1-3. (a) Nganong seguroon sa usa ka inahan nga ang iyang anak hapsay ug hinlo? (b) Nganong buot ni Jehova nga mahimong hinlo ang iyang mga magsisimba, ug unsay modasig kanato nga magpabiling hinlo?

GIANDAM sa usa ka inahan ang iyang batang lalaki kay may adtoan sila. Iyang giseguro nga nakaligo ang iyang anak ug ang iyang sinina hinlo ug inutaw. Nahibalo siya nga ang pagkahinlo hinungdanon sa iyang maayong panglawas. Nasayod usab siya nga ang panagway sa iyang anak mahimong makapasidungog o makapakaulaw sa iyang mga ginikanan.

² Buot ni Jehova, ang atong langitnong Amahan, nga mahimong hinlo ang iyang mga alagad. Matod sa iyang Pulong: “Sa usa nga nagpabiling mahinlo ikaw magpakita nga mahinlo.” * (Salmo 18:26) Si Jehova nahigugma kanato; siya nahibalo  nga ang pagkahinlo makaayo gayod kanato. Iyang gidahom usab nga kita makapasidungog kaniya ingong iyang mga Saksi. Sa pagkatinuod, ang atong hinlong dagway ug maayong panggawi makahimaya, dili magpakaulaw kang Jehova ug sa iyang balaang ngalan.​—Ezequiel 36:22; 1 Pedro 2:12.

³ Kay nahibalo kita nga ang Diyos nahigugma sa hinlong katawhan, kita madasig nga magmahinlo kanunay. Buot natong ang atong pagkinabuhi makapasidungog kaniya kay kita nahigugma kaniya. Buot usab natong magpabilin sa iyang gugma. Nan, atong susihon kon nganong angay kitang magmahinlo kanunay, kon unsay nalangkit niana, ug kon sa unsang paagi kita makapabiling hinlo. Ang maong pagsusi makatabang kanato sa pag-ila kon aduna bay angay natong pauswagon.

4, 5. (a) Unsay pangunang katarongan nga angay kitang magpabiling hinlo? (b) Sa unsang paagi ang kahinlo ni Jehova dayag diha sa makita niyang mga linalang?

⁴ Ang usa ka paagi sa paggiya ni Jehova kanato maoy pinaagig panig-ingnan. Busa giawhag kita sa iyang Pulong nga “mahimong mga tigsundog sa Diyos.” (Efeso 5:1) Kini ang pangunang katarongan nga angay kitang magpabiling hinlo: si Jehova, ang Diyos nga atong gisimba, maoy hinlo, dalisay, ug balaan sa tanang bahin.​—Levitico 11:44, 45.

⁵ Ang kahinlo ni Jehova, sama sa iyang daghan kaayong hiyas ug paagi, dayag diha sa makita niyang mga linalang. (Roma 1:20) Ang yuta gidisenyo aron mahimong hinlong puy-anan sa mga tawo. Gipalihok ni Jehova ang mga siklo sa kinaiyahan aron mahinlo ang atong hangin ug tubig. Iproseso sa pipila ka mikrobyo ang basura aron mahimong dili-makadaot nga mga produkto. Gigamit sa mga siyentipiko ang pipila niining gigutom nga gagmay kaayong mga mikrobyo sa paghinlo sa nayabong aseite ug ubang polusyon tungod sa kahakog ug kadalo sa tawo. Dayag, ang kahinlo hinungdanon sa “Magbubuhat sa yuta.” (Jeremias 10:12) Kini angayng hinungdanon usab kanato.

6, 7. Sa unsang paagi gipasiugda sa Moisesnong Balaod nga ang mga magsisimba ni Jehova kinahanglang hinlo?

 ⁶ Ang laing katarongan nga angay kitang magpabiling hinlo mao nga gibaod ni Jehova, ang atong Soberanong Magmamando, nga magmahinlo ang iyang mga magsisimba. Ubos sa Balaod nga gihatag ni Jehova sa Israel, ang kahinlo nalanggikit sa pagsimba. Gitin-aw sa Balaod nga ang hataas nga saserdote kinahanglang maligo ug duha ka beses sa Adlaw sa Pagtabon-sa-Sala. (Levitico 16:4, 23, 24) Kinahanglang hugasan sa nag-alagad nga mga saserdote ang ilang mga kamot ug tiil una motanyag ug mga halad kang Jehova. (Exodo 30:17-21; 2 Cronicas 4:6) Gipaila sa Balaod ang mga 70 ka matang sa pisikal ug seremonyal nga kahugawan. Samtang ang usa ka Israelinhon anaa sa hugaw nga kahimtang, dili siya makaapil sa pagsimba​—sa pipila ka kaso silotan pa siyag kamatayon kon siya molapas niana. (Levitico 15:31) Si bisan kinsang dili mosunod sa gibaod nga paagi sa paghinlo, apil ang pagdigo sa iyang lawas ug paglaba sa iyang besti, “pagaputlon gikan sa taliwala sa kongregasyon.”​—Numeros 19:17-20.

⁷ Bisan pag dili kita ilalom sa Moisesnong Balaod, makatabang kini kanato sa pagsabot sa panghunahuna sa Diyos bahin sa mga butang. Tin-aw, ang Balaod nagpasiugda nga ang mga magsisimba sa Diyos kinahanglang hinlo. Si Jehova dili mausab. (Malaquias 3:6) Dili niya dawaton ang atong pagsimba gawas kon kini “hinlo ug wala mahugawi.” (Santiago 1:27) Busa angay natong masayran kon unsay iyang gidahom kanato niining bahina.

8. Sa unsang mga paagi gidahom ni Jehova nga magpabilin kitang hinlo?

⁸ Sa Bibliya, ang pagkahinlo wala lang magkahulogan sa pisikal nga kahinlo. Ang pagkahinlo sa mga mata sa Diyos naglangkit sa tanang bahin sa atong kinabuhi. Gidahom ni Jehova nga kita magmahinlo sa upat ka pangunang paagi​—sa espirituwal, moral, mental, ug sa pisikal. Atong hisgotan kon unsay nalangkit sa matag usa niini.

9, 10. Unsay kahulogan sa pagpabiling hinlo sa espirituwal, ug unsay likayan sa matuod nga mga Kristohanon?

 ⁹ Espirituwal nga kahinlo. Sa yanong pagkasulti, ang pagpabiling hinlo sa espirituwal nagkahulogan nga ang matuod nga pagsimba dili sagolan ug bakak. Sa dihang migula ang mga Israelinhon sa Babilonya aron mobalik sa Jerusalem, kinahanglang sundon nila kining inspiradong tambag: “Gula gikan dinha, ayaw paghikap ug mahugaw; . . . pagpabilin kamong hinlo.” (Isaias 52:11) Ang pangunang katuyoan sa pagbalik sa mga Israelinhon mao ang pagpasig-uli sa pagsimba ni Jehova. Ang maong pagsimba kinahanglang hinlo​—wala mahugawi sa nagpasipala-sa-Diyos nga mga doktrina ug tulumanon, ug sa mga kostumbre sa relihiyon sa Babilonya.

¹⁰ Karong adlawa, ingong matuod nga mga Kristohanon, mag-amping gayod kitang dili mahugawan sa bakak nga pagsimba. (1 Corinto 10:21) Ang pagkamabinantayon bahin niini hinungdanon kaayo, tungod kay kaylap ang impluwensiya sa bakak nga relihiyon. Sa daghang nasod, ang nagkadaiyang tradisyon, kalihokan, ug mga rituwal nalangkit sa mga doktrina sa bakak nga relihiyon, sama sa ideya nga adunay mogula sa atong lawas nga magpadayong buhi pagkamatay nato. (Ecclesiastes 9:5, 6, 10) Ang matuod nga mga Kristohanon molikay sa mga kostumbreng nalangkit sa bakak nga relihiyosong mga tinuohan. * Dili nato ikompromiso ang mga sukdanan sa Bibliya bahin sa hinlong pagsimba bisan pa sa mga pagpit-os.​—Buhat 5:29.

11. Unsay nalangkit sa moral nga kahinlo, ug nganong kinahanglang magpabilin kitang hinlo sa moral?

¹¹ Moral nga kahinlo. Ang moral nga kahinlo naglakip sa paglikay sa tanang matang sa seksuwal nga imoralidad. (Efeso 5:5) Hinungdanon kaayo nga magpabilin kitang hinlo sa moral. Sumala sa masabtan nato sa sunod nga kapitulo niining libroha, kinahanglan kitang ‘mokalagiw gikan sa pakighilawas’ aron magpabilin sa gugma sa Diyos. Ang dili-mahinulsolong mga makihilawason “dili makapanunod sa gingharian sa Diyos.”  (1 Corinto 6:9, 10, 18) Sa mga mata sa Diyos, sila nahiapil niadtong “mga dulumtanan tungod sa ilang kahugawan.” Kon mapakyas sila sa pagpabiling hinlo sa moral, “ang ilang bahin mao unya . . . ang ikaduhang kamatayon.”​—Pinadayag 21:8.

12, 13. Unsay kalangkitan sa mga hunahuna ug mga buhat, ug sa unsang paagi makapabilin kitang hinlo sa mental?

¹² Mental nga kahinlo. Ang mga hunahuna moresulta sa mga buhat. Kon ang daotang mga hunahuna makatisok sa atong kaisipan ug kasingkasing, sa madugay o madali kita lagmit makahimog daotang mga buhat. (Mateo 5:28; 15:18-20) Apan kon atong pun-on ang atong kaisipan sa putli ug hinlong mga hunahuna, matukmod kita sa paghupot ug hinlong panggawi. (Filipos 4:8) Sa unsang paagi magpabilin kitang hinlo sa mental? Angayng likayan nato ang matang sa kalingawan nga makapahugaw sa atong panghunahuna. * Dugang pa, mahimong pun-on nato ang atong kaisipan ug hinlong mga hunahuna pinaagi sa regular nga pagtuon sa Pulong sa Diyos.​—Salmo 19:8, 9.

¹³ Aron magpabilin sa gugma sa Diyos, kinahanglang magpabilin kitang hinlo sa espirituwal, moral, ug mental. Kining mga matanga sa pagkahinlo gihisgotang mas bug-os pa sa ubang kapitulo niining libroha. Atong susihon dinhi ang ikaupat nga paagi​—pisikal nga kahinlo.

14. Nganong ang pisikal nga kahinlo dili lang personal nga butang?

¹⁴ Ang pisikal nga kahinlo naglangkit sa pagkahinlo sa atong lawas ug mga kabtangan. Ang maong kahinlo personal ba nga butang nga way labot niana ang uban? Dili gayod kana tinuod alang sa mga magsisimba ni Jehova. Sumala sa gipahayag na, ang atong pisikal nga kahinlo hinungdanon kang Jehova tungod kay kini alang gayod sa atong kaayohan ug kay kita usab mopabanaag kaniya. Hinumdomi ang ilustrasyon sa sinugdan. Kon ikaw makakitag bata nga kanunayng bulingit o nagkato, dili ka ba mahibulong kon unsang klaseha ang iyang mga  ginikanan? Dili nato buot nga maulawan ang atong langitnong Amahan o tamayon ang atong mensahe tungod sa atong dagway o paagi sa pagkinabuhi. Ang Pulong sa Diyos nag-ingon: “Wala gayod kami maghatag ug bisan unsa nga hinungdan sa pagkapandol, aron nga ang among ministeryo dili kakitaan ug sayop; apan sa tanang paagi among ginarekomendar ang among kaugalingon nga mga ministro sa Diyos.” (2 Corinto 6:3, 4) Nan, sa unsang paagi makapabilin kitang hinlo sa pisikal?

15, 16. Unsay nalakip sa maayong mga batasan sa pagpanghindik, ug unsay angay nga kahimtang sa atong sinina?

¹⁵ Atong personal nga panghindik ug panagway. Bisan pag nagkadaiya ang kultura ug kahimtang sa pagpuyo sa matag nasod, kita kasagarang makakitag igong sabon ug tubig aron kanunayng makaligo ug makaseguro nga hinlo kita ug ang atong mga anak. Ang maayong mga batasan sa panghindik naglakip sa pagpanghunaw gamit ang sabon ug tubig sa dili pa mokaon  o mokupot sa pagkaon, human mangasilyas, ug human sa pag-ilis ug lampin sa usa ka masuso. Ang pagpanghunaw gamit ang sabon ug tubig makasantag sakit ug makaluwas ug kinabuhi. Makapugong kini sa pagkaylap sa mga kagaw, nga sa ingon niana makatabang sa mga tawo sa paglikay sa diyariya. Sa kanasoran diin walay kasilyas ang kabalayan o walay publikong sistema sa paghipos sa hugaw, ang hugaw sa tawo ikalubong, sama sa gibuhat sa karaang Israel.​—Deuteronomio 23:12, 13.

¹⁶ Kinahanglang regular usab natong labhan ang atong sinina aron kini hinlo ug maayong tan-awon. Ang sinina sa usa ka Kristohanon dili kinahanglang mahalon o nunot sa uso apan kini angayng hapsay, hinlo, ug makasaranganon. (1 Timoteo 2:9, 10) Bisan pa kon diin kita, buot natong ang atong panagway “makadayandayan sa pagtulon-an sa atong Manluluwas, ang Diyos.”​—Tito 2:10.

17. Nganong ang atong balay ug mga kabtangan angayng hinlo ug nindot tan-awon?

¹⁷ Atong balay ug mga kabtangan. Tingali dili maluho ang atong balay, apan angay kining hinlo ug nindot tan-awon kutob sa atong maarangan. Sa susama, kon mogamit kitag sakyanan paingon sa mga tigom ug sa pagsangyaw, angay natong hinloan ang sulod ug gawas niini. Dili nato kalimtan nga ang hinlong balay ug mga kabtangan maoy usa ka pamatuod bahin sa Diyos nga atong gisimba. Ngani, nagtudlo kita sa mga tawo nga si Jehova maoy Diyos nga hinlo ug siya ‘maglaglag sa mga nagalaglag sa yuta,’ ug nga ang atong yutang puy-anan hapit nang himoong paraiso pinaagi sa iyang Gingharian. (Pinadayag 11:18; Lucas 23:43) Buot gayod natong ang kahimtang sa atong balay ug mga kabtangan magpasundayag sa uban nga bisan karon kita nagaugmad ug maayong mga batasan nga mohaom sa umaabot nga bag-ong kalibotan.

18. Sa unsang paagi ikapakita nato ang pagpabili sa atong Kingdom Hall?

¹⁸ Atong dapit sa pagsimba. Ang atong gugma kang Jehova motukmod kanato sa pagpabili sa atong Kingdom Hall, ang sentro sa matuod nga pagsimba sa usa ka dapit. Kon motambong ang mga bag-ohan, buot natong makadayeg sila sa atong tigomanan. Kinahanglan ang regular nga paghinlo ug pag-atiman  sa tinukod aron kini magpabiling nindot tan-awon ug kon atong himoon kini kutob sa atong maarangan, nagpakita kitag pagpabili sa atong Kingdom Hall. Usa ka pribilehiyo nga kita moboluntaryo sa pagtabang sa paghinlo ug “pag-ayom ug pag-ayo” sa atong dapit sa pagsimba. (2 Cronicas 34:10) Ang samang mga prinsipyo mapadapat sa dihang kita magkatigom sa Assembly Hall o laing pasilidad alang sa mga asembliya o kombensiyon.

19. Aron magpabilin kitang hinlo sa pisikal, unsay angay natong likayan, ug sa unsang paagi ang Bibliya makatabang kanato niining bahina?

¹⁹ Aron magpabilin kitang hinlo sa pisikal, angay natong likayan ang mahugawng mga bisyo, sama sa pagpanigarilyo, sobrang pag-inom ug alkoholikong ilimnon, ug sa dili-medikal nga paggamit sa makapaadik o makadaot sa utok nga mga droga. Ang Bibliya wala maghisgot sa tanang mahugaw ug dulumtanang mga bisyo nga kaylap karon, apan kini may mga prinsipyo nga makatabang kanato sa pagsabot sa panghunahuna ni Jehova nianang mga butanga. Kay nasayod man kita sa panghunahuna ni Jehova, ang atong gugma kaniya motukmod kanato sa pagbuhat kon unsay iyang giuyonan. Atong hisgotan ang lima ka Kasulatanhong mga prinsipyo.

20, 21. Buot ni Jehova nga kita mahigawas sa unsang mga bisyo, ug unsay bug-at nga katarongan nga atong sundon kana?

²⁰ “Sanglit nakabaton man kita niining maong mga saad, mga hinigugma, hinloan nato ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.” (2 Corinto 7:1) Buot ni Jehova nga mahigawas kita sa mga bisyo nga makapahugaw sa atong pisikal nga lawas ug makadaot sa atong panghunahuna. Busa kinahanglan natong likayan ang mga bisyo nga nailhang makadaot sa lawas ug hunahuna.

²¹ Ang Bibliya naghatag ug usa ka bug-at nga katarongan nga “hinloan nato ang atong kaugalingon sa tanang kahugawan.” Matikdi nga gisugdan ang 2 Corinto 7:1 niining mga pulonga: “Sanglit nakabaton man kita niining maong mga saad.” Unsang mga saara? Sumala sa nag-unang mga bersikulo, si Jehova  nagsaad: “Pasudlon ko kamo. Ug ako mahimong inyong amahan.” (2 Corinto 6:17, 18) Tiaw mo na: Si Jehova nagsaad nga iya kang atimanon ug higugmaon sama sa usa ka amahan nga nagsaad sa iyang anak. Apan tumanon lang ni Jehova kanang mga saara kon molikay ka sa mga kahugawan sa “unod ug espiritu.” Nan, pagkabinuang kon mawad-an ka nianang bililhon ug suod nga relasyon uban kang Jehova tungod sa dulumtanang bisyo!

22-25. Unsang Kasulatanhong mga prinsipyo ang makatabang kanato sa paglikay sa hugawng mga bisyo?

²² “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Gipaila ni Jesus nga kining sugoa mao ang kinadak-an. (Mateo 22:38) Takos si Jehova nianang matanga sa gugma. Aron atong mahigugma siya uban sa tibuok natong kasingkasing, kalag, ug kaisipan, kinahanglan natong likayan ang mga bisyo nga makapamubo sa atong kinabuhi o makapahabol sa atong hinatag-sa-Diyos nga mga katakos sa panghunahuna.

²³ “[Si Jehova] naghatag ngadto sa tanang tawo ug kinabuhi ug gininhawa ug tanang butang.” (Buhat 17:24, 25) Ang kinabuhi maoy gasa sa Diyos. Kita nahigugma sa Maghahatag, busa ipakita nato ang atong pagpabili sa maong gasa. Likayan nato ang mga bisyo nga makadaot sa atong panglawas, kay kana nagpakita nga kita wala gayoy pagpabili sa gasa sa kinabuhi.​—Salmo 36:9.

²⁴ “Higugmaon mo ang imong silingan sama sa imong kaugalingon.” (Mateo 22:39) Ang hugawng mga bisyo kasagarang makadaot sa nagbisyo ug sa mga tawong anaa sa duol. Pananglitan, ang aso nga mahanggab sa tawong anaa sa duol sa nanigarilyo makadaot sa mga dili manigarilyo. Ang tawong nagdaot niadtong anaa sa iyang duol naglapas sa sugo sa Diyos nga higugmaon ang atong silingan. Gipanghimakak usab niya nga iyang gihigugma ang Diyos.​—1 Juan 4:20, 21.

²⁵ “Magpasakop ug magmasinugtanon sa mga kagamhanan ug sa mga awtoridad ingon nga mga magmamando.” (Tito 3:1) Sa daghang nasod, ang pagbaton o paggamit sa pipila ka droga maoy paglapas sa balaod. Ingong matuod nga mga  Kristohanon, dili kita magbaton o mogamit ug gidili nga mga droga.​—Roma 13:1.

26. (a) Aron magpabilin sa gugma sa Diyos, unsay kinahanglan natong buhaton? (b) Nganong ang pagpabiling hinlo sa mga mata sa Diyos mao ang labing maayong paagi sa pagkinabuhi?

²⁶ Aron magpabilin sa gugma sa Diyos, kinahanglan kitang magpabiling hinlo sa tanang paagi, dili lang sa usa o duha ka paagi. Tingali lisod ang pagbiya ug paglikay sa hugawng mga bisyo, apan kini posible. * Sa pagkatinuod, kini ang labing maayong paagi sa pagkinabuhi, kay si Jehova kanunayng nagtudlo kanato sa pagpahimulos kon unsay maayo. (Isaias 48:17) Labing hinungdanon, pinaagi sa pagpabiling hinlo kita makasinatig katagbawan tungod kay nahibalo nga nagapasidungog kita sa Diyos nga atong gihigugma, ug busa makapabilin sa iyang gugma.