1-3. (a) Ire mehlel dah me Paipel kasalehda duwen kompoakepatail kan? (b) Ia duwen atail kak pilada kompoakepatail mwahu kan?

ARAMAS duwehte koatun. Re kin alehda soahng koaros me mi limwahrail. E uhdahn mengei kitail en alasang madamadau, koasoandi, oh irair kan en aramas akan me kitail kin kalapw patehng.

² Paipel kin kasalehda ire mehlel wet: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Ke sou pwungki me kitail kin alasang aramas akan me kitail kin kalapw patehng? Pwehki kitail kin poakepoake irail, re kak kamwakid atail mour ni ahl mwahu de suwed.

³ Pwehn dadaurete ni limpoak en Koht, e kesempwal kitail en rapahki kompoakepatail me pahn kamwakid atail mour ni ahl me mwahu. Ia duwen atail kak wia met? Kitail kak wia met ni atail kin poakohng irail me Koht kin ketin poakohng oh kompoakepahnki kompoakepah kan. Irail kan me kin ahneki irair kan me Siohwa kupwurki pahn wia kompoakepatail me keieu mwahu. Eri, kitail pahn tehkpene soangen  aramas kan me Koht kin ketin poakohng. Ma kitail wehwehki sapwellimen Siohwa madamadau, kitail pahn kak pilada kompoakepatail mwahu kan.

4. Dahme kahrehda Siohwa sapwellimanki pwuhng en pilada ihs me e pahn kompoakepahnki? Dahme kahrehda Siohwa ketin kahdaneki Eipraam “kompoakepahi”?

⁴ Siohwa kin ketin pilada ihs me e pahn kompoakepahnki. E sou sapwellimanki pwuhng en wia met? Pwehki ih me Kaunepen lahng oh sampah oh en kompoakepahnki ih kin wia pwais me keieu kaselel. Eri, ihs me e kin ketin pilada en kompoakepahnki? Siohwa kin ketin kompoakepahnki irail kan me kin likih ih oh uhdahn pwoson ih. Karasepe, medewehla duwen Eipraam. E ahneki pwoson kehlail. Siohwa ketin padahkihong Eipraam en meirongkihla nah pwutak. Met wia kasongosong en pwoson me keieu apwal ong pahpa men. * Ahpw pwehki Eipraam pwoson me “Koht kak ketin komourada Aisek sang mehla,” e kaunopadahr en meirongkihla Aisek. (Ipru 11:17-19) Pwehki Eipraam kasalehda pwoson kehlail oh peik, Siohwa ketin kahdaneki ih “kompoakepahi Eipraam.”​—Aiseia 41:8; Seims 2:21-23.

5. Ia duwen Siohwa eh kin ketin kilangwohng irail kan me kin lelepek oh peikiong ih?

⁵ Siohwa kin ketin kesempwalki lelepek oh peik. E kin ketin poakohng irail kan me kin keieu kesempwalki arail lelepek ong ih. (Wadek 2 Samuel 22:26.) Nin  duwen atail sukuhlki nan Irelaud 1 en pwuhk wet, Siohwa kin inenen kupwurperenki irail kan me kin pilada en peikiong ih pwehki arail poakohng ih. Lepin Padahk 3:32 mahsanih: “E kin ketin kompoakepahnki me pwung kan.” Siohwa kin ketin luke irail kan me kin lelepek ong sapwellime koasoandi kan en patohlong nan sapwellime ‘tehnpas.’ Met wehwehki me re kak kaudokiong ih oh karanih ih ni kapakap ahnsou koaros.​—Melkahka 15:1-5.

6. Ia duwen atail kak kasalehda atail limpoak ong Sises? Ia sapwellimen Siohwa pepehm ong irail me kin poakohng sapwellime Ohl?

⁶ Siohwa kin ketin poakohng irail kan me kin poakohng sapwellime Iehros, Sises. Sises mahsanih: “Mehmen me poakohng ie pahn kapwaiada ei padahk kan. Semei pahn loalloale, oh ngehi oh Semei pahn ketidohng reh oh ketiket reh.” (Sohn 14:23) Ia duwen atail kak kasalehda atail limpoak ong Sises? Sang ni atail kin kapwaiada sapwellime kosonned kan me iangahki en kalohki rongamwahu oh katohnpadahk. (Madiu 28:19, 20; Sohn 14:15, 21) Kitail pil kak kasalehda atail limpoak ong Sises sang ni atail kin wia uwen atail kak en “idawehn oh kahlemengih” ih nan atail lokaia kan oh wiewia kan mendahki kitail aramas soh unsek kei. (1 Piter 2:21) Siohwa kin kupwurperenki irail kan me kin mwekidki arail limpoak ong sapwellime Ohl oh nantihong idawehn ih.

7. Dahme kahrehda e wia elen loalokong en kompoakepahnki kompoakepahn Siohwa kan?

⁷ Pwoson, lelepek, peik oh limpoak ong Sises oh sapwellime koasoandi kan, iei irair kan me Siohwa kupwurki kompoakepah kan en ahneki. Emenemen kitail anahne idek rehtail: ‘Kompoakepahi kan kin  kasalehda irair pwukat? I kin kompoakepahnki kompoakepahn Siohwa kan?’ E wia elen loalokong en wia met. Aramas akan me kin kakairada soangen irair kan me Koht kupwurki oh ngoangki kalohki rongamwahu en Wehio kak kamwakid kitail ni ahl me mwahu. Irail kak sewese kitail en nannantihte kaperenda Koht.​—Menlau kilang koakon “ Ihs me Kak Wia Kompoakepahi Mwahu?”

8. Dahme ke perenki duwen nanpwungmwahu en (a) Naomi oh Rud? (b) mwahnakapw en Ipru silimen ko? (c) Pohl oh Timoty?

⁸ Paipel kin audaudki karasaras kan en irail kan me kin paiekihda arail pilada kompoakparail mwahu kan. Ke kak wadek duwen nanpwungmwahu en Naomi oh Rud, mwahnakapw en Ipru silimen ko me kin sawaspene nan Papilon, oh Pohl oh Timoty. (Rud 1:16; Daniel 3:17, 18; 1 Korint 4:17; Pilipai 2:20-22) Ahpw kitail pahn tehkpene pil ehu karasaras mwahu, iei nanpwungmwahu en Depit oh Sonadan.

9, 10. Dahme kahrehda Depit oh Sonadan kin ahneki nanpwungmwahu?

⁹ Paipel mahsanih me mwurin Depit kemehla Kolaiad, “Sonadan, inenen poakepoakehla Depit duwehte eh poakohng pein eh mour.” (1 Samuel 18:1) Miehla ara nanpwungmwahu kehlail mendahki ara sounpar inenen wekpeseng, oh nanpwungmwahu wet mihmi lao lel ahnsou me Sonadan mehla nan mahwen. *  (2 Samuel 1:26) Dahme kahrehiong ira en kakairada nanpwungmwahu kehlail wet?

¹⁰ Depit oh Sonadan kin ahneki nanpwungmwahu pwehki ara limpoak ong Koht oh ara kin inengieng kolokol ara lelepek ong ih. Ira kin miniminpene pwehki ara kin inengieng kaperenda Koht. Ira koaros kin kasalehda soangen irair kan me kin kamwakid ira en limpoakpene. Sonadan kin perenki eimah oh ngoang me mwahnakapw menet kasalehda ong mwaren Siohwa. Depit kin wauneki Sonadan pwehki eh kin utungada sapwellimen Siohwa koasoandi ong Depit en wiahla Nanmwarki oh eh kin nsenohki kamwahupen Depit laud sang kamwahupe. Karasepe, medewehla duwen dahme wiawi ni ahnsou me Depit inenen mworusala. E rukurukseli nan sapwtehn pwehn tangasang Nanmwarki suwed Sohl, ahn Sonadan pahpa, me lingeringer pahn Depit. Sonadan kasalehda eh lelepek ong Depit oh “kohla reh oh kangoangehki ndindaiong duwen eh Koht eh ketin sinsile.” (1 Samuel 23:16) Medewehla uwen en Depit eh mwekidkihda kompoakepah Sonadan kohdo reh pwehn kakehlaka oh kangoange ih! *

11. Dahme ke kak sukuhlkihsang Sonadan oh Depit?

¹¹ Dahme kitail kak sukuhlkihsang Sonadan oh Depit? Kitail kak kilang me dahme keieu kesempwal me kitail anahne ahnekipene iei atail nanpwungmwahu  rehn Koht. Ni atail kin karanih irail kan me kin pwungki dahme kitail kamehlele, atail tiahk, oh atail ineng en kolokol atail lelepek ong Koht kitail pahn kak sawaskipene atail madamadau, pepehm oh koahiek kan. Oh met kak kangoange kitail oh kakehlaka kitail. (Wadek Rom 1:11, 12.) Kitail kak diarada kompoakepatail kan me kin nsenohki kolokol arail lelepek ong  Koht nanpwungen iangatail tohnkaudok kan. Ahpw ia duwe, met wehwehki me aramas koaros me kin iang mihting kan nan atail Wasahn Kaudok kak wia kompoakepatail mwahu kan? Soh.

12, 13. (a) Dahme kahrehda kitail anahne pilada mwahu kompoakepatail kan nanpwungen iangatail Kristian akan? (b) Kahpwal dah kan me mwomwohdiso nan mwehin wahnpoaron kan kin lelohng? Peneu kehlail dah kan Pohl kihong irail?

¹² Pil nan mwomwohdiso, kitail anahne pilada mwahu kompoakepatail kan me kak sewese kitail en kakairada atail nanpwungmwahu rehn Koht. Ia duwe,  met wia mehkot kapwuriamwei ong kitail? Soh. Ekei Kristian akan nan mwomwohdiso kin anahne ahnsou laud pwehn kakairada arail nanpwungmwahu rehn Koht. Met rasehngete ekei wahn tuhke me kin pwand en mat. Kahrehda nan mwomwohdiso koaros, kitail kin diarada me ahn emenemen Kristian eh kakairada eh nanpwungmwahu rehn Koht kin wekpeseng. (Ipru 5:12–6:3) Kitail kin kasalehda kanengamah oh limpoak ong me kapw kan oh me luwet kan pwe kitail men sewese irail en kakairada arail nanpwungmwahu rehn Koht.​—Rom 14:1; 15:1.

¹³ Ekei ahnsou, kitail anahne kanahieng duwen ihs me kitail pahn patehng nan mwomwohdiso. Mwein ekei kin iang wiewia kan me sohte konehng. Mwein ekei kin nsensuwedkihla mehkot nan mwomwohdiso oh kin kalapw kaulim. Mwomwohdiso kan nan mwehin wahnpoaron kan pil kin lelohng kahpwal pwukat. Pali laud en tohnmwomwohdiso kin lelepek. Ahpw ekei kin iang wiewia kan me sohte konehng. Pwehki ekei nan mwomwohdiso nan Korint sohte kin utungada ekei padahk kan en Kristian, wahnpoaron Pohl kihda peneu wet: “Kaleke kumwail pitida pahn meteikan! Pwe ‘Werekiong aramas suwed kan e kin kauwehla tiahk mwahu.’” (1 Korint 15:12, 33) Pohl padahkihong Timoty me mie ekei ienge Kristian akan me kin iang wiewia kan me sohte konehng. E padahkihong Timoty en dehr kompoakepahnki irail.​—Wadek 2 Timoty 2:20-22.

14. Ia duwen atail kak doadoahngki mouren ahn Pohl peneu duwen kompoakepatail?

¹⁴ Ia duwen atail kak doadoahngki mouren ahn Pohl peneuo? Sang ni atail en dehr patehng irail kan me  sohte wia mehn kahlemeng mwahu sohte lipilipil ma irail kisehn mwomwohdiso de soh. (2 Deselonika 3:6, 7, 14) Kitail anahne pere atail nanpwungmwahu rehn Siohwa. Tamataman me duwehte koatun, kitail kin alasang madamadau oh wiewia kan en kompoakepatail. Ma kitail pahn kaduhdi koatun nan pihl samin, e sohte pahn audaudkihda pihl mwakelekel. Duwehte met, ma kitail kin patehng irail kan me sohte wia mehn kahlemeng mwahu, kitail sohte kak ale mehkot mwahu sang rehrail.​—1 Korint 5:6.

15. Dahme ke kak wia pwehn diarada kompoakpahmw kan me kin nantihong kolokol arail nanpwungmwahu rehn Siohwa nan mwomwohdiso?

¹⁵ Kitail kak diarada kompoakepatail mwahu tohto nanpwungen iangatail tohnkaudok kan. (Melkahka 133:1) Ia duwen omw kak diarada kompoakpahmw kan me kin nantihong kolokol arail nanpwungmwahu rehn Siohwa nan mwomwohdiso? Ni omw kin kakairada irair kan oh wiewia kan me Koht kupwurki, meteikan me pil kin nantihong wia met pahn perenki patehng uhk. Ni ahnsowohte, mie soahng kan me ke anahne wia pwehn diarada kompoakpahmw kapw kan. (Menlau kilang koakon “ Ia Duwen At Diarada Kompoakepaht Mwahu kan.”) Rapahki irail kan me kin kasalehda irair kan me ke pil men kasalehda. Doadoahngki kaweid en Paipel en “langahda douluhl mohngiongimwail kan,” me wehwehki en nantihong kompoakepahnki iengomw Kristian akan sohte lipilipil mehnia keinek, wehi, de tiahk me re tikida loale. (2 Korint 6:13; wadek 1 Piter 2:17.) Ke dehr patehngete irail kan en omw dih. Tamataman me Sonadan uhdahn mah sang Depit. Ma ke  pahn kompoakepahnki irail kan me mah sang uhk, ke pahn kak sukuhlki soahng tohto sang arail koahiek oh erpit.

16, 17. Ma iangatail tohnkaudok men pahn kansensuwedihala kitail, dahme kahrehda kitail en dehr uhdihsang patehng mwomwohdiso?

¹⁶ Pwehki soangsoangen aramas akan kin iang mwomwohdiso, kahpwal kan kak pwarada ekei ahnsou. Emen iangatail Kristian kak nda de wia mehkot me kansensuwedihala kitail. (Lepin Padahk 12:18) Kahpwal kan kak laudla pwehki wekpeseng en irair en aramas, sawehwe, de wekpeseng en madamadau.  Ia duwe, kitail pahn dipekelekelki kahpwal pwukat oh sohla patehng mwomwohdiso? Kitail sohte pahn wia met ma kitail uhdahn poakohng Siohwa oh irail kan me e kin ketin poakohng.

¹⁷ Pwehki Siohwa iei Sounkapikpatail oh ih me kin ketikihong kitail dahme kitail anahne pwehn momour, e warohng atail limpoak oh lelepek unsek. (Kaudiahl 4:11) Patehng met, mwomwohdiso me e kin kupwurki doadoahngki pil warohng atail lelepek oh utuht. (Ipru 13:17) Kahrehda ma iangatail tohnkaudok men pahn kansensuwedihala kitail, kitail sohte pahn uhdihsang patehng mwomwohdiso pwehn kasalehda uwen atail nsensuwed. Pwe dahme kitail en wiahki soahng wet? Kaidehn Siohwa me ketin kansensuwedihala kitail. Atail limpoak ong Siohwa sohte pahn mweidohng kitail en sohpeisang ih oh sapwellime aramas akan!​—Wadek Melkahka 119:165.

18. (a) Dahme kitail kak wia pwehn kalaudehla popohl nan mwomwohdiso? (b) Kapai dah kan me kitail kak ale ma kitail pahn mahkohng meteikan?

¹⁸ Limpoak ong iangatail tohnkaudok kan kin kamwakid kitail en kalaudehla popohl nan mwomwohdiso. Siohwa sohte ketin kasik irail kan me e kin ketin poakohng en wia aramas unsek kei. Kitail anahne alasang ih. Limpoak kin kamwakid kitail en pohnsehse sapwung tikitik kan oh tamataman me kitail koaros aramas soh unsek kei oh kin wiahda sapwung kan. (Lepin Padahk 17:9; 1 Piter 4:8) Limpoak kin sewese kitail en ‘mahkpene nanpwungatail.’ (Kolose 3:13) E sohte mengei en doadoahngki kaweid wet ahnsou koaros. Ma kitail pahn mweidohng atail nsensuwed  en poweikitaildi, ele kitail pahn kolokol pepehm wet oh lemeleme me atail nsensuwed kin kaloke aramaso me kansensuwedihala kitail. Ahpw en kolokol nsensuwed pahn kauwehla pein kitail. En mahkohng meteikan ni ahnsou me mie kahrepe mwahu pahn kihong kitail kapai laud. (Luk 17:3, 4) E kin kihong kitail popohl nan atail madamadau oh mohngiong, kolokol popohl nan mwomwohdiso, oh me keieu kesempwal, e pahn pere atail nanpwungmwahu rehn Siohwa.​—Madiu 6:14, 15; Rom 14:19.

19. Soangen irair dah kan kak pwarada me kahrehiong kitail en uhdihsang patehng emen?

¹⁹ Ekei ahnsou, kitail kin ale kaweid en uhdihsang patehng emen me kin wia tohnmwomwohdiso. Met kak wiawi ni ahnsou me emen piskensang nan mwomwohdiso pwehki e kauwehla kosonned en Koht oh sohte koluhla, de ahnsou me emen kesehla eh pwoson sang ni eh padahngki padahk likamw de ni eh pein pilada en mweisang mwomwohdiso. Mahsen en Koht kin padahkihong kitail en “dehr . . . kin patehng irail.” * (Wadek 1 Korint 5:11-13; 2 Sohn 9-11) Mwein e pahn uhdahn apwal en uhdihsang patehng emen me kin wia kompoakepatail de kisehtail. Ia duwe, kitail pahn kapwaiada kaweid wet oh kasalehda me kitail kin keieu kesempwalki atail lelepek ong Siohwa oh sapwellime kosonned pwung kan? Tamataman  me Siohwa kin ketin kesempwalki atail lelepek oh peik.

20, 21. (a) Dahme kahrehda koasoandi me emen en piskensang nan mwomwohdiso kin wia koasoandi limpoak ehu? (b) Dahme kahrehda e kesempwal kitail en pilada mwahu ihs me kitail pahn kompoakepahnki?

²⁰ Koasoandi me emen en piskensang nan mwomwohdiso kin wia koasoandi limpoak ehu sang rehn Siohwa. Dahme kahrehda? En kihsang emen me wiahda dihp ahpw sohte koluhla kin kasalehda atail limpoak ong Siohwa oh atail wauneki mware sarawio oh sapwellime koasoandi kan. (1 Piter 1:15, 16) Koasoandi wet kak pere mwomwohdiso sang irair keper kan. E kak pere tohnmwomwohdiso lelepek kan sang aramas me wiahda dihp oh sohte koluhla. Irail kak ese me mwomwohdiso kin wia wasa me sohte keper nan sampah suwed wet oh irail kak pousehla arail kaudok. (1 Korint 5:7; Ipru 12:15, 16) Peneu kehlail pil kin kasalehda limpoak ong me dipan men. Met kak kamwakid laud aramaso en wehwehki me e anahne wekidala eh mour oh wia dahme e anahne wia pwehn pwurehng pwurala rehn Siohwa.—Ipru 12:11.

²¹ Kitail sohte kak wekidala ire mehlel wet: Me kompoakepatail kan pahn kak kamwakid atail mour. Ihme kahrehda e kesempwal kitail en pilada mwahu ihs me kitail pahn kompoakepahnki. Sang ni atail kin kompoakepahnki kompoakepahn Siohwa kan oh ni atail kin poakohng irail me Koht kin ketin poakohng, kitail pahn kak ahneki kompoakepatail me keieu mwahu. Dahme kitail kin sukuhlkihsang irail pahn sewese kitail en nannantihte kaperenda Siohwa.