1-3. (a) Akoz en manman i fer sir ki son zanfan i prop e byen sanze? (b) Akoz Zeova i oule ki son bann adorater i prop e kwa ki pous nou pour anvi reste prop oubyen pir?

EN MANMAN pe prepar son pti garson pour zot al en landrwa. I fer sir ki i’n bennyen e ki son lenz i prop e byen drese. Sa manman i konnen ki en bon lizyenn i tre enportan pour lasante son garson. I osi konsyan ki lafason ki son zanfan i sanze i kapab donn en nide ki kalite paran i annan.

² Zeova, nou Papa dan lesyel, i anvi ki son bann serviter i reste prop oubyen pir. Son Parol i dir: “Ou pou montre ki ou pir anver sa enn ki gard li pir.” * (Psonm 18:26) Zeova  i kontan nou e i konnen ki ler nou kit nou prop sa i dan nou lavantaz. Konman son bann Temwen i ekspekte ki nou fer dimoun koz byen lo li. Anfet, kan nou prop e annan en bon kondwit, sa pou anmenn laglwar olye repros lo Zeova ek son non sen.​—Ezekyel 36:22; 1 Pyer 2:12.

³ Kan nou konnen ki Bondye i kontan bann dimoun ki prop, sa i pous nou pour anvi gard nou lekor prop. Akoz nou kontan li, nou ti a kontan ki lafason ki nou viv i anmenn loner pour li. Nou ti a osi kontan reste dan son lanmour. Aprezan, annou vwar akoz nou devret reste prop oubyen pir, ki sa i enplike e ki mannyer nou kapab reste prop oubyen pir. Ler nou egzamin nou lekor, sa i kapab ed nou pour vwar si i annan serten laspe ki nou bezwen amelyore.

4, 5. (a) Ki sa rezon prensipal akoz nou bezwen reste prop? (b) Ki mannyer nou vwar lapropte Zeova dan son kreasyon?

⁴ En fason ki Zeova i gid nou i par son legzanp. Anfet, son Parol i ankouraz nou pour “fer tou parey li.” (Efezyen 5:1) Rezon prensipal akoz nou bezwen reste prop, i akoz Zeova sa Bondye ki nou adore i prop, pir e sen dan tou laspe.​—Levitik 11:44, 45.

⁵ Parey son bann lezot kalite, sa lapropte oubyen lapirte ki Zeova i annan i evidan dan son kreasyon. (Romen 1:20) Later ti ganny kree pour vin en landrwa prop kot imen i kapab reste lo la. Zeova in etablir serten prosesis dan lanatir ki ganny repete pour netway ler ek delo. Serten mikrob i parey en lekip netwayaz ki transform serten keksoz sal pour fer li vin bann sibstans ki pa danzere pour imen. Syantis in servi sa bann mikroorganizm pour netway petrol ki pe polye lanvironnman ek lezot form polisyon okazyonnen par bann imen egois e voras. I kler ki lapropte i enportan pour “sa Enn ki’n fer later.” (Zeremi 10:12) Nou osi nou devret vwar li enportan.

6, 7. Ki mannyer Lalwa ti met lanfaz lo nesesite pour sa bann ki ador Zeova reste prop oubyen pir?

 ⁶ En lot rezon akoz nou gard nou prop, se ki Zeova, pli gran Dirizan dan liniver, i ekspekte ki son bann adorater i prop. Dapre Lalwa ki Zeova ti donn bann Izraelit, lapropte ek ladorasyon ti mars ansanm. Lalwa ti fer resorti ki Zour Propisyasyon, gran pret ti bezwen bennyen pa zis en fwa me de fwa. (Levitik 16:4, 23, 24) Avan en pret ti ofer sakrifis avek Zeova, i ti pou bezwen lav son lanmen ek lipye. (Egzod 30:17-21; 2 Kronik 4:6) Lalwa ti fer resorti apepre 70 keksoz ki kapab fer en dimoun pa prop fizikman oubyen enpir pour bann seremoni. Kan en Izraelit ti enpir, i pa ti pou kapab partisip dan ladorasyon e si i ti fer sa kan i enpir i ti pou kapab ganny met amor. (Levitik 15:31) Si en dimoun ti refize swiv bann lenstriksyon pour pirifye son lekor, ki enkli benny son lekor e lav son lenz, i ti pou ganny “touye parmi kongregasyon.”​—Nonm 19:17-20.

⁷ Menm si konmela nou nepli swiv sa Lalwa ki Moiz ti gannyen, sa i permet nou pour konpran lafason ki Bondye i panse. Wi, Lalwa ti met lanfaz lo nesesite pour sa bann ki ador Bondye reste prop oubyen pir. Zeova pa’n sanze. (Malaki 3:6) I pa aksepte nou ladorasyon si i pa “pir e san defo.” (Zak 1:27) Alors, nou bezwen konnen ki i ekspekte avek nou dan sa domenn.

8. Dan ki domenn Zeova i ekspekte nou pour reste prop oubyen pir?

⁸ Dan Labib, sa mo prop i enplik plis ki zis lapropte fizik. Kan en dimoun i prop devan Bondye i annan pour fer avek tou laspe son lavi. Zeova i ekspekte nou pour reste prop oubyen pir dan kat domenn enportan. Sa i spirityelman, moralman, mantalman e fizikman. Annou egzaminen ki tousala i enplike.

9, 10. Ki savedir reste pir spirityelman e ki bann vre Kretyen i rezete?

 ⁹ Pir spirityelman. San al an detay, reste pir spirityelman i kan nou pa melanz vre ladorasyon avek sa ki fo. Kan bann Izraelit ti pe sorti Babilonn pour retourn Zerizalenm, zot ti bezwen pran aker sa lankourazman: “Sorti laba, pa tous nanryen enpir; . . . gard zot lekor pir.” (Izai 52:11) Bann Izraelit ti pe retourn kot zot prensipalman pour reetablir ladorasyon Zeova. Alors, sa ladorasyon ti pou bezwen pir, san ganny kontaminen avek okenn lansennyman, pratik ek koutim sorti dan bann larelizyon Babilonn ki pa fer plezir Bondye.

¹⁰ Pareyman ozordi, bann vre Kretyen i bezwen veye ki zot pa ganny kontaminen avek fo ladorasyon. (1 Korentyen 10:21) Nou bezwen fer byen atansyon dan sa domenn, akoz lenfliyans ki fo larelizyon i annan i partou. Dan bokou pei, plizyer tradisyon, bann aktivite ek seremoni i relye avek fo lansennyman relizye, parey sa krwayans ki ler en dimoun i mor i annan en keksoz dan li ki kit son lekor. (Eklezyast 9:5, 6, 10) Bann vre Kretyen i rezet bann koutim ki enplik bann fo krwayans relizye. * Nou pa pou les presyon ki lezot i met lo nou fer nou fer konpromi konsernan bann standar ki Labib in mete pour en ladorasyon pir.​—Akt 5:29.

11. Ki i enplike pour vin pir moralman e akoz i tre enportan ki nou reste pir dan sa domenn?

¹¹ Pir moralman. Pour kapab reste pir moralman, en dimoun i bezwen rezet tou sort kalite limoralite seksyel. (Efezyen 5:5) I tre enportan ki nou reste pir moralman. Parey nou pou vwar dan sa lot sapit dan sa liv, pour nou kapab reste dan lanmour Bondye, nou pou bezwen ‘elwanny nou avek bann pratik imoral.’ Sa bann ki fer bann pratik imoral e ki pa repantir, “pa pou erit Rwayonm Bondye.” (1 Korentyen 6:9, 10, 18) Devan Bondye, sa bann ki fer  sa bann aksyon zot parmi sa bann ki “abominab [oubyen degoutan].” Si zot pa vin pir moralman zot pou eksperyans sa “dezyenm lanmor.”​—Revelasyon 21:8.

12, 13. Ki konneksyon i annan ant sa ki nou panse ek nou aksyon e ki mannyer nou kapab reste pir mantalman?

¹² Pir mantalman. Sa ki nou panse i pous nou pour fer aksyon. Si nou gard bann move panse dan nou lespri ek leker, to ou tar nou pou kapab fer sa ki mal. (Matye 5:28; 15:18-20) Me si nou met dan nou lespri sa ki pir, bann bon panse, nou kapab ganny motive pour toultan annan en bon kondwit. (Filipyen 4:8) Ki mannyer nou kapab reste pir mantalman? En keksoz ki byen mazinen, se ki nou bezwen evit okenn kalite divertisman ki kapab sali nou lespri. * Apre, nou kapab met bann bon panse dan nou lespri kan nou etidye Parol Bondye regilyerman.​—Psonm 19:8, 9.

¹³ Pour nou reste dan lanmour Bondye, i tre enportan ki nou reste pir spirityelman, moralman e mantalman. Dan lezot sapit sa liv, sa bann diferan laspe dan lapropte oubyen lapirte i ganny diskite pli an detay. Me aprezan, annou egzamin sa katriyenm laspe, sa i lapropte fizik.

14. Akoz lapropte fizik i pa zis en keksoz personnel?

¹⁴ Lapropte fizik i enplik kit nou lekor ek nou lanvironnman prop. Eski en tel lapropte i en keksoz personnel ki personn pa devret fatig li avek lezot? Sa i pa kapab leka pour bann adorater Zeova. Parey nou’n deza dir oparavan, nou lapropte fizik i enportan pour Zeova pa zis akoz i pour nou prop dibyen, me osi akoz nou pe reprezant li. Mazin sa legzanp ki nou ti mansyonnen o konmansman. Si ou vwar en zanfan ki toultan sal oubyen tou debraye, pa sa pou fer ou demande ki kalite paran i annan! Nou pa anvi okenn keksoz konsernan nou laparans oubyen lafason ki nou viv fer  dimoun koz an mal lo nou Papa dan lesyel oubyen pour anpes dimoun konsantre lo sa mesaz ki nou prese. Parol Bondye i dir: “Nou pa oule plas okenn lobstak devan personn, pour ki nou servis pour Bondye pa ganny blanmen. Me okontrer nou fer tou nou posib pour viv konman bann serviter Bondye.” (2 Korentyen 6:3, 4) Me ki mannyer nou kapab reste prop fizikman?

15, 16. Ki i enplike pour annan en bon lizyenn e ki mannyer nou lenz i devret ete?

¹⁵ Nou lizyenn ek laparans. Menm si sak pei i annan diferan kiltir ek fason viv, an zeneral nou kapab trouv sifizaman savon ek delo pour benny nou lekor regilyerman e pour fer sir ki nou ansanm avek nou zanfan nou prop. Pour annan en bon lizyenn, i enkli savonn nou lanmen avek savon e lav li avek delo avan nou manze oubyen tous manze. Nou  osi fer sa apre ki nou’n servi kabinen, apre ki nou’n lav oubyen sanz napi en pti baba. Kan nou lav nou lanmen avek savon sa i kapab anpes nou malad e anfet i sov lavi. I kapab anpes viris ek bakteri danzere ganny transmet e i osi anpes dimoun ganny maladi ek ladyare. Dan bann pei kot normalman i napa en sistenm desarz, petet malpropte i bezwen ganny antere parey ti leka dan lepok bann Izraelit.​—Deterononm 23:12, 13.

¹⁶ Pour ki nou lenz i prop e byen prezantab, nou pou bezwen lav zot regilyerman. I pa neseser ki en Kretyen i met lenz ser oubyen dernyen lanmod, me plito son lenz i devret prop, byen drese e respektab. (1 Timote 2:9, 10) Nenport landrwa kot nou ete, nou ti a kontan ki nou laparans i “fer loner lansennyman lo Bondye, nou Sover.”​—Tit 2:10.

17. Akoz nou lakaz ek son lanvironnman i devret prop e prezantab?

¹⁷ Nou lakour ek lanvironnman. Petet nou lakaz pa sitan zoli oubyen deliks, me i bezwen prop e prezantab dapre ki nou sitiasyon i permet nou. Pareyman si nou annan en transpor ki nou al lasal oubyen predikasyon ladan, nou devret fer nou mye pour gard li prop anndan e an deor. Annou pa bliye ki ler nou lakaz ek son lanvironnman i prop, sa i donn en bon temwannyaz. Apre tou, nou ansenny dimoun ki Zeova i en Bondye ki prop, ki i pou “detri bann ki detri later,” e ki son Rwayonm pou fer later vin en paradi kot nou pou reste. (Revelasyon 11:18; Lik 23:43) Sirman nou ti a kontan ki nou lakaz ek nou keksoz i montre lezot ki depi konmela menm nou pe devlop sa bon labitid ki pou akseptab dan sa nouvo lemonn ki pe vini.

18. Ki mannyer nou kapab montre respe pour nou Lasal Rwayonm?

¹⁸ Nou landrwa ladorasyon. Nou lanmour pour Zeova i motiv nou pour montre respe pour nou Lasal Rwayonm, sa landrwa kot nou ador Bondye. Kan bann nouvo i vin kot lasal, nou ti a kontan ki zot annan en bon pwennvi lo nou landrwa kot nou fer renyon. Alors, regilyerman nou bezwen netway e mentenir lasal dan en bon kondisyon pour fer  sir ki i reste zoli e atiran. Nou montre respe pour nou Lasal Rwayonm kan nou fer sa ki nou kapab pour gard li dan en bon kondisyon. I en privilez pour nou volonter pour ede fer renovasyon e “repar” nou landrwa kot nou ador Bondye. (2 Kronik 34:10) Nou aplik menm prensip kan nou zwenn dan en Lasal Lasanble oubyen lezot landrwa ki nou servi pour lasanble.

19. Ki nou bezwen evite pour kit nou lekor prop fizikman e konman Labib i ed nou dan sa domenn?

¹⁹ Pour ki nou reste prop fizikman, nou bezwen pa sali nou lekor avek bann move labitid ek pratik, parey fimen, abiz lalkol e servi bann sibstans ki fer dimoun adikt oubyen ki sanz leta lespri en dimoun san okenn rezon medikal. I vre ki dan Labib ou pa pou vwar non tou sa bann labitid ek pratik degoutan ki egziste partou dan lemonn ozordi. Me i kontyen bann prensip ki permet nou konpran ki mannyer Zeova i santi anver tousala. Lefet ki nou konn pwennvi Zeova an rapor avek sa, nou lanmour pour li i pous nou pour fer keksoz ki pou fer li kontan. Aprezan annou egzamin senk prensip baze lo Labib.

20, 21. Ki kalite pratik Zeova i oule nou rezete e ki tre bon rezon nou annan pour ekout li?

²⁰ “Tou sa bann promes in fer pour nou, byenneme; alor annou pirifye nou avek tou sa ki sali lekor ek lespri, e fer tou pour nou vin konpletman sen an vivan avek respe devan Bondye.” (2 Korentyen 7:1) Zeova i anvi ki nou rezet bann pratik ki sali nou lekor e ki kapab gat nou lespri, oubyen kontrol lafason ki nou panse. Alors, nou bezwen rezet bann pratik ki fer dimoun adikt ki nou konnen i afekte dimoun fizikman oubyen mantalman.

²¹ Labib i donn nou en tre bon rezon pour “pirifye nou avek tou sa ki sali lekor ek lespri.” Remarke ki 2 Korentyen 7:1 i konmanse par dir: “Tou sa bann promes in fer pour  nou.” Ki promes? Parey son verse avan i fer resorti, Zeova i fer sa promes: “Mon a resevwar zot. Mon a vin en papa pour zot.” (2 Korentyen 6:17, 18) Zis mazin sa: Zeova i promet ki i pou protez ou e i pou kontan ou zis parey en papa i kontan son zanfan. Me Zeova pou akonplir sa bann promes si zis ou pirifye ou avek sa ki sali “lekor ek lespri.” Pa i ti pou vreman bet, zis pour les en labitid oubyen pratik degoutan, gat sa relasyon pros e presye ki ou kapab annan avek Zeova!

22-25. Ki prensip Labib ki kapab ed nou evit bann move labitid ek pratik?

²² “Kontan [Zeova] ou Bondye avek tou ou leker, avek tou ou lam, e avek tou ou lespri.” (Matye 22:37) Sa i sa pli gran komannman ki Zezi ti swazir. (Matye 22:38) Zeova i merite ganny sa kalite lanmour ki sorti kot nou. Alors, pour kontan li avek tou nou leker, nanm ek lespri, nou devret rezet bann pratik ki kapab fer nou viv mwens letan, oubyen anpes nou byen servi nou abilite pour reflesir ki Bondye in donn nou.

²³ “[Zeova] ki donn tou dimoun, lavi, respirasyon ek tou keksoz.” (Akt 17:24, 25) Lavi i en kado sorti kot Bondye. Nou anvi montre respe pour sa kado akoz nou kontan sa Enn ki’n donn nou sa kado. Nou evit okenn labitid oubyen pratik ki kapab afekte nou lasante, akoz nou konsyan ki sa bann pratik i montre en gro mank respe pour sa kado lavi.​—Psonm 36:9.

²⁴ “Kontan ou prosen parey ou kontan ou prop lekor.” (Matye 22:39) Bann move labitid ek pratik i pa zis afekte sa enn ki pe pratik li, me osi lezot. Par egzanp, en dimoun ki pa fimen i kapab ganny afekte si i o bor enn ki pe fimen. En dimoun ki pe fer dimal sa bann o bor li pe kas sa komannman Bondye pour kontan son prosen. E alors, menm si i dir i kontan Bondye, sa i pa vre.​—1 Zan 4:20, 21.

²⁵ “Soumet zot avek bann dirizan ek lotorite e obei zot.” (Tit 3:1) Dan bokou pei i en lofans kont lalwa pour en dimoun annan oubyen servi drog. Konman bann vre Kretyen nou  pa an posesyon drog oubyen servi bann drog ilegal.​—Romen 13:1.

26. (a) Ki nou bezwen fer pour reste dan lanmour Bondye? (b) Akoz i napa pli bon fason pour viv ki ler nou reste prop devan li?

²⁶ Pour nou reste dan lanmour Bondye, nou pou bezwen reste prop pa zis dan enn oubyen de laspe me dan tou laspe nou lavi. I kapab pa fasil pour abandonn e rezet bann move labitid ek pratik, me i pa enposib. * Vreman i napa pli bon fason pour nou viv nou lavi, akoz Zeova i toultan ansenny nou pour nou prop dibyen. (Izai 48:17) Pli enportan, kan nou reste prop oubyen pir, nou kapab ganny satisfaksyon akoz nou konnen ki nou pe anmenn laglwar lo sa Bondye ki nou kontan e alors nou pe reste dan son lanmour.