1-3. (a) Sooq anaanap ernermi ipiitsuunissaa isumagissavaa? (b) Sooq Jehovap kiffami minguitsuunissaat kissaatigaa, minguitsuujuarnissatsinnullu suut kajumississutigaavut?

ANAANAP ernini kusassarpaa. Uffarnissaa atisaasalu ipiitsuullutillu torersuunissaat isumagaa. Anaanap nalunngilaa eqqiluisaarnissaq ernerata peqqissusianut pingaaruteqarluinnartoq. Nalunngilaalu meeqqap ipiitsuunera angajoqqaavinut ataqqinaataasinnaasoq.

² Jehovap, Ataatatta qilammiusup, kiffami minguitsuunissaat kissaatigaa. Oqaasiani ima allassimavoq: “Minguissutsit takutittarpat minguitsuusumut.” * (Tuss  18:27, 1990) Jehovap asavaatigut; nalunngilaa minguitsuujuarnissarput uagutsinnut iluaqutaangaartoq. Aamma Jehovap nalunaajaasorigamisigut uagutsinnit ataqqinaatissinneqarnissani piumasaraa. Aap, ipiitsuullutalu ileqqorissuunerput Jehovamut taassumalu aqqanut illernartumut ataqqinaataajumaarpoq. — Ez 36:22; 1 Petrusi 2:12 atuaruk.

³ Guutip inunnik minguitsunik asanninneranik ilisimasaqarnerput minguitsuujuarnissatsinnut kajumississutigaarput. Jehova asagatsigu inooriaatsitsigut taanna ataqqinaatissikkusupparput. Aamma asanninneraniittuinnarusuppugut. Taamaattumik misissoriartigu sooq minguitsuujuartariaqarnersugut, minguitsuuneq qanoq paasisariaqarnersoq qanorlu minguitsuujuarsinnaanersugut. Taakku misissorutsigit sunik sulissutigisassaqarnerluta paasisinnaavarput.

4, 5. (a) Minguitsuujuarnissatsinnut pissutaasoq pingaarnerpaaq suua? (b) Jehovap minguitsuunera pinngortitaanit takussaasunit qanoq erserpa?

⁴ Jehovap uagutsinnik siulersueriaasiisa ilagaat maligassiuinera. Oqaasiani kajumissaarneqarpugut Taanna ‘maligassarissagipput’. (Ef 5:1) Taamaattumik minguitsuujuarnissatsinnut pissutaasoq pingaarnerpaaq unaavoq: Jehovap Guutip pallorfigisatta minguilluinnartuullunilu illernarluinnartuunera. — 3 Mosesi 11:44, 45 atuakkit.

⁵ Jehovap pissusii iliuuserisartagaalu — minguitsuunera ilanngullugu — pinngortitarsuarmit ersertarput. (Rom 1:20) Jehovap nunarsuaq inuit angerlarsimaffissaattut minguitsutut pinngortippaa. Aamma silaannarmik imermillu minguiaataasinnaasut, assersuutigalugu  tappiorannartut aalajangersimasut perlukunik ajoqutaajunnaarsitsisartut, pinngortippai. Inuit namminissarsiorlutillu piumatussusiat pissutigalugu uuliamik kuuttoortoqaraangat allanillu mingutsitsisoqaraangat ilaatigut saliinermi tappiorannartut taakkua ilaat ilisimatuunit atorneqartarput. Ersarippoq ‘nunamik Pinngortitsisup’ minguissuseq pingaartikkaa. (Jer 10:12) Aamma uagut pingaartittariaqarparput.

6, 7. Mosesip inatsisaanit qanoq erserpa Jehovap imminik pallorfiginnittut minguitsuunissaat piumasarigaa?

⁶ Minguitsuujuarnissatsinnut pissutaasoq alla tassaavoq Jehovap, Naalakkatta kisimi oqartussaasup, imminik pallorfiginnittut minguitsuunissaannik piumasarinninnera. Jehovap inatsisaani Israelikkunnut tunniussaani minguissuseq pallorfiginninnerlu attuumassuteqarluinnarput. Mosesip inatsisai naapertorlugit ullormi saammaannartitsivimmi palasiuneq ataasiaannarani marloriarlunili uffartariaqartarpoq. (3 Mos 16:4, 23, 24) Palasit Jehovamut pilliitinnatik assatik isikkatillu eqqiartartussaavaat. (2 Mos 30:17-21; 2 Nal 4:6) Timikkut minguttuunermut aamma pallorfiginninnissamut minguttuunermut pissutaasut 70-it missaat Inatsisini allassimapput. Israelikkuusoq minguttuutilluni Jehovamik pallorfiginninnermut peqataasinnaanngilaq — peqataappat allaat toqumik pillarneqarnermik kinguneqarsinnaavoq. (3 Mos 15:31) Minguersarneq pillugu inatsisit, assersuutigalugu uffarneq atisanillu errorsineq pillugu inatsisit, malikkumanngikkunigit “katersorsimasunit piiagaassaaq”, tassa toqumik pillarneqassaaq. — 4 Mos 19:17-20.

⁷ Uagut Mosesip inatsisaanik maleruaasussaanngikkaluarluta taakku Jehovap isiginnittaasianik paasinninnissatsinnut iluaqutigisinnaavavut. Mosesip inatsisaanit erseqqippoq  Guutimik pallorfiginnittut minguitsuunissaat piumasaqaataasoq. Jehova allanngorsimanngilaq. (Mal 3:6) Pallorfiginninnerput aatsaat Jehovamit akuerineqarsinnaavoq ‘minguitsuuguni’. (Jaak 1:27) Taamaattumik tamatumunnga tunngatillugu uagutsinnit suna piumasarineqarnersoq paasisariaqarparput.

8. Sutigut minguitsuujuarnissarput Jehovap piumasaraa?

⁸ Guutip isaani minguitsuujumalluta inuunitsinni sutigut tamatigut minguitsuusariaqarpugut. Jehovap sisamatigut — anersaakkut, ileqqussatigut, eqqarsaatitigut timikkullu — minguitsuujuarnissarput piumasaraa. Taakku sisamat sammeriartigit.

9, 10. Anersaakkut minguitsuuneq qanoq paasisariaqarpa, kristumiullu ilumoortut suna mianersuutigisarpaat?

⁹ Anersaakkut minguitsuuneq. Tamanna qanoq paasisariaqarpa? Naatsumik oqaatigalugu pallorfiginninneq ilumoortoq pallorfiginninnermit eqqunngitsumit mingutsinneqassanngilaq. Israelikkut Jerusalemimut uterniarlutik Babylonimit aniguisinneqaramik Guutip peqqussutaa una maleruartussaavaat: “Illoqarfimmit aallaritsi, mingunnartumik attueqinasi! ... Minguersaritsi [minguitsuujuaritsi, NW].” (Es 52:11) Pingaarnerpaamik Israelikkut uterput Jehovamik pallorfiginninneq pilerseqqinniarlugu. Taakkua Guutisiornerat minguitsuusariaqarami Babylonip upperisarsiornikkut ajoqersuutaanit ileqquinillu Guutimik nikanarsaataasunit mingutsinneqassanngilaq.

¹⁰ Uagut kristumiuugatta ilumoortut upperisarsiornermit eqqunngitsumit mingutsinneqannginnissarput mianersuutigisariaqarparput. (1 Korinthimiut 10:21  atuaruk). Upperisarsiorneq eqqunngitsoq sunniuteqangaarmat anersaakkut eqqumasariaqarpugut. Nunani amerlasuuni ileqqulersuutit sammisartakkallu ajoqersuutinut eqqunngitsunut, assersuutigalugu tarnermik toqujuitsumik ajoqersuummut, attuumassuteqartartut amerlapput. (Oqal 9:5, 6, 10) Kristumiut ilumoortut upperisarsiornerup eqqunngitsup ajoqersuutaanut attuumassuteqartut ileqqorineq ajorpaat. * Allanit tatineqaraluaruttaluunniit pallorfiginninnermut minguitsumut najoqqutassiat Biibilimeersut maleruartuarumavavut. — ApS 5:29.

11. Ileqqussatigut minguitsuuneq qanoq paasisariaqarpa, tamatumunngalu tunngatillugu minguitsuujuarnissarput sooq pingaaruteqarluinnarpa?

¹¹ Ileqqussatigut minguitsuuneq. Ileqqussatigut minguitsuunermut ilaavoq kinguaassiuutitigut ajortuliornerit qanoq ittulluunniit ingalassimalluinnarnissaat. (Efesosimiut 5:5 atuaruk). Ileqqussatigut minguitsuujuarnissarput pingaaruteqarluinnarpoq. Soorlu kapitalimi tulliuttumi sammissagipput Guutip asanninneraniittuinnarumalluta ‘kinguaassiuutitigut assuarnartuliorneq qimarratigisariaqarparput’ (NW). Allamik isumataarumanatik kinguaassiuutitigut inuunerluttut “Guutip naalagaaffia kingornussarsiarissanngilaat”. (1 Kor 6:9, 10, 18) Taakku Guutip isaani ‘maajunnartuupput’. Ileqqussatigut minguttuujuarunik ‘toqup aappaa pissavaat’. — Saqq 21:8.

12, 13. Eqqarsaativut iliuutsivullu qanoq attuumassuteqarpat, qanorlu eqqarsaatitigut minguitsuujuarsinnaavugut?

¹² Eqqarsaatitigut minguitsuuneq. Eqqarsaatit iliuuseqalersitsisarput. Eqqarsaatipiluit eqqarsaatigiuarlugillu  uummatitsinni sorlanitsikkutsigit eqqunngitsuliornissarput ilimanaateqarluinnarpoq. (Matt 5:28; 15:18-20) Minguitsulli eqqarsaatigiuarnissaat ileqqussatigut minguitsuujuarnissatsinnut kajumississutigissavarput. (Filippimiut 4:8 atuaruk). Eqqarsaatitigut qanoq minguitsuujuarsinnaavugut? Assersuutigalugu eqqarsaatipiloqalersitsisinnaasut aliikkutarinnginnerisigut. * Aamma Guutip oqaasiata ullut tamaasa atuaqqissaarneratigut minguitsut eqqarsaatigiuarsinnaavavut. — Tuss 19:9, 10.

¹³ Guutip asanninneraniittuinnarumalluta anersaakkut, ileqqussatigut eqqarsaatitigullu minguitsuujuarnissarput pingaaruteqarluinnarpoq. Minguitsuunermut tunngasut taakku atuakkami matumani kapitalini  allani sukumiinerusumik sammineqarput. Maanna minguitsuunermut tunngasut sisamaat — timikkut minguitsuuneq, imaluunniit eqqiluisaarneq — sammeriartigu.

14. Sooq isumaqassanngilagut eqqiluisaarnerput eqqiluisaannginnerpulluunniit allat susassarinngikkaat?

¹⁴ Eqqiluisaarnermut ilaavoq timikkut aamma avatangiisitsinnik ipiitsuutitsineq. Imaappali eqqiluisaarnerput eqqiluisaannginnerpulluunniit allat susassarinngikkaat? Jehovap kiffaanut taamaanngilaq. Eqqiluisaarnerput uagutsinnut iluaqutaaginnarnani aammali inuit Jehova pillugu isumaannut sunniuteqartarami Jehovap isaani pingaaruteqarpoq. Kapitalip matuma aallaqqaataani eqqartorneqartoq eqqarsaatigeriaruk. Meeraq kinaluunniit isikkorissarneqarneq ajortoq ipertuujuaannartorlu takugukku taassuma angajoqqaaminit paarilluarneqannginnera eqqarsaatigissavat, ilaa? Soorunami kissaatiginngilarput isikkoqarnerput inooriaaserpulluunniit Ataatatsinnut qilammiusumut kanngunarsaataassasoq imaluunniit inuit tusarliussamik oqaluussissutigisatsinnik tusanngitsoorutigissagaat. Guutip oqaasiani ima allassimavoq: “Sumilluunniit naakkiuffissiiniartanngilagut kiffartuutigisarput tusaamanerlunneqaleqqunagu. Tamatigulli Guutimit kiffarineqartutut takutinniartarpugut.” (2 Kor 6:3, 4) Qanoq eqqiluisaartuarsinnaavugut?

15, 16. Qanoq eqqiluisaarsinnaavugut, atisavullu qanoq ittuussappat?

¹⁵ Timerput atisavullu. Nunamiit nunamut inuunermi atugarineqartut allaassuteqarsinnaagaluartut imermik qaqorsaammillu pinissaq amerlanertigut ajornanngilaq. Eqqiluisaarnermut ilaavoq igannginnitsinni, nerinnginnitsinni, perusuersareernitsinni meeqqamillu  nangilersuereernitsinni assatsinnik qaqorsaaserluta errortorluartarnerput. Imeq qaqorsaallu atorlugit assanik errortorneq napparsimanaveersaartitsisinnaavoq allaallu toqussutaasinnaasunik nappaateqalernaveersaartitsisinnaalluni. Assanik errortorneq aamma inuit timminnginnissaannut iluaqutaasinnaavoq virusinik bakterianillu ajoqutaasunik siammarnaveersaartitsigami. Nunat ilaanni kuuffilerneqanngitsunik illorpassuaqaraluartoq issumi assaariarluni annat matoorneqarsinnaapput, soorlu itsaq Israelimi taamaaliortarsimasut. — 5 Mos 23:13, 14.

¹⁶ Aamma atisavut errorlugillu torersuutinniartariaqarpavut. Kristumiup atisai akisusariaqarnatillu nutaaliaanerpaasariaqanngillat, kisianni ipiitsuusussaallutillu isornaatsuusussaapput. (1 Timotheusi 2:9, 10 atuakkit). Sumiikkaluaruttaluunniit qallikkut ‘Guutip annaassisitta ajoqersuutaanut tamatigut pinnersaataanissarput’ kissaatigaarput. — Tit 2:10.

17. Sooq angerlarsimaffipput pigisavullu ipiitsuullutillu torersuussappat?

¹⁷ Angerlarsimaffipput pigisavullu. Imaassinnaavoq angerlarsimaffipput torrattorujussuunanilu akimarpasinngitsoq, sapinngisarpulli naapertorlugu ipiitsuutittariaqarparput torersuutittariaqarlugulu. Taamatuttaaq ataatsimiigiaraangatta oqaluussigaangattaluunniit biilertarutta biilitta ilua silataatungaalu ipiitsuutinniartariaqarpavut. Puiussanngilarput angerlarsimaffik avatangiisillu torersut nalunaajaataalluartut. Inuimmi ilinniartittarpavut Jehova Guutiusoq minguitsoq ‘nunarsuarmillu aseruisunik aseruissasoq’ naalagaaffialu qanittukkut nunarsuarmik paratiisinngortitsissasoq. (Saqq 11:18; Luk 23:43) Soorunami kissaatigaarput minguitsunik silarsuassamut nutaamut naleqquttunik  ileqqoqalereersimanerput angerlarsimaffitsinnit pigisatsinnillu ersersinneqassasoq.

18. Qanoq naalagaaffilersaarfitsinnik eriaginninnerput ersersissinnaavarput?

¹⁸ Guutimik pallorfiginnittarfipput. Jehovamik asanninnerput kajumississutigalugu naalagaaffilersaarfipput eriagiumavarput, tassanimi Guuti pallorfigisarparput. Ataatsimiigiaqqaartut pallorfiginnittarfitsinnik nuannarinninnissaat kissaatigaarput. Naalagaaffilersaarfipput kusanartuujuaqqullugu aalajangersimasumik eqqiartarnissaa aserfallatsaaliortarnissaalu pisariaqarput. Naalagaaffilersaarfitsinnik eriaginninnerput tamatuminnga paarinnilluarnitsigut ersersittarparput. Kajumilluta piffissarput atorlugu pallorfiginnittarfitsinnik eqqiaaqataallutalu iluarsaasseqataasarnerput immikkut pisinnaatitaaffiuvoq. (2 Nal 34:10) Najoqqutassiat taakku aamma ataatsimeersuartarfitsinnut atuupput.

19. Timikkut minguitsuujuarumalluta sunaveersaartariaqarpugut, tamatumunngalu tunngatillugu Biibili qanoq iluaqutigisinnaavarput?

¹⁹ Timikkut minguitsuujuarumalluta minguttuunnguutaasunik ileqqoqarnaveersaartariaqarpugut. Assersuutigalugu pujortartarneq, imigassamik atornerluineq aamma ikiaroornartunik uerinartunillu nakorsaataanngitsunik atuineq ingalassimalluinnartariaqarpavut. Ileqqut iliuutsillu minguttuut ullumikkut nalinginnaasut Biibilimi eqqaaneqanngikkaluartut najoqqutassiat Biibilimeersut iluaqutigalugit Jehova taakkununnga qanoq isiginnittaaseqarnersoq paasisinnaavarput. Jehovap minguissusermut  isiginnittaasia ilisimagatsigu taassumunnga asanninnerput killinneqaatigalugu taassuma iluarisaatut iliuuseqartarpugut. Najoqqutassiat Biibilimeersut tallimat sammeriartigit.

20, 21. Jehovap sumik iliuuseqannginnissarput kissaatigaa, ileqqupalaaqannginnissatsinnullu pissutaasoq pingaarutilik suua?

²⁰ “Asasakka, neriorsuutit tamakku pigigatsigit immitsinnik minguiarniarta, timimi anersaamilu minguk tamaat piiassavarput illernartuullutalu Guutimik mianerinninnermi.” (2 Kor 7:1) Jehovap timitta mingutsinnissaanik ‘anersaattalu’, tassa isiginnittaatsitta, ajortumik sunnertinnissaannik iliuuseqannginnissarput kissaatigaa. Taamaattumik timikkut isumakkullu ajoqutaasut ileqquliunnaveersaartariaqarpavut.

²¹ Biibilimi uagutsinnit ‘minguup tamaat piiarnissaanut’ pissutaasoq pingaarutilik eqqaaneqarpoq. Maluginiaruk versip qulaani issuarneqartup aallartinnerani ima allassimasoq: “Neriorsuutit tamakku pigigatsigit.” Suunuku neriorsuutit? Versini siulianiittuni Jehova ima neriorsuivoq: “Ilassiumaarpassi; ilissinnut ataataajumavunga.” (2 Kor 6:17, 18) Eqqarsaatigeriaruk: Jehovap neriorsorpaatit illersorumallutit ataataasullu ernerminik panimminilluunniit asanninneratut asajumallutit. Jehovalli neriorsuutini aatsaat eqquutissavai ‘timikkut anersaakkullu’ mingutsinnaveersaaruit. Minguttuumik sumilluunniit iliuuseqalernikkut ileqqoqalernikkulluunniit Jehovamut, Ataatannut qilammiusumut, attaveqarluarnerit naleqangaartoq annaagukku sianiitsuliornerungaassaaq!

22-25. Najoqqutassiat Biibilimeersut suut minguttuunik iliuuseqarnaveersaarnissatsinnut iluaqutigisinnaavavut?

²² Jehova “Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit”.  (Matt 22:37) Jiisusip inassut tamanna inassutit annersaattut eqqartorpaa. (Matt 22:38) Jehova taamatut uagutsinnit asaneqartariaqarpoq. Uummatikkut, tarnikkut isumakkullu iluunngarluta Pinngortitsiserput asassagutsigu inuunikillisitsisinnaasunik imaluunniit eqqarsarsinnaassuseqarpiarunnaalersitsisinnaasunik iliuuseqarnaveersaarlutalu ileqqoqarnaveersaartariaqassaagut.

²³ Jehova ‘tamanut inuunermik anersaartornermillu allanillu tamanik tunisisarpoq’. (ApS 17:24, 25) Inuuneq Guutimit tunissutaavoq. Tunisisoq asagatsigu tunissutaa eriagiumavarput. Iliuutsit ileqqulluunniit peqqissutsitsinnut ajoqutaasinnaasut suulluunniit maajugaavut paasigatsigu tamakku inuunermik ataqqinninngilluinnarnermut ersiutaasut. — Tuss 36:10.

²⁴ “Tullit ilittut asassavat.” (Matt 22:39) Inuup iliuusii ileqquilu minguttuut taassumunngaannaq sunniuteqaannaratik aammali amerlanertigut inunnut allanut sunniuteqartarput. Assersuutigalugu tupap pujuanik pujormiuneq pujortartanngitsunut ajoqutaasinnaavoq. Allanik ajoqusiisoq Guutip tullermik asanninnissamik peqqussutaanik unioqqutitsivoq. Guutilu asaneraraluarlugu iliuutsimigut allatorluinnaq ersersitsivoq. — 1 Joh 4:20, 21.

²⁵ “Eqqaasittassavatit qullersaasunut pisortaasunullu naalatsigiteqqullugit, taakkununnga maleruuteqqullugit.” (Tit 3:1) Nunani amerlasuuni aangajaarniutinik aalajangersimasunik peqarneq atuinerlu inerteqqutaavoq. Kristumiuugatta ilumoortut aangajaarniutit inerteqqutigineqartut pigineq aamma pineq ajorpavut. — Rom 13:1.

26. (a) Guutip asanninneraniittuinnarumalluta susariaqarpugut? (b) Sooq Guutip isaani minguitsuujuarnissaq inooriaasiua pitsaanerpaaq?

 ²⁶ Guutip asanninneraniittuinnarumalluta sutigut tamatigut minguitsuujuartariaqarpugut. Minguttuunik ileqqoqarunnaarnissaq iliuuseqannginnissarlu sapernarsinnaavoq, ajornanngilarli. * Minguitsuujuarutta pitsaanerpaamik inooriaaseqassaagut, Jehovammi uagutsinnut iluaqutaajuaannartunik ilinniartittarpaatigut. (Esaja 48:17 atuaruk). Pingaarnerpaamillu minguitsuujuarnitsigut Guutimut asasatsinnut ataqqinartitseqataanerput nuannaarutigisinnaavarput, taamaalillutalu asanninneraniittuinnarsinnaavugut.