1, 2. Ирхӕфсӕнтӕ ӕвзаргӕйӕ нӕ цы фӕхъӕуы аскъуыддзаг кӕнын?

ЗӔГЪӔМ, адджын фӕткъуы ахӕрынмӕ хъавыс, фӕлӕ кӕсыс, ӕмӕ йӕ иу фарс у ӕмбыд. Куыд бакӕндзынӕ: ӕнӕхъӕнӕй йӕ бахӕрдзынӕ, ӕппаргӕ йӕ акӕндзынӕ ӕви йын йе ’мбыд хай ралыг кӕндзынӕ ӕмӕ ма дзы цы баззайа, уый бахӕрдзынӕ?

² Ирхӕфсӕнтӕ абарӕн ис ахӕм фӕткъуыимӕ. Иуӕй-иу хатт нӕ фӕфӕнды нӕхи аирхӕфсын, фӕлӕ йӕ ӕмбарӕм, ацы дунейы ирхӕфсӕнтӕн сӕ фылдӕр кӕй нӕ бӕззынц, «ӕмбыд» кӕй сты. Уӕдӕ ды куыд бакӕндзынӕ? Иуӕй-иутӕ ӕвзӕрдзинадмӕ уӕлӕнгай цӕстӕй кӕсынц ӕмӕ цыфӕнды ирхӕфсӕн дӕр ӕнӕхъӕнӕй «аныхъуырынц». Чидӕртӕ та сӕхи бынтондӕр хизынц ирхӕфсӕнтӕй, цӕмӕй сыл ӕвзӕрырдӕм ма фӕзыной. Иннӕтӕ та кӕд сӕхи ӕвзӕр ирхӕфсӕнтӕй хизынц, уӕддӕр сӕ рӕстӕгӕй-рӕстӕгмӕ фӕхъӕуы сӕ фӕллад суадзын дӕр, ӕмӕ уый тыххӕй равзарынц, пайда сын чи фӕуыдзӕн, ахӕм ирхӕфсӕнтӕ. Уӕдӕ цавӕр ирхӕфсӕнтӕ хъуамӕ ӕвзарӕм, цӕмӕй Хуыцауы уарзтӕй нӕхи ӕнӕхай ма фӕкӕнӕм?

3. Цӕуыл аныхас кӕндзыстӕм?

³ Нӕ фылдӕр, ӕвӕццӕгӕн, бакӕнынц, фӕстагмӕ кӕй кой скодтам, уыцы адӕмау. Ӕмбарӕм ӕй, рӕстӕгӕй-рӕстӕгмӕ нӕ улӕфын дӕр кӕй хъӕуы, фӕлӕ нӕ  фӕнды, ӕвзӕрӕй кӕм ницы ис, ӕрмӕстдӕр ахӕм ирхӕфсӕнтӕ ӕвзарын. Уымӕ гӕсгӕ нӕ хъӕуы ӕркӕсын, куыд ис сбӕлвырд кӕнӕн, цавӕр ирхӕфсӕнтӕ сты хорз ӕмӕ цавӕр ирхӕфсӕнтӕ сты ӕвзӕр. Фӕлӕ уал фыццаг аныхас кӕнӕм, цы ирхӕфсӕнтӕ ӕвзарӕм, уыдон нӕ лӕггадыл куыд фӕзынынц, ууыл.

4. Нӕхи Хуыцауӕн кӕй снывонд кодтам, уый куыд хъуамӕ фӕзына, цы ирхӕфсӕнтӕ ӕвзарӕм, ууыл?

⁴ 1946 азы донаргъуыд чи райста, иу ахӕм ацӕргӕ Йегъовӕйы Ӕвдисӕн иухатт загъта: «Мӕхицӕн загътон, алы хатт дӕр лӕмбынӕг кӕй хъусдзынӕн, донаргъуыд чи исы, уыдонӕн цы раныхас вӕййы, уымӕ, раст цыма мӕхӕдӕг исдзынӕн аргъуыд, афтӕ. Мӕхи Хуыцауӕн кӕй снывонд кодтон ӕмӕ йын дзырд кӕй радтон, лӕггад дын кӕндзынӕн, зӕгъгӕ, уый мӕ зӕрдыл кӕй ӕрлӕууын кӕнын, уый мын ӕххуыс кӕны, цӕмӕй йыл иузӕрдион уон». Ӕвӕццӕгӕн, ды дӕр разы дӕ ацы ныхӕстимӕ. Йегъовӕйӕн дзырд кӕй радтай, цӕрӕнбонты дын лӕггад кӕндзынӕн, зӕгъгӕ, уый дӕ зӕрдыл кӕй ӕрлӕууын кӕныс, уый дын ӕххуыс кӕны фидар лӕууынӕн. (Бакӕс Екклесиаст 5:4.) Ӕмӕ ӕцӕгдӕр, ууыл куы хъуыды кӕнӕм, уӕд уый ӕрмӕст нӕ лӕггадыл нӕ фӕзындзӕн, фӕлӕ нӕ царды алы фӕзилӕныл дӕр, уыимӕ, цавӕр ирхӕфсӕнтӕ ӕвзарӕм, ууыл дӕр. Уыцы хъуыддаг куыд ахсджиаг у, уый тыххӕй апостол Павел чырыстӕттӕм ныффыста: «Уӕдӕ хӕргӕ кӕнат, нуазгӕ кӕнат ӕви ӕндӕр исты аразат,– алцыдӕр аразут Хуыцауы кадӕн» (1 Коринфӕгтӕм 10:31).

5. Левиты 22:18–20 стихты цы фыст ис, уый нын куыд ӕххуыс кӕны, Ромӕгтӕм 12:1 стихы цы фӕдзӕхст ис, уый бамбарынӕн?

⁵ Цыфӕнды ма аразӕм,– алцыдӕр баст у, Йегъовӕйӕн кӕй лӕггад кӕнӕм, уыимӕ. Павелы фӕндыд,  цӕмӕй иннӕ чырыстӕттӕ дӕр уыцы хабар ӕмбӕрстаиккой. Ӕмӕ йӕ фыстӕджы Ромӕгтӕм ныффыста, хъуыдытыл сӕ чи бафтыдтаид, ахӕм ныхӕстӕ: «Уӕ буӕрттӕ раттут удӕгас, сыгъдӕг ӕмӕ, Хуыцауӕн ӕхсызгон чи у, ахӕм нывондӕн – лӕггад ын кӕнут, арф хъуыды кӕнут, афтӕмӕй» (Ромӕгтӕм 12:1). Адӕймагӕн йӕ буармӕ хауы йӕ зонд, йӕ зӕрдӕ ӕмӕ йӕ хъарутӕ. Ӕмӕ мах Хуыцауӕн лӕггад кӕнӕм ӕппӕт зондӕй, ӕппӕт зӕрдӕйӕ ӕмӕ ӕппӕт хъарутӕй (Марчы 12:30). Ахӕм удуӕлдай лӕггад Павел схуыдта нывонд. Ацы ныхӕстӕй чырыстӕтты, зӕгъӕн ис, фӕдзӕхсгӕ дӕр бакодта. Моисейы закъоны куыд фыст уыд, афтӕмӕй, Хуыцауӕн-иу нывондӕн сахъат фос куы ’рхастой, уӕд-иу дзы райгонд нӕ уыд (Левит 22:18–20). Афтӕ у нӕ лӕггады хабар дӕр – кӕд нын дзы исты хъӕндзинад ис, уӕд дзы Хуыцау райгонд нӕ уыдзӕн. Фӕлӕ афтӕ куыд рауайы?

6, 7. Чырыстонӕн йӕ буар цӕй аххосӕй фӕчъизи уыдзӕн ӕмӕ уый цӕмӕ ’ркӕндзӕн?

⁶ Павел Ромы чырыстӕтты фӕдзӕхста: «Уӕ буӕрттӕ тӕригъӕды къухмӕ ма дӕттут». Стӕй ма сын загъта, зӕгъгӕ, «тӕригъӕдджын буары хъуыддӕгтӕ... марут» (Ромӕгтӕм 6:12–14; 8:13). Гыццыл раздӕр йӕ фыстӕджы ранымадта, ахӕм хъуыддӕгтӕм  цы хауы, уыдӕттӕ. Зӕгъӕм, тӕригъӕдджын адӕмы тыххӕй ныффыста: «Сӕ дзыхӕй ӕлгъыст... йеддӕмӕ ницы цӕуы» (Ромӕгтӕм 3:13–18).Чырыстон адӕймаг тӕригъӕдджын хъуыддӕгтӕ куы кӕна, уӕд ын йӕ буар «ӕнӕсахъат» схонӕн нал уыдзӕн. Дзырдӕн, кӕд порнографимӕ кӕнӕ, тыхми ӕмӕ алы ӕвирхъау хабӕрттӕ кӕм февдисынц, ахӕм кинотӕм ӕмӕ передачӕтӕм кӕсы, уӕд йӕ цӕстытӕ дӕтты «тӕригъӕды къухмӕ» ӕмӕ афтӕмӕй йӕ буар ӕгасӕй дӕр чъизи кӕны. Ахӕм адӕймаг Хуыцауы номыл цыфӕнды ма араза, уӕддӕр ын Хуыцау йӕ нывонд сыгъдӕгыл нал нымайдзӕн ӕмӕ йын ӕй нал исдзӕн (Дыккаг закъон 15:21; 1 Петры 1:14–16; 2 Петры 3:11). Цӕй стыр аргъ бафидынц, ӕвзӕр ирхӕфсӕнтӕ чи равзары, уыдон!

⁷ Уӕдӕ, чырыстон цавӕр ирхӕфсӕнтӕ ӕвзары, уымӕ уӕлӕнгай цӕстӕй кӕсӕн нӕй. Уымӕ гӕсгӕ мах фӕнды ахӕм ирхӕфсӕнтӕ ӕвзарын, цӕмӕй, Хуыцауӕн цы нывонд хӕссӕм, уый ноджы кадджындӕр суа ӕмӕ йӕ мацӕмӕй фӕчъизи кӕнӕм. Ныр та аныхас кӕнӕм, куыд ис сбӕлвырд кӕнӕн, цавӕр ирхӕфсӕнтӕ сты хорз ӕмӕ цавӕр ирхӕфсӕнтӕ сты ӕвзӕр.

8, 9. а) Ирхӕфсӕнтӕ цавӕр дыууӕ хуызы сты? б) Нӕхи цавӕр ирхӕфсӕнтӕй хизӕм ӕмӕ цӕмӕн?

⁸ Зӕгъӕн ис, ӕмӕ ирхӕфсӕнтӕ сты дыууӕ хуызы. Иутӕм хауынц, чырыстӕттӕ сӕхи бынтондӕр кӕмӕй хизынц, ахӕмтӕ. Иннӕтӕ та сты ахӕм ирхӕфсӕнтӕ, ӕмӕ кӕмӕдӕр хорз кӕсынц, кӕмӕдӕр та – нӕ. Аныхас уал кӕнӕм, чырыстӕттӕ сӕхи цавӕр ирхӕфсӕнтӕй хизынц, уыдоныл.

⁹ Ацы чиныджы 1-аг сӕры дзырд цыди, кӕцыдӕр ирхӕфсӕнтӕ баст кӕй сты, Библи комкоммӕ кӕй ныхмӕ дзуры, ахӕм хъуыддӕгтимӕ. Зӕгъӕм, кӕцыдӕр сайтты,  киноты, телепередачӕты цы февдисынц ӕмӕ зарджыты цы ныхӕстӕ вӕййы, уыдон фӕразӕнгард кӕнынц ӕлгъаг, ӕнӕгъдау митӕм ӕмӕ тыхмимӕ кӕнӕ вӕййынц хинтӕ-кӕлӕнтимӕ баст. Ахӕм ирхӕфсӕнтӕ афтӕ ӕвдисынц, цыма сӕ ӕвзӕрӕй ницы ис, фӕлӕ ӕцӕгӕй та сты Библийы закъӕтты ӕмӕ уагӕвӕрдты ныхмӕ. Уымӕ гӕсгӕ сӕ чырыстӕттӕ хъуамӕ сӕхи хизой (Хъуыддӕгтӕ 15:28, 29; 1 Коринфӕгтӕм 6:9, 10; Раргомад 21:8). Ды дӕр дӕхи ахӕм ирхӕфсӕнтӕй куы хизай, уӕд Йегъовӕйӕн равдисдзынӕ, ӕвзӕрдзинадӕй ӕцӕгдӕр де сӕфт кӕй уыныс ӕмӕ дзы дӕхи ӕдзух кӕй хизыс. Афтӕмӕй бӕрӕг уыдзӕн, дӕ уырнындзинад «ӕнӕхин» кӕй у (Ромӕгтӕм 12:9; Псалом 34:14; 1 Тимофеймӕ 1:5).

10. Цавӕр хъуыдытӕ сты тӕссаг ӕмӕ цӕмӕн?

¹⁰ Фӕлӕ иуӕй-иутӕ афтӕ хъуыды кӕнынц, ӕмӕ, ӕнӕгъдау митӕ ӕргом кӕм ӕвдисынц, ахӕм цӕмӕдӕрты куы кӕсой, уӕддӕр сын уый ницы зиан ӕрхӕсдзӕн. Уыдон фӕхъуыды кӕнынц: «Кӕд ахӕм кинотӕм кӕнӕ передачӕтӕм бакӕсын, уӕддӕр мӕхӕдӕг афтӕ никуы бакӕндзынӕн». Уыдон сты тӕссаг, хисайӕн хъуыдытӕ. (Бакӕс Йеремийы 17:9.) Йегъовӕйӕн ӕнад цы у, уыдӕттӕм кӕсын нын ӕхсызгон куы уа, уӕд цымӕ афтӕ зӕгъӕн уыдзӕн, ӕмӕ ӕвзӕрдзинадӕй ӕцӕгдӕр не сӕфт уынӕм? Ӕвзӕр цы у, уыдӕттӕм ӕдзух куы кӕсӕм ӕмӕ куы хъусӕм, уӕд сӕ ӕвзӕрыл нал нымайдзыстӕм (Псалом 119:70; 1 Тимофеймӕ 4:1, 2). Ӕмӕ уый фӕзындзӕн, нӕхӕдӕг цы аразӕм, ууыл дӕр ӕмӕ, иннӕты ӕнӕгъдау митӕм цы цӕстӕй кӕсӕм, ууыл дӕр.

11. Галатӕгтӕм 6:7 стихы цы фыст ис, уый иуӕй-иутӕ сӕхиуыл куыд бавзӕрстой?

¹¹ Иуӕй-иу чырыстӕттӕн сӕ хабар ӕцӕгдӕр афтӕ рауад. Уыдон фӕцахуыр сты ӕвзӕр цӕмӕдӕрты кӕсыныл, ӕмӕ стӕй сӕхӕдӕг дӕр ӕнӕгъдау ми бакодтой.  Уыцы чырыстӕттӕ сӕхиуыл бавзӕрстой, «адӕймаг цы байтауы, уый [кӕй] ӕркӕрды» (Галатӕгтӕм 6:7). Фӕлӕ нӕ бон у нӕхи ахӕм бӕллӕхӕй бахизын. Сыгъдӕг цы у, уый нӕ зонды ӕдзух куы «тауӕм», уӕд «ӕркӕрддзыстӕм» хорз тыллӕг. (Кӕс рамкӕ « Цавӕр ирхӕфсӕн равзардзынӕн?».)

12. Галатӕгтӕм 6:5 стих ирхӕфсӕнтӕм куыд хауы ӕмӕ нын уынаффӕтӕ хӕсгӕйӕ цавӕр разамынд ис?

¹² Ныр та аныхас кӕнӕм, Библи комкоммӕ, ай ӕвзӕр у, ай та хорз у, зӕгъгӕ, кӕмӕй нӕ зӕгъы, ахӕм ирхӕфсӕнтыл. Ахӕм уавӕры алы чырыстон дӕр хъуамӕ йӕхӕдӕг рахӕсса уынаффӕ, цавӕр ирхӕфсӕн равзардзӕн, уый фӕдыл. (Бакӕс Галатӕгтӕм 6:5.) Фӕлӕ нӕ уыцы хъуыддаджы дӕр Йегъовӕ ӕнӕ разамындӕй нӕ ныууагъта. Библийы ис, Йегъовӕйы хъуыды бамбарынӕн нын чи ӕххуыс кӕны, ахӕм уагӕвӕрдтӕ. Уыцы уагӕвӕрдтыл-иу лӕмбынӕг куы ахъуыды кӕнӕм, уӕд-иу алы хъуыддаджы дӕр, уыимӕ ирхӕфсӕнтӕ ӕвзаргӕйӕ дӕр, бамбардзыстӕм, «Йегъовӕйы фӕндон цӕй мидӕг ис, уый» (Ефесӕгтӕм 5:17).

13. Йегъовӕйы зӕрдӕмӕ чи нӕ цӕуы, ахӕм ирхӕфсӕнтӕй нӕхи цӕй фӕрцы хиздзыстӕм?

¹³ Кӕй зӕгъын ӕй хъӕуы, хорз ӕмӕ ӕвзӕр цы у, уый чырыстӕттӕй иутӕ иннӕтӕй хуыздӕр фембарынц (Филиппӕгтӕм 1:9). Уымӕй уӕлдай йӕ ӕмбарӕм, иуӕн йӕ зӕрдӕмӕ иу ирхӕфсӕн кӕй цӕуы, иннӕмӕн та – ӕндӕр. Уӕдӕ афтӕ нӕ хъуыды кӕндзыстӕм, чырыстӕттӕ иууылдӕр ӕмхуызон уынаффӕтӕ кӕй хъуамӕ хӕссой. Йегъовӕйы уагӕвӕрдтӕ нӕ зӕрдӕйыл ӕмӕ нӕ зондыл цас тынгдӕр ӕндавой, уыйас тынгдӕр нӕхи хиздзыстӕм, йӕ зӕрдӕмӕ чи нӕ цӕуы, ахӕм ирхӕфсӕнтӕй (Псалом 119:11, 129; 1 Петры 2:16).

14. а) Ирхӕфсӕнтӕ ӕвзаргӕйӕ цӕуыл хъӕуы ахъуыды кӕнын? б) Цы хъӕуы аразын, цӕмӕй Хуыцауы Паддзахадимӕ баст хъуыддӕгтӕ нӕ царды фыццаг бынаты уой?

 ¹⁴ Ирхӕфсӕнтӕ ӕвзаргӕйӕ ма хъӕуы иу ахсджиаг хъуыддагыл ахъуыды кӕнын – цас рӕстӕг сыл ацӕуы. Цавӕр ирхӕфсӕнтӕ ӕвзарыс, уымӕй бӕрӕг у, хорзыл цы нымайыс, уый. Цас рӕстӕг сыл хардз кӕныс, уымӕй та бӕрӕг у, ахсджиагыл цы нымайыс, уый. Кӕй зӕгъын ӕй хъӕуы, чырыстӕттӕн ӕппӕты сӕйрагдӕр сты  Хуыцауы хъуыддӕгтӕ. (Бакӕс Матфейы 6:33.) Уӕдӕ дӕ цы хъӕуы аразын, цӕмӕй Хуыцауы Паддзахадимӕ баст хъуыддӕгтӕ дӕ царды фыццаг бынаты уой? Апостол Павел загъта: «Куыд цӕрут, уымӕ лӕмбынӕг кӕсут, цӕмӕй ӕнӕзонд ма уат, фӕлӕ зондджынтӕ, ӕмӕ уӕ рӕстӕгӕй, хуыздӕр куыддӕриддӕр у, афтӕ пайда кӕнут» (Ефесӕгтӕм 5:15, 16). Ӕцӕгдӕр, ирхӕфсӕнтыл цас рӕстӕг хардз кӕндзынӕ, уый-иу рагацау куы аскъуыддзаг кӕнай, уӕд дын фаг рӕстӕг уыдзӕн, «ахсджиагдӕр цы у», уымӕн, ома уырнындзинад чи фидар кӕны, уыцы хъуыддӕгтӕн (Филиппӕгтӕм 1:10).

15. Зиан нын чи ’рхӕсдзӕн, ахӕм ирхӕфсӕнтӕм хӕстӕг дӕр цӕуылнӕ хъуамӕ цӕуӕм?

¹⁵ Ирхӕфсӕнтӕ ӕвзаргӕйӕ ма тынг ахсджиаг у, цӕмӕй хӕстӕг ма цӕуӕм, зиан нын цы ’рхӕсдзӕн, уымӕ. Иу хатт ма ӕркӕсӕм, райдианы цы цӕвиттоны кой кодтам, уымӕ. Цӕмӕй фӕткъуыйӕн йе ’мбыдӕй дӕ дзыхы ма бахауа, уый тыххӕй, ӕмбыд кӕм у, ӕрмӕст уый нӕ ралыг кӕндзынӕ, фӕлӕ ма йын йӕ алыварс дӕр дзӕбӕх слыг кӕндзынӕ. Афтӕ у ирхӕфсӕнты хабар дӕр. Ӕмбаргӕ чырыстон, комкоммӕ Библийы ныхмӕ чи у, ӕрмӕст ахӕм ирхӕфсӕнтӕй нӕ хизы йӕхи, фӕлӕ зӕрдӕхсаинагӕй цыдӕр кӕм ис кӕнӕ, йӕ уырнындзинадӕн иу гыццыл дӕр тӕссаг чи уыдзӕн, ахӕм цыдӕртӕ кӕм ис, уыцы ирхӕфсӕнтӕй дӕр (Ӕмбисӕндтӕ 4:25–27). Хуыцауы Ныхасы цы фыст ис, ууыл фидар куы хӕцӕм, уӕд нӕ бон уыдзӕн афтӕ кӕнын.

16. а) Уаг ӕмӕ ӕгъдаумӕ Йегъовӕйы цӕстӕй кӕй кӕсӕм, уый цӕмӕй уыдзӕн бӕрӕг? б) Кӕд уыдзӕн зӕгъӕн, ӕмӕ ӕцӕгдӕр Библийы уагӕвӕрдтӕм гӕсгӕ архайыс?

¹⁶ Ирхӕфсӕнтӕ ӕвзаргӕйӕ чырыстӕттӕн сӕйрагдӕр вӕййы, Йегъовӕ цы хъуыды кӕны, уый. Библийы ис Йегъовӕйы уагӕвӕрдтӕ, базонӕн дзы ис, йӕ  зӕрдӕмӕ цы цӕуы ӕмӕ цы нӕ цӕуы, уый. Зӕгъӕм, паддзах Соломон ранымадта, Йегъовӕ йе сӕфт кӕмӕй уыны, цалдӕр ахӕм хъуыддаджы: «мӕнг ӕвзаг, ӕнаххос туг чи калы, ахӕм къухтӕ, фыдвӕндтӕ чи кӕны, ахӕм зӕрдӕ, ӕвзӕрдзинад ракӕнынмӕ чи тагъд кӕны, ахӕм къӕхтӕ» (Ӕмбисӕндтӕ 6:16–19). Йегъовӕ цы хъуыды кӕны, уый куыд хъуамӕ фӕзына, ды цы хъуыды кӕныс, ууыл? Псаломзарӕггӕнӕг загъта: «Йегъовӕйы чи уарзы, уыдон, ӕвзӕрдзинадӕй уе сӕфт уынут» (Псалом 97:10). Цы ирхӕфсӕнтӕ ӕвзарыс, уыдонӕй хъуамӕ бӕрӕг уа, Йегъовӕ йе сӕфт цӕмӕй уыны, уымӕй ӕцӕгдӕр де сӕфт кӕй уыныс (Галатӕгтӕм 5:19–21). Стӕй ма зӕрдыл дарын хъӕуы уый дӕр, ӕмӕ, иунӕгӕй куы вӕййыс, уӕд цы фӕаразыс, уымӕй тынгдӕр бӕрӕг вӕййы, ӕцӕгӕй цавӕр адӕймаг дӕ, уый (Псалом 11:4; 16:8). Уӕдӕ дӕ кӕд ӕцӕгдӕр фӕнды, цӕмӕй алы хъуыддаджы дӕр бӕрӕг уа, уаг ӕмӕ ӕгъдаумӕ Йегъовӕйы цӕстӕй кӕй кӕсыс, уӕд уынаффӕтӕ алкӕддӕр хӕсдзынӕ Библийы уагӕвӕрдтӕм гӕсгӕ (2 Коринфӕгтӕм 3:18).

17. Ирхӕфсӕнтӕ ӕвзаргӕйӕ цавӕр фарстатыл хъуамӕ ахъуыды кӕнӕм?

¹⁷ Цы ма дын баххуыс кӕндзӕн, цӕмӕй ирхӕфсӕнтӕм Йегъовӕйы цӕстӕй кӕсай? Ахъуыды кӕн ахӕм фарстайыл: «Ацы ирхӕфсӕн куы равзарон, уӕд мыл куыд фӕзындзӕн ӕмӕ мын уый фӕстӕ Хуыцауы раз цы ном уыдзӕн?» Зӕгъӕм, исты киномӕ бакӕсыны размӕ  ахъуыды кӕн: «Ацы кино ме ’фсармыл куыд фӕзындзӕн? Уый фӕстӕ мӕ мӕ цӕсгом нӕ хӕрдзӕн?» Ӕркӕсӕм, цавӕр уагӕвӕрдтӕ нын баххуыс кӕндзысты, уымӕ.

18, 19. а) Филиппӕгтӕм 4:8 стихы цы уагӕвӕрд ис, уый нын куыд баххуыс кӕндзӕн, ирхӕфсӕн хорз у ӕви нӕ, уый бамбарынӕн? б) Хорз ирхӕфсӕнтӕ ӕвзарынӕн ма дын ноджыдӕр цавӕр уагӕвӕрдтӕ баххуыс кӕндзысты? (Кӕс фиппаинаг.)

¹⁸ Иу ахсджиаг уагӕвӕрд ис Филиппӕгтӕм 4:8 стихы: «Цыдӕриддӕр у ӕцӕг, цыдӕриддӕр у ахсджиаг, цыдӕриддӕр у раст, цыдӕриддӕр у сыгъдӕг, цыдӕриддӕр у уарзинаг, хорз цӕмӕйдӕриддӕр фӕзӕгъынц, цыдӕриддӕр у хӕрзӕгъдау ӕмӕ раппӕлинаг,– уыдӕттыл хъуыды кӕнут ӕдзухдӕр». Кӕй зӕгъын ӕй хъӕуы, ацы ран Павел ирхӕфсӕнтыл нӕ дзырдта, фӕлӕ, адӕймагӕн йӕ хъуыдытӕ цӕуыл хъуамӕ уой, ууыл, ома, дам, хъуамӕ хъуыды кӕна, Хуыцауы зӕрдӕмӕ цы цӕуы, уыдӕттыл (Псалом 19:14). Фӕлӕ Павелы ныхӕстӕ ирхӕфсӕнтӕм дӕр ис ахӕссӕн.

¹⁹ Ахъуыды кӕн ахӕм фарстайыл: «Цы кинотӕм фӕкӕсын, цы видеохъӕзтытӕй фӕхъазын, цы музыкӕмӕ фӕхъусын, уыдоны фӕрцы мӕ зонд, сыгъдӕг цыдӕриддӕр у, уыдӕттӕй дзаг кӕнын?» Зӕгъӕм, киномӕ куы бакӕсыс, уӕд дӕм цавӕр хъуыдытӕ фӕзыны? Кӕд хорз цӕуылдӕрты фӕхъуыды кӕныс, стӕй де уӕнг фӕрогдӕр вӕййы, уӕд зӕгъӕн ис, ӕмӕ хорз ирхӕфсӕн уыд. Фӕлӕ дӕм кӕд кинойы фӕстӕ ӕнӕгъдау хъуыдытӕ фӕзынд, уӕд уыцы ирхӕфсӕн уыд ӕвзӕр, суанг ма дын зиан дӕр ӕрхаста (Матфейы 12:33; Марчы 7:20–23). Цӕмӕн ис афтӕ зӕгъӕн? Уымӕн ӕмӕ адӕймаг ӕнӕгъдау цӕуылдӕрты куы фӕхъуыды кӕны, уӕд йӕхимидӕг тыхсын райдайы, йӕ цӕсгом сыгъдӕг нал вӕййы ӕмӕ ма тӕссаг вӕййы, Хуыцауӕй кӕй адард уыдзӕн, уымӕй дӕр (Ефесӕгтӕм 5:5; 1 Тимофеймӕ 1:5, 19). Ахӕм  ирхӕфсӕнтӕ дын зиан кӕй хӕссынц, уымӕ гӕсгӕ хъуамӕ дӕхицӕн фидарӕй зӕгъай, дӕхи сӕ кӕй хиздзынӕ (Ромӕгтӕм 12:2) *. Псаломзарӕггӕнӕгау ды дӕр Йегъовӕмӕ кув: «Ницӕйаг цы у, ахӕмӕй мӕ мацӕмӕ бауадз кӕсын» (Псалом 119:37).

20, 21. 1 Коринфӕгтӕм 10:23, 24 стихты цы уагӕвӕрд ис, уый хорз ирхӕфсӕнтӕ ӕвзарынмӕ куыд хауы?

²⁰ Нӕхӕдӕг кӕй хъуамӕ аскъуыддзаг кӕнӕм, ахӕм хъуыддаджы фӕдыл нӕ уынаффӕ рахӕссын куы хъӕуа, уӕд хъуамӕ нӕ зӕрдыл дарӕм, Павел кӕй кой скодта, уыцы ахсджиаг уагӕвӕрд: «Алцы кӕныны бар дӕр ис, фӕлӕ алцы нӕ фидар кӕны. Уӕдӕ алчидӕр хъуыды кӕнӕд иннӕйы пайдайыл, йӕхи пайдайыл нӕ, фӕлӕ» (1 Коринфӕгтӕм 10:23, 24). Ацы уагӕвӕрд хорз ирхӕфсӕнтӕ ӕвзарынмӕ куыд хауы? Ахъуыды кӕн ахӕм фарстайыл: «Ацы ирхӕфсӕн куы равзарон, уӕд иннӕтӕ цы ахъуыды кӕндзысты?»

²¹ Чи зоны, цы ирхӕфсӕн равзӕрстай, уый тыххӕй дӕ дӕ цӕсгом нӕ хӕры ӕмӕ дӕм афтӕ кӕсы, ӕмӕ дын ахӕм ирхӕфсӕн равзарыны бар ис. Фӕлӕ куы уынай, йе ’фсарм афтӕ фӕлтӕрд кӕмӕн нӕу, уыцы хотӕ ӕмӕ ӕфсымӕртӕ уыцы ирхӕфсӕн ӕвзӕр ирхӕфсӕныл нымайынц, уӕд, ӕвӕццӕгӕн, йӕ кой дӕр нал скӕндзынӕ. Афтӕ цӕмӕн бакӕндзынӕ? Уымӕн ӕмӕ дӕ нӕ фӕнды, цӕмӕй афтӕ рауайа, ӕмӕ дӕу тыххӕй хотӕ ӕмӕ ӕфсымӕртӕн зындӕр у Хуыцауыл иузӕрдионӕй баззайын – уый уыдзӕн тӕригъӕд «де ’фсымӕрты раз» кӕнӕ, Павел куыд загъта, афтӕмӕй суанг «Чырыстийы раз» дӕр. Мах нӕ зӕрдыл дарӕм ацы фӕдзӕхст:  «Къуылымпыйы хос ма ут» (1 Коринфӕгтӕм 8:12; 10:32). Абон ӕцӕг чырыстӕттӕ архайынц Павелы зондджын уынаффӕмӕ гӕсгӕ ӕмӕ сӕхи хизынц, «бар» сын кӕмӕн ис, фӕлӕ чи «нӕ фидар кӕны», ахӕм ирхӕфсӕнтӕй (Ромӕгтӕм 14:1; 15:1).

22. Чырыстон цӕуылнӕ хъуамӕ дома, цӕмӕй иннӕтӕ дӕр, уый куыд хъуыды кӕны, афтӕ хъуыды кӕной?

²² Фӕлӕ ацы хъуыддагмӕ иннӕрдыгӕй дӕр хъӕуы ӕркӕсын. Йӕ цӕсгом цавӕрдӕр ирхӕфсӕнтӕ ӕвзарыны бар кӕмӕн нӕ дӕтты, уыцы чырыстон нӕ домдзӕн, цӕмӕй ӕмбырды иууылдӕр ирхӕфсӕнтӕм йӕ цӕстӕй кӕсой. Ахӕм зондыл хӕст чи у, уый абарӕн ис, фӕндагыл машинӕйыл чи фӕцӕуы ӕмӕ иннӕ шофыртӕй дӕр, уый куыд цӕуы, афтӕ цӕуын чи домы, ахӕм шофыримӕ. Уый йе ’мбаргӕдзинадыл дзурӕг нӕ уаид. Кӕцыдӕр ирхӕфсӕнтӕ хорз кӕмӕ нӕ кӕсынц, фӕлӕ иннӕты чи уарзы, уый хъуамӕ аргъ кӕна, ахӕм ирхӕфсӕнтӕ чи ӕвзары, уыдоны хъуыдыйӕн. Кӕд сӕ хъуыды йӕ хъуыдыйӕ хицӕн кӕны, фӕлӕ Библийы уагӕвӕрдты ныхмӕ нӕу, уӕд сын хъуамӕ йӕ хъуыды ма хъара. Ӕмӕ йӕ уӕд алчидӕр зондзӕн «йе ’мбаргӕдзинадӕй» (Филиппӕгтӕм 4:5; Екклесиаст 7:16).

23. Дӕ бон куыд у хорз ирхӕфсӕн равзарын?

²³ Уӕдӕ дӕ бон куыд у хорз ирхӕфсӕн равзарын? Хуыцауы Ныхас кӕй ныхмӕ у ӕмӕ ӕнӕгъдау митӕ ӕргом кӕм ӕвдисынц, ахӕм ирхӕфсӕнтӕй дӕхи хиз. Библийы бӕлвырдӕй кӕй кой нӕй, ахӕм ирхӕфсӕнтӕ ӕвзаргӕйӕ Библийы уагӕвӕрдтӕм гӕсгӕ архай. Дӕхи хиз, дӕ цӕсгом дын чи фӕчъизи кӕндзӕн, ахӕм ирхӕфсӕнтӕй. Ӕмӕ иннӕтӕн, уӕлдайдӕр де ’мчырыстӕттӕн, цӕлхдур чи суа, уыцы ирхӕфсӕнтыл дӕ къух сис. Цӕй уӕдӕ алкӕддӕр афтӕ архай ӕмӕ уымӕй Хуыцауы кадджын кӕн. Ӕмӕ дӕхӕдӕг дӕр ӕмӕ дӕ бинонтӕ дӕр йӕ уарзтӕй хайджын ут!