1-3. a) ¿Igi dule gusdaye Bibliagi soglenai, dule, dule baidba aggader? b) ¿Ibu anmar imagger gebe, anmar, aimar nuegan nigguega?

IGI ibigwensur ubsangi ibmar doge, aayobi anmar emarba aggadele, sun emar daed anmargi dogmogad, e binsaeddibe, emaryob anmar binsae gudmogodibe. Degsoggu doa dulebali anmar aggaoe, aaba sun anmar ibmar imadoed, ibmar nueddibe, ibmar isganadibe.

² Bibliagi ise sogar narmaggarnaid: “Dule, dule binsaed nued niggadba aggaele, binsaed nued nigga gumogoed. Dule, dule binsaedsulidba aggaele, na duggin boni amied” (Proverbios 13:20). Wegine soglenaidi, emarba “aggae[dye]”, unnila binsa uggiar dule baidba aggaed obarsulid, bali bali dule wargwenbo gudi guedgi sunmagnaid. * Libro maddagwen Biblia igargi sunmagged weyob sogsad: ‘Dule, dule baidba gudi guedi binsa eba gudi gued obarsurye, gadi binaledba eba nanaed obarye’. Anmar, dule wargwen yeer binalele, anmar, aa duleyob ibmar imagbi guardaed. Degsoggu anmar, dule wargwenba gadi aggaele, aa duleyob anmar dae gudagoed, anmar, dule nuedga gudodibe, anmar isgudodibe.

³ Anmar abesundibe, Jehová, anmar sabgumai guedi, anmar, aimar nuegan nigguer gebed. ¿Ibu anmar imaggoe  aimar nuegan amigega? Jehová doamar sabgumai, anmar, aamar sabgumogar gebed, geb doamar Jehová aimala, anmar, aamar anmar aimarga imagmogar gebed. Wemala Jehová sogedba nanamarsoggua, wemar, anmar aimarga guele, anmar, sordagan nuegan niggusardo. Anmar daggoena, Jehová, dule igi daed nued dagge. Jehová sogedba anmar, aimar amigele, anmar, aimar nuegan niggudoed.

4. ¿Ibigala geg dule Jehovága aggar soge Jehová yogasaar dulemar e aiga imagsulidba, geb ibigala Bibliagi soglenai, “Abrahán Bab Dummad e aiye”?

⁴ Jehová yogasaar dulemar e aimarga imagsulid. Jehová na sogoedid doa e aimarga guoe, dule bibbisaar geg ega aggar soged, ar Jehová dule Dummad maid. Ar Jehová, dule dummadsoggua, e aiga gued igar nuedid. Degsoggu, ¿Jehová doamar na e aimarga imagsunna? Dulemar egi bensurmaladbii, Jehová na e aimarga imagged. Be daggena, Abrahán bibbisaar Jehová bengudii nanassulid, Abrahánga soglesad, anga be, be massi oburgoye. * ¿Bule ibgwensur Abrahánga gus be binsae Jehová sogedba igar imaggega? Be iddogena, Abrahán, Jehovága “Isaac ugsa[yobi] gusad”, ar wisinad anba Isaac burgoe inigwale, anba Jehovádina nabir ‘gannar odulogoena’ (Hebreos 11:17-19). Weyob Bab bengussulidba, geb eba igar imasadba Bibliagi soglenaid, “Abrahán, Bab Dummad e aiye” (Santiago 2:21-23; Isaías 41:8).

5. ¿Igi Jehová dagmai dulemar inniggigwad eba igar imagmalad?

⁵ Jehová yeer binaled dulemar eba inniggigwad igar imagdidiid. Dulemar egi bangudisurmalad Jehová bela belad  sabgumaid (2 Samuel 22:26 absogo). We libro capítulo 1 gine anmar durdasad Jehová yeer iddodaye dulemar e sabedba eba igar imagger. Proverbios 3:32 gine sognaid, Bab Dummad ‘dulemar nueganbodi waliggaa gudidaye’. Dulemar nuegangala Bab Dummad sogmaid, bemar nabir ‘anse goled negse’ dagmarye, an bemar iddomaoye (Salmo 15:1-5).

6. ¿Igi mag daglegoe anmar, Jesús sabe, geb igi Jehová iddodae daggalir dulemar e massi sabe?

⁶ Dule, Jehová Massi sabele, Jehová, aa dule sabgumogoed. Jesús deyob sogsad: “Ar dule an sabele, an gaya burba sunmaggedba daoed, degine, an Bab a dule sabgumogoed” (Juan 14:23). ¿Ibu anmar imagger gebye weg sognai mag daglegega anmar Jesús sabe? Anmar, Jesús sogedba igar imagger gebye sognaid. Degsoggu abeleged anmar Bab igargi emarga sunmagged, geb anmar Jesúsga sordagan amibalid (Mateo 28:19, 20; Juan 14:15, 21). Mag daglegega, anmar Jesús sabe, anmar “eba da[er gebed]” (1 Pedro 2:21). Anmar sunmaggedba, geb anmar daedba nabir anmar Jesúsba igar imagged, anba anmar nosa nosa dae inigwale. Jehová yeer iddodaed daggalir, anmar, e Massi sogedba igar imaggedgi alamagdii.

7. ¿Ibigala nuedi Jehová aimar anmar aimarga gumogar?

⁷ Anmar durdasad Jehová abeye e aimala mer e bengumalad, inniggigwadba eba nagumalad, Jesús sabgumarbalid, geb Jesúsba igar imagmarbalid. Degsoggu anmar binsaedid, “¿an aimar weyob damardibe? ¿Jehová aimala, an aimarmodibe?”. Degsoggu, ¿doamar anmar aimarga guoe? Dulemar, Jesús sogedba igar imagdidiid, geb bela belad Bab igargi sunmagged binarmalad, aamar anmar aimarga anmar imagger nuedid. Dulemar wegi damaladba anmar aggaer nuedid, ar aamar anmar bendagmaloed nabir anmar Bab sogedba ibmar imagdii guega (recuadro “ Ai nued igi dae” aagi naid dagbalo).

8. a) Noemí, Rutbo gudi gusad, ¿ibu igargi be odurdagge? b) Sadrac, Mesac geb Abednego gudi gusmarmogad, ¿ibu igargi be odurdagbali? c) Pablo, Timoteobo gudi gusad, ¿ibu igargi be odurdagbali?

⁸ Bibliagi anmarga soglenaid, igi ebbenne dulemar Babga arbadii gusmalad, aimar nuegan niggusmaladba nued gudi gusmala. Soglenaid, Noemí e bala Rutbo, igi ai nuegan gusmala, geb sognabalid Sadrac, Mesac, geb Abednego, ebaabela, igi Babgi bangussurmala Babiloniagi gudi gusmargu, geb sunmagnabalid, Pablo igi Timoteobo na ia nuegan gusmarmoga (Rut 1:16; Daniel 3:17, 18; 1 Corintios 4:17; Filipenses 2:20-22). Auggi wegine bur anmar sunmaggoed, David, Jonatánbo igi ai nuegan gusmala.

9, 10. ¿Ibigala David, Jonatánbogwa nabir na ai nued gusmala?

⁹ Bibliagi soglenaid, David, Goliat oburgwisgua “Jonatándi, Davidbo ai nuedga gunonimar[ye]. Degsoggu, Jonatán bela bela David sabgusad” (1 Samuel 18:2). Weyobi David, Jonatán aiga gunoniggid, Jonatán, Davidba bur seredin inigwale, na ai nuegan gusmalad, degi Jonatán urwenai burgwissunnad, na e David idu (2 Samuel 1:26). * ¿Ibigala David, Jonatánbo nabir na ai nuegan gusmala?

¹⁰ David, Jonatánbo inniggigwad Jehová sabgusmalad, Jehovági bangubisur gusmalad, aaga nabir na ai nuegan gusmalad. Ebobela, bela belad Bab igar binarmalanad. Dulemar nuegan damalanad, aaga na gadi binarmalanad. Jonatán nued dagsar gebed, David bibbigwa, mer Jehová nug isguega dobe dobe ulussulidba. Geb David  daggarmogua, dule bur eba sered bela belad Jehovába nai, we dule na egine binsasurdae, bur e aimargi binsadae, David binsasar gebed, we dule, dule nued dagleye. Be daggena, David, rey isganase, Saúlse balegilleargua (Jonatán e bab), Jonatán ibu imasa, “Jonatán, Horesse David dagnaded. [...] David mer Bab Dummadgi bensuli gudi guega, David ogannosad” (1 Samuel 23:16). David  yeer iddosar gebed, daggargu, e ai nued e bendaggedga es daniggi. *

11. ¿David, Jonatánbo ai nued gudi gusadi, ¿ibu igargi anmar odurdagge?

¹¹ David, Jonatánbo ai nued gudi gusadi, ¿ibu igargi anmar odurdagge? Anmar odurdagged, dulemar nabir na ai nueganga gumalaga, ebober gadi Bab igar binarmalar gebed. Nuedid bur anmar Jehová sordaganba aggaer, Biblia sogedba igar imagmaladba, dulemar Babgi bangubisurmaladba nagued. We dulemarbo anmar mudsub mudsub Bab igargi sunmadosoggua, anmar na mudsub mudsub  ogannodmaloed, mer Bab igargi banguega (Romanos 1:11, 12 absogo). Aimar wegimaladi anmar gwenagan yaurgi anmar amigoed. Auggi, ¿soglesunde bela dulemar Igar Iddoged Negse nanamaladi aimar nueganbiye? Degisurbalid.

12, 13. a) ¿Ibigala geg anmar yogasaar anmar gwenadgan yaurgi dulemar anmar aimarga imagge? b) ¿Igi ebbenne gwenadgan siglo primerogi buggusad yaurgi neg gusa, geb ibigala Pablo sogsa nueggwa neg dagdi gumaloye?

¹² Anmar nueggwa dagbaloed, ar anmar gwenagan yaurgi yogasaar geg anmar aimar amibalid, ar bela anmar gwenagan anmar bendaggosulid, anmar Bab igarba nueggwa naguega. ¿Ibigala anmar geger we ibmar iddogedsuli? Ar anmar dagdiid bergwable ibmar emarbi goresurmalad, abar gwae gwae goreddamalad, abar gwae gwae goresurmalad, aayobmogad, abar anmar gwenagan gwae gwae Bab igarba ibmar imaddamalad, abar gwae gwae eba igar imagsurmarmogad (Hebreos 5:12–6:3). Degsoggu, mer anmar isdar iddogoed, anmar gwenagan, bela nueggwa ibmar imagsurmalar. Anmar, anmar gwenagan sabgued abeleged, degiile nabir anmar wemar bendaggoed nueggwa Bab igarba damarmogaga (Romanos 14:1; 15:1).

¹³ Sun anmar abargi dule wargwen, anmarga igar oburdaged, aaga anmar geg yogasaar dulemar anmar abargi gudimalad anmar aiga imagged. Sun dule wargwen ibmar isgana imaggedgi bur bule binsadidibe, anba gadi emargi sunmagdibe, anba gadi urwedibe, aaga anmar geg yogsaar emarba aggaed. Siglo primerogi deyob neg gusmogad, abar nueggwa Bab igarba gudi gussurmalad. Ebbenne Corinto neggweburgi abar Bab igar benguar gudmalad, aaga apóstol Pablo, Cristo sordaganga sogsad: “Mer [...] yardaglemar: Dulemar nuegan dulemar isganaba aggaele, isguddamalad” (1 Corintios 15:12, 33). Pablo, Timoteoga  sogsabalid, abar gwenagan yogasaar ibmar imadmaloye, mer aamarba aggaoye (2 Timoteo 2:20-22 absogo).

14. ¿Ibu igargi Pablo anmar odurdasa, sogsagu mer yogasaar emarba aggamaloye?

¹⁴ Pablo sogsagua mer yogasaar emarba aggamaloye, igar soggwengi anmar odurdasad, ¿ibu igargi anmar odurdasa? Dule wargwen Bab igarba dabisulile, anba anmar yaurgi gudimoga inigwale, mer be aiga imaggoye (2 Tesalonicenses 3:6, 7, 14). Anmar ibmar isgana imagbisulid mer Bab igargi banguega. Auggi mer iebalo, anmar ubsanyob gusoggua, anmar emarba aggadele sun emar daed anmargi dogmogad, e binsaeddibe. Be binsaena, dule ubsan dii yaggi odosale, alcohol biin nodagosulid, dii biin nodagoed. Deyobmogad, anmar aimar isganaba aggamosundibe anmar ibmar nued imadosurmogad (1 Corintios 5:6).

15. ¿Ibu anmar imaggoe, anmar gwenagan abargi, anmar aimar yeer Bab igar binarmalad nigguega?

¹⁵ Degi inigwale soglesulid aimar nuegan geg anmar yaurgi amiledeye, ar anmar abargi aimar nuegan obinegwadginbalid (Salmo 133:1). ¿Degidde igi anmar aimar nuegan amisarsunna? Igi Bab Dummad aimar dae, anmar aamaryob damogar gebed. Degiile, dulemar yeer Bab igar binarmalad anmar aimarga gubi gudamaloed. Auggi, anmar, gwenagan amimogar gebed anmar aiga gumalaga (recuadro “ Igi aimar nuegan amilege”, aagi naid dagbalo). Anmar, aimar amidele, anmar daggoed we dule nued dadibe anmar eba damogaga. Anmar iebisurbalid, Bibliagi soglenabalid ‘bamalad sabgumarbaloye’. Aaga, anmar unnila aimar soggwenna niggubisulid, anmar binsabisulid wedi an dulesurye, wedi an neggweburginedsurye, geb wedi anyob dasurye, degsoggu geg an aiga guye (2 Corintios 6:13; 1 Pedro 2:17 absogo). Unnila anmaryob seredgumaladbii, anmar, anmar aimarga imaggosurbalid. Be binsaena ¿bule Jonatán, Davidba bur seredina? Bur dulemar  anmarba selemaladi, bur nue anmarba ibmar wismalad, nabir anmar odurdaggega igar nuegangi.

16, 17. Wis gwenad wargwenbo anmarga igar aburusale, ¿ibigala nuedsuli gwenadgan buggwadgi anmar bangued?

¹⁶ Geg igar abursuli gubalid, ar anmar emarbi dasurmalad, ar anmar emarbi binsasurmarbalid. Degsoggu mag iddolledo ibigala gwenagan inbaggwa sun aggar anmar imagge, aaga sun anmar ibagwengi noar ibmar iddosadba dule wargwenbo anmarga igar abured (Proverbios 12:18). Wegi anmarga neg gualile, ¿ibu anmar imaggoe? Deyob anmarga neg gualir anmar gwenadgangi banguedsulid. Ar anmar, Jehová sabed, geb anmar gwenadgan sabbalid, degsoggu bibbisaar anmar gwenadgangi bangued abelesulid.

¹⁷ Jehová, anmar imasadid, geb Jehová anmar sediidbalid, degsoggu, bibbisaar anmar Jehová indaggedsulid  (Apocalipsis 4:11). Anmar gwenadgan bendagged abeleged geb anmar na gwenadgan geg ibgwensur sabalid ar anmar gwenagan Jehovágadid (Hebreos 13:17). Degsoggu, wis gwenad wargwenbo anmarga igar aburusale, nuedsulid sae iddogedba gwenadgan buggwadgi bangued. Dogdar dolle anmar deyob daer ar Jehová anmarga igar oburmasulid. Anmar bela belad Jehová sabsoggua geg anmar Jehovági bangued, geb anmar geg e neggweburgi bangubalid (Salmo 119:165 absogo).

18. a) ¿Ibu anmar imaggoe gwenadgan yaurgi mer urwed onodii guega? b) ¿Igi anmar gudi guoe anmarga igar aburusar ies imasdaer?

¹⁸ Gwenadgan sabedba, anmar alamaggoed mer gwenadganbo urwed onodii guega. Aaga dule wargwen anmargi nosale, anmar aa ibmargi nai nai guedsulid, ar bela anmar noedbimogad (Proverbios 17:9; 1 Pedro 4:8). Ar Jehovábela, abiddomasurmogad e aimala e igarba inniggi nanadii gumalad, anmar bulesunna, sun anmar abiddomogosi gwenadgan inniggi ibmar imagdii gumarmogad. Anmar gwenadgan sabsoggua gwenadgan anmargi nosale anmar na “mudsub mudsub igi barsaye sogma[loed]” (Colosenses 3:13). Auggi, inbaggwa ibgwensur ibmar ielesursoggua, sun anmar isdar iddogedba, we ibmar iebisur gudagoed. Sun sae iddogedba, anmar binsadaged, an, gwenadgan abin imagmogoye. Auggi, anmar na duggin imaggoed deyob daer. Anmar wisbalid inbaggwa ibmar geg ieleged, auggine, bur abeleged neg aggar gusale mer bar bur anmar egi binsadii gued (Lucas 17:3, 4). Weyob anmar daele, anmar nabir nued gudi gudoed, anmar buggib binsadii guosulid, anmar gwenadganbo urwedi guosurbalid, geb Jehová nued anmar dagmai gumogoed (Mateo 6:14, 15; Romanos 14:19).

19. ¿Sanawa anmar dule wargwen anmar aiga gusad obane dagledagoe?

¹⁹ Dule wargwen Bab igargi yolesar, geb ibmar isgana  indagbisulir, anmar yaurgi gudiid onolesunnoed. Anmar sorda, bar anmar sordaga gubisur gualir, geb yogasaar emar odurdaggarbalir, onolegoed. Deyob neg gunoniggile aa dulegine anmar bangue dagledagoed. Ar Bibliagi ise sogarnaid: “Amar dulemarba mer be[mar] aggamarye” (1 Corintios 5:11-13 absogo; 2 Juan 9-11). * We dule, anmar gwenad sunnadile, anmar ai nuedbardibe ibgwensursulid egi banguega. Auggi, ibu bur anmar imaggoe, anmar we dule e aiga guodibe, anmar bur Jehová sogedba igar saodibe. Mer iego, Jehová, nued dagmaid dulemar eba inniggi igar sadimalad.

20, 21. a) ¿Ibigala soglege sabedba Jehová igar mesisye dulemar isgudiir onolegoye? b) ¿Ibigala anmar nueggwa aimar amiged abelege?

²⁰ ¿Ibigala Jehová, dule isgudiid onosdae? Ar Jehová, dule dummad masoggua, bibbisaar abesulid e nug isgued, aaga dule isgudiid onosdaed (1 Pedro 1:15, 16). ¿Ibigala soglebali gwenadgan buggwad sabedba, dule, anmar abargi isgudiir onolesdaye? Ar dule isgudiid onolesulile gwenadgan bamalad eba isgudmogoed, aaga we dule onoleged, gwenadgan nuedgi Jehovága arbadii gumalaga (1 Corintios 5:7; Hebreos 12:15, 16). ¿Ibigala soglebali, sabedbali dule isgudiid onolesdaye? We dule onolesdaed mag na iddogega noar ibmar imagdii, binsaed amigega, geb nabir yoogidse gannar Jehovága arbaedgi binsabaliga (Hebreos 12:11).

²¹ Anmar nue wisid, anmar aimaryobi anmar ibmar imagbi guardaed, aaga anmar nueggwa aimar amiger gebed. Anmar, Jehová aimar anmar aimarga imaggele, geb anmar aamar sabgudii nanabalile, anmar, aimar nuegan nigguoed. Wemala, anmar bendaggoed anmar nabir ibmar nuegan imagmogaga, geb nabir anmar Jehová igarba gudi gubaliga.