dispela nambawan bikpela disisen long laip bilong yu. Yu dediketim yu yet long Jehova bilong mekim laik bilong em, na yu kisim baptais bilong makim olsem yu dediket pinis. (Rom 14:​7, 8) Bilong truim dediket bilong yumi long Jehova, yumi mas mekim wanpela narapela samting em Jon i toktok long en.

7. Wanem sampela lo bilong God? Bilong bihainim ol dispela lo, yumi mas mekim wanem?

⁷ Jon i kamapim klia samting em pasin bilong laikim God i mas kirapim man long mekim, em i tok: “Yumi bihainim ol lo bilong em.” Wanem ol lo? Jehova i givim ol lo long yumi long rot bilong Tok bilong  em, Baibel. Olsem, em i tambuim pasin bilong dring spak, pasin pamuk, pasin bilong lotuim god giaman, stil, na tok giaman. (1 Korin 5:11; 6:18; 10:14; Efesus 4:28; Kolosi 3:9) Pasin bilong bihainim ol lo bilong God i makim olsem yumi mas bihainim ol lo bilong stretpela pasin i stap long Baibel.

8, 9. Olsem wanem yumi inap save long wanem samting i stret long ai bilong Jehova, maski Baibel i no kolim stret wanpela lo long en? Stori long dispela.

⁸ Tasol bilong amamasim Jehova, pasin bilong bihainim tasol ol lo bilong em i no inap. Jehova i no save kalabusim yumi long rot bilong putim ol lo long olgeta samting long laip bilong yumi, nogat. Olsem na long olgeta wan wan de, planti samting inap painim yumi em Baibel i no gat lo stret long en. Long kain taim olsem, olsem wanem yumi inap save wanem samting i stret long ai bilong Jehova? Baibel i kamapim klia tingting bilong God. Taim yumi stadi long Baibel, yumi kisim save long ol samting Jehova i laikim na ol samting em i nolaik tru long en. (Song 97:10; Sindaun 6:​16-19) Yumi kisim save long ol tingting na pasin em i laikim. Taim yumi kisim save moa long tingting na pasin bilong Jehova, bai yumi inap larim tingting bilong em i stiaim moa yet ol disisen bilong yumi na ol samting yumi mekim. Olsem na maski i gat ol samting we Baibel i no kolim stret wanpela lo long en, planti taim yumi inap save “long laik bilong Bikpela” long ol dispela samting.​—Efesus 5:17.

⁹ Olsem, Baibel i no kolim stret wanpela lo i tokim yumi long no ken lukim ol muvi o piksa long TV i gat pasin bilong pait na bagarapim man na pasin pamuk.  Tasol yu ting i mas i gat wanpela lo stret i tambuim yumi long lukim kain samting olsem? Yumi save long tingting bilong Jehova long dispela samting. Baibel i tok klia olsem: “[Jehova] i heitim tru ol man i laikim pasin pait.” (Song 11:​5, NW) Na Baibel i tok tu olsem: “God bai i bekim pe nogut long ol manmeri i mekim ol kain kain pasin pamuk.” (Hibru 13:4) Taim yumi skelim ol dispela tok, yumi inap save gut long laik bilong Jehova. Olsem na yumi no laik lukim ol kain piksa i kamapim ol pasin nogut em God i save heitim. Yumi save olsem Jehova i amamas taim yumi sakim ol dotipela pasin nogut em ol man bilong dispela graun i ting i gutpela samting bilong kisim amamas long en. a

10, 11. Bilong wanem yumi laik bihainim tok bilong Jehova? Yumi mas bihainim tok bilong em olsem wanem?

¹⁰ Wanem samting i nambawan as na yumi bihainim ol lo bilong God? Bilong wanem na long olgeta de yumi laik mekim ol samting i stret wantaim tingting bilong God? I no olsem yumi bihainim dispela rot long wanem yumi laik abrusim strafe o abrusim ol hevi i save painim ol man i sakim laik bilong God, nogat. (Galesia 6:7) Yumi tingim pasin bilong bihainim tok bilong Jehova olsem wanpela gutpela rot bilong soim pasin bilong yumi long laikim em. Wankain olsem wanpela pikinini i laik bai papa bilong em i amamas long em, yumi tu i laik bai Jehova i amamas long yumi. (Song 5:12) Em i Papa bilong yumi,  na yumi laikim em. Yumi amamas tru taim yumi save olsem yumi bihainim pasin em “Bikpela i amamas na belgut” long en.​—Sindaun 12:2.

¹¹ Yumi amamas long bihainim tok, na yumi amamas long bihainim tok long olgeta samting. b Yumi no makim wanem lo yumi laik bihainim na wanem lo yumi laik sakim, o bihainim tasol ol lo i no putim hevi long yumi. Nogat. Yumi “bihainim tru” tok. (Rom 6:17) Yumi gat wankain tingting olsem man bilong raitim song long Baibel, em i tok: “Mi belgut tru long bihainim ol lo bilong yu long wanem, mi laikim tumas ol dispela lo.” (Song 119:47) Yes, yumi laikim tumas pasin bilong bihainim tok bilong Jehova. Yumi save olsem Jehova i laik bai yumi bihainim olgeta tok bilong em long olgeta taim, na i stret yumi mekim olsem. (Lo 12:32) Yumi laik bai Jehova i mekim wankain tok long yumi olsem em i bin mekim long Noa. Dispela gutpela man i bin kamapim pasin bilong em long laikim God long rot bilong bihainim tok inap planti yia, na Baibel i tok long em olsem: “Noa i mekim olgeta samting olsem God i tokim em.”​—Stat 6:22.

12. Olsem wanem Jehova i ken amamas long pasin bilong yumi long bihainim tok?

¹² Jehova i pilim olsem wanem taim yumi amamas long bihainim tok bilong em? Baibel i tok dispela  pasin i mekim em i “belgut tru.” (Sindaun 27:11) Yu ting Bikpela King bilong heven na graun i save amamas taim yumi bihainim tok bilong em? Yes, em i save amamas​—na i gat as na em i pilim olsem! Jehova i bin wokim yumi bilong i stap fri long makim rot yumi laik bihainim. Dispela i makim olsem yumi stap fri long makim samting yumi laik mekim; yumi ken bihainim tok bilong God, o yumi ken sakim tok bilong em. (Lo 30:​15, 16, 19, 20) Taim yumi amamas long bihainim tok bilong Jehova na taim pasin bilong laikim tru God i kirapim yumi long mekim olsem, dispela i save amamasim tru Papa bilong yumi long heven. (Sindaun 11:20) Long dispela rot yumi makim tu nambawan gutpela rot bilong bihainim.

13, 14. Olsem wanem yumi ken tok olsem ol lo bilong God “i no givim hevi long yumi”? Yumi ken tok piksa long dispela olsem wanem?

¹³ Aposel Jon i tokim yumi long wanpela gutpela samting long ol lo bilong Jehova: “Ol lo bilong em i no givim hevi long yumi.” c Narapela Baibel i tanim dispela ves olsem: “Ol lo bilong em i no save daunim yumi.” (New English Translation) Ol lo bilong Jehova i no hatwok tumas long bihainim na ol i no putim hevi long yumi. Nogat. Yumi ol man inap bihainim ol lo bilong em.

 ¹⁴ Yumi ken tok piksa long dispela olsem: Wanpela gutpela pren i askim yu long helpim em long kisim ol kago bilong em i go long narapela haus. I gat planti boks bilong karim i go. Sampela i no hevi tumas na wanpela man inap karim, tasol sampela boks i hevi na tupela man i mas karim. Pren bilong yu i makim ol boks em i laik bai yu karim. Yu ting em bai askim yu long kisim ol boks em i save ol i hevi tumas long karim? Nogat. Em i no laik bai yu wanpela i karim ol dispela boks, nogut yu kisim bagarap. Na olsem tasol, gutpela God bilong yumi i no tokim yumi long bihainim ol lo i hatwok tumas long bihainim. (Lo 30:​11-14) Em bai i no inap tokim yumi long mekim samting i givim hevi long yumi. Jehova i save long ol samting yumi no inap mekim, “em i save olsem em i bin kisim graun na wokim yumi na em i tingim yumi i olsem das tasol.”​—Song 103:14.

15. Bilong wanem yumi ken bilip tru olsem ol lo bilong Jehova i bilong helpim tru yumi?

¹⁵ Ol lo bilong Jehova i no bilong givim hevi long yumi, nogat; ol i bilong helpim tru yumi. (Aisaia 48:17) Olsem na Moses inap tokim lain Israel bilong bipo olsem: ‘God, Bikpela bilong yumi, i tokim yumi long bihainim olgeta dispela lo, na yumi mas aninit long em. Sapos yumi mekim olsem, oltaim bai em i was long yumi, na mekim yumi stap gut olsem nau.’ (Lo 6:24) Yumi tu i ken bilip tru olsem taim Jehova i givim ol lo bilong em long yumi, em i tingim yumi​—em i laik bai yumi stap gut inap long olgeta taim bihain. Jehova i no inap tru long tokim yumi long mekim wanpela samting inap nogutim yumi. Jehova  em i God i gat bikpela savetingting. (Rom 11:33) Olsem na em i save long wanem ol samting i gutpela bilong helpim tru yumi. Na tu, Jehova em i as bilong pasin laikim. (1 Jon 4:8) Pasin laikim em pasin tru bilong em, na dispela pasin i bosim olgeta tok bilong em na olgeta samting em i mekim. Pasin laikim i as bilong olgeta lo em i givim long ol wokboi bilong em.

16. Maski i gat ol samting nogut bilong dispela graun na yumi gat sin, bilong wanem yumi inap bihainim tok?

¹⁶ Dispela i no makim olsem em i isi long bihainim tok bilong God. Nogat. Yumi mas sakim ol samting nogut bilong dispela graun i “stap aninit long strong bilong Satan.” (1 Jon 5:19) Na tu, yumi mas karim hevi bilong sin i stap long skin bilong yumi, em samting i save kirapim yumi long brukim ol lo bilong God. (Rom 7:​21-25) Tasol pasin bilong yumi long laikim God inap win. Jehova i save blesim ol man i laik kamapim klia pasin bilong ol long laikim em long rot bilong bihainim tok. Em i save givim holi spirit bilong em long “ol manmeri i bihainim tok bilong em.” (Aposel 5:32) Dispela spirit i save kirapim yumi long kamapim ol gutpela pasin​—em ol gutpela pasin i helpim yumi long bihainim tok.​—Galesia 5:​22, 23.

17, 18. (a) Bai yumi skelim wanem ol samting long dispela buk? Taim yumi mekim olsem, yumi mas tingim wanem samting? (b) Bai yumi stori long wanem samting long sapta i kamap bihain long dispela?

¹⁷ Long dispela buk, bai yumi skelim ol stiatok bilong Jehova na ol lo bilong stretpela pasin na ol arapela samting i kamapim klia laik bilong em. Taim yumi mekim olsem, yumi mas tingim sampela bikpela  samting. Yumi mas tingim olsem Jehova i no save subim yumi long bihainim ol lo na stiatok bilong em; em i laik bai bel bilong yumi yet i kirapim yumi long bihainim tok bilong em. Yumi no ken lusim tingting olsem Jehova i laik bai yumi bihainim rot i helpim tru yumi long nau na i bringim yumi long laip i stap gut oltaim oltaim long bihain. Na yumi mas tingim olsem pasin bilong yumi long givim bel long bihainim tok, em i gutpela rot bilong soim Jehova olsem yumi laikim em tru.

¹⁸ Bilong helpim yumi long save wanem samting i stret na wanem samting i no stret, Jehova i bin givim yumi maus bilong bel. Tasol bilong maus bilong bel bilong yumi i ken stiaim gut yumi, yumi mas skulim em gut, olsem sapta i kamap bihain long dispela bai stori long en.