1, 2. Kukheta kwakadini kwatinodikana kuita ngo pamusoro po mabungaijo?

RANGARIRANYI kuti muri kuda kuha mucero unotapira maningi asi movona kuti uno divi rimwe rakavora. Zvicinyi zvamunoita? Mwaizoha mucero wese kubatanija divi rakavoraro here? Mwaizousveja here kana kuti mwaizoceka divi rakavoraro mosveja, mosia divi rakanakaro? Zvicinyi zvamwaizokheta kuita?

² Ngo njira imweni, mabungaijo akatojana no mucero wondhowo. Nguva jimweni, imwimwi mungada kudakajihwa ngo mabungaijo ari ese, asi movona kuti mabungaijo mazinji nyamasi uno akashata, pikija kutovora kamare. Waro, zvicinyi zvamunozoita? Vamweni vanotendera zvakashata zve vanondodavira mabungaijo ari ese anowanika mu nyika ino. Vamweni vangaramba mabungaijo ese kuitira kuti vave no gwinyiso ro kutama kuzodhivana no ayana akashata. Vamwenivo vangaramba mabungaijo akashata asi nguva jimweni votodakajihwa ngo amweni ari nane. Imwimwi, zvicinyi zvamwaizokheta kuti murambe muri mu rudo hwa Mwari?

3. Zvicinyi zvatinoda kujija wari?

³ Vazinji vedu vaizokheta pa divi ro citatu. Itusu tinoziva kuti tinodikana kubungaija asi tinoda kubungaija basi no zviana zvakanaka. Ngo iyo ndava, tinodikana kuziva kuti tingavonesa kudini mabungaijo akanaka no acikazivi kunaka. Cokutanga, ngatende tivone kuti makhetere atinoita  mabungaijo edu anopsasisa kudini kunamata kwedu Jehovha.

4. Kuitisa kudini kukhombija kujipira kwedu kungapsasa kukheta kotingaita mabungaijo?

⁴ Pa makore manganani adarika, umwe ari Capupu cakura, wakabhabhatijwa mu gore ro 1946 wakabhuya kudari: “Ndinoita zvese kuti ndikwanise kuwanika paya panoithwa hurukuro yo rubhabhatijo, zve ndinonasa kuipurutana kamare, inga nditori pa rubhabhatijo hwangu kamare.” Ngenyi? Iyena wakasanangura kudari: “Kuramba ndecirangarira ngo pamusoro po kujipira kwangu i mudanyu unondibesera maningi kuitira kuramba ndakagondeka.” Atikani-kani kuti munotenderana no mazwiro aya. Kuceukija kuti imwimwi mwakagondesa Jehovha kuti mwaizoshandisa upenyu hwenyu hwese pa kumushandira, zvinomuvangisa kuti mucungirire. (Verenganyi Mucumaeri 5:4.) Zvokadi, kurangarijisisa ngo pamusoro po kujipira kwenyu kunopsasa mavonero enyu haiwa basi mu mushando wo ciKristu asi mu mativi ese o upenyu hwenyu—kubatanija pa mabungaijo. Mupostori Pauro wakagogomejera cokwadi ici ku maKristu o mazuva ake: “Ngokudaro, meciha nokuti kumwa, dangani kuita bziribzese bzimweni, bziitenyi mecikoja Mwari.”—1 VaKorinto 10:31.

5. VaLevi 22:18-20 inotibesera kudini kuti tivone ngwajo yakafishika iri pana VaRoma 12:1?

 ⁵ Ciro cese camunoita mu upenyu hwenyu, cinobatanijwa pa kunamata kwenyu Jehovha. Mu karata yake ku vaRoma, Pauro wakashandisa rimwe gama rakavanga kuitira kubesera vanamati doni vake vazwisise kusisira ko cokwadi ici. Iyena wakavabvunja kudari: ‘Kuti mupire muviri yenyu inga mupiro unopona, wakacena no unodakajira Mwari; basa rakacena no simba renyu ro kurangarira.’ (VaRoma 12:1, Shanduro yeNyika Itsva) Muviri wenyu unobatanija murangariro wenyu, mwoyo wenyu zve simba renyu ro muviri. Zvese izvi, munozvishandisa pakushandira Mwari. (Marco 12:30) Pauro wakanangira basa rondhoro ro mwiha-wese kuva mupiro. Gama iri rino ngwajo imwe yakafishika. Pasi po Mutemo wa Mosi, mupiro wakaremara, wainyenywa ndi Mwari. (VaLevi 22:18-20) Mukufanana, kudari mupiro wo kumujimu wo muKristu ukava wakasvipa ngo maitiro ari ese, iwona unozorambiwa ndi Mwari. Izvi zvingaitikisa kudini?

6, 7. MuKristu angasvipisa kudini muviri wake, zve ngo wapi waizova muviyo?

⁶ Pauro wakananga kudari kuno maKristu o ku Roma: “Mucadopira muviri wenyu ku uxaixi.” Iyena wakavabvunjazve kuti ‘vauraye maitiro o nyama.’ (VaRoma 6:12-14; 8:13) Acito atara karata iyi, iyena wakapa muezaniso munganani jo “maitiro o nyama” ondhowo. Ngo pamusoro po kuva kwedu vacizivi kukwana, iyena wakananga kudari: “Muromo yavo yakazara ngo uxori.” “Murenje yavo inogogomesesa, kuti ipopomese ngazi.” [‘Akuna kumuthya Mwari pamberi po majiso avo,’ Baiberi Mazwi Akacena aMwari]. (VaRoma 3:13-18) MuKristu angakhuvaza muviri wake kudari akashandisa “muviri” kana kuti mativi o muviri wake mukuita zviro izvi zvakashata. Inga muezaniso, nyamasi uno kudari muKristu, akavona ngo cabomo kana ngo cakwenye zviro zvakashatisisa zvakadari inga zvo umitu-mitu kana zvo ugevenga izvi zvaizova ‘kupira [majiso ake] ku uxaixi’ zve zvaizosvipisa muviri wake wese. Kunamata kwese  kwaangaita kungava mupiro ucikazivi kucena zve akudavihwi ndi Mwari. (Deuteronòmio 15:21; 1 Pedru 1:14-16; 2 Pedru 3:11) Mbzakadi, tinoripa mutengo wakakura maningi ngo kukheta mabungaijo akashata.

⁷ Zvakajeka kuti kukheta kunoita muKristu mabungaijo kuno muviyo kamare. Pacina kukana-kana, itusu tinoda kukheta mabungaijo anotivangisa haiwa kusvipisa mupiro wedu kuna Mwari. Wari, tingamavonesa kudini mabungaijo akanaka no acikazivi kunaka.

8, 9. (a) Kazinji mabungaijo angasianiswa ngo mufumbo muviri japi? (b) Mukhaindi wapi wo mabungaijo anodikana kurambiwa kamare ngo maKristu, zve ngenyi?

⁸ Kazinji, mabungaijo angasianiswa ngo mufumbo muviri. Umwe ngo wo mabungaijo anodikana kurambiwa kamare ngo maKristu; kuveni umweni ngo wo mufumbo wo kuti muKristu angajikhetera ega. Ngatitange kubhuya ngo mufumbo wokutanga—mabungaijo anodikana kurambiwa ngo maKristu.

⁹ Inga zvakanangwa pa Cipauko co 1, mukhaindi jimweni jo mabungaijo jinokhombija pambhene kamare mabasa anorambijwa ngo Bhaibheri. Inga muezaniso, rangariranyi ngo pamusoro po maSaiti o mu Interneti, mavhidhio, urongwa hwo muterevhizau, no mumbo jinokhombija ugevenga kana zvo madhimoni, zvo umitu-mitu, no mufambiro wakashata. Zvecivoneka kuti mufumbo uwo wo mabungaijo unokhombija pambhene zviito zvinophwanya zviambi kana mutemo jo Bhaibheri, mabungaijo ao anodikana kurambiwa kamare ngo maKristu okadi-kadi. (Maitiro o Vapostori 15:28, 29; 1 VaKorinto 6:9, 10; Apokalipsi (Cakapangijihwa) 21:8) Ngo kuramba mabungaijo ao akashata, imwimwi munozova mecivonesa kuna Jehovha kuti zvokadi kamare muri ‘kuramba uxaixi’ zve muri kuenderera mberi ‘meciramba bzakaxata.’ Ngo kuita kudaro, imwimwi munozova no  “rutendo hwokadi-kadi.”—VaRoma 12:9; Nduyo 34:15; 1 Timoti 1:5.

10. Murangariro wapi uno ngozi ngo pamusoro po mabungaijo, zve ngenyi?

¹⁰ Vamweni vangavona kuti, kubatikana mu mabungaijo anokhombija mufambiro wakashata azvikhuvazi. Ivona vanorangarira kudari: ‘Ndingazvivona hangu mu mavhidhio kana mu terevhizau, asi andizozviiti.’ Murangariro uu unocengeja zve uno ngozi. (Verenganyi Jeremia 17:9.) Kudari tikabungaija ngo kuvona zvinonyenywa ndi Jehovha, taizova ‘teciramba uxaixi’ here? Kuenderera mberi tecivona, kuzwa no kuverenga zviro zvakashata zvaizotindivaja mazwiro edu. (Nduyo 119:70; 1 Timoti 4:1, 2) Zviito zvondhozvo zvinozopsasa zvatinoita, kana mavonero atinoita ushaishi unoitwa ngo vamweni.

11. VaGalàsia 6:7 inokhombijisa kudini kuva yokadi ngo pamusoro po mabungaijo?

¹¹ Izvi zviri kuitikadi kamare. MaKristu amweni akawira mu zviito zvo mufambiro wakashata ngo kuti akakwevejehwa ngo mabungaijo avairoveja kuvona. Ivona vakajijira no musoji pamatama masoko o kuti “bzaanosima mundhu ngo bzaanozokotora.” (VaGalàsia 6:7) Asi muvio iji jinosuruvarisa, jingatizika. Kudari mukasima mu murangariro mwenyu zviro zvakanaka, no mudakaro wese munozokotora mu upenyu hwenyu zviro zvakanaka.—Vonanyi bhokiso ro kuti: “ Mabungaijo Api Andinodikana Kukheta?” pa pheji 67.

12. VaGalàsia 6:5 inozwirana kudini no shwiro jo mabungaijo, zve i ndhungamiro yapi yatinayo pa kuda kuita zvisungo?

¹² Ngatende tibhuye ngo pamusoro po mufumbo wo cipiri—mabungaijo anokhombija zviito zvicikarambijwi nee zvicikanasi kujekeswa kamare mu Soko ra Mwari. MuKristu umwe nga umwe paanokheta mabungaijo akadaro, anodikana kuita cisungo co mundhu ega ku zviana zvaanovona  kuva zvakanaka. (Verenganyi VaGalàsia 6:5.) Asi, itusu tino ndhungamiro pikija patinoda kuita zvisungo zvakadari. Bhaibheri rino zviambi, kana zvokadi huru, jinotibesera kuziva murangariro ja Jehovha. Ngo kusotesesa zviambi zvondhozvo, itusu tinozokwanisa kuziva “kuda ka [Jehovha]” mu zvese, kubatanija pa kukheta kwedu mabungaijo.—VaEfeso 5:17.

13. Cicinyi cingatindunda kuti tiregere mabungaijo anonyangajisa Jehovha?

¹³ Zvinozwisisika kuti, asipi maKristu ese anokwanisa kukurisa  mufambiro wavo wakanaka wo kuzwisisa kana wo kusianisa ngo maitiro amwewo. (VaFilipi 1:9) Kunja ka izvi, maKristu anoziva kuti pa shwiro jo mabungaijo, zvido zvinosiana. Ngo kudaro, izvi azvingavetehwi kuti maKristu ese aite zvisungo zvakafanana pa shwiro yo mabungaijo. Kunyazi zvakadaro, patinotendera kuti zviambi zvo umwari zvikwevejere murangariro wo mwoyo wedu, no cido cese, tinonga teciengejera kuramba mukhaindi wese wo mabungaijo anonyangajisa Jehovha.—Nduyo 119:11, 129; 1 Pedru 2:16.

14. (a) Zvicinyi zvatinodikana kusotesesa maningi patinokheta mabungaijo? (b) Tingarambisa kudini tecidira zvido zvo Umambo pa kutanga mu upenyu hwedu?

¹⁴ Pakukheta mabungaijo, pano ciro cimweni cinosisira maningi camunodikana kurangarira: Inguva yenyu. Mushovo wo mabungaijo enyu, unokhombija zvamunovona kuva zvakanaka, kuveni nguva yamunopeja pa mabungaijo, inokhombija kuti zvicinyi zvinosisira maningi kwamuri. Ngokudaro, ku maKristu, shwiro jo kumujimu ndijona jinosisira maningi. (Verenganyi Mateu 6:33.) Ngo kudaro, zvicinyi zvamungaita kuti muve no gwinyiso ro kuti zvido zvo Umambo zviri kuramba zviri pa kutanga mu upenyu hwenyu? Mupostori Pauro wakananga kudari: “Ngokudaro, vonesesanyi kufamba kwenyu: Mucaita inga mapenji. Itanyi inga vazivi, mecingwarira nguva.” (VaEfeso 5:15, 16) Ngo zvokadi kuti kugaja nguva kuitira kubungaija, zvicazomubesera kuwana nguva inodiwa yakakwana kuitira “ibzo bzinodikana”—mabasa anobesera kuitira kugarisika kwenyu ko kumujimu.—VaFilipi 1:10.

15. Ngenyi i ungwaru kutema mugano wakakura pamunonga mecikheta mabungaijo?

¹⁵ I ungwaru kutema mugano wakakura patinokheta mabungaijo. Zvinoda kurevenyi? Ngativonezve basi muezaniso wo mucero. Kuti muve no gwinyiso rokuzotama kuha divi rakavoraya mucikadi, imwimwi munoceka haiwa basi divi rakavoraya asi munotocekavo no pakanaka. Mukufanana,  ngo zvo ungwaru kusia mugano wakakura pa kukheta mabungaijo. MuKristu ano ungwaru, aatizi basi mabungaijo anophwanya zvakajeka zviambi zvo Bhaibheri kamare, asi anorambavo mabungaijo ano mativi amweni anobatanija mativi acikabeseri kumujimu. (Mazwi Akangwara 4:25-27) Zvinozomubesera kuita izvi i kubatisisa kamare Soko ra Mwari.

16. (a) Tingakhombijisa kudini kuti tino mavonero a Jehovha pa shwiro jo mufambiro? (b) Kushandisa zviambi zvo Bhaibheri kungaguma kudini kuva mararamiro edu?

¹⁶ Paanokheta mabungaijo, maKristu okadi-kadi anotanga arangarira mavonero a Jehovha. Bhaibheri rinokhombija mazwiro a Jehovha no ndhungamiro jake. Inga muezaniso, Mambo Soromona wakandandanisa zviro zvakasiana-siana zvinonyenya Jehovha, zvakadari inga “rurimi hwokunyepa, nyara inopopomeja ngazi icina ndava, mwoyo unotanda bzakaxata, soka jinogogomera kuenda ku bzakaxata.” (Mazwi Akangwara 6:16-19) Mavonero a Jehovha anopsasa kudini mavonero enyu? Mutari wo nduyo wakangwaja kudari: “Imwimwi munoda Jehova nyenyai zvakashata.” (Nduyo 97:10, BMAA) Kukheta kwenyu mabungaijo kunodikana kukhombija kuti zvokadi kamare munonyenya zvinonyenywa ndi Jehovha. (VaGalàsia 5:19-21) Munodikanavo kuceukija kuti, zvamunoita pa cifishe-fishe, ndizvona zvinokhombija maningi kuti muri mundhu wo mukhaindinyi, kupinda zvamunoita pambhene. (Nduyo 11:4; 16:8) Ngo kudaro, kudari  mukada ngo mwoyo wese kukhombija mu upenyu henyu hwese mazwiro a Jehovha mu mufambiro wenyu, zvisungo zvenyu munozozviita mukuzwirana no zviambi zvo Bhaibheri. Anozova mararamiro enyu.—2 VaKorinto 3:18.

17. Ticito takheta mabungaijo, mubvunjo japi jatinodikana kuzviita?

¹⁷ Ngo capi cimweni camungaita kuti muve no gwinyiso ro kuti muri kuzwirana no murangariro wa Jehovha pa munokheta mabungaijo? Rangariranyi ngo pamusoro po mubvunjo uu: ‘Izvi zvinozondipsasa kudini zve Mwari anozondivona kudini?’ Inga muezaniso, mucito mwasunga kuvona vhidhio iri yese, jibvunjisenyi kudari: ‘Zvinokhombijwa pa vhidhio iyi zvinopsasa kudini hana yangu?’ Ngatende tivone zviambi zvinoshandisihwa pa shwiro yondhoyo.

18, 19. (a) Ciambi ciri pana VaFilipi 4:8 cingatibesera kudini kuvona kuti mabungaijo edu akanaka kana kuti haiwa? (b) Zviambi zvapi zvimweni zvingamubesera kukheta mabungaijo akanaka? (Vonanyi masoko o pasi.)

¹⁸ Cimwe ciambi cikuru cinowanika pana VaFilipi 4:8, cinonanga kudari: “Ku bzimweni, hama: bzokadi bzese, bzino nderemejo, bzakarungama, bzakacena, bzakathiva, bzakakojwa, bzauxoni bzese no bzakanakira kukojwa bzese ngabzigare pakati penyu.” I zvokadi kuti, Pauro aacainga ecinangira mabungaijo, asi wainga ecinangira kurangarijisisa ko mu mwoyo, uko kunodikana kusotesesa ku zviro zvinodakajisa Mwari. (Nduyo 19:15) Asi, magama a Pauro angashandiswavo inga ciambi pa shwiro jo mabungaijo. Kuitisa kudini?

¹⁹ Jibvunjisenyi kudari: ‘Mavhidhio, mavhidhio gemi, mumbo kana mukhaindi umweni wo mabungaijo andinokheta zvinozaja murangariro wangu ngo zviro “bzakacena” here?’ Inga muezaniso, mukapera kuvona vhidhio iri yese, zvicinyi zvinovia maningi mu murangariro mwenyu? Kudari zvinodakajisa, zvakacena, zvinovangisa, waro munonga meciziva kuti rava bungaijo rakanaka. Asi, kudari vhidhio yamabvaya kuvona inomurangarija zviro zvakasvipa, waro bungaijo renyu rainga rakashata, kana rinokhuvaza.  (Mateu 12:33; Marco 7:20-23) Ngenyi? Ngo kuti kurangarira ngo zviro zvakasvipa zvinobviringija runyararo wedu wo mukati, zvinokhuvaza hana yedu yakarovejwa ngo Bhaibheri zve zvingaparaja ushamwari hwedu na Mwari. (VaEfeso 5:5; 1 Timoti 1:5, 19) Zvecivoneka kuti mabungaijo akadaro ano muviyo jinokhuvaza imwimwi kamare, temanyi civaringo cokumaramba. * (VaRoma 12:2) Ivanyi inga mutari wo nduyo, uwo wakaita mukumbiro kuna Jehovha eciti: “Reesanyi majiso angu kuti atame kuvona bza biresi [kana zvicikasisiri].”—Nduyo 119:37.

20, 21. 1 VaKorinto 10:23, 24 inozwirana kudini no shwiro jo kukheta mabungaijo akanaka?

²⁰ Pauro wakananga ngo pamusoro po ciambi cikuru catinodikana kurangarira patinoita zvisungo pa shwiro jo mundhu ega. Iyena wakananga kudari: “Bzese bzinotendehwa. Kaveta asi bzese bzinovaka. Mucadopsanga bzenyu basi. Rangariranyi bzo vamwenivo.” (1 VaKorinto 10:23, 24) Ciambi ici cinozwirana kudini no kukheta mabungaijo akanaka? Munodikana kujibvunjisa kudari: ‘Mabungaijo andinokheta anopsasa kudini vamweni?’

²¹ Hana yenyu ingamutendera kuva pa mukhaindi umweni wo mabungaijo amunovona kuti ‘anotendehwa.’ Asi, kudari mukavona kuti vatendi doni vaya vano hana jinokasika kuvatonga, vecivona kuti mabungaijo aya aatendehwi, imwimwi mungamaregera. Ngenyi? Ngo ndava yokuti amudi ‘kuxaixira hama doni’—pikija “kuxaixira Kristu,” inga zvakananga Pauro—ngo kuita kuti vatendi doni venyu vanesehwe maningi kuramba vakagondeka kuna Mwari. Imwimwi munobatisisa ngo mwoyo wese ngwajo ya Pauro yo kuti: “Mucadova cikhugu.” (1 VaKorinto 8:12; 10:32) MaKristu okadi-kadi nyamasi uno anobatisisa mbhangiro ya Pauro  yakanasa kurangarihwa zve ino shwiro, ngo kuramba kamare mabungaijo anoita inga ‘anotendehwa’ asi ‘acikavaki.’—VaRoma 14:1; 15:1.

22. Ngenyi pakati po maKristu pangava no mavonero akasiana ngo pamusoro po shwiro jo mundhu ega?

²² Asi, pa shwiro iyi yo kupsaka kugarisika ko vamweni, pano divi rimwenivo ratinodikana kuvona. MuKristu ano hana inokasika kumutonga, aadikani kuvangirija vese mu ungano yo ciKristu kuti vatendere mavonero ake ngo pamusoro po mabungaijo. Kudari iyena akaita kudaro, anozova inga shoferi ari mu citaka cikuru uwo anovangirija mashoferi ese amweni ari mucitakemo kuti agogomese ngo maitiro aanoda iyena. Ngo kuita kudaro, iyena waizokhombija kuva acikazivi kupfava. MuKristu ano hana inokasika kumutonga zve anondundhwa ngo rudo hwo ciKristu, anodikana kureremeja vatendi doni vaya vano mavonero avo ngo pamusoro po mabungaijo, asi vaciramba vari mu zviambi zvo Bhaibheri. Ngo kuita kudaro, iyena anosia kuti ‘kuthiva mwoyo kwake kuzivike ngo vandhu vese.’—VaFilipi 4:5; Mucumaeri 7:16.

23. Mungava kudini no gwinyiso rokuti muri kukheta mabungaijo akanaka?

²³ Mukugurisira, tingava kudini no gwinyiso ro kuti muri kukheta mabungaijo akanaka? Rambanyi mushovo wese wo mabungaijo unokhombija zviro zvakashatisisa, zviito zvo mufambiro wakashata unorambiswa kamare mu Soko ra Mwari. Tevejeranyi zviambi zvo Bhaibheri zvingashandiswa ku mushovo wo mabungaijo acikanasi kujekeswa kamare mu Bhaibheri. Rambanyi kamare mabungaijo aizokhuvaza hana yenyu, zve ivanyi no cidisiso co kutiza mukhaindi uri wese wo mabungaijo waizokhuvaza hana jo vamweni maningi-ningi jo vatendi doni vedu. Civaringo cenyu ngacive co kuita zvese kuitira kuviisa rukujo kuna Mwari zve kuita kuti imwimwi no mbhuri yenyu murambe muri mu rudo hwake.