1-3. (a) Baibel i kamapim wanem tok i tru? (b) Olsem wanem yumi ken makim ol poroman husat bai kirapim yumi long mekim gutpela pasin?

 YUMI ol man i olsem spans. Olsem spans i save pulim wara samting, em i isi tru long yumi pulim, olsem kisim na bihainim tingting, pasin, na ol lo bilong ol man yumi stap wantaim ol.

² Baibel i kamapim wanpela tok i tru olsem: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Dispela savetok i no toktok long ol man yumi save bungim wan wan taim tasol, nogat. Dispela tok “wokabaut wantaim” i makim pasin bilong poroman oltaim wantaim wanpela man. Wanpela dikseneri bilong Baibel i stori long dispela ves olsem: “Pasin bilong wokabaut wantaim wanpela man i makim olsem yu laikim em na yu pas gut wantaim em.” Ating bai yu wanbel long tok olsem, yumi save bihainim pasin bilong ol man yumi laikim. Tru tumas, yumi save pas gut wantaim ol man yumi laikim, olsem na pasin bilong ol inap stiaim yumi​—long mekim gutpela pasin o pasin nogut.

 ³ Bilong stap insait yet long pasin laikim bilong God, em i bikpela samting long yumi painim ol poroman husat bai kirapim yumi long mekim gutpela pasin. Olsem wanem yumi ken mekim dispela? Yumi ken mekim dispela long rot bilong laikim ol man em God i save laikim, na kamap pren bilong ol pren bilong God. Tingim dispela. Ol lain i gat ol pasin em Jehova i laik bai ol pren bilong em i gat, ol i nambawan gutpela lain bilong poromanim. Orait nau yumi ken skelim wanem kain ol man God i save laikim. Taim yumi holim tingting bilong Jehova, bai yumi inap makim gut ol man i gutpela long poroman wantaim ol.

4. Bilong wanem Jehova i gat rait long makim gut wanem kain man em i laik poromanim? Bilong wanem Jehova i kolim Abraham olsem “pren bilong mi”?

⁴ Jehova i save makim gut wanem kain man em i laik poromanim. Na em i gat rait long mekim olsem. Em i Bikpela King bilong heven na graun, na pasin bilong i stap pren bilong em, dispela em nambawan gutpela samting man i ken kisim. Orait em i save makim husat long i stap pren bilong em? Jehova i save go klostu long ol man husat i trastim em na i bilip tru long em. Olsem, tingim bilipman Abraham, em man i gat strongpela bilip tru. Sapos wanpela man i askim wanpela papa long kilim i dai pikinini man bilong em olsem ofa, dispela bai traim tru bilip bilong em, winim olgeta narapela traim. a Tasol Abraham i bilip  tru olsem ‘sapos Aisak i dai, God inap long kirapim em bek,’ na em i redi long “givim Aisak long God” olsem ofa. (Hibru 11:​17-19) Abraham i bilip strong na i bihainim tok, olsem na long gutpela pasin laikim Jehova i kolim em “pren bilong mi.”​—Aisaia 41:8; Jems 2:​21-23.

5. Jehova i ting olsem wanem long ol man i save bihainim oltaim tok bilong em?

⁵ Long tingting bilong Jehova, pasin bilong bihainim tok bilong em i bikpela samting tru. Em i save laikim tru ol man husat i ting pasin bilong stap gut long em i winim olgeta narapela samting. (2 Samuel 22:26) Olsem yumi lukim long Sapta 1 bilong dispela buk, Jehova i laikim tru ol man husat i bihainim tok bilong em, long wanem, ol i laikim em. Sindaun 3:32 i tok: “Bikpela i stap wanbel tru wantaim ol man i save wokabaut stret.” Ol man i bihainim ol lo bilong God, Jehova i singautim ol long ol i ken i stap long “haus” bilong em​—ol i ken lotuim em na beten long em long olgeta kain taim.​—Song 15:​1-5.

6. Olsem wanem yumi ken soim olsem yumi laikim tru Jisas? Jehova i ting olsem wanem long ol man i laikim tru Pikinini bilong em?

⁶ Jehova i save laikim ol man i laikim Jisas, em dispela wanpela Pikinini bilong em. Jisas i tok: “Sapos man i laikim mi tru, em bai i bihainim gut tok bilong mi. Na Papa bilong mi bai i laikim dispela man. Na bai mitupela i kam long em na i stap wantaim em oltaim oltaim.” (Jon 14:23) Olsem wanem yumi ken soim olsem yumi laikim tru Jisas? Long rot bilong bihainim ol tok bilong em, na wanpela bilong ol dispela tok em yumi mas autim gutnius na kamapim ol disaipel. (Matyu 28:​19, 20; Jon 14:​15, 21) Yumi soim pasin bilong yumi long laikim Jisas taim yumi “bihainim  gut lek mak bilong en,” olsem yumi bihainim toktok na pasin bilong em inap tru long skel bilong yumi ol man i gat sin. (1 Pita 2:​21, NW ) Jehova i pilim tru hatwok bilong ol man em pasin bilong laikim tru Pikinini bilong em i kirapim ol long bihainim pasin bilong Krais.

7. Bilong wanem em savetingting long kamap pren bilong ol man i pren bilong Jehova?

⁷ Pasin bilong bilip, bihainim tok, stap gut long Jisas, na laikim em na laikim ol lo bilong em​—em ol pasin Jehova i laik bai ol pren bilong Em i mas i gat. Yumi olgeta wan wan i mas askim yumi yet olsem: ‘Ol gutpela pren bilong mi i gat ol kain pasin olsem? Mi kamap pren bilong ol man i pren bilong Jehova?’ Em savetingting long mekim olsem. Ol man husat i kamapim ol pasin bilong God na i givim bel long autim gutnius bilong Kingdom ol inap helpim tru yumi, ol inap strongim laik bilong yumi long mekim ol samting God i laikim.​—Lukim blok “ Gutpela Pren i Wanem Kain Man?” long pes 33.

8. Yu pilim wanem samting long pasin pren bilong (a) Naomi na Rut? (b) tripela yangpela Hibru? (c) Pol na Timoti?

⁸ Baibel i gat stori bilong planti man husat i kisim helpim taim ol i makim ol gutpela poroman. Yu inap ritim stori bilong pasin pren i stap namel long Naomi na tambu meri bilong em Rut, na namel long tripela yangpela Hibru husat i pas gut wantaim long Babilon, na namel long Pol na Timoti. (Rut 1:16; Daniel 3:​17, 18; 1 Korin 4:17; Filipai 2:​20-22) Tasol nau yumi ken stori long pasin pren bilong narapela tupela man i stap gutpela piksa tru: em Devit na Jonatan.

9, 10. Wanem samting i as bilong pasin pren bilong Devit na Jonatan?

 ⁹ Baibel i tok bihain long Devit i kilim i dai Goliat, “Jonatan . . . i givim bel bilong en moa yet long Devit na em i laikim Devit tru olsem em i laikim em yet.” (1 Samuel 18:1) Long dispela taim tupela i kamap pren maski krismas bilong Jonatan i winim tru krismas bilong Devit. Pasin pren bilong tupela i strong tru i go inap long taim Jonatan i dai long wanpela pait. b (2 Samuel 1:26) Wanem samting i as bilong strongpela pasin pren i stap namel long tupela?

¹⁰ Devit na Jonatan i pas gut wantaim, long wanem, tupela i laikim tru God na ol i gat strongpela laik long stap gut long em. Dispela laik i mekim na pasin pren bilong tupela i strong. Tupela wantaim i kamapim ol pasin em narapela i laikim. Jonatan i pilim tru pasin bilong yangpela Devit long sanap strong na givim bel tru long sambai long nem bilong Jehova. Devit i rispektim tru Jonatan husat i stap gut long ol pasin Jehova i putim na em i putim laik bilong Devit i go pas long laik bilong em yet. Tingim samting i bin kamap taim bel bilong Devit i bagarap stret. Em i raun olsem wanpela ranaweman long ples nating, em i ranawe long King Sol, papa bilong Jonatan. Jonatan i kamapim pasin bilong em long stap gut long Devit, na em i kirap na “i go lukim em na mekim gutpela tok long em bai Devit i bilip strong long God.” (1 Samuel 23:16) Pilim tingting bilong Devit taim gutpela pren bilong em  i kam bilong helpim na strongim bel bilong em! c

11. Stori bilong Jonatan na Devit i lainim yu long wanem samting long pasin pren?

 ¹¹ Stori bilong Jonatan na Devit i lainim yumi long wanem samting? Bikpela samting tru em yumi lukim olsem nambawan bikpela samting i pasim tupela pren wantaim em ol samting bilong spirit. Taim yumi pas gut wantaim ol man i gat wankain bilip olsem yumi, na ol i save bihainim ol wankain lo long stretpela pasin, na ol tu i laik stap gut long God, dispela inap mekim na ol tingting, ol samting yumi pilim long bel, na ol ekspiriens yumi kisim i ken strongim narapela narapela. (Rom 1:​11, 12) Yumi ken painim ol kain poroman i tingim ol samting bilong spirit namel long ol wanbilip bilong yumi. Tasol yu ting dispela i makim olsem  olgeta lain i kam long ol miting long Haus Kingdom, ol i gutpela long poroman wantaim ol? Nogat, i no olsem.

12, 13. (a) Bilong wanem yumi mas was gut taim yumi makim ol poroman namel long ol wanbilip Kristen tu? (b) Wanem hevi i painim ol kongrigesen long taim bilong ol aposel? Dispela i kirapim Pol long mekim wanem ol strongpela tok lukaut?

¹² Insait long kongrigesen tu, yumi mas makim gut ol poroman na bai yumi poromanim ol lain husat bai strongim yumi long ol samting bilong spirit. Olsem wanem? Yumi kirap nogut long dispela? Nogat. Sampela Kristen long kongrigesen i no save kamap strong hariap, wankain olsem sampela prut i stap long diwai i no save mau hariap. Olsem na long olgeta kongrigesen i gat sampela Kristen i no strong yet long ol samting bilong spirit wankain olsem ol arapela. (Hibru 5:12–6:3) Yumi no les kwik na yumi soim pasin laikim long ol nupela lain o ol lain i no strong, long wanem, yumi laik helpim ol long kamap strong.​—Rom 14:1; 15:1.

¹³ Sampela taim, wanpela samting inap kamap insait long kongrigesen na nau yumi mas lukaut gut long ol lain yumi poroman wantaim ol. Sampela inap insait long pasin i no stret tumas. Na sampela inap kisim pasin bilong bel nogut na komplein. Wankain samting i bin painim ol kongrigesen long taim bilong ol aposel. Planti bratasista insait long kongrigesen i stap gut, tasol sampela i no mekim gutpela pasin. Sampela insait long kongrigesen Korin i no bihainim sampela bilip Kristen, olsem na aposel Pol i givim tok lukaut long kongrigesen, em i tok: “Yupela i no ken larim ol arapela man i giamanim yupela. Yupela i save long dispela tok, ‘Sapos  yumi poroman wantaim ol man nogut, bai ol i bagarapim gutpela pasin bilong yumi.’” (1 Korin 15:​12, 33) Pol i tokim Timoti olsem namel long ol wanbilip Kristen i gat sampela husat i mekim pasin i no stret. Em i tokim Timoti long stap longwe long ol kain man olsem, em i no ken pas wantaim ol.​—2 Timoti 2:​20-22.

14. Olsem wanem yumi ken bihainim stiatok i stap long ol tok lukaut bilong Pol long ol poroman?

¹⁴ Olsem wanem yumi ken bihainim stiatok i stap long ol tok lukaut bilong Pol? Yumi no ken poroman wantaim wanpela man​—insait o ausait long kongrigesen​—husat inap bagarapim bilip bilong yumi. (2 Tesalonaika 3:​6, 7, 14) Yumi mas lukautim pasin bilong yumi long pas gut wantaim Jehova. Tingim, olsem spans, yumi save pulim, olsem kisim na bihainim tingting na pasin bilong ol pren yumi pas gut wantaim ol. Yumi no inap putim spans long doti wara na ting olsem spans bai pulap long klinpela wara, na olsem tasol yumi no inap poroman wantaim ol lain i no gat gutpela pasin na ting olsem yumi bai kisim ol gutpela pasin, nogat.​—1 Korin 5:6.

15. Olsem wanem yu ken painim ol poroman insait long kongrigesen em ol i strong long ol samting bilong spirit?

¹⁵ Tasol gutpela tru na yumi inap painim planti gutpela poroman namel long ol wanbilip. (Song 133:1) Olsem wanem yu ken painim ol poroman insait long kongrigesen em ol i strong long ol samting bilong spirit? Taim yu wok long kisim ol pasin God i laikim, ol narapela husat i gat wankain pasin ol bai laik kamap pren bilong yu. Tasol tu, ating yu yet i mas go pas na mekim sampela samting bilong kisim ol nupela pren. (Lukim blok “ Olsem Wanem Mipela i Bin Kisim Ol  Gutpela Pren?” long pes 34.) Painim ol pren i gat ol pasin yu yet i laik kamapim. Bihainim tok bilong Baibel long laikim moa yet ol wanbilip, painim ol pren namel long ol maski ol i bilong wanem skin, kantri, o lain. (2 Korin 6:13; 1 Pita 2:17) No ken poromanim tasol ol wankrismas bilong yu. Tingim, krismas bilong Jonatan i winim tru krismas bilong Devit. Taim yu poroman wantaim lain i gat bikpela krismas, save na gutpela tingting bilong ol inap helpim yu tru.

16, 17. Sapos wanpela wanbilip i bagarapim bel bilong yumi, bilong wanem yumi no ken lusim kongrigesen?

¹⁶ Ol bratasista insait long kongrigesen i gat kain kain pasin na ol i bilong kain kain sindaun, olsem na sampela taim hevi inap kamap. Wanpela wanbilip inap  mekim sampela tok o pasin i bagarapim bel bilong yumi. (Sindaun 12:18) Sampela taim hevi i kamap, long wanem, pasin bilong yumi i no wankain, yumi kisim tingting kranki, o yumi no gat wankain tingting long sampela samting. Olsem wanem? Bai yumi pundaun na lusim kongrigesen taim kain hevi olsem i kamap? Bai yumi no mekim olsem sapos yumi laikim tru Jehova na ol lain em i laikim.

¹⁷ Jehova em i Man Bilong Wokim yumi na Man i helpim yumi long i stap laip, olsem na i stret yumi laikim em na givim bel olgeta long em. (KTH 4:11) Na tu, i stret yumi stap gut long kongrigesen em Jehova i amamas long mekim wok long en. (Hibru 13:17) Olsem na sapos wanpela wanbilip i bagarapim bel bilong yumi o yumi bel hevi long em, bai yumi no lusim kongrigesen bilong soim olsem yumi no amamas. Nogat tru! Jehova i no bin bagarapim bel bilong yumi. Pasin bilong yumi long laikim Jehova i mekim na yumi no inap givim baksait long em na long lain bilong em, nogat tru!​—Song 119:165.

18. (a) Yumi ken mekim wanem bilong kamapim bel isi insait long kongrigesen? (b) Pasin bilong fogivim rong taim i gat as tru bilong mekim olsem, dispela i save kamapim wanem ol gutpela samting?

¹⁸ Pasin bilong laikim ol wanbilip i kirapim yumi long kamapim pasin wanbel insait long kongrigesen. Jehova i no ting ol man em i laikim ol i mas i stap gutpela olgeta, na yumi tu i no ken ting olsem. Pasin laikim i helpim yumi long lusim tingting long ol liklik popaia, yumi tingim olsem yumi olgeta i gat sin na yumi save popaia. (Sindaun 17:9; 1 Pita 4:8) Pasin laikim i helpim yumi long wok yet long “lusim sin bilong ol arapela.” (Kolosi 3:13) Sampela taim i hatwok  long bihainim dispela tok. Sapos yumi bel hevi i stap, dispela inap mekim na yumi bel nogut i go i go, na yumi inap ting kros bilong yumi bai mekim save long man i bin bagarapim bel bilong yumi. Tasol pasin bilong bel nogut i stap bai bagarapim yumi yet tasol. Pasin bilong fogivim rong taim i gat as tru bilong mekim olsem, dispela i save kamapim planti gutpela samting. (Luk 17:​3, 4) Dispela pasin i mekim na bel na tingting bilong yumi i stap isi, bel isi i stap insait long kongrigesen, na bikpela samting moa, yumi pas gut wantaim Jehova.​—Matyu 6:​14, 15; Rom 14:19.

19. Wanem samting inap kamap na nau yumi no ken poroman moa wantaim wanpela?

¹⁹ Sampela taim yumi mas lusim pasin bilong poroman wantaim wanpela brata o sista bilong kongrigesen. Dispela samting i save kamap taim wanpela i brukim lo bilong God na i no tanim bel na kongrigesen i rausim em, o taim wanpela i sakim bilip long rot bilong skulim ol man long ol bilip giaman, o taim wanpela i rausim em yet long kongrigesen. Baibel i tok klia olsem yumi mas “lusim pasin bilong poroman wantaim” ol kain lain olsem. d (1 Korin 5:​11-13, NW; 2 Jon 9-11) Sapos wanpela em i wanblut bilong yumi o bipo em i pren bilong yumi, dispela inap mekim na i hatwok tru long yumi lusim pasin bilong poromanim em. Olsem wanem? Bai yumi strong long bihainim lo bilong Baibel, na long dispela rot yumi soim olsem pasin  bilong stap gut long Jehova na ol stretpela lo bilong em i bikpela samting long yumi, winim ol narapela samting? Tingim: Long tingting bilong Jehova, pasin bilong stap gut long em na bihainim tok i bikpela samting tru.

20, 21. (a) Bilong wanem pasin bilong rausim man i wanpela gutpela samting? (b) Bilong wanem em i bikpela samting long yumi makim gut ol lain yumi poroman wantaim ol?

²⁰ Pasin bilong rausim man i wanpela gutpela samting Jehova i putim. Bilong wanem i olsem? Pasin bilong rausim sinman i no tanim bel, dispela i kamapim klia pasin bilong laikim Jehova, nem holi bilong em na ol lo bilong em. (1 Pita 1:​15, 16) Pasin bilong rausim man, dispela i lukautim kongrigesen. Dispela bai banisim ol gutpela bratasista long pasin nogut bilong ol man i bikhet na mekim rong, na tu, ol i ken mekim lotu na save olsem kongrigesen em ples we ol i ken i stap gut na pasin nogut bilong dispela graun i no ken bagarapim ol. (1 Korin 5:7; Hibru 12:​15, 16) Dispela strongpela strafe i bilong helpim man i mekim rong. Dispela inap kirapim em long kisim stretpela tingting na mekim ol samting bilong kam bek long Jehova.​—Hibru 12:11.

²¹ Ol lain yumi poroman wantaim ol, ol inap stiaim tru tingting na pasin bilong yumi. Olsem na em i bikpela samting long yumi makim gut ol lain yumi poroman wantaim ol. Taim ol pren bilong Jehova ol i kamap pren bilong yumi, na yumi laikim ol man em God i laikim, bai yumi gat ol gutpela poroman tru. Ol pasin na tingting yumi kisim long ol bai helpim yumi long inapim laik bilong yumi long mekim ol samting Jehova i laikim.