1-3. (a) Nguliphi liciniso lelingeke liphikwe lelivetwa liBhayibheli? (b) Singabakhetsa njani bangani labatawusenta kutsi natsi sente lokuhle?

NGANDLELA tsite, bantfu bafanana netipontji; bamunya nobe ngabe yini lebatungeletile. Bangakanaki, bamunya indlela yekucabanga, timiso, kanye nebuntfu balabo lababangani babo labakhulu.

² LiBhayibheli liveta liciniso lelingeke liphikwe nalitsi: “Lohambisana nebantfu labahlakaniphile naye ugcina asahlakaniphile; kodvwa umngani wetilima uyawuhlupheka.” (Taga 13:20) Lesaga asisho nje kutayelana nalotsite, kepha ligama lelitsi ‘kuhambisana’ lisho buhlobo lobuchubekako. * Ikhuluma ngalelivesi, incwadzi lechaza liBhayibheli itsi: “Kute bantfu bahambe ndzawonye kudzingeka babe nelutsandvo kanye nekusondzelana.” Awuvumi yini kutsi imvamisa silingisa labo lesibatsandzako? Loku kungenca yekutsi sisondzelene nalabo lesibatsandzako, lokwenta kube melula ngabo kusenta kutsi sente lokuhle nobe lokubi.

³ Kute sihlale elutsandvweni lwaNkulunkulu, kufanele sifune bangani labatawusenta kutsi sente lokuhle. Singakwenta njani loku? Ngekutsi sitsandze labo labatsandvwa nguNkulunkulu, sente bangani bakhe babe bangani betfu.  Asewucabange nje: Bakhona yini bangani labancono lesingabakhetsa kwendlula labo labanetimfanelo letitsandvwa nguJehova? Kwanyalo, asesihlole luhlobo lwebantfu Nkulunkulu lalutsandzako. Nasesinembono waJehova ngalendzaba, siyokwati kukhetsa bangani labatawusenta kutsi natsi sente lokuhle.

4. Kungani Jehova anelilungelo lekukhetsa kutsi ngubani longaba ngumngani wakhe, futsi kungani atsi Abrahama ‘ungumngani wakhe’?

⁴ Jehova uyabakhetsa labo lafuna babe bangani bakhe. Ute yini vele lilungelo lekwenta njalo? Phela uyiNkhosi lenguMbusi wendzawo yonkhe, futsi bungani naye bulilungelo lelikhulu. Bobani-ke Jehova labakhetsako kutsi babe bangani bakhe? Ukhetsa labo labametsembako futsi labanelukholo loluphelele kuye. Cabanga ngesibonelo sa-Abrahama, indvodza leyatiwa ngelukholo loluvelele. Phela kute kuvivinywa kwelukholo babe longumuntfu langase akutfole lokwendlula kucelwa kutsi anikele ngendvodzana yakhe ibengumhlatjelo. * Kepha Abrahama “wanikela nga-Isaka kutsi abe ngumhlatjelo,” anelukholo lwekutsi “Nkulunkulu unemandla ekuvusa umuntfu ngisho kulabafile.” (Hebheru 11:17-19) Ngenca yekutsi Abrahama wabonisa lukholo lolungaka futsi walalela, ngalokusuka enhlitiyweni, Jehova wambita ngekutsi ‘ngumngani wakhe.’—Isaya 41:8; Jakobe 2:21-23.

5. Jehova utiva njani ngalabo labamlalela ngebucotfo?

⁵ Jehova ufuna kutsi simlalele ngebucotfo. Uyabatsandza labo labatimisele kumlalela kwendlula tonkhe letinye tintfo. (Fundza 2 Samuweli 22:26.) Njengobe sibonile eSehlukweni  sekucala salencwadzi, Jehova ujabula kakhulu ngalabo labakhetsa kumlalela ngobe bamtsandza. Taga 3:32 titsi: “Labalungile balitsemba lakhe.” Labo labacotfo kuNkulunkulu futsi labagcina timfuneko takhe, batfola simemo lesiligugu lesivela kuJehova: Bangaba timenywa “ethempelini” lakhe—bangamkhonta futsi bathandaze kuye nganobe ngabe ngusiphi sikhatsi.—Tihlabelelo 15:1-5.

6. Lutsandvo lwetfu ngaJesu singalubonisa njani, futsi Jehova utiva njani ngalabo labatsandza iNdvodzana yakhe?

⁶ Jehova uyabatsandza labo labatsandza Jesu, iNdvodzana yakhe lekukuphela kwayo. Jesu watsi: “Umuntfu nakangitsandza, uyawugcina emavi ami. Babe uyawumtsandza. Tsine-ke naBabe siyawuta kuye, sihlale naye.” (Johane 14:23) Singalubonisa njani lutsandvo lwetfu ngaJesu? Ngekutsi silalele imiyalo yakhe, lehlanganisa umsebenti wekushumayela tindzaba letinhle newekwenta bafundzi. (Matewu 28:19, 20; Johane 14:15, 21) Lutsandvo lwetfu ngaJesu silubonisa nangekutsi ‘simlandzele etinyatselweni takhe.’ Ngalokusemandleni etfu, kufanele simlingise ngemavi etfu nangetento tetfu. (1 Phetro 2:21) Jehova uyajabula lapho labo labatsandza iNdvodzana yakhe balandzela tinyatselo tayo.

7. Kungani kukuhlakanipha kwenta bangani baJehova babe bangani betfu?

⁷ Lukholo, kwetsembeka, kulalela, kanye nelutsandvo ngaJesu nangetindlela takhe—nguletinye tetimfanelo Jehova latifunako kubangani baKhe. Ngamunye wetfu wenta kahle ngekutibuta: ‘Letimfanelo kanye netindlela tekutiphatsa tikhona yini kubangani bami labakhulu? Sengibentile yini bangani baJehova baba bangani bami?’ Kwenta njalo kukuhlakanipha. Bantfu labanetimfanelo taNkulunkulu futsi labashumayela tindzaba lenhle teMbuso ngenshiseko bangasenta kutsi sente lokuhle. Bangaphindze basente siphile ngendlela leyawujabulisa Nkulunkulu.—Fundza  libhokisi lelitsi: “ Ngulonjani Umngani Lomuhle?”

8. Yini lekumangalisako ngebungani (a) baNawomi naRuthe? (b) bemaHebheru lamatsatfu? (c) kanye nebaPawula naThimothi?

⁸ ImiBhalo igcwele tibonelo tebantfu labazuza ngekukhetsa bangani labahle. Ungafundza ngebungani baNawomi kanye namalukatane wakhe Ruthe, bungani emkhatsini wemaHebheru lamatsatfu langazange alahlane ngesikhatsi aseBhabhulona, kanye nebungani baPawula naThimothi. (Ruthe 1:16; Danyela 3:17, 18; 1 Khorinte 4:17; Filiphi 2:20-22) Asesihlole lesinye sibonelo lesigcamile kuloku: Bungani emkhatsini waDavide naJonathani.

9, 10. Babusekelwephi bungani baDavide naJonathani?

⁹ LiBhayibheli litsi ngemuva kwekutsi Davide abulale Goliyathi, “Jonathani waba ngumoya munye naDavide, ngobe wamtsandza njengobe atitsandza yena.” (1 Samuweli 18:1) Bacala kanjalo-ke bungani lobungazange buphele, nobe nje bebangalingani ngeminyaka, futsi bachubeka kwaze kwaba sekufeni kwaJonathani emphini. * (2 Samuweli 1:26) Babusekelwephi lobungani lobucinile balaba lababili?

¹⁰ Davide naJonathani bebahlanganiswa lutsandvo ngaNkulunkulu kanye nesifiso sekuhlala betsembekile kuye. Bebaphindze bahlanganiswe sifiso sabo sekujabulisa Nkulunkulu. Ngamunye wabo abenetimfanelo letatimenta atsandzeke kulona lomunye. Akungabateki kutsi Jonathani wamangaliswa sibindzi nenshiseko yalomfana lowalwela ligama laJehova ngekungesabi. NaDavide wamhlonipha Jonathani, lowasekela emalungiselelo aJehova ngekwetsembeka, futsi wabeka inhlalakahle yaDavide kucala kuneyakhe.  Akewucabange ngaloko lokwenteka ngesikhatsi Davide acindzeteleke kakhulu, aphila njengembaleki ehlane, njengobe abebalekela lulaka lwaSawula iNkhosi lembi, uyise waJonathani. Abonisa kwetsembeka lokumangalisako, Jonathani watsatsa sinyatselo kucala futsi ‘wesuka waya kuDavide kuyewumcinisa sandla sakhe kuNkulunkulu.’ (1 Samuweli 23:16) Asewucabange nje indlela Davide lativa ngayo lapho  umngani wakhe lamtsandzako eta kuye amsekela futsi amkhutsata. *

11. Yini lesiyifundzako esibonelweni sebungani baJonathani naDavide?

¹¹ Yini lesiyifundzako kulesibonelo saJonathani naDavide? Ngetulu kwako konkhe, siyabona kutsi lokubaluleke kakhulu ngebangani, kutsi bafanane ngetintfo takamoya. Lapho sisondzelana nalabo labanetinkholelo, simo sekutiphatsa lesifanana nesetfu, kanye nesifiso sekuhlala setsembekile kuNkulunkulu, singakhona kukhutsatana futsi sakhane  ngemavi, kanye nangalesihlangene nako ekuphileni. (Fundza Roma 1:11, 12.) Bangani labanjalo sibatfola etikhontini taNkulunkulu. Loku kusho kutsi wonkhe umuntfu lobakhona emihlanganweni lebaseHholweni leMbuso, ungumngani lomuhle yini? Cha! Akusinjalo.

12, 13. (a) Kungani kufanele sibakhetse ngekuhlakanipha bangani nakumaKhristu lesikanye nawo? (b) Nguyiphi insayeya emabandla elikhulu lekucala labhekana nayo, futsi loko kwabangela Pawula kutsi anikete siphi secwayiso?

¹² Ngisho nasebandleni, kufanele sikhetse nangabe sifuna kutsi bangani betfu kube ngulabo labatawusisita sikhule ebuhlotjeni betfu naNkulunkulu. Kufanele kusimangalise yini loku? Cha. Lamanye emaKhristu ebandleni kungawatsatsa sikhatsi kutsi abe nebuhlobo lobucinile naNkulunkulu, njengobe nje naletinye titselo esihlahleni tingatsatsa sikhatsi kutsi tivutfwe. Ngako-ke, kulelo nalelo bandla, kunemaKhristu langafanani ngelizinga lawo lekukhula etintfweni takamoya. (Hebheru 5:12–6:3) Ngako-ke, kufanele sibabeketelele futsi sibatsandze labo labasandza kuhlanganyela nobe lababutsakatsaka, njengobe sifuna nabo bakhule etintfweni takamoya.—Roma 14:1; 15:1.

¹³ Ngaletinye tikhatsi, kungaba netimo ebandleni letidzinga kutsi sicaphele labo lababangani betfu. Labanye kungenteka bahlanganyela ekutiphatseni lokungabatisako. Labanye bangase bacale kuba nemoya lomubi wekukhonona. Nemabandla elikhulu lekucala C.E. abhekana nebumatima lobufananako. Nobe nje emalunga awo lamanyenti abetsembekile, kodvwa labatsite kubo bebangatiphatsi kahle. Ngenca yekutsi labanye ebandleni laseKhorinte bebangasatigcini letinye timfundziso tebuKhristu, umphostoli Pawula walicwayisa lelo bandla watsi: “Ningayengeki: Bangani lababi bonakalisa similo lesihle.” (1 Khorinte 15:12, 33) Pawula wecwayisa Thimothi ngekutsi nemaKhristu lakanye nawo  kungenteka ngaletinye tikhatsi angatiphatsi ngendlela lefanele. Wamtjela kutsi akhweshe kubantfu labanjalo, futsi angabenti bangani bakhe.—Fundza 2 Thimothi 2:20-22.

14. Singasisebentisa njani lesimiso lesitfolakala kuleseluleko saPawula ngebangani?

¹⁴ Singasisebentisa njani lesimiso lesitfolakala kuleseluleko saPawula? Ngekugwema kutihlanganisa nanobe ngubani losebandleni nobe ngaphandle, longasiyengela ebubini. (2 Thesalonika 3:6, 7, 14) Kufanele sibuvikele buhlobo betfu naJehova. Khumbula kutsi njengesipontji, simunya imikhuba kanye nendlela yekuphila yebangani betfu. Njengobe nje singeke sifake sipontji kuviniga bese silindzela kutsi sigcwale emanti, ngaloko-ke angeke sitihlanganise nalabo labangatiphatsi kahle bese silindzela kutfola imikhuba lemihle.—1 Khorinte 5:6.

15. Ungabatfola njani bangani labalwela kugcina buhlobo babo naJehova ebandleni lebuKhristu?

¹⁵ Lokuhle kutsi manyenti ematfuba ekutfola bangani labahle emkhatsini wetikhonti taNkulunkulu. (Tihlabelelo 133:1) Ungabatfola njani bangani labalwela kugcina buhlobo babo naJehova ebandleni lebuKhristu? Njengobe ulwela kuba netimfanelo letinhle kanye nekutiphatsa ngendlela lejabulisa Nkulunkulu, akungabateki kutsi nalabanye labacabanga njengawe nabo batawusondzela kuwe. Kepha-ke, kufanele utsatse sinyatselo kucala kute wakhe bangani labasha. (Fundza libhokisi lelitsi “ Indlela Lesabakha Ngayo Bangani Labahle.”) Kufanele ubuke labo labanetimfanelo nawe lofuna kuba nato. Lalela seluleko seliBhayibheli sekuba ‘nenhlitiyo levulekile,’ wakhe bungani nawo onkhe emaKhristu kungakhatsaliseki kutsi bantfu basiphi sive futsi balandzela maphi emasiko. (2 Khorinte 6:13; fundza 1 Phetro 2:17.) Ungetayelani nje kuphela nalabo lolingana nabo ngeminyaka. Khumbula kutsi Jonathani abemdzala kakhulu kunaDavide. Bantfu labadzala labanyenti benta bungani bube mnandzi, ngemavi nangekuhlakanipha kwabo.

16, 17. Nangabe umKhristu asivise buhlungu ngandlela tsite, kungani kungafanele siyekele kuhlanganyela nelibandla?

¹⁶ Njengobe kunekungafanani lokungaka ebuntfwini betfu nasendleleni lesikhule ngayo ebandleni lebuKhristu, kungahle kube netinkinga njengobe sikhatsi sichubeka. Lomunye umKhristu angasho nobe ente intfo lesivisa buhlungu. (Taga 12:18) Kuba nemibono leyehlukene, kanye nebuntfu lobungafanani, kungenta timo tibe matima nakakhulu. Tinkinga letinjalo kufanele tisikhube yini, kangangekutsi siyekele nekuhlanganyela nelibandla lebuKhristu? Nangabe simtsandza kakhulu Jehova kanye nalabo labatsandzako angeke siyekele.

¹⁷ Njengobe Jehova anguMdali wetfu futsi anguMniki Kuphila, uyakufanelekela kutsi simtsandze futsi sitinikele kuye ngalokuphelele. (Sembulo 4:11) Nelibandla lakujabulelako kulisebentisa, nalo kufanele silisekele ngebucotfo.  (Hebheru 13:17) Ngako-ke, nangabe umKhristu asivisa buhlungu nobe asidvumata ngandlela tsite, angeke siyekele kuhlanganyele nelibandla. Akusuye Jehova losivise buhlungu. Lutsandvo ngaJehova angeke lusivumele simlahle nobe silahle bantfu bakhe.—Fundza Tihlabelelo 119:165.

18. (a) Yini lesingayenta kute sikhutsate kuthula ebandleni? (b) Ngutiphi tibusiso letiletfwa kukhetsa kutsetselela nangabe unetizatfu letivakalako tekwenta kanjalo?

¹⁸ Lutsandvo lwetfu ngemaKhristu lusikhutsata kutsi sibe nekuthula ebandleni. Jehova akalindzeli kutsi labo labatsandzako babengulabaphelele, natsi futsi akukafanele sikulindzele loko. Lutsandvo lwenta kutsi singanaki emaphutsana ebazalwane betfu, ngobe siyakhumbula kutsi sonkhe asikapheleli futsi siyawenta emaphutsa. (Taga 17:9; 1 Phetro 4:8) Lutsandvo lusisita kutsi sichubeke ‘sitsetselelana ngalokukhululekile.’ (Kholose 3:13) Liciniso kutsi akusimelula kusebentisa leseluleko. Nasingavumela intfukutselo kutsi isincobe, sitawuphoceleleka ekutseni sibambe emagcubu, mhlawumbe sibe nemuva wekutsi kutfukutsela kwetfu kutawumvisa buhlungu lona losonile. Ngalokuvamile, kubamba emagcubu kuyingoti kitsi. Kukhetsa kutsetselela nangabe unesizatfu lesivakalako sekwenta kanjalo, kuletsa tibusiso. (Lukha 17:3, 4) Kusenta sibe nekuthula kwengcondvo, futsi kwenta kutsi kube nekuthula ebandleni, futsi ngetulu kwako konkhe kulondvolota buhlobo betfu naJehova.—Matewu 6:14, 15; Roma 14:19.

19. Ngutiphi timo letingenta kutsi kudzingeke siyekele kutihlanganisa nalotsite?

¹⁹ Ngaletinye tikhatsi siyacelwa kutsi siyekele kutihlanganisa nalotsite lobekalilunga lelibandla. Lesimo siyenteka nangabe lotsite ephule umtsetfo waNkulunkulu futsi angaphendvuki bese uyasuswa ekuhlanganyeleni. Nobe lapho lomunye alahla kukholwa kwakhe ngekufundzisa timfundziso temanga bese uyatehlukanisa nelibandla. LiVi laNkulunkulu  lisitjela ngalokucacile: “Ningahlanganyeli” nebantfu labanjalo. * (Fundza 1 Khorinte 5:11-13; 2 Johane 9-11) Kungaba yinsayeya lenkhulu kugwema umuntfu lebekangumngani wetfu nobe sihlobo setfu. Sitawuma sicinile yini sikhombisa kwetsembeka kwetfu kuJehova kulendzaba, nasemitsetfweni yakhe lelungile ngetulu kwanobe ngabe yini lenye? Khumbula kutsi Jehova ukwatisa kangakanani kulalela nekwetsembeka kuye.

20, 21. (a) Kungani kususa umuntfu ekuhlanganyeleni kulilungiselelo lelutsandvo? (b) Kubaluleke ngani kukhetsa bangani betfu ngekuhlakanipha?

²⁰ Lilungiselelo lekususwa kwemuntfu lusipho selutsandvo lesivela kuJehova. Kungani sisho kanjalo? Kususa soni lesingaphendvuki kukhombisa lutsandvo ngelibito laJehova lelingcwele, netindlela takhe letiphakeme, kanye nangaye Jehova cobo lwakhe. (1 Phetro 1:15, 16) Kususwa kwemuntfu lowonile kugcina libandla liphephile. EmaKhristu letsembekile ayaphephiswa ekuyengweni toni letingaphendvuki, futsi achubeka akhonta Jehova ati kutsi libandla liyindzawo langaphephela kuyo kulelive lelibi. (1 Khorinte 5:7; Hebheru 12:15, 16) Lesijeziso lesicinile sibonisa lutsandvo ngaloyo lowente sono. Kungevakala kwetfusa, kepha kutawumsita ashintje indlela yakhe yekucabanga futsi atsatse tinyatselo letifanele kutsi abuyele kuJehova.—Hebheru 12:11.

²¹ Angeke siliphike liciniso lekutsi bangani betfu labakhulu banendzima lenkhulu ekutseni yini lesiyentako. Ngako-ke kubalulekile kutsi sikhetse bangani betfu ngekuhlakanipha. Ngekwenta bangani baJehova babe bangani betfu, nekutsandza nalabo labatsandvwa nguNkulunkulu, sitawube sitentela bangani labanyenti labancono kakhulu. Loko lesikutfola kubo kutawusisita kutsi sichubeke siphila ngendlela lejabulisa Jehova.