1-3. (a) Ki bèrdat innegabel Beibel ta indiká? (b) Kon nos por skohe amigu ku lo tin bon influensia riba nos?

DEN sierto sentido hende ta manera spòns; nan tin e tendensia di apsorbá loke tin rònt di nan. Ta masha fásil pa nos adoptá, kisas sin ku nos ripará mes, e aktitut, norma i balor i karakterístika di personalidat di e hendenan ku mas nos ta anda kuné.

² Beibel ta indiká un bèrdat innegabel: “Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) No ta na kontakto superfisial e proverbio akí ta referí. E ekspreshon “anda ku” ta indiká asosiashon kontinuo. * Un buki di komentario bíbliko a bisa lo siguiente tokante e versíkulo akí: “For di ora bo ta anda ku un persona, esei ta indiká ku bo tin kariño p’e i un laso emoshonal kuné.” Bo no ta di akuerdo ku nos tin e tendensia di imitá hende ku nos ta stima? Sin duda, mas será nos ta ku un persona, mas e ta influensiá nos, sea pa bon òf pa malu.

³ Pa nos keda den e amor di Dios, ta masha importante pa nos buska amigu ku lo tin bon influensia riba nos. Kon nos por hasi esei? Masha simpel: stima e hendenan ku Dios ta stima; bira amigu di e amigunan di Dios. Pensa riba esei un ratu. E personanan ei tin e kualidatnan ku Yehova ke pa su amigunan tin. Ki mihó amistat nos por  tin ku esei? Pues, laga nos analisá ki klase di hende Dios ta stima. Unabes nos ta bon na haltura di e punto di bista di Yehova, nos lo ta mihó prepará pa skohe bon amigu.

4. Kiko ta duna Yehova e derecho di skohe ken ta kualifiká pa ta su amigu, i dikon Yehova a referí na Abraham komo “mi amigu”?

⁴ Yehova ta masha kuidadoso den e asuntu di skohe amigu. Akaso e no tin derecho di ta asina? E ta e Señor Soberano di universo, i amistat kuné ta e onor di mas grandi ku un hende por tin. Pues, ta ken e ta skohe komo amigu? Yehova ta hala serka di esnan ku ta konfia den dje i ku ta pone nan pleno fe den dje. Tuma por ehèmpel patriarka Abraham, un hòmber konosí pa su fe ekstraordinario. Dios a pidié ofresé su yu komo sakrifisio. * Por tin un prueba di fe mas grandi pa un tata? Sinembargo, Abraham, “na moda di papia, a ofresé Isak,” ku e pleno konfiansa “ku Dios por a lanta su yu asta for di morto.” (Hebreonan 11:17-19) E fe i obedensia ku Abraham a demostrá a pone ku Yehova kariñosamente a referí na dje komo “mi amigu.”—Isaías 41:8; Santiago 2:21-23.

5. Kon Yehova ta mira hende ku ta obedes’é fielmente?

⁵ Pa Yehova, lealtat i obedensia ta masha importante. E stima hende ku ta dispuesto pa keda leal na dje kueste loke kueste. Manera nos a mira den Kapítulo 1 di e buki akí, Yehova ta keda masha kontentu ku hende ku ta obedes’é pasobra nan stim’é. Proverbionan 3:32 ta bisa: “E tin komunion íntimo ku e hende rekto.” Esnan ku lealmente ta kumpli ku Yehova su rekisitonan ta haña e invitashon bondadoso di por ta huéspet den su “tabernakel.” Ku otro  palabra, gustosamente e ta aseptá nan adorashon, i nan por aserk’é den orashon ki ora ku nan ke.—Salmo 15:1-5.

6. Kon nos por demostrá ku nos ta stima Hesus, i kon Yehova ta sintié ora e mira ku nos ta stima su Yu?

⁶ Yehova ta stima hende ku ta stima su Yu unigénito, Hesus. Esei ta loke Hesus mes a bisa: “Si un hende ta stima mi, lo e kumpli ku mi palabra, i mi Tata lo stim’é, i nos lo bini serka dje i keda biba serka dje.” (Huan 14:23) Kon nos por demostrá ku nos ta stima Hesus? Un manera sigur ta di kumpli ku su mandamentunan, inkluso e mandamentu di prediká e bon notisia i hasi disipel. (Mateo 28:19, 20; Huan 14:15, 21) Tambe nos ta demostrá nos amor pa Hesus ora nos ta “sigui su pasonan fielmente.” Di e manera ei, maske nos ta imperfekto, nos ta imit’é lo mihó ku nos por den nos manera di papia i aktua. (1 Pedro 2:21) Ora Yehova mira kon amor pa su Yu ta motivá nos pa hasi esfuerso pa sigui e pasonan di Kristu, esei ta touch Su kurason.

7. Dikon ta sabí pa sera amistat ku e amigunan di Yehova?

⁷ Fe, lealtat, obedensia i amor pa Hesus i pa su manera di biba ta algun di e kualidatnan ku Yehova ta rekerí di Su amigunan. Pues, ta bon pa nos puntra nos mes: ‘Kiko di mi amigunan? Nan tin tal kualidat i ta imitá e manera di biba ei? Mi a bira amigu di e amigunan di Yehova?’ Ta sabí pa nos sera amistat ku hende ku ta kultivá kualidatnan ku ta agradá Dios i ku ta prediká e bon notisia. Nan por tin un bon influensia riba nos, ya ku nan ta animá nos pa kumpli ku nos desishon di agradá Dios.—Wak e kuadro “ Kiko Ta un Bon Amigu?”

8. Kiko ta impreshoná bo di e amistat entre (a) Noemí i Rut? (b) e tres hóbennan hebreo? (c) Pablo i Timoteo?

⁸ Den e Skritura tin hopi ehèmpel di personanan ku a skohe bon amigu i a benefisiá for di esei. Bo por lesa  tokante e relashon entre Noemí i su suegra Rut, e relato di e tres hóbennan hebreo na Babilonia ku tabatin un laso di amistat será ku otro i di e amistat entre Pablo i Timoteo. (Rut 1:16; Daniel 3:17, 18; 1 Korintionan 4:17; Filipensenan 2:20-22) Pero, laga nos enfoká riba un otro ehèmpel sobresaliente: e amistat entre David i Jonatan.

9, 10. Kiko tabata e base di e amistat entre David i Jonatan?

⁹ Beibel ta bisa ku despues ku David a mata Goliat, “alma di Jonatan a keda uní ku alma di David, i Jonatan tabata stima David manera su mes.” (1 Samuel 18:1) Asina a kuminsá un amistat inkebrantabel ku a superá e diferensia grandi di edat entre nan i ku a dura te ora Jonatan a muri riba kampo di bataya. * (2 Samuel 1:26) Kiko tabata e base pa e laso fuerte ku a forma entre e dos amigunan akí?

¹⁰ David ku Jonatan tabatin un amistat será ku otro debí na nan amor pa Dios i nan determinashon firme pa keda fiel na dje. Nan deseo pa agradá Dios a uni nan. Kada un tabatin kualidatnan ku e otro tabata atmirá. Jonatan indudablemente a keda impreshoná ku e kurashi i zelo di e hóben ku a defendé e nòmber di Yehova sin miedu. I sin duda, David a respetá e hòmber di edat ku a apoyá lealmente loke Yehova a disidí i kende, sin pensa riba su mes, a pone e interesnan di David promé ku esnan di dje. Por ehèmpel, konsiderá loke a pasa durante un di e pió momentonan di David su bida, tempu ku e tabata biba komo fugitivo den desierto pa skapa di e furia di e tata di Jonatan, e rei malbado Saul. Jonatan a demostrá un lealtat remarkabel ora ku el a tuma e inisiativa i ‘a bin bishita David aya i a anim’é pa e buska su forsa den Dios.’ (1 Samuel  23:16, BPK) Imaginá bo kon David lo mester a sintié ora ku su amigu stimá a bini serka dje pa dun’é sosten i animashon! *

11. Kiko bo ta siña tokante amistat for di e ehèmpel di Jonatan i David?

 ¹¹ Kiko nos ta siña for di e ehèmpel di Jonatan ku David? E lès di mas importante ta ku loke amigunan mester tin en komun ta un bon relashon ku Dios. Ta bon pa nos sera amistat ku hende ku tin e mesun kreensianan i norma- i balornan moral ku nos i tambe e determinashon firme pa keda fiel na Dios. Esei ta hasi posibel ku nos por interkambiá pensamentu, sintimentu i eksperensia ku ta animá nos i fortalesé nos. (Romanonan 1:11, 12) Nos ta haña amigunan asina, ku ta interesá pa keda fiel na Dios, entre nos rumannan den fe. Akaso esaki ta nifiká ku tur hende ku ta asistí na e reunionnan na Salòn di Reino ta bon asosiashon? No nesesariamente.

12, 13. (a) Dikon asta entre rumannan kristian nos mester tene kuidou ora di skohe amigu? (b) Ki problema tabatin den e kongregashonnan di promé siglo, i esei a pone Pablo duna ki spièrtamentu fuerte?

¹² Asta den kongregashon, nos mester skohe nos amistatnan ku kuidou si nos ke tin amigu ku ta yuda nos fortalesé nos relashon ku Dios. Esaki mester straña nos? En realidat, nò. Meskos ku algun fruta ta tuma mas tempu ku otro pa hecha, asina tambe tin rumannan den kongregashon ku ta tuma mas tempu pa madurá den sentido spiritual. Pues, den tur kongregashon nos ta haña rumannan na diferente nivel di desaroyo spiritual. (Hebreonan 5:12–6:3) Klaru ku nos ta tene pasenshi ku esnan mas nobo òf mas débil i ta mustra amor na nan pasobra nos ke yuda nan madurá komo kristian.—Romanonan 14:1; 15:1.

¹³ De bes en kuando por surgi un situashon den kongregashon ku ta rekerí pa nos tene kuidou ku ken nos ta anda. Podisé e komportashon di algun persona ta kuestionabel. Otronan kisas ta bira masha negativo i ta kuminsá kritiká tur kos. Den e kongregashonnan di promé siglo tabatin e mesun problema. Aunke mayoria di kristian tabata fiel, tabatin algun persona ku no tabata komportá nan mes korektamente. Algun ruman di e kongregashon di Korinto no tabata di akuerdo ku sierto siñansa, i p’esei apòstel Pablo a spièrta e kongregashon: “No laga hende gaña boso. Mal kompania ta daña bon kustumber.” (1 Korintionan 15:12, 33) Pablo a spièrta Timoteo ku asta entre e rumannan kristian por tin algun ku no ta aktua na un manera onorabel. El a bisa Timoteo pa keda leu for di nan, es desir, pa e no tin amistat será ku nan.—2 Timoteo 2:20-22.

14. Kon nos por apliká e prinsipio ku e spièrtamentunan di Pablo ta kontené tokante ken pa anda kuné?

¹⁴ E spièrtamentunan di Pablo ta kontené un prinsipio  bon kla: Evitá di tin amistat será ku hende, sea paden òf pafó di e kongregashon, ku lo por tin mal influensia riba nos. (2 Tesalonisensenan 3:6, 7, 14) Nos mester protehá nos relashon ku Yehova. No lubidá ku nos ta manera spòns; nos ta apsorbá aktitut i manera di anda di nos amigunan. Meskos ku nos no por hinka un spòns den binager i kere ku e ta yena ku awa, asina tambe nos no por anda ku hende ku ta mal influensia i kere ku nos ta apsorbá kos bon.—1 Korintionan 5:6.

15. Kiko bo por hasi pa haña amigu den kongregashon ku ta traha duru pa mantené nan relashon ku Dios?

¹⁵ Afortunadamente, tin hopi posibilidat pa haña bon amigu entre e sirbidónan di Yehova. (Salmo 133:1) Kon bo por haña amigu den e kongregashon ku ta traha duru pa mantené nan relashon ku Dios? Segun ku abo ta kultivá kualidat- i kustumbernan kristian, siguramente lo bo atraé atenshon di otronan ku tambe ta hasi meskos. Pero a la bes, lo bo tin ku dal algun paso práktiko pa haña amigu nobo. (Wak e kuadro “ Kon Nos A Haña Bon Amigu.”) Bo por buska amistat ku rumannan ku tin e kualidatnan ku abo ke desaroyá. Ademas, apliká e konseho bíbliko pa ‘habri bo kurason hanchu’ dor di sera amistat ku rumannan den fe sin wak rasa, nashonalidat òf kultura. (2 Korintionan 6:13; 1 Pedro 2:17) Anto no anda solamente ku hende di bo mes edat. Kòrda ku Jonatan tabata hopi mas grandi ku David. Ku e eksperensia i sabiduria ku hopi ruman di edat tin, nan por duna un bon aporte na e amistatnan ku nan ta forma.

16, 17. Dikon nos no mester bandoná e kongregashon si un ruman ofendé nos?

¹⁶ Komo ku den kongregashon tin asina tantu diferente  karakter i sirkunstansia personal, de bes en kuando por surgi problema. Un ruman lo por bisa òf hasi algu ku ta ofendé nos. (Proverbionan 12:18) Tin biaha diferensia di personalidat, malkomprondementu òf diferensia di opinion ta kousa problema. Kiko nos lo hasi ora esei sosodé? Nos lo laga esei pone nos trompeká i alehá for di e kongregashon? Hamas! Nos stima Yehova i tambe esnan ku e ta stima.

¹⁷ Yehova ta nos Kreador i Esun ku ta mantené nos na bida, i p’esei e meresé nos amor i deboshon kompleto. (Revelashon 4:11) Ademas, e kongregashon meresé nos apoyo i lealtat ya ku e ta un instrumento ku Yehova ta usa. (Hebreonan 13:17) P’esei, si un ruman ofendé nos òf desepshoná nos, nos lo no bandoná e kongregashon pa demostrá nos malkontentu. Kon nos lo por hasi un kos  asina? No ta Yehova a ofendé nos, tòg? Nos amor pa Yehova ta pone ku nunka nos lo por bira lomba p’e i pa su pueblo!—Salmo 119:165.

18. (a) Kiko nos por hasi pa promové pas den kongregashon? (b) Ki bendishon nos lo haña si nos skohe pa pordoná ora tin motibu bálido pa hasi esei?

¹⁸ Amor pa nos rumannan ta motivá nos pa promové pas den kongregashon. Yehova no ta ferwagt perfekshon di hende ku e ta stima, i nos tampoko no mester ferwagt esei. Amor ta motivá nos pa pasa por haltu di fayonan chikitu, ya ku nos ta kòrda ku nos tur ta imperfekto i ta kometé fayo. (Proverbionan 17:9; 1 Pedro 4:8) Amor ta yuda nos sigui “pordoná otro libremente.” (Kolosensenan 3:13) Pero no ta semper fásil pa apliká e konseho akí. Si nos laga emoshonnan negativo poderá di nos, nos por keda karga renkor i kisas pensa ku dor di keda rabiá nos ta kastigá esun ku a ofendé nos. Ma en realidat, karga renkor ta perhudiká nos mes. Pues, si nos skohe pa pordoná ora tin motibu bálido pa hasi esei, nos lo haña gran bendishon. (Lukas 17:3, 4) Esei ta duna nos pas mental, e ta mantené pas den kongregashon i, mas ku tur kos, e ta protehá nos relashon ku Yehova.—Mateo 6:14, 15; Romanonan 14:19.

19. Ki situashonnan por surgi ku ta pone ku nos mester stòp di anda ku un hende?

¹⁹ Tin biaha, nos tin ku stòp di anda ku un hende ku tabata miembro di e kongregashon. E situashon akí ta surgi ora ku un persona ku a kibra ku lei di Dios i ku no a arepentí ser ekspulsá, òf ora un persona ta nenga e fe siñando doktrina falsu òf ta desasosiá su mes for di e kongregashon. E Palabra di Dios ta bisa nos bon kla pa “stòp  di anda” ku hende asina. * (1 Korintionan 5:11-13; 2 Huan 9-11) Kisas ta masha difísil pa evitá un persona ku tabata un amigu òf ku ta nos famia. Kiko nos lo hasi? Nos lo tuma un posishon firme i asina mustra ku nos promé prioridat ta lealtat na Yehova i na su leinan hustu? Kòrda ku Yehova ta duna masha balor na lealtat i obedensia.

20, 21. (a) Dikon e medida di ekspulsá un persona ta un muestra di amor? (b) Dikon ta masha importante pa nos skohe nos amistatnan ku masha kuidou?

²⁰ En realidat, e medida di ekspulsá un persona for di kongregashon ta un muestra di amor di parti di Yehova. E ta duna nos tambe un oportunidat pa demostrá nos amor. Dikon nos por bisa esei? Na promé lugá, ekspulshon di un pekadó ku no a arepentí ta mustra amor pa Yehova su nòmber santu i tur loke e nòmber ei ta representá. (1 Pedro 1:15, 16) Na di dos lugá, esei ta tene e kongregashon limpi. E rumannan fiel ta ser protehá di e mal influensia di pekadónan ku ta nenga di kambia, i nan por sigui sirbi Dios sabiendo ku e kongregashon ta un refugio den e mundu malbado akí. (1 Korintionan 5:7; Hebreonan 12:15, 16) Na di tres lugá, e disiplina fuerte ei ta un muestra di amor pa e malechor. Esei lo por dun’é nèt e shòk ku e mester pa rekobrá su sano huisio i dal e pasonan nesesario pa bolbe serka Yehova.—Hebreonan 12:11.

²¹ Pues, ta un echo ku nos amistatnan por tin un gran influensia riba nos. P’esei ta masha importante pa nos skohe nan ku masha kuidou. Si nos sera amistat ku e amigunan di Yehova, sí, stima esnan ku e ta stima, nos lo ta rondoná pa e mihó amigunan ku tin. Loke nos ta apsorbá for di nan lo yuda nos kumpli ku nos determinashon di agradá Yehova.