1, 2. Exeeni eniwiirihani omphentaka Yehova Muluku?

NIIREKE munnimphenta Muluku? Nto akhala wira muhiivahererya wa Yehova Muluku, waakhula wanyu wohihoverya onikhala so: aayo; nto eyo etthu yookhalela! Tthiri omphenta Yehova ti etthu eniphavela ahu. Ninnimphenta Muluku nthowa noowi owo ooniphenta. Biibiliya onihimya so: “Hiyo ninnimphenta Muluku, okhala wira Muluku t’opajenrye oniphenta”.​—1 Yohani 4:19.

² Yehova topacenrye oniphenta. Owo oonivaha elapo ela ya vathi yooreera okhala. Onninthokorerya ni onivaha itthu sinitthuneya wira nikhalane ekumi. (Matheyo 5:43-48) Etthu yootthuneya okhala wira owo onninthokorerya mwa enamuna yomunepani. Oonivaha Nuulumo nawe, Biibiliya. Onninlattula-tho wira ninvekeleke nikupaliki wira onimwiiwa ni onivaha munepa awe wootteela wira onikhaliherye. (Esalimo 65:3; Luka 11:13) Etthu enivikana itthu sotheene, oonivaha Mwanawe onimphentexa awe wira okhale Moopoli ahu, wira noopowe mwa yoottheka ni okhwa. Tthiri Yehova onnitepa oniphenta!​—Mmusome Yohani 3:16; aRoma 5:8.

3. (a) Exeeni enitthuneya wira nikhale moophentani mwa Muluku? (b) Nikoho xeeni nuulupale nikhanle ahu oopaka, nto waakhuliwa waya oniphwanyaneya vai?

³ Yehova oniphavela wira nittottele mureerelo ophenta wawe mwa okathi woohimala. Soothanla sinipaka ahu  sinoowerya oniiriha ottottela mureerelo aahiiso ohittottela mureerelo ophenta wa Muluku. Nuulumo na Muluku nintumererya so: “Mukhaleke mophentani mwa Muluku, muroromelaka wira . . . onimovahani ekumi yohimala”. (Yuda 21) Nuulumo noowi “mukhaleke” nnooniherya wira nihaana opaka etthu wira nivikanihe okhala moophentani mwa Muluku. Makhalelo ahu ahaana wooniherya wira ninneemya ophenta wawe. Tivonto, nikoho nuulupale nikhanle ahu oopaka ti nla: ‘Kinrowa wooniherya sai omphenta Muluku?’ Waakhuliwa waya oniphwanyaneya mmasu owuupuxeriwa a murummwa Yohani, ani: “Vano nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”. (1 Yohani 5:3) Nohaana otokosa saana  wira nisuwele enitaphulela aya moolumo ala, maana nimphavela wooniherya otepa wahu omphenta Muluku.

4, 5. (a) Masu oowi ‘omphenta Muluku’ anitaphulela exeeni? (b) Mutthokiherye moota opacenrye aya wunnuwa omphenta wanyu Yehova.

⁴ Murummwa Yohani aaphavela ohimya exeeni ni masu oowi omphenta Muluku? Nuulumo nla khinnitaphulela Muluku oniphenta wawe, masi nintaphulela ophenta onimooniherya ahu. Niireke munniwerya wuupuwela okathi yoole mwaapacenrye anyu omphenta Yehova?

⁵ Muupuweleke okathi yoole mwaapacenrye anyu wiixutta ekeekhai ya Yehova ni soolakela sawe, ni waapacenrye anyu wooniherya waamini. Muhiixutta wira nnaamwi muyariwe ene ntoko mulipa-oottheka oovalaana ni Muluku, Yehova omurumeelaka Kristu oopaka marehereryo wira mphwanye okumi woohittheka, yoowo Adamu yaapweteiwale aya, ni wira mwaakhele okumi woohimala. (Matheyo 20:28; aRoma 5:12, 18) Nave nyuwo mwaahipacerya wiiwexexa saana moota orina aya efaita mukuttho wa yowoopola ovahiwe ni Yehova; nto khomuruma Mwanawe onimphentexa awe wira okhwe mwaha wa nyuwo. Yoovaha eyo yaahivara murima anyu, nto nyuwo mwaahipacerya omphenta Muluku yoowo oonihenrye niphento nuulupale.​—Mmusome 1 Yohani 4:9, 10.

6. Ophenta wekeekhai onooniheriwa sai, nave omphenta wanyu Muluku wotumerenryeni opaka exeeni?

⁶ Masi itthu iyo sotheene waari opacerya paahi omphenta Yehova wekeekhai. Ophenta khahiyo etthu enuupuwela ahu vamurimani paahi. Omphenta Muluku wekeekhai onihela muhina itthu sinci, khahiyo ohimya paahi wira: “Miyo kinnimphenta Yehova”. Ntoko siniiraneya aya ni waamini, ophenta wekeekhai onooneya ni miteko. (Yakobo 2:26) Hiyo ninnooniherya ophenta wahu, okathi onipaka ahu itthu sinimuhakalaliha ole onimphenta ahu. Tivonto, okathi waalimpe aya omphenta wanyu Yehova vamurimani, nyuwo  mwaahiphavela okhalana mweettelo onimuhakalaliha Tiithi anyu a wiirimu. Niireke nyuwo mwa Namoona oobatiziwa? Akhala wira ti siiso, omphenta wanyu Yehova ni ovikaniha okhala oororomeleya, wowiirihani opaka yoothanla yafaita mookumi mwanyu. Nyuwo muhiivahererya wa Yehova wira mpakeke otthuna wawe, ni muhooniherya wiivahererya iwo okathi waabatiziwa anyu. (Mmusome aRoma 14:7, 8.) Wira mukhale moovarihana ni wiivahererya wanyu wa Yehova, muhaana weettela masu anittharelana yaahimmwale ni murummwa Yohani.

7. Sooruma xeeni sikina sa Muluku sihimmwale ettima ela, nto onitaphulela exeeni weettela sooruma iyo?

⁷ Yohani onnitthokiherya yootaphulela ya omphenta Muluku, oriki: “Nnimphenta nettelaka soruma sawe”. Sooruma sa Muluku ti sivi? Orweela wa Biibiliya Yehova oonivaha malamulo anihimya itthu sooluluwanya wa ele eniphavela awe wala ehimphavela awe. Mwa ntakiheryo, owo onnikhoottiha ohapaliwa, oraruwa, waakokhorela amuluku eethiru, wiiya, ni wootha. (1 aKorinto 5:11; 6:18; 10:14; aÉfeso 4:28; aKolosi 3:9) Weettela sooruma sa Muluku onihela muhina okhala moovarihana ni malamulo oowiiwanyeya a Biibiliya voohimya sa mweettelo wooloka.

8, 9. Ninrowa osuwela sai ele enimuhakalaliha Yehova, hata nihirina nlamulo na Biibiliya ninlavula mooluluwanya muxankiho owo? Nvahe ntakiheryo.

⁸ Masi, wira nimuhakalalihe Yehova hiyo nihaana opaka etthu ekina, ohiya wiiwelela malamulo awe paahi anihimya itthu mooluluwanya. Yehova khonivanhe malamulo voohimya sa etthu pi itthu ya okumi ahu. Tivonto, khuta nihiku vanniweryaneya hiyo okumana mixankiho sihiromoliwe mBiibiliyani mooluluwanya. Nto vaavo vanikumana ahu mixankiho iyo, ninrowa osuwela sai ele ekhanle ahu oopaka wira nimuhakalalihe Yehova? Biibiliya onnooniherya oratteene muupuwelo wa Muluku. Okathi onimusoma ahu Biibiliya,  hiyo nnoowerya osuwela ele Yehova oniphenta awe ni ele eninyokha awe. (Musome Esalimo 97:10; Miruku 6:16-19) Orweela wa Biibiliya hiyo nnoowerya osuwela muupuwelo ni sowiira sinimusivela. Vaavo vanitepa ahu wiixutta sa makhalelo a Yehova, ninrowa otepaka weemya wira otthuna wawe weettiheke soothanla sahu ni sowiira sahu. Tivonto, okathi onikumana ahu mixankiho sihiromoliwe mooluluwanya mBiibiliyani, okathi ti okathi nnooweryaka woona etthu enimuhakalaliha Muluku.​—aÉfeso 5:17.

⁹ Mwa ntakiheryo, Biibiliya khorina nlamulo nooluluwanya ninkhoottiha oweha ifilme ni iprograma sa televisau sinooniherya owali wootepexa wala atthu anrupihana. Masi niireke ninlipelela oleeliwa khuta etthu ehinreerela woona? Hiyo ninnisuwela moonelo wa Yehova mmyaha iyo. Nuulumo nawe moowiiwanyeya ninhimya so: ‘Yehova . . . onniphweliwa ni alipa-òwali’. (Esalimo 11:5) Biibiliya onnihimya-tho wira: “Muluku onimwaphuka anamuttompe n’anamararuwa”. (aHéberi 13:4) Wuupuwelela moolumo awo oowuupuxeriwa, onooniiriha wiiwexexa saana ele eri yootthuna ya Yehova. Nto eyo enooniiriha ohiphavelaka oweha etthu ti etthu enooniherya makhalelo ahinimusivela Muluku. Ninnisuwela wira Yehova onnihakalala vaavo vanisyaka ahu mweettelo woohiloka, yoowo olumwenku ola oneererya aya waakupaliha atthu wira khahiyo etthu yootthekeya. *

10, 11. Exeeni enniiriha omwiiwelela Yehova, nto omwiiwelela wahu okhaleke sai?

¹⁰ Nthowa xeeni nuulupale ninniiriha wiiwelela sooruma sa Muluku? Xeeni vanimananiha ahu khuta nihiku okhala moovarihana ni ele enimuhakalaliha Muluku? Khannipaka eyo mwaha wowoova ehukhumu paahi aahiiso ophavela osyaka sookhumelela sootakhala, sinaakhumelela ale ahinicalela sooruma sa Muluku. (aGalasia 6:7) Ohiya-vo, hiyo ninnoona omwiiwelela wahu Yehova, okhala eparakha ahu yuulupale  ya wooniherya omphenta wahu yena. Ntoko siisaale mwaana oniphavela awe vanceene omuhakalaliha tiithi awe, nave-tho hiyo niphaveleke omuhakalaliha Yehova. (Esalimo 5:13) Yehova tori Tiithi ahu, nto hiyo ninnimphenta. Khiivo etthu ekina ennihakalaliha vanceene ovikana osuwela wira mweettelo ahu onnimuhakalaliha Yehova.​—Miruku 12:2.

¹¹ Tivonto, wiiwelela wahu khahiyo etthu yookhanyereriwa; ni khannithanla ele ennisivela wiiwelela, aahiiso khanniiwelela mwaha woolaiheriwa etthu paahi. * Khannithanla sooruma sinnisivela weettela, wala khanneettela okathi yoole onoona ahu oreerela paahi. Hiyo ‘ninniwelela ni murim’ahu wothene’. (aRoma 6:17) Nrina muupuwelo wa nasaalimo, yoowo aalempe wira: “Kinnisiveliwa n’ikano sanyu, kinniphenta seiyo vanjene”. (Esalimo 119:47) Tthiri, hiyo ninniphavela omwiiwelela Yehova. Ninnisuwela wira owo onniphwanela ni oniveka wira nimwiiweleleke ni murima ahu wotheene. (Otumererya 12:32) Hiyo nimphavela wira Yehova onooneke ntoko siisaale Biibiliya sinimuhimya awe Nowe. Voohimya sa muhavinre owo oororomeleya, yoowo amphentale Muluku omwiiwelelaka mwa iyaakha sinceene, Biibiliya onihimya so: ‘Nowé ahìra sothene sarummwawe ni Muluku’.​—Maphattuwelo 6:22.

12. Enamuna xeeni ya wiiwelela wahu enimuhakalaliha Yehova?

¹² Yehova onoonela sai omwiiwelela wahu ni murima wotheene? Nuulumo nawe ninhimya wira omwiiwelela wahu wa enamuna eyo onnimwiiriha ‘otteliwa murima’. (Miruku 27:11) Niireke tthiri wiiwelela wahu onnimuhakalaliha Pwiya Muulupale a olumwenku wotheene? Aayo, tthiri onnitteeliwa murima, mwaha wa mathowa ookhalela! Yehova onipattunxe wira nipakeke soothanla mootaphuwa. Eyo enitaphulela  wira hiyo ti ninthanla mekhihuru omwiiwelela aahiiso ohimwiiwelela Muluku. (Otumererya 30:15, 16, 19, 20) Nnomuhakalaliha Tiithi ahu a wiirimu, akhala wira ninthanla omwiiwelela Yehova ni murima wotheene, ni opaka eyo mwaha wa omphenta wahu wuulupale. (Miruku 11:20) Okathi onipaka ahu eyo, hiyo ninthanla mweettelo woolokexa mokumini.

13, 14. Xeeni ohimmwaka wira “soruma sa Muluku khasinnirikela wettela”, nto eyo enilikana ni xeeni?

¹³ Murummwa Yohani onninleela etthu yoolipiha murima voohimya sa sooruma sa Yehova, oriki: “Soruma sa Muluku khasinnirikela wettela”. Nuulumo na egriki nitaphuleliwe ‘orika’ va 1 Yohani 5:3, nintaphulela “olemela”. * Biibiliya mukina onihimya so: ‘Malamulo awe khanilemela’. (Biblya Exirima) Itthu sinnivekela awe Yehova, khahiyo soorika weettela aahiiso soohaaxa. Malamulo awe khahiyo etthu apinaatamu oottheka ahinwerya aya weettela.

¹⁴ Hiyo pooti otakiherya so. Niire mpatthani onimphentexa anyu onoovekelani omukhaliherya othaamela opuro okina. Sookhala ikaaxa sinceene sintthuneya olovoliwa. Sikina ti sooveya ni pooti oteexiwa ni mutthu mmosa, masi sikina ti soolemela ni sohaana oteexiwa atthu anli. Mpatthani anyu onnithanla ikaaxa oniphavela awe wira muteexe. Niireke aamoovekelani oteexa ikaaxa osuwenle awe wira ti soolemelexa ni khamunwerya oteexa mekhinyu? Nnaari. Owo khaarowa ophavela wira nyuwo mphwanye masooso okathi woteexa ikaaxa iyo mekhinyu. Vamosaru, Muluku ahu oophenta ni ooreera murima, khonniruma weettela malamulo ootepexa  ovilexa. (Otumererya 30:11-14) Owo khonkhala-khala onivekelaka oteexa muritti woolemelexa. Yehova onnisuwela itthu sihiniwerya ahu, okhala wira owo ‘onnisuwela orattene mùpeliwo ahu, onnisuwela wira hiyo ná ntthupi pahi’.​—Esalimo 103:14.

15. Xeeni vanitthuneya ahu ororomelaka wira sooruma sa Yehova sinniruuhela mureerelo ahu?

¹⁵ Okhala wene sooruma sa Yehova khasinrika weettela; maana sinniniphwanyiha mureerelo. (Mmusome Yesaya 48:17.) Tivonto Moise anwerya waaleela anaIsarayeli a khalai, oriki: ‘Yehova oniruma wira netteleke ikano iya, nattittimihe n’uwova Apwiya Muluku ahu. Nìra siso, nnophwanya oreriwa mahiku othene; vano Apwiya anosuka ekumi ahu, ntoko sìralyaya mpakha olelo va’. (Otumererya 6:24) Nto hiyo nihaana ororomelaka wira Yehova onninivaha malamulo awo, mwaha woophavela mureerelo ahu wa okathi munceene, eyo piiyo, okumi woohimala. Tthiri Yehova khaarowa oniruma opaka etthu yaarowa onihaaxa! Yehova ti Muluku a miruku sihinimala. (aRoma 11:33) Owo onnisuwela etthu eri yoolokexa wa hiyo. Nave-tho, ophenta onnitepa wooneya mmikhalelo sotheene sa Yehova. (1 Yohani 4:8) Tthiri ophenta toneettiha khuta etthu enihimya awe ni enipaka awe. Sooruma sotheene onaavaha awe arumeyi awe, onaavaha moophenta.

16. Nnaamwi sikhanleene mikhalelo soohiloka sa elapo ela yootakhala ni nryeene atthu oottheka, xeeni vanitthuneya ahu omwiiwelela Muluku?

¹⁶ Ela khentaphulela wira omwiiwelela Muluku etthu yookhweya. Hiyo nihaana okhoottela mweettelo wa olumwenku ola woohiloka, yoowo ‘oniweriwa ni mutakhali’. (1 Yohani 5:19) Nave-tho nihaana owanana soophavela soohiloka sa erutthu ahu, seiyo sinnitumererya ovonyola malamulo a Muluku. (aRoma 7:21-25) Masi omphenta Muluku onooniiriha oxintta soweeha iyo. Yehova onnaareeliha ale aniphavela wooniherya omphenta waya orweela mwa omwiiwelela. Onnaavaha munepa awe wootteela “ale animwiwelela” ntoko namalamulela aya. (Miteko 5:32) Munepa owo onnikumiherya  sowiima sooloka, eyo piiyo, mikhalelo sooreera sinnikhaliherya otthara mweettelo wowiiwelela.​—aGalasia 5:22, 23.

17, 18. (a) Exeeni enrowa ahu othokorerya muliivuruni-mu, nto vaavo vanipaka ahu eyo, exeeni enitthuneya ahu wuupuwelaka? (b) Mwaha xeeni onrowa othokoreriwa muru onittharelana?

¹⁷ Muliivuruni-mu, hiyo ninrowa othokorerya malamulo a Yehova, mweettelo wooloka ni inamuna sikina sa yoolakela awe. Vaavo vanithokorerya ahu malamulo awo, nihaana wuupuwelelaka itthu sinceene sootthuneya. Nuupuweleke wira Yehova khonnikhanyererya wiiwelela malamulo awe ni malakiheryo; owo oniphavela wira nooniheryeke wiiwelela woohikhanyereriwa onikhuma vamurimani. Nihiliyaleke wira Yehova onninivekela wira nitthareke mweettelo onrowa oniphwanyiha mireerelo sinceene vano, ni okumi woohimala muhoolo. Nooneke wiiwelela wahu ni murima wotheene okhala eparakha ya omooniherya Yehova moota onimphenta ahu vanceene.

¹⁸ Ophavelaka onikhaliherya wira nisuwele ele eri yooloka ni yoohiloka, moophenta Yehova oonivaha yowuupuxerya ya murima. Masi wira yowuupuxerya ya murima ahu ekhale yoororomeleya, eyo ehaana wiixuttihiwa, ntoko sinrowa ahu othokorerya muru onittharelana.