1-3. (a) ?From wanem wan mama i meksua se pikinini blong hem i klin mo klos blong hem i stret? (b) ?From wanem Jeova i wantem we ol man blong hem oli mas klin, mo wanem i pulum yumi blong wantem stap klin?

WAN mama i stap rerem smol boe blong hem blong i go long skul. Hem i meksua se pikinini ya i swim mo se ol klos blong hem oli stret mo oli klin. Mama ya i save se sipos hem i no wantem we pikinini blong hem i sik, i impoten tumas we hem i stap klin. Mo tu, sipos pikinini ya i doti mo ol klos blong hem oli olbaot, bambae ol man oli tingting nogud long papa mama blong hem.

² Jeova, we i Papa blong yumi long heven, i wantem we ol man blong hem oli klin. Tok blong hem i talem se: “Man we i stap klin, bambae yu soemaot long hem se ol fasin blong yu oli klin.” * (Ol Sam 18:26, NW) Jeova i lavem yumi. Hem i save se fasin blong stap klin, i save mekem i gud long yumi. Mo tu, hem i wantem  we ol Witnes blong hem oli soemaot ol fasin we i pulum narafala blong tingting gud long hem. Tru ya, fasin blong yumi blong stap klin mo ol gudfala fasin blong yumi, oli leftemap Jeova mo nem blong hem we i tabu. Bambae oli no sakem doti long nem ya.—Esikel 36:22; 1 Pita 2:12.

³ Taem yumi save se God i lavem man we i klin, samting ya i save pulum yumi blong traehad blong stap klin. From we yumi lavem hem, yumi wantem we fasin blong laef blong yumi i givim ona long hem. Mo tu, yumi wantem we hem i lavem yumi oltaem. Taswe i gud yumi faenem ansa long ol kwestin ya se, ?From wanem yumi mas stap klin? ?Fasin klin i minim wanem? ?Mo olsem wanem blong stap klin? Taem yumi faenem ansa long ol kwestin ya, bambae yumi luksave sipos i gat sam samting we yumi nidim blong wok long hem blong kamgud moa.

4, 5. (a) ?Wanem bigfala risen from wanem yumi mas stap klin? (b) ?Olsem wanem ol samting we Jeova i wokem oli soemaot we hem i laekem samting we i klin?

⁴ Wan rod we Jeova i yusum blong lidim yumi, hemia taem hem i soemaot eksampol blong yumi folem. Tok blong hem i talem se i gud yumi “traehad blong folem fasin blong hem.” (Efesas 5:1) Faswan bigfala risen from wanem yumi mas stap klin, hemia, se Jeova, God ya we yumi wosipim, hem i tabu, hem i klin olgeta.—Levitikas 11:44, 45.

⁵ Ol samting we Jeova i wokem oli soemaot se hem i wan God we i klin, olsem we oli soemaot ol narafala gudfala fasin blong hem tu. (Rom 1:20) God i wokem wol ya blong i wan klin ples we man i save laef long hem. Jeova i wokem sam samting long wol ya we oli save klinimaot doti we i stap long win mo wota. Sam smosmol bebet oli wok olsem klina, we oli kakae ol doti mo tanem doti ya i kam wan gudfala samting. Tru ya, ol samting ya oli soemaot se long lukluk blong God we i “mekem wol,” fasin klin i wan impoten samting tumas. (Jeremaea 10:12) Yumi tu yumi mas tingbaot samting ya se hem i impoten tumas.

6, 7. ?Olsem wanem Loa blong Moses i makemgud se man we i wosipim Jeova i mas klin?

⁶ Wan narafala risen from wanem yumi mas stap klin hemia  from we Jeova, Haefala King blong heven mo wol, i wantem se ol man blong hem oli stap klin. Long Loa we Jeova i givim long Isrel, man i mas klin taem hem i mekem wosip. Loa i talem se long Dei blong Tekemaot Sin, hae pris i mas swim tu taem. (Levitikas 16:4, 23, 24) Taem wan pris i mekem wok long haos blong God, hem i mas wasem ol han mo leg blong hem bifo we hem i save mekem ol sakrefaes i go long Jeova. (Eksodas 30:17-21; 2 Kronikel 4:6) Loa i tokbaot 70 defren kaen samting we oli mekem bodi blong man i doti mo wanem we man i mas mekem blong kam klin bakegen. Taem wan man Isrel i doti, hem i no save mekem wosip. I gat sam fasin blong wosip we sipos man i mekem taem hem i doti, hem i mas ded from. (Levitikas 15:31) Eni man we i no wantem folem rod we i stap blong mekem hem i kam klin, olsem maet hem i no wantem wasem bodi blong hem mo ol klos blong hem, Jeova i talem se “mi mi no moa save kaontem hem se i man blong mi.”—Namba 19:17-20.

⁷ Nating se yumi no stap aninit long Loa blong Moses, Loa ya i halpem yumi blong save tingting we God i gat long saed blong plante samting. Long Loa ya, yumi luksave klia nomo se ol man we oli wosipim God, oli mas stap klin. Jeova i no jenis. (Malakae 3:6) Hem i save agri long wosip blong yumi sipos wosip blong yumi i “klin gud mo i stret gud.” (Jemes 1:27) Taswe yumi mas save wanem we God i wantem yumi blong mekem long saed ya.

8. ?Jeova i wantem yumi blong stap klin long saed blong wanem fo samting?

⁸ Taem Baebol i tokbaot fasin klin hem i no minim nomo se man i swim mo i klin long bodi. Fasin klin long fes blong God hem i long saed blong evri haf blong laef blong yumi. Jeova i wantem we yumi klin long fo impoten samting: long wosip, long ol fasin blong laef, long tingting, mo long bodi blong yumi. Bambae yumi tokbaot wanwan long ol fofala samting ya.

9, 10. ?Wosip we i klin i minim wanem, mo ol trufala Kristin oli lukaotgud blong no joen long wanem?

⁹ Klin long wosip. Blong talem stret, wosip we i klin i min se man i no miksimap giaman wosip wetem tru wosip. Taem ol man Isrel oli aot long Babilon blong gobak long Jerusalem, oli mas folem  tok ya we God i talem long olgeta se: “Yufala i no mas tajem ol samting we i doti . . . yufala i mas mekem we yufala i klin.” (Aesea 52:11) Bigfala risen from wanem ol man Isrel oli stap gohom, hemia blong stanemap trufala wosip bakegen. Wosip ya i mas klin. I no mas gat wan tijing, wan fasin, mo wan kastom blong skul blong Babilon we i miks i go long hem, from we hemia bambae i no givim ona long God, mo bambae i mekem wosip blong olgeta i doti.

¹⁰ Tede, yumi ol trufala Kristin, yumi mas lukaotgud se i no gat giaman wosip i kam spolem wosip blong yumi. (1 Korin 10:21) Yumi mas lukaotgud long saed ya from we ol tijing mo kastom blong giaman skul oli stap long evri ples. I gat plante kastom, wok, mo seremoni we oli joen wetem ol bilif blong giaman skul, olsem bilif ya se taem man i ded i gat wan spirit no devel blong hem we i go laef samples. (Prija 9:5, 6, 10) Ol trufala Kristin oli mas stap longwe long ol kastom we oli stanap long bilif blong giaman skul. * Yumi no mas letem ol man oli fosem yumi blong lego ol rul blong Baebol long saed blong wosip we i klin.—Ol Wok 5:29.

11. ?Man we fasin blong hem i klin hem i mekem wanem, mo from wanem i impoten blong stap klin long saed ya?

¹¹ Klin long ol fasin blong laef. Man we i klin long ol fasin blong laef blong hem, hem i mas stap longwe long olkaen nogud fasin long saed blong seks. (Efesas 5:5) I impoten tumas we yumi gat ol fasin we oli klin oltaem. Long japta 9 blong buk ya, bambae yumi talem se sipos yumi wantem we God i lavem yumi olwe, yumi mas “ronwe long nogud fasin long saed blong seks.” Ol man we oli no wantem tanem tingting blong olgeta from sin ya, bambae oli “no save kasem kingdom blong God.” (1 Korin 6:9, 10, 18, NW) Long lukluk blong God, ol man olsem oli sem mak nomo long olgeta ya we hem i talem se oli “mekem ol fasin nogud we i krangke.” Sipos oli no traehad blong wokem ol fasin we oli klin, “ples blong ol man ya . . . hemia i seken ded.”—Revelesen 21:8.

12, 13. ?Olsem wanem ol tingting oli joen wetem aksen blong yumi, mo olsem wanem yumi save mekem we ol tingting blong yumi oli klin oltaem?

¹² Klin long tingting. Ol tingting blong man oli save pulum hem  blong mekem samting. Sipos yumi tingbaot wan samting we i nogud, nao yumi letem tingting ya i stap long maen mo hat blong yumi, i no longtaem, bambae yumi save mekem wan nogud fasin. (Matiu 5:28; 15:18-20) Be sipos yumi fulumap tingting blong yumi wetem ol samting we oli klin mo stret, samting ya i save pusum yumi blong gat ol fasin we oli klin mo stret. (Filipae 4:8) ?Olsem wanem yumi save gat ol tingting we oli klin oltaem? Wan samting we yumi save mekem, hemia blong no wajem mo lesin long eni samting we oli save mekem tingting blong yumi i kam doti. * Mo narafala samting we yumi save mekem, hemia blong ridim mo stadi oltaem long Tok blong God, blong yumi fulumap tingting blong yumi wetem ol samting we oli klin.—Ol Sam 19:8, 9.

¹³ Blong stap oltaem long laef ya we God i lavem yumi, i impoten tumas blong stap klin long wosip, ol fasin blong laef, mo tingting blong yumi. I gat sam narafala japta blong buk ya we oli tokbaot moa fasin klin olsem. Be naoia bambae yumi tokbaot namba fo poen, hemia we yumi mas stap klin long bodi.

14. ?From wanem fasin blong yumi blong stap klin long bodi hem i no bisnes blong yumi wan nomo?

¹⁴ Yumi mas klin long bodi, mo ples we yumi laef long hem tu i mas klin. ?Hemia wan samting we i bisnes blong yumi nomo, ol narafala oli no gat raet blong talem samting long yumi? Ol man blong Jeova oli no mas tingting olsem. Yumi talem finis se Jeova i wantem we ol man blong hem oli klin from we samting ya i save mekem i gud long olgeta, mo tu, samting ya i leftemap nem blong hem. Tingbaot pijatok ya we yumi tokbaot long stat. Sipos yu yu luk wan pikinini we i doti mo ol klos blong hem oli olbaot, ating bambae yu tingbaot papa mama blong pikinini ya se tufala i no stap lukaot gud long hem. Yumi no wantem we bodi blong yumi no fasin blong laef blong yumi i pulum ol man blong tok nogud long Papa blong yumi long heven, mo yumi no wantem tu we samting ya i blokem olgeta, blong oli no lesin long yumi  taem yumi prij long olgeta. Tok blong God i talem se: “Mifala i no wantem we sam man oli save faenem sam rabis poen long ol wok blong mifala. Nao mifala i stap traehad, blong mifala i no mekem sam fasin we narafala man bambae i save foldaon long hem. Long olgeta samting we mifala i mekem, mifala i stap soemaot we mifala i man blong wok blong God.” (2 Korin 6:3, 4) ?Ale olsem wanem yumi save stap klin long bodi?

15, 16. ?Wanem ol samting we man i mekem blong stap klin, mo ol klos blong yumi oli mas olsem wanem?

¹⁵ Mekem bodi mo klos blong yumi i klin. Kalja mo fasin blong laef blong ol man i defdefren folem kantri mo ples blong olgeta. Nating se i olsem, bighaf blong yumi, yumi naf blong gat smol sop mo wota blong swim evri dei, mo meksua se yumi wetem ol pikinini blong yumi, yumi klin. I gud blong lanem fasin blong wasem han oltaem wetem sop bifo we yumi kakae no bifo we yumi kuk. I gud blong mekem samting ya tu afta we yumi go long toelet, mo afta we yumi klinim no jenisim napkin blong bebi. Fasin  blong wasem han wetem sop i save blokem ol sik mo i save sevem laef blong yumi tu. Hem i save blokem ol nogud bebet mo jem we oli givim ol sik olsem sitsit wota. Long ol kantri we oli no wokem plante haos wetem flastoelet insaed, taem ol man oli gobus oli save digim hol mo berem bakegen, olsem ol man Isrel oli mekem bifo.—Dutronome 23:12, 13.

¹⁶ I gud tu sipos yumi wasem klos blong yumi oltaem blong oli stap klin mo oli luk naes. Wan Kristin i no nid blong pem ol klos we oli sas mo we oli folem laswan stael. Be oli mas stret, klin, mo oli no mas pulum ae blong man. (1 Timoti 2:9, 10) Nomata weples yumi stap long hem, yumi wantem we taem ol man oli lukluk yumi, oli “leftemap tok blong God ya we i sevem yumi.”—Taetas 2:10.

17. ?From wanem haos, yad, mo olting blong yumi oli mas klin mo stret?

¹⁷ Haos, yad, mo olting blong yumi. Haos blong yumi maet i no flas mo i no bigwan, be hem i mas klin mo stret olsem we yumi naf blong mekem. Sem mak tu sipos yumi gat wan trak we yumi yusum blong go long ol miting mo long wok blong prij, yumi mas traem bes blong yumi blong mekem we trak ya i klin, insaed mo afsaed blong hem. Yumi no mas fogetem se taem haos mo olting blong yumi oli klin, i olsem we yumi stap talemaot God blong yumi long ol man. Tru ya, yumi tijim ol man se Jeova i wan God we i klin, mo se bambae hem i “spolem ol man ya we oli stap spolem wol,” mo yumi talemaot se Kingdom blong hem bambae i mekem graon ya i kam wan paradaes blong yumi laef long hem. (Revelesen 11:18; Luk 23:43, NW) Taswe i gud tu sipos haos, yad, mo ol narafala samting blong yumi, oli klin blong soemaot long ol man se yumi lanem naoia blong stap klin, blong bambae yumi naf blong laef long niufala wol.

18. ?Olsem wanem yumi soemaot se yumi tinghae long Haos Kingdom blong yumi?

¹⁸ Haos wosip blong yumi. Sipos yumi lavem Jeova, bambae yumi tinghae long Haos Kingdom blong yumi, we hem i olsem ples blong trufala wosip long komuniti. Long faswan taem we wan man i kam long Haos Kingdom, yumi wantem we hem i gat gudfala tingting long saed blong ples we yumi miting long hem. I gud blong klinim mo fiksimap samting we i brok long Haos Kingdom ya, blong hem i stap naes oltaem. Yumi soem se yumi tinghae  long Haos Kingdom taem yumi traem bes blong yumi blong kipim hem i stapgud oltaem. Hem i wan blesing blong yusum taem blong yumi blong klinim mo ‘wokemgud bakegen’ haos wosip blong yumi. (2 Kronikel 34:10) Hemia sem samting we yumi mas mekem taem yumi yusum ol haos asembli no taem yumi rentem narafala haos blong mekem ol asembli long hem.

19. ?Man we i wantem stap klin, hem i mas stap longwe long wanem fasin, mo olsem wanem Baebol i halpem yumi blong save ol samting we yumi mas blokem?

¹⁹ Blong stap klin long bodi, yumi mas stap longwe long ol fasin we yumi lan blong mekem we oli mekem yumi doti, olsem smok tabak, dring alkol, mo tekem drag mo narafala samting we oli spolem tingting blong yumi. Baebol i no talem nem blong evri fasin we oli doti, be hem i givim ol save we oli halpem yumi blong gat tingting blong Jeova long saed ya. Ale taem yumi save tingting blong hem, mo from we yumi lavem hem, yumi jusum blong mekem ol samting we hem i laekem. Bambae yumi tokbaot faef stamba trutok we oli soemaot ol tingting blong Jeova long yumi.

20, 21. ?Jeova i wantem we yumi fri long wanem kaen fasin, mo wanem strong risen from wanem yumi mas mekem samting we hem i wantem long saed ya?

²⁰ “Olgeta promes ya oli blong yumi, mo from samting ya, yumi mas mekem yumi klin. Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God, mo yumi man blong hem nomo.” (2 Korin 7:1) Jeova i no wantem we yumi lan blong mekem sam fasin we oli save spolem bodi blong yumi mo tingting blong yumi. Taswe yumi mas blokem ol fasin we oli save mekem yumi kam olsem slef blong olgeta nomo, mo we oli save mekem yumi sik long bodi mo tingting blong yumi.

²¹ Baebol i givim strong risen long yumi from wanem yumi “mas mekem yumi klin” mo ‘sakemaot olgeta samting we oli stap mekem yumi doti.’ Lukluk bakegen long faswan toktok blong 2 Korin 7:1 we i talem se: “Olgeta promes ya oli blong yumi.”  ?Wanem ol promes ya? Ol vas we oli stap bifo long hemia oli tokbaot promes blong Jeova se: “Bambae mi mi glad blong tekem yufala. Mi bambae mi Papa blong yufala.” (2 Korin 6:17, 18) Tingbaot samting ya: Jeova i promes blong protektem yu mo blong lavem yu olsem we wan papa i mekem long boe no gel blong hem. Be Jeova i save mekem promes ya long yu nomo sipos yu stap longwe long ol samting we oli save mekem yu yu doti ‘long bodi mo tingting.’ !Tru ya, i krangke nomo sipos yu lanem wan fasin we biaen i holem yu, yu olsem slef blong hem, nao yu lusum nambawan fasin ya blong stap klosap long Jeova olsem fren blong hem!

22-25. ?Wanem tingting blong God long Baebol we i halpem yumi blong stap longwe long ol fasin we oli doti?

²² ‘Yu mas lavem hae God ya [Jeova] we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ (Matiu 22:37) Jisas i talem se loa ya hem i hae moa long ol narafala loa. (Matiu 22:38) I stret nomo we yumi ol man yumi lavem Jeova. Sipos yumi wantem lavem Jeova long olgeta hat, laef mo tingting blong yumi, yumi mas blokem olkaen samting we oli save sotem laef blong yumi mo mekem tingting blong yumi, we God i givim, i no moa klia.

²³ [Jeova] “nomo i stap mekem yumi evriwan i laef, mo hem i stap givim olgeta samting long yumi.” (Ol Wok 17:24, 25) Laef i wan presen we God i givim. Yumi lavem God ya we i givim laef long yumi, taswe yumi wantem soem se yumi tinghae long presen ya blong hem. Yumi sakemaot eni fasin we maet yumi lan long hem be i stap spolem bodi blong yumi. Yumi mekem olsem from we yumi luksave se ol fasin ya oli no gat respek nating long presen ya: laef.—Ol Sam 36:9.

²⁴ “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Matiu 22:39) Plante taem ol fasin we man i lan blong mekem, oli spolem hem mo oli spolem ol man raonabaot long hem tu. Tingbaot man we i smok sigaret. Smok blong sigaret ya i save spolem ol man raonabaot long hem we oli no smok. Wan man we i spolem narafala, hem i stap brekem loa ya we God i givim se yumi mas lavem ol man raonabaot long yumi. Mo tu, man olsem i stap giaman nomo se hem i lavem God.—1 Jon 4:20, 21.

 ²⁵ “Ona long ol haeman mo gavman.” (Taetas 3:1) Long plante kantri, loa i putum tabu long fasin blong yusum samfala drag. Sipos yumi trufala Kristin, bambae yumi no save pem, salem, no yusum ol drag we oli agensem loa blong kantri.—Rom 13:1.

26. (a) ?Blong stap long laef ya we God i lavem yumi, yumi mas mekem wanem? (b) ?From wanem man we i traehad blong gat wan laef we i klin long fes blong God, hem i gat laef ya we i beswan?

²⁶ Man we i wantem stap long laef ya we God i lavem hem, hem i mas stap klin long evri haf blong laef blong hem, i no long sam samting nomo. Maet i no isi blong lego ol fasin we yumi lan blong mekem longtaem, be hemia wan samting we yumi save mekem. * Tru ya, i gud tumas blong folem fasin we Jeova i wantem, from we Jeova i tijim yumi blong givhan long yumi wan. (Aesea 48:17) Be samting we i moa impoten, hemia se taem yumi stap klin, yumi harem gud from we yumi save se ol man we oli luk yumi bambae oli presem God ya we yumi lavem hem, ale bambae yumi stap oltaem long laef ya we God i lavem yumi.