1, 2. Ame koi itre nyine iamadrinë, tre, nemene la nyine tro sa iën?

PANE mekune ju epun, laka, epuni a iji la ketre wene sinöe ka hmedr, nge epuni a öhne laka, ka pi la ketre götrane ne ej. Nemene la nyine tro epuni a troa kuca? Ijije hi tro epuni a iji asë lai wene sinöe, uti fe hë lai götrane ka pi; ijije fe tro epuni a trij asë lai wene sinöe; maine pena, tro epuni a xöje la götran ka ngazo me trij ej, me iji pë hë lai munën. Nemene la hnei epuni hna troa iën?

² Kösë ceitune la itre nyine iamadrinë, memine la wene sinöe cili. Ame ngöne la itre xaa ijin, tre, easa ajane troa pane mano, ngo easa atrehmekune laka, ame la itre nyine iamadrinë hna kuca enehila, tre, ka ngazo, nge tune lo wene sinöe laka pui ngazo hë la thiina. Haawe, nemene la hnei epuni hna troa kuca? Ame itre xan, tre, angatr a wanga ahmalohmaloeëne la ewekë ka ngazo me kapa la itre nyine iamadrinë hna hamëne hnene la fene celë. Ame itre xan, tre, angatr a neëne la itre nyine iamadrinë asë matre troa xecie hnyawa koi angatr laka, thaa tro kö a hane ajojezi angatr me hetre ethane thei angatr la ketre e itre ej. Ame itre xan, angatr a hmekëne me neën la itre nyine iamadrinë ka troa hetre ethan kowe la mele i angatr, ngo angatr a xome e itre xaa ijin la itre xaa nyine iamadrinë ka lolo koi angatr. Nemene la nyine tro epuni a iën, matre tro pala hi a thupë nyipunieti kö ngöne la ihnimi Akötresie?

3. Nemene hë la hne së hna troa ce ithanatan?

³ Ala nyimu the së la itre ka iëne la hnaakönine mekun. Easa atrehmekune la enyipiewekëne la itre xaa nyine iamadrinë, ngo easë a thele troa xome la itre nyine iamadrinë hne së hna öhne laka ka hetre thangane ka loi kowe la mele së. Qa ngöne lai, nyipi ewekë tro sa wange hnyawa la aqane tro sa atreine waipengöne  la nyine iamadrinë ka loi memine la ka ngazo. Ame la hnapan, tre, tro sa ce ithanatane la thangane la itre xaa nyine iamadrinë hne së hna iën ngöne la aqane nyi hlue i Iehova hne së.

4. Maine ase hë së nue la mele së troa nyi hlue i Iehova, nemene la thangane lai kowe la aqane iëne së la itre nyine iamadrinë?

⁴ Hnene la ketre qatre thup ka anyipici Iehova, nge ka bapataiso ngöne lo macatre 1946 hna qaja ngöne la ketre ijine ka hape: “Hnenge hna axeciën e kuhu hning ka hape, loi e tro pala hi ni a sine la itre cainöj göi bapataiso me drenge hnyawan, tune lo eni a xötrei bapataiso ekö.” Ngo pine nemen? Öni nyidrëti e qeje pengöne ka hape, “Ame la kola amekunë ni pala hi ka hape, ase hë ni huujëne la melenge koi Iehova, tre, ketre iamekunë lai ka nyipi ewekë koi ni matre troa mele nyipici pala hi.” Maine jë aqane waiewekë së jë fe hi lai. Ame la easa mekune hmaca la hne së hna sisinyi koi Iehova ka hape, easa nue hnyawa la mele së koi Nyidrëti matre nyi hlue i Nyidrë, celë hi lai ka troa uku së troa hetrenyi la xomihni. (Ate Cainöj 5:4; Heberu 10:7) Eje hi laka, maine tro sa lapaa mekune laka ase hë së huujëne la mele së koi Iehova, haawe, tro lai a mama la thangan ngöne la aqane goeëne së la huliwa ne cainöj, me ngöne mina fe la itre xaa götrane la mele së, tune la itre nyine iamadrinë. Hnei Paulo aposetolo hna qaja catrëne la trenge nyipici celë ngöne la nyidrëti a cinyihane koi itre Keresiano ne la hneijine i nyidrë ka hape: “E tro nyipunie a xen, me ij, me kuca kete ewekë kö, kuca asë jë nyine atrunyi Akötesie.”—1 Korinito 10:31.

5. Tune kaa la aqane xatua së hnene la tusi Levitiko 22:18-20 matre troa öhne la ithuemacanyi ka sihngödr hna eköthe ngöne Roma 12:1?

 ⁵ Ame la hnënge ewekë hne së hna kuca ngöne la mele së, tre kolo hi lai a amamane la aqane nyi hlue i Iehova hne së. Hnei Paulo hna qaja la ketre trenge ithanata ka tru aliene catr matre troa ketr hnyawa la itre trejine me nyidrë, ngöne la tusi nyidrë koi angetre Roma. Öni nyidrëti e thuecatre koi angatre ka hape: “Hamënepi hnei nyipunie la ite ngönetei nyipunie huje ka mel, me ka hmitöt, lo aja i Akötesie, celë hi qâ i nyipunie ka ijij.” (Roma 12:1) Ame la ngönetrei, tre, kola qaja e celë la mekune së, memine la hni së, memine fe la trenge catre së. Itre ewekë asë lai hne së hna huliwane matre troa nyi hlue i Akötresie. (Mareko 12:30) Hnei Paulo hna qaja la huliwa hne së hna kuca ce memine la hni së ka pexej ceitu me ketre huuj. Ame la hna ewekë celë hna hape “huuj,” tre, kola eköthe la ketre ithuemacanyi ka sihngödr. Ame ngöne lo Trenge Wathebo i Mose, tre, hnei Iehova Akötresie hna methinëne la huuj ka hetre ethanyin. (Levitiko 22:18-20) Ketre tune mina fe kowe la huuj ngöne la götrane la ua, maine ka hape kösë hetre ethanyin, tre, thaa tro jë kö Iehova a kapa aloin. Ngo tro lai a traqa tune kaa?

6, 7. Tro la Keresiano a apuingazone tune kaa la ngönetrei i angeic, nge nemene hë la thupene koi angeic?

⁶ Hnei Paulo hna hmekën me thuemacane la itre keresiano ne Roma, ka hape: “The . . . nuejë kö la ite hnepe ngönetei nyipunie kowe la ngazo.” Hnei Paulo mina fe hna upi angatr troa “humuthe la ite huliwa ne la ngönetei.” (Roma 6:12-14; 8:13) Hnei nyidrëti hna qaja ngöne la pane götrane la tus i nyidrë, la itre xaa “huliwa ne la ngönetei” cili. Öni nyidrëti göi itre atre kuca la ngazo ka hape: “Tiqapi hë la ite ineqe i angate hnene la iëji.” “Nge saqe hi la ite lue ca i angate troa anenine la madra.” “Nge pëkö qou angate e Akötesie.” * (Roma 3:13-18) Tro la Keresiano a adrone la ngönetrei i angeic e hnei angeic hna xome la itre “hnepe ngönetei” i angeic maine itre götrane ne ngönetrei angeic, göi troa kuci huliwa ka ngazo. Drei la ketre ceitun, maine tro la ketre Keresiano enehila a ketre sipu goeëne la itre ewekë ka amamane la kuci ngazo maine iakötrë pena, angeice hi lai a “nue la ite [ala meke i angeice] kowe la ngazo,” ene pe apuingazone pi la ngönetrei i angeice ka  pexej. Ame la nöjei aqane nyi hlue i Akötresie hnei angeic, tre, thaa ka hmitrötre hmaca kö nge thaa hna kapa kö hnei Nyidrë. (Deuteronomi 15:21; 1 Peteru 1:14-16; 2 Peteru 3:11) Drei la ketre thangane ka ngazo catr hne së hna xeni pun qa ngöne la hne së hna nyinyape thele la itre nyine iamadrinë ka ngazo!

⁷ Kola mama hnyawa laka, ame la aqane ië nyine iamadrinë la ketre Keresiano, tre, thaa ka pë thangane kö. Haawe, easa thele troa iëne la itre nyine iamadrinë ka troa amingömingön la huuje së koi Akötresie, ngo thaa tro kö a apuingazone ej. Tro pena së a ithanatane enehila la aqane troa atrehmekune la itre nyine iamadrinë ka loi maine itre ka ngazo pena kowe la mele së.

8, 9. (a) Ijije hi tro sa thawa luëne la itre nyine iamadrinë koi lue nemene götran? (b) Nemene la itre nyine iamadrinë hne së hna troa thipetrij, nge pine nemen?

⁸ Kola mama hnyawa laka, ijije hi tro sa thawa luëne la itre nyine iamadrinë, matre lue götran. Ame la hnapan, tre, hna thipetrij mekötine hnene la itre Keresiano la itre xaa nyine iamadrinë; nge ame la hnaaluen, tre, itre nyine iamadrinë ka ijij, maine ka thaa ijije pena troa kapa hnene la itre Keresiano. Tro sa pane ce wange la hnapan, ene lo itre nyine iamadrinë nyine troa thipetrije mekötine hnene la itre Keresiano.

⁹ Tune la hne së hna ce wange hë ngöne la mekene waan, hetrenyi la itre xaa nyine iamadrinë ka amamane hnyawa la itre ewekë hna wathebone hnei Tusi Hmitrötr. Pane mekune jë së la itre ewekë hna hamëne jëne ëternet; me itre film ngöne sinema, me itre porogaram ne televizio, me itre miuzik; itre ej a amamane la madrine ne la itre atr troa akötrëne la itre xan, maine itre thiina ne la itre dremoni, maine kola amamane pena la kuci huliwa ka sis, maine sajuëne pena la ngazo memine la kuci ngazo. Pine laka ame la itre nyine iamadrinë celë ka ngazo, tre, itre ej a qaja aloine la itre thiina ka ena la itre trepene meköti ne la Tusi Hmitrötr, me saisaithe la itre trenge wathebo, haawe, loi e tro la itre nyipi Keresiano a kötrene itre ej. (Ite Huliwa 15:28, 29; 1 Korinito 6:9, 10; Hna Amamane 21:8) Maine tro sa thipetrije la itre nyine iamadrinë asë cili, easë hi lai a troa amamane koi Iehova laka easë hnyawa hi lai a “[sisine] la ngazo,” me catre “tianepi la ngazo.” Aqane tro  hi së lai a amamane ka hape, hetrenyi së la “lapaune ka pë thoi ngön.”—Roma 12:9; Salamo 34:14; 1 Timoteo 1:5.

10. Nemene la ketre aqane mekune göi nyine iamadrinë ka troa hetre thangane ka ngazo koi së, nge pine nemen?

¹⁰ Maine jë troa mekune hnene la itre xan, ka hape, ame la troa goëne la itre nyine iamadrinë, ene la itre iatr ka amamane la itre aqane ujë ka sis, tre, thaa tro kö a hetre thangane ka ngazo kowe la mele i angatr. Öni angatr e isa qaja, ka hape, ‘Eni hi a goeëne itre ej ngöne sinema maine ngöne televizio, ngo thaa tro jë kö ni a kuca la itre ewekë cili.’ Ka iamenu nge ka ngazo catre la aqane mekune cili. (Ieremia 17:9) Maine easa mekune ka hape, nyine iamadrinë hi la troa goeëne la itre ewekë hna jele ngazone hnei Iehova, hapeu, easë kö lai a amamane hnyawa ka hape, easa “sisine la ngazo”? Maine tro pala hi sa goeën, me e maine drenge la itre ewekë ka ngazo, haawe, tro ha ajojezine la aqane waiewekë së, me itre hni së. (Salamo 119:70; 1 Timoteo 4:1, 2) Maine jë ketre aqane ujë lai ka troa hetre ethane ngöne la itre hne së hna kuca, maine ngöne pena la aqane goeëne së la thiina ka ngazo ne la itre xan.

11. Nemene la hna amamane hnyawa ngöne Galatia 6:7 göne la itre nyine iamadrinë?

¹¹ Celë hi ewekë lai ka traqa kowe la itre xaa Keresiano. Hetrenyi la itre xan ka kuci ngazo, pine laka hna ajojezi angatr hnene la itre nyine iamadrinë hnei angatr hna majemine goeën. Hnene la hnei angatr hna melëne la ewekë ka ngazo, ene pe angatr a atrepengön lo hna hape, “ame la hna trane hnei ate, celë hi hnei angeice hna tro ha menuën.” (Galatia 6:7) Ngo ijije hi troa neëne la itre thangane ka ngazo cili. Maine tro sa traane hnyawa hnine la he së la itre mekune ka loi me ka wië, haawe, tro hë së a menuën ngöne la mele së la itre thangane ka lolo catr.—Wange ju la itre mekune hna eköhagen, hna hape,  “Nemene Nyine Iamadrinë La Nyine Tro Ni a Iën?,” ngöne götrane 67.

12. Tune kaa la aqane ce tro la hna qaja ngöne Galatia 6:5 memine la itre nyine iamadrinë, nge nemene la ka troa eatrongë së matre tro sa isa axecië mekune hnyawa?

¹² Tro pena së enehila a ce ithanatane la hnaaluene götran, ene lo itre nyine iamadrinë ka sajuëne la itre huliwa thaa hna jele ngazone  mekötine hnyawa kö nge thaa hna qaja hnyawa pena kö hnene la Wesi Ula i Akötresie ka hape, hna kapa itre ej. Ame ngöne la kola iëne hnene la ketre Keresiano la nyine iamadrinë cili, nyipi ewekë tro angeic a ketre sipu axecië mekun thenge la nyine iamadrinë hnei angeic hna öhn maine ka lolo koi angeic. (Galatia 6:5) Ngo, eje hi lai laka, hetre ka troa eatrongë së pala hi ngöne la easa troa iëne la nyine iamadrinë cili. Eje e hnine la Tusi Hmitrötr la itre trepene meköt, maine trenge nyipici ka aijijë së troa atrehmekune la aqane waiewekë i Akötresie. Maine tro sa wanga atrune la itre trepene meköti cili, tro hë së a trotrohnine la “aja i Iehova”  ngöne la nöjei ewekë asë, tune la itre nyine iamadrinë hne së hna troa iën.—Efeso 5:17.

13. Nemene la ka troa upi së troa neëne la itre nyine iamadrinë hna thipetrije hnei Iehova?

¹³ Eje hi lai laka, isa pengöne kö la isa aqane waiewekë ne la itre Keresiano, me isa etrune la atrehmekune ka eje thei angatr. (Filipi 1:9) Ketre, kola atrehmekune hnene la itre Keresiano laka, ame göi nyine iamadrinë, tre, hetre hna ajan hnei angatr, itre xane hmaca pena ha a xelen. Qa ngöne lai, thaa kolo kö a upe la itre Keresiano asë tro hi a axeciëne me xome thatraqa i angatr asë la nyine iamadrinë ka caas. Ngo eje hi lai laka, maine tro sa catre nue pala hi la itre trepene meköt i Akötresie troa huliwa ngöne la itre mekune së me e kuhu itre hni së, haawe, ketre tro fe hë së a canga neëne la nöjei nyine iamadrinë hnei Iehova hna thipetrij.—Salamo 119:11, 129; 1 Peteru 2:16.

14. (a) Nemene la ewekë nyine tro sa wanga atrune ngöne la easa iëne la itre nyine iamadrinë? (b) Tune kaa la aqane tro sa amë panëne la itre aja ne la Baselaia ngöne la mele së?

¹⁴ Ame ngöne la easa ië nyine iamadrinë, hetre ketre ewekë ka tru nyine tro sa nyi göhnene hnyawa: ene la traeme së. Maine ame koi së, tre, pëkö engazone la nyine iamadrinë hne së hna iën, ngo tro hë lai a qajaqaja hnene la etrune la traeme hne së hna xom thatraqane lai, la itre ewekë hne së hna amë panën. Ame la ka sisitria catre kowe la itre Keresiano, tre, ene la itre ewekë ngöne la götrane la ua. (Mataio 6:33) Haawe, nemene la nyine tro sa kuca matre troa xecie hnyawa koi së laka, easa amë panëne ngöne la mele së la itre ewekë ngöne la götrane la ua? Hnei Paulo aposetolo hna qaja ka hape: “Wange hnyawa kö la aqane tronge i nyipunie, the tune kö la ite hmo, ngo tune ju la ite ka inamacan, kola anyipi ewekëne la nöjei ijin.” (Efeso 5:15, 16) Eje hi laka, maine tro sa amë hnyawa la itre ifego ngöne la aqane tro sa xome la traem thatraqane la itre nyine iamadrinë, haawe, tro ha xatua së troa amë hnyawa la traeme ka lolo thatraqane la “nöjei ewekë ka isa pengöne kö [ka nyipi ewekë],” ene la itre huliwa ka hetre eloine kowe la mele së ngöne la götrane la ua.—Filipi 1:10.

15. Pine nemen matre jëne inamacane la troa ami ifego ngöne la kola ië nyine iamadrinë?

¹⁵ Loi e troa inamacan me ami ifego ngöne la kola iëne la itre nyine iamadrinë. Kolo lai a hapeu? Tro sa xome hmaca lo ceitun ne  la wene sinöe. Maine easa nëene troa xeni fe lo götrane ka pi ne la wene sinöe, loi e tro sa xöje hnyawa lai götrane ka ngazo memine fe la itre xötre ezine ej. Ketre, jëne inamacane fe la troa ami ifego ngöne la easa iëne la ketre nyine iamadrinë. Thaa kolo kö a neëne hmekuje hi hnene la Keresiano ka inamacan la ketre nyine iamadrinë hna wathebone hnene la itre trepene meköti ne la Tusi Hmitrötr, ngo kolo fe lo itre pengöne nyine iamadrinë hna lueluën, maine kola mama laka ka hetre götrane ngön ka troa hetre ethane kowe la mele së ngöne la götrane la ua. (Ite Edomë 4:25-27) Maine tro sa xötrethenge hnyawa la eamo hna hamëne hnene la Wesi Ula i Akötresie, tro ha xatua së troa neëne la itre nyine iamadrinë ka ngazo koi së.

16. (a) Tune kaa la aqane tro sa amamane ka hape, easë a xome la aqane waiewekë i Iehova göne la thiina? (b) Maine tro sa trongëne la itre trepene meköt, tune kaa la aqane troa nyi taan la mele së hnene itre ej?

¹⁶ Ame ngöne la kola ië nyine iamadrinë hnene la itre nyipi Keresiano, nyipi ewekë troa pane wanga atrune la aqane waiewekë i Iehova. Tusi Hmitrötr a fe amamane la mekuna i Iehova me itre trepene meköt i Nyidrë. Drei la ketre ceitun, kola e wengëne hnei Solomona Joxu la itre ewekë ka nyimutre hna sisine hnei Iehova, tune la troa hetrenyi la “sesepeneqë ate thoi, me lue ime luete aneni madra ka pë ethan, me hni ate mekune la nyinyithina ka ngazo, me lue ca luete nyenyape kowe la ngazo.” (Ite Edomë 6:16-19) Nemene la thangane la mekuna i Iehova kowe la aqane waiewekë së? Kola ithuecatr hnene la atre cinyihane la salamo, ka hape: “Angete hnine koi Iehova fe, sisinejë la ngazo.” (Salamo 97:10) Nyipi ewekë troa mama ngöne la aqane easa ië nyine iamadrinë, laka, easa nyipi  sisine la itre hnei Iehova hna sisin. (Galatia 5:19-21) Tro mina fe sa mekune hnyawa laka, ame la hne së hna kuca ngöne la gaa sihngödr, ene la kola mama hnyawa e cili la sipu pengö së, tre, ka tru catre kö hune la hne së hna kuca ngöne la gaa tru atr. (Salamo 11:4; 16:8) Qa ngöne lai, maine eje the së la ajane troa amamane ngöne la nöjei götrane ne la mele së la mekuna i Iehova göne la thiina nyine troa xom, haawe, loi e tro pala hi sa ië nyine iamadrinë thenge la itre trepene meköti ne la Tusi Hmitrötr. Maine tro sa ujë tune lai, tre, tro hë së majemine troa huliwa tune lai ngöne la mele së.—2 Korinito 3:18.

17. Qemekëne troa iëne la itre nyine iamadrinë, nemene la itre hnyinge nyine tro sa pane isa mekun?

¹⁷ Nemene fe la nyine tro sa kuca matre troa xecie hnyawa koi së laka, easa ujë thenge la aqane waiewekë i Iehova, ngöne la easa iëne la itre nyine iamadrinë? Mekune ju la hnyinge celë, ‘Nemene la thangane lai koi ni me kowe la pengöi eni xajawa i Akötresie?’ Drei la ketre ceitun, qëmekene tro sa iëne la ketre film, isa thele jë ka hape, ‘Tune kaa la aqane troa hetre thangane la film cili kowe la mekuthetheweng?’ Tro sa ce wange la itre trepene meköti nyine tro sa xome thatraqane la mekune cili.

18, 19. (a) Tune kaa la aqane troa xatua së hnene la trepene meköt ka eje ngöne Filipo 4:8, troa atrehmekune la nyine iamadrinë ka pë ethane koi së? (b) Nemene la itre xaa trepene meköti ka xatua së troa iën la nyine iamadrinë ka lolo? (Wange ju la ithuemacanyi e cahu fen.)

¹⁸ Kola qaja hnene la ketre trepene meköt ka nyipi ewekë catr ngöne Filipi 4:8, ka hape: “Ame la nöjei ewekë ka nyipici, me nöjei ewekë hna qaja aloin, me nöjei ewekë ka meköt, me nöjei ewekë ka wië, me nöjei ewekë ka lolo, me nöjei ewekë ka hlemu loi; nge maine kete thina ka loi, me kete nyine atrun, mekuneju nyipunie la ite ewekë cili.” Nyipici, thaa Paulo kö a qeje pengöne la itre nyine iamadrinë, ngo nyidrëti pe a qaja la itre mekuna ne la hni hna eköthe hune la itre ewekë ka amadrinë Akötresie. (Salamo 19:14) Ngo, ijije hi troa trongëne la itre trenge ewekë i Paulo ngöne la kola ië nyine iamadrinë. Troa tune kaa?

¹⁹ Isa thele jë ka hape,‘Tune kaa la itre film ngöne sinema hnenge hna iën, me itre elo jëne video, me itre miuzik, maine itre xaa madrine ju kö, itre eje kö a nyi alien la mekunang hnene la “nöjei ewekë ka wië”?’ Drei la ketre ceitun, thupene la hne së hna goeëne  la ketre film, nemene la itre iatr ka lapa huti pë hë ngöne la itre mekuna së? Maine ka lolo itre ej, ka wië, nge ka iakeukawany, haawe atre hi së laka, nyine iamadrinë lai ka pë ethane kowe la mele së. Ngo maine hne së hna goeëne la ketre film, nge easa mekune lo itre thiina ka sis, haawe, nyine iamadrinë lai ka ngazo nge ka troa hetre ethane kowe la mele së. (Mataio 12:33; Mareko 7:20-23) Pine nemen? Pine laka, maine tro sa mekune la itre ewekë ka sis, tre, troa ajölëne la sipu tingetinge së, me ajojezine la mekuthethewe së hna inine hnei Tusi Hmitrötr, me angazone la aqane imelekeu së me Akötresie. (Efeso 5:5; 1 Timoteo 1:5, 19) Pine laka, ka hetre ethane kowe la sipu mele së la nyine iamadrinë cili, loi e tro sa catre neëne ej. * (Roma 12:2) Loi e tro sa thith, tune la atre cinyihane la salamo, me hape: “Ezineju la lue mekeng mate tha tro kö ni a goeën la thoi.”—Salamo 119:37

20, 21. Tune kaa la aqane troa trongëne la 1 Korinito 10:23, 24 ngöne la kola ië nyine iamadrinë ka pë ethan?

²⁰ Hnei Paulo hna qaja la ketre trepene meköti ka tru alien, nyine tro sa nyipiewekëne hnyawa ngöne la easa isa axecië mekun. Öni nyidrë: “Ijiji ni la nöjei ewekë asëjëihë, ngo tha nyipi ewekë kö la nöjei ewekë asëjëihë ; ijiji ni la nöjei ewekë asëjëihë, loi pe ame la nöjei ewekë asëjëihë, te, tha nyine akeukawan. The tro kö kete a thele la loi i angeice kö, loi pe la loi i kete ate kö.” (1 Korinito 10:23, 24) Nemene la aqane ce tro la trepene meköti celë memine la kola ië nyine iamadrinë ka pë ethan? Nyipi ewekë tro sa isa thele ka hape: ‘Tune kaa la aqane troa ketr la itre xan hnene la aqane ië madrineng?’

²¹ Maine jë tro la mekuthethewe së a nue së troa xome la ketre nyine iamadrinë hne së hna mekune ka hape “ka ijij” maine ka loi. Ngo maine easa öhne la itre xaa sine hmi së a pane cile hnö, pine laka, hna athixötrë angatr, maine jë tro sa nue la itre nyine iamadrinë cili. Pine nemen? Pine laka thaa ajane kö së troa “athixötën la ite tejin” me easë, maine tro pena “ngazo koi Keriso,” wanga troa jole catr kowe la itre trejine me easë troa cile hut me mele nyipici koi Akötresie. Loi e tro sa hnine la eamo celë: “The nyi nyine  athixötë” kö. (1 Korinito 8:12; 10:32) Kola trongëne hnene la itre Keresiano ne la hneijine së, la ketre eamo hna hneatrepene hnene la ihnim me ka inamacan, hna hamëne hnei Paulo, göi troa neën la nyine iamadrinë, laka maine jë ka “ijiji” ngo ka thaa “akeukawan.”—Roma 14:1; 15:1.

22. Pine nemene matre itre Keresiano a kapa la itre aqane waiewekë ne la itre xaa trejin ka isapengöne kö ngöne la itre xaa götrane la mele i angatr?

²² Hetrenyi la ketre aqane troa thele la loi thatraqane la itre xan. Thaa loi kö tro la ketre Keresiano ka canga huliwa mekuthethewen a catre fë la aqane iëne angeic la ketre nyine iamadrinë, me upe ielene la itre trejine asë troa trongëne ej. Maine tro angeic a upe ielene la itre xan troa trongën la aqane mekune i angeic, eje hi lai laka, angeic a ceitu memine la ketre atr ka xomi loto; laka nyidrëti a isine la mekune i nyidrë, ene la tro asë hi la itre loto a ce nyenyape thenge la aqane nyinyape i nyidrë, me ngöne la gojenyi hnei nyidrë hna ajane troa nyinyape ngön. Ka sasaithi tulu pala ha la aqane mekune cili. Maine hetrenyi la ihnimi Keresiano thene la ketre atr trene mekuthethewe ka hetre ifegon, nyipi ewekë tro angeic a hane metrötrëne fe la itre trejin, ngacama isapengöne kö la aqane waiewekë i angeic me angatr ngöne la ketre nyine iamadrinë; ngo thaa tro pi kö a isazikeu memine la itre trepene meköti ne la Keresiano. Angeice hi lai a thele troa “öhne hnene la nöjei ate asëjëihë la menyike i [angeic].”—Filipi 4:5; Ate Cainöj 7:16.

23. Troa xecie tune kaa koi nyipunieti laka, ame la nyine iamadrinë hnei epuni hna iën, tre, ka pë ethan?

²³ Tune la hne së hna ce wange hë, troa xecie tune kaa koi së laka, ame la itre nyine iamadrinë hne së hna iën, tre, ka pë ethan? Thipetrije jë la nöjei pengöne nyine iamadrinë e mama hnyawa hi laka ka ngazo, me itre aqane kuci ngazo, ke, ka ngazo me hna wathebone hnene la Wesi Ula i Akötresie. Trongëne jë la itre trepene meköti ne la Tusi Hmitrötr hna troa xome thatraqane la itre pengöne nyine iamadrinë thaa hna qaja mekötine kö e hnine la Tusi Hmitrötr. Neëne jë la itre nyine iamadrinë ka angazone la mekuthethewe i nyipunie, nge loi e troa nuetrije la itre nyine iamadrinë ka troa athixötrëne la itre xan, ene hi lo itre trejine me epun. Epi tro la aqane catre axecië mekune i nyipunie a atrunyi Akötresie, me thupë nyipunieti kö me hnepe lapa i epuni ngöne la ihnimi Nyidrë.