1, 2. Soangen pilipil dahieu kitail anahne wia me pid mehn kamweit kan?

IA DUWEN ma ke pahn kang ehu wahntuhke iou ahpw tehkada me mie kisin wasa me ohla? Dahme ke pahn wia? Ke kak kangala wahntuhkeo pwon iangahki wasa ohla, de ke kak koskihla pwon, de ke kak lekehsang wasa me ohla oh kangala wasa me mwahu. Ia omw pilipil?

² Wahntuhkeo kak duwehte mehn kamweit kan. Ekei ahnsou ke men perenki mehn kamweit kan, ahpw ke ese me rahnpwukat, pali laud en mehn kamweit kan kin pidada tiahk samin oh suwed. Eri, dahme ke pahn wia? Ekei aramas sohte kin nsenohki soahng suwed kan oh alehte mehn kamweit sohte lipilipil nan sampah wet. Ekei pahn soikala mehn kamweit kan koaros pwe irail en dehr ale mehkot suwed. Pil ekei kin kanahieng en dehr ale mehn kamweit suwed kan ahpw re kin ekei pak perenki mehn kamweit mwahu kan. Mehnia pilipil me ke pahn wia pwehn dadaurete ni limpoak en Koht?

3. Dahme kitail pahn tehkpene mahs?

³ Pali laud en kitail pahn pilada pilipil kesiluh. Kitail wehwehki atail anahn en ahneki ahnsou kaperen ahpw kitail men perenki mehn kamweit mwahu kante. Eri, kitail anahne medemedewe ia duwen atail pahn ese mehnia me mwahu oh suwed. Keieu kitail  pahn tehkpene dahme atail pilipil en mehn kamweit kak wiahiong atail kaudok ong Siohwa.

4. Ia duwen atail inou eh pahn kamwakid atail pilipil en mehn kamweit kan?

⁴ Sounkadehdehn Siohwa mah men me papidaisla nan pahr 1946 koasoia: “I kin ahnsou koaros rong kanahieng padahk en papidais oh kin wiahki me ngehi me papidais.” Dahme kahrehda? E koasoia, “En tamatamante ei inou kin wia mehkot kesempwal en kolokol ei lelepek.” Ke uhdahn pahn pwungki met. En katamankin uhk me ke inoukihong Siohwa omw mour pwehn papah ih kin kamwakid uhk en dadaurete. (Wadek Eklesiasdes 5:4.) En medemedewe duwen omw inou pahn kamwakid omw madamadau kaidehn ongete doadoahk en kalohk ahpw pil wiewia teikan nan omw mour iangahki mehn kamweit kan. Wahnpoaron Pohl kasalehda ire mehlel wet ni eh ntinglahng Kristian akan: “Mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong ni kalinganpen Koht.”​—1 Korint 10:31.

5. Ia duwen Lipai 22:18-20 eh kak sewese kitail en wehwehki mouren kaweid en Rom 12:1?

⁵ Soahng koaros me ke kin wia kin pid omw kaudok ong Siohwa. Nan nah kisinlikou ong mehn Rom kan, Pohl doadoahngki mahsen kehlail kan pwehn katamankihong ienge Kristian akan ire mehlel wet: “Kumwail mweidala paliwaramwail kan pwe en wiahla mehn meirong momour, me sarawi oh kaperen pahn kupwur en Koht.” (Rom 12:1) Paliweromw kin iangahki omw madamadau, omw mohngiong oh omw kehl. Ke kin doadoahngki soahng pwukat koaros pwehn papah Koht.  (Mark 12:30) Pohl koasoia me atail doadoahngki atail mour unsek pwehn papah Koht kin wia meirong ehu. Lepin lokaia “meirong” kin kasalehda me e kihda peneu ehu. Kosonned en Moses kasalehda me Koht sohte kupwurki meirong en mahn me sakanakan. (Lipai 22:18-20) Duwehte met, ma en Kristian emen eh doadoahk ong Koht kin saminla, Koht sohte pahn kupwurki meirong wet. Ahpw ia duwen met eh kak wiawi?

6, 7. Ia duwen Kristian men eh kak kasaminehla paliwere? Dahme met kak imwikihla?

⁶ Pohl kaweidki Kristian akan en Rom: “Kumwail dehpa pil mweidohng kisehn paliwaramwail en wiahda dihp.” Pohl pil padahkihong irail en ‘kemehla wiewia kan en paliwararail.’ (Rom 6:12-14; 8:13, NW) Nan kisinlikouohte, Pohl kasalehda ekei ‘wiewia kan en paliwar.’ Me pid aramas suwed kan, e koasoia: “Awarail kan me diren keria suwed.” “Re [“nehrail,” NW] kin mwadang kamadak aramas oh kemehla.” “Re [“masarail,” NW] pil sohte ese duwen lemmwiki Koht.” (Rom 3:13-18) Emen Kristian kak kasaminehla paliwere ma e doadoahngki ‘kisehn paliwere’ ong wiewia suwed kan. Karasepe, ma Kristian emen kin pein pilada en kilang mehkan me samin duwehte kilel suwed kan de tiahk lemei, e pahn “mweidohng [mese] en wiahda dihp,” oh met kin  kasaminehla paliwere pwon. Eh kaudok pahn wiahla meirong me sohte mwakelekel oh Koht sohte pahn kupwurki meirong wet. (Deuderonomi 15:21; 1 Piter 1:14-16; 2 Piter 3:11) Ia uwen imwila suwed ong ih pwehki eh pilada mehn kamweit suwed!

⁷ E sansal me en Kristian men eh pilipil me pid mehn kamweit kan kakete imwila suwed. Ihme kahrehda, kitail men pilada mehn kamweit kan me pahn sewese kitail en wiahda meirong me Koht kupwurki. Kitail sohte men pilada mehn kamweit kan me pahn kasaminehla atail meirong. Met kitail pahn tehkpene ia duwen atail kak ese mehnia me mwahu oh suwed.

8, 9. (a) Soangen mehn kamweit riau dah kan mie? (b) Soangen mehn kamweit dah kan kitail kin liksang, oh dahme kahrehda?

⁸ Mie soangen mehn kamweit riau. Ehu kin pid mehn kamweit kan me Kristian akan uhdahn anahne liksang, ahpw meteio kin pid mehn kamweit kan me ekei Kristian pahn lemeleme me mwahu ahpw ekei soh. Kitail pahn tehkpene mahs mehn kamweit kan me Kristian akan uhdahn anahne liksang.

⁹ Irelaud 1 en pwuhk wet kin kasalehda me ekei mehn kamweit kan kin kasalehda wiewia kan me uhdahn uhwong padahk en Paipel. Karasepe, mie wasa kan nan Internet, kasdo kan, prokram en TV oh koul kan me kin pid tiahk lemei, ngehn saut kan, kilel suwed de soahng kan me kin kangoange tiahk kasaut de samin kan. Soangen mehn kamweit suwed pwukat kin wiahki mehkot mwahu wiewia kan me kin uhwong kaweid de kosonned en Paipel kan. Kristian mehlel kan anahne liksang mepwukat. (Wiewia 15:28, 29; 1 Korint 6:9, 10; Kaudiahl 21:8) Sang ni omw kin liksang mehn kamweit suwed  pwukat, ke kin kasalehda mwohn silangin Siohwa me ke kin uhdahn “tatki me suwed kan” oh ahnsou koaros “sohpeisang me suwed.” Ni ahl wet ke kin ahneki “pwoson mehlel.”—Rom 12:9; Melkahka 34:14; 1 Timoty 1:5.

10. Soangen madamadau dahieu me pid mehn kamweit kan me keper? Dahme kahrehda?

¹⁰ Ahpw ekei kin medewe me en kilikilang mehn kamweit kan me kasalehda tiahk samin kin sohte keper. Re kin medewe, ‘I kak kilang wiewia pwukat nan kasdo kan de TV ahpw I sohte pahn wia soahng pwukat.’ Soangen madamadau wet me widing oh keper. (Wadek Seremaia 17:9.) Kitail kin uhdahn “tatki me suwed kan” ma kitail kin perenki kilang dahme Siohwa ketin kalahdeki? En kaukaule kilang, wadek oh rong duwen wiewia suwed kan pahn kahrehiong kitail en sohla suwedki wiewia pwukat. (1 Timoty 4:1, 2) Met kak kamwakid atail wiewia kan de atail madamadau ong wiewia suwed en meteikan.

11. Ia duwen Kalesia 6:7 eh kin mehlel me pid duwen mehn kamweit kan?

¹¹ Met kin uhdahn wiawi. Ekei Kristian akan wiahda tiahk samin pwehki mehn kamweit kan me re kin kalapw kilang kin kamwakid irail. Imwila suwed kan me re lelohng kahrehiong ren wehwehkihla me “mehkot me aramas pahn padokedi, ihme e pahn dolung.” (Kalesia 6:7) Ahpw re kak soikala imwila suwed pwukat. Ma ke pahn padokedi mehkot me mwakelekel nan omw madamadau, ke pahn dolung imwila mwahu nan omw mour.—Menlau kilang koakon “ Soangen Mehn Kamweit Dah Ien Pilada?”

12. Ia duwen Kalesia 6:5 eh kin pidada mehn kamweit kan? Soangen sawas dah kan mie ong wiahda pilipil kan?

¹² Met kitail pahn tehkpene duwen mehn kamweit  kan me kin kasalehda wiewia kan me Paipel sohte mahsanih ni sansal ma re mwahu de suwed. Ahnsou me Kristian akan pahn pilada mehn kamweit pwukat, emenemen anahne pein pilada mehnia me mwahu. (Wadek Kalesia 6:5.) Ahpw mie sawas kan me kitail kak doadoahngki pwehn wiahda pilipil mwahu kan. Paipel kin audaudki ire mehlel kan me kak sewese kitail en wehwehki sapwellimen Siohwa madamadau. Ni atail kin tehk ire mehlel pwukat, kitail pahn kak dehdehki “dahme Kaun-o ketin kupwukupwure” ong mehkoaros iangahki atail pilipil en mehn kamweit kan.​—Episos 5:17.

13. Dahme pahn kamwakid kitail en liksang mehn kamweit kan me kak kansensuwedih Siohwa?

¹³ En Kristian akan ar kakairada koahiek en dehdehki dahme konehng kin wekpeseng. (Pilipai 1:9) Oh Kristian akan pohnese me mehn kamweit kan me re perenki pil kin wekpeseng. Ihme kahrehda, kitail sohte kak kasik me Kristian koaros pahn wiahda pilipil kan me duwepenehte. Ahpw ma kitail pahn mweidohng kaweid kan oh ire mehlel kan sang rehn Koht en kamwakid atail madamadau oh mohngiong, kitail pahn men liksang mehn kamweit kan me kak kansensuwedih Siohwa.​—Melkahka 119:11, 129; 1 Piter 2:16.

14. (a) Dahme kitail anahne medewe ni ahnsou me kitail pahn pilada mehn kamweit kan? (b) Ia duwen atail kak ahnsou koaros keieu kesempwalki atail kaudok ong Koht nan atail mour?

¹⁴ Ahnsou me ke pahn pilada mehn kamweit kan, ke pil anahne medewe ia uwen laud en ahnsou me ke pahn doadoahngki. Audepen mehn kamweit kan me ke pilada kin kasalehda dahme ke medewe me mwahu. Ahpw uwen laud en ahnsou me ke kin doadoahngki ong mehn kamweit kan kin kasalehda dahme ke kin kesempwalki nan omw mour. Ong Kristian akan, mehkan me pid kaudok ong Koht iei me keieu kesempwal.  (Wadek Madiu 6:33.) Eri, dahme ke kak wia pwe ken keieu kesempwalki omw kaudok ong Koht nan omw mour? Wahnpoaron Pohl koasoia: “Kumwail kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehte me loalokong kan. Kumwail isaneki ahnsou mwahu koaros.” (Episos 5:15, 16) En koasoanehdi ia uwen laud en ahnsou me ke pahn doadoahngki ong mehn kamweit kan pahn sewese iuk en ahneki ahnsou  ong “dahme keieu mwahu [“kesempwal,” NW]” me wehwehki wiewia kan me kak sewese iuk en ahneki nanpwungmwahu rehn Koht.​—Pilipai 1:10.

15. Dahme kahrehda e wia elen loalokong en wia laudsang en liksangete dahme uhdahn suwed?

¹⁵ E pil wia elen loalokong en wia laudsang en liksangete dahme uhdahn suwed ni atail kin pilada mehn kamweit kan. Ia wehwehn met? Tamanda karasaras en wahntuhkeo. Pwe ken dehr kang wasa me ohla, ke anahne lekehsang kaidehn ihte wasa me uhdahn ohla ahpw pil limwahn wasa me ohla. Kitail anahne wia duwehte met ni ahnsou me kitail pahn pilada mehn kamweit kan. Kristian loalokong men sohte kin liksangete mehn kamweit kan me kin uhwong kaweid en Paipel kan ni sansal. Ahpw e pil kin liksang soangen mehn kamweit kan me sohte mwomwen mwahu de mwein mie wasa kan me kak kauwehla eh nanpwungmwahu rehn Koht. (Lepin Padahk 4:25-27) Omw kin nantihong idawehn kaweid kan sang Mahsen en Koht pahn seweseiuk en wia met.

16. (a) Ia duwen atail kak kasalehda me kitail ahneki sapwellimen Siohwa madamadau me pid tiahk mwahu? (b) Ia duwen omw doadoahngki kaweid oh ire mehlel kan en Paipel eh pahn wiahla elen omw mour?

¹⁶ Ni ahnsou me Kristian mehlel men pahn pilada mehn kamweit kan, e pahn keieu kesempwalki sapwellimen Siohwa madamadau. Paipel kin kasalehda sapwellimen Siohwa pepehm oh koasoandi kan. Karasepe, Nanmwarki Solomon kasalehda soahng kan me Siohwa kin ketin kalahdeki duwehte “au likamw, peh kan me kin kemehla aramas me soh-dipe, mohngiong me kin  koasoanehdi mehkot suwed, mehmen me kin mwadang en wiahda me suwed.” (Lepin Padahk 6:16-19) Ia duwen sapwellimen Siohwa madamadau eh pahn kamwakid omw madamadau? Sounmelkahka men kin koasoia: “KAUN-O kin ketin loalloale irail kan me kin kailongki me suwed.” (Melkahka 97:10) Mwomwen omw kin pilada mehn kamweit kan anahne kasalehda me ke kin uhdahn tateki dahme Siohwa kin ketin kalahdeki. (Kalesia 5:19-21) Pil tamataman me dahme ke kin wia ni rir kin kasalehda soangen aramas dahmen kowe laudsang dahme ke kin wia mwohn aramas. (Melkahka 11:4; 16:8) Kahrehda ma ke uhdahn men idawehn dahme Siohwa kupwurki me pid tiahk mwahu ni soahng koaros nan omw mour, eri ke pahn ahnsou koaros wiahda pilipil kan me pahrekiong kaweid oh ire mehlel kan en Paipel. Omw kin wia met pahn wiahla elen omw mour.​—2 Korint 3:18.

17. Mwohn atail pahn pilada mehn kamweit kan, soangen peidek dah kan kitail kak idek rehtail?

¹⁷ Dahme ke pil kak wia pwe ken kak kasalehda me omw wiewia kan kin pahrekiong sapwellimen Siohwa madamadau ni ahnsou me ke kin pilada mehn kamweit kan? Ke kak medemedewe peidek wet, ‘Dahme pilipil wet pahn wiahiong ie oh ei nanpwungmwahu rehn  Koht?’ Karasepe, mwohn omw pahn pilada ma ke pahn kilang soangen kasdo ehu, ke kak idek rehmw, ‘Ia duwen audepen kasdo wet eh pahn kamwakid ei nsenmwakelekel?’ Kitail pahn tehkpene mehnia ire mehlel de kaweid kan me kitail kak doadoahngki me pid ire wet.

18, 19. (a) Ia duwen kaweid en Pilipai 4:8 eh kin sewese kitail en ese ma mehn kamweit kan me kitail pilada me mwahu? (b) Ia pil ekei kaweid de ire mehlel kan me kak sewese iuk en pilada mehn kamweit mwahu kan? (Menlau kilang dahme ntingdi pah.)

¹⁸ Pilipai 4:8 kin kasalehda kaweid kesempwal ehu: “Kumwail en audehkihda nan kapehdamwail kan soahng mwahu kan me kapingpe mie: soahng kan me mehlel, me kesempwal, me pwung, me mwakelekel, me kaselel oh waun.” Wasaht Pohl sohte koasoia duwen mehn kamweit kan ahpw e koasoakoasoia duwen en doudouloale soahng kan me kin kaperenda Koht. (Melkahka 19:14) Ahpw kitail kak doadoahngki eh kaweid kan ong mehn kamweit kan. Ia duwen atail kak wia met?

¹⁹ Ke kak idek rehmw, ‘Ia duwe, kasdo kan, video game kan, koul, de mehn kamweit teikan me I kin pilada kin audehkihda ei madamadau “soahng mwahu kan”?’ Karasepe, mwurin omw kilang kasdo ehu, soangen kilel dah me tengedi nan omw madamadau? Ma re kin kansenamwahu oh mwakelekel, eri ke ese me mehn kamweit me ke pilada me mwahu. Ahpw ma kasdo me ke kilang me kahrehda ken medemedewe duwen soahng kan me sohte mwakelekel, eri mehn kamweit me ke pilada me sohte mwahu oh e keper. (Madiu 12:33; Mark 7:20-23) Dahme kahrehda? Pwehki omw kin medemedewe duwen soahng kan me samin pahn kauwehla omw meleilei nan loalomw oh omw nsenmwakelekel, oh e pahn pil kak kauwehla omw nanpwungmwahu rehn Koht. (Episos 5:5; 1 Timoty 1:5, 19) Pwehki soangen mehn kamweit pwukat pahn keper ong uhk, koasoanehdi teng pwe  ken liksang mepwukat. * (Rom 12:2) Kahlemengih sounmelkahka menet me kapakapkihong Siohwa: “Komw kupwure ie, pwe I en dehr ngoangki dipwisou mwahl akan.”​—Melkahka 119:37.

20, 21. Ia duwen 1 Korint 10:23, 24 eh kin pid en pilada mehn kamweit mwahu?

²⁰ Pohl kasalehda ehu ire kesempwal nan Paipel me kitail anahne medemedewe ni atail pahn wiahda atail pilipil kan. E koasoia: “Ekei kin nda, ‘E mweimweiong kitail, kitail en wia mehkoaros’​—ahpw mehkoaros sohte kin wia mehn sawas mwahu ehu ong kitail. Eri, kumwail dehr kin ngoangki raparapahkihte pein kamwahupamwail kan, ahpw emenemen en ngoangki rapahki kamwahupen meteikan.” (1 Korint 10:23, 24) Ia duwen ire wet eh kin pid omw kin pilada mehn kamweit mwahu kan? Ke anahne idek rehmw, ‘Ia duwen mehn kamweit me I pahn pilada eh kak kamwakid meteikan?’

²¹ Mwein kadeikpen loalomw kak mweidohng uhk en wia ehu soangen mehn kamweit me ke lemeleme me e ‘mweimwei’ de mwahu. Ahpw ma ke esehda me kadeikpen loalen Kristian teikan sohte mweidohng irail en pilada soangen mehn kamweito, mwein ke pahn pilada en sohla wia met. Dahme kahrehda? Pwehki nin duwen Pohl koasoia, ke sohte men “wiahda dihp ong riamwail kan” de “wia dihp ong Krais” sang ni omw kin kahrehiong iengomw tohnkaudok kan en apwalki kolokol arail lelepek ong Koht. Ken tamataman kaweid wet: “Dehr wia mehkot me kak wiahla kahrepen dihp.” (1 Korint 8:12;  10:32) Kristian mehlel kan rahnpwukat kin kapwaiada en Pohl eh kaweid mwahu ni arail kin liksang mehn kamweit kan me ele kin ‘mweimwei’ ahpw “sohte kin wia mehn sawas mwahu.”​—Rom 14:1; 15:1.

22. Dahme kahrehda Kristian akan kin wauneki ahn meteikan pilipil kan?

²² Ahpw pil mie ehu ahl en rapahki kamwahupen meteikan. Ma kadeikpen loalen emen Kristian sohte kak mweidohng ih en wia dahme meteikan kin wia, e sohte pahn kasik me koaros nan mwomwohdiso anahne pwungki eh madamadau me pid duwen mehn kamweit kan. Ma e pahn wia met, e pahn duwehte emen me kin tangahki sidohsa oh kasik me koaros anahne en tang marahra duwehte ih. Soangen madamadau wet sohte mwahu. Limpoak en Kristian anahne kamwakid aramaso en wauneki ienge tohnkaudok teikan me arail pilipil en mehn kamweit kan kin weksang ah ahpw sohte kin kauwehla kaweid kan en Paipel. Ni ahl wet, e kin “kadekohng aramas koaros.”​—Pilipai 4:5; Eklesiasdes 7:16.

23. Ia duwen omw kak pilada mehn kamweit mwahu kan?

²³ Eri, ia duwen omw kak pilada mehn kamweit mwahu kan? Soikala mehn kamweit kan me kin kasalehda ni sansal tiahk suwed oh samin kan me kin uhdahn uhwong Mahsen en Koht. Doadoahngki kaweid oh ire mehlel kan en Paipel ong mehn kamweit kan me Paipel sohte kin oaritikiada ma re mwahu de soh. Liksang mehn kamweit kan me kak kauwehla omw nsenmwakelekel. Oh kesehla mehn kamweit kan me kak kadipikelekelih meteikan, ahpw mehlel iengomw Kristian teikan. Omw pilipil en wia met en kalinganahda Koht oh sewese iuk oh omw peneinei en dadaurete ni limpoak en Koht.