TOKO 1
?“Dikany Tia Zan̈ahary zen̈y”
“Dikany tia Zan̈ahary zen̈y, mitandrin̈y didinany, fa didinany fo tsy mavesatra.”—1 JAONA 5:3.
1, 2. Ino mahavy anao tia Zan̈ahary Jehovah?
ANAO ma tia Jehovah ankitin̈y? Anao koa fa nanokanten̈a taminany, hay tsarabe fa anao hamaly karaha ty: ‘Ia, tiako Jehovah!’ Rariny zen̈y! Izikoa dinihin̈y, valiny fitiavany Zan̈ahary atsika fitiavantsika izy io. Baiboly mivolan̈a karaha ty: “Atsika tia, fotony [Jehovah] tia atsika voanalohany.”—1 Jaona 4:19.
2 Jehovah nan̈ano raha voanalohany han̈aboahany fitiavany atsika. Amiany atsika tany ty hipitrahantsika. Karakarainy koa zay raha ilaintsika. (Matio 5:43-48) Tsy vitanizen̈y fo fa namiany atsika koa Baiboly, baka atsika hifandray aminany tsarabe. Jehovah mikaiky atsika hivavaka aminany, baka io amiany toky atsika fa izy han̈amia fan̈ahy masin̈y han̈ampy atsika. (Salamo 65:2; Lioka 11:13) Izy nan̈iraka Zanany ten̈a tiany hankafaka atsika amy fahotan̈a ndreky fahafatesan̈a. Be ankitin̈y fitiavany Jehovah atsika!—Vakia Jaona 3:16; Romanina 5:8.
3. a) Izikoa tsy tiantsika hiala amy fitiavany Zan̈ahary, ino raha tsy maintsy ataontsika? b) Ino fan̈ontanian̈a maventy mila iritriretintsika, baka io aia ahitantsika valinizio?
3 Tiany Jehovah hahazo hatsaran̈a mandrakizay atsika, fotony izy tia atsika. Kanefa, miankin̈y amy raha ataontsika fo hazahoantsika raha zen̈y. Mandrisiky atsika karaha ty Volan̈a Zan̈ahary: ‘Aza miala amy fitiavany Zan̈ahary, sady mitsinjo fiain̈ana mandrakizay.’ (Joda 21) Dikany “aza miala” zen̈y man̈ano raha baka tsy hiala amy fitiavany Zan̈ahary. Ino raha tsy maintsy ataontsika? Ty raha tsara iritriretintsika: ‘Akory ma han̈aboahako fitiavako Zan̈ahary zen̈y?’ Karaha ty namaliany apostoly Jaona fan̈ontanian̈a io: “Dikany tia Zan̈ahary zen̈y, mitandrin̈y didinany, fa didinany fo tsy mavesatra.” (1 Jaona 5:3) Mila haintsika tsarabe dikany volan̈a aby zen̈y, izikoa tiantsika ho hita fa atsika tia Zan̈ahary ankitin̈y.
“DIKANY TIA ZAN̈AHARY ZEN̈Y”
4, 5. Ombian̈a ma fitiavan̈a Zan̈ahary io nanomboko nitsiry tan̈aty fonao tao? Tantarà.
4 ‘Fitiavan̈a Zan̈ahary’ raha tiany apostoly Jaona koran̈iny io. Asa azonao onon̈o ombian̈a fitiavan̈a Zan̈ahary io nanomboko nitsiry tan̈aty fonao tao?
Anao koa fa nanokanten̈a ndreky natao batisa, anao han̈araka volan̈a Jehovah fo nohony fitiavanao izy
5 Mety taminy anao nianatra voanalohany ny marin̈y momba Jehovah ndreky fikasan̈anany anao nanomboko nino izy. Nanjary hainao fa Jehovah nan̈iraka Jesosy tambony tany teto, baka atsika ho velon̈o tsisy farany. Atsika ndray taranaka panota ndreky tsy nifandray tamy Zan̈ahary, atsika mbala hanjary lavorary fo, karaha Adama talohany izy nandika didiny Zan̈ahary in̈y. (Matio 20:28; Romanina 5:12, 18) Nanjary nankasitraka soron̈o maventy nataony Jehovah zen̈y anao, fotony hainao fa izy ten̈a tia anao. Tafiditry tan̈aty fonao raha zen̈y, ke nanjary tia Zan̈ahary anao.—Vakia 1 Jaona 4:9, 10.
6. Akory ma ahitan̈a ten̈a fitiavan̈a zen̈y? Ino aby raha tsy maintsy nataonao nohony fitiavanao Zan̈ahary?
6 Mbala vo fanombohany fitiavan̈a Jehovah fo zen̈y. Tsy ampy mivolan̈a fa “tia Jehovah” zen̈y, fotony fitiavan̈a zen̈y tsy raha amy vava fo. Ten̈a fitiavan̈a zen̈y tokony ho hita amy raha atao, tsisy ny hafa amy finoan̈a fo. (Jakoba 2:26) Izikoa olo araiky misy olo tian̈a, izy tsy maintsy han̈ano raha mamparavoravo olo tiany io. Karaha zen̈y koa, anao koa tia Jehovah, Babanao andan̈itry an̈y io, anao han̈ano raha mamparavoravo izy fo. Vavolombelon̈o Jehovah vita batisa ma anao? Misy fanapahankevitry maventy tsy maintsy nataonao nohony fitiavanao izy zen̈y. Nanokanten̈a tamy Jehovah ndreky natao batisa anao, fotony anao man̈iry tsy hivadiky aminany ndreky han̈ano sitraponany. (Vakia Romanina 14:7, 8.) Ino raha nikoran̈iny apostoly Jaona fa han̈ampy atsika han̈efa voady nataontsika io?
“MITANDRIN̈Y DIDINANY”
7. Ino aby ma sasany amy didiny Zan̈ahary? Karakory ma mitandrin̈y didiny Zan̈ahary zen̈y?
7 Apostoly Jaona nivolan̈a fa izikoa atsika tia Zan̈ahary ankitin̈y, atsika “mitandrin̈y didinany.” Mazava didiny Zan̈ahary amy Baiboly ao. Halany Jehovah man̈ano mamo, mijangajanga, manompo sampy, mangalatra, baka io mavandy. (1 Korintianina 5:11; 6:18; 10:14; Efesianina 4:28; Kolosianina 3:9) Mitandrin̈y didiny Zan̈ahary zen̈y atsika, izikoa man̈ano raha mifan̈araka amy fitsipikinany momba fitondranten̈a voasoratra amy Baiboly ao.
8, 9. Akory ahaizantsika raha mamparavoravo Jehovah, koa fa tsisy lalàn̈a mazava momba zen̈y amy Baiboly ao? Man̈ameza ohatra.
8 Izikoa tiantsika han̈ano raha mamparavoravo Jehovah, tsy ampy man̈araka didinany. Jehovah tsy nan̈amia lalàn̈a maro momba fiain̈anantsika andavanandra, fotony tsy tiany hanahiran̈a atsika. Ke tsy voatery raha jiaby mandalo amy fiain̈anantsika ho hitantsika amy Baiboly ao aby. Akory fo basy ahaizantsika raha mamparavoravo Jehovah? Amy Baiboly ao ahitantsika hevitry Jehovah. Izikoa atsika mianatra Baiboly, ho haintsika fo raha tiany Jehovah ndreky raha tsy tiany. (Vakia Salamo 97:10; Ohabolana 6:16-19) Arakaraka ny ahaizantsika toetriny Jehovah ndreky fomba fisain̈any ahaizantsika hanapakevitry ndreky han̈ano raha mifan̈araka amy sitraponany. Hitantsika baka amy zen̈y fa ndray tsisy didiny Zan̈ahary mazava momba raha mahazo atsika amy Baiboly ao, ho haintsika fo raha mifan̈araka amy “sitrapony Jehovah.”—Efesianina 5:17.
9 Ohatra, amy Baiboly ao tsisy lalàn̈a mandrova atsika hizaha na tsy hizaha filma na soma feno olo kafiry ndreky maloto fitondranten̈a. Ke izio ma atsika tsy maintsy mila lalàn̈a mivantan̈a fo? Tsy voatery. Mazava raha volan̈iny Baiboly: ‘Ten̈a halany [Jehovah] olo kafiry.’ (Salamo 11:5) Karaha ty koa volan̈iny: “Hisaziny Zan̈ahary lan̈iany olo pijangajanga ndreky pandiadia vady.” (Hebreo 13:4) Izikoa atsika fa mieritreritry volan̈a jiaby zen̈y, haintsika fo ino sitrapony Jehovah. Atsika tsy tokony hizaha filma na han̈ano soma misy raha halany Jehovah, izikoa fa mangala diandian̈a. Tsy mampan̈ino olo amy donia ty man̈ano zen̈y. Izikoa ndraiky atsika tsy man̈ano raha karaha zen̈y, ho ravoravo mare Jehovah. *
10, 11. Nan̈ino ma atsika mifidy han̈araka volan̈a Jehovah? Akory fomba han̈anovantsika zen̈y?
10 Ino ma ten̈a antony maventy mahavy atsika mitandrin̈y didiny Zan̈ahary? Nan̈ino atsika man̈iry han̈araka fomba fisain̈any Jehovah fo? Tsy raha favozoan̈a sazy na favozoan̈a raha ratsy baka tamy raha tsy nety natao fo mahavy atsika man̈araka didinany, fa man̈ano zen̈y atsika fotony zen̈y fomba ten̈a tsara an̈aboahantsika fitiavantsika izy. (Galatianina 6:7) Karaha ataony tsaiky araiky man̈iry hahazo rady baka amy raimandreniny in̈y, atsika koa man̈iry hahazo hatsaran̈a baka amy Jehovah. (Salamo 5:12) Ten̈a tiantsika Jehovah Babantsika andan̈itry an̈y io. Tsisy raha maharavoravo ndreky mahafapo mandilatra mahay fa ‘mamparavoravo Zan̈ahary’ fomba fiain̈anantsika.—Ohabolana 12:2.
11 Atsika koa fa man̈araka volan̈a Jehovah tsy raha man̈ekin̈eky fo na tiren̈y, fa amy fo jiaby. * Atsika tokony han̈araka didiny Jehovah jiaby fa tsy lan̈iany tiatiantsika na tsy manahiran̈a atsika fo arehantsika. Tokony ‘amy fo jiaby han̈arahantsika’ didiny Jehovah. (Romanina 6:17) Karaha ty nivolan̈iny panoratra salamo: ‘Zaho tsy hiala amy didinao, fotony efa rango ela nitiavako izio.’ (Salamo 119:47) Tsisy ny hafa amy zen̈y koa atsika, fotony ten̈a tiantsika han̈araka volan̈a Jehovah. Izy tsy vitany mendriky arehan̈a volan̈a, fa zen̈y koa raha irahiny ataontsika. (Deoteronomia 12:32) Tan̈atiny taon̈o maro Noa nan̈araka Volan̈a Jehovah fo, sady tsy nivadiky taminany, fotony izy tia Jehovah. Karaha ty raha nivolan̈iny Jehovah momba Noa: “Nataony Noa lan̈iany raha nan̈irahany Jehovah izy. Zen̈y ankitin̈y raha nataony.” Tsy mba tianao izikoa Jehovah mba mivolan̈a raha karaha zen̈y momba anao?—Genesisy 6:22.
12. Ino ma raha ten̈a mamparavoravo fony Jehovah?
12 Han̈ano akory eky Jehovah izikoa atsika man̈araka volan̈anany amy fo jiaby? Baiboly mivolan̈a fa ‘ravoravo fony Jehovah’ izikoa atsika man̈ano zen̈y. (Ohabolana 27:11) Rariny Jehovah, Tompontsika Farany An̈abo io, izikoa izy ravoravo. Fotony nan̈ino? Ambelany Jehovah han̈ano zay raha tiantsika hatao atsika, ndreky hifidy han̈araka na tsy han̈araka volan̈anany. (Deoteronomia 30:15, 16, 19, 20) Izikoa baka amy fitiavantsika Jehovah mahavy atsika mifidy hanompo izy, ho ravoravo mare Babantsika andan̈itry an̈y io. (Ohabolana 11:20) Tsisy fomba fiain̈ana tsara mandilatra zen̈y!
‘DIDINANY TSY MAVESATRA’
13, 14. Ino ivolan̈ana fa ‘didiny Zan̈ahary tsy mavesatra’? Man̈ameza ohatra.
13 Misy raha ten̈a mankahery nivolan̈iny apostoly Jaona. Karaha ty nambarany: ‘Didinany tsy mavesatra.’ * (1 Jaona 5:3) Karaha ty nandikan̈a andininy io amy Baiboly Fandikanteny Angiley Vaovao: “Didinany tsy mampijaly atsika.” Tsy natao hampijaly atsika foeky lalàn̈any Jehovah. Izy tsy mitaky raha tsy ho vitanolombelon̈o tsy lavorary.
14 Ohatra izio misy namanao araiky hifindra tran̈o, ke nangataka fan̈ampian̈a taminao. Maro entan̈a mila taterin̈y. Entan̈a sasany mahivan̈a, ke olo araiky fo efa mahatondra izy. Entan̈a sasany ndraiky mavesatra, ke mila olo aroe vo mahatondra izy. Ke izikoa misy entan̈a efa hainy fa tsy ho tondranao, mbala hirahiny hibatainao fo? Izy tsy mety han̈ano zen̈y. Anao tsy hambelany hibata zen̈y manokan̈a, tsao misy raha havoa anao. Karaha zen̈y koa Jehovah. Izy tsy mety han̈iraka atsika han̈araka didinany, izikoa fa hainy fa tsy ho vitantsika raha zen̈y, fotony izy tsy vitany tsara fan̈ahy fo fa izy koa tia atsika. (Deoteronomia 30:11-14) Izy tsy mety han̈iraka atsika hitondra entan̈a tsy tondrantsika. Hainy fo raha mety ho vitantsika ndreky tsy ho vitantsika, fotony “hainy tsarabe raha niasany atsika, ke tsaroany fa atsika io fotaka.”—Salamo 103:14.
15. Nan̈ino ma atsika matoky fa mahatsara atsika didiny Jehovah aby io?
15 Didiny Jehovah tsy mavesatra fa natao hampatsara ndreky hampasambatra atsika fo. (Vakia Isaia 48:17.) Volan̈iny Mosesy tamindro Israelita aby io: “Jehovah nivolan̈a fa atsika tsy maintsy man̈araka fitsipikinany jiaby ndreky matahotro Zan̈aharintsika Jehovah, baka atsika hahazo hatsaran̈a fo, ke ho velon̈o atsika karaha aminandra izio io.” (Deoteronomia 6:24) Ty raha atokisantsika: Jehovah koa fa man̈amia lalàn̈a, raha nataony hampatsara atsika fo zen̈y. Tiany atsika hahazo hatsaran̈a rango izioty ndreky mandrakizay. Atsika tsy mety hanen̈iny izikoa man̈araka didinany! Tsisy olo manan̈a fahendrena mandilatra Jehovah, ke hainy fo raha mahatsara atsika. (Romanina 11:33) Jehovah io koa fitiavan̈a. (1 Jaona 4:8) Zay raha volan̈iny na ataony, baka amy fitiavan̈a io fo an̈anovany zen̈y. Baka amy fitiavany olonany fo nahavy izy nan̈amia didinany jiaby io.
16. Ndray atsika tsy lavorary ndreky miain̈y amy donia ratsy ty, nan̈ino atsika matoky fa ho vitantsika fo han̈araka volan̈a Jehovah?
16 Zen̈y tsy mivolan̈a fa mora man̈araka volan̈a Zan̈ahary. Atsika tsy maintsy miady mare baka tsy ho voantsoriny donia maloto fitondranten̈a ndreky ‘ambany fahifan̈any araiky ratsy [Satana]’ ty. (1 Jaona 5:19) Atsika koa tsy lavorary, ke mila miady mare koa atsika baka tsy ho voatariky handika lalàn̈any Zan̈ahary. (Romanina 7:21-25) Ndray izy man̈ano zen̈y, ho vitantsika fo handresy izikoa atsika tia Jehovah ankitin̈y. Izikoa baka amy fitiavantsika Jehovah an̈arahantsika volan̈anany, izy ten̈a hitahy atsika. Amiany Jehovah fan̈ahy masin̈y lan̈iany olo ‘man̈araka volan̈anany amy maha pitondra izy.’ (Asan’ny Apostoly 5:32) Fan̈ahy masin̈y io hahavy atsika hanan̈a toetry tsara han̈ampy atsika han̈araka volan̈a Jehovah fo.—Galatianina 5:22, 23.
17, 18. a) Ino raha ho hitantsika amy boky ty, baka io ino raha tsy tokony hadin̈antsika koa fa mandiniky zen̈y? b) Ino raha hidinihintsika amy toko fan̈araka ty?
17 Ho hitantsika amy boky ty toro lalan̈a ndreky fitsipiky Jehovah momba fitondranten̈a, baka io fomba maro hahaizantsika sitraponany. Atsika koa fa mandiniky raha jiaby zen̈y, misy raha maventy maromaro tsy tokony hadin̈antsika. Tokony halentsika onon̈o fo fa Jehovah tsy manery atsika han̈araka toro lalan̈a ndreky fitsipikinany. Kanefa izikoa atsika man̈araka volan̈anany amy fo jiaby, atsika hahazo hatsaran̈a rango izioty ndreky fiain̈ana mandrakizay aminy amaray an̈y. Zen̈y fiain̈ana tiany Jehovah hamian̈a atsika. Tsarova fa zen̈y zaraiky fo fomba ten̈a tsara an̈aboahantsika fitiavantsika Jehovah.
18 Jehovah ten̈a tia atsika, ke zen̈y nahavy izy nan̈amia raha han̈ampy atsika hahay han̈avaka ny tsara ndreky ratsy. Ino izio? Zen̈y raha hidinihintsika amy toko fan̈araka ty.
^ feh. 9 Ho hitanao amy Toko faha-6 amy boky ty fomba hifidianan̈a fangalan̈a diandian̈a mety tsarabe.
^ feh. 11 Ndray iro demony aby io mba nan̈eky fa tsy tamy fo. Jesosy koa fa nan̈iraka iro niboaka taminolo, iro voatery nan̈eky fahifan̈anany, ndray tsy tan̈aty fondro raha zen̈y.—Marka 1:27; 5:7-13.
^ feh. 13 “Entan̈a mavesatra” nandikany Matio volan̈a griky nampiasainy apostoly Jaona io. (Matio 23:4) Tsy ino “entan̈a mavesatra” io fa lalàn̈a feno tsipiriany ndreky fombandrazan̈a marobe nirahindro panoratra lalàn̈a ndreky Fariseo aby io tandremany vahoaka.
