1, 2. O le ā se filifiliga e tatou te faia e faatatau i faafiafiaga?

SEʻI faapea o le a e ʻaina se fualaau ʻaina manaia, ae ua e iloa e pala le isi itu. O le ā lau mea e fai? E mafai ona e ʻaina le fua atoa e aofia ai ma le itu ua pala; pe e te tiaʻia le fua atoa e aofia ai ma le itu ua pala; ae e mafai foʻi ona e tipiesea le itu ua pala ae ʻai na o le vaega lelei. O le ā se filifiliga e te faia?

² E mafai ona faatusaina faafiafiaga i lenā fualaau ʻaina. E iai taimi e te fia auai ai i faafiafiaga, ae ua e iloa o le tele o faafiafiaga i aso nei e faaleagaina ai amioga lelei. O le ā la lau mea e fai? E iai nisi e latou te onosaia faafiafiaga leaga, ma latou talia so o se faafiafiaga o loo i le lalolagi. A ua ʻalofia e nisi tagata faafiafiaga uma lava ina neʻi aafia ai i latou i so o se mea e afāina ai. Peitaʻi, e iai nisi e latou te ʻalofia ma le faaeteete faafiafiaga e afāina ai, ae e filifilia faafiafiaga mamā mai i lea taimi i lea taimi. O le ā sau filifiliga e fai ina ia faatumauina ai oe i le alofa o le Atua?

3. O le ā le mea o le a tatou talanoaina?

³ Atonu e filifilia e le toʻatele o i tatou le vala lona tolu. E tatou te iloa le tāua o le auai i sina faafiafiaga, ae e tatou te mananaʻo foʻi e filifili na o faafiafiaga e lagolagoina ai amioga mamā. O lea la, e tatau ona iloilo pe faapefea ona tatou iloa faafiafiaga e mamā ma faafiafiaga  e lē mamā. Ae seʻi o tatou talanoa muamua pe faapefea ona aafia la tatou tapuaʻiga iā Ieova i faafiafiaga e tatou te filifilia.

4. E faapefea i lo tatou tuuina atu ona aafia ai faafiafiaga tatou te filifilia?

⁴ Na faapea mai se tasi Molimau ua loa le soifua, na papatiso i le 1946: “Na ou taumafai e auai ma faalogologo lelei i so o se lauga o le papatisoga, e pei lava o aʻu lea e papatiso.” Aiseā? Na faapea mai le uso, “O le manatu mamafa i loʻu tuuina atu iā Ieova, o se vala tāua lea o loʻu tumau i le faamaoni.” E mautinoa lava e te ioe i lenā faamatalaga. O lou faamanatu pea iā te oe lava o lau tautoga iā Ieova e faaaogā lou ola atoa e auauna ai iā te ia, ua uunaʻia ai oe ina ia tutumau pea. (Faitau le Failauga 5:4.) O le mea moni, o lou manatunatu loloto i lou tuuina atu, e aafia ai lau vaai i le faiva faa-Kerisiano, atoa foʻi ma vala uma o le olaga, e aofia ai faafiafiaga. Na lagolagoina e le aposetolo o Paulo lenā mea moni i lana tusi i Kerisiano i ona aso: “Pe tou te aai, pe inu, pe faia se tasi mea, ia faia mea uma lava ina ia faamamaluina ai le Atua.”​—1 Korinito 10:31.

5. E faapefea ona fesoasoani mai le Levitiko 22:18-20 ina ia iloa ai le lapataʻiga o loo faaataata mai i le Roma 12:1?

 ⁵ O mea uma lava e te faia i le olaga, e aafia ai lau tapuaʻiga iā Ieova. Na faaaogā e Paulo se faaupuga malosi i lana tusi i Kerisiano i Roma, ina ia tāmau ai lenā mea moni i mafaufau o uso talitonu. Na timaʻi atu o ia iā i latou: “Ia tuuina atu o outou tino o le taulaga ola, e paia, ma e mālie i le Atua, ia faia le auaunaga paia ma lo outou mafaufau lelei.” (Roma 12:1) O lou tino e aofia ai lou mafaufau, o lou loto, ma lou malosi. O mea uma na e te faaaogā e auauna ai i le Atua. (Mareko 12:30) Na taʻua e Paulo, o se auaunaga e faia ma le lotoatoa, o le taulaga lea. O loo iai se lapataʻiga o loo faaataata mai i lenā faaupuga. I le tulafono a Mose, na teena e le Atua se taulaga o manu na faalētonu. (Levitiko 22:18-20) E faapena foʻi ona teena e le Atua taulaga faaleagaga ua pisipisia a se Kerisiano. E faapefea ona tupu lenā mea?

6, 7. E faapefea ona faaleagaina e se Kerisiano lona tino, ma o ā iʻuga leaga e oo i ai?

⁶ Na apoapoaʻi atu Paulo i Kerisiano i Roma: “Aua neʻi tuuina atu o outou tino i le agasala.” Na faapea atu foʻi Paulo iā i latou ina ia “faaumatia galuega a le tino.” (Roma 6:12-14; 8:13) Na ia taʻua ni faaaʻoaʻoga o “galuega a le tino” i se taimi na muamua atu i lana tusi. Na tusi o ia e faatatau i tagata agasala e faapea: “Ua tumu foʻi o latou gutu i upu fetuu.” “Ua televavave o latou vae e sasaa le toto.” “Ua leai so latou mataʻu i le Atua [i o latou mata].” (Roma 3:13-18) E faaleagaina e se Kerisiano lona tino pe a ia faaaogāina lona “tino” i amioga agasala faapena. O se faaaʻoaʻoga, afai e matamata se Kerisiano i aso nei i mea matagā e pei o ata i feusuaʻiga po o sauāga ogaoga, ua ia “tuuina atu [ona mata] i  le agasala” ma faapea ona faaleagaina ai lona tino atoa. Afai e tapuaʻi o ia i le Atua, e lē toe taliaina e le Atua auā ua lē toe paia lana taulaga. (Teuteronome 15:21; 1 Peteru 1:14-16; 2 Peteru 3:11) Pagā se iʻuga leaga o le filifilia o faafiafiaga lē mamā!

⁷ E manino mai la, e mataʻutia aafiaga o faafiafiaga e filifilia e se Kerisiano. E tatau la ona tatou mananaʻo e filifili faafiafiaga e faaleleia ai la tatou taulaga i le Atua, ae lē o le faaleagaina ai. Seʻi o tatou talanoa loa pe faapefea ona iloa faafiafiaga mamā ma faafiafiaga e lē mamā.

8, 9. (a) O ā vaega e lua e mafai ona vaevaeina ai faafiafiaga? (e) O ā ituaiga o faafiafiaga e tatou te teena, ma aiseā?

⁸ E mafai ona vaevaeina faafiafiaga i ni vaega se lua. O le tasi vaega, o faafiafiaga e matuā teena e Kerisiano; o le isi vaega, o faafiafiaga e ono talia pe lē taliaina foʻi e Kerisiano. Seʻi o tatou iloiloina muamua le vaega muamua, o faafiafiaga e teena e Kerisiano.

⁹ E pei ona taʻua i le Mataupu 1, e iai faafiafiaga o loo faaalia ai mea e matuā taʻusalaina e le Tusi Paia. O se faaaʻoaʻoga, seʻi manatu i polokalame i komepiuta, o ata tifaga, o polokalame i le TV, ma musika e iai faiga ogaoga ma faiga faatemoni, pe e iai foʻi faiga tau feusuaʻiga po o amioga leaga ma matagā. E tatau i Kerisiano moni ona matuā teena faafiafiaga matagā faapena, auā o loo taʻuleleia ai amioga ma faiga e soli ai mataupu silisili ma tulafono o le Tusi Paia. (Galuega 15:28, 29; 1 Korinito 6:9, 10; Faaaliga 21:8) O lou teena o faafiafiaga lē mamā faapena, ua e faaali ai iā Ieova lou matuā “ʻinoʻino i le leaga” ma maumauaʻi e “liliuese mai i mea leaga.” O le  faia faapea, ua e maua ai le “faatuatua e lē faatagāfai.”​—Roma 12:9; Salamo 34:14; 1 Timoteo 1:5.

10. O le ā le manatu e uiga i faafiafiaga e lamatia ai, ma aiseā?

¹⁰ Ae ua manatu nisi tagata, e leai se mea e afāina ai le matamata i faafiafiaga e faaalia ai amioga lē mamā. Ua manatu i latou, ʻOu te matamata i ata tifaga ma le TV, ae e lē taitai lava ona ou faia na mea.’ O mafaufauga faapena e taufaasesē ma e lamatia ai. (Faitau le Ieremia 17:9.) Afai e tatou te fiafia e matamata i mea e taʻusala e Ieova, po o tatou “ʻinoʻino” moni la “i le leaga”? O le faaauau ona matamata i amioga leaga, o le a tatou lē toe lagonaina ai le mea saʻo ma le mea sesē. (Salamo 119:70; 1 Timoteo 4:1, 2) O le faia faapea e ono aafia ai a tatou mea e fai, po o la tatou vaai i agasala a isi tagata.

11. Ua faapefea ona moni le Kalatia 6:7 e faatatau i faafiafiaga?

¹¹ Ua tupu moni lenei mea. Ua faia e nisi Kerisiano ni amioga lē mamā, ona na taaʻina i latou i faafiafiaga na masani ona matamata ai. Ua latou aʻoaʻoina ai ma le tigā le mea moni e faapea, “o le mea e lūlūina e le tagata, o le mea lava lea e na te seleseleina mai.” (Kalatia 6:7) Ae e mafai ona ʻalofia lenā iʻuga faanoanoa. Afai e te lūlūina i lou mafaufau le mea lelei, e te seleseleina foʻi ma le fiafia i lou olaga le mea lelei.​—Tagaʻi i le pusa “ O ā Faafiafiaga o le a Ou Filifilia?.”

12. O le ā le fesootaʻiga o le Kalatia 6:5 ma faafiafiaga, ma o le ā le taʻiala ua tatou maua i le faia o filifiliga a le tagata lava ia?

¹² Seʻi o tatou iloiloina le vaega lona lua​—o faafiafiaga e iai faiga e lē o maʻoti mai ona taʻusalaina pe taliaina e le Afioga a le Atua. Afai e filifilia faafiafiaga faapena, e tatau i Kerisiano taʻitoʻatasi ona fai lana lava  filifiliga e tusa ma le mea ua ia iloa e mamā. (Faitau le Kalatia 6:5.) Ae o loo iai taʻiala pe a faia se filifiliga faapena. O loo maua i le Tusi Paia mataupu silisili, po o upu moni faavae, lea e mafai ai ona tatou iloa mafaufauga o Ieova. O lo tatou uaʻi atu i na mataupu silisili, o le a mafai ai ona tatou iloa “po o le ā le finagalo o Ieova,” e aofia ai ma faafiafiaga e tatou te filifilia.​—Efeso 5:17.

13. O le ā e uunaʻia i tatou e ʻalofia faafiafiaga e lē fiafia i ai Ieova?

 ¹³ E lē tutusa le iloa ma le malamalamaga o Kerisiano uma e faatatau i amioga. (Filipi 1:9) Ua iloa foʻi e Kerisiano e eseese faafiafiaga e fiafia ai tagata. O le mea lea, e lē tatau ona tatou manatu o le a tutusa filifiliga e faia e Kerisiano uma. Afai e matuā taaʻina o tatou mafaufau ma loto i mataupu silisili mai i le Atua, o le a atili ai ona tatou naunau e ʻalofia so o se ituaiga o faafiafiaga e lē fiafia i ai Ieova.​—Salamo 119:11, 129; 1 Peteru 2:16.

14. (a) O le ā se mea e tatou te mafaufau i ai a o filifilia faafiafiaga? (e) E faapefea ona tatou faamuamua i le olaga manaʻoga o le Malo?

¹⁴ E iai se isi mea tāua e mafaufau i ai a o filifilia faafiafiaga: o lou taimi. O ituaiga o faafiafiaga e te filifilia e faaalia ai mea e te taliaina, ae o le tele o le taimi e faaaluina ai, e faaalia ai mea e sili ona tāua iā te oe. Ae o mea e sili ona tāua i Kerisiano, o mea faaleagaga. (Faitau le Mataio 6:33.) O lea la, o le ā se mea e te faia ina ia faamautinoa ai o loo e faamuamuaina pea i lou olaga manaʻoga o le Malo? Na taʻua e le aposetolo o Paulo: “Ia outou matuā faautauta ina neʻi outou savavali e pei o ē e vālea, ae ia pei o ē e atamamai, ia outou faaaogā tatau le taimi.” (Efeso 5:15, 16) O le faatapulaa o le taimi e auai ai i faafiafiaga, e fesoasoani iā te oe ina ia lava le taimi mo “mea e sili ona tāua,” o galuega e aogā i lou itu faaleagaga.​—Filipi 1:10.

15. Aiseā e lelei ai pe a matuā faaeteete i le filifilia o faafiafiaga?

¹⁵ E lelei pe a tatou matuā faaeteete i le filifilia o faafiafiaga. Aiseā? Seʻi toe manatu i le faaaʻoaʻoga o le fualaau ʻaina. Ina ia ʻalofia le ʻaina o le itu pala, e lē gata e te tipiesea le itu pala, ae e te matuā faaeteete foʻi e tipiese ma le itu o latalata i ai. E faapena foʻi le filifilia o faafiafiaga, e lelei pe a matuā faaeteete. O se Kerisiano poto e na te ʻalofia e lē gata o faafiafiaga o loo mautinoa  e soli ai mataupu silisili o le Tusi Paia, ae atoa foʻi ma faafiafiaga e faailoga fesili, pe e foliga mai e aofia ai ma faiga e faaleagaina ai le itu faaleagaga. (Faataoto 4:25-27) E mafai ona e faia lenā mea, pe a e piiama atu i le Afioga a le Atua.

16. (a) E faapefea ona faaalia ua iā i tatou le silafaga a Ieova i amioga tatau? (e) E faapefea ona e faatāuaina i lou olaga mataupu silisili o le Tusi Paia?

¹⁶ Pe a filifilia faafiafiaga, e mafaufau muamua lava Kerisiano moni i le silafaga a Ieova. Ua faailoa mai e le Tusi Paia faalogona ma tapulaa a Ieova. O se faaaʻoaʻoga, o loo taʻua e le tupu o Solomona nisi o mea e inosia e Ieova e pei “o le laulaufaiva pepelo, o lima e sasaa le toto o ē e lē sala, o le loto e fafau faufauga leaga, o vae e vave ona tamoʻe e fai le mea leaga.” (Faataoto 6:16-19) E faapefea ona aafia ou manatu i le silafaga a Ieova? Na apoapoaʻi mai le faisalamo: “O outou o ē e alolofa iā Ieova, ia outou ʻinoʻino i le leaga.” (Salamo 97:10) E tatau ona faaalia i faafiafiaga ua e filifilia lou ʻinoʻino i mea ua ʻinoʻino i ai Ieova. (Kalatia 5:19-21) Ia manatua foʻi, o mea e te faia na o oe, e iloa ai lou tagata moni, ae e lē o mea e te faia a o faatasi ma isi. (Salamo 11:4; 16:8) Afai la e te naunau moni lava e faaatagia atu  i vala uma o lou olaga le silafaga a Ieova i amioga tatau, e te faia la ni filifiliga i taimi uma e ōgatusa ma mataupu silisili o le Tusi Paia. O le mea lenā e te faatāuaina i lou olaga atoa.​—2 Korinito 3:18.

17. A o leʻi filifilia se faafiafiaga, o ā fesili e fesili ifo ai iā i tatou lava?

¹⁷ O ā nisi mea e te faia e faamautinoa ai o loo e gaoioi e ōgatusa ma mafaufauga o Ieova pe a filifilia faafiafiaga? Ia mafaufau i le fesili lenei, ʻE faapefea ona aafia ai aʻu ma laʻu faiā ma le Atua?’ O se faaaʻoaʻoga, a o leʻi matamata i se ata, ia fesili ifo iā te oe, ʻE faapefea ona aafia loʻu lotofuatiaifo i lenei ata?’ Seʻi o tatou iloiloina ni mataupu silisili e mafai ona faatatau i lenei mataupu.

18, 19. (a) E faapefea ona fesoasoani mai le mataupu silisili i le Filipi 4:8 ina ia tatou iloa pe e mamā a tatou faafiafiaga? (e) O ā nisi mataupu silisili e fesoasoani iā te oe e filifili ai faafiafiaga lelei? (Tagaʻi i le faamatalaga pito i lalo.)

¹⁸ O loo iai se mataupu silisili tāua i le Filipi 4:8: “O mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.” E moni e leʻi talanoa Paulo i faafiafiaga, ae na talanoa i manatunatuga o le loto, lea e tatau ona taulaʻi i mea e fiafia i ai le Atua. (Salamo 19:14) Ae e mafai foʻi ona faatatau atu upu a Paulo i faafiafiaga. E faapefea?

¹⁹ Ia fesili ifo iā te oe, ʻPo o tumu loʻu mafaufau i “mea uma ua mamā” i ata tifaga, o taaloga vitiō, o musika, po o isi faafiafiaga ou te filifilia?’ O se faaaʻoaʻoga, pe a uma ona e matamata i se ata, o ā mea e mapuna aʻe i lou mafaufau? Afai o ni mea lelei, e mamā ma e faafouina ai, ona e iloa lea e mamā faafiafiaga na e  filifilia. Peitaʻi, afai e te mafaufau i mea e lē mamā ona o se ata na e matamata ai, o lona uiga e lē lelei le faafiafiaga na e filifilia, pe e lamatia ai foʻi. (Mataio 12:33; Mareko 7:20-23) Aiseā? Auā foʻi o le mafaufau i amioga lē mamā e atuatuvale ai lou loto, e ōia ai lou lotofuatiaifo ua aʻoaʻoina i le Tusi Paia, ma e mafai ona faaleagaina ai lau faiā ma le Atua. (Efeso 5:5; 1 Timoteo 1:5, 19) Talu ai o faafiafiaga faapena e te afāina ai, ia maumauaʻi la e teena. * (Roma 12:2) Ia pei o le faisalamo o lē na tatalo iā Ieova: “Ia e liliuese oʻu mata mai i le vaai atu i mea e lē aogā.”​—Salamo 119:37.

20, 21. E faapefea ona faatatau le 1 Korinito 10:23, 24 i le filifilia o faafiafiaga mamā?

²⁰ Na taʻua e Paulo se mataupu silisili tāua o le Tusi Paia e ao ona mafaufau i ai, a o faia filifiliga e fitoitonu i le tagata lava ia. Na faapea mai o ia: “E taga mea uma lava; ae e lē o mea uma e atiaʻe ai. Aua neʻi saʻilia e se tasi lona lava lelei, a ia faaauau ona saʻili le lelei o isi.” (1 Korinito 10:23, 24) E faapefea ona faatatau lenā mataupu silisili i le filifilia o faafiafiaga mamā? Ia fesili ifo iā te oe lava, ʻO ā aafiaga o isi i faafiafiaga o le a ou filifilia?’

²¹ Atonu e mafai e lou lotofuatiaifo ona e auai i nisi o faafiafiaga e te manatu e “taga” pe e lelei. Ae peitaʻi, afai e te mātauina e lē o fiafia i ai nisi o uso talitonu o ē e maʻaleʻale o latou lotofuatiaifo, e ono fai lau filifiliga e aua neʻi e auai ai. Aiseā? Talu ai e te lē manaʻo e “agasala i o outou uso,” pe e “agasala . . . iā Keriso” e pei ona taʻua e Paulo, e ala i lou faia o se mea e faafaigatā ai i ou  uso talitonu ona tutumau i le faamaoni i le Atua. E te ave i fale le apoapoaʻiga: “Aua neʻi avea outou ma mea e tausuai ai tagata.” (1 Korinito 8:12; 10:32) Ua utagia e Kerisiano moni i aso nei le fautuaga alofa ma le manino a Paulo, e ala i le teena o faafiafiaga e “taga” ae e lē “atiaʻe ai.”​—Roma 14:1; 15:1.

22. Aiseā e talia ai e Kerisiano manatu eseese i mataupu e fitoitonu i le tagata lava ia?

²² Peitaʻi, e iai se isi manatu tāua lava a o saʻili mea e lelei ai isi. O se Kerisiano e maʻaleʻale lona lotofuatiaifo, e lē tatau ona maumauaʻi e faapea e ao ona lolo mai tagata uma o le faapotopotoga Kerisiano i ona manatu faasāsā naʻuā e faatatau i faafiafiaga. Afai e na te faia faapea, e pei o ia o se avetaavale i le auala tele o loo maumauaʻi ia tutusa uma le saoasaoa o isi taavale e pei o le saoasaoa o loo manaʻo i ai o ia. E lē fetaui lona manaʻo. Ona o le alofa faa-Kerisiano, e tatau i lē e ilitatagofie lona lotofuatiaifo ona faaaloalo i uso talitonu o ē e ese o latou manatu i faafiafiaga, ae e lē o sopotapulaa i mataupu silisili faa-Kerisiano. O le faia faapea, o le a ʻiloa ai e tagata uma lona magafagafa.’​—Filipi 4:5; Failauga 7:16.

23. E faapefea ona e faamautinoa e mamā faafiafiaga e te filifilia?

²³ E faapefea ona e faamautinoa e mamā faafiafiaga e te filifilia? Ia teena so o se faafiafiaga lava e faaalia ai amioga matagā ma le lē mamā, lea ua taʻusalaina ma le manino e le Afioga a le Atua. Ia mulimuli i mataupu silisili o le Tusi Paia e faatatau i faafiafiaga e lē o taʻua maʻoti mai i le Tusi Paia. Ia teena faafiafiaga e ōia ai lou lotofuatiaifo, ma ia lotomalie e tuu faafiafiaga e ilitata ai isi, aemaise lava o uso talitonu. Tau ina ia faamamaluina le Atua i lau filifiliga maumauaʻi, ma faatumauina ai oe ma lou aiga i lona alofa.