1, 2. Ginipai nafõ ngbaduro yo tipa mo kpinyemu Yekova Mbori?

YA MO mo nakpinyemu Mbori? Ka si du nga mo aima kpara ga raka fu Yekova, gamo karagapai kuti gu sanahe re nga ii. Na si nga bawenepai! Kpinyemu Yekova nga gupai du kina rogo rani yo. Ani nakpinyemu Mbori nzunzu mbiko gupai nga ko ima kpinyemu rani. Ziazia Kekeapai naya: “Nyemuse ti rani, bambiko ko [Yekova] nyemurani adu ti ko mbata.”​—1 Yoane 4:19.

² Yekova du nakpinyemu rani mbata. Ko afu bawene kpotosende furani ni kpurani. Ko nafu agu ahe furani du ani na zingoho. (Matayo 5:43-​48) Gu nyakipaha gbe nga, ko nangerafuo rani rogo toro yo. Ko afu Fugoko furani nga Ziazia Kekeapai. Kurigure, ko nagumba gupai furani nga ani mangi kparakpee fuko, na ko nakido rani nga ko nika giaha agia na ki fu gako ziazia toro furani tipa si undo rani. (Atambuahe 65:2; Ruka 11:13) Gu kii gbe nga, ko akedi gu Wiriko ko akpinyemuko gbe tipa ko ye ka kpi ni motumo tumorii tipa ka batasa rani be kpio gbiati ingapai. Nairiwo gu nyemuse Yekova nayuguhe furani re!​—Mo gedi Yoane 3:16; ARomo 5:8.

3. (a) Ginipai si aidaha berani tipa ani nye rogo ga Mbori nyemuse yo? (b) Gini nyanyakipa sanahe si aida ani sana tirani na ni, na wari rengbe ani ka gbia karagapai ni?

³ Yekova naida gupai nga ani gbia undo be gako nyemuse nyeanye kindi. Ono singia ani agbia gu undo re watadu ani agbianga ha te, gaani siapai du. Fugo Mbori nagumba gupai  furani nga: “Oni bánda tironi rogo ga Mbori nyemuse yo . . . sa nyenye unga.” (Yuda 21) Gu fugo nga “oni bánda tironi” nayugo gupai nga si naida ani mangipai amanga tipa ka nye rogo ga Mbori nyemuse yo. Si naida ani yugu gaani nyemuse fu Mbori rogo mangapai yo. Gu nyanyakipa sanahe si aida ani sana tirani na ni nga, ‘Wai rengbe mi ka yugo gi nyemuse tipa Mbori?’ Karagapai kutini gu du rogo gu fugo Ziazia Kekeapai gu mokedi nangia Yoane akehe ki ya: “Bambiko gi nga du na nyemu Mbori re, nga ka ani kuti gako rugute. Gako rugute asusa nga omerani te.” (1 Yoane 5:3) Si naida gupai nga ani wisigi agi afugo re wenengai ka rugatirani na rogo yo, bambiko ani naida ka yugo wai fu Mbori ani nakpinyemuko na kpotorani yo dunduko.

4, 5. (a) Ginipai naadu berã gu mokedi yo nangia Yoane ho ko agumba gupai ni nga “gi nga du na nyemu mbori re”? (b) Mo sakingopai tipa wai nyemu Yekova atona ka sona ngbaduro yo.

⁴ Ginipai naadu berã gu mokedi yo nangia Yoane ho ko agumba gupai ni nga “gi nga du na nyemu mbori re”? Ko aafura tipa gu dudunguro nyemuse du ani na ni tipa Yekova wa du ani ni basasa dunduko. Ya mo mo natingida gu regbo nyemuse atona ka sona ngbaduro yo tipa Yekova?

⁵ Mo berẽnga tooni kusayo ti gu bambata regbo mo awiriki rengo tipa Yekova gbiati gako ringbisapai na ki tona kadu na idapase kutiko. Mo arugu tiro na gupai nga wa vura duhe nga i avungu ro ni kpakpa boro ka mo adunga na bakure na Yekova ya, ko aza gene foro vurube Kristo tipa mo rengbe kada ni rengberengbe boro berewe na ki gbia gu nyenye unga Adamu azangaha. (Matayo 20:28; ARomo 5:12, 18) Mo atona ka ruga tiro na bakio gupai Yekova amangihe nga ka keda gu Wiriko ko akpinyemuko gbe ko ye ka kpi tipa ro. Gipai re afõ ngbaduro yo na mo ki tona ka kpinyemu Mbori tipa gu bakere nyemuse ko ayuguhe foro re.​—Mo gedi 1 Yoane 4:9, 10.

6. Wai du boro ayugo ndikidi nyemuse, na nyemuse tipa Mbori asa ro mo mangi wai?

⁶ Gu nyemuse mo adu na ni ti gu regbo re angia tonatona ndikidi nyemuse tipa Yekova. Anga nyemuse nga gupai i apehe gbua kina ngbayo te. Ndikidi nyemuse tipa Yekova nga ka ya gbua, “Mi ima kpinyemu Yekova” te. Wakina idapase, ani nayugo ndikidi nyemuse rogo mangimangipai yo. (Yakoba 2:26) Gu nyanyakipa gene ani ayugo gupai ngbaha nga ani ima kpinyemu Yekova nga kaa manga agu apai ngba tiko. Sidu, ho tarã rengo azi baha ni ngbaduro yo, si afõ ro tipa mo niraki ngba gu gene nasa ngbarago ti gu bamo du ngbangbaturũ yo. Ya mo mo zi bapatiza? Ka si du nga mo aima zioho, gi dudunguro nyemuse tipa Yekova re du nasa ro tipa mo mangi gu nyanyakipa diaberã re  rogo gamo raka yo. Mo akpara tiro fu Yekova tipa ka manga gupai ko akpinyemuhe, na mo ayugu ga kparatise fuko ni zio mo bapatiza. (Mo gedi ARomo 14:7, 8.) Mangapai kuti gu mokido mo amangihe fu Yekova re nakoda gupai gu mokedi nangia Yoane agumbaha fuo gere.

7. Gini bete ga Mbori arugute duho, na ka kuti agu arugute re nakoda gine?

⁷ Yoane asakipai tipa kpinyemu Mbori ki ya si nga: “Ka ani kuti gako rugute.” Ga Mbori arugute nga gine? Yekova nafu badungu arugute furani rogo Fugoko yo nga Ziazia Kekeapai. Ni kpiapai, ko nazahe ti kpibuda, wasiwasi kodaba, irisokpiahe, dĩ, gbiati peziree. (1 AKorindo 5:11; 6:18; 10:14; AEfeso 4:28; AKorosaio 3:9) Ka kuti ga Mbori arugute nakoda raka ringbisihe kuti agu arugute nga ga Ziazia Kekeapai.

8, 9. Wai rengbe ani ka ino gupai Yekova akpinyemuhe ka ani gbiatirani na gupai adunga ndiko tipaha rogo Ziazia Kekeapai yo ya? Mo funga kpiapai.

⁸ Tipa ka manga gupai ngba ti Yekova, anga si nga ani yugu giasangba sa tipa kina agu arugute ke yo paha rogo Ziazia Kekeapai yo te. Yekova afunga andiko furani tipa rukutu apai dunduko ani naapeka fuoho rogo gaani raka yo te. Sidu, kura aregbo kinaho rengbe ani ka gbiatirani na gupai adunga ndiko tipaha rogo Ziazia Kekeapai yo ya. Ka ani gbiatirani na ngbatungapai wa gure, wai rengbe ani ka ino gupai Yekova akpinyemuhe? Ziazia Kekeapai nafura gbaiga tipa ga Mbori berãpai tipa apai. Ho ani awirika Ziazia Kekeapai ni, ani nawirikapai tipa gupai Yekova akpinyemuhe na gupai ko asogaha. (Mo gedi Atambuahe 97:10; Asanza 6:16-19) Gipai re nasa rani ani du na inohe tipa agu aberãpai gbiati mangaapai ko abihe na nyanyakipaha. Wa ani kaa wirikapai ni bakerehe tipa asino Yekova gbiati gako mangaapai, si nika undo rani ani mbu gako gene berãpai si du  na maapai kurii gaani diaberã gbiati mangapai. Ni sangbana gipai re, ka si du nga ani gbiatirani na gupai adunga ndiko tipaha rogo Ziazia Kekeapai yo ya, ani ima rengba ka ‘ruga tirani na guhe Gbia akpinyemuhe.’​—AEfeso 5:17.

⁹ Ni kpiapai, ndiko ho rogo Ziazia Kekeapai nagumba gupai nga ka ani naabingo agu avidio watadu ambakadapai nga ga terevizioni du na zuũ rogoho watadu wasiwasi kodaba ya te. Ono ya mo gure naida ndiko duadu ho ani kini ru ka bihe nga si aidanga ani naabi ngbatunga ahe wa gure te? Ani ima ino gu bipai du Yekova na ni tipa ngbatunga agu apai re. Fugoko nafura afura gbaiga kini ya: “[Yekova] nasoga airazuu.” (Atambuahe 11:5) Si nagumba gupai a nga: ‘Airameteka na airabäri Mbori asapa ngbanga yo asapa.’ (AEbere 13:4) Ka ani berẽkurii agu afugo Ziazia Kekeapai re, ani ima rengba ka ino gupai Yekova akpinyemuhe. Sidu, ani nane agu avidio du na agu amangapai rogoho Mbori asogaha. Ani ima inoho nga rago nangba ti Yekova na ani ni kerehe ho ani ane gu wasiwasi mangaapai ni aboro zegino abihe tigayo wa wenepai. *

10, 11. Tipagine ani adiaberã ti ni ka giasangba Yekova, na gini ngbatunga giasangba ani ayugoho fuko?

¹⁰ Gine nga gu bangua ndupai nasa rani ani kakuti ga Mbori arugute? Tipagine ani aida ti ni kaa raka na auru dunduko ringbisihe kuti gupai ani naima inoho nga si nandu wa sa na ga Mbori berãpai? Ani akanga kuti ga Mbori arugute gbua bambiko gupai nga ani naida ka ne mbusa watadu gu gbegberẽ sangbanaapai nagbia agu aboro nabasa sangba Mbori te. (AGaratio 6:7) Kuba gure, ani nagiasangba Yekova bambiko si nga bawene mamu furani tipa ani yugu gupai fuko nga ani ima kpinyemuko. Kina wai du tooni gude na nyemu ka sa ngbarago ti bai, kinawo a ani aida ka sa ngbarago ti Yekova. (Atambuahe 5:12) Barani du nga  ko, na ani ima kpinyemuko. Gu kura he ho rengbe ka ye na bakere ngbarago furani susi gu nga ani ini gupai nga ani naraka ngba gu gene nika sa rani ani ‘bi wenepai be Yekova’ te.​—Asanza 12:2.

¹¹ Sidu tie, i aziongo rani azio ni dingisoro kuti giasangba te, na ani asianga agu apai asia ani kaa yugo giasangba rogoho te. * Ani agianga sangba sa kina rogo agu apai yo nandu na ani wenengai watadu ho adunga kpakarapai ni ya te. Kuba gure, ani nagiasangba ‘kpotorani yo.’ (ARomo 6:17) Ani na kina gu bangisa bipai bake papara Atambuahe adu na ni ho ko akepai ni ki ya: “Bambiko mi bi pa gi ngbarago rogo sangbaro nga gu mi nakpi nyemu he.” (Atambuahe 119:47) Nirengo, ani ima kpinyemu giasangba Yekova. Ani ima ino gupai nga ko naida ani nigi sangbako na kpotorani yo dunduko na si rẽarẽ nzunzu ani gisangbako na kpotorani yo dunduko. (Pa Fu Rugute ni Ue he 12:32) Ani naida Yekova gumba ngbatunga gupai tipa rani ko agumbaha tipa Noa. Ziazia Kekeapai nafura tipa Noa nga gu ruru kumba nayugu gako nyemuse tipa Mbori nidu ko na giasangba tipa dungu agarã kini ya: “Were Noa ki mangi wo; wa Mbori arugu ko na ni, kina wo ko amangi he dũ.”​—Bambata Pai 6:22.

12. Ti gini regbo gaani giasangba aye na bakere ngbarago ku kpoto Yekova yo?

¹² Wai Yekova abi gu giasangba naye kina boro ngbadurani yo? Fugoko nagumba gupai nga ani ‘nafu ngbarago ku kpotoko yo.’ (Asanza 27:11) Ya mo rengo du nzunzu nga gaani giasangba nafu ngbarago ku kpoto gu Bakerepa Bakindo yo nga ga haurago ko? Ii. Yekova na dungu nduapai beko kadu na ngbarago! Yekova akusi aboro na gu tandu  nga ga sia wenepai watadu gbegberẽpai. Gipai re nayugo gupai nga ani na ranirii berani ka manga siapai; ani ima rengba ka sia ka giasangba Mbori, watadu ka basasangba ko. (Pa Fu Rugute ni Ue he 30:15, 16, 19, 20) Ho ani adiaberã ni nisarani ka giasangba Yekova na ho duhe ni nga gu nyemuse du ani na ni tipa ko du fõ ngbadurani yo tipa ani mangihe wo, si naye na bakere ngbarago ku kpoto gu Barani yo du ngbangbaturũ yo re. (Asanza 11:20) Na ho ani amangaha ni wo, gure nga ani nasia wene gene raka.

13, 14. Tipagine rengbe ani ka ya ti ni ga Mbori ‘arugute asusa nga omerani te,’ na ani rengbe ka ringbisaha kuti gini kpiapai?

¹³ Gu mokedi nangia Yoane agumba gupai nafu kido furani tipa ga Yekova arugute nga: “Gako rugute asusa nga omerani te.” Gu pa-Giriki i asaha nga “asusa nga omerani te” rogo 1 Yoane 5:3 nafura tipa guhe du ni “rõrõihe.” * Ga Yekova arugute dunduko ni ruruhe na si afunga rii omerani te. Gako arugute asusanga ome kpakpa aboro tipa i ka kutini te.

¹⁴ Ani rengbe ka ringbisaha na kpiapai wa gere. Ani yanga bawene bakureamo naga ku rogo gu kura kporo, na ni ki gumba gupai foro nga mo undo ni ti tinda gani ahe. Badungu ahe du beni si aida oni tindihe. Agu akuraha ni aakpuraha rengbe boro arengba ka tumbaha nisani, ono agu akuraha naida aboro ue tipa i tumbaha. Gu bakureamo re ki sia agu ahe ni aida mo tindihe. Ya mo ni sia kina agu ahe foro mo arengbanga ka tindaha nisaro ya? Wagusa te. Ni funga agu ahe foro naima furii omero tipa mo tindihe nisaro te. Wakina gure a, gu gaani Mbori naima kpinyemu rani ni kerehe kidu na bawene sino tiko re arengbanga ka fu agu arugute furani naima furii omerani tipa ani ka  kutini te. (Pa Fu Rugute ni Ue he 30:11-14) Yekova ima ino gupai rengbe ani ka mangaha “bambiko ko ini pa bororani; ko natingida pa rani ya nvutu sende nga ani.”​—Atambuahe 103:14.

15. Tipagine rengbe ani kadu ti ni na gu kido nga ga Yekova arugute dunduko tipa kina gaani undo?

¹⁵ Ga Yekova arugute asusanga omerani kandara tooni te; agu arugute re tipa kina gaani undo. (Mo gedi Yesaya 48:17.) Si du Moize arengbe arengba ti ni ka gumba gupai fu agu aYisaraere naadu mbata nga: ‘Yekova ki rugu rani ani nimangi agi arugapai dunduko re, ka gunde ti Yekova gaani Mbori, tipa gaani wenepai na auru, ya ko nika banda rani ni ungarani, wa duhe nigi uru re.’ (Pa Fu Rugute ni Ue he 6:24) Zavura ani areme a, ani na gu kido nga ga Yekova arugute tipa ka undo rani ani gbia amaku nyeanye kindi. Ka Yekova funga guhe furani du ni gbegberẽ he wagusa te. Yekova nga Mbori tatamana. (ARomo 11:33) Sidu, ko ima ino gupai ngba tipa rani. Yekova a nga bangbasia boro nyemuse. (1 Yoane 4:8) Nyemuse nga bangbasia sinoko, si nga mburu agu apai dunduko ko agumbaha na kini mangihe. Si nga mburu agu arugute dunduko ko nafuhe fu gako amoyambu.

16. Wa vura duhe nga ani nasovura na gu maapai nga ga gi gbegberẽ zegino re gbiati gaani zangarengba, tipagine rengbe ani arengba ti ni kadu na giasangba?

¹⁶ Ono anga si ni taatapai tipa ka giasangba Mbori te. Si naida ani sovura aso kuti gu gbegberẽ maapai nga ga gi zegino “du ni zogozogo ho be gbegberẽ ko” re. (1 Yoane 5:19) Ani nasovura a kuti gaani zangarengba nga gu nandu na ani dedede kina kuti agu apai nakuo ga Mbori andiko. (ARomo 7:21-25) Ono gaani nyemuse tipa Mbori ima rengba ka undo rani ani kakuti gako arugute. Yekova nafu maku fu agu aboro nayugo gayo nyemuse fuko ni gia yo sangbako. Ko nafu gako ziazia toro fu “agu yo nagia sangbako.” (Amokedi 5:32) Gu ziazia toro re nakusa wene zuzuhe rogo rani  yo. Si nasonosa wene asino rogo rani yo nga gu rengbe ka undo rani ani du na giasangba.​—AGaratio 5:22, 23.

17, 18. (a) Gini apai ani ka wisigopai tipaha rogo gi buku re, na wa ani kaa wisigoho, ginipai si aida sidu berãrani yo? (b) Ginipai ani ka sakapai tipaha rogo gu kapita naye re?

¹⁷ Rogo gi buku re, ani nika wisigopai tipa ga Yekova arugute, gu sino mangapai ko aidaha gbiati gu kura apai nayugo gupai ko akpinyemuhe. Wa ani kaa wisigo agi apai re, nyanyakipa apai kinaho si aida ani bandaha berãrani yo. Si naida ani tingidi gupai nga Yekova aziongo rani azio ngbaome tipa ani gisangbako na kini kakuti gako arugute te; ko naida na gu giasangba naye kina boro ngbadurani yo. Si aidanga bangirani go ti gupai nga Yekova naida ani raki ngba gu gene nika ye na amaku furani awere na ki ndu na ani sa nyenye unga kumbatayo te. Si naida ani du na ruru bipai tipa gu gaani giasangba naye kina boro ngbadurani yo, si nga gu bawene mamu du berani ka yugo wai fu Yekova ani nakpinyemuko.

¹⁸ Tipa ka undo rani ani kpara wenepai ti gbegberẽpai, Yekova aima fu guhe furani nga sangbakpotoseyo. Ono tie, tipa ani du na kido kuti sangbakpoto rani yo, ani du wa ka ani rabaha, gu kapita naye fuo gere nika sakapai tipaha.