1, 2. Se a te mea e fakamalosi aka ei tou alofa ki a Ieova te Atua?

E MATA, e alofa koe ki te Atua? Kafai ko oti ne tuku atu tou ola ki a Ieova te Atua, ka tali atu koe mo te mautinoa, ao—kae e tonu ‵ki eiloa! E masani eiloa o fakaosofia tatou ke a‵lofa atu ki a Ieova. E a‵lofa tatou ki te Atua ona ko tena alofa ki a tatou. E fai mai penei a muna a te Tusi Tapu e uiga ki ei: “A tatou e a‵lofa me i te Atua ne mua o alofa mai ki a tatou.”—1 Ioane 4:19.

² Ne fakaasi muamua mai ne Ieova tena alofa ki a tatou. E tuku mai ne ia se lalolagi tafasili i te gali ke ‵nofo tatou i ei. E tuku mai foki ne ia a mea faka-te-foitino kolā e ‵tau o maua ne tatou. (Mataio 5:43-48) Kae e sili atu i te tāua, e tausi mai a ia ki a tatou i te feitu faka-te-agaga. E tuku mai ne ia ki a tatou tena Muna, ko te Tusi Tapu. E se gata i ei, e ‵kami ne ia tatou ke ‵talo atu ki a ia mo te mautinoa me ka fakalogologo mai eiloa a ia kae ka tuku mai foki ne ia tena agaga tapu ke fesoasoani mai ki a tatou. (Salamo 65:2; Luka  11:13) Kae ko te ‵toe mea tāua, ne uga mai ne ia tena Tama fagasele ke fai mo fai te ‵tou Fakaola ko te mea ke mafai o fakasaoloto tatou mai te agasala mo te mate. Ko tafaga lā te lasi o te alofa o Ieova telā ne fakaasi mai ki a tatou!—Ioane 3:16; Loma 5:8.

3. (a) Kafai e fia tumau tatou i te alofa o te Atua, ne a mea e ‵tau o fai ne tatou? (e) Se a te fesili tāua telā e ‵tau mafau‵fau tatou ki ei, kae e maua i fea te tali?

³ E manako a Ieova ke maua ne tatou ki te se-gata-mai a mea aoga mai tena alofa. A te aoga o mea konā ki a tatou, e faka‵na eiloa ki te ‵tou filifiliga. E fakamalosi  mai te Muna a te Atua ki a tatou: “Tausi koutou i te alofa o te Atua . . . ke tuku atu ne ia a te ola se gata mai.” (Iuta 21) E fakaasi mai i te tugapati ko te “tausi koutou” me kafai e fia tumau tatou i te alofa o te Atua, e isi ne mea e ‵tau o fai ne tatou. E ‵tau o ‵saga atu tatou ki tena alofa i auala mautinoa. Tela la, se mea ‵lei ke mafau‵fau tatou ki te fesili tāua tenei, ‘E mafai pefea o fakaasi atu toku alofa ki te Atua?’ E maua te tali i pati fakaosofia a te apositolo ko Ioane: “Me e tenei te uiga o te alofa ki te Atua: ko te fakalogo ki ana fakatonuga. Ka ko ana fakatonuga e se na ‵mafa foki mō tatou.” (1 Ioane 5:3) E ‵tau o iloilo faka‵lei ne tatou a uiga o pati konei, me e ma‵nako tatou o fakaasi atu ki te ‵tou Atua te lasi o ‵tou a‵lofa ki a ia.

4, 5. Fakamatala mai te auala ne kamata ei o tupu aka i tou loto a te alofa ki a Ieova.

⁴ “Te alofa ki te Atua”—se a te mea ne mafaufau ki ei a Ioane i te tusiga ne ia o pati konā? E mata, e masaua ne koe te taimi ne kamata ei o tupu aka i tou loto a te alofa ki a Ieova?

⁵ Mafaufau malie aka ki te taimi ne iloa muamua ei ne koe te munatonu e uiga ki a Ieova mo ana fuafuaga kae kamata o maua ne koe te fakatuanaki. Ne malamalama koe me e tiga eiloa ne fanau mai koe e pelā me se tino agasala telā e ‵vae keatea mai te Atua, ne ‵tala mai ne Ieova te auala e alatu i a Keliso ke maua ne koe te tulaga ‵lei katoatoa telā ne galo i a Atamu kae ke maua foki te ola se-gata-mai. (Mataio 20:28;  Loma 5:12, 18) Ne kamata o matea ne koe a te lasi o te taulaga ne fai ne Ieova i te ugamaiga o tena toe Tama fagasele ke mate mō koe. Ne otia tou loto, kae ne kamata o lagona ne koe te alofa ki te Atua telā ne fakaasi mai ne ia se vaegā alofa lasi penā.—1 Ioane 4:9, 10.

6. E fakaasi atu pefea te alofa tonu, kae se a te mea ne fakamalosi atu ke fai ne koe ona ko tou alofa ki a Ieova?

⁶ Kae ko te lagonaga tenā ko te kamataga fua o te alofa tonu ki a Ieova. A te alofa e se se lagonaga fua; kae e se fakaasi atu foki i pati. E uke atu a mea e aofia i te alofa tonu ki te Atua i lō te fai atu fua, “Au e alofa ki a Ieova.” E pelā mo te fakatuanaki, e fakaasi atu te alofa tonu e auala i faifaiga. (Iakopo 2:26) E masani eiloa o fakaasi atu te ‵tou a‵lofa mai te faiga o mea kolā e fakafiafia atu ki te tino telā e a‵lofa tatou ki ei. Tela la, kafai ko oti ne ‵mau a aka o te alofa ki a Ieova i tou loto, e fakamalosi aka i ei ke fia ola koe i se auala telā ka fakafiafia atu ki tou Tamana i te lagi. A koe se Molimau papatiso? Kafai e tonu tenā, e fai eiloa ne te alofa lasi mo te fakamaoni tenei ki a Ieova ke fai ne koe a te ‵toe fakaikuga tāua i tou olaga. Ne tuku atu ne koe a koe eiloa ki a Ieova ke fai tena loto, kae ne fakamailoga ne koe tou tukuatuga e auala i tau papatisoga. (Loma 14:7, 8) A te fakataunuga o te tautoga tenei ki a Ieova e aofia i ei a nisi pati kolā ne fai mai ne te apositolo ko Ioane.

7. Ne a nisi fakatonuga a te Atua, kae se a te mea e aofia i te fakalogo ki ei?

⁷ Ne fakamatala mai ne Ioane a te uiga o te alofa  ki te Atua: “Ko te fakalogo ki ana fakatonuga.” Ne a fakatonuga a te Atua? E tuku mai ne Ieova se aofaki o fakatonuga mautinoa e auala i tena Muna, ko te Tusi Tapu. E pelā mo te fakatapu ne ia a vaegā faifaiga pelā mo te konā, finalalolagi, ifo ki tupua, kaisoa, mo te loi. (1 Kolinito 5:11; 6:18; 10:14; Efeso 4:28; Kolose 3:9) E aofia i te fakalogo ki fakatonuga a te Atua a te ola e ‵tusa mo tulaga ma‵nino i te Tusi Tapu i mea tau amioga.

8, 9. E mafai pefea o iloa ne tatou a mea kolā e fakafiafia atu ki a Ieova ke oko foki eiloa ki mea kolā e seai ne tulafono mautinoa e maua i te Tusi Tapu e uiga ki ei? Taku mai se fakaakoakoga.

⁸ Kae ke fakafiafia atu ki a Ieova, e uke atu a mea e ‵tau o fai ne tatou i lō te faka‵logo fua ki ana fakatonuga mautinoa. E se fakafi‵ta tatou ne Ieova ki tulafono kolā e pule mai ki vaega katoa o ‵tou olaga i aso takitasi. Tela la, i aso takitasi, e mafai o fe‵paki tatou mo mea kolā e seai ne fakatonuga mautinoa e uiga ki ei mai te Tusi Tapu. I vaegā mea penā, e iloa pefea ne tatou a mea kolā ka fakafiafia atu ki a Ieova? E fakaasi manino mai i te Tusi Tapu a mafaufauga o te Atua. I taimi e suke‵suke ei tatou ki te Tusi Tapu, ko iloa ei ne tatou a mea e fiafia ki ei a Ieova mo mea e takalialia a ia ki ei. (Salamo 97:10; Faataoto 6:16-19) Ko malamalama ei tatou i kilokiloga mo faifaiga kolā e fakatāua ne ia. Ko te lasi o te ‵tou iloa i uiga mo auala o Ieova, ko te momea aka foki o te talia ne tatou o ana mafaufauga ke fakavae ki ei ‵tou fakaikuga mo faifaiga. Tela la, ke oko eiloa ki mea kolā e seai ne tulafono mautinoa e maua i te Tusi Tapu, e iloa faeloa ne tatou “a te mea e loto ki ei te Aliki [ko Ieova].”—Efeso 5:17.

 ⁹ E pelā mo te seai o se fakatonuga mautinoa ke mo a ma onoono ki tamunei mo ata i televise kolā e fakaasi mai i ei a amioga fakasauā mo amioga finalalolagi matagā. Kae e mata, e ‵tau o maua ne tatou se tulafono mautinoa e uiga ki te onoono ki vaegā mea penā? E iloa ne tatou te kilokiloga a Ieova ki mea konei. E fai ‵tonu mai tena Muna ki a tatou: “So se tino e fiafia ki amioga fakasauā e takalialia eiloa a [Ieova] ki ei.” (Salamo 11:5, Tusi Paia, Samoa) E fai mai foki i ei: “E fakamasino ne te Atua a latou kolā e fina lalolagi, pelā foki mo latou kolā e mulilua.” (Epelu 13:4) Mai te mafaufau ki pati konei mai te Atua, ko maina faka‵lei ei tatou i te loto o Ieova. Ko fai ei ‵tou filifiliga ke mo a ma onoono tatou ki vaegā faifaiga kolā e takalialia ki ei te ‵tou Atua. E iloa ne tatou me e fakafiafia atu ki a Ieova māfai e ‵kalo keatea tatou mai i amioga lai‵lai kolā e fakaloiloi mai te lalolagi me ne fakafiafiaga sē fakama‵taku. *

10, 11. Kaia e filifili ei ne tatou ke faka‵logo ki a Ieova, kae se a te vaegā fakalogo e fakaasi atu ne tatou ki a ia?

¹⁰ Se a te ‵toe pogai tāua e faka‵logo ei tatou ki fakatonuga a te Atua? Kaia e ma‵nako ei tatou o ola i aso takitasi e ‵tusa mo mea kolā e iloa ne tatou me ko mafaufauga o te Atua? E se filifili ne tatou te auala tenei ko te mea fua ke se fakasala tatou io me ke ‵kalo keatea mai i ikuga ma‵sei e maua ne tino kolā e se fia ‵saga atu ki te loto o te Atua. (Kalatia 6:7) I lō te fai penā, e ‵kilo atu tatou ki te fakalogo ki a Ieova e pelā me se avanoaga tafasili i te tāua ke fakaasi atu ei te  ‵tou a‵lofa ki a ia. E pelā eiloa mo te manako malosi o se tamaliki ke maua ne ia te taliaga a tena tamana, e penā foki te ‵tou ma‵nako ke maua te taliaga a Ieova. (Salamo 5:12) A ia ko te ‵tou Tamana, kae e a‵lofa eiloa tatou ki a ia. E seai se mea e sili atu tena fakafiafia io me fakalotomalie mai ki a tatou i lō te iloa atu me e ola tatou i se auala telā e ‘fiafia ki ei a Ieova.’—Faataoto 12:2.

¹¹ Tela la, e se faka‵logo tatou mo te kauga‵ta; kae e se se mea foki e ‵tau o filifili ki ei. * E se filifili ne tatou a fakatonuga kolā e fia faka‵logo io me se fia faka‵logo ki ei, kae e se faka‵logo foki māfai fua e ‵lei ki a tatou io me māfai e seai ne mea faiga‵ta e fe‵paki mo tatou i ei. I lō te fai penā, e faka‵logo tatou mo te “loto katoatoa.” (Loma 6:17) E fai ‵tou lagonaga e pelā mo pati a te faisalamo i te Tusi Tapu: “Au e fiafia o fakalogo ki au tulafono, me i a au e fiafia malosi ki ei.” (Salamo 119:47) E tonu, e fia‵fia malosi tatou o faka‵logo ki a Ieova. E matea ne tatou me se mea ‵tau eiloa—kae e manako foki a ia—ke katoatoa te ‵tou faka‵logo e aunoa mo te faiga o se filifiliga ki ei. (Teutelonome 12:32) E ma‵nako tatou ke fai mai ne Ieova ki a tatou ana pati kolā ne fai ki a Noa i loto i tena Muna. E fai mai te Tusi Tapu e uiga ki se tagata fakamaoni, telā ne fakaasi atu tena alofa ki te Atua i te fia sefulu tausaga: “Ne fai eiloa ne Noa a mea katoa kolā ne fakatonu atu ne te Atua.”—Kenese 6:22.

12. Ko te taimi fea e fai ei ne te ‵tou faka‵logo ke fiafia te loto o Ieova?

 ¹² E pefea a lagonaga o Ieova e uiga ki te ‵tou fia‵fia o faka‵logo ki a ia? E fai mai tena Muna me e fai i ei tena loto ke “fiafia malosi.” (Faataoto 27:11) E mata, e fai eiloa ne te ‵tou faka‵logo ke fiafia te loto o te Aliki Sili o te lagi mo te lalolagi? E tonu, e fai eiloa penā—kae mō se pogai ‵lei foki! Ne faite ne Ieova tatou e pelā me ne tino saoloto. Ko tena uiga e saoloto tatou o fai ‵tou filifiliga; e mafai o filifili tatou ke faka‵logo ki te Atua, io me ke se faka‵logo ki a ia. (Teutelonome 30:15, 16, 19, 20) Kafai e filifili tatou mo te fia‵fia ke faka‵logo ki a Ieova kae e fakamalosi aka te ‵tou fakaikuga tenā ne te loto e ‵fonu i te alofa ki te Atua, e fai ei ne tatou ke fiafia malosi te ‵tou Tamana i te lagi. (Faataoto 11:20) Ko filifili foki i ei ne tatou te ‵toe olaga tafasili i te ‵lei.

13, 14. Kaia e mafai ei o fai atu me i fakatonuga a te Atua “e se na ‵mafa,” kae e mafai pefea o fai se tala fakatusa ki ei?

¹³ E fakaasi mai ne te apositolo ko Ioane ki a tatou se mea tafasili i te fakamafanafana loto e uiga ki mea e manako ki ei a Ieova: “Ka ko ana fakatonuga e se na ‵mafa foki.” * E se faiga‵ta io me e fakafi‵ta a mea e manako ki ei a Ieova. E se fai pelā me e se mafai ne tino sē ‵lei katoatoa o faka‵logo ki ana tulafono.

 ¹⁴ E fai pelā mo te tala fakatusa tenei. E fakamolemole atu sou taugasoa ke fesoasoani atu koe i a ia ka fano o nofo i se isi fale. E uke a pokisi e ‵tau o avatu. A nisi pokisi e mā‵ma kae e mafai fua o sau ne se tino, kae ko nisi pokisi ko tō ‵mafa kae e manakogina a tino e tokolua ke sau ne laua. E fili aka ne tou taugasoa a pokisi kolā e manako a ia ke sau ne koe. E mata, ka fili aka ne ia a pokisi kolā e iloa ne ia me ko tō ‵mafa ki a koe? Ikai. E se manako a ia ke pakia koe i te taumafai o amo tokotasi ne koe a pokisi konā. E penā foki te ‵tou Atua alofa kae atafai, e se manako ke faka‵logo tatou ki fakatonuga kolā ko tō faiga‵ta ke fai ne tatou. (Teutelonome 30:11-14) E se mafai lele eiloa o fakamolemole mai a ia ke amo ne tatou se vaegā amoga ‵mafa penā. E iloa ne Ieova ‵tou tapula, me “e iloa ne ia a te mea ne faite ki ei tatou, e manatua foki ne ia i a tatou ne pefu.”—Salamo 103:14.

15. Kaia e tali‵tonu ei tatou me ne fai a fakatonuga a Ieova ke maua ei ne tatou a toe mea aoga mai i ei?

¹⁵ E mautinoa ‵lei me i fakatonuga a Ieova e se tō ‵mafa; e maua ne tatou i ei a toe mea aoga. (Faitau te Isaia 48:17.) Tenā te pogai ne fai atu ei a Mose ki tino Isalaelu mua: “Ne fakatonu mai a Ieova ke faka‵logo tatou ki tulafono katoa konei, ke ma‵taku ki a Ieova te ‵tou Atua mō te ‵lei o tatou i taimi katoa, ko te mea ke tumau tatou i te ola e pelā eiloa mo te aso tenei.” (Teutelonome 6:24, Tusi Paia, Samoa) E tali‵tonu foki tatou me i te tukumaiga o ana tulafono ki a tatou, e manako eiloa a Ieova ke maua ne tatou a toe mea ‵lei—ko mea ‵lei kolā e tumau ki se-gata-mai. E mafai pefea o se fai ne ia te mea tenā? E katoatoa te poto o  Ieova te Atua. (Loma 11:33) Tela la, e iloa ne ia a toe mea ‵lei mō tatou. A Ieova foki ko te alofa eiloa a ia. (1 Ioane 4:8) A te alofa ko tena toe uiga maluga, telā e fakavae ki ei ana pati mo ana faifaiga katoa. Ko te fakavae eiloa tenā o fakatonuga katoa kolā e tuku atu ne ia ki ana tavini.

16. Faitalia a fakamalosiga a te lalolagi matagā tenei mo manakoga o te foitino sē ‵lei katoatoa, kaia e mafai ei o ola tatou i se olaga fakalogo muna?

¹⁶ E se ko tena uiga me se mea faigofie a te fakalogo ki te Atua. E ‵tau o taua malosi atu tatou ki fakamalosiga a te lalolagi matagā, telā e nofo mai “lalo i te pule a te tino masei.” (1 Ioane 5:19) E ‵tau foki o taua malosi atu tatou ki ‵tou foitino sē ‵lei katoatoa, kolā e fakamalosi mai ke soli ne tatou a tulafono a te Atua. (Loma 7:21-25) Kae e mafai eiloa o manumalo te ‵tou a‵lofa ki te Atua. E fakamanuia ne Ieova a latou kolā e ma‵nako o fakatalitonu atu te lotou a‵lofa mai te faka‵logo ki a ia. E tuku atu ne ia tena agaga tapu “ki a latou kolā e faka‵logo ki a ia.” (Galuega 5:32) Ko te agaga eiloa tenā e maua ei ne tatou a fuataga tafasili i te ‵lei—ko uiga tāua kolā e fesoasoani mai ke ola tatou i se olaga fakalogo muna.—Kalatia 5:22, 23.

17, 18. (a) Ne a mea ka suke‵suke tatou ki ei i te tusi tenei, kae ne a mea e ‵tau o masaua ne tatou i te taimi e suke‵suke ei tatou ki ei? (e) Se a te mea ka sau‵tala ki ei i te suā mataupu?

¹⁷ I te tusi tenei, ka suke‵suke tatou ki akoakoga fakavae a Ieova mo ana tulaga i mea tau amioga mo nisi mea e uke kolā e fakaasi mai i ei tena loto. I taimi e suke‵suke ei tatou, e ‵tau o masaua ne tatou a nisi mea tāua. Ke masaua ne tatou me e se faimalo tatou  ne Ieova ke faka‵logo ki ana tulafono mo ana akoakoga fakavae; e manako a ia ki te fakalogo telā e māfua mai i te loto o te tino. Ke se puli i a tatou me e fakamolemole mai a Ieova ke ola tatou i se auala telā ka maua ei ne tatou a fakamanuiaga e uke i aso nei kae ka takitaki atu ei tatou ki te ola se-gata-mai i aso mai mua. Kae ke na mafau‵fau tatou ki te ‵tou faka‵logo katoatoa—se avanoaga tafasili i te tāua ke fakaasi atu ki a Ieova a te lasi o te ‵tou a‵lofa ki a ia.

¹⁸ Ke fesoasoani mai ke matea ne tatou a te mea tonu mai te mea ‵se, ko oti ne tuku mai ne Ieova mo te alofa ki a tatou se loto lagona. Kae ke mafai o fakatuagagina te takitakiga o te loto lagona, e ‵tau o akoakogina faka‵lei, e pelā mo te mea ka sau‵tala ki ei i te suā mataupu.