1, 2. Aliikkutassanut tunngatillugu qanoq aalajangertariaqarpugut?

TAKORLOORIARUK iipilimik mamarunartumik tamussilerlutit takulerit ilaa asiusimasoq. Qanoq iliussavit? Iipili tamaat, aamma asiusimasortaa, nerisinnaavat; iipili tamaat igisinnaavat; imaluunniit asiusimasortaa peeriarlugu asiusimanngitsortaa nerisinnaavat. Qanoq iliorusuppit?

² Tamatumunnga assingusumik iliortoqarsinnaavoq aliikkutassanik toqqaanissamut tunngatillugu. Immaqa ilaannikkut arlaannik aliikkutaqarlutit qasuersaarusuttarputit, nalunngilalli ullumikkut aliikkutassat ilarpassui ileqqussanut tunngatillugu ajortuusut, aap, asiusimasullusooq. Taava qanoq iliussavit? Immaqa ilaasa aliikkutassat silarsuarmit neqeroorutigineqartartut tamaasa, aamma ajortuusut, akueriinnassavaat. Allat immaqa aliikkutassat ajoqutaasut pinngitsoorumallugit sunilluunniit aliikkutaqarusunneq ajorput. Allat ajoqutaasunik aliikkutaqanngilluinnartarput aliikkutassanilli iluaqutaasunik ilaannikkut sammisaqartarlutik. Illit Guutip asanninneraniittuinnarumallutit qanoq aalajangertariaqarpit?

3. Suna sammissavarput?

³ Amerlanersatta immaqa periarfissat pingajuat toqqarumassavaat. Nalunngilarput sukisaarsarnissaq pisariaqartillutigu, taamaallaalli ileqqussanut tunngatillugu minguitsunik aliikkutaqarusuppugut. Taamaattumik aliikkutassat  suut iluaqutaanersut suullu iluaqutaannginnersut paasissallugu uagutsinnut pingaaruteqarpoq. Sammeqqaassavarpulli aliikkutassanik toqqaanerput Jehovamik pallorfiginninnitsinnut qanoq sunniuteqarsinnaanersoq.

4. Guutimut tunniulluinnarsimanerput aliikkutassanik toqqaanitsinnut qanoq sunniuteqartariaqarpa?

⁴ Jehovap Nalunaajaasuisa ilaat angut utoqqaq 1946-mi kuisittoq ima oqarsimavoq: “Ataatsimeersuarnerni kuisinneq pillugu oqalugiartoqaraangat najuuttuaannarpunga tusarnaaqqissaartarlungalu, soorlu tassa nammineq kuisittussaallunga.” Sooq taamaaliortarpa? Ima oqarpoq: “Tunniulluinnarsimanera puiunngisaannarakku aalajaattuarnissannut iluaqutigaara.” Qularnanngitsumik isumaqatigaat. Eqqaamajuarukku Jehova inuunerit tamaat kiffartorfiginiarlugu neriorsorsimallugu tamanna aalajaattuarnissannut kajumississutigissavat. (Oqaluussisartup oqaasii 5:3 atuaruk). Guutimut tunniulluinnarsimanerit eqqarsaatigeqqissaartarukku tamanna oqaluussinermut isiginnittaatsinnut sunniuteqaannarani aammali inuunermi sunut tamanut — aamma aliikkutassanik toqqaaninnut — sunniuteqassaattaaq. Apustilip Paulusip tamanna erseqqissarpaa kristumiunut nalimini inuusunut ima allakkami: “Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.” — 1 Kor 10:31.

5. Mosesimik allakkat pingajui 22:18-20 iluaqutigalugit mianersoqqussut toqqaannanngitsoq Romamiunut allakkani 12:1-imiittoq qanoq paasisinnaavarput?

⁵ Inuuninni iliuutsitit tamarmik Jehovamut attaveqarninnut sunniuteqartarput. Paulusip ilumoortoq tamanna uppeqatiminut eqqaasitsissutigiumallugu Romamiunut  allakkamini oqaaseqatigiit pikkunartut atorpai. Ima allappoq: “Oqaaqqissaarniarpassi timisi sassaateqqullugit pilliutitut uumasutut illernartutullu Guutip iluarinartitaatut, tamanna tassaassaaq anersaakkut guutisiornersi.” (Rom 12:1) Illit isumat, uummatit nukitillu timinnut ilaapput. Taakku tamaasa guutisiorninni atortarpatit. (Mark 12:30) Paulusip taamatut uummatikkut iluunngarluni kiffartorneq pilliutitut uumasutut eqqartorpaa. Oqaatsit taakku toqqaannanngitsumik mianersoqqussutaapput. Mosesip inatsisai naapertorlugit pilliut ajoqutilik Guutimit akuerineqarneq ajorpoq. (3 Mos 22:18-20) Kristumiu anersaakkut ittunik arlaatigut ‘ajoqutilinnik’ pilliuteqarpat pilliutai aamma Guutimit akuerineqassanngillat. Qanoq ‘ajoqutilinnik’ pilliuteqartoqarsinnaava?

6, 7. Kristumiup timini qanoq mingutsissinnaavaa, tamannalu qanoq kinguneqarsinnaava?

⁶ Paulusip kristumiut Romamiittut ima oqaaqqissaarpai: ‘Avatisi ajortimut atugassanngorteqinasigit.’ Aamma allappoq ‘timip suliai toqutissagaat’. (Rom 6:12-14; 8:13) Allakkamini siusinnerusukkut ‘timip suliaasa’ ilaat eqqartorpai. Inuit ajortillit pillugit ima allassimasoqarpoq: ‘Perloqqusinerit ajuallannartullu qarnisa ulikkaarutigaat; aammik kuisissallutik isigaat oqilapput.’ (Rom 3:13-18, 1936) Kristumiup ‘avatini’  taamatut ajortuliornermut atortarunigit timini mingutsissavaa. Assersuutigalugu kristumiu ileqqussatigut ajortunngornartunik, soorlu pornografiimik, isiginnaartaruni imaluunniit naalliutsitsinertalinnik aliikkutaqartaruni isini ‘ajortimut atortussanngortissavai’, taamaalillunilu timini tamaat mingutsissavaa. Guutimik pallorfiginninnermini qanorluunniit ilioraluaruni iliuusii illernartuujunnaarput, taamaalillutillu Jehovamit akuerineqarsinnaajunnaarput. (5 Mos 15:21; 1 Petr 1:14-16; 2 Petr 3:11) Ajortunngornartunik aliikkutaqarneq akisoqaaq!

⁷ Erseqqippoq kristumiup aliikkutassanik toqqaanera kingunerlorujussuarsinnaasoq. Taamaattumik qularnanngitsumik uagut Guutimut pilliutitsinnut pitsanngorsaataasinnaasunik, mingunnartuunngitsunik, aliikkutassanik toqqaasarnissarput kissaatigaarput. Maanna aliikkutassat iluaqutaasut iluaqutaanngitsullu qanoq immikkoortissinnaanerlutigit paasiniaariarta.

8, 9. (a) Aliikkutassat qanoq immikkoortinneqarsinnaappat? (b) Suut aliikkutarissanngilavut, aamma sooq?

⁸ Aliikkutassat marlunnut immikkoortinneqarsinnaapput. Aliikkutassaqarpoq kristumiut aliikkutarerusunngilluinnagaannik; aamma aliikkutassaqarpoq kristumiut akuersaarnartitaannik akuersaarnartinngisaannilluunniit. Siulleq sammeriartigu — aliikkutassat kristumiut aliikkutarerusunngisaat.

⁹ Kapitalimi siullermi eqqaaneqartutut aliikkutassat sukisaarsarnerillu ilaanni iliuutsit assigiinngitsut Biibilimi erseqqilluinnartumik assuarineqartut pingaarnerutinneqartarput. Assersuutigalugu internetikkut nittartakkat, filmit, fjernsynikkut aallakaatitassiat erinarsuutillu ilaanni nuannariinnarlugu allanik naalliutsitsineq, anersaapilussiorneq pornografiilu sammineqartarput imaluunniit  kinguaassiuutitigut maajunnartunik iliuuseqarnissamut kajumissaarutitaqartarlutik. Aliikkutassani tamakkunani iliuutsit najoqqutassianut inatsisinullu Biibilimeersunut naapertuutinngitsut akuersaarnartunngorlugit saqqummiunneqartarmata kristumiut ilumoortut aliikkutarinngilluinnartariaqarpaat. (ApS 15:28, 29; 1 Kor 6:9, 10; Saqq 21:8) Illit taamaaliornikkut Jehova paasitissinnaavat uummatikkut iluunngarlutit ‘ajussuseq maajugalugu’ ‘ajortorlu nigorsimajuarlugu’. Taamatut ‘uppernikkut pisuusaannginnerit’ ersersissinnaavat. — Rom 12:9; Tuss 34:15; 1 Tim 1:5, 1936.

10. Aliikkutassanut tunngatillugu eqqarsartaaseq suna navianarpa, aamma sooq?

¹⁰ Ilaasali ileqqorluttortalinnik aliikkutaqartarnertik ajoqutaasorisanngilaat. Ima oqartarput: ‘Imaassinnaavoq filminik fjernsynikkullu aallakaatitassianik tamakkuninnga isiginnaartartunga, takutinneqartutulli nammineq iliuuseqanngisaannassaanga.’ Taamatut eqqarsartarneq imminut salloqittarnerullunilu navianarpoq. (Jeremia 17:9 atuaruk). Jehovap assuarisaanik aliikkutaralugu isiginnaartarneq nuannarigutsigu ilumut ‘ajussuseq maajugigipput’ oqartoqarsinnaava? Ileqqorluttortalinnik isiginnaartarlutalu, atuartarlutalu tusarnaartarutta nalunngeqatiginnissuterput misikkarlussiartussaaq. (Tuss 119:70; 1 Tim 4:1, 2) Tamannalu iliuutsitsinnut allallu ajortuliortarnerannut isiginnittaatsitsinnut sunniuteqarsinnaavoq.

11. Aliikkutassanut tunngatillugu Galatiamiunut allakkani 6:7-imi allassimasut ilumoortuunerat qanoq erserpa?

¹¹ Kristumiut ilaat taamatut eqqarsartaaseqaramik nakkaannarsimapput. Aliikkutarisartakkaminnit sunnerneqarnertik pissutigalugu kinguaassiuutitigut assuarnartuliorsimapput. Ajortumik misigisaqaramik aatsaat paasivaat ‘inuup siaruartikkani aamma katersorumaarai’. (Gal 6:7) Ajortuliornaveersaartoqarsinnaavorli. Isumat  iluaqutaasunik ajunngitsunillu immersortarukku nuannersut ajunngitsullu katersussavatit. — Takuuk ungalusaq “ Suut aliikkutarissavakka?”

12. Galatiamiunut allakkani 6:5-imi allassimasut aliikkutassanut tunngatillugu qanoq atorneqarsinnaappat, toqqaassagaangattalu suut iluaqutigisarsinnaavavut?

¹² Maanna aliikkutassat assuarnartuunersut imaluunniit akuerineqarsinnaasuunersut Guutip oqaasiani allaatigineqanngitsut misissoriartigit. Kristumiut aliikkutassanik tamakkuninnga toqqaassagaangamik namminneq inuttut ataasiakkaatut nalilertariaqarpaat suut ajunngitsuunersut suullu ajortuunersut. (Galatiamiut 6:5 atuaruk). Najoqqutassaqarpugulli. Najoqqutassianik, imaluunniit ilumoortunik tunngaviusunik, Biibilimiittoqarpoq Jehovap isiginnittaasianik paasinninnissamut iluaqutigisartakkatsinnik. Najoqqutassiat taakku eqqarsaatigeqqissaartarutsigit sutigut tamatigut, aamma aliikkutassanik toqqaanitsigut, ‘suna Jehovap piumasarineraa’ paasisinnaavarput. — Ef 5:17.

13. Jehovap iluarinngissinnaasaanik aliikkutaqannginnissamut suna kajumississutigissavarput?

¹³ Paasinarpoq kristumiut paasinnittaatsiminnik, imaluunniit immikkoortitsisinnaanerminnik, tamarmik assigiimmik ineriartortitsinngimmata. (Fil 1:9) Kristumiut aamma paasisimavaat nuannarisamik iluarisamillu assigiinngitsuunerat. Taamaattumik kristumiut tamarmik assigiimmik aalajangiisarnissaat naatsorsuutigineqassanngilaq. Taamaakkaluartorli isumarput uummaterpullu najoqqutassianit Biibilimiittunit sunnerneqarnerujartortillugit Jehovap iluarinngissinnaasaanik sunilluunniit aliikkutaqannginnissatsinnut kajumissuseqarnerulissaagut. — Tuss 119:11, 129; 1 Petr 2:16.

14. (a) Aliikkutassanik toqqaagaangatta suna eqqarsaatigisariaqarparput? (b) Qanoq Guutip naalagaaffiata soqutigisaanik salliutitsisinnaavugut?

 ¹⁴ Aliikkutassanik toqqaanermut tunngatillugu eqqarsaatigisariaqakkat pingaarutilik alla tassaavoq illit piffissat. Illit aliikkutassanik toqqaaninnit paasinarsisarpoq suut akuerineritit, aliikkutassanullu piffissamik atuininnit paasinarsisarpoq suut pingaartinneritit. Soorunami kristumiunut pingaarnerpaasut tassaapput anersaakkut  ittut. (Matthæusi 6:33 atuaruk). Inuuninni Guutip naalagaaffiata soqutigisaanik pingaarnerpaatitsiuarnissat qulakkeerniarlugu illit qanoq iliuuseqarsinnaavit? Apustili Paulusi ima allappoq: “Sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi. Piffissaqqissoq atorniarsiuk.” (Ef 5:15, 16) Aliikkutassanut piffissamik qanoq atuitigissanerlutit killilertarukku ‘pingaaruteqarnerusunut’ (NW) — sammisassanut anersaakkut peqqinnerulissutigisinnaasannut — piffissaqalissaatit. — Fil 1:10.

15. Sooq aliikkutassanik toqqaassagaanni mianersornerusarnissaq silatusaarnerua?

¹⁵ Aamma aliikkutassanik toqqaassagaanni mianersornerusarnissaq silatusaarnerussaaq. Tamanna qanoq paasisariaqarpa? Iipilimik assersuusiaq eqqarsaatigeqqeriaruk. Asiusimasortaa neriumanagu ajortunngorsimasortaa kisiat piiginnarnagu aammali tamatuma eqqaa ilanngullugu peerneqartariaqarpoq. Aliikkutassanik toqqaaniaraanni tamatumunnga assingusumik iliuuseqartariaqarpoq. Soorunami kristumiup silatuup Biibilimut naapertuutinngilluinnartut aliikkutarinavianngilai, aammali aliikkutassat qularnartut imaluunniit anersaakkut ajoqutaasinnaasunik imaqalaaginnarsinnaasut aliikkutarinavianngilai. (Uss 4:25-27) Guutip oqaasia maleruaqqissaarukku iluaqutaanngitsunik aliikkutaqarnavianngilatit.

16. (a) Jehovap ileqqussanut tunngatillugu isiginnittaasiatut isiginnittaaseqarnerput qanoq ersersissinnaavarput? (b) Najoqqutassianik Biibilimiittunik maleruaaneq qanoq inooriaaserilersinnaaviuk?

¹⁶ Kristumiut ilumoortut aliikkutassanik toqqaannginnerminni Jehovap isiginnittaasia pingaarnerutittarpaat. Biibilimi Jehovap misigissusii najoqqutassiaalu allaatigineqarput. Assersuutigalugu kunngip Salomop eqqartorpai  Jehovap uumigisai arlallit ilaat uku: “Oqaq sallutooq, assaat pinngitsup aavanik kuisisut, uummat pilersaarutipiloqartoq, isikkat tuaviusukaartut siunertaralugu ajortussaq.” (Uss 6:16-19) Jehovap isiginnittaasia illit isiginnittaatsinnut qanoq sunniuteqassava? Tussiaasiortoq ima kajumissaarivoq: “Ilissi Naalakkamik asannittusi ajortoq uumigissavarsi.” (Tuss 97:10) Aliikkutassanik toqqaasarninnit ersertariaqarpoq Jehovap uumigisai uumigilluinnaritit. (Gal 5:19-21) Eqqaamajullu kisimiillutit iliuuserisartakkavit allat ilagalugit iliuuserisartakkanniit inuttut qanorpiaq ittuusutit ersersinnerusaraat. (Tuss 11:4; 16:8) Taamaattumik inuuninni sutigut tamatigut Jehovap ileqqussanut tunngatillugu isiginnittaasiatut isiginnittaaseqarnissat qamannga pisumik kissaatigigukku najoqqutassianut Biibilimiittunut naapertuuttumik aalajangiisassaatit. Taamaaliortaruit tamanna inooriaaserilissavat. — 2 Kor 3:18.

17. Aliikkutassanik toqqaannginnitsinni imminut qanoq aperisinnaavugut?

¹⁷ Aliikkutassanik toqqaasarnerit Jehovap isiginnittaasianut naapertuuttuunersoq aamma qanoq qulakkeersinnaaviuk? Imminut ima aperisinnaavutit: ‘Toqqaanissara Guutimut attaveqarninnut uannullu qanoq sunniuteqassava?’ Assersuutigalugu filmi aalajangersimasoq isiginnaassanerlugu isiginnaassannginnerluguluunniit aalajanginnginninni  imminut ima aperigit: ‘Filmi isiginnaaraluarukku ilerasuuteqalissaanga?’ Tamatumunnga tunngatillugu najoqqutassiat suut eqqarsaatigineqarsinnaasut sammeriartigit.

18, 19. (a) Najoqqutassiaq Filippimiunut allakkani 4:8-miittoq aliikkutassanik iluaqutaasunik toqqaanissamut qanoq iluaqutigisinnaavarput? (b) Najoqqutassiat allat suut aamma iluaqutigisinnaavigit? (Quppernerup ataani ilanngussaq takuuk).

¹⁸ Filippimiunut allakkani 4:8-mi pingaarutilimmik ima najoqqutassiaqarpoq: “Pingaartissigit [eqqarsaatigiuarniarsigit, NW] suut ilumoortut tamaasa, suut assuarnaatsut, suut iluartut, suut minguitsut, suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu.” Paulusip aliikkutassat pinnagit uummatilli eqqarsaatai Guutip iluarinartitai pivai. (Tuss 19:15) Taamaakkaluartorli Paulusip oqaasii aamma aliikkutassanut tunngatinneqarsinnaapput. Qanoq ililluni?

¹⁹ Imminut ima aperigit: ‘Filminik, qarasaasiakkut pinnguaatinik, nipilersukkanik aliikkutassanillu allanik toqqaasarnera “minguitsunik” eqqarsaateqalersitsisarpa?’ Assersuutigalugu filmimik isiginnaareerlutit eqqarsaatigiuk filmip takutitaasa ilaat suut illit isumanni takoqattaartutullusooq ittarnerlugit. Nuannersunik, minguitsunik ineriartuutaasunillu eqqarsaateqaruit aliikkutaasimassaaq iluaqutaasoq. Filmili takusimasat minguttuumik eqqarsartitsippat taava aliikkutaasimassaaq ineriartuutaanngitsoq, aap, allaat ajoqutaasimassaaq. (Matt 12:33; Mark 7:20-23) Qanoq ajoqutaagami? Ileqqussatigut minguttuut eqqarsaatigigukkit eqqarsaatitit taakku qamuuna eqqissisimaninnut akornutaasinnaallutillu nalunngeqatiginnissutinnik Biibili tunngavigalugu ilinniartinneqarsimasumik malussarlersitsisinnaallutillu Guutimut attaveqarninnut ajoqutaasinnaapput. (Ef 5:5; 1 Tim 1:5, 19)  Aliikkutassat taamaattut ilinnut ajoqutaasumik sunniuteqarmata taakkua aliikkutarinnginnissaat aalajangiusimasariaqarpat. * (Rom 12:2) Tussiaasiortoq Jehovamut ima qinusoq ilaaruk: “Isikka alartikkit sallunermit [naleqanngitsunit, NW].” — Tuss 119:37.

20, 21. Korinthimiunut allakkat siulliit 10:23, 24 aliikkutassanik iluaqutaasunik toqqaanissannut qanoq attuumassuteqarpat?

²⁰ Aalajangiiniaraangatta najoqqutassiaq pingaarutilik alla eqqarsaatigisariaqartagarput Paulusip eqqaavaa. Ima allappoq: “Sunik tamanik iliorsinnaatitaavunga, imaanngilarli suut tamarmik ineriartortitsisuusut. Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk.” (1 Kor 10:23, 24) Najoqqutassiaq tamanna illit aliikkutassanik iluaqutaasunik toqqaanissannut qanoq attuumassuteqarpa? Imminut ima aperisariaqarputit: ‘Aliikkutassamik toqqaanissara allanut qanoq sunniuteqassava?’

²¹ Immaqa nalunngeqatiginnissutit naapertorlugu aliikkutassat ilaat aalajangersimasut akuerisinnaavatit. Uppeqativilli ilaasa killeqarnerutitsisumik nalunngeqatiginnissutillit aliikkutassat tamakku mamiatsaatigigaat paasigukku taava immaqa tamakku aliikkutariumanagit aalajangissaatit. Sooq? Uppeqativit Guutimut aalajaattuarnissaannik sapernarnerutitsinikkut ‘qatanngutinnut ajortuliorumannginnavit’ — ingammillu ‘Kristusimut ajortuliorumanngilluinnaravit’. Paulusip oqaaqqissaarutaa una maleruarumavat: “Mamiatsatsitsiniaqinasi.” (1 Kor 8:12; 10:32) Ullumikkut kristumiut ilumoortut Paulusip siunnersuutitsialai  iluaqutaangaartut naalappaat aliikkutassat akuerineqarsinnaagaluartut ineriartuutaanngitsulli aliikkutarinnginnerisigut. — Rom 14:1; 15:1.

22. Sooq kristumiut assigiinngitsumik isiginnittaaseqarsinnaanertik akueraat?

²² Allanut pitsaanerpaamik noqqaassutiginninnermut tunngatillugu pingaarutilik alla eqqaamasariaqarparput. Kristumiup killeqarnerusitsisumik nalunngeqatiginnissutillip ilagiinniittut allat tamaasa aliikkutarisinnaasanik aliikkutarisinnaanngisanillu isiginnittaatsimisut isiginnittaaseqalersinniarsarissanngilai. Taamaalioruni biilertoq sukkassutsimisut biilertunik allanik tamanik sukkatitsiniartoq assigissavaa. Tamannalu ingasaassinerussaaq. Killeqarnerutitsisumik nalunngeqatiginnissutillip uppeqatini aliikkutassanut tunngasunik immisut isiginnittaaseqanngitsut — kristumiulli najoqqutassiaat naapertorlugit akuerineqarsinnaasunik isiginnittaasillit — asannittumik ataqqisariaqarpai. Taamaalilluni ‘ingasaassinianngitsuunini’ tamanut ilisimaneqalersissavaa. — Fil 4:5, NW; Oqal 7:16.

23. Aliikkutassanik iluaqutaasunik toqqaanissat qanoq qulakkeersinnaaviuk?

²³ Uteqqiilaariarta: Aliikkutassanik iluaqutaasunik toqqaanissat qanoq qulakkeersinnaaviuk? Aliikkutassat kinguaassiuutitigut assuarnartortalinnik, Guutip oqaasiani assuarineqarluinnartunik, takutitsisut tamaasa aliikkutarinngilluinnakkit. Najoqqutassiat Biibilimeersut aliikkutassanut Biibilimi allaatigineqanngitsunut tunngatinneqarsinnaasut maleruartakkit. Aliikkutassat allanik, ingammik uppeqatinnik, mamiatsatsitsisinnaasut aliikkutarinnginnissaannut kajumissuseqarit. Taamaaliornissat aalajangiusimagukku tamanna Guutimut ataqqinaataatissallugulu ilaquttatillu Guutip asanninneraniittuinnassutigissavarsi.