NDIMA YA 6
Nḓila Ya U Khetha U Ḓimvumvusa Havhuḓi
“Zwoṱhe ni ite luné Mudzimu a ḓo rendwa ngalwo’.”—1 VHA-KORINTA 10:31.
1, 2. Ndi phetho ifhio ine ra fanela u i ita malugana na u ḓimvumvusa?
KHA ri ri ni khou ṱoḓa u ḽa mutshelo u ḓifhaho vhukuma, fhedzi na ṱhogomela uri wo sina nga thungo. Ni ḓo ita mini? Ni nga kha ḓi ḽa wonoyo mutshelo woṱhe, u katela na henefho ho sinaho; ni nga u laṱa woṱhe; kana ni nga tshea henefho ho sinaho nahone na ḽa tshipiḓa tshi songo sinaho. Ni ḓo ita mini?
2 U ḓimvumvusa hu fana na wonoyo mutshelo nga lwa pfanyisedzo. Nga zwiṅwe zwifhinga ni ṱoḓa u ḓimvumvusa hu takadzaho, fhedzi ni ṱhogomela uri u ḓimvumvusa hune ha vha hone ṋamusi a ho ngo kuna nahone hu ṱuṱuwedza matshilele mavhi. Nga zwenezwo, ni ḓo ita mini? Vhaṅwe vha nga kha ḓi ṱanganedza vhuḓimvumvusi huvhi nahone vha ḓidzingadza nga zwiṅwe na zwiṅwe zwine zwa vha hone kha ḽeneḽi shango. Vhaṅwe vha nga iledza u ḓimvumvusa hoṱhe, u itela uri vha si ḓitshikafhadze na luthihi. Nahone vhaṅwe vha nga iledza nga vhulondi vhuḓimvumvusi vhu re na khombo, fhedzi nga zwiṅwe zwifhinga vha ṱanganela kha vhuḓimvumvusi havhuḓi. Ni nga ita phetho ifhio u itela uri ni ḓivhulungele lufunoni lwa Mudzimu?
3. Ndi mini zwine ra ḓo zwi haseledza zwino?
3 Vhunzhi hashu ro vha ri tshi ḓo khetha phetho ya vhuraru. Ri a ṱoḓa u ḓimvumvusa, fhedzi ri ṱoḓa u ḓiphina nga vhuḓimvumvusi ho kunaho. Ngauralo, ri fanela u ṱhogomela nḓila ine ra nga ṱalula ngayo vhuḓimvumvusi havhuḓi na vhu re na khombo. Naho zwo ralo, kha ri thome ri haseledze nḓila ine vhuḓimvumvusi vhune ra vhu khetha ha nga kwama ngayo nḓila ine ra gwadamela ngayo Yehova.
“ZWOṰHE NI ITE LUNÉ MUDZIMU A ḒO RENDWA NGALWO”
4. U ḓiṋekedza hashu hu fanela u kwama hani u ḓimvumvusa hune ra hu khetha?
4 Tshifhingani tsho fhiraho, muṅwe mukalaha wa Ṱhanzi o lovhedzwaho nga 1946 o ri: “Ndo vha ndi tshi ita vhungoho ha uri misi yoṱhe ndi vha hone kha nyambo iṅwe na iṅwe ya ndovhedzo na u thetshelesa nga vhuronwane, zwi tshi tou nga ndi ya ndovhedzo yanga.” Ndi ngani? O ri, “U dzula ndi tshi humbula nga ha u ḓiṋekedza hanga zwo nthusa uri ndi dzule ndi tshi fulufhedzea.” A zwi timatimisi uri ni ḓo tendelana na zwe a zwi amba. U dzula ni tshi ḓihumbudza uri no fulufhedzisa Yehova uri ni ḓo mu shumela vhutshilo haṋu hoṱhe, zwi ḓo ni ṱuṱuwedza uri ni konḓelele. (Muhuweleli 5:3; Vha-Heberu 10:7) Zwi re zwone ndi uri u dzula ni tshi elekanya nga ha u ḓiṋekedzela haṋu a zwi nga ḓo kwama nḓila ine na dzhia ngayo vhuḓinḓa ha Vhukriste fhedzi, fhedzi zwi ḓo kwama na masia oṱhe a vhutshilo—u katela na u ḓimvumvusa. Muapostola Paulo o ombedzela yeneyo mbuno musi a tshi ṅwalela Vhakriste vha misini yawe uri: “Ni tshi ḽa kana ni tshi nwa, na tshini tshiné na ita, zwoṱhe ni ite luné Mudzimu a ḓo rendwa ngalwo’.” (Maḽeḓeretsendama ndi ashu.)—1 Vha-Korinta 10:31.
5. Levitiko 22:18-20 i ri thusa hani u vhona tsevho i songo livhaho i re kha Vha-Roma 12:1?
5 Zwithu zwoṱhe zwine na zwi ita vhutshiloni zwi tshimbidzana na nḓila ine na gwadamela ngayo Yehova. Kha vhurifhi hawe he a vhu ṅwalela Vharoma, Paulo o ombedzela yeneyi mbuno kha vhatendi ngae. O vha khadeledza a ri: “Kumedzani mivhili yaṋu i vhe tshidzimu tshi tshilaho, tshikhethwa, tshi takadzaho Mudzimu. Ndi kwone kushumele kwa u shumela Mudzimu kwo ni fanelaho.” (Vha-Roma 12:1) Muvhili waṋu u katela muhumbulo waṋu, mbilu yaṋu na nungo dzaṋu. Zwenezwi zwoṱhe ni zwi shumisela u shumela Mudzimu. (Marko 12:30) Paulo u amba uri tshumelo ine ra i ita nga muya-tshivhili woṱhe ndi tshidzimu. Ḽeneḽo ipfi ḽi ṋea tsevho i songo livhaho. Nga fhasi ha Mulayo wa Mushe, Mudzimu o vha a sa tshi ṱanganedzi tshidzimu tshe tsha vha tshi songo kuna. (Levitiko 22:18-20) Nga hu fanaho, arali tshumelo ya Mukriste i songo kuna, Mudzimu a nga si ḓo i ṱanganedza. Zwenezwo zwi nga itea hani?
6, 7. Mukriste a nga tshikafhadza hani muvhili wawe nahone hu nga vha na mvelelo dzifhio?
6 Paulo o khadeledza Vhakriste vha ngei Roma a ri: “Ni songo kumedza miraḓo yaṋu kha vhuvhi.” Paulo o dovha a vha vhudza uri vha “vhulah[e] mishumo ya muvhili.” (Vha-Roma 6:12-14; 8:13) U thomani kha vhurifhi hawe, o ṋea dziṅwe tsumbo dza “mishumo ya muvhili” yo raloho. Malugana na vhathu vha re na tshivhi, ri a vhala: “Haṋwani havho ho ḓala maṱamba.” “Milenzhe yavho i gidimela u yo shulula malofha.” “U ofha Mudzimu a zwiho’ kha vhone.” (Vha-Roma 3:13-18, maḽeḓeretsendama oṱhe ndi ashu.) Mukriste u ḓo tshikafhadza muvhili wawe arali a shumisa “miraḓo” yawe u itela u ita vhuvhi. Sa tsumbo, arali ṋamusi Mukriste a tshi ṱalela nga khole zwifanyiso zwi nengisaho zwa vhathu vha songo ambaraho kana filimu dza vhuvemu vhu re na tshiṱuhu, u vha a tshi khou “kumedza [maṱo awe] kha vhuvhi” nahone u tshikafhadza muvhili wawe woṱhe. Tshiṅwe na tshiṅwe tshine a tshi ita vhurabelini a tshi nga ḓo vha tshiṱhavhelo tshikhethwa nahone a tshi nga ṱanganedzwi nga Mudzimu. (Doiteronomio 15:21; 1 Petro 1:14-16; 2 Petro 3:11) Ndi mvelelo mmbi lungafhani dzine a ḓo sedzana nadzo arali a khetha vhuḓimvumvusi vhu songo kunaho!
7 Vhukuma, u ḓimvumvusa hune Mukriste a hu khetha hu nga vha na dziṅwe mvelelo. Ngauralo, ri fanela u khetha vhuḓimvumvusi vhune ha sa ḓo tshikafhadza tshiṱhavhelo tshashu kha Mudzimu. Zwino kha ri haseledze nḓila ine ra nga vhona ngayo u ḓimvumvusa havhuḓi na hu si havhuḓi.
“NENGWANI VHUVHI”
8, 9. (a) U ḓimvumvusa hu nga khethekanywa nga zwipiḓa zwifhio zwivhili? (b) Ndi mifuda ifhio ya u ḓimvumvusa ine ra i iledza nahone ndi ngani?
8 Nga u tou angaredza, u ḓimvumvusa hu nga khethekanywa nga zwipiḓa zwivhili. Huṅwe hu katela u ḓimvumvusa hune Vhakriste vha fanela u hu iledza tshoṱhe; huṅwe ndi u ḓimvumvusa hune Vhakriste vha wana hu tshi ṱanganedzea kana hu sa ṱanganedzei. Kha ri thome nga u haseledza tshipiḓa tsha u thoma—u ḓimvumvusa hune Vhakriste vha fanela u hu iledza.
9 Samusi ro zwi vhona kha Ndima ya 1, huṅwe u ḓimvumvusa hu katela zwithu zwine zwa tou vha khagala uri Bivhili i a zwi sasaladza. Sa tsumbo, edzani u humbula nga dzi-Web site khathihi na dzifilimu, mbekanyamushumo dza thelevishini na muzika u re na maipfi ane a ṱuṱuwedza tshiṱuhu kana u re na vhudimoni kana une wa ṱuṱuwedza vhuḓabaḓaba kana matshilele a vhuaḓa. Vhakriste vha ngoho vha fanela u iledza yeneyo mifuda ya u ḓimvumvusa ngauri i ita uri mishumo ine ya lwisana na maitele a Bivhili kana ine ya sa tendelane na milayo ya Bivhili, i vhonale i tshi nga i a ṱanganedzea. (Mishumo 15:28, 29; 1 Vha-Korinta 6:9, 10; Ndzumbululo 21:8) Arali na iledza honohu u ḓimvumvusa, ni sumbedza Yehova uri ngangoho ni a ‘ṋengwa vhuvhi’ nahone ni dzula ni tshi “hana vhuvhi.” Nga yeneyo nḓila, ni na “lutendo lu sóngo tou ṱumetshedzwaho.”—Vha-Roma 12:9; Psalme ya 34:14; 1 Timotheo 1:5.
10. Ndi mahumbulele afhio a re na khombo nga ha u ḓimvumvusa nahone ndi ngani?
10 Naho zwo ralo, vhaṅwe vha nga vhona u nga u ṱalela vhuḓimvumvusi vhune ha sumbedza u ḓifara luvhi a zwi na khombo. Vha nga kha ḓi ri, ‘Ndi nga zwi ṱalela kha dzifilimu kana kha thelevishini, fhedzi ndi nga si vhuye nda ita zwenezwo zwithu.’ U humbula nga yeneyo nḓila ndi u ḓifhura nahone zwi na khombo. (Yeremia 17:9) Arali ri tshi ḓimvumvusa nga zwithu zwine Yehova a zwi sasaladza, naa zwa vhukuma ri ḓo vha ri tshi khou ‘ṋengwa vhuvhi’? Ri ḓo kwangwala arali ri tshi dzulela u ṱalela, u vhala kana u thetshelesa zwithu zwivhi. (Psalme ya 119:70; 1 Timotheo 4:1, 2) Nḓowelo yo raloho i nga kwama nḓila ine ra ita ngayo zwithu kana nḓila ine ra dzhia ngayo vhuḓifari vhuvhi ha vhaṅwe.
11. Maipfi a re kha Vha-Galata 6:7 o ḓadzea hani malugana na u ḓimvumvusa?
11 Zwenezwi zwo no itea zwa vhukuma. Vhaṅwe Vhakriste vho ḓifara luvhi nge vha ṱuṱuwedzwa nga zwithu zwe vha vha vha tshi dzulela u zwi ṱalela. Vho guda nga nḓila i vhavhaho uri “tshiné muthu a zwala, u ḓo tshi kaṋa.” (Vha-Galata 6:7) Fhedzi mvelelo dzenedzo dzi vhavhaho dzi nga iledzwa. Arali na ḓidina na dzhenisa zwithu zwo kunaho muhumbuloni waṋu ni ḓo tshila vhutshilo havhuḓi, vhu takadzaho.—Sedzani bogisi “Ndi U Ḓimvumvusa Hufhio Hune Nda Fanela U Hu Khetha?” kha siaṱari 67.
PHETHO DZA MUTHU NGA EṰHE DZO THEWAHO KHA MAITELE A BIVHILI
12. Vha-Galata 6:5 i shuma hani kha mafhungo a u ḓimvumvusa nahone ndi vhulivhisi vhufhio vhune ra vha naho musi ri tshi ita phetho?
12 Zwino kha ri haseledze tshipiḓa tsha vhuvhili—u ḓimvumvusa hune Ipfi ḽa Mudzimu ḽa sa ambe nga ho livhaho uri hu a ṱanganedzea kana a hu ṱanganedzei. Musi Mukriste a tshi khetha u ḓimvumvusa ho raloho, u fanela u ḓiitela phetho kha zwine a vhona zwo kuna. (Vha-Galata 6:5) Naho zwo ralo, musi ri tshi khou ita yeneyi phetho, hu na vhulivhisi vhune ra nga vhu tevhela. Bivhili i na maitele kana pfunzo dzine dza nga ri livhisa, dzine dza ita uri ri kone u pfesesa mahumbulele a Yehova. Arali ra tevhela maitele o raloho, ri ḓo kona u ṱhogomela “zwiné Yehova a funa zwone,” kha zwithu zwoṱhe, u katela na kha u ḓimvumvusa hune ra hu khetha.—Vha-Efesa 5:17, vhambedzani NW.
13. Ndi mini zwine zwa ḓo ri sudzulusela u iledza u ḓimvumvusa hune ha nga sinyusa Yehova?
13 Zwi a pfala uri a si Vhakriste vhoṱhe vha re na vhukoni ha u ṱavhanyedza vha pfesesa zwithu nga nḓila i fanaho. (Vha-Filipi 1:9) Zwiṅwe hafhu, Vhakriste vha a ṱhogomela uri vhathu vha funa zwithu zwo fhamba-fhambanaho musi zwi tshi ḓa kha u ḓimvumvusa. Nga zwenezwo, a ro ngo fanela u lavhelela uri Vhakriste vhoṱhe vha ḓo ita phetho ine ya fana. Naho zwo ralo, musi ri tshi tendela maitele a Mudzimu a tshi ṱuṱuwedza muhumbulo na mbilu dzashu, ri ḓo kona u iledza mufuda naho u ufhio wa u ḓimvumvusa hune ha nga sinyusa Yehova.—Psalme ya 119:11, 129; 1 Petro 2:16.
14. (a) Ndi mbuno ifhio ine ra fanela u i ṱhogomela musi ri tshi khetha u ḓimvumvusa? (b) Ri nga ita mini u itela uri madzangalelo a Muvhuso a dzule e a u thoma vhutshiloni hashu?
14 Musi ni tshi khetha u ḓimvumvusa, hu na iṅwe mbuno ine na fanela u i ṱhogomela: tshifhinga tshaṋu. U ḓimvumvusa hune na hu khetha hu dzumbulula zwine na wana zwi tshi ṱanganedzea, tshifhinga tshine na tshi fhedza kha honoho u ḓimvumvusa tshi dzumbulula zwine na zwi dzhia zwi zwa ndeme. Vhukuma, kha Vhakriste zwithu zwa muya ndi zwone zwa ndeme vhukuma. (Mateo 6:33) Ngauralo-ha, ni nga ita mini u itela uri madzangalelo a Muvhuso a dzule e a u thoma vhutshiloni haṋu? Muapostola Paulo o ri: “Sedzani-ha kutshimbilele kwaṋu, ni toolole; ni songo nga matsilu, ni nge vhaṱali. Ni bindulise tshifhinga tshi iteaho.” (Vha-Efesa 5:15, 16) Vhukuma, u vhetshela thungo tshifhinga tsha u ḓimvumvusa zwi ḓo ni thusa uri ni vhe na tshifhinga tshine tsha ṱoḓea tsha “zwithu zwa ndeme”—zwithu zwine zwa ḓo ni vhuyedza siani ḽa muya.—Vha-Filipi 1:10, NW.
15. Ndi ngani zwi vhuṱali u khetha u ḓimvumvusa hune ha sa vhe na tshithu tshine tsha ḓo ri dzhenisa khomboni?
15 Zwiṅwe hafhu ndi zwa vhuṱali u khetha u ḓimvumvusa hune ha sa vhe na tshithu tshine tsha ḓo ri dzhenisa khomboni. Zwenezwo zwi amba mini? Kha ri dovhe ri ambe nga iḽa tsumbo ya mutshelo. U itela uri ni songo ḽa fhethu ho sinaho, a ni nga ḓo tshea fhethu ho sinaho fhedzi, fhedzi ni ḓo tshea u mona na henefho fhethu ho sinaho. Nga hu fanaho, zwi ḓo sumbedza vhuṱali u khetha u ḓimvumvusa hune ha sa ḓo ni dzhenisa khomboni. Mukriste o ṱalifhaho ha iledzi u ḓimvumvusa hune ha sa tendelane na maitele a Bivhili fhedzi, fhedzi u iledza na u ḓimvumvusa hu soliseaho kana hune ha nga tshinya vhushaka hawe na Yehova. (Mirero 4:25-27) U tevhela yeneyi nyeletshedzo i re Ipfini ḽa Mudzimu zwi ḓo ni thusa uri ni iledze u ḓimvumvusa hu songo kunaho.
“ZWO ṰAMBAHO”
U shumisa maitele a Mudzimu musi ri tshi khetha u ḓimvumvusa zwi a ri tsireledza uri ri sa tshinye vhumuya hashu
16. (a) Ri nga zwi sumbedza hani uri ri na mavhonele a Yehova kha sia ḽa matshilele? (b) U shumisa maitele a Bivhili zwi nga vha hani matshilele aṋu?
16 Musi Vhakriste vha ngoho vha tshi khetha u ḓimvumvusa, vha thoma vha ṱolisisa arali honoho u ḓimvumvusa hu tshi ṱanganedzwa nga Yehova. Bivhili i dzumbulula maḓipfele na zwilinganyo zwa Yehova. Sa tsumbo, Khosi Salomo o bula zwithu zwo vhalaho zwine Yehova a zwi vhenga, zwi nga ho “lulimi lwa mazwifhi, zwanḓa zwe zwa shulula malofha a muvhuya, mbilu ya u elekanya zwivhi, milenzhe ya u gidimela vhuvhi.” (Mirero 6:16-19) Mavhonele a Yehova a fanela u kwama hani aṋu? Mupsalme o khadeledza uri: ‘Vha funaho Yehova, hanani [“vhengani,” NW] vhuvhi.’ (Psalme ya 97:10) Nḓila ine na khetha ngayo u ḓimvumvusa i fanela u sumbedza uri ngangoho ni a hana kana ni vhenga zwine Yehova a zwi vhenga. (Vha-Galata 5:19-21) Ni songo hangwa uri zwine na zwi ita tshiphirini ndi zwone zwine zwa dzumbulula tshoṱhe zwine na vha zwone, u fhira zwine na zwi ita khagala. (Psalme ya 11:4; 16:8) Nga zwenezwo, arali ni tshi tama nga mbilu yoṱhe u ḓifara nga nḓila ine ya takadza Yehova kha masia oṱhe a vhutshilo haṋu, ni ḓo dzula ni tshi ita phetho dzine dza tshimbidzana na maitele a Bivhili. U ita nga u ralo zwi ḓo vha matshilele aṋu.—2 Vha-Korinta 3:18.
17. Ri sa athu khetha u ḓimvumvusa, ndi mbudziso dzifhio dzine ra fanela u ḓivhudzisa dzone?
17 Ndi zwifhio zwiṅwe zwine na nga zwi ita u itela u khwaṱhisedza uri ni ita zwithu zwi tshimbidzanaho na mavhonele a Yehova musi ni tshi khetha u ḓimvumvusa? Ḓivhudziseni mbudziso ine ya ri, ‘Naa izwi zwi ḓo nkwama hani khathihi na vhushaka hanga na Mudzimu?’ Sa tsumbo, ni sa athu ṱalela filimu, ḓivhudziseni uri, ‘Zwine zwa vha kha yeneyi filimu zwi ḓo kwama hani luvalo lwanga?’ Kha ri ṱolisise maitele ane a nga ri livhisa kha enea mafhungo.
18, 19. (a) Maitele a re kha Vha-Filipi 4:8 a nga ri thusa hani uri ri vhone arali u ḓimvumvusa hashu hu havhuḓi? (b) Ndi afhio maṅwe maitele ane a nga ni thusa uri ni khethe u ḓimvumvusa havhuḓi? (Sedzani ṱhaluso i re magumoni a siaṱari.)
18 Maitele a ndeme a wanala kha Vha-Filipi 4:8 ine ya ri: “Zwi re mafhungo-ngoho, na zwa vhugala, na zwa u luga, na zwo ṱambaho, na zwi tamisaho, na zwa phungo mbuya, na zwi re vhuvhuya, kana zwi khoḓwaho, elekanyani zwenezwo!” (Maḽeḓeretsendama ndi ashu.) Ndi ngoho uri Paulo o vha a sa khou haseledza nga ha u ḓimvumvusa, fhedzi o vha a tshi khou amba uri mbilu dzashu dzi fanela u dzula dzi tshi elekanya zwithu zwine zwa takadza Mudzimu. (Psalme ya 19:14) Naho zwo ralo, maipfi a Paulo a nga shumiswa kha mafhungo a u ḓimvumvusa. Nga nḓila-ḓe?
19 Ḓivhudziseni, ‘Naa dzifilimu, mitambo ya vidio, muzika kana u ḓimvumvusa naho hu hufhio hune nda hu khetha, zwi ḓadza muhumbulo wanga nga zwithu “zwo ṱambaho”?’ Sa tsumbo, nga murahu ha u ṱalela filimu, ndi zwifanyiso zwifhio zwine zwa sala muhumbuloni waṋu? Arali zwi zwavhuḓi, zwo kuna nahone zwi tshi homolosa, zwi amba uri u ḓimvumvusa haṋu ho vha hu havhuḓi. Fhedzi arali filimu ye na i ṱalela ya ita uri ni humbule nga ha zwithu zwi songo ṱambaho, zwi amba uri u ḓimvumvusa haṋu ho vha hu songo kuna nahone hu na khombo. (Mateo 12:33; Marko 7:20-23) Ndi ngani? Ngauri u humbula nga ha zwithu zwi songo kunaho zwi thithisa mulalo waṋu wa ngelelo, zwi huvhadza luvalo lwaṋu lwo gudiswaho nga Bivhili nahone zwi nga tshinya vhushaka haṋu na Mudzimu. (Vha-Efesa 5:5; 1 Timotheo 1:5, 19) Samusi honohu u ḓimvumvusa hu tshi nga ni huvhadza ni fanela uri ni ḓiimisele u hu iledza. * (Vha-Roma 12:2) Itani phetho ine ya fana na ya mupsalme we a rabela Yehova a ri: “Funza maṱo anga u tata zwivhi, U nkhanyise kha nḓila yau.”—Psalme ya 119:37.
HUMBULELANI VHAṄWE
20, 21. Vha-Korinta ya U Thoma 10:23, 24 i shuma hani kha u khetha u ḓimvumvusa havhuḓi?
20 Paulo o bula maitele a ndeme a Bivhili ane a nga ri livhisa musi ri tshi ḓiitela phetho kha mafhungo a muthu nga eṱhe. O ri: “Zwoṱhe zwo tendiwa, zwi ro sá lamulela zwoṱhe, zwoṱhe zwo tendiwa, zwi ro sá fhaṱisa zwoṱhe. Hu so ngo vha na ané a ḓi-ṱoḓela zwawe ene muṋe, muthu nga a vhavhalele muṅwe.” (1 Vha-Korinta 10:23, 24) Enea maitele a shuma hani kha u khetha u ḓimvumvusa havhuḓi? Ni fanela u ḓivhudzisa uri, ‘U ḓimvumvusa hune nda hu khetha hu ḓo kwama hani vhaṅwe?’
21 Luvalo lwaṋu lu nga ni tendela uri ni ṱanganele kha huṅwe u ḓimvumvusa hune na hu dzhia hu tshi “tendiwa,” kana hu tshi ṱanganedzea. Naho zwo ralo, arali na ṱhogomela uri mvalo dza vhaṅwe vhatendi a dzi vha tendeli uri vha ṱanganele kha honoho u ḓimvumvusa, ni nga phetha u hu iledza. Ndi ngani? Ngauri a ni ṱoḓi ‘u itela vhahaṋu tshivhi’—kana u “ita vhuvhi kha Kristo,” samusi Paulo o amba—nga u konḓisela vhatendi nga inwi uri vha dzule vha tshi fulufhedzea kha Mudzimu. Ni tevhela nyeletshedzo ine ya ri: “Ni songo vha zwikhukhuliso.” (1 Vha-Korinta 8:12; 10:32; Vha-Roma 14:1; 15:1) Vhakriste vha ngoho ṋamusi vha tevhela nyeletshedzo ya Paulo ine ya sumbedza u humbulela na u pfesesa, nga u iledza u ḓimvumvusa hune ha nga kha ḓi “tendiwa,” fhedzi hu sa ‘fhaṱi.’—Vha-Roma 14:1; 15:1.
22. Ndi ngani Vhakriste vha songo fanela u kombetshedza uri vhaṅwe vha ite zwithu u fana navho kha mafhungo a muthu nga eṱhe?
22 Naho zwo ralo, u humbulela vhaṅwe zwi katela na zwiṅwe zwithu. Mukriste ane luvalo lwa mu thivhela u ṱanganela kha huṅwe u ḓimvumvusa ho ngo fanela u kombetshedza vhoṱhe tshivhidzoni tsha Vhukriste uri vha vhe na mavhonele a fanaho na awe, musi zwi tshi ḓa kha u ḓimvumvusa ho kunaho. Arali a ita nga u ralo, u ḓo fana na mureili badani khulwane ane a kombetshedza uri vhareili vhoṱhe vha reile nga luvhilo lune ene a khou reila ngalwo. U kombetshedza uri hu itwe zwenezwo a si u humbulela. A tshi itiswa nga lufuno lwa Vhukriste, muthu ane luvalo lwawe lwa mu thivhela u ita zwiṅwe zwithu, u fanela u ṱhonifha vhatendi ngae vha re na mavhonele o fhambanaho na awe kha sia ḽa u ḓimvumvusa hu sa lwisani na maitele a Vhukriste. Nga u ita zwenezwo, u ita uri “vhulenda ha[we] vhu ḓihwe nga vhathu vhoṱhe.”—Vha-Filipi 4:5; Muhuweleli 7:16.
23. Ni nga ita hani vhungoho ha uri ni khetha u ḓimvumvusa havhuḓi?
23 Ri tshi tou nweledza, ni nga ita hani vhungoho ha uri u ḓimvumvusa hune na hu khetha ho kuna? Iledzani mufuda naho u ufhio wa u ḓimvumvusa hune ha sumbedza nga ho livhaho vhuaḓa vhu shonisaho, u ḓifara luvhi hune ha sasaladzwa nga ho livhaho Ipfini ḽa Mudzimu. Tevhelani maitele a Bivhili ane a nga shumiswa kha u ḓimvumvusa naho hu hufhio hu songo bulwaho nga ho livhaho Bivhilini. Iledzani u ḓimvumvusa hune ha tshinya luvalo lwaṋu nahone ni ḓiimisele u litsha u ḓimvumvusa naho hu hufhio hune ha nga sinyusa vhaṅwe, zwihuluhulu vhatendi nga inwi. U nga ri u ḓiimisela haṋu u ita phetho yo khwaṱhaho zwi nga ḓisela Mudzimu vhugala nahone zwa ita uri inwi na vha muṱa waṋu ni ḓivhulungele lufunoni lwa Mudzimu.
^ phar. 19 Maṅwe maitele a shumaho malugana na u ḓimvumvusa a wanala kha Mirero 3:31; 13:20; Vha-Efesa 5:3, 4; na Vha-Kolosa 3:5, 8, 20.
You May Also Like
TSHIINGAMO—TSHI GUDWAHO
Ṱhogomelani Zwine Mbilu Ya Elekanya Zwone
Nga zwiṅwe zwifhinga mbilu dzashu dzi nga ita uri ri vhuyafhedze ḽiṅwe buḓo ḽo khakheaho. Ndi mini zwine zwa nga ri thusa uri ri ḓivhe zwine mbilu dzashu dza vha zwone?
