1-3. (a) Nama kebuah indai nentuka anak iya kemas enggau beresi? (b) Nama kebuah Jehovah deka nembiak Iya beresi, lalu nama meransang kitai nyaga pemeresi?

SEBEDAU ngemai anak keluar bejalai, indai nentuka anak iya udah mandi sereta ngena gari ti kemas enggau beresi. Iya nemu pemeresi nya pulaika pengerai anak. Iya mega nemu chara ngintu anak ngambarka sapa apai indai anak nya.

² Apai kitai ti di serega, Jehovah, deka nembiak Iya beresi. Bup Kudus madah: “Nuan mandangka Diri tuchi ngagai orang ke tuchi.” * (Masmur 18:26) Jehovah rinduka kitai; Iya nemu ngintu pemeresi nya ulih ngenataika  penguntung ke kitai. Jehovah mega ngarapka kitai ngenataika puji ngagai Iya. Endang amat, pemeresi enggau ulah kitai ti manah ngenataika mulia ngagai Jehovah enggau nama Iya ti kudus.—Esekiel 36:22; bacha 1 Peter 2:12.

³ Ketegal nemu Petara rinduka orang ti beresi, tu meransang kitai nyaga pemeresi. Kitai deka chara pengidup kitai ngenataika basa ngagai Iya laban kitai rinduka Iya. Kitai mega deka meruan dalam pengerindu Iya. Aram kitai beratika nama kebuah kitai patut nyaga pemeresi, pemeresi nyengkaum nama, lalu baka ni kitai ulih nyaga pemeresi. Tu nulung kitai nemu ni utai ti patut diubah manah agi.

4, 5. (a) Nama batang kebuah kitai nyaga pemeresi? (b) Baka ni pemeresi Jehovah ulih dipeda ari utai ti digaga Iya?

⁴ Siti chara Jehovah ngiring kitai iya nya ngena teladan Iya. Bup Kudus meransang kitai nunda ‘teladan Petara.’ (Epesus 5:1) Tu batang kebuah kitai patut nyaga pemeresi: Jehovah, Petara ke disembah kitai nya beresi, tuchi sereta kudus ba semua utai.—Bacha Adat Lewi 11:44, 45.

⁵ Pemeresi Jehovah ulih dipeda ari kualiti enggau chara Iya ngereja pengawa. Kitai meda tu ari utai ti digaga Iya. (Rome 1:20) Dunya tu mega digaga nyadi alai diau ti beresi ke mensia. Jehovah udah ngatur kaul entara semua utai idup ngambika ulih meresi angin enggau ai. Nya alai, dunya tu ulih meresi diri empu. Nyadi, pemeresi endang utai ti beguna ba Petara ke “ngaga dunya.” (Jeremiah 10:12) Kitai mega patut nyaga pemeresi.

6, 7. Baka ni Adat Moses madahka pemeresi nya syarat ngagai orang ke nyembah Jehovah?

⁶ Siti agi kebuah kitai patut nyaga pemeresi laban Jehovah, Pemerintah kitai ti Pemadu Tinggi, deka nembiak  Iya beresi. Ba Adat ke diberi Jehovah ngagai orang Israel nunjukka kaul entara pemeresi enggau sembah. Adat madahka maya Hari Pengampun Dosa, imam besai patut mandi dua kali. (Adat Lewi 16:4, 23, 24) Bala imam ke bejalaika pengawa diasuh nuchi jari enggau kaki sida sebedau meri pemeri ngagai Jehovah. (Pemansut 30:17-21; 2 Bansa Israel 4:6) Adat madahka kira-kira 70 iti pekara ti ulih ngamahka tubuh sereta ngasuh sida enda ulih nyembah Petara. Enti orang Israel sengaja nyembah Petara maya sida enda tuchi, sida patut diukum bunuh. (Adat Lewi 15:31) Sida ke enggai nuchi diri nitihka Adat, nyengkaum mandi enggau masu gari, patut diukum bunuh.—Penyampau 19:17-20.

⁷ Taja pan kitai enda agi di baruh Adat Moses, tu nulung kitai nemu nama runding Petara pasal pemeresi. Nya alai, Adat nunjukka pemeresi nya syarat ngagai orang ke deka nyembah Petara. Jehovah enda berubah. (Malaki 3:6) Jehovah semina nerima sembah kitai “ti tuchi, ti bendar.” (James 1:27) Nya alai, kitai patut nemu utai ti dikedeka Iya pasal pekara tu.

8. Jehovah deka kitai beresi ba empat pekara. Padahka.

⁸ Ba Bup Kudus, pemeresi ukai semina ba tubuh aja. Beresi ba mata Petara nyengkaum semua pekara ba pengidup kitai. Jehovah deka kitai beresi ba empat pekara tu—pengarap, ulah, runding sereta pemeresi diri. Aram kitai beratika semua pekara tu.

9, 10. Nama reti tuchi ba pengarap, lalu nama patut diseliahka orang Kristian ti bendar?

⁹ Tuchi ba pengarap. Reti iya, kitai nadai kaul agi enggau pengarap ti bula. Lebuh orang Israel ninggalka Babilon, lalu pulai baru ke Jerusalem, sida diasuh nitihka jaku  peransang tu: “Angkat ari menua Babilon, . . . anang negu utai ti enda tuchi. Intu diri kudus.” (Isaiah 52:11) Orang Israel pulai baru ke Jerusalem ngambika sembah ngagai Jehovah ulih diaduka baru. Sembah tu patut tuchi, iya nya enda dikamahka enggau ajar, pengawa sereta adat ba pengarap orang Babilon ti enda bebasaka Petara.

¹⁰ Kemaya hari tu, orang Kristian ti bendar patut bejimat ngambika enda dikamahka pengarap pelesu. (Bacha 1 Korint 10:21.) Kitai bejimat laban pengarap pelesu bisi ba dini-dini endur. Pengarap pelesu ngajar mayuh ajar ti bula. Chunto, sida ngajar orang ke udah mati nyadi semengat. Nya alai, orang ke pechayaka ajar sida nganjung pemakai ngagai pendam ngambika diberi ngagai orang ke udah mati. (Pengajar 9:5, 6, 10) Orang Kristian nyeliahka adat ti bekaul enggau pengarap pelesu. * Kitai anang ngasuh orang bukai nagang kitai ari nitihka ajar Bup Kudus pasal pengarap ti tuchi.—Kereja Rasul 5:29.

11. Ulah ti tuchi nyengkaum nama, lalu nama kebuah kitai patut ngembuan ulah ti tuchi?

¹¹ Ulah ti Tuchi. Tu nyengkaum nyeliahka semua ulah ti kamah. (Bacha Epesus 5:5.) Nya alai, kitai patut ngembuan ulah ti tuchi. Ba Pelajar 9, kitai diasuh nyeliahka “ulah ti kamah” ngambika meruan dalam pengerindu Petara. Orang ke butang ti enda nesal ati ‘enda ulih bempu Perintah Petara.’ (1 Korint 6:9, 10, 18) Ba mata Petara, sida “ngereja penyai.” Enti sida enda ngembuan ulah ti tuchi, “endur alai sida nya . . . pemati ti kedua.”—Pemandang 21:8.

12, 13. Nama kaul entara runding enggau utai ti dikereja, lalu baka ni kitai ulih nyaga runding ngambika tuchi?

¹² Tuchi ba runding. Runding bekaul enggau utai ti  dikereja. Enti kitai ngelakka runding ti salah tumbuh ba pikir enggau ati, nyau kelama kitai deka ngereja pengawa ti enda tuchi. (Matthew 5:28; 15:18-20) Tang, enti kitai ngisi runding enggau utai ti tuchi, kitai deka diperansang ngetanka ulah ti tuchi. (Bacha Pilipi 4:8.) Baka ni kitai ulih nyaga runding ngambika tuchi? Siti chara nya, kitai patut nyeliahka sebarang pemerindang ke ulih ngamahka runding kitai. * Nambahka nya, kitai mega ulih belajarka Bup Kudus ninting hari.—Masmur 19:8, 9.

¹³ Ngambika meruan dalam pengerindu Petara, kitai patut nyaga pengarap, ulah enggau runding kitai tuchi. Aram kitai belajar pekara keempat, iya nya pemeresi diri.

14. Nama kebuah pemeresi diri bisi kaul enggau orang bukai?

¹⁴ Pemeresi diri nyengkaum pemeresi tubuh enggau reta kitai. Kati pemeresi diri bisi kaul enggau orang bukai? Bisi. Baka ke udah dipelajar, Jehovah deka kitai nyaga pemeresi diri ukai semina ketegal ulih nguntungka kitai, tang mega ketegal kitai ngambarka sapa Jehovah nya. Peratika baru chunto keterubah tadi. Meda anak ke selalu kamah tauka enda diintu ngasuh nuan bisi runding ke enda manah pasal apai indai iya. Kitai enggai chara ngintu pemeresi diri tauka chara pengidup kitai ngemaluka Apai ti di serega, tauka ngasuh Berita Manah ke dikerembaika kitai enda diterima orang. Paul nulis: ‘Kami nadai mempang jalai orang, ngambika orang enda ulih besalahka pengawa kami, tang dalam semua utai enggau ngena semua macham chara kami udah ngayanka diri amat ulun Petara.’ (2 Korint 6:3, 4) Nya alai, baka ni kitai ulih nyaga pemeresi diri?

15, 16. Nama reti nyaga pemeresi ti manah, lalu baka ni enggau gari kitai?

 ¹⁵ Pemeresi tubuh. Taja pan adat enggau chara pengidup ba siti-siti menua enda sebaka, kitai bisi sabun enggau ai kena mandi ninting hari, lalu nentuka kitai enggau anak kitai beresi. Nyaga pemeresi ti manah nyengkaum masu jari ngena sabun enggau ai sebedau makai tauka nyediaka pemakai, pengudah ngena jamban enggau pengudah ngintu anak ke udah bira. Tu ulih nyeliahka penyakit sereta nyelamatka nyawa. Iya ulih nagang virus enggau bakteria ti tau nganu ari ngelekai, lalu nulung orang nyeliahka penyakit chirit tauka muang ai. Ba sekeda menua, orang engka nadai jamban ti meruan. Sida engka numbak lubang maya deka bira, lalu udah nya ngelamun tai sida, baka ke digaga orang Israel menya.—Ulang Adat 23:12, 13.

 ¹⁶ Gari kitai mega patut selalu dibasu ngambika beresi enggau manah dipeda. Gari orang Kristian enda ibuh mar tauka nitih setail baru, tang iya patut beresi, kemas enggau pengumbas iya. (Bacha 1 Timoti 2:9, 10.) Enda ngira dini alai kitai, kitai deka pemeresi tubuh ‘mai puji ngagai ajar ti diberi Petara ti Juruselamat kitai.’—Titus 2:10.

17. Nama kebuah rumah enggau reta kitai patut beresi sereta manah dipeda?

¹⁷ Rumah enggau reta. Rumah kitai engka enda manah tauka mar, tang iya patut beresi sereta manah dipeda. Baka nya mega, enti kitai ngena rengka pengangkut ngagai gempuru tauka maya nginjil, kitai nentuka iya beresi ari dalam enggau luar. Anang enda ingat, pemeresi rumah enggau reta kitai ulih ngambarka sapa Petara ti disembah kitai. Pia mega, kitai ngajar orang Jehovah nya Petara ti tuchi. Iya deka “ngerusak sida ke nyadi pengerusak dunya,” lalu Perintah Iya deka ngubah dunya kitai tu nyadi paradais. (Pemandang 11:18; Luke 23:43) Kitai endang deka pemeresi rumah enggau reta kitai nunjukka kitai diatu nyediaka diri, ngambika ulih diau ba dunya baru ti deka datai.

18. Baka ni kitai bebasaka Palan Gempuru?

¹⁸ Endur kitai nyembah Petara. Pengerindu ngagai Jehovah meransang kitai bebasaka Palan Gempuru kitai, laban nya endur nyembah Iya. Lebuh orang ke baru datai ngagai Palan Gempuru, kitai deka sida bisi runding ti manah pasal endur gempuru kitai. Kitai patut selalu meresi sereta ngaduka endur gempuru ngambika iya manah dipeda. Kitai bebasaka Palan Gempuru kitai, enti kitai nyaga pemanah iya enggau naka ulih. Endang peluang ti manah enti kitai ngena jam kitai nulung meresi sereta “ngaduka” endur kitai nyembah Petara. (2 Bansa Israel  34:10) Kitai mega nyaga pemeresi ba endur gempuru maya gempuru besai.

19. Nama patut diseliahka kitai ngambika tubuh tuchi, lalu baka ni Bup Kudus nulung kitai ba pekara tu?

¹⁹ Kitai patut nyeliahka ulah enggau pengawa ti ngasuh tubuh kitai enda tuchi, baka nginsap, makai buah pinang, balat ngirup ai bisa, enggau ngena utai ti tau ngasuh gian sereta enda ulih berunding enggau betul. Bup Kudus enda madahka enggau terang semua ulah enggau pengawa ti enda tuchi kemaya hari tu. Tang, iya ngembuan ajar ti ulih nulung kitai nemu baka ni asai ati Jehovah pasal utai nya. Laban kitai nemu runding Jehovah, pengerindu kitai ngagai Iya meransang kitai milih jalai pengidup ti diterima Iya. Aram kitai berandauka lima ajar Bup Kudus ti ulih dikena kitai.

20, 21. Jehovah deka kitai bibas ari pengawa ti baka ni, lalu nama ajar ti patut dititihka kitai?

²⁰ ‘Laban kitai bisi semaya tu, menyadi, aram kitai nuchi diri empu ari semua utai ti ngamahka tubuh enggau roh kitai, lalu nyadi pemadu kudus nangika Petara.’ (2 Korint 7:1) Jehovah deka kitai bibas ari pengawa ti tau ngamahka tubuh enggau ngerusak runding. Nya alai, kitai patut nyeliahka utai ti ulih ngasuh kitai gian.

²¹ Bup Kudus meri kitai kebuah ti berat kitai patut “nuchi diri empu ari semua utai ti ngamahka.” Peratika, 2 Korint 7:1 belabuh munyi tu: “Laban kitai bisi semaya tu.” Nama semaya tu? Baka ke dipadah ba ayat ke dulu agi, Jehovah besemaya: “Aku deka nerima kita, lalu Aku deka nyadi Apai kita.” (2 Korint 6:17, 18) Pikirka: Jehovah besemaya deka nyaga sereta sayauka nuan baka apai ti sayauka anak iya. Tang Jehovah deka ngamatka semaya tu, enti  nuan nyeliahka sebarang utai ti ngamahka tubuh enggau runding. Nya alai, anang nejuka ulah tauka pengawa ti kamah nagang nuan bulih kaul ti semak sereta berega enggau Jehovah!

22-25. Nama ajar Bup Kudus ti ulih nulung kitai nyeliahka ulah enggau pengawa ti enda tuchi?

²² ‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ (Matthew 22:37) Jesus milih pesan tu nyadi pesan ti pemadu besai. (Matthew 22:38) Jehovah patut nerima pengerindu ke baka nya ari kitai. Enti deka rinduka Iya enggau pengabis ati, semengat sereta runding, kitai patut nyeliahka pengawa ti ulih ngasuh umur kitai enda panjai, tauka ngasuh kitai enda nemu berunding.

²³ “[Jehovah] ke meri pengidup enggau seput, enggau semua utai bukai, ngagai semua mensia.” (Kereja Rasul 17:24, 25) Nyawa datai ari Jehovah. Kitai rinduka Iya, nya alai kitai deka bebasaka nyawa. Kitai nyeliahka sebarang ulah tauka pengawa ti ngerusak pengerai kitai, laban kitai nemu pengawa nya nunjukka diri balat enda bebasaka nyawa.—Masmur 36:9.

²⁴ “Rinduka pangan nuan baka nuan ke rinduka diri empu.” (Matthew 22:39) Ulah enggau pengawa ti enda tuchi ukai semina ngachau orang ke ngereja pengawa nya, tang mega orang ke semak enggau iya. Chunto, asap insap orang ke nginsap ulih ngerusak pengerai orang ke semak enggau iya. Sida ke ngemedis orang ke semak sida ngelanggar perintah Petara ke ngasuh kitai rinduka orang bukai. Jaku sida ke ngumbai diri rinduka Petara nya semina jaku ngapa.—1 John 4:20, 21.

²⁵ “Nunduk ngagai orang ke megai perintah enggau ngagai orang ke megai kuasa.” (Titus 3:1) Ba mayuh menua, ngembuan tauka ngena sekeda dadah nya pengawa  ti ngelangar undang-undang. Orang Kristian ke bendar enda ngembuan tauka ngena dadah enggau chara ti salah.—Rome 13:1.

26. (a) Nama patut digaga kitai ngambika meruan dalam pengerindu Petara? (b) Nama kebuah mengkang tuchi ba mata Petara nya chara pengidup ti pemadu manah?

²⁶ Ngambika meruan dalam pengerindu Petara, kitai patut mengkang tuchi ukai semina ba siti tauka dua iti pekara aja, tang ba semua pekara. Ninggalka sereta nyeliahka ulah enggau pengawa ti enda tuchi engka enda senang, tang iya ulih dikereja. * Tu meh chara pengidup ti manah, laban Jehovah seruran ngajar utai ti nguntungka kitai. (Bacha Isaiah 48:17.) Kelebih agi, enti mengkang tuchi kitai puas ati, laban nemu diri ngambarka Petara ti dikerindu kitai, lalu ulih meruan dalam pengerindu Iya.