1, 2. Uskayn we fɔ ɛnjɔy yusɛf, yu go pik?

LƐ WI se yu want it wan swit swit frut. Bɔt yu kam si se sɔm pat pan di frut rɔtin. Wetin yu go du? Wɛl, i lɛf to yu fɔ disayd. If yu want, yu kin it di wan ol frut, di gud pat ɛn di bad pat. Ɔ yu kin trowe di wan ol frut. Ɔ if yu want, yu kin kɔt di bad pat kɔmɔt ɛn it di gud pat. Uswan yu go want fɔ du?

² Semweso, di tin dɛn we wi de tek fɔ ɛnjɔy wisɛf kin tan lɛk da frut. Sɔntɛnde, yu kin want fɔ rili ɛnjɔy yusɛf, bɔt yu go si se plɛnti pan di tin dɛn we pipul dɛn kin tek fɔ ɛnjɔy dɛnsɛf, nɔ kin fayn, ɛn sɔm kin ivin rɔtin. So, wetin yu go du? Sɔm pipul dɛn kin gri fɔ put an pan ɛnikayn bad tin we de na dis wɔl fɔ ɛnjɔy dɛnsɛf. Ɔda pipul dɛn nɔ kin want ɛnjɔy dɛnsɛf atɔl bikɔs dɛn nɔ want fɔ put an pan ɛnitin we nɔ fayn. Bɔt ɔda wan dɛn de we kin tek tɛm fɔ avɔyd ɛni gladi gladi we nɔ fayn, bɔt wan wantɛm, dɛn kin ɛnjɔy dɛnsɛf di rayt we. So uswan pan dɛn wan ya yu go lɛk fɔ du we go mek Gɔd kɔntinyu fɔ lɛk yu?

3. Wetin wi de kam tɔk bɔt?

³ Plɛnti pan wi go pik di las wan we wi dɔn tɔk bɔt. Wi no se i fayn fɔ ɛnjɔy, bɔt wi nɔ want fɔ ɛnjɔy wisɛf wit tin dɛn we bad ɛn we nɔ klin na Gɔd in yay. So wi gɛt fɔ tink bɔt di tin dɛn we wi de tek fɔ ɛnjɔy wisɛf. Wi want fɔ no  uswan we fayn ɛn uswan we nɔ fayn. Bɔt fɔs, lɛ wi tɔk bɔt aw di tin dɛn we wi de du fɔ ɛnjɔy wisɛf go ambɔg wi wɔship to Jiova ɔ mek Jiova gladi fɔ wi wɔship.

4. Aw di gi we wi dɔn gi wi layf to Jiova, go mek wi tek tɛm pik di we aw wi de ɛnjɔy wisɛf?

⁴ Dis biɛn tɛm, wan ol Jiova Witnɛs we bin baptayz insay di ia 1946, bin tɔk se: “A kin mek shɔ se a go ɛn tek tɛm lisin fayn to di tɔk dɛn we dɛn kin gi fɔ di wan dɛn we want baptayz. A kin lisin lɛk se na mi gɛt fɔ baptayz.” I ɛksplen wetin mek i kin du so, i se, “We a kin mɛmba ɔltɛm bɔt di gi we a dɔn gi mi layf to Jiova, dɔn rili ɛp mi fɔ fetful to am.” Yu go mɔs gri wit wetin dis ol Jiova Witnɛs tɔk. We yu de mɛmba yusɛf se yu bin dɔn prɔmis Jiova se yu go yuz yu layf fɔ sav am, dat go ɛp yu fɔ bia ɛnitin we go kam yu we. (Rid Ɛkliziastis 5:4; Di Ibru Pipul Dɛn 10:7) We yu de tink dip wan bɔt di gi we yu dɔn gi yu layf to Jiova, dat go ɛp yu fɔ si bɔku tin dɛn lɛk aw Gɔd de si dɛn, lɛk di prich we Kristian dɛn fɔ prich ɛn di we aw dɛn fɔ ɛnjɔy dɛnsɛf. Di apɔsul Pɔl bin tɛl wi di tru tin bɔt dat we i bin de rayt to in Kristian brɔda dɛn. I bin se: “Ɛnitin we una de du, if una de it ɔ una de drink, una fɔ mek Gɔd  gɛt di prez.”​—Na wi mek am italiks; Fɔs Lɛta Fɔ Kɔrint 10:31.

5. Aw Lɛvitikɔs 22:18-20 ɛp wi fɔ si di wɔnin we de na Lɛta Fɔ Rom 12:1?

⁵ Ɛnitin we yu de du na layf go mek Jiova gladi ɔ nɔ gladi. We Pɔl bin de rayt di Kristian dɛn we bin de na Rom, i bin yuz wɔd dɛn we gɛt dip minin fɔ tɛl dɛn bɔt dis sem tin. I bin tɛl dɛn se: “A de beg una mek una gi una layf lɛkɛ sakrifays to Gɔd fɔ du in wok, ɛn fɔ du ɔl wetin i lɛk; na di tru we dat fɔ wɔship Gɔd.” (Lɛta Fɔ Rom 12:1) Sɔntɛnde, we di Baybul kin tɔk bɔt layf, i kin min yu maynd, yu at, ɛn yu trɛnk. Yu de yuz ɔl dɛn tin ya fɔ sav Gɔd. (Mak 12:30) Pɔl se we wi de yuz wi layf fɔ sav Gɔd tan lɛk sakrifays. We Pɔl yuz di wɔd sakrifays, i bin de tek tɛm wɔn in Kristian brɔda dɛn. Di tɛm we Gɔd bin gi in Lɔ dɛn to Mozis, i nɔ bin de tek ɛni sakrifays we gɛt bɔt ɔ we gɛt sɔntin pan am we nɔ fayn. (Lɛvitikɔs 22:18-20) Semweso, if di wɔship we pɔsin de wɔship Gɔd, gɛt ɛni bɔt ɔ sɔntin pan am we nɔ fayn, Gɔd nɔ de tek da wɔship de. Aw di wɔship we pɔsin de wɔship Gɔd kin gɛt bɔt?

6, 7. Aw pɔsin we na Kristian go dɔti in bɔdi? Wetin na di prɔblɛm dɛn we i go gɛt if i dɔti in bɔdi?

⁶ Pɔl bin tɛl di Kristian dɛn we de na Rom se: “Una nɔ fɔ sin wit ɛni pat pan una bɔdi.” Pɔl tɛl dɛn bak se: “Una fɔ kil dɛn tin we de mek una sin.” (Lɛta Fɔ Rom 6:12-14; 8:13) Insay di fɔs pat na in lɛta, i bin tɔk bɔt sɔm tin dɛn ‘we de mek wi sin.’ I bin rayt se: “Na bad wɔd ɛn kɔs nɔmɔ de kɔmɔt na dɛn mɔt.” “Dɛn lɛk fɔ kil ɛn mek pipul sɔfa.” “Dɛn nɔ de fred Gɔd sɛf.” (Na wi mek am italiks; Lɛta Fɔ Rom 3:13-18) Kristian go dɔti in bɔdi if i de yuz ‘ɛni pat pan in bɔdi’ fɔ du bad tin. Fɔ ɛgzampul, if pɔsin we na Kristian lɛk fɔ luk tin dɛn we de sho nekɛd  pɔsin, tin dɛn we de sho usay dɛn de du mami ɛn dadi biznɛs, ɔ usay pipul dɛn de fɛt-fɛt, i de sin wit in yay ɛn i de dɔti in wan ol bɔdi. So dis pɔsin in wɔship go tan lɛk sakrifays we nɔ klin ɛn Gɔd nɔ go tek am. (Ditarɔnɔmi 15:21; Pita In Fɔs Lɛta 1:14-16; Pita In Sɛkɛn Lɛta 3:11) Yu si wetin mek i fayn fɔ lɛ wi ɛnjɔy wisɛf di we aw Jiova want? Bikɔs if wi nɔ du dat, wi go sɔfa.

⁷ Dis dɔn sho wi klia wan se di we aw wi de ɛnjɔy wisɛf go kam wit siriɔs prɔblɛm dɛn, if wi nɔ tek tɛm. So wi want fɔ ɛnjɔy wisɛf di we we go mek Gɔd tek di wɔship we wi de wɔship am. Bɔt wi nɔ want fɔ ɛnjɔy wisɛf ɛnikayn we we go dɔti di wɔship we wi de wɔship Gɔd. Lɛ wi tɔk naw bɔt aw wi go no wetin fayn ɛn wetin nɔ fayn fɔ tek ɛnjɔy wisɛf.

8, 9. (a) Us tu we dɛn de we pipul dɛn kin ɛnjɔy dɛnsɛf? (b) Uskayn we pipul dɛn kin ɛnjɔy dɛnsɛf we wi nɔ want fɔ put an pan atɔl? Wetin mek wi nɔ fɔ put an pan dɛn kayn tin ya?

⁸ Insay di wɔl tide, na tu kayn we de fɔ ɛnjɔy. Di fɔs wan, na di wan we Kristian dɛn nɔ fɔ put an pan atɔl. Di sɛkɔn wan, na di wan we Kristian dɛn fɔ tink gud bifo dɛn put dɛn an pan am. Naw, lɛ wi tɔk bɔt di fɔs wan we Kristian dɛn nɔ fɔ put an pan atɔl.

⁹ Insay Chapta 1, wi bin lan se sɔm tin dɛn de we pipul dɛn de du fɔ ɛnjɔy dɛnsɛf we di Baybul se wi nɔ fɔ put an pan. Fɔ ɛgzampul, dɛn Intanɛt wɛbsayt, fim, tɛlivishɔn program, ɛn myuzik dɛn we de tɔk bɔt dɛn bad tin dɛn, lɛk wich ɛn mami ɛn dadi biznɛs. Pipul dɛn kin tek dɛn tin ya fɔ ɛnjɔy dɛnsɛf ɛn dɛn kin fil se i fayn. Bɔt di Baybul dɔn tɛl wi klia wan se dɛn tin ya nɔ fayn. So Kristian dɛn nɔ fɔ put an pan dɛn tin ya atɔl. (Di Apɔsul Dɛn Wok [Akt] 15:28, 29; Fɔs Lɛta Fɔ Kɔrint 6:9, 10;  Rɛvɛleshɔn 21:8) We yu nɔ put an pan dɛn kayn tin ya fɔ ɛnjɔy yusɛf, yu de sho Jiova se yu nɔ “lɛk ɛnitin we bad” ɛn yu dɔn rɛdi fɔ “lɛf fɔ du bad ɔltogɛda.” We yu du dat, yu go sho se yu “biliv Gɔd fɔ tru.”​—Lɛta Fɔ Rom 12:9; Sam 34:14; Fɔs Lɛta To Timoti 1:5.

10. Wetin pipul dɛn kin tink bɔt di bad tin dɛn we dɛn de wach? Wetin mek i nɔ fayn fɔ tink da we de?

¹⁰ Sɔm pipul dɛn kin fil se i nɔ bad fɔ wach tin dɛn we nɔ fayn. Dɛn kin se, ‘A go wach am na fim ɔ na tɛlivishɔn, bɔt a nɔ go ɛva du am.’ If wi de tink dis kayn we, dat de sho se wi de ful wisɛf ɛn wi de put wisɛf pan denja. (Rid Jɛrimaya 17:9.) If wi de ɛnjɔy fɔ wach tin dɛn we Jiova et, yu fil se wi rili et “ɛnitin we bad”? Wi nɔ go ebul tink fayn we wi de wach ɔ rid bad tin dɛn ɔltɛm. (Sam 119:70; Fɔs Lɛta To Timoti 4:1, 2) I go mek wi bigin du tin dɛn we nɔ fayn ɔ i go mek wi fil se di bad tin dɛn we ɔda pipul dɛn de du, nɔ bad.

11. Us tru tin we Lɛta Fɔ Galeshya 6:7 tɔk bɔt we i kam pan di we aw wi de ɛnjɔy wisɛf?

¹¹ Sɔm Kristian dɛn dɔn du tin dɛn we bad na Jiova in yay bikɔs di tin dɛn we dɛn kin wach nɔ fayn. Di bad tin we kin apin to dɛn kin mek dɛn no se na wetin pɔsin plant na in i go gɛt. (Rid Lɛta Fɔ Galeshya 6:7.) Bɔt yu go ebul avɔyd dɛn bad tin ya mek dɛn nɔ apin to yu. Aw yu go ebul du dat? Na we yu de pik di tin dɛn we yu de wach. We yu du dis, i go mek yu tink bɔt gud tin dɛn, ɛn yu go ɛnjɔy yu layf.​—Rid di bɔks we se  “Aw A Go Pik di We Aw A De Ɛnjɔy Misɛf?”

12. Aw Lɛta Fɔ Galeshya 6:5 go ɛp wi fɔ pik di we aw wi de ɛnjɔy wisɛf? Wetin wi gɛt we go ɛp wi fɔ disayd aw wi fɔ ɛnjɔy wisɛf?

¹² Lɛ wi tɔk naw bɔt di sɛkɔn we aw pipul dɛn kin ɛnjɔy  dɛnsɛf. Dis sɛkɔn we de tɔk bɔt tin dɛn we di Baybul nɔ sho klia wan if dɛn fayn ɔ dɛn nɔ fayn. We wi de pik di kayn we aw wi fɔ ɛnjɔy wisɛf, ɔlman we na Kristian gɛt fɔ disayd fɔ insɛf wetin i tink se fayn ɔ nɔ fayn. (Lɛta Fɔ Galeshya 6:5) Bɔt dis nɔ min se wi nɔ gɛt ɛnitin we go ɛp wi fɔ pik di we aw wi go ɛnjɔy wisɛf. Di Baybul gɛt gud gud advays dɛn we go ɛp wi fɔ no aw Jiova de tink. We wi tray fɔ no wetin di Baybul se go mek wi ebul no “wetin di Masta want.” Dis go mek wi no aw wi de ɛnjɔy wisɛf ɛn aw wi go du plɛnti ɔda tin dɛn.​—Lɛta Fɔ Ɛfisɔs 5:17.

13. Wetin go mek wi avɔyd fɔ ɛnjɔy wisɛf wit ɛnitin we go mek Jiova nɔ gladi?

 ¹³ Wan tin we wi fɔ no na dat, ɔl Kristian dɛn nɔ go ebul fɔ tink di sem we ɔ si tin dɛn di sem we. (Lɛta Fɔ Filipay 1:9) Bɔt Kristian dɛn fɔ no se ɔlman gɛt di we aw i lɛk fɔ ɛnjɔy insɛf. So wi nɔ fɔ fil se ɔl Kristian dɛn fɔ ɛnjɔy dɛnsɛf di sem we. Di mɔ we wi gri mek di Baybul gayd wi maynd ɛn wi at, na di mɔ wi go avɔyd fɔ ɛnjɔy wisɛf wit ɛnitin we go mek Jiova nɔ gladi.​—Sam 119:11, 129; Pita In Fɔs Lɛta 2:16.

14. (a) Wetin wi fɔ tink bɔt we wi de fɛn we fɔ ɛnjɔy wisɛf? (b) Aw wi go put Gɔd biznɛs fɔs na wi layf?

¹⁴ Wan ɔda impɔtant tin de we yu fɔ mɛmba we yu de pik di kayn we aw yu fɔ ɛnjɔy yusɛf. Wetin na da tin de? Na yu taym. Di tin we yu kin tek fɔ ɛnjɔy yusɛf, de sho wetin yu tink se rayt, bɔt di tɛm we yu de spɛn fɔ ɛnjɔy yusɛf, de sho wetin impɔtant to yu. Di tin we impɔtant pas ɔl fɔ wi Kristian dɛn, na we wi de wɔship Jiova. (Rid Matyu 6:33.) So, wetin yu go du we go ɛp yu fɔ put Gɔd biznɛs fɔs na yu layf? Di apɔsul Pɔl bin tɔk se: “Una tek tɛm aw una [de] liv una layf, una nɔ du lɛkɛ dɛn pipul we nɔ gɛt sɛns. Ɛni chans we una gɛt fɔ du gud, una du ɔl wetin una ebul du.” (Lɛta Fɔ Ɛfisɔs 5:15, 16) We yu plan ɔmɔs tɛm yu go spɛn fɔ ɛnjɔy yusɛf, dat go ɛp yu fɔ gɛt tɛm fɔ du wetin “rayt na Gɔd in yay.” Ɛn dis go bɛnifit yu.​—Lɛta Fɔ Filipay 1:10.

15. Wetin mek wi nɔ fɔ go nia ɛnitin we go mek wi ɛnjɔy wisɛf di we aw Gɔd nɔ want?

¹⁵ We wi de pik di we aw wi de ɛnjɔy wisɛf, i fayn fɔ mek wi nɔ go nia ɛnitin we go mek wi ɛnjɔy wisɛf di we aw Gɔd nɔ want. Wetin dat min? Fɔ no di ansa, lɛ wi tɔk bak bɔt da frut we wi bin dɔn tɔk bɔt. Fɔ lɛ yu nɔ mistek it di rɔtin pat, yu fɔ kɔt di say we rɔtin wit sɔm gud pat we de nia di rɔtin pat. Semweso, i go fayn mek wi du di  sem tin we wi de fɛn gud we fɔ ɛnjɔy wisɛf. Kristian we gɛt sɛns nɔ go want fɔ ɛnjɔy insɛf di we aw Gɔd nɔ want. Bɔt nɔto dat nɔmɔ, i go fayn bak fɔ avɔyd ɛniwan we wi tink se i nɔ tu bad ɔ we gɛt tin dɛn we go pwɛl wi padi biznɛs wit Gɔd. (Prɔvabs 4:25-27) We wi rili fala wetin Gɔd in Wɔd se, dat go ɛp wi fɔ avɔyd ɛnitin we go mek wi ɛnjɔy wisɛf di we aw Gɔd nɔ want.

16. (a) Aw wi go sho se wi de tink lɛk aw Jiova de tink we i kam pan di we aw wi de ɛnjɔy wisɛf? (b) Aw pɔsin go sho se i de obe Gɔd ɔltɛm?

¹⁶ We tru Kristian dɛn de fɛn we fɔ ɛnjɔy dɛnsɛf, dɛn fɔ tray fɔs fɔ no wetin Jiova tink bɔt di we aw dɛn want fɔ ɛnjɔy dɛnsɛf. Di Baybul sho wi di we aw Jiova de fil ɛn di tin dɛn we i want. Fɔ ɛgzampul, Kiŋ Sɔlɔmɔn bin tɔk bɔt bɔku tin dɛn we Jiova et, lɛk “pɔsin we lɛk fɔ lay, pɔsin we de kil fɔ natin, dɛn at we de plan bad tin, fut we de magomago fɔ du bad.” (Prɔvabs 6:16-19) Wetin yu fɔ du we yu dɔn no se Jiova nɔ lɛk dɛn tin ya? Wan pan di pipul dɛn we rayt di Sam buk bin tɔk se: “Lɛ ɔl udat se i lɛk PAPA GƆD, et bad.” (Di Sam Dɛm 97:10) Di kayn tin we wi kin pik fɔ ɛnjɔy wisɛf kin sho if wi rili et wetin Jiova et. (Lɛta Fɔ Galeshya 5:19-21) Mɛmba bak se, wetin yu de du we nɔbɔdi nɔ de nia yu, na in mɔ de sho uskayn pɔsin yu rili bi. (Sam 11:4; 16:8) So if yu  rili want fɔ du wetin Jiova want wit ɔl yu at, dat go ɛp yu fɔ pik di rayt we fɔ ɛnjɔy yusɛf we go gri wit wetin di Baybul se. If yu de du dis, i go mek yu du wetin Jiova want ɔltɛm.​—Sɛkɛn Lɛta Fɔ Kɔrint 3:18.

17. Bifo wi pik di we aw wi go ɛnjɔy wisɛf, us kwɛstyɔn dɛn wi fɔ aks wisɛf?

¹⁷ We i kam pan di kayn we aw yu de ɛnjɔy yusɛf, wetin bak yu go du we go mek yu ɛnjɔy yusɛf di we aw Jiova want? Aks yusɛf dis kwɛstyɔn, ‘Aw dis go mek Gɔd fil bɔt di padi biznɛs we a gɛt wit am?’ Fɔ ɛgzampul, bifo yu wach fim, aks yusɛf dis kwɛstyɔn, ‘Wetin dis fim go du to mi kɔnshɛns?’ Naw, lɛ wi kam tɔk bɔt sɔm tin dɛn we go ɛp wi fɔ ɛnjɔy wisɛf di rayt we.

18, 19. (a) Aw di tin dɛn we de na Lɛta Fɔ Filipay 4:8 go ɛp wi fɔ no if di we aw wi de ɛnjɔy wisɛf fayn ɔ nɔ fayn? (b) Us ɔda tin dɛn go ɛp wi fɔ no di rayt we fɔ ɛnjɔy wisɛf? (Rid di futnot.)

¹⁸ Lɛta Fɔ Filipay 4:8 tɔk se: “Dɛn tin we tru, dɛn tin we rayt na Gɔd yay, dɛn tin we gud we nɔ de mek pipul sin, dɛn tin we de mek pɔsin lɛk in kɔmpin mɔtalman, ɛn dɛn tin we ɔlman si se gud; na dɛn nɔmɔ una fɔ de mɛmba ɛn ɔl dɛn tin we pɔsin kin prez Gɔd fɔ.” (Na wi mek am italiks.) Insay dis skripchɔ, Pɔl nɔ bin de tɔk bɔt di kayn tin dɛn we wi go tek ɛnjɔy wisɛf. I bin de tɔk bɔt di tin dɛn we wi fɔ tink bɔt na wi at we go mek Gɔd gladi. (Sam 19:14) Bɔt stil, di tin dɛn we Pɔl tɔk bɔt go ɛp wi fɔ fɛn fayn we fɔ ɛnjɔy wisɛf. Aw wi go ebul du dat?

¹⁹ Aks yusɛf dis kwɛstyɔn, ‘Di tin we de na dis fim, vidio gem, myuzik, ɔ ɔda kayn tin dɛn we a de tek fɔ ɛnjɔy misɛf, kin mek a tink bɔt “tin we gud”?’ Fɔ ɛgzampul, afta yu dɔn wach fim, wetin mɔ kin lɛf na yu maynd bɔt di fim? If di tin we lɛf na yu maynd, fayn ɛn klin ɛn na tin we de mek yu fil gud, dis go mek yu no se da  fim de fayn. Bɔt if di fim we yu wach de mek yu tink bɔt tin dɛn we nɔ gud, dat min se da fim de nɔ fayn. (Matyu 12:33; Mak 7:20-23) Wetin mek wi se so? Na bikɔs we yu de tink bɔt tin we nɔ fayn go mek yu nɔ gɛt kolat, i go ambɔg yu kɔnshɛns, ɛn pwɛl yu padi biznɛs wit Gɔd. (Lɛta Fɔ Ɛfisɔs 5:5; Fɔs Lɛta To Timoti 1:5, 19) Yu fɔ avɔyd dɛn tin ya bikɔs dɛn nɔ fayn. * (Lɛta Fɔ Rom 12:2) Tray fɔ tan lɛk wan pan di man dɛn we rayt di Sam buk, we bin pre to Jiova se: “Nɔ mek fulish tin ful mi yay.”—Sam 119:37.

20, 21. Aw Fɔs Lɛta Fɔ Kɔrint 10:23, 24 go ɛp wi fɔ pik di we aw wi de ɛnjɔy wisɛf?

²⁰ Pɔl bin tɔk bɔt wan men tin na di Baybul we wi fɔ mɛmba we wi want fɔ du sɔntin. I bin se: “Sɔm pipul go se, ‘Wi kin du ɛnitin, nɔbɔdi nɔ go tap wi.’ Dat na tru. Bɔt nɔto ɔltin we pɔsin kin du, gud. Dɛn go se igen, “Wi kin du ɛnitin,” bɔt nɔto ɔltin we dɛn de du, go ɛp ɔda pipul. Ɔlman nɔ fɔ jɛs de luk fɔ dɛn yon bɛtɛ wan nɔmɔ, dɛn fɔ de tray fɔ mek bɛtɛ fala dɛn kɔmpin.” (Fɔs Lɛta Fɔ Kɔrint 10:23, 24) Aw dis skripchɔ go ɛp wi we wi de fɛn fayn we fɔ ɛnjɔy wisɛf? Yu gɛt fɔ aks yusɛf dis kwɛstyɔn, ‘Aw di tin dɛn we a de du fɔ ɛnjɔy misɛf, go mek ɔda pipul dɛn fil?’

²¹ Yu kɔnshɛns go alaw yu fɔ ɛnjɔy yusɛf di we we fayn na yu yay. Bɔt, if yu kam no se ɔda Kristian dɛn kɔnshɛns nɔ alaw dɛn fɔ ɛnjɔy dɛnsɛf da we de, yu go disayd se yu nɔ go du da tin de. Wetin mek? Bikɔs yu nɔ want fɔ mek yu “kɔmpin Kristiɛn fil bad” ɔ du sɔntin we “na  sin na Krays in yay.” Aw pɔsin kin du dis? Na we di pɔsin mek i at fɔ lɛ in kɔmpin Kristian dɛn kɔntinyu fɔ fetful to Gɔd. Wi want fɔ du wetin di Baybul tɛl wi, we i se wi fɔ avɔyd ɛnitin we de mek wi kɔmpin “Kristiɛn tap fɔ biliv pan Gɔd.” (Fɔs Lɛta Fɔ Kɔrint 8:12; 10:32) Tru Kristian dɛn fɔ mɛmba wetin Pɔl bin se we dɛn want fɔ ɛnjɔy dɛnsɛf. Dɛn nɔ fɔ ɛnjɔy dɛnsɛf wit sɔntin we fayn to dɛn bɔt we nɔ fayn to dɛn kɔmpin Kristian dɛn ɛn we nɔ “go ɛp ɔda pipul.”​—Lɛta Fɔ Rom 14:1; 15:1.

22. Wetin mek Kristian dɛn fɔ bia wit dɛn kɔmpin dɛn?

²² Ɔda tin de we wi fɔ mɛmba we de sho se wi de tink bɔt wi kɔmpin Kristian dɛn. Kristian we in kɔnshɛns nɔ de alaw am fɔ du bɔku tin, nɔ fɔ se ɔlman na di kɔngrigeshɔn fɔ fala di we aw in fil se fayn fɔ ɛnjɔy. If i du dat, i go tan lɛk pɔsin we de drayv motoka, we se pawpa ɔl di ɔda drayva dɛn na di rod fɔ drayv wit di sem spid we in want. I nɔ go fayn if pɔsin du dat. If pɔsin lɛk in kɔmpin Kristian dɛn, i go rɛspɛkt dɛn, pan ɔl we dɛn de ɛnjɔy dɛnsɛf di we aw in nɔ want, wans di Baybul nɔ tɔk se da we de bad. We i du dat, i de ‘mek ɔlman si se i ebul bia wit pipul.’​—Lɛta Fɔ Filipay 4:5; Ɛkliziastis 7:16.

23. Aw yu go mek shɔ se yu pik di rayt we fɔ ɛnjɔy yusɛf?

²³ Frɔm ɔl wetin wi dɔn tɔk, aw yu go mek shɔ se yu pik di rayt we fɔ ɛnjɔy yusɛf? Avɔyd ɛnitin we yu de tek fɔ ɛnjɔy yusɛf we rili bad ɛn dɔti na Gɔd in yay, ɔ tin we Gɔd in Wɔd se nɔ fayn. Fala di tin dɛn we de insay di Baybul we go ɛp wi fɔ no uskayn we wi fɔ ɛnjɔy wisɛf. Nɔ put an pan ɛnitin fɔ ɛnjɔy yusɛf we go ambɔg yu kɔnshɛns, ɔda pipul dɛn kɔnshɛns, ɛn wi Kristian brɔda dɛn kɔnshɛns. I go fayn fɔ mek yu mekɔp yu maynd ɛn rɛdi fɔ du ɔl dɛn tin ya. If yu du dat, yu go sho se yu de rɛspɛkt Gɔd ɛn yu de du wetin go mek Gɔd kɔntinyu fɔ lɛk yu ɛn yu famili.