1, 2. Shangwi shapyaw ai lam hte seng nna gara lata ai lam ni nga ai kun?

NAMCHYIM nga ai namsi hpe nang sha na maw ai shaloi, shara mi hta yat taw ai hpe nang mu dat ai. Nang hpa galaw na kun? Yat taw ai daw hte nawng namsi hpe nang sha na kun? Namsi hpe n sha ai sha kabai kau na kun? Shing nrai yat taw ai daw hpe la kau nna kaja ai daw hpe sha na kun? Nang gara hpe lata na kun?

² Shangwi shapyaw ai lam hpe dai namsi hte shing daw mai ai. Shangwi shapyaw ai hta ginsup ai lam, tinang hti ai, yu ai lam ni lawm ai. Nang ban sa mayu tim, dai ni na shangwi shapyaw ai lam law law gaw yat taw ai namsi zawn akyang lailen hta hten za nga ai. Rai yang, nang hpa galaw na kun? Nkau mi gaw n kaja ai lam hpe n chye masu su nna, ndai mungkan hta nga ai gara shangwi shapyaw ai lam hpe raitim hkap la na re. Nkau mi gaw shoihpa n nga hkra shangwi shapyaw lam yawng hpe koi ma ai. Nkau mi gaw shoihpa nga ai shangwi shapyaw lam hpe koi nna, akyu nga ai shangwi shapyaw lam hpe hkap la ma ai. Nang gaw Karai Kasang a n-gaw nwai ai myit hta a nga nga na matu gara hpe lata ging ai kun?

3. Ya gara lam hpe bawngban na kun?

³ Anhte law malawng gaw nambat masum hpe lata na re. Ban sa lam nga ra ai hpe anhte chye da ga ai. Raitim, akyang lailen san seng ai shangwi shapyaw ai lam hte sha ban sa mayu ga ai. Dai majaw, gara lam gaw akyu nga ai, gara lam gaw akyu n nga ai hpe daw dan lu na matu atsawm myit yu ra ai. Raitim,  shangwi shapyaw ai lam hte seng nna, anhte lata ai lam gaw Yehowa hpe nawku daw jau ai lam hta, gara hku hkra machyi chye ai hpe shawng nnan bawngban yu ga.

4. Anhte a ap nawng ai lam gaw shangwi shapyaw lam lata ai hte seng nna gara hku akyu shabyin ging ai kun?

⁴ 1946 ning hta hkalup hkam wa ai asak kaba sai Sakse Hkam langai gaw, “hkalup mungga htawn ai aten shagu hta ngai nga taw nna, ngai nan hkalup hkam ai zawn mungga hpe atsawm madat na matu shakut ai” nga nna tsun ai. Hpa majaw kun? “Nye a ap nawng ai lam hpe myit dum nga ai gaw, matut nna sadi dung na matu ahkyak ai lahkam langai re” nga nna shi matut tsun ai. Dai hpe nang myit hkrum na re. Tinang a prat hpe Yehowa a magam gun na matu, ap nawng ai ngu ga sadi jaw wa ai hpe, bai dum ai gaw hkamjan lu na matu karum ya ai. (Hpaji 5:4 hpe hti u.) Na a ap nawng ai lam hpe bai sumru ai gaw, Hkristan magam bungli sha n-ga, shangwi shapyaw ai lam hte nawng prat ting hte seng ai na a myit jasat hpe akyu shabyin lu na re. Kasa Pawlu gaw shi prat na Hkristan ni hpang de laika ka ai shaloi, dai teng man ai lam hpe ndai hku ahkyak shatai tsun wa ai: “Nanhte sha timung, lu timung, hpa galaw timung, nga manga hta Karai Kasang a hpung shingkang tam let, galaw nga mu.”​—1 Korinhtu 10:31.

5. Roma 12:1 hta lawm ai sadi jaw ga hpe chye na na matu Jaw Jau 22:18-20 gaw gara hku madi shadaw ya ai kun?

 ⁵ Prat hta nang galaw ai lam yawng gaw, Yehowa hpe nawku daw jau ai lam hte matut mahkai nga ai. Pawlu gaw dai teng man ai lam hpe hpunau nauna ni dum nga na matu, Roma mare masha ni hpang de ka ai laika hta lachyum sung ai ga si hpe jailang wa ai. “Hkrung nga ai, chyoi pra ai hte, Karai Kasang kaw sharawng awng ai hkungga matu nawng ya na, Karai Kasang a chyeju hte ngai nanhte hpe shadut shahkat dat ma de ai: dai gaw nanhte a myit masin a daw jau ai lam rai nga ai” nga nna shi n-gun jaw wa ai. (Roma 12:1) Na a hkum hkrang hta nyan hpaji, myit masin, atsam marai ni lawm ai. Karai Kasang hpe nawku daw jau ai hta, dai ni yawng hpe nang akyu jashawn ai. (Marku 12:30) Dai zawn myit masin mahkra hte nawku daw jau ai lam hpe hkungga hku nna Pawlu tsun wa ai. “Hkungga” ngu tsun ai shaloi, anhte sadi ra na lam langai hpe dum shangun ai. Mawshe Tara hta nga yang, ra rawng ai hkungga hpe Karai Kasang n hkap la ai. (Jaw Jau 22:18-20) Dai hte maren, Hkristan langai a wenyi hkungga hta ra rawng ai lam lawm yang, Karai Kasang hkap la na n re. Gara lam hku nna dai zawn byin chye ai kun?

6, 7. Hkristan langai gaw shi a hkum hkrang hpe gara hku matsat shabat byin shangun chye ai kun? Gara akyu ni shabyin lu ai kun?

⁶ Roma mare hta nga ai Hkristan ni hpe Pawlu gaw, “nanhte a daw shan ni hpe mung, . . . yubak hpe hkum ap ya myit” nga nna sadi jaw wa ai. ‘Hkum hkrang a arawn alai ni hpe sat kau’ na matu shi matut tsun wa ai. (Roma 6:12-14; 8:13) Shi a laika shawng na daw hta “hkum hkrang a arawn alai” hte seng ai ga shadawn nkau hpe tsun wa ai. Mara galaw chye ai masha ni hte seng nna “shanhte a n-gup matsa mawa hte kajet kaje hkrai hpring nga ma lu ai.” “Asai shapraw na shanhte a lagaw larau nga ai.” “Karai Kasang hpe hkrit kamyin ai lam, shanhte a myi man e n rawng ma lu ai” nga nna tsun wa ai. (Roma 3:13-18) Hkristan langai gaw shi a “hkum hkrang” hpe akyu jashawn nna, n kaja ai akyang lailen ni hpe galaw nga ai rai yang, shi a hkum hkrang hta ra rawng ai lam nga nga ai re. Ga shadawn, ya aten hta Hkristan langai gaw nse nsa sumla ni, grai mazut nna zingri zingrat ai hpe n-gun jaw ai sumla hkrung ni hpe dingsang yu taw ai nga  yang, shi a myi gaw “yubak” hpe sak jaw nga ai majaw, shi a hkum hkrang yawng hpe matsat shabat byin shangun ai. Shi a nawku daw jau ai lam yawng gaw, n san seng ai hkungga byin wa nna Karai Kasang hkap la sana n re. (Tara Jahprang 15:21; 1 Petru 1:14-16; 2 Petru 3:11) Akyu n nga ai shangwi shapyaw lam hpe lata ai majaw, jaw ra ai manu gaw grai kaba la ai.

⁷ Hkristan langai shangwi shapyaw lam lata shut yang grai hkra machyi chye ai gaw teng sha re. Dai majaw, Karai Kasang hpang de sak jaw ai hkungga hpe matsat shabat n byin mat hkra, Karai Kasang hkap la ai shangwi shapyaw lam hpe anhte lata mayu ga ai. Hpa gaw akyu nga nna, hpa gaw akyu n nga ai hpe gara hku dawdan mai ai lam hkaja yu ga.

8, 9. (a) Shangwi shapyaw lam hpan lahkawng gaw hpa ni kun? (b) Gara shangwi shapyaw lam hpe anhte koi ra ai kun? Hpa majaw kun?

⁸ Shangwi shapyaw ai lam hpe hpan lahkawng ginhka mai ai. Langai gaw Hkristan ni koi ra na shangwi shapyaw lam rai nna, lahkawng gaw Hkristan ni hkap la yang mung mai ai, n hkap la yang mung mai ai shangwi shapyaw ai lam re. Hkristan ni koi ra na shangwi shapyaw lam hpe hkaja yu ga.

⁹ Daw 1 hta tsun wa ai hte maren shangwi shapyaw lam nkau gaw, Chyum Laika hta n kaja ai ngu asan sha tsun da ai lam ni hpe hkrang shala da ai. Ga shadawn, grai mazut nna zingri zingrat ai hpe n-gun jaw ai lam, nat hte seng ai lam, nse nsa sumla ni, matsat shabat rai nna hpye ai amu galaw na matu n-gun jaw ai website ni, sumla hkrung ni, TV lamang ni, mahkawn ni re. Dai matsat shabat re ai shangwi shapyaw lam ni gaw, Chyum Laika tara ni hpe tawt lai ai akyang lailen ni hpe madun nga ai majaw, teng man ai Hkristan ni koi ra ai. (Kasa 15:28, 29; 1 Korinhtu 6:9, 10; Shingran 21:8) Nang gaw akyu n nga ai shangwi shapyaw lam hpe koi ai hku nna, n hkru n hkra ai hpe gaja nan matsat nna yubak hpe koi nga ai lam Yehowa hpe sakse madun ai re. Dai lam hku nna nang hta “sawt ai n lawm ai makam masham” rawng nga ai.​—Roma 12:9; Shakawn 34:14; 1 Timohti 1:5.

10. Shangwi shapyaw ai lam hte seng nna gara hku sawn la ai gaw shoihpa nga ai kun? Hpa majaw kun?

 ¹⁰ Hpye ai amu hpe dan dan leng leng madun da ai shangwi shapyaw lam hpe yu ai gaw, shoihpa n nga ai ngu nkau mi sawn la na re. Shanhte gaw ‘dai ni hpe video ni, sumla hkrung ni hta sha yu ai. Galoi mung tatut galaw na n re’ ngu sawn la ma ai. Dai zawn sawn la ai gaw tinang hkum tinang hkalem ai lam rai nna shoihpa nga ai. (Yeremia 17:9 hpe hti u.) Yehowa n ra ai lam ni hpe anhte yu nna ra sharawng nga ai rai yang “n hkru n hkra ai hpe” gaja wa “matsat” ai lam rai na kun? N hkru n hkra ai lam ni hpe chyahkring hkring yu ai, hti ai, madat ai nga yang anhte a myit nsam ja mat na re. (Shakawn 119:70; 1 Timohti 4:1, 2) Dai akyang lailen gaw tinang galaw ai lam (sh) kaga ni a mara nga ai akyang lailen ni ntsa anhte a mu mada lam galai shai mat chye ai.

11. Shangwi shapyaw ai lam hte seng nna Galati 6:7 gaw gara hku teng ai kun?

¹¹ Dai zawn gaja wa byin nga ai. Hkristan nkau gaw akyang hten za ai shangwi shapyaw lam hpe galoi mung yu ai majaw, hpye ai amu galaw wa ma ai. Shanhte gaw n kaja ai akyu hkam sha ngut yang she, “masha gaw gat hkai ai hte maren, dan la na ra ai” lam chye wa ma ai. (Galati 6:7) Raitim, dai n kaja ai akyu ni hpe koi lu ai. Na a myit hta akyang lailen san seng ai hpe gat hkai na nga yang, na a prat hta kaja ai akyu ni dan la lu na re.​—“ Gara Shangwi Shapyaw Ai Lam Hpe Ngai Lata Ging Ai Kun?” ngu ai lawk hpe yu u.

12. Galati 6:5 hpe shangwi shapyaw ai lam hte seng nna gara hku hkan sa lu ai kun? Dawdan lam jahkrak ai hta anhte a matu gara lam matsun ni nga ai kun?

¹² Chyum Laika tara hte ading tawk nhtan shai ai mung n re, hkap la hpa re ai ngu nna mung hkrak n tsun da ai shangwi shapyaw lam hpe hkaja yu ga. Dai zawn shangwi shapyaw ai lam hpe lata ai hta, Hkristan langai gaw tinang a matu akyu nga ai, n nga ai hpe tinang hkrai dawdan ra ai. (Galati 6:5 hpe hti u.)  Raitim, dai hku lata ai shaloi anhte a matu lam matsun nga ai. Chyum Laika hta Yehowa a myit mang ai lam hpe chye shangun ai npawt tara ni nga ai. Dai tara ni hpe sumru ai hku nna shangwi shapyaw ai lam hte rau lam shagu hta “Madu [Yehowa] a myit ra ai lam” hpe chye lu na re.​—Ehpesu 5:17.

13. Yehowa n ra ai shangwi shapyaw ai lam hpe koi na matu gara gaw anhte hpe shadut ya ai kun?

¹³ Akyang lailen hte seng nna, Hkristan ni a sawn maram chye ai atsam gaw langai hte langai bung na n re. (Hpilipi 1:9)  Shangwi shapyaw ai lam hte seng nna mung, ra sharawng ai lam n bung ai hpe Hkristan ni chye ma ai. Dai majaw, Hkristan yawng a dawdan lam gaw, maren sha rai na ngu n myit mada ging ai. Anhte a myit masin hta Karai Kasang a tara ni shingkang ka-up magang, Yehowa n ra ai shangwi shapyaw ai lam yawng hpe koi na matu grau shakut magang rai na re.​—Shakawn 119:11, 129; 1 Petru 2:16.

14. (a) Shangwi shapyaw ai lam lata ai hta gara lam hpe mung myit ra na kun? (b) Anhte a prat hta Karai Kasang Mungdan hpe gara hku shawng tawn mai na kun?

¹⁴ Shangwi shapyaw ai lam lata ai hta, naw myit ra ai ahkyak ai lam langai gaw aten re. Na a shangwi shapyaw ai lam hta lawm ai lam gaw, nang hkap la ai lam hpe madun ai. Shangwi shapyaw ai lam a matu nang jaw ai aten gaw, nang shawng tawn ai lam hpe madun ai. Hkristan ni a matu ahkyak htum gaw wenyi lam re. (Mahte 6:33 hpe hti u.) Dai rai yang, na a prat hta Karai Kasang Mungdan hpe shawng tawn ai lam gara hku madun mai na kun? Kasa Pawlu gaw, “nanhte kaning rai hkawm nga myit dai gaw, azin ayang yu nga mu: hpaji n rawng ai ni zawn n rai, hpaji rawng ai ni zawn hkawm nga mu: . . . dai ahkying aten hpe lata mari la mu” nga nna tsun wa ai. (Ehpesu 5:15, 16) Shangwi shapyaw ai lam a matu jailang ai aten hpe masat da ai gaw, “grau ahkyak ai lam ni” re ai wenyi lam rawt jat wa hkra, galaw na matu aten grau lu wa na re.​—Hpilipi 1:10, NW.

15. Shangwi shapyaw ai lam lata ai hta grau shim hkra galaw ai gaw hpa majaw hpaji rawng ai kun?

¹⁵ Shangwi shapyaw ai lam lata ai hta grau shim hkra galaw ai gaw hpaji rawng ai. Dai gaw hpa hpe tsun mayu ai kun? Namsi ga shadawn hpe kahtap nna myit yu u. Yat nga ai daw hpe n sha hkrup na matu, yat nga ai shara hpe sha n-ga, de a makau grupyin hpe mung nang gadoi kau na re. Dai hte maren shangwi shapyaw ai lam lata ai hta grau shim hkra galaw ai gaw hpaji rawng ai. Hpaji rawng ai Hkristan langai gaw, Chyum Laika tara ni hte nhtan shai ai shangwi shapyaw ai lam sha n-ga, wenyi lam hpe hkra machyi shangun na zawn re ai lam ni lawm ai shangwi shapyaw lam hpe mung koi na re. (Ga Shagawp 4:25-27) Chyum  Laika tara ni hpe tup hkrak hkan sa ai gaw, dai hku galaw na matu karum ya na re.

16. (a) Akyang lailen hte seng ai Yehowa a mu mada ai lam anhte hta mung nga ai hpe gara hku madun mai ai kun? (b) Chyum Laika tara ni hpe hkan sa ai gaw na a prat hkrun lam gara hku byin wa na kun?

¹⁶ Shangwi shapyaw ai lam lata ai hta, jet ai Hkristan ni gaw Yehowa a mu mada ai lam hpe shawng myit ai. Yehowa a myit jasat hte tsang madang ni hpe Chyum Laika hta madun da ai. Ga shadawn, Yehowa matsat ai lam ni hpe Hkawhkam Shawlumon ka wa ai. Dai hta “masu ga tsun ai shinglet, Mara n kap ai wa a sai hpe jahkaw kau ai lata; N kaja ai hpaji daw ai myit masin, Kajam galam galaw na lawan ai lagaw” zawn re ai ni lawm ai. (Ga Shagawp 6:16-19) Yehowa a mu mada ai lam gaw nang hpe gara hku akyu shabyin lu ai kun? “Yehowa hpe tsaw ra ai ni e, n hkru ai hpe ndawng kau mu” nga nna shakawn kungdawn sara tsun da ai. (Shakawn 97:10) Shangwi shapyaw ai lam lata ai hta, Yehowa matsat ai hpe nang teng sha matsat ai lam madun ra ai. (Galati 5:19-21) Masha shawng hta galaw ai hta na, masha n mu ai shara hta galaw ai lam gaw, nang gaw kaning re ai masha re ai hpe madun dan ai lam hpe dum u. (Shakawn 11:4; 16:8) Dai majaw, anhte a prat hkrun lam yawng hta, akyang lailen hte seng ai Yehowa a myit jasat nga ai nga yang, Chyum Laika tara hte maren galoi mung lata na re. Dai hku galaw ai gaw na a prat hkrun lam rai wa na re.​—2 Korinhtu 3:18.

17. Shangwi shapyaw ai lam n lata shi yang gara ga san ni san ging ai kun?

 ¹⁷ Shangwi shapyaw ai lam lata ai hta, Yehowa a myit mang ai lam hte maren byin hkra, nang gara lam naw galaw lu na kun? ‘Ndai gaw ngai hpe, Karai Kasang hte nye a hku hkau lam hpe gara hku hkra machyi na kun?’ ngu ai ga san hpe myit yu u. Ga shadawn, sumla hkrung langai yu na, n yu na hpe n dawdan shi yang ‘ndai sumla hkrung hta lawm ai lam gaw nye a myit nsam hpe gara hku hkra machyi na kun?’ nga nna tinang hkum tinang san u. Ndai lam hta gara tara ni hpe hkan sa mai ai lam hkaja yu ga.

18, 19. (a) Hpilipi 4:8 hta lawm ai tara ni gaw anhte a shangwi shapyaw ai lam akyu nga, n nga dawdan ai hta gara hku karum ya ai kun? (b) Akyu nga ai shangwi shapyaw ai lam lata lu na matu karum ya ai kaga tara ni gaw hpa ni rai kun? (Lawu matsing hpe yu u.)

¹⁸ Hpilipi 4:8 hta ahkyak ai npawt tara langai hpe mu lu ai. “Hpunau ni e, hpa tengman ai lam rai ti mung, hpa htuk htap re ai lam rai ti mung, hpa dinghpring ai lam rai ti mung, hpa san seng ai lam rai ti mung, hpa sharawng awng ai lam rai ti mung, hpa sha-a ram ai lam rai ti mung, arawng re ai lam lama ma, shakawn kungdawn re ai lam lama rai nga yang gaw, dai lam hte hpe myit ada yu nga mu.” Pawlu gaw shangwi shapyaw ai lam tsun nga ai n re. Myit masin hta sumru ai lam gaw, Karai Kasang ra sharawng ai lam ni a ntsa madung da ging ai lam tsun nga ai re. (Shakawn 19:14) Raitim, Pawlu a ga ni gaw shangwi shapyaw lam hte mung seng ai. Gara hku nna kun?

¹⁹ ‘Ngai lata ai sumla hkrung, video game, yungwi hte kaga shangwi shapyaw ai lam ni gaw nye a myit hpe san seng ai lam nga manga hte hpring shangun ai kun?’ nga nna tinang hkum tinang san u. Ga shadawn, sumla hkrung yu ngut ai hpang na a myit hta gara sumla ni ngam taw ai kun? Yu ngut ai hpang, myit hta ngwi pyaw lam, simsa lam lu ai nga yang na a shangwi shapyaw lam gaw akyu nga ai. Raitim, nang sumla hkrung yu ngut ai hpang n san seng ai lam ni hpe sha myit taw ai nga yang, na a shangwi shapyaw ai lam gaw akyu n nga ai, shoihpa pyi byin chye ai. (Mahte 12:33; Marku 7:20-23) Hpa majaw kun? Akyang  lailen n san seng ai lam ni hpe myit taw ai gaw, na a myit sim sa lam hpe hten za shangun ai. Chyum Laika hte shaman da ai na a myit nsam hpe ningma lu shangun nna, Karai Kasang hte na a hku hkau lam hpe hten za shangun ai. (Ehpesu 5:5; 1 Timohti 1:5, 18, 19) Dai zawn shangwi shapyaw ai lam ni gaw, nang hpe grai hkra machyi shangun ai majaw, dai hpe koi na matu myit dawdan da u. * (Roma 12:2) “Kaman lila hpe n mu n ga, nye a myi kayin la ya e” nga nna akyu hpyi wa ai shakawn kungdawn sara zawn galaw u.​—Shakawn 119:37.

20, 21. 1 Korinhtu 10:23, 24 gaw akyu nga ai shangwi shapyaw ai lam lata ai hte gara hku seng ai kun?

²⁰ Tinang hte seng ai dawdan lam ni jahkrat ai shaloi, myit ra na Chyum Laika npawt tara hpe Pawlu tsun wa ai. “Yawng mayawng galaw na ahkang nga ai; rai ti mung, yawng mayawng hte wa akyu byin ai n rai; yawng mayawng galaw na ahkang nga ai; rai ti mung, yawng mayawng hte wa shadaw shagrin lu ai n rai. Kadai mung tinang akyu n re ai sha, kaga wa a akyu sha tam nga mu” nga nna shi tsun ai. (1 Korinhtu 10:23, 24) Ndai npawt tara gaw, akyu nga ai shangwi shapyaw ai lam lata ai hte gara hku seng ai kun? ‘Ngai lata ai shangwi shapyaw ai lam a majaw kaga ni gara hku hkamsha mat na kun?’ nga nna tinang hkum tinang san u.

²¹ “Galaw na ahkang” nga ai (sh) hkap la mai ai ngu nang sawn la ai shangwi shapyaw ai lam langai hpe yu na matu, na a myit nsam gaw ahkang jaw na re. Raitim, myit nsam gawng kya ai hpunau nauna nkau gaw, dai hpe n hkap la yang nang n galaw na matu dawdan na re. Hpa majaw kun? Hpunau nauna ni Karai Kasang a ntsa matut sadi dung na matu grau yak shangun ai majaw re. Pawlu tsun wa ai hte maren, “hpunau ni hpe shut hpyit” ai gaw “Hkristu hpe shut hpyit” ai hte bung ai majaw, nang dai hku byin mayu na n re. “Ahtu kataw shara hkum tai nga myit”  ngu ai ga hpe nang hkan sa mayu ai majaw re. (1 Korinhtu 8:12; 10:33) Dai ni na jet ai Hkristan ni gaw “galaw na ahkang” nga ai raitim, “shadaw shagrin” ai lam n byin shangun ai shangwi shapyaw lam hpe koi ai hku nna, Pawlu a myit tau ya chye ai, hpaji rawng ai lam matsun hpe hkan sa ma ai.​—Roma 14:1; 15:1.

22. Hkristan ni gaw mu mada lam shai wa ai lam ni hta hpa majaw hkungga ging ai kun?

²² Kaga ni a akyu hpe tam mai ai lam langai naw nga ai. Myit nsam gawng kya ai Hkristan langai gaw, htap htuk ai shangwi shapyaw ai lam langai hte seng nna, tinang a gyip ai mu mada lam hte maren hpung hta nga ai Hkristan yawng galaw ra na ngu n hpyi shawn ging ai. Shi gaw dai zawn galaw yang, lam nmaw hta mawdaw gawt ai ni yawng gaw, shi gawt ai hku sha gawt ra na ngu atik anang hpyi shawn ai wa hte bung na re. Dai hku hpyi shawn ai gaw rap ra ai lam n nga ai. Shangwi shapyaw ai lam hte seng nna, kaga hpunau nauna ni a mu mada lam gaw tinang hte shai ai raitim, npawt tara hpe n tawt lai ai mung rai na re. Dai zawn re ai masa hta, myit nsam gawng kya ai wa gaw Hkristan tsawra myit hte hpunau nauna ni a mu mada lam hpe hkungga ging ai. Dai lam hku nna shi a “rap ra ai mu mada lam hpe masha yawng a man hta dan dawng shangun” na re.​​—Hpilipi 4:5, NW; Hpaji 7:16.

23. Akyu nga ai shangwi shapyaw ai lam hpe nang gara hku lata lu na kun?

²³ Akyu nga ai shangwi shapyaw ai lam hpe nang gara hku lata lu na kun? Chyum Laika hta n kaja ai ngu tsun da ai hpye ai amu hpe dan dan leng leng madun da ai shangwi shapyaw lam yawng hpe koi u. Shangwi shapyaw ai lam langai hte seng nna Chyum Laika hta tup hkrak tara n nga tim, dai hte seng ai Chyum Laika npawt tara ni hpe hkan sa u. Na a myit nsam hpe hkra machyi shangun ai shangwi shapyaw ai lam ni hpe koi u. Kaga masha ni, laksan hku nna hpunau nauna ni hpe myit hkra machyi shangun ai shangwi shapyaw lam yawng hpe tsep kawp koi u. Dai zawn galaw na matu, na a ngang kang ai dawdan lam a majaw Karai Kasang a hpung shingkang dan dawng u ga. Nang hte na a kun dinghku mung Karai Kasang a n-gaw nwai ai tsawra myit hta a nga nga u ga.