1-3. (a) Porque el un nana ta asigura que arreglao y limpio el de suyu anak? (b) Porque quierre si Jehova que limpio el de suyu maga siervo y cosa kanaton manda move para esta limpio?

TA PREPARA el nana con el de suyu anak cay tiene este onde anda. Ta asigura le que ya baña este y limpio y arreglao el camisa. Sabe le que el limpieza importante na salud del de suyu anak. Sabe tambien le que el ichura del anak puede dale positivo o negativo comento con el de suyu mayores.

² El diaton Tata na cielo, si Jehova, quierre que limpio el de suyu maga siervo. El de suyu Palabra ta habla: “Ta dale tu mira que tu limpio con aquellos limpio.” * (Salmo 18:26) Ta  ama kanaton si Jehova y sabe le que bueno para kanaton si limpio kita. Ta expecta tambien le que por causa na diaton limpieza como de suyu maga Testigo, el otro gente hay alaba con ele. El diaton limpieza y buen conducta puede dale gloria con Jehova y con el de suyu sagrao nombre y gendeh con ele hace huya.​—Ezequiel 36:22; le con el 1 Pedro 2:12.

³ Ciendo sabe kita que el Dios ta ama con el maga gente limpio, manda se move kanaton que esta limpio. Cay ta ama kita con ele, quierre kita vivi na manera que ta honra con ele. Quierre tambien kita esta na de suyu amor. Poreso, examina kita si porque kita necesita esta limpio, si cosa quierre decir que queda limpio y si paquemodo kita esta limpio. Por medio con ese, puede kita mira si cosa aspeto na diaton vida el necesita kita hace cambio.

4, 5. (a) Cosa el primer razon si porque kita necesita esta limpio? (b) Paquemodo el limpieza de Jehova puede mira na de suyu maga visible creacion?

⁴ Ta guia kanaton si Jehova por medio na de suyu ejemplo. Poreso el de suyu Palabra ta anima kanaton: “Imita con el Dios.” (Efeso 5:1) Este el primer razon si porque kita necesita esta limpio: si Jehova, el Dios con quien kita ta adora, limpio y sagrao na todo aspeto.​—Le con el Levitico 11:44, 45.

⁵ El limpieza de Jehova igual na de suyu otro maga calidad y manera, puede mira na de suyu visible creacion. (Roma 1:20, NW) Ya crea con el tierra para queda un limpio lugar donde queda el maga gente. Ya pone si Jehova maga cycle na ecologia para limpia con el diaton aire y agua. El tierra tiene capacidad para limpia con este mismo. Claro que el limpieza importante con “el Creador del tierra.” (Jeremias 10:12) Debe importante tambien se para kanaton.

6, 7. Paquemodo ya hace claro na Ley que ya dale con Moises que aquellos quien ta adora con Jehova necesita queda limpio?

⁶ El otro razon si porque necesita kita esta limpio amo que  si Jehova, el diaton Soberano Dios, quierre que limpio el de suyu maga siervo. Na ley ya dale si Jehova na Israel, tiene coneccion el limpieza na adoranza. El Ley especifico ta habla que na Dia de Tapada de Culpa, el alto sacerdote necesita baña dos beses. (Levitico 16:4, 23, 24) El maga sacerdote quien ta sirvi necesita laba con el diila mano y pies antes de ofrece sacrificio con Jehova. (Exodo 30:17-21; 2 Cronicas 4:6) Ya menciona el Ley maga 70 clase que ta causa buling na fisical y na adoranza. Si mabuling el un Israelita, gendeh le puede participa na adoranza​—na cuanto situacion, muerte el castigo si viola le con ese. (Levitico 15:31) Muerte tambien el castigo para con aquellos quien no quierre sigui na proceso para queda limpio, incluido el bañada y labada del diila ropa.​—Numero 19:17-20.

⁷ Maskin pa gendeh kita bajo na ley que ya dale con Moises, ta ayuda se kanaton sabe si cosa el pensamiento del Dios. El Ley ta hace claro que aquellos quien ta adora con Dios necesita queda limpio. Nuay cambia si Jehova. (Malaquias 3:6) Gendeh aceptable con ele el diaton adoranza puera lang si ese “limpio y deverasan.” (Santiago 1:27, El Nuevo Testamento) Poreso, necesita kita sabe si cosa le ta expecta kanaton acerca con este.

8. Ta expecta si Jehova que esta kita limpio na cosa-cosa aspeto?

⁸ Na Biblia, el limpieza gendeh lang ta refiri que limpio na fisical. Para queda limpio na ojos del Dios, necesita limpio kita na todo aspeto del diaton vida. Ta expecta si Jehova que esta kita limpio na cuatro aspeto: espiritual, moral, pensamiento y fisical. Discuti kita si cosa el envuelto na cada uno de este.

9, 10. (a) Cosa quierre decir que esta limpio na espiritual? (b) Cosa debe evita el maga verdadero Cristiano?

⁹ Limpieza na espiritual. Para esta limpio na espiritual quierre  decir que gendeh kita mezcla cosas falso na verdadero adoranza. Cuando ya sale el maga Israelita na Babilonia para bira na Jerusalem, necesita sila sigui con el consejo: “Sale ustedes alli, no agarra cosa mabuling! . . . Esta ustedes limpio.” (Isaias 52:11) El maga Israelita ya bolbe na diila lugar para hace bira el adoranza con Jehova. Necesita limpio ese adoranza y nuay marca de enseñanza, practica y tradicion del religion na Babilonia que gendeh ta honra con Dios.

¹⁰ Como maga verdadero Cristiano ahora, debe kita queda con cuidao para gendeh queda influenciao na falso adoranza. (Le con el 1 Corinto 10:21.) Necesita kita queda alerto ciendo alrededor kanaton el influencia del falso religion. Na manada lugar, mucho tradicion, actividad y ritual el tiene coneccion na falso enseñanza, igual el idea que tiene cosa adentro kanaton ta continua vivi despues del muerte. (Eclesiastes 9:5, 6, 10) El maga verdadero Cristiano ta evita maga practica que tiene que hace na creencia del falso religion. * Gendeh kita permiti que influencia kanaton el otro para man compromiso con el maga principio na Biblia acerca na limpio adoranza.​—Maga Actividad 5:29.

11. (a) Para queda limpio na moral, cosa kita debe hace? (b) Porque importante esta limpio na moral?

¹¹ Limpieza na moral. Para esta limpio na moral, debe kita evita el todo clase de imoralidad. (Le con el Efeso 5:5.) Bien importante que esta kita limpio na moral. Como cosa kita discuti na siguiente capitulo na este libro, para esta na amor del Dios, debe ‘desaleja gayot kita na imoralidad.’ Aquellos quien ta comete sexual imoralidad y gendeh ta arripinti “gendeh gayot ay hereda el Reino del Dios.” (1 Corinto 6:9, 10, 18) Na ojos del Dios, ese clase de maga gente “ta hace cuchinadas.” Si gendeh sila queda limpio na moral, “sila ay guinda na . . . segundo muerte.”​—Revelacion 21:8.

12, 13. Cosa el coneccion del diaton pensamiento na cosa kita ta hace y paquemodo kita mentena un limpio pensamiento?

 ¹² Limpieza na pensamiento. Ta hace kita el cosa kita ta pensa. Si mal cosas el laman del diaton pensamiento y corazon, gendeh dura posible kita hace maga cosas mabuling. (Mateo 5:28; 15:18-20) Pero si pone kita na pensamiento el maga cosas limpio, manda se move kanaton para mentena limpio conducta. (Le con el Filipo 4:8.) Paquemodo kita mentena un limpio pensamiento? Necesita kita evita el maskin cosa entretenimiento que puede hace mabuling con el diaton pensamiento. * Mas pa, puede kita pone cosas limpio na pensamiento si regular kita ta le con el Palabra del Dios.​—Salmo 19:8, 9.

¹³ Para esta na amor del Dios, bien importante que esta kita limpio na espiritual, moral y pensamiento. El otro maga capitulo na este libro ta discuti mas acerca con este maga aspeto de limpieza. Examina kita ahora el ika-cuatro aspeto​—limpieza na fisical.

14. Porque el fisical limpieza gendeh lang un personal cosa?

¹⁴ Para queda limpio na fisical, debe kita mentena el limpieza na cuerpo y na diaton alrededor. El fisical limpieza ba un personal cosa lang que gendeh debe entra mete el otro? Gendeh ansina el maga ta sirvi con Jehova. Como cosa ya discuti, importante para con Jehova el diaton fisical limpieza gendeh lang cay para se na bien diaton sino ta dale se gloria con ele. Pensa con el ilustracion na primer parapo. Si mira tu con el bata que pirmi mabuling o marusingun, gendeh ba negativo el cosa tu pensa acerca na de suyu mayores? No quierre kita que el diaton ichura o manera de vida puede dale negativo comento con el diaton Tata na cielo o queda malo el mensaje que ta predica kita. El Palabra del Dios ta anima  kanaton que imita con Pablo. Ele ya escribi: “Gendeh came ta dale mal ejemplo ni con ningunos. Ansina, gendeh sila ay puede ganguia con el diamon trabajo como Apostol. Emvez, na todo maga cosa-cosa que came ta hace, ta dale mira cay maga muchacho came del Dios.” (2 Corinto 6:3, 4) Entonces, paquemodo kita esta limpio na fisical?

15, 16. (a) Cosa el incluido na limpieza del cuerpo? (b) Cosa debe el condicion del diaton camisa?

¹⁵ El diaton ichura y limpieza na cuerpo. Maskin pa otro-otro el cultura y estado del vida na cada nacion, tiene jabon y bastante agua para regular kita puede baña y puede asigura que limpio kita y el diaton maga anak. Parte na limpieza el labada de mano con jabon y agua antes come o agarra comida, despues usa con el C.R. y despues limpia con el bata o cambia lampin. Puede se ayuda kanaton para evita maga enfermedad y salva con el diaton vida. Ayuda se para evita  man calayat el maga virus y bacteria que ta causa diarrhea. Na maga lugar donde nuay septic tank el maga casa, puede entera na tierra con el suciu igual como cosa ta hace na tiempo del maga Israelita.​—Deuteronomio 23:12, 13.

¹⁶ Necesita tambien kita regular laba con el diaton maga ropa para limpio y presentable este. El camisa del un Cristiano gendeh necesita de carro o nuevo el estilo, sino arreglao, limpio y decente. (Le con el 1 Timoteo 2:9, 10.) Maskin onde man kita, quierre kita que el diaton ichura “lleva alabanza con el enseñanza acerca de Dios, el di aton Salvador.”​—Tito 2:10, El Nuevo Testamento.

17. Porque debe limpio y presentable el diaton casa y alrededor de este?

¹⁷ El diaton casa y el alrededor de este. Gendeh man bien bonito el diaton casa, pero debe este limpio y presentable. Si ta usa kita coche o motor para anda na miting o na predicacion, asigura kita que limpio este. Debe kita acorda que si limpio el diaton casa y el alrededor de este, puede se dale buen impresion con el diaton Dios. Gane, ta enseña kita con el maga gente que si Jehova un limpio Dios, que ele hay ‘destroza con el maga destrozador del mundo,’ y el de suyu Reino hay hace paraiso con el mundo. (Revelacion 11:18; Lucas 23:43) Asigurao quierre kita dale mira con otro por medio na diaton casa y alrededor que sabe kita mentena limpieza que aceptable na venedero nuevo mundo.

18. Paquemodo kita dale mira que sagrao para kanaton el Kingdom Hall?

¹⁸ El diaton lugar de adoranza. El diaton amor para con Jehova manda kanaton move para trata como sagrao el Kingdom Hall, el lugar onde kita ta adora con Dios. Si tiene nuevo ta atende, quierre kita que positivo el diila comento acerca na diaton Kingdom Hall. Necesita regular kita limpia y mentena con este para asigura que pirmi este presentable. Ta trata kita como sagrao el Kingdom Hall si ta ayuda kita limpia con este. Un privilegio que man voluntario na limpieza  y ayuda “arregla y compone” con el diaton lugar de adoranza. (2 Cronicas 34:10) Ansina tambien kita hace na Assembly Hall o otro facilidad que ta usa kita para na maga asemblea.

19. Para esta limpio na fisical, cosa kita necesita evita y paquemodo kanaton ayuda el Biblia?

¹⁹ Para esta limpio na fisical, necesita kita evita maga mabuling vicio y practica igual el pumada, por demas de alcoholico tomada y usada de droga prohibido. El Biblia nuay especifico nombra con el todo mabuling vicio y practica que uso ahora. Pero, ta contene se maga principio que puede ayuda kanaton sabe si cosa si Jehova ta sinti acerca con ese maga cosas. Ciendo sabe kita si cosa el pensamiento de Jehova, el diaton amor para con ele manda kanaton move para hace el cosas que ta hace alegre con ele. Discuti kita con el cinco maga principio na Biblia.

20, 21. Quierre si Jehova queda kita librao na cosa maga practica y cosa el razon si porque kita obedece con ese?

²⁰ “Este maga promesa ya hace para canaton. Poreso, limpia kita todo mancha na diaton cuerpo o espiritu, y por causa del miedo con el Dios, queda kita santo [sagrao, NW] gayot.” (2 Corinto 7:1) Quierre si Jehova que queda kita librao desde na maga practica que ta hace mabuling con el diaton cuerpo y tiene negativo influencia na diaton pensamiento. Poreso, debe kita evita maga vicio que puede hace malo con el diaton salud y pensamiento.

²¹ El Biblia ta dale kanaton razon si porque debe “limpia kita todo mancha.” Nota si cosa ya habla na primer parte del 2 Corinto 7:1: “Este maga promesa ya hace para canaton.” Cosa se maga promesa? Como cosa ta habla na maga versiculo una pa con ese, si Jehova ya promete: “Yo ay recivi con ustedes. Yo ay queda un Tata para con ustedes.” (2 Corinto 6:17, 18) Imagina tu: Ta promete contigo si Jehova que protege, cuida y ama le contigo igual como cosa ta hace el un tata na  de suyu anak. Pero, hay cumpli lang se si Jehova si evita tu el maga cosas mabuling na “cuerpo o espiritu.” Poreso, gendeh gayot justo que permiti kita perde el diaton precioso relacion con Jehova por causa lang na maga mabuling vicio y practica!

22-25. Cosa maga principio na Biblia puede ayuda kanaton evita maga mabuling vicio y practica?

²² “Ama con el Señor, el dituyo Dios, con todo el dituyo corazon, con todo el dituyo alma y con todo el dituyo pensamiento.” (Mateo 22:37) Ya iscuji si Jesus con este mandamiento como el de con todo importante. (Mateo 22:38) Debe lang kita dale mira ansina clase de amor con Jehova. Para puede ama con ele con todo corazon, alma y pensamiento, debe kita evita maga practica que puede hace corto con el diaton vida o tiene mal efecto na diaton pensamiento.

²³ Si Jehova “ta dale el vida y el resuello y todo maga cosa-cosa con todo el maga gente.” (Maga Actividad 17:24, 25) Un regalo estaba con Dios el vida. Ta aprecia kita con ese regalo cay ta ama kita con Dios. Evita kita el maskin cosa vicio o practica que malo para na diaton salud, cay sabe kita que ese clase de maga practica ta destroza con el diaton vida.​—Salmo 36:9.

²⁴ “Ama con el dituyo vecinos, como ta ama tu con el dituyo mismo cuerpo.” (Mateo 22:39) El maga mabuling vicio y practica ta afecta gendeh lang con el quien ta hace con ese sino pati con aquellos alrededor con ele. Por ejemplo, el umera del cigarillo tiene mal efecto na maga gente alrededor con el quien ta puma. El un persona quien ta pone na peligro con otro ta viola con el mandamiento del Dios que ama con el diaton vecinos. Ta dale tambien le mira que gendeh le deverasan ta ama con Dios.​—1 San Juan 4:20, 21.

²⁵ “Hace tu acorda canila que necesita sila somete con el maga gobernador y maga autoridad del gobierno.” (Tito 3:1) Na manada lugar, ta prohibi el ley con el un persona tiene o usa cuanto maga droga. Como maga verdadero Cristiano,  nuay kita ansina clase de droga ni ta usa con ese.​—Roma 13:1.

26. (a) Para esta na amor del Dios, cosa kita necesita hace? (b) Porque el de con todo buen manera de vida amo que esta limpio na ojos del Dios?

²⁶ Para esta na amor del Dios, necesita kita esta limpio na todo aspeto del diaton vida. Gendeh facil deja o evita con el maga mabuling vicio y practica, pero posible se. * Este el de con todo buen manera de vida, cay pirmi kanaton ta enseña si Jehova para na diaton bien. (Le con el Isaias 48:17.) El mas importante, si ta esta kita limpio queda kita alegre cay sabe kita que ta dale kita gloria con el Dios con quien kita ta ama. Na ese manera, hay esta kita na de suyu amor.