TOKO FAHA-3
Tiava Olo Tiany Zan̈ahary
“Lan̈iany olo miaraka aminolo misy jery hanjary ho hisy jery.”—OHABOLANA 13:20.
1-3. a) Ino volan̈a marin̈y nambarany Baiboly momba naman̈a? b) Akory hazahoantsika naman̈a handrisiky atsika han̈ano ny tsara?
ATSIKA olombelon̈o io mety hampitovisin̈y aminy eponzy. Tsintsefiny eponzy io lan̈iany ranondraha man̈odidin̈y izy. Karaha zen̈y koa atsika. Mora amintsika mangala tahaka toetsain̈y, fitondranten̈a ndreky toetrinolo mifandray amintsika, ndray tsy kiniantsika raha zen̈y.
2 Baiboly mivolan̈a karaha ty: “Lan̈iany olo miaraka aminolo misy jery hanjary ho hisy jery, fa lan̈iany olo minaman̈a aminolo tsisy sain̈y ndraiky ho azondraha.” (Ohabolana 13:20) Tsy olo mahalan̈a mifanojy amintsika koran̈iny Baiboly amy “miaraka” io, fa olo ‘tiantsika ndreky mifankahazo be’ amintsika in̈y. * Akory fahitanao izy, tsy mora mangala tahaka olo tiantsika atsika io? Arakaraka olo ataontsika naman̈a hahavy atsika han̈ano raha tsara na han̈ano raha ratsy.
3 Mila mifen̈y fo atsika hitady olo handrisiky atsika han̈ano ny tsara, baka atsika tsy hiala amy fitiavany Zan̈ahary. Akory hazahoantsika naman̈a tsara karaha zen̈y? Izikoa dinihin̈y, olo tiany Zan̈ahary ndreky olo manan̈a toetry tiany Jehovah fo tokony hitiavintsika. Dikanizen̈y, olo efa namany Jehovah fo tokony hataontsika naman̈a. Ke izio ma olo karakory tiany Zan̈ahary? Aia mety hahitantsika naman̈a tsara karaha zen̈y? Ho haintsika hifidy naman̈a tsara, izikoa mazava amintsika tsarabe fomba fisain̈any Jehovah.
OLO KARAKORY MA TIANY ZAN̈AHARY?
4. Nan̈ino ma Jehovah manan̈a zo hifidy olo tiany hatao naman̈a? Karakory nahavy Abrahama nanjary ‘namany’ Jehovah?
4 Jehovah mifidy olo ataony naman̈a. Zonany zen̈y, fotony izy Tompo Farany An̈abo. Tsisy voninahitry be mandilatra ataony Jehovah naman̈a zen̈y! Olo karakory amy zay fidiny Jehovah atao naman̈a? Olo matoky izy ndreky mino izy amy fo jiaby. Aleva onon̈o baka Abrahama. Ten̈a fatatra finoan̈anany. Indraiky andra izy nirahiny Jehovah nan̈ano soron̈o zanany. * Zen̈y donko raha farany sarotro amy raimandreny araiky! Kanefa, Abrahama efa von̈ono han̈ano soron̈o Isaka zanany, fotony izy natoky fa ‘hainy Jehovah fo hamelon̈o zanany io.’ (Hebreo 11:17-19) Abrahama nan̈araka volan̈a Jehovah ndreky ten̈a nino izy. Zen̈y nahavy Jehovah nanjary ten̈a tia izy, ke nifidy izy ho ‘namany.’—Isaia 41:8; Jakoba 2:21-23.
5. Akory fahitany Jehovah olo man̈araka raha koran̈iny ndreky tsy mivadiky aminany?
5 Amy Jehovah, ten̈a raha maventy man̈araka volan̈anany ndreky tsy mivadiky aminany zen̈y. Ten̈a tiany mahita olo tsy mivadiky aminany, na amy mora na amy sarotro. (Vakia 2 Samoela 22:26.) Hitantsika tamy Toko 1 in̈y fa ravoravo Jehovah izikoa baka amy fitiavan̈a izy mahavy olo araiky manompo izy. Karaha ty volan̈iny aminy Ohabolana 3:32: “Olo man̈ano raha mahitsy fo ho tsara fihavan̈ana aminany.” Izikoa olo araiky tsy mivadiky aminany, baka io man̈ano raha nan̈irahany izy, Jehovah ho tsara fan̈ahy aminany, ke izy hitaominy hipetraka amy ‘tran̈o-lainany’. Dikanizen̈y, atsika ambelany Jehovah hanompo izy. Tsy vitanizen̈y fo fa isaka atsika mivavaka aminany, izy hitandren̈y atsika fo.—Salamo 15:1-5.
6. Akory han̈aboahantsika fa tia Jesosy ankitin̈y atsika? Akory fahitany Jehovah olo tia Zanany?
6 Tiany Jehovah koa zay olo tia Jesosy, Zanany lelahy tokan̈a. Jesosy nivolan̈a karaha ty: “Izikoa olo araiky tia zaho, izy han̈araka volan̈anaka, ke Babako ho tia izy. Zahay handeha amy Babako an̈y, baka io hiaraka hipetraka aminany.” (Jaona 14:23) Akory han̈aboahantsika fa atsika tia Jesosy ankitin̈y? Tia izy atsika, izikoa man̈araka volan̈anany. An̈isanizen̈y mitory vaovao tsara ndreky mampianatra. (Matio 28:19, 20; Jaona 14:15, 21) Tia Jesosy koa atsika izikoa mifen̈y man̈araka raha nataony, na amy volan̈antsika zen̈y na amy raha ataontsika, eraka ny mety ho vitantsika olombelon̈o tsy lavorary. (1 Petera 2:21) Ho ravoravo Jehovah izikoa baka amy fitiavantsika izy mahavy atsika mifen̈y man̈araka raha nataony Kristy.
7. Nan̈ino ma olo namany Jehovah fo tokony hataontsika naman̈a?
7 Tiany Jehovah olo araiky izikoa mino izy, tsy mivadiky ndreky man̈araka volan̈anany. Tiany koa olo tia Jesosy ndreky man̈araka raha nataony zanany io. Zay olo manan̈a toetry aby io fo hanjary namany Jehovah. Ty raha mila iritriretintsika: ‘Mba manan̈a toetry aby io edy ma olo ataoko naman̈a? Zaho ma mba minaman̈a aminolo tiany Jehovah?’ Olo namany Jehovah fo tokony hataontsika naman̈a. Izikoa namantsika tsara toetry ndreky mazoto mitory, atsika koa han̈ano karaha zen̈y. Zen̈y koa han̈ampy atsika ho tapakevitry fo han̈ano raha mamparavoravo Jehovah.—Zahava efajoro “ Olo Karakory ma Tsara Atao Naman̈a?”.
ALEVA TAHAKA OLONY ZAN̈AHARY TALOHA TAN̈Y
8. Ino ma raha ten̈a nampiavaka a) Naomy ndreky Rota? b) iro Hebreo telo lahy in̈y? baka io d) Paoly ndreky Timoty?
8 Amy Baiboly ao misy tantaranolo maro nahita hatsaran̈a, fotony iro nahay nifidy naman̈a. Karaha ataony Naomy ndreky Rota, iro Hebreo telo lahy babo ta Babylony in̈y, baka io Paoly ndreky Timoty. (Rota 1:16; Daniela 3:17, 18; 1 Korintianina 4:17; Filipianina 2:20-22) Ohatra araiky miavaka hidinihintsika izioty ndraiky, Davida ndreky Jonatana.
9, 10. Karakory nahavy Davida ndreky Jonatana nanjary pinaman̈a be?
9 Koran̈iny Baiboly fa Davida koa fa baka namono Goliata, ‘iro roeny Jonatana nanjary nifandray mare, ke Jonatana nanjary tia Davida karaha ataony tia ain̈inany in̈y.’ (1 Samoela 18:1) Be elan̈elan̈a taon̈ondro, kanefa zen̈y tsy nisakana iro tsy hanjary pinaman̈a. Iro kamarady fo firaka taminandra nifatesany Jonatana. * (2 Samoela 1:26) Karakory nahavy Davida ndreky Jonatana nanjary pinaman̈a?
10 Nanjary pinaman̈a mare Davida ndreky Jonatana, fotony iro samy tia Jehovah. Tsy vitanizen̈y fo fa iro koa samy nan̈iry tsy hivadiky tamy Jehovah. Tiany Jonatana koa toetriny Davida tsy navozo olo ndreky nafana fo niaro an̈arany Jehovah. Karaha zen̈y koa Davida, tiany toetriny Jonatana, fotony Jonatana tsy nivadiky ndreky nan̈eky fanapahankevitry Jehovah. Tsy zen̈y fo, Jonatana koa tsy tia ten̈a, fotony izy nitady raha nahatsara Davida fo. Zen̈y nahavy Davida nan̈aja Jonatana mare, sady izy lasitio zokiny lavitry amy taon̈o. Nisy fotoan̈a Davida nalemy troko mare. Izy taminio nilefa nisitriky tamy tany paiky tan̈y, fotony panjaka Saoly, babany Jonatana mila hamono izy. Ino raha nataony Jonatana? Loso izy nandeha ‘tamy Davida tan̈y, nankahery sady nan̈amia toky izy fa Zan̈ahary han̈ampy izy.’ (1 Samoela 23:16) Misaora ravoravo Davida nahita namany io navy nankahery izy! *
11. Ino ma raha ianarantsika baka amy tantarany Davida ndreky Jonatana?
11 Ino aby raha ianarantsika baka amy tantarany Davida ndreky Jonatana? Tokony ho samy tia Jehovah olo pinaman̈a. Zen̈y raha ten̈a maventy tokony hitovizandro. Tsara izikoa mitovy fo raha inoandro ndreky fitsipiky arahindro. Tsy vitanizen̈y fo fa iro koa tokony ho samy man̈iry tsy hivadiky amy Jehovah. Iro koa samy mifen̈y han̈ano zen̈y, iro tsy vitany ho afaka hifankahery ndreky hifanakalo hevitry, fa ho afaka hifampitantara vaovao koa. (Vakia Romanina 1:11, 12.) Maro naman̈a tsara karaha zen̈y an̈atiny fiangonan̈a. Fa zen̈y ma mivolan̈a fa mety hatao naman̈a aby olo jiaby avy mivory ao? Tsy voatery ho zen̈y!
MAHAIZA MIFIDY NAMAN̈A
12, 13. a) Nan̈ino ma atsika mila mahay mifidy naman̈a, ndray an̈atiny fiangonan̈a? b) Ino raha nanahiran̈a nandalo tamy fiangonan̈a tamy taonjato voanalohany tan̈y, baka io ino raha nampitandreminy apostoly Paoly?
12 Ndray an̈atiny fiangonan̈a, atsika mbala mila mifidy naman̈a mandrisiky atsika han̈ano ny tsara fo. Tsy tokony hampalany fan̈ahy atsika raha zen̈y. Karaha ataony voany kakazo tsy miaraka masaka in̈y, mety ho elaela koa Kristianin̈y sasany vo ho matotro. Ndray aia ndray aia fiangonan̈a misy anao, tsy voatery ho matotro olo jiaby ao. (Hebreo 5:12–6:3) An̈atiny fiangonan̈a misy olo vaovao ndreky tsy dia fatatra finoan̈a. Mila haboakantsika fo fa atsika ten̈a tia ndreky man̈iry han̈ampy iro hankatsara fihavan̈andro amy Jehovah. Atsika fo tsy tokony ho mora kivy izikoa fa man̈ano zen̈y.—Romanina 14:1; 15:1.
13 Mila mitandrin̈y koa atsika aminolo ataontsika naman̈a an̈atiny fiangonan̈a, fotony mety ho hisy olo han̈ano raha hafahafa, na tsy ho ravoravo amy fanapahankevitry sasany, na tia mitretre. Raha karaha zen̈y tsy vaovao fa efa nisy fo rango tamy fiangonan̈a tamy taonjato voanalohany tan̈y. Ankamarozandro Kristianin̈y tamy zen̈y tsy nivadiky, kanefa sasany tamindro nan̈ano raha tsy mety. Tamy fiangonan̈a ta Korinto, nisy Kristianin̈y tsy nan̈eky fampianaran̈a sasany. Zen̈y nahavy apostoly Paoly nivolan̈a tamindro: “Anaro aza man̈eky ankadalainolo: Naman̈a ratsy mandrobaka fahazaran̈a tsara efa anan̈anaro.” (1 Korintianina 15:12, 33) Zen̈y koa nahavy apostoly Paoly nampitandrin̈y Timoty tsy hifandray be aminolo karaha zen̈y.—Vakia 2 Timoty 2:20-22.
14. Akory mety han̈arahantsika toro lalan̈a namiany apostoly Paoly momba naman̈a?
14 Akory ma mety han̈arahantsika toro lalan̈a namiany apostoly Paoly io? Atsika tsy tokony hifandray aminolo mety hitariky atsika han̈ano raha ratsy, na an̈atiny fiangonan̈a izy na ambelany. (2 Tesalonianina 3:6, 7, 14) Atsika tsy maintsy man̈ano raha hiarovan̈a fihavan̈antsika amy Jehovah. Aleva onon̈o fa atsika io mora mangala tahaka toetry ndreky raha ataony namantsika, karaha ataony eponzy mitsentsitry ranondraha man̈odidin̈y izy in̈y. Izikoa eponzy atao amy rano maloto, io tsy mety ho feno rano madio. Karaha zen̈y koa, izikoa atsika tsy mahay mifidy namantsika, atsika fo ho azondraha amy zen̈y.—1 Korintianina 5:6.
Maro naman̈a tsara mety ho hitantsika an̈atiny fiangonan̈a
15. Karakory mety hazahoanao naman̈a tia Jehovah an̈atiny fiangonan̈a?
15 Nahatsara izy, maro naman̈a tsara mety ho hitantsika an̈atiny fiangonan̈a. (Salamo 133:1) Izikoa tianao hahazo naman̈a tia Jehovah, anao antsendriky mila mifen̈y hanan̈a toetry tiany Jehovah. (Zahava efajoro “ Karakory ma Nazahoanay Naman̈a Tsara?”) Tadiava lan̈iany olo manan̈a toetry tianao hanan̈ana. Man̈araha torohevitry Baiboly mivolan̈a ‘ataova hevitry hampalalaka fonao’, ke mifandraisa aminolo isankarazany, na baka aia izy na baka aia, na tsy mitovy fomba aminao. (2 Korintianina 6:13; vakia 1 Petera 2:17.) Tsy mety izikoa olo mitovy taon̈o aminao fo ataonao naman̈a. Aleva onon̈o Davida ndreky Jonatana. Zokiny Davida lavitry be Jonatana. Maro koa olo efa matoe, kanefa mbala mahavita mampianatra namandro hahay raha maro ndreky han̈ampy iro hanan̈a fahendrena baka amy raha niain̈andro taloha tan̈y.
IZIKOA FA MISY RAHA MANAHIRAN̈A
16, 17. Nan̈ino ma atsika tsy tokony hiala amy fiangonan̈a, ndray misy olo man̈ano raha mampameloko atsika?
16 Mety ho hisy koa raha tsy hampifankahazo atsika, fotony atsika io samy amy toetrintsika ndreky raha niain̈antsika. Ndraikindraiky, mety hisy raha ataondro rahalahy ndreky ranabavy mety hampalahelo atsika. (Ohabolana 12:18) Fan̈ampinizen̈y koa, mety tsy hitovy hevitry atsika amy raha sasany, ke zen̈y mety tsy hampifankahazo atsika. Akory anao, ho meloko anao ke hiala amy fiangonan̈a? Izikoa atsika ten̈a tia Jehovah ndreky iro namantsika aby io, atsika tsy mety han̈ano raha karaha zen̈y.
17 Jehovah mendriky hitiavin̈y ndreky hitompoen̈y amy fo jiaby, fotony izy Pamoron̈o ndreky Pamelon̈o atsika. (Apokalypsy 4:11) Atsika koa tsy tokony hivadiky amy fiangonan̈a, fotony izio fitaovan̈a ampiasainy, sady izy ravoravo mampiasa izio. (Hebreo 13:17) Izikoa nisy olo nan̈ano raha nampameloko atsika, na raha tsy niritriretintsika foeky, atsika tsy tokony hiala amy fiangonan̈a. Aza adin̈a fa tsy Jehovah nan̈ano raha nampameloko atsika io. Izikoa atsika tia Jehovah ankitin̈y, atsika tsy hiala izy ndreky olonany foeky.—Vakia Salamo 119:165.
18. a) Karakory ma tokony hataontsika baka hiray sain̈y fo fiangonan̈a? b) Ino aby hatsaran̈a ho azontsika izikoa atsika man̈ambela hadisovan̈a namantsika?
18 Mifen̈y fo atsika hampisy fihavan̈ana aminolo an̈atiny fiangonan̈a, fotony tiantsika iro rahalahintsika aby io. Jehovah tsy mitaky olo tiany hanjary lavorary. Atsika koa tokony han̈ano karaha zen̈y. Ho vitantsika fo han̈adin̈a hadisovan̈a namantsika, izikoa atsika tia iro ankitin̈y. Aleva onon̈o fa atsika jiaby io samy man̈ano diso. (Ohabolana 17:9; 1 Petera 4:8) Fanan̈antsika fitiavan̈a han̈ampy atsika han̈ano zen̈y. (Kolosianina 3:13) Tsy mora man̈ano zen̈y, izikoa nampameloko atsika mare raha nataonolo io tamintsika. Atsika mety hirafy aminany foeky. Mety hieritreritry atsika fa efa zen̈y edy raha vain̈y izy amy raha tsy nety nataony. Kanefa, atsika fo hijaly izikoa atsika mitana heloko. Izikoa ndraiky atsika man̈ambela hadisovan̈a namantsika, atsika hahita hatsaran̈a. (Lioka 17:3, 4) Hilamin̈y fontsika ndreky sain̈intsika, baka io hiray sain̈y atsika an̈atiny fiangonan̈a. Ho tsara koa fihavan̈antsika amy Jehovah. Tsisy raha bebenizen̈y!—Matio 6:14, 15; Romanina 14:19.
OLO TSY TOKONY HATAO NAMAN̈A EKY
19. Olo karakory ma tsy tokony hataontsika naman̈a eky?
19 Ndraikindraiky atsika iangavian̈a hanapaka fihavan̈antsika aminolo sasany. Voaroaka tsy ho an̈isany fiangonan̈a iro, fotony iro nandika lalàn̈any Jehovah kanefa iro tsy nety nibebaka. Na niala tamy finoan̈a iro, ke nan̈aparitaka fampianaran̈a diso, na mety iro foeky nifidy hiala tsy ho an̈isany fiangonan̈a. Baiboly mivolan̈a fa atsika ‘tsy tokony hifandray’ aminolo karaha zen̈y. * (Vakia 1 Korintianina 5:11-13; 2 Jaona 9-11) Mety ho sarotro amintsika han̈araka torohevitry zen̈y, izikoa namantsika na havantsika olo voaroaka io. Izikoa tsisy raha foeky ambelantsika han̈elingelin̈y atsika amy fan̈arahantsika toro lalan̈a Jehovah, ho hitanolo fo fa atsika ten̈a man̈iry tsy hivadiky amy Jehovah ndreky han̈araka lalàn̈anany marin̈y, fotony zen̈y raha ten̈a maventy amintsika. Aleva onon̈o fa amy Jehovah, tsisy raha bebeny tsy mivadiky ndreky man̈araka volan̈anany.
20, 21. a) Ino ivolan̈ana fa fandroasan̈a io an̈isany fomba han̈aboahan̈a fitiavan̈a? b) Nan̈ino atsika mila mahay mifidy naman̈a tsarabe?
20 Fandroasan̈a io didy baka amy Jehovah, sady fomba han̈aboahan̈a fitiavan̈a. Ino mahavy atsika mivolan̈a zen̈y? Fotony izio an̈isany fomba han̈aboahan̈a fitiavan̈a an̈aran̈a masin̈y Jehovah ndreky fitsipikinany. (1 Petera 1:15, 16) Izio koa fomba hiarovan̈a olo an̈atiny fiangonan̈a, baka iro tsy ho voataon̈onolo kinia nan̈ano fahotan̈a io han̈ano raha ratsy. Iro Kristianin̈y tsy mivadiky aby io afaka manompo Jehovah fo, fotony iro matoky fa fiangonan̈a hiaro iro amy donia ty. (1 Korintianina 5:7; Hebreo 12:15, 16) Fitiavan̈a olo nan̈ano fahotan̈a io koa mahavy fandroasan̈a io, fotony mety ho zen̈y fo raha ilainy hampatontohitry izy, ke himpody ndraiky amy Jehovah.—Hebreo 12:11.
21 Hita baka amy raha jiaby zen̈y fa mila mahay mifidy naman̈a atsika. Nanin̈o atsika mila man̈ano zen̈y? Fotony miankiny amy zen̈y toetrintsika ndreky raha ataontsika. Hanan̈a naman̈a tsara atsika, izikoa olo namany Jehovah ndreky olo tiany fo ataontsika naman̈a. Atsika hanjary ho tapakevitry han̈ano raha mamparavoravo Jehovah fo amy fiain̈anantsika jiaby, fotony naman̈a mandrisiky atsika han̈ano raha tsara nifidintsika ndreky nalentsika tahaka.
^ feh. 2 Amy volan̈a hebreo, dikany “minaman̈a” zen̈y “miaraka” ndreky “mifanerasera.”—Mpitsara 14:20; Ohabolana 22:24.
^ feh. 4 Tiany Jehovah ho haintsika fa mbala han̈ano soron̈o Zanany tokan̈a izy. (Jaona 3:16) Zen̈y nahavy Jehovah nisakana Abrahama tsy hamono Isaka, fa nan̈amia ondrikondriky hatao soron̈o ho solony zanany io.—Genesisy 22:1, 2, 9-13.
^ feh. 9 “Mbala tsaiky” na tsaiky lelahy Davida taminy izy namono Goliata in̈y, baka io kadiriny 30 taon̈o tio izy tamy Jonatana naty. (1 Samoela 17:33; 31:2: 2 Samoela 5:4) Jonatana ndraiky kadiriny 60 taon̈o taminy izy naty in̈y. Dikanizen̈y, Jonatana zokiny Davida 30 taon̈o.
^ feh. 10 Izikoa zahan̈a 1 Samoela 23:17, koran̈iny ao fomba dimy nataony Jonatana nankahery Davida: 1) Nivolan̈a izy fa tsisy raha tokony havozoany Davida, 2) namiany toky Davida fa tsisy hahomby tetiky Saoly, 3) nivolan̈a izy fa Davida hanjary panjaka eraka raha nivolan̈iny Jehovah, 4) nampan̈anten̈a Davida izy fa tsy hivadiky aminany, 5) nivolan̈a izy fa na Saoly efa mahay fa izy tsy hivadiky amy Davida.
^ feh. 19 Izikoa tianao ho hay tsarabe raha tokony hatao izikoa fa misy olo voaroaka na kinia niala tsy ho an̈isany fiangonan̈a, zahava Fan̈ampiny Fan̈azavan̈a, “Raha Tokony Hatao Izikoa fa Misy Olo Voaroaka.”
